Pramāṇa · Search · About · API

Prabhasakhanda 3

Prabhāsakhaṇḍa 3

Language
Sanskrit

Contents

3.1

śrīprahlāda uvāca || || evaṃ saṃpūjitastena hariṇā brāhmaṇottamaḥ || uvāca parituṣṭo varaṃ brūhīti keśavam

3.2

śrīkṛṣṇa uvāca || || yadi tuṣṭo'si bhagavanyadi deyo varo mama || sthātavyamatra bhavatā na tyaktavyaṃ kadācana

3.3

durvāsā uvāca || || yadi tiṣṭhāmyahaṃ kṛṣṇa tathā tvamapi keśava || tiṣṭhasva ṣoḍaśakalo nityaṃ madvacanena hi

3.4

śrīkṛṣṇa uvāca || || ye'tra paśyanti bhaktyā tvāṃ māṃ cāpi dvijasattama || kiṃ dāsyasi phalaṃ teṣāṃ bhāvināṃ bhagavanvada

3.5

durvāsā uvāca || || yaḥ snātvā saṃgame kṛṣṇa gomatyāḥ sāgarasya ca || tvāṃ māṃ samarcayeti naraḥ sarvapāpaiḥ sa mucyate

3.6

tathānyacchṛṇu kṛṣṇātra snātvā dāsyati yaddhanam || mama dattasya deveśa prāpnuyātṣoḍaśottaram

3.7

śrīkṛṣṇa
uvāca || || yo naraḥ pūjayitvā tvāṃ pūjayiṣyati māmiha || tasya muktiṃ pradāsyāmi yā surairapi durlabhā

3.8

prahlāda uvāca || || paraṃ
sparaṃ varau dattvā kṛṣṇadurvāsasau mudā || tataḥ prabhṛti viprendrāstasminsthāne hyatiṣṭhatām || varadānamiti proktaṃ tattīrthaṃ sarvakāmadam

3.9

varadāne
naraḥ snāto gosahasraphalaṃ labhet || viṣṇudurvāsasoryatra varadānamabhūtpurā

3.10

tadāprabhṛti viprendrāstiṣṭhate dvārakāṃ hariḥ || durvāsasā girā
baddho na jahāti kadācana

3.11

yatra traivikramī mūrbirvahate yatra gomatī || narā muktiṃ prayāsyanti cakratīrthena saṃgatāḥ

3.12

kalevaraṃ parityaktaṃ prabhāse hariṇā yadā || kalābhiḥ sahitaṃ tejastasyāṃ mūrtau niveśitam

3.13

tasmātkaliyuge viprā nānyatra
prāpyate hariḥ || yadi kāryaṃ hi kṛṣṇena tatra gacchata mā ciram

3.14

ṛṣaya ūcuḥ || || sādhu bhāgavataśreṣṭha sādhu mārgaprada
śaka || yattvayā hi parijñātaṃ tatra jānāti kaścana

3.15

kiṃ phalaṃ gamane tasyāṃ kiṃ phalaṃ kṛṣṇadarśane || kāni tīrthāni tatraiva ke devāstaddasva
naḥ

3.16

kasminmāse tithau kasyāṃ kasminparvaṇi mānavaiḥ || gantavyaṃ kāni deyāni dānāni danujarṣabha

3.17

sūta uvāca
iti pṛṣṭastadā taistu mahābhāgavato'suraḥ || kathayāmāsa viprebhyo bhagavadbhaktisaṃyutaḥ

3.18

prahlāda uvāca || || bho bhūmidevāḥ śṛṇuta
paraṃ guhyaṃ sanātanam || yatkasyacinna cākhyātaṃ tadvadāmi suvistarāt

3.19

yadā matiṃ ca kurute dvārakāgamanaṃ prati || tadā narakanimuktā
gāyanti pitaro divi

3.20

yāvatpadāni kṛṣṇasya mārge gacchati mānavaḥ || padepade'śvamedhasya yajñasya labhate phalam

3.21

yātrārthaṃ deva
devasya yaḥ prerayati cāparān || mānavānnātra sandeho labhate vaiṣṇavaṃ padam

3.22

dvārakāṃ gacchamānasya yo dadāti pratiśrayam || tathaiva madhuraṃ
vācaṃ nandate krīḍate hi saḥ

3.23

adhvani śrāṃtadehasya vāhanaṃ yaḥ prayacchati || haṃsayuktena sa naro vimānena divaṃ vrajet

3.24

yātrāyāṃ
gacchamānasya madhyāhne kṣudhitasya ca || annaṃ dadāti yo bhaktyā śṛṇu tasyāpi yadbhavet

3.25

gayāśrāddhena yatpuṇyaṃ labhate mānavo bhuvi
annadānena tatpuṇyaṃ pitṝṇāṃ tṛptirakṣayā

3.26

upānahau tu yo dadyāddvārakāṃ prati gacchatām || kṛṣṇaprasādātsa naro gajaskandhena gacchati

3.27

vighnamācarate yastu dvārakāṃ prati gacchatām || narake majjate mūḍhaḥ kalpamātraṃ tu raurave

3.28

mārgasthitasya yo dhanyaḥ prayacchati
kamaṇḍalum || prapādānasahasrasya phalamāpnoti mānavaḥ

3.29

yātrāyāṃ gacchamānasya pādābhyaṃgaṃ dadāti yaḥ || pādaprakṣālanaṃ caiva sarvānkāmāna
vāyuyāt

3.30

gāthāṃ śṛṇoti yo viṣṇorgītaṃ ca gāyataḥ pathi || dānaṃ dadāti viprendrāstasmādnyataro na hi

3.31

kailāsaśikharāvāsaṃ
śvetāśramiva nirmalam || prāsādaṃ kṛṣṇadevasya yaḥ paśyati narottamaḥ

3.32

dūrāddhemamayaṃ dṛṣṭvā kalaśaṃ dhvajasaṃyutam || vāhanaṃ saṃparityajya luṭhate
dharaṇīṃ gataḥ

3.33

paścasūnākṛtaṃ pāpaṃ tathā'dhamakṛtaṃ ca yat || kṛmikīṭapataṃgāśca nihitāḥ pathi gacchatā

3.34

parāṉnaṃ parapānīyamaspṛśya
sparśasaṃgamam || tatsarvaṃ nāśamāpnoti bhagavatketudarśanāt

3.35

paṭhennāmasahasraṃ tu stavarājamathāpi vā || gajendramokṣaṇaṃ caiva pathi gacchañchanaiḥ
śanaiḥ

3.36

gāyamāno bhagavataḥ prādurbhāvānanekadhā || nṛtyadbhirharṣasaṃyuktairhṛṣyamāṇaḥ punaḥpunaḥ || svayaṃ nṛtyanharṣayukto bhakto gaccheddhareḥ
puram

3.37

viṣṇoḥ krīḍākaraṃ sthānaṃ muktimuktipradāyakam || yasmindṛṣṭe kalau nṛṇāṃ muktirevopajāyate

3.38

prahlāda uvāca
pūrvaṃ hi devarājena bṛhaspatirudāradhīḥ || praṇamya parayā bhaktyā pṛṣṭaśca sa mahāmatiḥ

3.39

indra uvāca || || dvārakāyāśca māhātmyaṃ katha
yasva prasādataḥ || caturyugaṃ yathābhāgairdharmavṛddhiṃ jano labhet

3.40

etacchrutvā mahendrasya vacanaṃ munisattamāḥ || bṛhaspatiruvācainaṃ mahendraṃ deva
saṃvṛtam

3.41

bṛhaspatiruvāca || || kṛtaṃ tretā dvāparaṃ ca kaliśca surasattama || caturyugamidaṃ proktaṃ tattvato munisattamaiḥ

3.42

kṛte
dharmaścatuṣpādo vedādiphalameva ca || tīrthaṃ dānaṃ tapo vidyā dhyānamāpurarogatā

3.43

pādahīnaṃ sarvametadyugaṃ tretābhidhaṃ prabho || pādadvayaṃ dvāpare tu
sarvasyaitasya vāsava

3.44

pādenaikena tatsarvaṃ vibhāge prathame kalau || ūrdhvaṃ vināśaḥ sarvasya bhaviṣyati na saṃśayaḥ

3.45

mantrāstīrthāni
yajñāśca tapo daivādikaṃ tathā || pragacchaṃti samucchedaṃ vedāḥ śāstrāṇi caiva hi

3.46

mlecchaprāyāśca bhūpālā bhaviṣyantyamarādhipa || lokaḥ kariṣyate
nindāṃ sādhūnāṃ vratacāriṇām

3.47

prahlāda uvāca || || śrutvā bṛhaspatervākyametattīrthasya bho dvijāḥ || prakaṃpitāḥ surāḥ sarve mleccha
saṃsargajādbhayāt

3.48

bṛhaspatiṃ suraguruṃ papracchurvinayānvitāḥ || mlecchasaṃsargajo doṣo gaṃgayāpi na pūyate

3.49

kathayasva prasādena sthānaṃ
kalivivarjitam || yatra gatvā nivatsyāmo yāsyāmo nirvṛtiṃ parām

3.50

yena duḥkhavinirmuktā bhaviṣyāmo gatavyathāḥ || kṛpayā sumukho bhūtvā
brūhi tīrthaṃ hitāya naḥ

3.51

prahlāda uvāca || || etacchrutvā surendrasya vākyamaṃgirasāṃ varaḥ || ciraṃ dhyātvā jagādedaṃ vākyaṃ devapurohitaḥ

3.52

bṛhaspatiruvāca || || pañcakrośapramāṇaṃ hi tīrthaṃ tīrthavarottamam || dvārakānāma vikhyātaṃ kalidoṣavivarjitam

3.53

viṣṇunā nirmitaṃ
sthānaṃ lokasya gatidāyakam || muktidaṃ kalikāle tu jñānahīnajanasya ca

3.54

ūṣaraṃ karmaṇāṃ kṣetraṃ puṇyaṃ pāpavināśanam || na prarohati pāpāni
punarnaṣṭāni tatra vai

3.55

tisraḥ koṭacordhvakoṭī ca tīrthānīha mahītale

3.56

evaṃ tīrthayutā tatra dvārakā muktidāyakā || sevanīyā prayatnena prāpya manuṣyamuttamam

3.57

prahlāda uvāca || bṛhaspatervacaḥ śrutvā śatakraturathābravīt || vācaspate mama brūhi dvāravatyā mahodayam || gamane kiṃ phalaṃ proktaṃ kṛṣṇadevasya darśane

3.58

anyāni tatra tīrthāni mukhyāni vada me guro || yathābhiṣeke gomatyāḥ phalaṃ yadapi saṃgame

3.59

bṛhaspatiruvāca || || śṛyatāṃ tāta vakṣyāmi māhātmyaṃ dvārakodbhavam || manuṣyarūpo bhagavānyatra krīḍati keśavaḥ

3.60

nārāyaṇaḥ sa īśāno dhyeyaścādau jaganmayaḥ || sa eva devatāmukhyaḥ purīṃ dvāravatīṃ sthitaḥ

3.61

ekaikasminpade datte purīṃ dvāravatīṃ prati || puṇyaṃ kratusahasreṇa kalau bhavati dehinām

3.62

kalau kṛṣṇapurīṃ ramyāṃ ye gacchaṃti narottamāḥ || kulakoṭiśatairyuktāste gacchanti hareḥ padam

3.63

ye dhyāyaṃti manovṛttyā gamanaṃ dvārakāṃ prati || teṣāṃ vilīyate pāpaṃ pūrvajanmārjutaiḥ kṛtam

3.64

kṛṣṇasya darśane buddhirjāyate yasya dehinaḥ || vakrāvalokanāttasya pāpaṃ yāti sahasradhā

3.65

ye gatā dvārakāyāṃ ca ye mṛtāḥ kṛṣṇasannidhau || na teṣāṃ punarāvṛttiryāvadābhūtasaṃplavam

3.66

kulabhā mathurā kāśī hyavantī ca tathā surāḥ || ayodhyā kulabhā loke durlabhā dvārakā kalau

3.67

gatvā kṛṣṇapurīṃ ramyāṃ ṣaṇmāsātkṛṣṇasannidhau || jīvanmuktāstu te jñeyāḥ satyametatsurottama

3.68

kṛṣṇakrīḍākaraṃ sthānaṃ vāñchanti manasā priye || teṣāṃ hṛdi sthitaṃ pāpaṃ kṣālayetpretanāyakaḥ

3.69

atyugrāṇyapi pāpāni tāvattiṣṭhanti vigrahe || yāvanna gacchati naraḥ kalau dvāravatīṃ prati

3.70

puṇyasaṃkhyā ca tīrthānāṃ brahmaṇā vihitā purā || dānādhyayana saṃjñānāṃ muktā dvāravatī kalau

3.71

cakratīrthe tu yo gacchetprasaṃgenāpi mānavaḥ || kulaikaviṃśatiyutaḥ sa gacchetparamaṃ padam

3.72

lobhenā'pyaparādhena dambhena kapaṭena vā || cakratīrthaṃ ca yo gacchenna punarviṃśate bhavam

3.73

prayāge hyasthipātena yatphalaṃ parikīrtitam || tadeva śatasāhasraṃ cakratīrthāsthipātanāt

3.74

pṛthivyāṃ caiva tattīrthaṃ paramaṃ parikīrtitam || cakratīrthamiti khyātaṃ brahmahatyāvināśanam

3.75

yeye kule bhaviṣyaṃti tatpūrvaṃ mānavāḥ kṣitau || sarve viṣṇupuraṃ yāṃti cakratīrthāsthipātanāt

3.76

kiṃ jātairbahubhiḥ putrairgaṇanāpūrakātmakaiḥ || varameko bhavetputraścakratīrthaṃ tu yo vrajet

3.77

tapasā kiṃ prataptena dānenādhyayanena kim || sarvāvastho'pi mucyeta gataḥ kṛṣṇapurīṃ yadi

3.78

kalikāla kṛtedoṣairatyugrairapi mānavaḥ || kalau kṛṣṇamukhaṃ dṛṣṭvā lipyate na kadācana

3.79

dānaṃ cādhyayanaṃ śaucaṃ kāraṇaṃ na hi putraka || hīnavarṇo'pi pāpātmā gataḥ kṛṣṇapurīṃ yadi

3.80

vārāṇasyāṃ kurukṣetre narmadāyāṃ ca yatphalam || tatphalaṃ nimiṣārdhena dvāravatyāṃ dinedine

3.81

dhanyā
nāmapi dhanyāste devānāmapi devatāḥ || kṛṣṇopari matiryeṣāṃ hīyate na kadācana

3.82

śravaṇadvādaśīyoge gomatyudadhisaṃgame || snātvā kṛṣṇa
mukhaṃ dṛṣṭvā lipyate naiva sa kacit

3.83

yasya kasyāpi māsasya dvādaśīṃ prāpya mānavaḥ || kṛṣṇakrīḍāpurīṃ dṛṣṭvā muktaḥ saṃsāragahvarāt

3.84

yeṣāṃ kṛṣṇālaye prāṇā gatāḥ surapate kalau || svargānna teṣāmāvṛttiḥ kalpakoṭiśatairapi

3.85

vijñeyā mānuṣā vatsa garbhasthāste mahītale
dvāravatyāṃ na yairdevo dṛṣṭaḥ kaṃsaniṣūdanaḥ

3.86

durlabho dvārakāvāso durlabhaṃ kṛṣṇadarśanam || durlabhaṃ gomatīsnānaṃ durlabho rukmiṇīpatiḥ

3.87

tapaḥ paraṃ kṛtayuge tretāyāṃ jñānamucyate || dvāpare tu paro yajñaḥ kalau keśavakīrtanam

3.88

hemabhārasahasraistu dattairyatphalamāpyate || dṛṣṭvā tatkoṭi
guṇitaṃ hareḥ sarvapradaṃ mukham

3.89

dvārakāyāṃ ca yadattaṃ śaṃkhoddhāre tathaiva ca || piṃḍārake mahātīrthaṃ dattaṃ caivākṣayaṃ bhavet

3.90

gomahiṣyādi
yadattaṃ suvarṇavasanāni ca || vṛṣo bhūmigraho rūpyaṃ kanyādānaṃ tathaiva ca

3.91

yaccānyadapi devendra triṣu sthāneṣu yacchati || tanmuktikārakaṃ proktaṃ
pitṝṇāmātmanastathā

3.92

ūṣaraṃ hi yato loke kṣetrametatprakīrtitam || ato muktikaraṃ sarvaṃ dānaṃ coktaṃ maharṣibhiḥ

3.93

yatkiṃcitkurute
tatra dānaṃ krīḍāvagāhanam || tadanantaphalaṃ prāha bhagavānmadhusūdanaḥ

3.94

pretatvaṃ naiva tasyāsti na yāmyā nārakī vyathā || yena dvāravatīṃ gatvā
kṛtaṃ kṛṣṇāvalokanam

3.95

vārimātreṇa gomatyāṃ piṇḍadāne kṛte kalau || pitṝṇāṃ jāyate tṛptiryāvadābhūtasaṃplavam

3.96

nityaṃ kṛṣṇapurīṃ
ramyāṃ ye smaranti gṛhasthitāḥ || namasyāḥ sarvalokānāṃ devānāṃ ca surottama

3.97

brahmajñānaṃ gayāśrāddhaṃ maraṇaṃ gograheṣu ca || vāsaḥ puṃsāṃ dvāre
kāyāṃ muktireṣā caturvidhā

3.98

brahmajñānena mucyante prayāge maraṇena vā || athavā snānamātreṇa gomatyāṃ kṛṣṇasaṃnidhau

3.99

kṛtārthaḥ kṛta
puṇyo'haṃ bravītyevaṃ mahodadhiḥ || pavitritaṃ ca mantrātraṃ gomatīvārisaṃplutāt

3.100

atyugrāṇyapi pāpāni tāvattiṣṭhanti vigrahe || yāvatsnānaṃ na
gomatyāṃ vāriṇā pāpahāriṇā

3.101

cakratīrthe naraḥ snātvā gomatyāṃ rukmiṇīhrade || dṛṣṭvā kṛṣṇamukhaṃ ramyaṃ kulānāṃ tārayecchatam

3.102

kṛṣṇaṃ ca ye dvāravatīṃ manuṣyāḥ smaraṃti nityaṃ haribhaktiyuktāḥ || vidhūtapāpāḥ kila saṃbhavaṃte gacchaṃti lokaṃ paramaṃ murāreḥ

3.103

adhautapādaḥ prathamaṃ namaskuryādgaṇeśvaram || sarvavighnavināśaśca jāyate nātra saṃśayaḥ

3.104

nīlotpaladalaśyāmaṃ kṛṣṇaṃ devakinandanam || daṇḍa
vatpraṇametprītyā praṇamedyajaṃ punaḥ

3.105

bālye ca yatkṛtaṃ pāpaṃ kaumāre yauvane tathā || darśanātkṛṣṇadevasya tannaśyennātra saṃśayaḥ

3.106

vāṇyāstha manasā yacca karmaṇā samupārjitam || pāpaṃ janmasahasreṇa tannaśyennātra saṃśayaḥ

3.107

hemabhārasahasraistu dattairyatphalamāpyate
tatatphalaṃ koṭiguṇitaṃ kṛṣṇavaktrāvalokanāt

3.108

namaskṛtya ca deveśaṃ puṇḍarīkākṣamacyutam || durvāsasaṃ maheśānaṃ dvārakāparirakṣakam

3.109

praṇamya parayā bhaktyā vainateyasamanvitam || dvāramāgatya ca punaḥ svargadvāropamaṃ śubham

3.110

viśramya ca muhūrtārdhaṃ suhṛdbhirbāndhavairvṛtaḥ || tatrā
śritānsamāhūya brāhmaṇānmantrakovidān || pūjādravyaṃ samānīya tatastīrthaṃ vrajedyudhaḥ

3.110.p1

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye dvārakāyātrāvidhivarṇanaṃnāma caturtho'dhyāyaḥ

Linked texts (7)