Pramāṇa · Search · About · API

Halasyakhanda 40

Hālāsyakhaṇḍa 40

Language
Sanskrit

40.1

iti śrīskānde mahāpurāṇe agastyasaṃhitāyāṃ
hālāsyamāhātmye - nīvīdānaṃ nāma
saptatriṃśo'dhyāyaḥ
aṣṭatriṃśo'dhyāyaḥ
32. valayavikrayaṇam
agastyaḥbhūlokaśivalokeśaḥ śambhurvalayavikrayam
yayā'karollīlayā ca yuṣmākaṃ prabravīmi tām

40.2

purā bhikṣāṭanaṃ kartuṃ pravṛtte somasundare
devadāruvanaṃ prāpte munipatnyassumohitāḥ

40.3

sundareśasya saundaryaṃ manojātimanoharam
samīkṣya tasya saṃsparśaṃ lubdhā api na lebhire

40.4

kaṭhorakucabhārāstāḥ kamanīyakalebarāḥ
munipatnyaśca kalitavalayāmbarakuntalāḥ

40.5

manobhavaśaravrātaśakalīkṛtavakṣasaḥ
tasyānudhāvanaṃ cakruḥ pṛṣṭhataḥ pārśvayoḥ puraḥ

40.6

tapasvin tiṣṭha tiṣṭheti kāścitsma prārthayanti tam
tatsaundaryaṃ ciraṃ kāściddṛṣṭvā tṛptiṃ na cāyayuḥ

40.7

akurvannanatiṃ kāścit kāścitpuṣpāñjaliṃ vyadhuḥ
kāścidbhikṣāṃ dadustasmai kāścidābharaṇāni ca

40.8

payodadhighṛtakṣaudraśarkarādīni tāḥ striyaḥ
sarvāṇi tasmai vastūni samarpya prīṇayanti ca

40.9

kāścidāliṅganaṃ kartuṃ tatsamīpaṃ gatā yadā
tadā dūragatastābhyassparśanaṃ na dadau śivaḥ

40.10

evaṃ tasya ca vairāgyamanurāgaṃ ca yoṣitām
dṛṣṭvā munīśvarāssarve vismitā abhavaṃstadā

40.11

śrīmaddhālāsyanagarīnāyakasyeśvarasya ca
līleyamiti jānanti samādhisthā maharṣayaḥ

40.12

vikāraṃ mānmathaṃ dṛṣṭvā kruddhāstāsāṃ svayoṣitām
pātivratyapravīṇānāṃ bhartāraśśepuraṅganāḥ

40.13

madhurānagarasthānāṃ vaiśyānāṃ vaṃśaśālinām
yūyaṃ striyassutā jātāstadīśasparśāmāpsyatha

40.14

evaṃ tā bhartṛbhiśrśaptā nikhilā muniyoṣitaḥ
vaiśyakanyāssamabhavanvṛddhiṃ ca prāpuranvaham

40.15

sampatsaubhāgyasaundaryasadguṇairatulā viśām
kanyakāsma virājante vibudhānāmivātmajāḥ

40.16

vismitā abhavan sarve janāssaundaryamadbhutam
vilokya kanyakānāṃ ca madhurānagarīviśām

40.17

bhikṣāṭanaṃ kṛtavatassvasya sparśanalālasāḥ
yāstāsspraṣṭuṃ sundareśo vṛddhavaiśyavapurdadhau

40.18

saundaryeṇātulenāpi tejasā prajvalanniva
paridhāyāmbaraṃ śubhraṃ soṣṇīṣassottarīyakaḥ

40.19

sugandhāliptasarvāṅgaḥ kāśmīratilakojjvalaḥ
dukūlenāvṛtatanurbahirācchāditena ca

40.20

pādukālaṅkṛtāṅghriśca dhṛtacchatrassa pāṇinā
kaṭakābhyāṃ kuṇḍalābhyāmaṅgulīyakaiśca bhūṣitaḥ

40.21

sugandhasārakarpūratāmbūlāmoditānanaḥ
nānāvarṇāṃśca valayān śaṅkhaśuktyādinirmitān

40.22

vahannaṃsena suprotān paṭṭasūtrottharāśmabhiḥ
vaiśyavīthyāmaṭan prāha vaiśyaveṣadharo haraḥ

40.23

kanyakāḥ pratigṛhṇantu mattassadvalayānīti
dṛṣṭvā valayavaiśyaṃ taṃ janāssarve suvismitāḥ

40.24

kanyakā api vaiśyānāṃ prāhurevaṃ ca susvarāḥ
mahyaṃ dehīti mahyaṃ ca dehītyatimudānvitāḥ

40.25

abhūṣitāśca valayairbhūṣitā api sotsukāḥ
so'pi tāsāṃ samālambya mṛdulān karapallavān

40.26

tvaṃ tiṣṭha kanye dāsyāmi tvaṃ ca tiṣṭhātra kanyake
mandaṃ mandaṃ vadannevaṃ valayān pradadau śubhān

40.27

gṛhītānna jahau vaiśyaḥ kanyakākarapallavān
tāsāṃ viśāṃ kanyakānāmapyānandaḥ prajāyate

40.28

janānāṃ puratastvevaṃ lajjayā tā vadanti hi
mama hastaṃ gṛhītvādya vaiśya kiṃ tvaṃ na muñcasi

40.29

jananyai kathayiṣyāmi muñca māṃ muñca māmiti
kanye valayavaiśyasya karasparśena kā bhavet

40.30

nindā tavādya kathaya kāmaṃ mātre na bhīriti
bhāṣamāṇaḥ pratigṛhaṃ gatvā valayavikrayam

40.31

akarotkaruṇāsindhurvaiśryaveṣadharo haraḥ
tatkarasparśasukhitā api mithyoktabhartsanāḥ

40.32

māyāvaiśyasya vaśatāṃ prāpussarvā viśāṃ sutāḥ
punaśca tatkarasparśalobhātkāścana kanyakāḥ

40.33

sundareśasya kuhanāmajñātvā'tīva mohitāḥ
āmuktānatiramyāṃśca bhindantyo valayān bahūn

40.34

prayaccha nassadvalayāniti taṃ prārthayanti tāḥ
adatvā yāsi cetsomasundaro bādhakastava

40.35

ityukte prahasannantardadau sa valayān punaḥ
guṇitvañca viśo dṛṣṭvā vismitā abhavan janāḥ

40.36

manasā bhāvayantyastāstatkarasparśajaṃ sukham
śvaḥ paraśvo'pi nityaṃ tvamāgaccheti tamabruvan

40.37

tathā kariṣya ityuktvā vaiśyavīthīṣu sañcaran
sa tābhiḥ kanyakābhiśca pradattaṃ valayocitam

40.38

mūlyaṃ na pratijagrāha bhaktābhīṣṭapradāyakaḥ
gṛhāṇa mūlyamityukte'pyevamāha maheśvaraḥ

40.39

adya na pratigṛhṇāmi valayānāntu mūlyakam
śvo dāsyatha bhṛtiṃ mahyaṃ svīkaromi tadā mudā

40.40

evaṃ bruvāṇaḥ kurvāṇo valayānāntu vikrayam
madhurāvaiśyavīthīśca paryaṭan paritaḥ śivaḥ

40.41

hālāsyanātho bhagavān saccidānandavigrahaḥ
garbhagehaṃ praviśyātha mūlaliṅge tirodadhe

40.42

śaṅkarasya karasparśamātreṇānugraheṇa ca
śrīmatyo rūpavatyaśca putravatyo nirāmayāḥ

40.43

vaiśyakanyāściraṃ kālaṃ jīvantyo'thāmṛtaṃ gatāḥ
tāsāṃ putrāśca pautrāśca paścāttadvaṃśasambhavāḥ

40.44

sarve ca skandavanmānyāssutarāṃ dharmatatparāḥ
dhanino dānaśīlāśca satataṃ pāpabhīravaḥ

40.45

abhavannirmalasvāntāssundareśaśivājñayā
vaiśyavaṃśo mahānāsīttadāprabhṛti bhūtale

40.46

evaṃ vaiśyavapurdhṛtvā śrīhālāsyapatiḥ prabhuḥ
śāpajātā vaiśyakanyāḥ kāruṇyena sma rakṣati

40.47

śṛṇvanti ye valayavikrayamādareṇa
someśvarasya satataṃ sakaleśvarasya
satputramitrasahitā anubhūya saukhyaṃ
yāsyanti te śivapuraṃ punarakṣayañca

40.48

iti dvātriṃśikā līlā kathitā kalmaṣāpahā
kanyākanakabhūmyādikāṃkṣitārthapradāyinī

Linked texts (4)