Halasyakhanda 42
Hālāsyakhaṇḍa 42
- Language
- Sanskrit
42.1
iti śrīskānde mahāpurāṇe agastyasaṃhitāyāṃ
hālāsyamāhātmye - aṣṭasiddhyupadeśo nāma
ekonatriṃśo'dhyāyaḥ
catvāriṃśo'dhyāyaḥ
34. kāntāracchedicolānugrahaḥ
agastyaḥ -
kāntāracchedicolāya bhagavān sundaraprabhuḥ
yayā'karoddhārabhedaṃ tāṃ līlāṃ varṇayāmi vaḥ
42.2
kāntāracchedako nāma colaḥ kaścinmahāprabhuḥ
maheśvare'tibhaktaśca sarvaśāstrārthatattvavit
42.3
hārakeyūramakuṭakuṇḍalādivibhūṣaṇam
candracandanakastūrīkuṅkumādivilepanam
42.4
vihāya vidyayā śambhorvibhūtyoddhūlya vigraham
dadhau rudrākṣamālābhistripuṇḍraṃ sarvasandhiṣu
42.5
sarvopacāraissampūjya satyaṃ sāmbaṃ sadāśivam
ajapacchraddhayā nityaṃ śrīmatpañcākṣaraṃ manum
42.6
yugāntakāle kāmākṣyā viśīrṇaṃ mahadālayam
navīcakāra tatsarvaṃ chitvā kāntāramutkaṭam
42.7
tadāprabhṛti sarve ca kāñcīpuranareśvaram
kāntāracchedaka iti kathayanti vicakṣaṇāḥ
42.8
kartuṃ kampānadīsnānaṃ kāmākṣīpādukārcanam
kadācidāgatāttatra purāṇajñānmunīśvarāt
42.9
hālāsyakṣetramāhātmyaṃ tīrtharājasya vaibhavam
anādiliṅgavaiśiṣṭyaṃ śrutvā bhūpassuvismitaḥ
42.10
kadā hālāsyamabhyetya sundareśvaradarśanāt
kṛtārtho'haṃ bhaviṣyāmītyevaṃ cintārṇavāplutaḥ
42.11
sundareśo'vadatsvapne bhūpatiṃ bhaktavatsalaḥ
ekākinā tvayā''gatya māṃ dṛṣṭvā gamyatāmiti
42.12
sa buddhassahasotthāya veṣāntaramathādbhutam
parigṛhya parājñāto madhurāmāyayau javāt
42.13
kūlaṅkaṣā vegavatī tadānīṃ prāvahadbhṛśam
sa nadītaraṇe'śakto manasyevamacintayat
42.14
yena kenāpyupāyena tīrṇeyañcettaraṅgiṇī
mama śatrumatsarvānmadhurāpuranāyakaḥ
42.15
jānāti cedāgataṃ māṃ yuddhaṃ sadyaḥ kariṣyati
kathaṃ jeṇyāmi saṃkruddhāvubhau nṛpanadīrayau
42.16
evaṃ bahūni vākyāni coktvā bhaktyeśamabravīt
kāntāracchedakaḥ khinno nadyā uttaratīragaḥ
42.17
hālāsyavāsin deveśa hālāhalaviṣāpaha
vibudheśādivibudhaiḥ paripūjitapāduka
42.18
tvadīyañca mahākṣetraṃ vimānaṃ diggajairdhṛtam
svayambhūtaṃ mahāliṅgamamṛtākāramadbhutam
42.19
draṣṭuṃ samāgato'smyadya sahete na nadaunṛpau
kiṃ kariṣyāmi śaṃsa tvaṃ tvameva śaraṇaṃ mama
42.20
dīnāni tasya vākyāni śrutvā sundaranāyakaḥ
bhaktaṃ taṃ rakṣitumanāḥ kāñciddevaṃ kriyāṃ vyadhāt
42.21
sarvāṇi sāladvārāṇi pidhāya dvārarakṣiṇaḥ
nidhāya mīnamudrāñca vasatīrāpnuvaṃstadā
42.22
dvāramuttarasālasya madhye bhittvā viśaṅkaṭam
saiddhaṃ mahādbhutaṃ veṣaṃ dhṛtvā' gacchatsvayaṃ haraḥ
42.23
kṣaṇātsa vālukāśeṣāṃ kṛtvā vegavatīṃ nadīm
kāntāracchedakaṃ bhūpamardharātre samānayat
42.24
strāpayitvā mahātīrthe mahādevo mahīpatim
dṛkprasādaṃ dadau tasmai draṣṭuṃ sarvaṃ tamovṛtam
42.25
purā devyāssumīnākṣyā mūrtiñca karuṇāmayīm
vimānaṃ darśayāmāsa vicitramapi mandiram
42.26
athātmīyaṃ vimānañca gajaiśca gajavairibhiḥ
gaṇairvidhṛtamāścaryaṃ liṅgañcāghamadarśayat
42.27
talliṅgadarśanādbhūṣaḥ pulakāñcitadehavān
vācā gadgadayā yuktaścāsīdānandajāśrubhiḥ
42.28
bhaktyā paravaśo bhūtvā stotraiḥ pañcākṣareṇa ca
stuvan japannaman gāyannṛtyaṃstasthau tadagrataḥ
42.29
tadbhaktyatiśayaṃ dṛṣṭvā bhaktacintāmaṇiśivaḥ
cintitāthryān dadau tasmai nikhilānatidurlabhān
42.30
asmadīyena yoddhuṃ te pāṇḍyenādya balaṃ na hi
śīghraṃ gaccheti taṃ procya prāpayattoramuttaram
42.31
atha tasya lalāṭaṃ sa kṛtvā bhasmābhirāmakam
antardadhe siddharūpī sundareśvara īśvaraḥ
42.32
so'pi vismayasaṃyuktaḥ kāntāracchedibhūpatiḥ
smaran śambhoḥ kṛpāmantaḥ svakīyaṃ rājyamāviśat
42.33
sundareśaḥ punaḥ prāpya dvārabhedaṃ svayaṃ kṛtam
pidhāya vṛṣamudrāñca kṛtvā bhaktārtibhañjanaḥ
42.34
svaprāsādaṃ samāsādya devyā śapharanetrayā
manojñamañcamadhye tu mahādevassukhaṃ sthitaḥ
42.35
kulabhūṣaṇabhūpālastadā pāṇḍyamahīpatiḥ
prātaḥ kavāṭabhedaṃ ca mudrābhedaṃ ca pālakāḥ
42.36
vijñāya rājñe vijñaptiṃ cakrussa stimito'bhavat
vicārayantu yūyaṃ dvāgityuktavati bhūpuji
42.37
sarve vicārya sarvatra nāsmābhirjñāyate nṛpa
kenaivaṃ kṛtamityatra jñātā cedīśa eva hi
42.38
ityavocan pālakāste tacchrutvā khinnadhīrnṛpaḥ
vihāya bhuktiṃ śete sma bhuvi śambhuṃ hṛdi smaran
42.39
bhūlokaśivalokeśaḥ svapne kṛtrimakṛcca tam
jñātārthamakarodīśaḥ kulabhūṣaṇabhūpatim
42.40
sadya utthāya mantribhyassa śivenoktamabravīt
astuvan bhaktavātsalyaṃ te sarve sundaraprabhoḥ
42.41
pūrvato'bhūdbhṛśaṃ bhaktaḥ kulabhūṣaṇa īśvare
dīrghamāyuśca kāmāṃśca tasmai rājñe śivo dadau
42.42
kāntāracchedakārthaṃ yatkṛtaṃ karmeśvareṇa ca
tacchṛṇoti sakṛdyastu taṃ kāntāraṃ na bādhate
42.43
sundarasya catustriṃśā līleyaṃ varṇitā'dya vaḥ
sarva kāmapradā sadyaḥ kāmadhenurivāparā
Linked texts (3)
- Hālāsyairmāhātmya — Sanskrit
- Hālāsyamāhātmya — Sanskrit
- Hālālasyamāhātmya — Sanskrit