Pramāṇa · Search · About · API

Halasyakhanda 4

Hālāsyakhaṇḍa 4

Language
Sanskrit

4.1

sakṛcchravaṇataḥ puṃsāṃ bhuktermukteśca kāraṇam
iti śrīskānde mahāpurāṇe agastyasaṃhitāyāṃ
hālāsyamāhātmye kṣetratīrthamāhātmyaṃ nāma
dvitīyo'dhyāyaḥ
tṛtīyo'dhyāyaḥ
sundareśasya līlāḥ
agastyaḥhālāsyeśvaraliṅgasya māhātmyaṃ paramādbhutam
vakṣyāmi saṅgraheṇātha śṛṇvantu munipuṅgavāḥ

4.2

merumandarakailāsakāśīśrīparvatādiṣu
śivakṣetreṣu sarveṣu mahāsiddhipradeṣu ca

4.3

svāyambhuvāni liṅgāni na bhavanti yadā purā
tadā''virāsīttalliṅgaṃ kadambavanamadhyake

4.4

tasmādanena sadṛśaṃ liṅgamantyapurātanam
śrutismṛtipurāṇeṣu nāsti nāsti munīśvarāḥ

4.5

umayā nityasambandhāt sundaratvātsvabhāvataḥ
somasundarasaṃjñāntu purā cakrurdivaukasaḥ

4.6

liṅgānāṃ mūlabhūtatvānmūlaliṅgamiti smṛtam
svāyambhuvaṃ tu talliṅgaṃ viśvaṃ vyāpya vyavasthitam

4.7

tasmānnetraprahārastu sarvatra paridṛśyate
liṅgānāṃ vyaṣṭibhūtānāṃ samaṣṭau somasundare

4.8

sevite śraddhayā sārdhaṃ sarvakṣetragatāni ca
liṅgāni sevitāni syunartrā kāryā vicāraṇā

4.9

vṛkṣasya mūlasekena śākhāḥ puṣṭiṃ yathā yayuḥ
mūlaliṅge pūjite tu pūjitānyakhilāni ca

4.10

catuṣṣaṣṭividhā līlā yenākāri dayālunā
tenaiva sadṛśo devo na bhūto na bhaviṣyati

4.11

mṛtyuñjayopadeśena bhāradvājasya pakṣiṇaḥ
sarvebhyaḥ pakṣijātebhyaḥ śreṣṭhatvaṃ yaḥ prayacchati

4.12

tenaiva sadṛśo devo na bhūto na bhaviṣyati
koyaṣṭerapi nirvāṇapradānaṃ yena kāritam

4.13

tenaiva sadṛśo devo na bhūto na bhaviṣyati
mahyañca drāviḍaṃ sūtramupadiṣṭaṃ salakṣaṇam

4.14

tenaiva sadṛśo devo na bhūto na bhaviṣyati
piṭṭārthamuttamāṅgena mṛdbhāraṃ yo dadhāra ca

4.15

tenaiva sadṛśo devo na bhūto na bhaviṣyati
sṛgālānāmaśvarūpaṃ parikalpya svamāyayā

4.16

vikrīṇāti ca tānaśvān pāṇḍyabhūpāya yaśśivaḥ
tenaiva sadṛśo devo na bhūto na bhaviṣyati

4.17

śūleṣvāropitā yena kṣapaṇā vedanindakāḥ
tenaiva sadṛśo devo na bhūto na bhaviṣyati

4.18

yo varāhaśiśūnāñca stanyandatvā surakṣati
tenaiva sadṛśo devo na bhūto na bhaviṣyati

4.19

atassarvaissusaṃsevyaṃ sarvaliṅgamayaṃ param
dharmārthakāmamokṣāṇāmādhāraṃ paramārthataḥ

4.20

yajñānāmaśvamedhaśca parvatānāṃ himālayaḥ
vratānāṃ somavāraśca mantrāṇāñca ṣaḍakṣarī

4.21

dānānāmannadānañca varṇānāṃ brāhmaṇo yathā
pātrāṇāṃ śivabhaktaśca dharmāṇāṃ śivadharmavat

4.22

devatānāṃ mahādevo vṛkṣāṇāṃ tu suradrumaḥ
dhenūnāṃ kāmadhenuśca tīrthānāṃ hemapadminī

4.23

cintāmaṇistu ratnānāṃ yathā mukhyaḥ prakīrtitaḥ
tathā sarveṣu liṅgeṣu liṅgaṃ svāyambhuvaṃ mahat

4.24

svāyambhuveṣu liṅgeṣu somasundarasaṃjñikam
bhūlokaśivalokeśaṃ proktaṃ mukhyatamaṃ tviti

4.25

talliṅgaṃ tu paraṃ jyotistalliṅgaṃ tu parātparam
talliṅgaṃ jagatāṃ mūlaṃ talliṅgaṃ sarvasiddhidam

4.26

anugrahāya lokānāṃ niṣkalaḥ paramaśśivaḥ
śrīhālāsye liṅgarūpī sānnidhyaṃ kurute sadā

4.27

svāyambhuvāni cānyāni yāni liṅgāni sarvataḥ
tāni sarvāṇi cāyānti draṣṭuṃ hālāsyasundaram

4.28

yena dṛṣṭaṃ mahāliṅgaṃ bhaktyā vimalayā dṛśā
sākṣātkāreṇa giriśo dṛṣṭa eva na saṃśayaḥ

4.29

bhānūdaye tamāṃsīva siṃhāgre tu yathā gajāḥ
ajñānāni śivajñānānnāgāstārkṣyavilocanāt

4.30

mahāvātahatā meghāśśailā vajrahatā yathā
tathā naśyanti pāpāni hālāsyeśvaradarśanāt

4.31

kāmena ca yathā buddhiḥ kopena ca yathā tapaḥ
garveṇa ca yathā vidyā rogo divyauṣadhena ca

4.32

lobhena sadguṇo yadvat tūlaśailaḥ sphuliṅgataḥ
praṇaśyanti tathā doṣāssomasundaradarśanāt

4.33

hālāsyeśaṃ mahāliṅgaṃ dṛṣṭvā prātassakṛnnaraḥ
catussamudraparyantabhūmidānaphalaṃ labhet

4.34

madhyāhne tu sakṛddṛṣṭvā jīvanmuktipureśvaram
sahasrakapilādānaphalaṃ prāpnoti mānavaḥ

4.35

sāyaṃkāle sakṛddṛṣṭvā kadambavananāyakam
gavāṃ koṭipradānasya phalaṃ martyassamaśnute

4.36

arddhayāme sakṛddṛṣṭvā catuṣkūṭapureśvaram
aśvamedhādiyajñānāṃ phalaṃ prāpnoti bhaktimān

4.37

evaṃ vicārya matimān puṇyādhikyaṃ dine dine
samaṣṭividyānagarīnāthaṃ velāsu tāsu ca

4.38

pradakṣiṇanamaskārastotrādyaissevate ca yaḥ
sarvapāpavinirmuktaḥ sarvaiśvaryasamanvitaḥ

4.39

iha bhuktvā mahābhogān sāyujyaṃ labhate janaḥ
śravaṇāttasya liṅgasya daśajanmārjitaṃ tvagham

4.40

avaśyaṃ vilayaṃ yāti vahninā tūlarāśivat
smaraRootnmūlaliṅgasya pātakaṃ śatajanmajam

4.41

avaśyaṃ naśyati kṣipraṃ tamassryodaye yathā
hālāsyeśvarasevārthaṃ gṛhānniṣkramaṇe kṛte

4.42

sahasrajanmajanitaṃ pātakaṃ tu vinaśyati
kadambavananāthasya darśanāt liṅgarūpiṇaḥ

4.43

aśvamedhasahasrasya sukṛtaṃ bhajate janaḥ
stotrairvā rudrasūktairvā stute hālāsyasundare

4.44

rājasūyasahasrasya phalaṃ bhavati sarvadā
culukodakamātreṇa talliṅgaṃ snāpayettu yaḥ

4.45

anyatra hemakalaśamahāsnānaphalaṃ labhet
vidhāya mahatīṃ pūjāṃ pañcagavyapurassaraiḥ

4.46

pañcāmṛtaiśca śuddhodairgandhādyairbhaktimānnaraḥ
hālāsyeśasya labhate puruṣārthacatuṣṭayam

4.47

vastrapūtairjalaiḥ snāpya talliṅgaṃ bhaktitaḥ sakṛt
lakṣāśvamedhajanitaṃ puṇyaṃ prāpnoti mānavaḥ

4.48

candracandanakastūrīkuṅkumairvā mṛgodbhavaiḥ
sugandhairvā samālipya sakṛtkarpūrasundaram

4.49

ālipyate divyagandhaissuvastraiśca mahādarāt
ekapuṣpapradānācca mūlaliṅge munīśvarāḥ

4.50

anyatra śatasauvarṇaṃ puṣpapūjāphalaṃ labhet
sakṛddhūpapradānena kṣamate somasundaraḥ

4.51

sahasramaparādhānāṃ dayālutvātsvabhāvataḥ
karpūravartidīpena sakṛddattena bhaktitaḥ

4.52

karpūranirmalatanurbhavetphālavilocanaḥ
datvā naivedyamātraṃ tu sikthe sikthe yugaṃ yugam

4.53

śivaloke vaseddhīmānmahābhogasamanvitaḥ
hālāsyeśāya tāmbūlaṃ yo dadyālliṅgamūrtaye

4.54

varṣakoṭiśataṃ divyaṃ śivaloke mahīyate
somasundarapūjāyai yo dadyādbhaktiyogataḥ

4.55

ghaṇṭābhiṣekakalaśadhūpadīpādipātrakam
sa muktassarvapāpaiśca sarvān kāmānavāpnuyāt

4.56

nṛttaṃ gītañca vādyaṃ ca talliṅgaprītaye vyadhāt
tasyāgratassadā kālaṃ bhavettauryatrikaṃ mahat

4.57

hālāsyeśaṃ sakṛnnatvā daṇḍavatpṛthivītale
trailokyavanditapado jāyate vasudhādhipaḥ

4.58

japo homastapo dānaṃ hālāsyeśasya sannidhau
kṛtamalpaṃ mahāpuṇyaphaladaṃ syānna saṃśayaḥ

4.59

samaṣṭividyānagarīnāyakasya mahāprabhoḥ
śambhormāhātmyamakhilaṃ ko vā vaktuṃ vicakṣaṇaḥ

4.60

kadambakāntārasamaṃ tapovanaṃ hiraṇyapadmākaratulyatīrthakam
samaṣṭividyānagarīmaheśiturliṅgena sāmyaṃ na hi liṅgamanyat

4.61

mūlabhūtaṃ mahāliṅgaṃ śrīmaddhālāsyasundaram
karpūrasundarañceti kadambavanasundaram

4.62

kalyāṇasundarañcābhiṣekasundaramityapi
sundareśaṃ mṛgamadasundaraṃ somasundaram

4.63

satsundaraṃ janavadhabhītasundaramityapi
ādisundaramānandasundaraṃ devasundaram

4.64

cāmpeyasundarañceti pāṇḍyasundaramityapi
samaṣṭividyānagarīnāyakaṃ madhurādhipam

4.65

kanyakānagarīnāthaṃ catuṣkūṭapureśvaram
bhūlokaśivalokeśaṃ jīvanmuktipureśvaram

4.66

evamādyairnāmadheyaiḥ stuvanti munipuṅgavāḥ
kadambavanyāṃ śivarājadhānyāṃ sudhāmayaṃ yattu śivasya liṅgam
āsaptapātālatalātsvayambhu samutthitaṃ tajjagatāṃ hitāya

4.67

liṅgasya māhātmyamidaṃ yathoktaṃ skandena cāsmadgururūpiṇaiva
tathaiva coktaṃ tu mayā samastaṃ munīśvarā vo jagatāṃ hitāya

4.68

ityukte kumbhasambhūte vasiṣṭhādyā munīśvarāḥ

4.69

hālāsyeśakṛtā līlāśśrotukāmāḥ parasparam
vicārya śraddhayā yuktāḥ prārthayanti ghaṭodbhavam

4.70

munayaḥbhagavan sarvaśāstrārthaparijñānavatāṃ vara
śrutvā ca kṣetramāhātmyaṃ tīrthaśreṣṭhasya vaibhavam

4.71

mūlaliṅgasya māhātmyaṃ śravaṇātsarvasiddhidam
asmākaṃ mahatī bhaktissañjātā somasundare

4.72

catuṣṣaṣṭividhā līlā yāḥ kṛtāstena śambhunā
bhavatā sūcitāssarvāstāḥ kramādadhunā vada

4.73

iti samprārthitassarvairmahātmā kumbhasambhavaḥ
līlānāñca catuṣṣaṣṭiṃ vaktumārabhate tadā

4.74

agastyaḥśṛṇvantu munayassarve mahābhāgyasamanvitāḥ
yāsāṃ śravaṇamātreṇa brahmahatyāpi naśyati

4.75

līlāstāḥ kramaśò vakṣye saṅgraheṇa munīśvarāḥ
hālāsyanāyako devo manovācāmagocaraḥ

4.76

brahmaviṣṇumahendrādyairvandyamānapadāmbujaḥ
dayālussarvabhūtānāmanugrahaparāyaṇaḥ

4.77

sarvajñassarvadevādiḥ saccidānandavigrahaḥ
aṇoraṇīyān sarvātmā mahīyānmahataḥ prabhuḥ

4.78

śrīmatkadambavipine śivakṣetrottame śubhe
sadā karoti sānnidhyaṃ liṅge svāyambhuvottame

4.79

himāṃśu vaṃśaprabhavāḥ pravarāḥ pāṇḍyabhūbhujaḥ
atīva bhaktisaṃyuktāḥ kadambavananāyake

4.80

sevāṃ pratidinañcakrustrividhaiḥ karaṇairdhanaiḥ
punaranye mahendrādyā bhaktiśraddhāsamanvitāḥ

4.81

pūjayanti mahāliṅgaṃ tridaśāssarvasiddhaye
teṣāṃ parabhayā bhaktyā parituṣṭaḥ parātparaḥ

4.82

cakāra vividhā līlāḥ svabhaktānāṃ hitāya ca
kṛte ṣoḍaśalīlāśca tretāyāmapi ṣoḍaśa

4.83

dvāpare ṣoḍaśa tathā ṣoḍaśaiva kalau yuge
evaṃ līlāścatuṣṣaṣṭistāsāṃ krama ihocyate

4.84

liṅgānāmādibhūtasya kadambavanavāsinaḥ
somasundaranāthasya sumīnākṣīpateḥ prabhoḥ

4.85

vicitrāśca pavitrāśca catuṣṣaṣṭiśca saṃkhyayā
yā līlā lokavikhyātāstāsāṃ krama ihocyate

4.86

prathamā prathitā līlā vṛtrārervṛjināpahā
dvitīyā sā muneśśāpānmuktirairāvatasya ca

4.87

tṛtīyā sā nīpavavyāmakaronmadhurāpurīm
taṭātakāyā jananañcaturthī vidadhāti sā

4.88

pañcamyāṃ pāṇḍyadevena kṛtaṃ tatpāṇipīḍanam
ṣaṣṭhīśanṛttaṃ suvyaktaṃ svamitrasya patañjaleḥ

4.89

saptamī sā kuṇḍakukṣerahlādanaśaktidā
abhragatāṃ nadīṃ tasmai darśayāmāsa sā'ṣṭamī

4.90

līlā sā navamī saptasāgarānayanakṣamā
daśamī tridivādbhūmimānayanmalayadhvajam

4.91

ugra ityugratanaya ekādaśyā tayā'jani
dvādaśī sā dadau tasmai valayādyāyudhatrayam

4.92

trayodaśī karoti sma śaktyā sāgaratāḍanam
caturdaśī vṛtrahantuḥ kirīṭamabhinaddṛḍham

4.93

hemādrerhemajātaṃ yadrājñe pañcadaśī dadau
vyaktīkaroti vedārthān munibhyaṣṣoḍaśī tu sā

4.94

rājñe saptadaśī līlā kirīṭārthamadānmaṇīn
meghaissāgarapānañca cakārāṣṭadaśī tu sā

4.95

meghairekonaviṃśatyā tvativṛṣṭirnivāritā
viṃśallīlā tanoti sma vicitraṃ siddhavaibhavam

4.96

jagrāha grāvadantīkṣumekaviṃśatilīlayā
dvāviṃśallīlayā nagnamātaṅgo maraṇaṃ gataḥ

4.97

dvijakanyā'nugraho' bhūttrayoviṃśatilīlayā
vyatyastaṃ nṛttamabhavaccaturviṃśatilīlayā

4.98

dvijasya pañcaviṃśatyā vadhūvadhanirūpaṇam
mātṛjāraṃ pitṛghnaṃ taṃ ṣaḍviṃśatirapālayat

4.99

bhaṭārthaṃ saptaviṃśatyā tvaṃkaṃ chitvā'jayacchivaḥ
praśāntamaṣṭāviṃśatyā nagnanāgabhavaṃ viṣam

4.100

ekonatriṃśikā līlā nagnadhenumapātayat
triṃśikā pāṇḍyasenānyaṃ pātuṃ sainyamadarśayat

4.101

rājño hemamayī nīvī tvekatriṃśikayā'jani
dvātriṃśikā vaiśyavīthyāṃ kartrī valayavikrayam

4.102

yakṣastrībhyastrayastriṃśallīlā siddhyaṣṭakaṃ dadau
colendrāya catustriṃśallīlā dvāravibhedinī

4.103

pānīya pāṇḍyasenāyai sā pañcatriṃśikā tvadāt
ṣaṭtriṃśikā puṣpavane rasavādamadarśayat

4.104

saptatriṃśikayā colamaśvasādī haro'jayat
aṣṭatriṃśikayā cāsīdvṛṣalastvakṣayākṣataḥ

4.105

navādhikā triṃśikā sā'karodvaiśyavaṭojayam
rājñaścatvāriṃśikā tu brahmahatyārtināśinī

4.106

ekacatvāriṃśikayā kāṣṭhabhāraṃ haro dadau
dvicatvāriṃśikā ceraṃ prati śrīpatrikāmadāt

4.107

bhadrāya phalakādānaṃ tricatvāriṃśikā'karot
catuścatvāriṃśikā tu tatkaḷatrajayapradā

4.108

pañcacatvāriṃśikā tu kolapotānapālayat
ṣaṭcatvāriṃśikā teṣāṃ sacivatvaṃ prayacchati

4.109

saptacatvāriṃśikayā khañjarīṭo'jayadripūn
aṣṭacatvāriṃśikā sā koyaṣṭerapi muktidā

4.110

ekonapañcāśikayā purasīmā sphuṭīkṛtā
pañcāśikā'jayaccoḷamīśanāmāṅkasāyakaiḥ

4.111

ekapañcāśikā līlā saṅkhibhyassaṅghapīṭhadā
dvipañcāśikayā śambhurviprāya svāṃ kṛtiṃ dadau

4.112

tripañcāśikayā devo nakkīraṃ rakṣati sma ca
catuḥpañcāśikā kartrī tasmai sūtropadeśanam

4.113

prabandhatāratamyañca pañcapañcāśikā'karot
prāpottaraśrīhālāsyaṃ ṣaṭpaṃcāśikayā haraḥ

4.114

saptapañcāśikā dāśakanyākalyāṇakāriṇī
aṣṭapañcāśikā dīkṣāṃ kartrī vātapureśituḥ

4.115

ekonaṣaṣṭiḥ kurute rājñe māyāśvavikrayam
ṣaṣṭiśca nadyākṛṣṭiṃ cākarotpherutvamarvaṇām

4.116

ekaṣaṣṭyā tu piṣṭārthaṃ mṛdbhāramavahacchivaḥ
dviṣaṣṭiḥ kubjapāṇḍyasya jvarapīḍānivāriṇī

4.117

triṣaṣṭyā taruśūlaiśca nagnān saṃharatīśvaraḥ
catuṣṣaṣṭiścamīkūpaśaṅkarān sākṣiṇo'nayat

4.118

evaṃ catuṣṣaṣṭividhā līlā nīpāṭavīpateḥ
śṛṇvantaśca paṭhantaśca labhante sakalepsitam

4.119

saṅgrahaślokamātraṃ ye līlānāṃ kālavairiṇaḥ
japtvā kurvanti yatkāryaṃ tasya siddhiṃ prayānti te

4.120

iti hālāsyanāthasya līloddeśa udāhṛtaḥ
punastā ānupūrvyeṇa līlā vakṣye tvanukramāt

4.121

yayā tu līlayā mukto devendro vṛtrahatyayā
tāṃ śṛṇudhvaṃ muniśreṣṭhāḥ śravaṇāttu śivapradām

4.122

itīdaṃ liṅgamāhātmyaṃ līloddeśasamanvitam
sakṛtsamāhitāssanto ye śṛṇvanti paṭhanti vā

4.123

te mahāpāpanirmuktāḥ sarvān kāmānavāpya ca
labhante śivasāyujyamante śambhoranugrahāt

Linked texts (1)