Halasyakhanda 50
Hālāsyakhaṇḍa 50
- Language
- Sanskrit
50.1
iti śrīskānde mahāpurāṇe agastyasaṃhitāyāṃ
hālāsyamāhātmye - kāṣṭhabhāravahanaṃ nāma
saptacatvāriṃśo'dhyāyaḥ
aṣṭacatvāriṃśo'dhyāyaḥ
42. cerarāṅge patrikādānam
agastyaḥbhadrānugrahakṛt paścātpatrikālekhanaṃ yayā
ceraṃ pratyakarocchambhustāṃ līlāṃ śṛṇuta dvijāḥ
50.2
bhadrābhidhāno bhāṇastu sadā śaṅkarasaktadhīḥ
bhūpāladarśanaṃ tyaktvā gāyatīśvarasannidhau
50.3
gānarūpī gānarato gāyakāgresaro'pi saḥ
sundareśo'sya kaṇṭhoktarāgeṇākṛṣṭamānasaḥ
50.4
bhavo bhaktaparādhīno bhagavān pārvatīpatiḥ
śambhustannikaṭaṃ prāpya śṛṇvannāste sadā mudā
50.5
sa toṣayitvā sarveśaṃ gāyako gānavidyayā
yadā ca gantumudyuktastadā devo maheśvaraḥ
50.6
kadācinnyadadhāttasya purobhāge paṇān bahūn
kadācidbhūṣateḥ sphītaṃ nyadadhādbhūṣaṇaṃ bahu
50.7
prādācca jātucidratnahāraṃ ca kanakāni ca
sauvarṇañcaṣakañcāpi ratnacitritadarpaṇam
50.8
bhadrāsanasthapaṭṭañca hemaratnasamāyutam
daṇḍañca cāmarasyāpi navaratnavicitritam
50.9
rājataṃ cāpi tāmraṃ ca samastaṃ vastujātakam
yāni yāni ca dattāni śambhunā tāni tāni ca
50.10
labdhvā sa mudito bhūtvā gāyakaśca gṛhaṃ gataḥ
chitvā bhitvā gāyakebhyo dadau sarvāṇyasau mudā
50.11
evaṃ gacchati kāle sa kadācidbhadrasaṃjñitaḥ
riktò'bhavattadā bhūpamarthāya tu kadācana
50.12
nopāgāyatsundareśaṃ sadā gānairapūjayat
tathābhūtaṃ stuvantyenamupagāyakapaṅktayaḥ
50.13
dātavyavastvabhāvena khinnaśśiśye kadācana
dātṛtvamātmabhaktiñca dṛṣṭvā bhaktasya śaṅkaraḥ
50.14
tatsvapne svayamabhyetya bhaktādhīno'vadacca tam
bhadra tvamatidātṛtve dīkṣito nitarāmasi
50.15
rājamandiramadhyasthaṃ rahastubhyaṃ dadāmyaham
sarvaṃ vastu mahāratnasvarṇarūpyādi cānvaham
50.16
kośādhyakṣāstu pāṇḍyasya sadā krośanti bhūyasā
paṇāśca naiva dṛśyante sthāpitāḥ kośasadmani
50.17
bhūṣāśca ratnacitrāśca haimāni caṣakāṇi ca
adṛṣṭaścorakaḥ ko nu corayitvā gato'bhavat
50.18
nodghāṭitaṃ kavāṭañca jñātā cetsundareśvaraḥ
evaṃ krośatsu bahuśaḥ kośādhyakṣeṣu hanta te
50.19
punaśca kiñcidghāñcchredṛṣṭvā tvāṃ bādhayennṛpaḥ
prāyaśaścera evādya saskaroti śivāśritān
50.20
śīghraṃ gatvā darśayāmūṃ patrikāṃ cerabhūpate
ityuktvā ramyayā yuktāmāryayā patrikāmadāt
50.21
yuṣmatsevāmahaṃ hitvā na gacchāmīti so'bravīt
mayocyamāno hi bhavān gacchatviti śivo'vadat
50.22
ājñollaṅghanamīśasya pāpāyeti vicintayan
sarvairajñāta eva drāk ceraṃ prati yayau nṛpam
50.23
dinaiḥ katipayaiḥ prāpya cerasya puramadbhutam
bhasmāṅkitalalāṭādirāste koṇe prapāntare
50.24
bhasmabhūyiṣṭhasarvāṅgaṃ tatratyā dadṛśurjanāḥ
ceraṃ svapne sundareśo gatvā prāha savistaram
50.25
madbhaktaḥ kaścidāyātastamanvīkṣya mahīpate
prīṇayeti vacassvapne śṛṇoti sma sa cerapaḥ
50.26
sa sambhramāt samutthāya sacivān drāk samāhvayat
tān jhaṭityāgatān vīkṣya procya svapne śrutaṃ vacaḥ
50.27
pure'smin śivabhaktaḥ kiṃ nūtanaḥ kaścidāgataḥ
iti pṛṣṭvā janān dṛṣṭaścettamānayatetyaśāt
50.28
tatheti te javādgatvā'nveṣayantaḥ prapāntike
nikṛṣṭaveṣaṃ taṃ dṛṣṭvā gatvā rājñe nyavedayan
50.29
tataścero javādgatvā panthānameva tamaikṣata
akṣiṇī mīlayan śambhuṃ gāyan sa pulakānvitaḥ
50.30
puraḥsthamapi bhūpālaṃ nāpaśyaddharṣabāṣpayuk
vyādhito'pi daridro'pi kṣudhito'pi ya īśvare
50.31
bhaktyā bhāvita cittaḥ san vartate sa hi bhāgyavān
iti praśaṃsanmanasā so'pṛcchattaṃ śivapriyam
50.32
bhasmoddhūlita sarvāṅga śaṅkarapriya śaṃsa me
kuto bhavān samāyātaḥ ityuktaḥ so'bravīnnṛpam
50.33
bhaktābhīṣṭaprada śrīmatsundareśājñayā tvaham
madhurāyāḥ samāyātastvāṃ draṣṭuṃ śaṅkarapriyam
50.34
paśyāmāṃ patrikāṃ rājan iti tāṃ pradadāvasau
namaskṛtya samādāya tāvavācayadātmanā
50.35
nānāścaryayutāyāṃ madhurāyāṃ bhadra ityasau nāmnā
mayi bhakto datvā'smai preṣaya vasu bhūri śīghrataram
50.36
divyākṣarayutāmevamāryā dṛṣṭvā manoramām
vicāryyānugrahaṃ śambhoḥ tasminatyantaharṣitaḥ
50.37
sa cerastaṃ gajaskandhamāropya prāpayan purīm
sugandhitailābhyaktāṅgaṃ kṛtvā snāpya śubhairjalaiḥ
50.38
śivarūpaṃ smaranbhadraṃ ṣaḍsaiḥ samabhojayat
vāsāṃsyadānmahārhāṇi candanādisuvastu ca
50.39
yāvadāyuśca paryāptaṃ tāvacca vyavataraddhanam
evaṃ bhadraṃ susantoṣya vinayenāha pārthivaḥ
50.40
adyaivāhaṃ kṛtārtho'smi yuṣmadāgamanāditi
athāha bhadrabhaktastaṃ bhāṇo'haṃ hi mahīpate
50.41
mahānubhāvastvamiti ślāghayan sa punaḥ punaḥ
brahmādistambaparyantaṃ jīvākhyastiṣṭhatīśvaraḥ
50.42
na jātibhedastatrāsti kimevaṃ bhavatocyate
evamādivacaḥ procya vilambanabhayānnṛpaḥ
50.43
śaknomi tvāṃ na nirbaddhuṃ gāyakeśājñayā vraja
ityuktvā rakṣibhiḥ sārdhaṃ dhanabhāravahairapi
50.44
preṣayāmāsa bhadraṃ taṃ cerarāṭ sa mudānvitaḥ
bhadraśca sukhamāgatya nīrogaḥ saumyaveṣadhṛt
50.45
prastutyābhīṣṭadaṃ śambhuṃ gānaistadapadānakaiḥ
sarvaiḥ praśasyamānaḥ san svavargairitarairapi
50.46
arthatyāgavinodena hṛṣṭaḥ prāpa svamandiram
gāyan yathā puraṃ śaṃbhuṃ dadan vasu ca pūrvavat
50.47
modamānaściraṃ kālaṃ madhurāyāmuvāsa saḥ
dvicatvāriṃśikā līlā sundareśasya varṇitā
sakṛcchravaṇataḥ puṃsāṃ sarvasampatpradāyinī
Linked texts (3)
- Hālāsyairmāhātmya — Sanskrit
- Hālāsyamāhātmya — Sanskrit
- Hālālasyamāhātmya — Sanskrit