Pramāṇa · Search · About · API

Halasyakhanda 58

Hālāsyakhaṇḍa 58

Language
Sanskrit

58.1

ṣaṭpañcāśo'dhyāyaḥ
56. colasenābhañjanam
agastyaḥ -
vaṃśaśekharabhūpāle vasudhāṃ sati śāsati
sambhrūya bahavo bhūpāstena yoddhuṃ samāyayuḥ

58.2

vīro vikramacolastu teṣāṃ madhye mahattaraḥ
pradhānaśatrurabhavattasya pāṇḍyamahīpateḥ

58.3

nareśaśca gajeśaśca śūraśvāśvapatirmahān
ete vikramacolasya nṛpāḥ prāpussahāyatām

58.4

asaṅkhyātā gajāśvāśca narāśśūratarā api
tainarendraissahāyātāḥ punaranye'pi pārthivāḥ

58.5

sarve te nṛpaśārdūlāḥ sahyakanyātaṭe śubhe
skandhāvāraṃ prakalpyātha nyavasannāhavodyatāḥ

58.6

tadyodhā madhurāṃ prāpya tvagṛhṇan godhanaṃ bahu
taṭākānāñca tīrāṇi babhañjuścobhatāni ca

58.7

vrīhyādīnāmāyatiñca parivṛtya nyavārayan
pāṇḍyo'pi sacivaissārdhaṃ mantrayāmāsa daiṣṭikaḥ

58.8

colādyā bahavo bhūpā bahusenābhirāgatāḥ
balena jetuṃ tān sarvānaśaktā durbalā vayam

58.9

śrīhālāsyapatiśśambhuśśaraṇyo bhaktavatsalaḥ
sa eka eva cāsmākaṃ sahāyo'nyo na kaścana

58.10

ityuktavati bhūpāle śambhubhaktisamanvite
taduktaṃ satyameveti pratyūcuḥ sacivā nṛpam

58.11

aṭṭālasundaraṃ śambhumiṣṭārthadamiha drutam
samprāpya prārthayāmāsa vaṃśaśekharabhūpatiḥ

58.12

devadeva kṛpāsindho praṇatārtihara prabho
aṭṭālavīra varada viṣṭapatrayatuṣṭida

58.13

tvameva mama mātā'si tvameva ca pitā mama
tvameva mama bandhuśca tvamevāsi gururmama

58.14

tvameva mama vidyā ca tvameva draviṇaṃ mama
tvameva me rakṣitā ca sarvaṃ vastu tvameva me

58.15

colena bahavo bhūpā mayā yoddhuṃ samāgatāḥ
tān jetuṃ mama śaktirna kiṃ kartavyamitaḥ param

58.16

tvadīyaṃ kṣetramevaitat śrīhālāsyaṃ parātparam
atra sthitā janāssarve tvadīyā eva śaṅkara

58.17

ahaṃ tvaddāsa evāsmi nātra sandehakāraṇam
tvatkṣetrasya tvadīyānāṃ janānāṃ mama vā prabho

58.18

bhaviṣyati dhvaṃsanañcettattavaiva hi dūṣaṇam
ityuktvā so'śrupūrṇākṣo daṇḍavat praṇanāma ca

58.19

mā bhaiṣīrnṛpa dhīrassan yuddhaṃ kurvvaribhissaha
sāhāyyaṃ te kariṣyāmītyaiśamāvirabhūdvacaḥ

58.20

tacchrutvā vismitassamrāṭ santoṣātiśayānvitaḥ
praṇamyāṣṭāṅgapañcāṅgatryaṅgaiśśambhuṃ punaḥ punaḥ

58.21

sahasā bhasmanoddhūlya svakīyañca kalebaram
dṛḍhamāmuktakavacassvayaṃ śūrataro nṛpaḥ

58.22

svalpasenārathagajavājibhiśca samanvitaḥ
śambhuṃ pradakṣiṇīkṛtya natvā yuddhāya niryayau

58.23

pāṇḍyanirgamanaṃ śrutvā colo vikramaviśrutaḥ
sahāyabhūtairananyaiśca bhūpaissaha samāyayau

58.24

prathitau tāvubhau pāṇḍyacolau vikramamānitau
ābhimukhyaṃ prāpatuśca vṛṣādreruttarasthale

58.25

dvaṃdvayuddhamabhūtteṣāṃ yodhānāṃ pāṇḍyacolayoḥ
dhanvinastu bhaṭāḥ kecit śaraistīkṣṇatarairapi

58.26

sahāyabhūtāścolasya prajaghnuḥ pāṇḍyarāḍbhaṭān
siṃhanādaṃ samākarṇya yodhānāṃ colabhūpateḥ

58.27

haraścāṭṭālanilayo devo dhanvyabhavajjavāt
sundareśvara ityeva svanāmāṃkān bahūnapi

58.28

pāṇḍyarāḍbhaṭamadhyasthaḥ śarānvyasṛjadadbhutān
ekaścolasya yodhānāṃ bādhate sma śataṃ śaraḥ

58.29

dṛṣṭvā colamahīpastaṃ śaraṃ śaṃbhārvvākhyayāṅkitam
viśiṣṭatvāt buddhimattvādevaṃ citte hyacintayat

58.30

sundareśaḥ svabhaktānāṃ kāmadhukkāmadhenuvat
cintāmaṇirivābhāti cintitārthapradānataḥ

58.31

kalpapādapakalpaścānalpasaṅkalpakalpanāt
bhuvaneṣvapi sarveṣu prasiddho yaḥ paraśśivaḥ

58.32

tameva nūnaṃ bhūpālaḥ puraskṛtya samāgataḥ
tena yoddhuṃ vayaṃ tasmānna śaktāśśambhu vaibhavāt

58.34

pureśo bhaktarakṣārthamakarotkāṣṭhavikrayam
yotsyāmaścedanenaiva naṣṭā eva vayaṃ dhruvam
iti niścitya yodhām svām jñātārthānakarottadā
narāśvagajanāthādyān bhūpānevamabodhayat

58.35

colabhūpativākyaṃ te śrutvā vaṃśabhavā nṛpāḥ
vihāyāyodhanodyogaṃ tūṣṇīmeva sthitā bhaṭaiḥ

58.36

punammleṃcchaturuṣkādyā ityuktaṃ colabhūpatim
prabhartsya yoddhumudyogamakurvannativikramāḥ

58.37

aṭṭālavīraṃ taṃ śambhuṃ dṛṣṭvā pratyakṣato'grataḥ
pāṇḍyabhūpo nirbhayassan tasthau dhīro raṇāṅgaṇe

58.38

aṭṭālavīrassahasā bhaktāpaddhvañjanakṣamaḥ
svanāmāṅkaśarañcaikaṃ vyasṛjattānarīn prati

58.39

visṛṣṭastena devena tīkṣṇastejomayaśśaraḥ
sahasradhā prabhinno'bhūtsahasrāṃśurivāṃśubhiḥ

58.40

sarvān mlecchaturuṣkādyānmānavikramamohitān
sarandhrānakarotsadyaḥ sa śaro hṛtpradeśataḥ

58.41

śambhunāmāṅkitairbāṇaissarve te bhinnavakṣasaḥ
gacairaśvaissvakīyaiśca sahitā nyapatan sthale

58.42

raṇāṅgaṇaṃ samālokya gajādiśavapūritam
colaḥ stuvan sundareśavaibhavaṃ prayayau kṣaṇāt

58.43

colaṃ turagamāruhya gacchantamativegataḥ
ālokyānthe mahīpāśca niśvasantastamanvayuḥ

58.44

evamaṭṭālavīrastu vijayaṃ ca parājayam
dadau pāṇḍyāya colāya svatantro bhaktavatsalaḥ

58.45

kiñcit smitvā pāṇḍyamukhaṃ kaṭākṣeṇa vilokya ca
aṭṭālavīraśśambhuḥ svamaṭṭālaṃ samupāviśat

58.46

pāṇḍyo'pyakṣatasarvāṅgaścākṣataiḥ svajanādibhiḥ
sahito'ṭṭālagaṃ śambhuṃ natvā prastutya bhaktitaḥ

58.47

muktāphalāni citrāṇi bhūṣaṇānyambarāṇi ca
devāya pradadau tasmai ratnacitradhanuśśarau

58.48

sarve pratyakṣato dṛṣṭvā vīryamaṭṭālavāsinaḥ
prāśaṃsannātha nātheti madhurāvāsino janāḥ

58.49

vaṃśaśekharabhūpo'pi varavāgbhiḥ kavīśvaraiḥ
praśasyamāno magno'bhūnmahāsantoṣasāgare

58.50

athāṭṭālapateḥ śambhoranugrahamabhīṣṭadam
labdhvā sarvānarīn jitvā sārvabhaumo'bhavannṛpaḥ

58.51

iti pañcāśikā līlā kadambavanavāsitaḥ
mayā proktā ca yuṣmākaṃ śrotṝṇāmiṣṭasiddhidā

Linked texts (3)