Halasyakhanda 41

Hālāsyakhaṇḍa 41

Language: Sanskrit

41.1

iti śrīskānde mahāpurāṇe agastyasaṃhitāyāṃ
hālāsyamāhātmye - valayavikrayo nāma
aṣṭatriṃśo'dhyāyaḥ
ekonacatvāriṃśodhyāyaḥ
33. yakṣiṇīnāṃ aṣṭasiddhyupadeśaḥ
agastyaḥaṣṭasiddhyupadeśañca yakṣaṇīṇāṃ yathā'karot
somasundara īśānastāṃ līlāṃ kathayāmi vaḥ

41.2

śrīmatkailāsamukhyeṣu śivakṣetrottameṣu ca
yadā liṅgasamutpattistatpurā sundareśvaraḥ

41.3

sasapātālamūlāttu liṅgarūpī samutthitaḥ
mūlaliṅgamiti prāhustasmāttaṃ sanakādayaḥ

41.4

tadevāṃkuritaṃ liṅgaṃ kailāsādisthaleṣvapi
tasmātsamastaliṅgasthastalliṅgasthaḥ paraśivaḥ

41.5

paripūrṇassundareśaḥ parātparataraḥ prabhuḥ
kailāsādyakhilasthāne sānnidhyaṃ kurute sadā

41.6

kailāsavāsī deveśaḥ kadāmbavananāyakaḥ
vaṭamūlāsane sthitvā girā madhurayā yutaḥ

41.7

śivadharmān samastāṃśca sakalānāgamānapi
tatvajñānāni śāstrāṇi śravaṇapriyadāni ca

41.8

nandibhṛṅgimahākālakumbhodaranikumbhakān
aparān gaṇanāthāṃśca vyājīkṛtyāvadatsvayam

41.9

sanatkumārasanaka sanātanasanandanān
praṇatān śivabhaktāṃśca prāha divyāḥ kathāśśubhāḥ

41.10

skandasya mātṛsthānīyāḥ yakṣiṇyaḥ ṣaṭ sakautukāḥ
bhasmoddhūlitasarvāṅgā rudrākṣāṅkakalebarāḥ

41.11

jaṭilā bhaktisaṃyuktāḥ kṛtaliṅgārcanakriyāḥ
namaskṛtya mahādevaṃ prāhuḥ pramuditāśayāḥ

41.12

bhavāmbhodhiparivdhvaṃsipādāmbujarajaḥkaṇa
devāṣṭasiddhiṃ no brūhi kṛpārāśe suvistaram

41.13

śaṃsantīṣu ca tāsvevaṃ sarvajñassundareśvaraḥ
prasannavadano bhīmaḥ pramatheśaḥ pinākadhṛt

41.14

tatheti mudito bhūtvā prāha siddhyāptikāraṇam
īśvaraḥ -
paripūrṇā parā śaktirmayā'dvaitā maheśvarī

41.15

bhāvanāmātratastuṣṭā siddhīścāṣṭau prayacchati
navāvaraṇasaṃyuktā navanādasvarūpiṇī

41.16

yakṣiṇyo bhāvayaṃtvāśu saivāhamiti dāḍhyataḥ
aṣṭābhiraṇimādyābhiranyābhiścaśaktibhirvṛtām

41.17

madaṅkasaṃniṣaṇṇāṃ tāṃ tarpayantu saparpayā
jñātṛjñānajñeyarūpāṃ jagatāmādikāraṇam

41.18

pūrṇāṃhantātmakaṃ jyotiśśīlayantu śivāptaye
samastaduḥkhahantrīñca samastānandadāyinīm

41.19

mūlavidyāṃ mahādevyā japaṃtvakhilasiddhaye
ityādinā maheśena vacasāṃ vistareṇa ca

41.20

siddhyupāye sati prokte sarvajñena dayālunā
tāstu karmavaśāccakuryakṣiṇyo'navadhānatām

41.21

pramādayuktāstāssarvā aśapadvṛṣabhadhvajaḥ
anādarayutā yūyaṃ jñānotpattirna vo bhavet

41.22

tataḥ sthāsyatha cājñānācchilārūpadharā bhuvi
iti śaptā maheśena vaṭamūlanivāsinā

41.23

yakṣiṇyo vipulākārāssarvāḥ kampitavigrahāḥ
bhītāssapadi nirdagdhamānasā nibhṛtendriyāḥ

41.24

akurvaṃstotrajātāni śivaprītikarāṇi ca
papracchustāḥ punassarvāḥ kadā yāmastavāntikam

41.25

kasmin deśe vasiṣyāmaḥ pāṣāṇatvaṃ gatā vayam
ityukto muditastābhirīśaḥ paśupatistadā

41.26

pratiśāpaṃ dadau tābhyaḥ prahasan kṛpayānvitaḥ
śrīpaṭṭamaṅgalagrāmaḥ pāṇḍyadeśe'sti kaścana

41.27

mahānvaṭo'sti tatrāḍhyaśśākhābhiḥ krāntayojanaḥ
divyaśaktyabhisaṃyukto meghamārganirodhakaḥ

41.28

viśāladalasaṃpūrṇaḥ prarohānekasaṃyutaḥ
tasyādhastiṣṭhata bhrāṃtāḥ śilābhāvasamanvitāḥ

41.29

antarbahistamorūpāḥ saṃvatsara sahasrakam
anādikṣetramamalamākhyayā madhurāpuram

41.30

madīyamasti bhūloke mahadatyantapāvanam
tatrāsti manmūlaliṅgaṃ sundareśvarasaṃjñitam

41.31

tatra sānnidhyakṛnnityamasaṅkhyātayugāditaḥ
nirgatya tanmūlaliṅgādahaṃ guruvapurdadhat

41.32

tatrāgatya kariṣye vassiddhīnāmupadeśakam
tadā yūyaṃ muktaśāpāḥ pūrvarūpaṃ manoharam

41.33

labdhvā'tha mama sāmīpyaṃ yakṣiṇyastvāgamiṣyata
ityuktavati deveśe khinnāḥ prītāśca tā javāt

41.34

yakṣiṇyo vaṭamāpyātha petuḥ pāṣāṇatāṃ gatāḥ
goṣṭhīṃ kṛtvā'tha devaśca gaṇeśvaramunīśvaraiḥ

41.35

nandīśārpitahastassan devyā vāsamagāttataḥ
yāte vatsarasāhasre sundareśaḥ kṛpānidhiḥ

41.36

dṛṣado yatra yakṣiṇyo gatvā śāpādvimocya tāḥ
gurumūrtidharastābhyassiddhīścāṣṭāvupādiśat

41.37

tatastāḥ pūrvarūpañca prāptā vijñānasaṃyutāḥ
labdhasiddhiprabhāvena sarvato dikṣvatha kramāt

41.38

ākāśagamanādīni darśayantyo muhurmuhuḥ
kailāsācalamāsādya samprāpuśśaṅkarāntikam

41.39

evaṃ śambhostrayastriṃśā līlā vassampakīrtitā
sarvasiddhipradā sadyaśravaṇātpaṭhanādapi

Linked texts (3)

Hālāsyairmāhātmya — Sanskrit
Hālāsyamāhātmya — Sanskrit
Hālālasyamāhātmya — Sanskrit