Pramāṇa · Search · About · API

Halasyakhanda 35

Hālāsyakhaṇḍa 35

Language
Sanskrit

35.1

iti śrīskānde mahāpurāṇe agastyasaṃhitāyāṃ
hālāsyamāhātmye - pitṛghnadoṣahananaṃ nāma
dvātriṃśo'dhyāyaḥ
trayastriṃśo'dhyāyaḥ
27. siddhāṅgacchedanam
agastyaḥ -
aṅgaṃ chittvā caṇḍikeśo līlāṃ yāmakarotprabhuḥ
tāṃ līlāṃ sampravakṣyāmi samastāpatprabhañjanīm

35.2

purā''sīnmadhurāpuryāṃ kaścidāyudhaśikṣakaḥ
śikṣayitvā yāmamātraṃ bhaṭān pratidinaṃ sa vai

35.3

pradakṣiṇanamaskārastotrairīśamatoṣayat
tasmāttu bahavo yodhāśśikṣāṃ prāpya mudānvitāḥ

35.4

dakṣiṇāñca yathāśakti datvā vṛttiñca lebhire
kaścicchiṣyaḥ pāpabuddhissiddhārakhyaścānusṛtya tam

35.5

asidhenumukhā vidyāssākalyena gṛhītavān
asāvṛjutvādācāryyaśikṣayāmāsa taṃ punaḥ

35.6

sa tadā pūrṇavidyatvāt nirapekṣatayā'nvitaḥ
śālāṃ śramāya kṛtvā'thāśikṣayadbahulām bhaṭān

35.7

purā'muṣya hi sacchātrā bhaṭāḥ krodhaṃ sametya ca
ācāryaṃ codayāmāsurevamuktvā punaḥ punaḥ

35.8

pratiśramakuṭīṃ kṛtvā yuṣmacchālāsamāgatān
sa siddhārakhyo bahūn śiṣyān yuṣmadīyānsamagrahīt

35.9

śrutveti nirvikārassan guṇitvāddhartate sma saḥ
chadmanā sa bhaṭo nityamācāryyagṛhametya ca

35.10

ācāryyagṛhiṇīṃ prāpya brūhi me'vasaro'sti kim
na veti sma prārthayati manmathādhīnamānasaḥ

35.11

asyāśayamanubuddhvā sā na jānāmītyabhāṣata
yāteṣvevaṃ katipayadineṣu sa bhaṭādhamaḥ

35.12

vaijanyamavalokyāśu kadācittāṃ samagrahīt
dhikkṛtyānādarātsādhvī taṃ prabhartsyālayaṃ gatā

35.13

vañcanāmapamānaṃ ca matimānna prakāśayet
iti niścitya citte tu bhartrā saha na sā'bravīt

35.14

hālāsyanāyako devo bhaktānāṃ hitakṛtsadā
bhaṭaṃ siddhārakhyamabhyetya prāhācāryaśarīradhṛt

35.15

tvaṃ yuvā'hañca vṛddho'dya tathā'pyāvāṃ samudyatau
aṅkamekaṃ kariṣyāvaścaṇḍikā parameśvarī

35.16

tava vā mama vā sadyaḥ kāryasiddhiṃ kariṣyati
tiṣṭhātra vanitā cettvaṃ pumāṃścedutthito bhava

35.17

tacchrutvā kupito bhūtvā phalakākhaḍgasaṃyutaḥ
vṛddhaṃ sadyaḥ prahartuṃ tamudyukto'bhūtsa pāpadhīḥ

35.18

ācāryaveṣadhārī ca bhaktavatsala īśvaraḥ
phalakākhaḍgapāṇissan śiṣyairanyairjanairvṛtaḥ

35.19

viśālaṃ deśamāsādya vidhinā pūjya caṇḍikām
ātmīyamaticitrañca darśayitvā'tha vikramam

35.20

siddhāgamanaparyantaṃ kālakṣepañcakāra ha
sadyassaṃsnāya bhuktvā ca siddho'laṅkāraveṣavān

35.21

gṛhītvā phalakākhaḍgaṃ javātprāpa tadantikam
hantumekaprahāreṇa śaktassundaranāyakaḥ

35.22

lokatuṣṭiṃ prakurvāṇassaṃvyāsavyakrameṇa tu
bhramaṇaṃ bahudhā kṛtvā punarhantuṃ samudyataḥ

35.23

ācāryapatnīsvīkāraścikīrṣormanasastyalam
prahṛtya pūrvaṃ tasyāstu pāṇisparśanalolupam

35.24

chitvā pāṇiñca jihvāñca siddhasyāsatpralāpinīm
mānonnataṃ śirastasya ciccheda karavālataḥ

35.25

praśaśaṃsurjanāssarve tamācāryaṃ laghukriyam
tadānīṃ paśyatāmeva sarveṣāṃ sa tirodadhe

35.26

vismitāste bhaṭāssarve prāpyācāryasya mandiram
kvācārya iti papracchurvanitāṃ ratnaśālinīm

35.27

adhunā sundaraṃ nantumagacchaditi sā'bravīt
kimetaditi sarve te cānyonyamativismitāḥ

35.28

tatra sambhūya tiṣṭhanti samācāryabhavanāṅgaṇe
natvā sundaranāthaṃ tamācāryo gehamāyayau

35.29

dṛṣṭvā janān sa kiṃ yūyamāgatā iti pṛṣṭavān
yuṣmaddveṣadharaḥ kaścittaṃ yuṣmatparipanthinam

35.30

hatvā siddhaṃ tirobhūta iti sarve tamabruvan
tacchrutvā kāraṇājñānāttūṣṇīṃ tasthau niruttaraḥ

35.31

durvṛttena ca siddhena kṛtaṃ karmātininditam
vivicyakathayatpatnī vallabhopahare tadā

35.32

tacchrutvā'tha vinirgatya gehātsundaranāyakam
samprāpya bhaktibhāreṇa praṇipatya punaḥ punaḥ

35.33

iti samprārthayāmāsa sāñjalirasannidhau sthitaḥ
sundareśa mahādeva bhagavan bhaktavatsala

35.34

tvatpādapaṅkaje bhaktiṃ datvā māṃ rakṣa sarvadā
bhuktimuktikarīṃ sadyassamastaduritāpahām

35.35

sarvaśatrukṣayakarīṃ bhaktiṃ datveśa pāhi mām
ajñānavinihantrīñca sadā sujñānadāyinīm

35.36

bhaktiṃ pradāya māṃ rakṣa bhagavan pādapaṅkaje
sālokyādipadaprāptimūlabhūtāṃ supuṇyadām

35.37

mahāpātakasaṅghaghnīṃ bhaktiṃ datvā ca pālaya
dharmamarthañca kāmaṃ ca mokṣaṃ yā samprayacchati

35.38

datvā tāṃ bhaktimatulāṃ pāhi māṃ karuṇānidhe
iti vijñāpya devasya sundareśasya sannidhau

35.39

annācāryaḥ punaḥ prāha kṛpāṃ śambhorvicārya ca
tvayi me'timitā bhaktiramitā te kṛpā mayi

35.40

phalgutvaṃ ca prabhutvaṃ ca budhairnirṇītamāvayoḥ
tasmāttvaṃ pūrṇakṛpayā bhaktileśāṃśa saṃyutam

35.41

pāhi pāhi mahādeva kadambavananāyaka
karuṇāmṛtasaṃpūrṇa tvatkaṭākṣāvalokanāt

35.42

madīyavaṃśasambhutān sarvadā pālaya prabho
iti samprārthya saṃjapya śrīmatpañcākṣaraṃ śatam

35.43

bhavanaṃ gantumudyukte śastravidyāvicakṣaṇe
tadvṛttāntaṃ janaiśśrutvā kautūhalasamanvitaḥ

35.44

kulottuṅgamahīpālassamāgatya tadantikam
adhiropya gajaskandhe devavatparipūjya tam

35.45

vividhāni ca ratnāni bhūṣaṇānyambarāṇi ca
pradāya sakalatrāya dhanāni subahūni ca

35.46

praśaṃsan tasya māhātmyaṃ rājā svālayamāyayau
svakīyaṃ bhavanaṃ prāpya śastravidyāvicakṣaṇaḥ

35.47

kalatreṇa samāyuktaściraṃ jīvati saṃpadā
saptaviṃśā tu līleyaṃ sarvasaubhāgyadāyinī

Linked texts (3)