Halasyakhanda 46
Hālāsyakhaṇḍa 46
- Language
- Sanskrit
46.1
śrutamātreṇa bhūpānāmāhave vijayapradā
catuścatvāriṃśodhyāyaḥ
38. bhaktasaumyānugrahaḥ
agastyaḥvakṣye yuṣmākamāścaryaṃ tatratyaṃ kimapi dvijāḥ
bhūtvā samāhitāstvettacchṛṇudhvaṃ munipuṅgavāḥ
46.2
śūdrasyākṣatamūtaṃ ca yayā devo dadau purā
sā līlā śrutamātreṇa manorathasuradrumaḥ
46.3
purā''sīnmadhurāpuryāṃ śūdrassadguṇasaṃyutaḥ
bhaktasaumya iti khyāto bhaktebhyo'nnaṃ dadau mudā
46.4
dharmaśīlā tasya patnī pātivratya parāyaṇā
bhaktānāmannadā nityaṃ pativākyapracoditā
46.5
tatastau sadguṇāsaktau śivajñānasamanvitau
śivabhaktisamāpannau śivārcanaparāyaṇau
46.6
kṛṣimeva prakurvāṇau vartete bahudhānyakau
dharmamārge sañcarantau bhasmarudrākṣadhārakau
46.7
anvahaṃ bhojayitvā tau śivabhaktānatandritau
paścādbhuktvā ca hālāsye sukhaināvasatāṃ pure
46.8
tayoḥ kadācidīśānoṃ bhaktiśodhanakāṃkṣayā
bahupradeśajakṛṣervaikalyamudapādayat
46.9
bhaviṣyadbhogasamaye vṛddhyā dāsyāmyahaṃ dhruvam
iti vārdhuṣikebhyaśca dhānyamādāya yatnataḥ
46.10
pratyahaṃ prītisaṃyuktaśśivabhaktānabhojayat
ṛṇamapyatra kālena sarvatra prārthitāya ca
46.11
na dadau puruṣaḥ kaściddurbhikṣavaśato bhuvi
tadānīṃ khinnahṛdayāvupavāsena karśitau
46.12
snātvā tau dampatī tīrthe prāpatussundareśvaram
pradakṣiṇatrayeṇāpi namaskāraiśca pañcabhiḥ
46.13
pañcākṣarajapaiḥ stotraiḥ prīṇayāmāsatuśśivam
atha tau sāñjalī bhūtvā sānandāśruvilocanau
46.14
pulakāṅkitasarvāṅgau sagadgadavacoyutau
śrī hālāsyapatiṃ śambhuṃ sāmbaṃ kāruṇyarūpiṇam
46.15
prārthayāmāsatuścaivamubhau bhaktārtibhañjanam
dampatīkadambakānanādhīśa kanakācalakārmuka
46.16
kamalāsanasaṃstutya kamalāpatipūjita
bhavataścaraṇāmbhojaṃ niyamānnityamarcya ca
46.17
bhavadbhaktajanānpaścāt bhaktadānena toṣya ca
bhuktvā bhaktaṃ bhukta śeṣaṃ tvatkaṭākṣaprabhāvataḥ
46.18
tvadbhaktajanasaṅkīrṇe tvatsānnidhyātipāvane
āvāṃ nīpavanakṣetre sukhaṃ vartāvahe purā
46.19
ṛṇātpratigṛhītena dhānyena ca dhanena ca
idānīṃ pañca ṣaṇmāsā yātāḥ kṛcchreṇa cāvayoḥ
46.20
pūrvedyurapi bhaktāśca bhaktadānena tarpitaḥ
ṛṇadātā ca me nāsti hyadya kiṃ karavāṇyaham
46.21
ṛṇapradaṃ me tvaṃ kaṃcitsadyo darśaya śaṅkara
na cettvaṃ darśayasyenaṃ hāsyāmyeva kṣaṇādasūn
46.22
tvadbhaktebhyo bhaktadānaṃ mama nityavrataṃ śubham
tadvinā sthātumatraiva na śakto'haṃ kadācana
46.23
ityārtiyuji vijñāptiṃ kurvāṇe'smin priyānvite
tadā divyā'bhavadvāṇī śaivī nikhilakāmadā
46.24
śūdracūḍāmaṇe tvaṃ hi bhaktairbhaktānabhojayaḥ
asmyahaṃ harṣasaṃyuktastathā kaścinna dṛṣṭavān
46.25
dhavalākṣatasaṃpūrṇo mūtaste sadane sthitaḥ
taṇḍulaṃ bahulaṃ tasmādādāya tvaṃ vrataṃ kuru
46.26
matprasādātkadācinna kṣīyate pūrṇa eva saḥ
satyāṃ svarṇādyapekṣāyāmādāya bahulākṣatān
46.27
vikrīya dhanamādāya bhaktān prīṇaya sādaram
yāvadicchanti me bhaktāstāvaddatvā dhanādikam
46.28
nirādhivyādhiko jīva yathoktaṃ śaradaśśatam
paścāddāsyāmi yuvayormadīyaṃ lokamadbhutam
46.29
bhaktebhyo bhaktadānañca viśeṣeṇa samācara
tasmātparataro dharmo nāstīti pravicārya ca
46.30
annadānamahorātraṃ kuru nityamatandritaḥ
tat śrutvā śāṅkaraṃ vākyaṃ vyaktaṃ bhāryāpatī ca tau
46.31
vismayāviṣṭacittau ca stutvā natvā punaśśivam
sahasā sadanaṃ ramyaṃ jagmatuḥ prītisaṃyutau
46.32
akṣatākṣatasampūrṇaṃ mahāntaṃ mūtamadbhutam
dṛṣṭvā mandiramadhyasthaṃ tau santuṣṭimavāpatuḥ
46.33
āsane taṃ śubhe sthāpya gandhādyaiḥ paripūjya ca
bhaktyā pradakṣiṇīkṛtya namaskṛtya ca mūtakam
46.34
tasmādādāya dhavalānakṣatānakṣatān bahūn
devenoktaprakāreṇa so'nnadānarato'bhavat
46.35
etadāścaryamākarṇya janāssarve samāgatāḥ
vilokya vismitāśśambhorbhaktavātsalyamastuvan
46.36
gataiśvaryassamāgatya madhurāpuranāyakam
bhajamānāstundareśaṃ jīvanti sma susampadaḥ
46.37
tau dampatī samādāya taṇḍulān pāṇḍarān bahūn
śambhuñca śambhubhaktāṃśca prīṇayāmāsutuśca taiḥ
46.38
yatheṣṭaṃ taṇḍulānāntu kṛtvā vikrayamādarāt
ghṛtakṣīrāpūpaphalaśarkarāpāyasādibhiḥ
46.39
annadānamahorātramanyāni vividhāni ca
kāñcanādīni dānāni śraddhayā cakratuśca tau
46.40
bhaktānāṃ bhuktaśeṣasya prāśanena ca dampatī
balārogya jñānavantāvabhūtāmadhikaśriyau
46.41
annadānādhikaṃ dānaṃ na bhūtaṃ na bhaviṣyati
iti niścitya śāstrārthaṃ taddānaniratau ca tau
46.42
iha bhuktvā ciraṃ bhogān putraiḥ pautraissuhṛdgaṇaiḥ
bhṛtyaiḥ parivṛtau paścātsāmbasārūpyamāpatuḥ
46.43
dṛṣṭvā'timātravihitāṃ vṛṣalena bhaktiṃ
kṛtvā tamādhirahitaṃ dṛḍhabhaktiyuktam
kāruṇyadattasitataṇḍulabhūtakāya
hālāsyamadhyanilayāya namaśśivāya
46.44
ityaṣṭatriṃśikā līlā hālāsyeśasya kīrtitā
sarvadurgatisaṃhartrī sarvasampatpradāyinī
Linked texts (3)
- Hālāsyairmāhātmya — Sanskrit
- Hālāsyamāhātmya — Sanskrit
- Hālālasyamāhātmya — Sanskrit