Halasyakhanda 28
Hālāsyakhaṇḍa 28
- Language
- Sanskrit
28.1
iti śrīskānde mahāpurāṇe agastyasaṃhitāyāṃ
hālāsyamāhātmye - ati varṣarakṣaṇaṃ nāma
pañcaviṃśo'dhyāyaḥ
ṣaḍviṃśodhyāyaḥ
20. siddhacaritam
agastyaḥ -
vakṣye yuṣmākamāścaryaṃ hālāsyeśakṛtaṃ dvijāḥ
citraṃ siddhacaritraṃ tacchṛṇudhvaṃ munipuṅgavāḥ
28.2
hālāsyavāsī devastu kanakācalakārmukaḥ
kartuṃ līlā vicitrāśca samartho bhaktavatsalaḥ
28.3
viśvakarmaviniṣpannavimānāvāsasupriyaḥ
mahadaiśvaryadānārthaṃ madhurāpuravāsinām
28.4
tasyābhiṣekapāṇḍyasya mahābhaktiyutasya ca
dātuṃ sarvārthasiddhīśca siddhaveṣaṃ samagrahīt
28.5
kaṭakābhyāṃ nūpurābhyāmalaṅkṛtya padadvayam
ācchādanañca kaupīnaṃ dhṛtvā śārdūlacarmaṇā
28.6
khaṭvāṅgavilasatpāṇirbhasmoddhūlitavigrahaḥ
bhasmadhārābhirāmāṃso mahāmerusamunnataḥ
28.7
sarpasannaddhakapilahrasvakuñcitasañjaṭaḥ
atyantaśuddhasphaṭikakuṇḍalābhyāṃ manoharaḥ
28.8
mandasmitalasadvaktraḥ kundakudmaladantavān
śubhrābhirasthimālābhirveṣṭya ca kalebaram
28.9
vicitrauḍyāṇabandhena kaṭīśobhāṃ vidhāya ca
ṣoḍaśābdākṛtissaumyo yogapaṭṭaṃ samudvahan
28.10
vetrañca kāñcanamayaṃ dhṛtvā dakṣiṇapāṇinā
siddhassanmadhurāvīthyāṃ carati sma mudānvitaḥ
28.11
ye ye janāssamāhūya taṃ siddhaṃ paripūjya ca
prārthayanti ca yadvastu tebhyastebhyo dadāti tat
28.12
kecidvṛddhāstadāgatya jarjarīkṛtavigrahāḥ
nirdantāḥ kāśakeśāśca prārthayanti sma yauvanam
28.13
divyayā vetrayaṣṭyā ca teṣāṃ mūrdhasu saṃspṛśan
yuvatvaṃ pradadau tebhyo mahāsiddho maheśvaraḥ
28.14
vandhyāḥ kāścitsamāyātāśśrutvā siddhasya vaibhavam
tāsāṃ phāle bhasma datvā garbhiṇīstāścakāra saḥ
28.15
andhāśca badhirāścānye samājagmussasambhramam
tebhyaścāñjanadānena taddoṣaṃ harati sma saḥ
28.16
paṅgavaḥ pāṇihīnāśca kubjāścānye samāyayuḥ
bhasmavetraprahārābhyāṃ rakṣayāmāsa tānmudā
28.17
bhūtapretapiśācādyaiḥ pīḍitā bahavo janāḥ
āgatya dṛṣṭvā taṃ siddhaṃ vimuktā vividhāpadaḥ
28.18
kuṣṭhamaṣṭādaśavidhaṃ parihṛtya ca bhasmanā
kuṣṭhavyādhiyutānāñca karoti sma mahatpriyam
28.19
śiraḥkarṇākṣirogārttā jvaragulmādipīḍitāḥ
sarve nīrogatāṃ prāpustatsiddhasya kaṭākṣataḥ
28.20
dāridryakarśitāntāñca janānāṃ bhavanāni ca
dhanadhānyasamṛddhāni siddheśena kṛtāni ca
28.21
vaśyavādavayaḥstambhānadṛśyākarṣaṇāñjanam
evaṃ vakāratritayaṃ akāratritayaṃ tathā
28.22
yṝnāñca darśayitvā tānmohayāmāsa santatam
indrajālamahājālapramukhāni mahānti ca
28.23
vicitrāṇi ca karmāṇi darśayāmāsa vai muhuḥ
vaśyākarṣaṇavidveṣastambhanoccāṭanādibhiḥ
28.24
vaśīkṛtā janāssarve śambhunā siddharūpiṇā
aśvāṃśca rāsabhākārānaśvākārāṃśca rāsabhān
28.25
biḍālāṃśca mahāvyāghrān punarvyāghrānbiḍālakān
vṛddhāṃśca bālarūpeṇa bālānvṛddhasvarūpataḥ
28.26
evaṃ bahuvidhaṃ karma kṛtvā viharati sma saḥ
puropavanamāsādya tatra citrāṇyadarśayat
28.27
lāṅgalīvṛkṣavṛndvāni tālavṛkṣān karoti ca
tālāṃśca lāṅgalīvṛkṣān punarapyakarotprabhuḥ
28.28
evaṃ vṛkṣaviparyāsaṃ kṛtvā'nekaprakārataḥ
apuṣpitān puṣpitāṃśca saphalānaphalānapi
28.29
unnatānapi nīcāṃśca hrasvānatyunnatānapi
pūgapunnāgapanasasahakārādipādapān
28.30
iti kṛtvā vegavatīṃ nirjalāṃ sajalāṃ vyadhāt
bhūyaśca nirjalāṃ kṛtvā krīḍayāmāsa tairjanaiḥ
28.31
dūrasthaṃ parvatamapi samīpasthamivākarot
samīpasthaṃ parvatañca dūrasthitamivākarot
28.32
rātricihnāni sarvāṇi divākāle'pyadarśayat
divā cihnāni rātrau ca darśayāmāsa sa prabhuḥ
28.33
khadvāṅgamambare sthāpya tasmin sūcīṃ nidhāya ca
pādāṅguṣṭhāgratastasyāṃ sthitvā bhramaṇamātanot
28.34
punastasyāṃ śiraḥsthāpya pādāvūrdhvaṃ prasārya ca
vegāccakāra bhramaṇaṃ siddho vismāpayañjanān
28.35
punassiddhaḥ khecarassan cacāra vihagendravat
atha meghapathaṃ gatvā kālameghaṃ sugarjitam
28.36
ākṛṣya bhujadaṇḍābhyāṃ vegātprāpya mahītalam
darśayitvā janānāṃ taṃ vidyunmālāvibhūṣitam
28.37
paścānmumoca taṃ meghaṃ so'pi svapadamāyayau
anyāṃśca khecarān sarvān balādākṛṣya bhūtale
28.38
punarmuñcati tān sarvān bhītyā dhāvanti te drutam
divyāñjanapradānena bhūgatāni bahūni ca
28.39
anargharatnakanakakaladhautamukhāni ca
vividhāni ca vastūni siddho vyaktīcakāra ca
28.40
agnistambhajalastambhavāyustambhamukhāḥ kriyāḥ
catuṣṣaṣṭikalāścānyāḥ sarvā vidyāḥ pradarśitāḥ
28.41
apekṣitāni vastūni bhogamokṣaparāyaṇaiḥ
yāni tāni ca sarvāṇi siddho'yatnāddadau prabhuḥ
28.42
vedaśāstrapurāṇādividyāḥ sarvārsaslakṣaṇāḥ
vasantu jihvāsvasmākamiti vavruśca kecana
28.43
teṣāṃ dvijānāṃ jihvāsu bhasmāṇukṣepamātrataḥ
sarvavidyāssamabhavanvicitraṃ kimataḥ param
28.44
ye vṛddhā yauvanaṃ prāptāsteṣāṃ patnyassamāyayuḥ
dadau ca tāsāṃ tāruṇyaṃ rūpalāvaṇyasaṃyutam
28.45
antarvatnyassamabhavan punastāssiddhavaibhavāt
evamanyānyanekāni darśitānyadbhutāni ca
28.46
kaśśaktastāni sarvāṇi vaktuṃ vāgīśvaraṃ vinā
saṃpaśyatāṃ janānāntu paramānandadāni ca
28.47
evaṃ vicitrakarmāṇi kṛtvā saṃcarati sma saḥ
sthūlaḥ kadācitkṣīṇaśca kṣaṇaṃ dīrgho'tha vāmanaḥ
28.48
adṛśyaśca kṣaṇaṃ dṛśyastejasvī māyayā vṛtaḥ
janairapūrvavastūni tapobhirdurlabhāni ca
28.49
prārthitāni ca sarvāṇi pradadau sa kṛpānidhiḥ
sarvasiddhipradaṃ siddhaṃ sarvasadguṇasaṃyutam
28.50
śāntaṃ kāruṇyasampūrṇaṃ janā dṛṣṭvā'tivismitāḥ
āścaryāṇyevamālokya vartante smāsya pārśvataḥ
28.51
rājā'bhiṣekapāṇḍyo'pi śrutvā siddhasya vaibhavam
svajanān preṣayāmāsa kāṃścitkarmakarān śiśūn
28.52
yena kena prakāreṇa siddhaṃ darśayateti me
udyuñjate grahītuṃ taṃ janatā sā tu tadvaśā
28.53
tatkṛtāni vicitrāṇi vilokyātīva vismitā
carati sma mudāyuktā tasya siddhasya pṛṣṭhataḥ
28.54
iti siddhasya caritaṃ śṛṇoti paṭhatīha yaḥ
tasya sarvāṇi saukhyāni vardhante sarvasampadaḥ
28.55
evaṃ viṃśā tu līleyaṃ sundareśamaheśituḥ
śrutā vā paṭhitā vāpi sarvasaukhyapradāyinī
Linked texts (3)
- Hālāsyairmāhātmya — Sanskrit
- Hālāsyamāhātmya — Sanskrit
- Hālālasyamāhātmya — Sanskrit