Pramāṇa · Search · About · API

Kumarikakhanda 35

Kumārikākhaṇḍa 35

Language
Sanskrit

Contents

35.1

cha || || nārada uvāca || || tatastaṃ girivarṣmāṇaṃ patitaṃ vasudhopari || ārliṃgitamiva pṛthvyā guṇinyā
guṇinaṃ yathā

35.2

dṛṣṭvā devā vismitāste jayaṃ jagustathā muhuḥ || kecitsamīpamāgaṃtuṃ bibhyati tridivaukasaḥ

35.3

utthāya tārako daityaḥ kadā
citro nihaṃti cet || taṃ tathā patitaṃ dṛṣṭvā vasudhāmaṇḍale guhaḥ

35.4

āsīddīnamanāḥ pārtha śuśoca ca mahāmatiḥ || stavanaṃ cāpi devānāṃ vāri
yitvā vaco'bravīt

35.5

śocyaṃ pātakinaṃ māṃ ca saṃstuvadhvaṃ kathaṃ surāḥ || paṃcānāmapi yo bhartā prākkṛto'sau na kīrtyate

35.6

sa tu rudrāṃśajaḥ
proktastasya druhyanna rudravat || svāyaṃbhuvena gītaśca ślokaḥ saṃśrūyate tathā

35.7

vīraṃ hi puruṣaṃ hatvā gosahasreṇa mucyate || yathākathaṃcitpuruṣo
na haṃtavyastato budhaiḥ

35.8

pāpaśīlasya hanane doṣo yadyapi nāsti ca || tathāpi rudrabhakto'yaṃ smaranniti śocāmi

35.9

tadahaṃ
śrotumicchāmi prāyaścittaṃ ca kiṃcana || prāyaścittairapaityeno yatopi maharddhitam

35.10

iti saṃśocatastasya śivaputrasya dhīmataḥ || vāsu
devo guruḥ puṃsāṃ devamadhye vaco'bravīt

35.11

śrutiḥ smṛtiścetihāsāḥ purāṇaṃ ca śivātmaja || pramāṇaṃ cettato duṣṭavadhe doṣo na vidyate

35.12

svaprāṇānyaḥ paraprāṇaiḥ prapuṣṇātyaghṛṇaḥ pumān || tadvadhastasya hi śreyo yadghoṣādyātyadhaḥ pumān

35.13

annāde bhrūṇahā mārṣṭi patyau bhāryā pacāriṇī || gurau śiṣyaśca yājyaśca steno rājani kilbiṣam

35.14

pāpinaṃ puruṣaṃ yo hi samartho na nihaṃti ca || tasya tāvaṃti pāpāni tadardhaṃ so'pyavāpnute

35.15

pāpino yadi vadhyaṃte naiva pālanasaṃsthitaiḥ || tato'yamakṣamo lokaḥ kaṃ yāti śaraṇaṃ guhaḥ

35.16

kathaṃ yajñāśca vedāśca vartaṃte viśvadhārakāḥ || tasmāttvayā puṇyamātaṃ na ca pāpaṃ kathaṃcana

35.17

atha cedbhadrabhakteṣu bahumānastava prabho || tatra te kīrtayiṣyāmi prāyaścittaṃ mahottamam

35.18

ājanmasaṃbhavaiḥ pāpaiḥ pumānyena vimucyate || ākalpāṃtaṃ ca vā yena rudraloke pramodate

35.19

kṛte pāpe'nutāpo vai yasya skanda prajāyate || rudrārādhanato'nyacca prāyaścittaṃ paraṃ na hi

35.20

nai yasyālamapi brahmā mahimānaṃ vivarṇitum || śrutiśca bhītā yaṃ vakti kiṃ tasmātparamaṃ bhavet

35.21

akāṃḍe yacca brahmāṃḍakṣayodyuktaṃ halāhalam || kaṇṭhe dadhāra śrīkaṇṭhaḥ kastasmātparamo bhavet

35.22

duḥkhatāṃḍavadīno'bhūddaṇḍasaṃkīrṇamānasaḥ || māramāraśca yo devaḥ kastasmātparamo bhavet

35.23

viyadvyāpī surasaritpravāho vipruṣākṛtiḥ || babhūva yasya śirasi kastasmātparamo bhavet

35.24

yajñādikāśca ye dharmā vinā yasyārcanaṃ vṛthā || dakṣo'tra satyahadghātaḥ kastasmātparamo bhavet

35.25

kṣoṇī ratho vidhiyaṃtā śaro'haṃ mandaro dhanuḥ || rathāṃge cāpi caṃdrākau yuddhe yasya ca trepure

35.26

ārādhanaṃ tasya kecidyogamārgeṇa kurvate || duḥkhasādhyaṃ hi tatteṣāṃ nityaṃ śūnyamupāsatām

35.27

tasmāttasyārcayelliṃgaṃ bhuktimuktī ya icchati || sṛṣṭayādau liṃgarūpī sa vivādo mama brahmaṇaḥ

35.28

abhūdyasya paricchede nālamāvāṃ babhūviva || carācaraṃ jagatsarvaṃ yato līnaṃ sadātre ca

35.29

tasmālliṃgamiti proktaṃ devai rudrasya dhīmataḥ || toyena snāpayelliṃgaṃ śraddhayā śucināṃ ca yaḥ

35.30

brahmāditṛṇaparyaṃtaṃ tenedaṃ tarpitaṃ jagat || paṃcāmṛtena talliṃgaṃ snāpayedyaśca buddhimān

35.31

tarpitaṃ tena viśvaṃ syātsudhayā pitṛbhiḥ samam || puṣpairabhyarcayelliṃgaṃ yathākālodbhavaiśca yaḥ

35.32

tena saṃpūjitaṃ viśvaṃ sakalaṃ nātra saṃśayaḥ || naivedyaṃ tatra yo dadyālliṃgasyāgre vicakṣaṇaḥ

35.33

bhojitaṃ tena viśvaṃ syālliṃgasyaivaṃ phalaṃ mahat || kimatra bahunoktena svalpaṃ vā yadi vā bahu

35.34

liṃgasya kriyate yacca tatsarvaṃ viśvaprītidam || tacca liṃgaṃ sthāpayedyaḥ
śucau deśe subhaktitaḥ

35.35

sa sarvapāpanirmukto rudraloke pramodate || yannityaṃ yajato yajñaiḥ phalamāhurmanīṣiṇaḥ

35.36

tacca sthāpayato
liṃgaṃ śivasya śubhalakṣaṇam || yathāgniḥ sarvadevānāṃ mukhaṃ skanda prakīrtyate

35.37

tathaiva sarvajagatāṃ mukhaṃ liṃgaṃ na saṃśayaḥ || prāraṃbhānmucyate pāpaiḥ
sarvajanmakṛtairapi

35.38

atītaṃ ca tathāgāmi kulānāṃ tārayecchatam || mṛnmayaṃ kāṣṭhaniṣpannaṃ pakeṣṭaṃ śailameva ca

35.39

kṛtamāyatanaṃ dadyātkamā
cchataguṇaṃ phalam || kalaśaṃ tatra cāropya ekaviṃśatkulairyutaḥ

35.40

ākalpāṃtaṃ rudraloke modate rudravatsukhī || evaṃvidhaṃphalaṃ liṃgamato
bhūyo'pyadho na hi

35.41

tasmādatra mahāsena liṃgaṃ sthāpitumarhasi || yaduktametadśīlaṃ yadi kiṃcana cātra cet

35.42

tadvītu mahā
sena svayaṃ sākṣī maheśvaraḥ || evaṃ vadati goviṃde sādhuvādo mahānabhūt

35.43

mahādevo hyathāliṃgya skandaṃ vacanamabravīt || yadbhavānmama bhakteṣu
prakaroti kṛpāṃ parām

35.44

tenāpi paramā prītirmama jātā tavopari || kiṃ tu yadbhagavānāha vāsudevo jagadguruḥ

35.45

tattathā nānyathā kiṃci
datra proktaṃ hi viṣṇunā || yo hyahaṃ sa harirjñeyo yo hariḥ so'hamityuta

35.46

nāvayoraṃtaraṃ kiṃciddīpayoriva suvrata || enaṃ dveṣṭi sa māṃ dveṣṭi
yonvetyenaṃ sa māṃ'nugaḥ

35.47

iti skanda vijānāti sa madbhaktonyathā na hi

35.48

skanda uvāca || || evamevāsmi jānāmi tvāṃ ca viṣṇuṃ
ca śaṃkara

35.49

yacca liṃgakṛte prāha harirmāṃ dharmavatsalaḥ || khe vāṇī tārakavadhe evameva purāha mām

35.50

liṃgaṃ saṃsthāpayiṣyāmi sarvapāpā
pahaṃ tataḥ || ekaṃ yatra pratijñā me gṛhītāsya vadhāya ca

35.51

dvitīyaṃ yatra niḥsattvastyaktaḥ śaktyā'suro'bhavat || tṛtīyaṃ yatra nihato hatyā
pāpopaśāṃtidam

35.52

ityuktvā viśvakarmāṇamāhūya prāha pāvakiḥ || trīṇi liṃgāni śuddhāni śīghraṃ tvaṃ kartumarhasi

35.53

vacanādvāhuleyasya
nirmame devavarddhakiḥ || trīṇi liṃgāni śuddhāni nyavedayata tāni ca

35.54

tato brahmādibhiḥ sārdhaṃ viṣṇunā śaṃkareṇa ca || pūrvaṃ saṃsthāpayāmāsa
paścimāyāmadūrataḥ

35.55

pratijñeśvaramityeva liṃgaṃ paramaśobhanam || aṣṭamyāṃ bahule cātra cetre snātvā upoṣya ca

35.56

pūjāṃ ca jāgaraṃ kṛtvā
mucyetpāruṣyapāpataḥ || ityāha skaṃdaprītyarthaṃ svayaṃ tatra maheśvaraḥ

35.57

tato dvitīyaṃ liṃgaṃ tu vahnikoṇāśritaṃ tathā || sthāpayāmāsa saraso yatra
śaktirviniryayau

35.58

kapāleśvaramityeva liṃgaṃ pāpāpahaṃ śubham || śaktiṃ ca tāmabhiṣṭya sthāpayāmāsa tatra ca

35.59

kapāleśvarasāṃnidhyaṃ
devīṃ kāpālikeśvarīm || tatra cottaradigbhāge śakticchidraṃ pracakṣate

35.60

pātālagaṃgā yatrāsti sarvapāpaharā śivā || tatra snātvā dadau skaṃdaḥ
kṛpayābhipariplutaḥ

35.61

tadā toyaṃ tārakāya sahitaḥ sarvadaivataiḥ

35.62

kāśyapeyāya vajrāṃgatanayāya mahātmane || rudrabhaktāya satilamakṣyayo
dakamastviti

35.63

tato maheśvaraḥ prītaḥ prāha skaṃdasya śṛṇvataḥ || caturdaśyāṃ kṛṣṇapakṣe maghau caivātra yo naraḥ || snātvopoṣya samabhyarcya kapāle
śvaramīśvarīm

35.64

tejovadhasamudbhūtapātakena sa mucyate

35.65

asyāmeva tithau somaḥ śivayogaśca taitilam || ṣaḍyogaḥ śakticchidre
yo dinaṃ rudraṃ japanniśi || snātvātra saśarīro vai rudralokaṃ vrajiṣyati

35.66

kapāleśasya sāṃnidhye śakticchidraṃ hi kīrtyate || tasya tulyaṃ
paraṃ tīrthaṃ pṛthivyāṃ naiva vidyate

35.67

iti śrutvā rudravākyaṃ skaṃdaḥ prīto'bhavadbhṛśam || devāśca muditāḥ sarve sādhusādhiti te jaguḥ

35.67.p1

iti śrīskaṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe kumārasthāpitapratijñeśvaraśakticchidreśvara māhātmyavarṇanaṃ nāma trayastriṃśo'dhyāyaḥ

Linked texts (6)