Halasyakhanda 55
Hālāsyakhaṇḍa 55
- Language
- Sanskrit
55.1
iti śrīskānde mahāpurāṇe agastyasaṃhitāyāṃ
hālāsyamāhātmye-kroḍapotasacivatvaprakalpanaṃ
nāma dvipañcāśo'dhyāyaḥ
tripāñcāśo'dhyāyaḥ
47. khañjarīṭāya mantropadeśaḥ
agastyaḥ -
khañjarīṭasyopadeśaṃ mṛtyuñjayamahāmanoḥ
yayā'karotsundareśaḥ sā līlā varṇyate mayā
55.2
purā balibhujassarve khañjarīṭānbaloddhatāḥ
tuṇḍairaṅkuśavattīkṣṇaiḥ tāḍayanti sma santatam
55.3
tattāḍanebhyassantrastāḥ khañjanānā yayuḥ purīm
avasan koṭareṣveva vaneṣu vanajāśinaḥ
55.4
tadā teṣāṃ ca yūtheṣu pūrvajanmani sañcitaiḥ
puṇyairyuktaḥ pāpaleśāt pakṣī kaścidajāyata
55.5
sa khañjanaḥ kadācittu kākatuṇḍaissutāḍitaḥ
cintayāmāsa hṛdaye svapuṇyaparipākakaḥ
55.6
sarveṣāṃ śatravassanti janānāṃ jagatītale
śatrubhiḥ pīḍitāḥ kecitpīḍayantyatha tānarīn
55.7
etasya kāraṇaṃ kiṃ vetyacintayadanāratam
cireṇa niścayāmāsa śaṅkaropāstimeva saḥ
55.8
tadupāstiḥ kutra gatvā kartavyeti hṛdantare
dhyāyamānasya tasyārādgacchan kaścinmunīśvaraḥ
55.9
tīrthayātrāparaścaivaṃ prāha gambhīrayā girā
ādhinā vyādhinā vāpi ripuṇā mṛtyunāṃhasā
55.10
punaranyairbahuvidhairbādhikairbādhitasya ca
jantossadyassukhāvāptyai tadbhītivinivṛttaye
55.11
śrī hālāsyapatiḥ śambhureka eva jagattraye
prathitaśca pravīṇaśca yathā'sti na tathā paraḥ
55.12
samastaśambhukṣetrebhyastapassiddhipradaṃ drutam
śrīhālāsyaṃ mahākṣetramiti prāhurvicakṣaṇāḥ
55.13
mahadbhyastīrthasaṅghebhyaḥ sahasā'ghaharaṃ param
hemapadmākaraṃ tīrthaṃ tathāsti hi sudurlabham
55.14
sarvebhyaśśivaliṅgebhyaḥ samastavaradaṃ param
sundareśaṃ praśaṃsanti sūkṣmataratvārthavedinaḥ
55.15
sa eva sarvadharmadaḥ sa eva sarvakāmadaḥ
sa eva sarvadārthadassa eva sarvamuktidaḥ
55.16
sa eva sarvasiddhidaḥ sa eva sarvapāpahṛt
sa eva sarvaśatruhā sa eva sundareśvaraḥ
55.17
bhaktyā paravaśenaivaṃ muninā bhāṣitāni ca
śrutvā vākyāni sarvāṇi bharadvājo'tivismitaḥ
55.18
gatvā'hamapi hālāsyaṃ snātvā hemābjinījale
natvā ca sundareśānaṃ tameva ca hṛdantare
55.19
dhyātvopāsya vijeṣyāmi vāyasānātmabādhakān
iti niścitya sahasā tatkṣetraṃ prāpya khañjanaḥ
55.20
tasmiṃstīrthe ca saṃsnāya dṛṣṭvā liṅgaṃ praṇamya ca
paritassundareśānaṃ mandaṃ mandaṃ paribhraman
55.21
pradakṣiṇānyanekāni kṛtvā tatsannidhau sthitaḥ
taṃ prekṣya sāmbamīśānaṃ manasā'pūjayatsadā
55.22
evaṃ sa khañjarīṭastu sandhyātrayamadhāttapaḥ
taccaritraṃ pavitraṃ sa dṛṣṭveśo vismayānvitaḥ
55.23
brahmādistambaparyantabhūtānāmaṃtarātmakaḥ
sarvajñassundareśānaḥ sarvabhūtahite rataḥ
55.24
bhaktiṃ dṛṣṭvā bharadvājapakṣiṇastasya cātmani
devyai śapharanetrāyai tāṃ sambhāṣya punaḥ punaḥ
55.25
atikāruṇyavivaśaḥ kadambavananāyakaḥ
divaseṣu ca gacchatsu punaḥ katipayeṣu ca
55.26
mṛtyuñjayaṃ mahāmantraṃ bharadvājākhyapakṣiṇe
ṛṣicchandodevatādyaṃ tasmā upadideśa ha
55.27
tryakṣaraṃ mantramenaṃ tvaṃ sarvakāmapradaṃ drutam
brāhme muhūrta utthāya prajapātyādareṇa ca
55.28
tanmantrasya prabhāvena samastābhīṣṭadena ca
na bhaviṣyati bhītiste balibhugbhyo na saṃśayaḥ
55.29
yuṣmadvaṃśabhavebhyaśca yuṣmadvaṃśavivṛddhaye
kuru mantrasyopadeśaṃ te sarve santu nirbhayāḥ
55.30
iti cāha kṛpādhīnaḥ sundareśaḥ sadāśivaḥ
tasya vākyāni cākarṇya bharadvājo vihaṅgamaḥ
55.31
prītaḥ praṇamya taṃ śambhuktakāle'japacca tam
acirācchaktirutpannā bharadvājasya pakṣiṇaḥ
55.32
tadādyupari kākānāṃ khañjanaḥ parito bhraman
tuṇḍenāṅkuśatīkṣṇena teṣāṃ mūrdhasbatāḍayat
55.33
vāyasāṃstāḍayantaṃ taṃ nirīkṣya nikhilā janāḥ
nāmnā balīyānityūcuralpasatvañca khañjanam
55.34
trikālajñā yogayuktā mahātmānaścirantanāḥ
prāśaṃsandevadevasya svātantryaṃ sakaleśituḥ
55.35
prabhāte śrūyate'dyāpi khañjanānāṃ tu kūjitam
mṛtyuñjayākhyamantreṇa tulyarūpaṃ na saṃśayaḥ
55.36
khañjarīṭasya yaccaitanmantrajāpena bhūtale
balīyāniti nāmābhūttatprasiddhataraṃ budhāḥ
55.37
sundareśopadiṣṭañca bharadvājāya pakṣiṇe
mṛtyuñjayākhyamadyāpi prabhāte mantramuttamam
55.38
ya utthāya prasannātmā japedbhyādisaṃyutam
mṛtyuṃ jayatyasau dhanyaḥ samastānāmayānapi
55.39
tanmantrajapamātreṇa dīrghamāyurarogatām
labdhvā jano'tulaiśvaryaṃ samare vijayī bhavet
55.40
iti viracitalīlāṃ sundareśena harṣāt
paṭhati paramabhaktyā sādaraṃ yaśśṛṇoti
vividhasakalabhogān so'nubhūyeha loke
caramavayasi satyaṃ satyalokaṃ prayāti
55.41
saptacatvāriṃśikeyaṃ līlā proktā maheśituḥ
sarvaśatrupramathinī sampaddalavidhāyinī
Linked texts (3)
- Hālāsyairmāhātmya — Sanskrit
- Hālāsyamāhātmya — Sanskrit
- Hālālasyamāhātmya — Sanskrit