Halasyakhanda 44
Hālāsyakhaṇḍa 44
- Language
- Sanskrit
44.1
dvicatvāriṃśodhyāyaḥ
36. rasavādapradarśanam
agastyaḥ -
siddho bhūtvā sundeśo rasavādapradarśanam
yayā vyadhāllīlayā'tha sā līlā'dya mayocyate
44.2
purā puṣpavanābhikhye pure sarvamanohare
puruhūtādidevaiśca munimukhyairabhiṣṭute
44.3
āsītsaundaryasampannā rudrakanyā guṇojjvalā
śivasya śivabhaktānāṃ sevayā tuṣṭamānasā
44.4
śrīmatpuṣpavaneśasya svayaṃbhūtottamasya ca
pūjāvasānabalyante śuddhanṛttaṃ karoti sā
44.5
brāhme muhūrta utthāya snātvā toyena bhasmanā
nityakṛtyaṃ vidhāyātha pūjayāmāsa sā śivam
44.6
sūryeṇa pūjitasyādau sūryanāthasya śūlinaḥ
pradakṣiṇanamaskārastotraistuṣṭiṃ sadā'karot
44.7
tatkṣetrasya ca māhātmyaṃ ko vā varṇayituṃ kṣamaḥ
tatkṣetrajāḥ pāṃsavaśca yayuśśambhostu liṅgatām
44.8
sūryādayo grahāssarve nakṣatrāṇyakhilāni ca
pradakṣiṇaṃ prakurvanti śrīmatpuṣpavaneśvaram
44.9
padbhyāmapyaspṛśantastat kṣetraṃ gotrabhidādayaḥ
stuvanto dūrataḥ sthitvā prāpussiddhimanuttamām
44.10
annapūrṇeśvarī devī śrīmatpuṣpavanedhituḥ
ajasramannadānañca yayā kārayati priyāt
44.11
nāmatò hemanāthā sā yuvabhirdravyamāhṛtaiḥ
yāvaddattamaśeṣeṇa tāvatā'rthena nispṛhā
44.12
bhojayāmāsa sarvāṃśca śivabhaktān ṣaḍrasam
evaṃ hi vartamānā sā kadācidbhakticoditā
44.13
pratimāṃ nāyakākhyāṃ ca kartumudyògatavatyabhūt
atha krītvā madhūcchiṣṭaṃ somaṃ somadharaṃ śivam
44.14
kārayitvā śilpinā sā manasaibamacintayat
manmano'smin daivayogātsamudyuktamabhūnmudā
44.15
labdhaṃ dhanaṃ bhojayitumalaṃ bhavati śāmbhavān
abhavannātiriktaṃ ca lobhaṃ kartuṃ na hi kṣamam
44.16
dayālussundareśaśca na jāne kiṃ vidhāsyati
evaṃ gacchati kāle tu sarvavyāpī sadāśivaḥ
44.17
manīṣitaṃ pūrayituṃ tasyāssiddhākṛtiṃ dadhat
tadgehe bhoktumicchūnāṃ bhaktānāṃ madhyataḥ sthitaḥ
44.18
nantuṃ tānāgatāṃ tatra siddhastāmabhyalokayat
aṅgapratyaṅganihitadṛṣṭiḥ kāruṇyasaṃyutaḥ
44.19
akaroccākṣuṣīṃ dīkṣāṃ tadanugrahatatparaḥ
khadvāṅgapāṇiṃ sphaṭikakuṇḍalālaṅkṛtānanam
44.20
paśyati sma mahābhāgā siddhaṃ sarvāṅgasundaram
pādaprakṣālanādyaṃ ca karma kṛtvā yathāvidhi
44.21
tayā sambhojitāssarve mudā māheśvarā janāḥ
yāteṣu teṣu bhakteṣu nikhileṣu tapasviṣu
44.22
siddho mandasmitaṃ kṛtvā tatrātiṣṭhadabhojitaḥ
dāsyassiddhaṃ samālokya sthitaṃ bhojanamaṇṭape
44.23
avadan rudrakanyāyā upāyātā athāntikam
sā samutthāya sahasā sasmitā ca samāgatā
44.24
sāñjalisannidhau tasya prāha bhaktiviśāradā
kāmasya dṛṣṭinaivāstītyāhussarve jagattyapi
44.25
yuṣmākamicchā māṃ bhoktuṃ mahatāṃ yadi vidyate
samaśvamantarbhavanamāgacchantvavilambitam
44.26
śivabhakteṣṭakaraṇaṃ madīyaṃ vratamanvaham
tattvaṃ bhuṃkṣva yathākāmaṃ prārthitāṃ māṃ manohara
44.27
evaṃ madhurayā vācā proktaśśaṅkarakanyayā
siddharūpī sundareśo vaktumārabhate mudā
44.28
siddhaḥśṛṇu kalyāṇi subhage subhakte hemanāyike
tvayā samā nāsti loke nārī dharmaparāyaṇā
44.29
adhruveṇa śarīreṇa tvayā dhruvamupārjitam
annenārthena vapuṣā dayayā satyayā girā
44.30
dharmāṇāṃ śivadharmaśca mukhyaḥ prokto manīṣibhiḥ
taddharmeṣu ca sarveṣu śivaliṅgārcanaṃ varam
44.31
śivaliṅgārcanācchreṣṭhaṃ tadbhaktānāṃ prapūjanam
sarvaiḥ proktairmahādharmaiḥ kṛtārthe tvaṃ na saṃśayaḥ
44.32
utsaveśvaramīśānaṃ kartumudyogavatyasi
tvannāmadheyasadṛśaṃ kuru hemnā tamīśvaram
44.33
hālāsyavāsī siddho'haṃ tava kāryasusiddhaye
samāgato'smi kṛpayā rasavādavicakṣaṇaḥ
44.34
tvadgehe yāvadastyadya rūpyatāmrādilohakam
sūcyantaṃ nikhilaṃ tāvatsamānaya sumadhyame
44.35
ityuktā prītahṛdayā hemanāthā suvismitā
kṣaṇādgṛhītvā tatsarvaṃ siddhasyāntikamāyayau
44.36
sundareśassa siddho'pi rūpyādyaṃ svapurasthitam
spṛṣṭvā sa bhasmahastena bhaktāṃ tāmevamabravīt
44.37
prakṣipyaitatsarvamagnau śvaḥ prabhāte vilokaya
uttamasvarṇarūpaṃ syāttadādāya mudānvitā
44.38
sauvarṇapratimāṃ kṛtvā pūrṇakāmā bhava dhruvam
ityukte sā punarnatvā siddhamevamayācata
44.39
svāminnabhyavahāraṃ tvamatra kṛtvā'nugṛhya mām
niśāmapyatra nītvā'tha prabhāte gantumarhasi
44.40
ākarṇya tasyā vacanaṃ mandasmitamanoharaḥ
siddho gaganamārgeṇa tejorūpī tirodadhe
44.41
sā ca toṣeṇa khedena saṃyuktā rudrakanyakā
yathoktaṃ tena siddhena tathā sarvaṃ cakāra ca
44.42
tadaśeṣaṃ svarṇamayaṃ prabhāte sā vilokya ca
śilpibhiḥ kārayāmāsa somaṃ somadharaṃ śivam
44.43
śivāgamajñairācāryaiḥ sādhakaissumuhūrtake
pratiṣṭhāṃ kārayitvā'tha praṇanāma mudānvitā
44.44
tata utthāya saundaryamanaupamyaṃ vilokya ca
pratimā tvanayā tulyā loke nāstīti sā jagau
44.45
atha sundaranāthākhyo bhavatvevāyamīśvaraḥ
hemanāthā nāma tasya priyādevaṃ cakāra sā
44.46
aṅgulībhirgaṇḍadeśaṃ spṛṣṭvā sā jighrati sma tam
tadaṅgulyudbhavaṃ cihnaṃ dṛśyate'dyāpi tatra tu
44.47
praśaśaṃsuśca tāṃ sarve śivabhaktaprapūjane
evaṃ sā śaṃsatassarvānmā meti drāṅnivārya ca
44.48
tasyotsavaṃ kārayitvā bhūṣāśca vividhā dadau
tatprasādātparāśaktessārūpyamagamacca sā
44.49
prāmāṇyena prabhajatāṃ sarveṣāṃ śaṅkaro dhruvam
aihikāmuṣmikān kāmān dāsyatyeva na saṃśayaḥ
44.50
bhaktābhīṣṭapradaṃ sadyassomasundaramīśvaram
tadbhaktāṃ hemanāthāṃ ca stuvanti satataṃ janāḥ
44.51
evaṃ ṣaṭtriṃśikā līlā nīpāraṇyānivāsinaḥ
sakṛt śrutā syātpāpaghnī bhaktābhīṣṭa pradāyinī
Linked texts (2)
- Hālāsyamāhātmya — Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit