Pramāṇa · Search · About · API

Halasyakhanda 43

Hālāsyakhaṇḍa 43

Language
Sanskrit

43.1

ekacatvāriṃśo'dhyāyaḥ
35. pāṇḍyasenāyai pānīyadānam
agastyaḥyayā ca līlayā pāṇḍyasenāyai sundareśvaraḥ
pānīyadānamakarottāṃ līlāṃ vacmi vaśśubhām

43.2

kulabhūṣaṇabhūpāle samprāpte śāmbhavaṃ padam
rājā'bhavattasya putro rājendro madhurāpure

43.3

śauryādisadguṇopetassāmantagaṇasaṃvṛtaḥ
rūpeṇa jitakāmassan rājyaṃ cakre sunītikam

43.4

kāntāracchiccolabhūpastaṃ bandhuṃ kartumudyataḥ
dātuṃ svaputrīṃ pāṇḍyāya prāhiṇodāptamantriṇam

43.5

tacchrutvā pāṇḍyabhūpāla utkarṣādiguṇānvitaḥ
samprāhiṇotprābhṛtāni colāya mahitātmane

43.6

sa ca pratiprābhṛtakaṃ pāṇḍyeśāya dadau mudā
evaṃ gacchati kāle tu rājendrasyānujaḥ khalaḥ

43.7

rājasiṃha iti khyātaḥ parākramaviśeṣavān
colakanyāṃ samādātuṃ sasainyaḥ prayayau svayam

43.8

svabalaṃ tadbalaṃ cātha kāñcīnātho vicārya ca
dātumudyogamakarottasmai putrīṃ suśobhanām

43.9

athābhimukhamāgatya pāṇḍyabhūpānujasya saḥ
taṃ sampūjya yathānyāyaṃ hemapuṣpaiśca mauktikaiḥ

43.10

rājasiṃhena sahito rājarājanibhaśriyā
kāñcīṃ coleśvaraḥ prāpa bhuvaḥ kāñcīmiva sthitām

43.11

mahimnassvasya tasyāpi sadṛśīmutsavakriyām
akarodvaraveṣāṃ tāṃ kanyāṃ datvā varāya saḥ

43.12

jāmātrā rājasiṃhena sahitaścolabhūpatiḥ
jetumaicchatpāṇḍyabhūpaṃ dinaiḥ katipayairatha

43.13

jyeṣṭhāya niścitāṃ kanyāṃ gṛhītvā so'nujādhamaḥ
jyeṣṭhaṃ prahartumakarodyogaṃ colabhūbhujā

43.14

ubhāvapi susannaddhau caturaṅgabalānvitau
āyātau madhurāpuryā yojanadvayamātrake

43.15

atiśūraṃ sainyavantaṃ colanāthasamanvitam
ākarṇyāyāntamanujaṃ bhīto'bhūtpāṇḍyabhūpatiḥ

43.16

svalpasenāsamāyuktassvalpaśauryasamanvitaḥ
mahatyā śraddhayā bhaktyā sahitassundareśvaram

43.17

bhaktābhīṣṭapradaṃ sadyaśśaṅkaraṃ prāpya khinnadhīḥ
pradakṣiṇanamaskārastotraissantoṣya sādaram

43.18

japtvā pañcākṣaraṃ mantramaśeṣārthapradāyakam
prāñjaliḥ prārthayāmāsa svajayaṃ tatparājayam

43.19

sarvajñassarvagaśśambhurbhakteṣvatikṛpānvitaḥ
khedo māstu tavetyuktvā tamāśvāsyaivamabravīt

43.20

tavābhīṣṭaṃ kariṣyāmi tvamādhiṃ mā kṛthāḥ punaḥ
prabhāte satvaraṃ gatvā tābhyāmāyodhanaṃ kuru

43.21

iti proktaṃ divyavāṇyā śaṅkareṇa dayālunā
śrutvā rājendrabhūpālaḥ kṛtārtho'smīti pipriye

43.22

punaḥ prabhāte samprāpte bhasmarudrākṣakañcukaḥ
yāvatī vidyate senā tāvatyā senayā vṛtaḥ

43.23

mahāliṅgasya purataḥ praṇipatya punaḥ punaḥ
pradakṣiṇakrameṇaiva prayayau paripanthinam

43.24

anujo rājasiṃhaśca kāntāracchedakānvitaḥ
āyayāvativegena balavīryasamuddhataḥ

43.25

dṛṣṭvā dṛṣṭipathaṃ prāptaṃ sasainyamanujādhamam
yoddhuṃ pracakrame pāṇḍyassiṃhanādasamanvitaḥ

43.26

bahusainyo'nujo vīkṣya janyaṃ jyeṣṭhakṛtaṃ hasan
svayaṃ pracakrame yoddhuṃ sainyairaśvairgajai rathaiḥ

43.27

anyonyamabhavadyuddhaṃ senayorubhayorapi
śastrāstrapātasaṅghoramatinṛtyatkabandhakam

43.28

yāmādiyāmaparyantaṃ mitho yudhvā varūthinī
madhyaṃ prāpte pataṅge tu prāpa śrāntiñca tṛṣṇayā

43.29

tadānīṃ grīṣmakālatvādagnikalpātapena ca
prapīḍitā colasenā śuṣkāsyā nyapatadbhuvi

43.30

kālasvabhāvātpāṇḍyasya senā tṛṣṇāvaśena tu
labhyate kutra pānīyamiti yuddhādnyavartata

43.31

tadā dayālurbhagavānbhaktabhaktaḥ paraśśivaḥ
raṇasthale suvistīrṇāṃ prapāṃ nirmāya māyayā

43.32

tatra vedamayaiḥ stambhairmañcaṃ kṛtvā mahojvalam
tanmadhye sanniviṣṭassan dṛśyate devanāyakaḥ

43.33

mañjuśiñjānamañjīrallasatpādasaroruhaḥ
vyāghracarmāmbaravaravirājitakaṭītaṭaḥ

43.34

bhasmarudrākṣamālābhirmanoharakalebaraḥ
lāvaṇyābdhisamudbhūtapūrṇendupratimānanaḥ

43.35

taptakāñcanasaṅkāśajaṭāmaṇḍalamaṇḍitaḥ
kanakādrinibhaḥ kāntyā kanakoḍyāṇabandhavān

43.36

evaṃ tapasvino veṣaṃ dhṛtvā hālāsyanāyakaḥ
puraḥsthitaṃ mahākumbhaṃ māyāśaktyā'karotprabhuḥ

43.37

svakapardasthagāṃgeyavāribhiḥ paripūrya tam
tannissrutajharātpāṇḍyabhaṭebhyaḥ pradadau jalam

43.38

ghaṭakaṇṭhopakaṇṭhastharandhrādekaiva nissrutā
jaladhārā tvanekā''sīcchatadhā ca sahasradhā

43.39

tābhiśca jaladhārābhiḥ pavitrābhissudhārasam
parihāsaṃ kurvatībhistṛptimāpuḥ kṣaṇādbhaṭāḥ

43.40

pānīyapānātsaṃhṛṣṭā balavīryamadānvitāḥ
punaryoddhuṃ javājjagmuḥ senāḥ pāṇḍyamahīpateḥ

43.41

coḷendrasenā'nekā'pi pānīyābhāvatastadā
coḷapāṇḍyānujābhyāñca niruddhā'pi palāyitā

43.42

tathā'pi yāmamātrantu yudhvā sainye palāyite
rājasiṃhaśca colaśca tāvubhau raṇabhūsthitau

43.43

jīvagrāhaṃ gṛhītvā tau rājendraḥ parayā mudā
āgatya sundreśāya darśayāmāsa nirmadau

43.44

kṛtaṃ kṛtyaṃ mayā te'dya yatheṣṭaṃ kurvimau vraja
iti divyā'bhavadvāṇī tau sa cānyepi śuśruvuḥ

43.45

rājendraśśambhubhaktatvāddharmaniṣṭhāparatvataḥ
colendre rājasiṃhe ca sadayastāvapālayat

43.46

gateṣu pañcadivaseṣvatha pāṇḍyo yaśaḥparaḥ
coḷaṃ visarjayāmāsa datvā sainyadhanādikam

43.47

anujañca khalaṃ paścādalpakarmasu yojayan
bhaktyā mahatyā saṃyuktassundareśe'bhyavartata

43.48

śivaṃ pānīyadātāraṃ tadbhaktaṃ pāṇḍyabhūpatim
sarve janā vismitāśca praśaṃsāṃsussamantataḥ

43.49

iti pañcatriṃśikeyaṃ līlā nīpāṭavīpateḥ
samproktā śrutamātreṇa sarvakalyāṇadāyinī

Linked texts (3)