Pramāṇa · Search · About · API

Satyanarayanavratakatha 3

Satyanārāyaṇavratakathā 3

Language
Sanskrit

Contents

3.1

rājā ulkāmukha, sādhu vaṇik evaṃ līlāvatī-kalāvatīkī kathā
sūta uvāca
punaragre pravakṣyāmi śṛṇudhvaṃ munisattamāḥ| purā colkāmukho nāma nṛpaścāsīnmahāmatiḥ

3.2

jitendriyaḥ satyavādī yayau devālayaṃ prati| dine dine dhanaṃ dattvā dvijān saṃtoṣayat sudhīḥ

3.3

bhāryā tasya pramugdhā ca sarojavadanā satī| bhadraśīlānadītīre satyasya vratamācarat

3.4

etasminnantare tatra sādhurekaḥ samāgataḥ| vāṇijyarthaṃ bahudhanairanekaiḥ paripūritaḥ

3.5

nāvaṃ saṃsthāpya tattīre jagāma nṛpatiṃ prati| dṛṣṭvā sa vratinaṃ bhūpaṃ papraccha vinayānvitaḥ

3.6

sādhuruvāca
kimidaṃ kuruṣe rājan bhaktiyuktena cetasā| prakāśaṃ kuru tatsarvaṃ śrotumicchāmi sāmpratam

3.7

rājovāca
pūjanaṃ kriyate sādho viṣṇoratulatejasaḥ| vrataṃ ca svajanaiḥ sārdhaṃ putrādyāvāptikāmyayā

3.8

bhūpasya vacanaṃ śrutvā sādhuḥ provāca sādaram| sarvaṃ kathaya me rājan kariṣye'haṃ tavoditam

3.9

mamāpi saṃtatirnāsti hyetasmājjāyate dhruvam| tato nivṛtya vāṇijyāt sānando gṛhamāgataḥ

3.10

bhāryāyai kathitaṃ sarvaṃ vrataṃ saṃtatidāyakam| tadā vrataṃ kariṣyāmi yadā me saṃtatirbhavet

3.11

iti līlāvatīṃ prāha patnīṃ sādhuḥ sa sattamaḥ
ekasmin divase tasya bhāryā līlāvatī satī

3.12

bhartṛyuktānandacittā'bhavad dharmaparāyaṇā| garbhiṇī sā'bhavat tasya bhāryā satyaprasādataḥ

3.13

daśame māsi vai tasyāḥ kanyāratnamajāyata| dine dine sā vavṛdhe śuklapakṣe yathā śaśī

3.14

nāmnā kalāvatī ceti tannāmakaraṇaṃ kṛtam| tato līlāvatī prāha svāminaṃ madhuraṃ vacaḥ

3.15

na karoṣi kimarthaṃ vai purā saṃkalpitaṃ vratam
sādhuruvāca
vivāhasamaye tvasyāḥ kariṣyāmi vrataṃ priye

3.16

iti bhāryāṃ samāśvāsya jagāma nagaraṃ prati| tataḥ kalāvatī kanyā vavṛdhe pitṛveśmani

3.17

dṛṣṭvā kanyāṃ tataḥ sādhurnagare sakhibhiḥ saha| mantrayitvā drutaṃ dūtaṃ preṣayāmāsa dharmavit

3.18

vivāhārthaṃ ca kanyāyā varaṃ śreṣṭhaṃ vicāraya| tenājñaptaśca dūto'sau kāñcanaṃ nagaraṃ yayau

3.19

tasmādekaṃ vaṇikputraṃ samādāyāgato hi saḥ| dṛṣṭvā tu sundaraṃ bālaṃ vaṇikputraṃ guṇānvitam

3.20

jñātibhirbandhubhiḥ sārdhaṃ parituṣṭena cetasā| dattavān sādhuputrāya kanyāṃ vidhividhānataḥ

3.21

tato'bhāgyavaśāt tena vismṛtaṃ vratamuttamam| vivāhasamaye tasyāstena ruṣṭo'bhavat prabhuḥ

3.22

tataḥ kālena niyato nijakarmaviśāradaḥ | vāṇijyyārthaṃ tataḥ śīghraṃ jāmātṛsahito vaṇik

3.23

ratnasārapure ramye gatvā sindhusamīpataḥ | vāṇijyamakarot sādhurjāmātrā śrīmatā saha

3.24

tau gatau nagare ramye candraketornṛpasya ca | etasminneva kāle tu satyanārāyaṇaḥ prabhuḥ

3.25

bhraṣṭapratijñamālokya śāpaṃ tasmai pradattavān | dāruṇaṃ kaṭhinaṃ cāsya mahad duḥkhaṃ bhaviṣyati

3.26

ekasmin divase rājño dhanamādāya taskaraḥ | tatraiva cāgataścauro vaṇijau yatra saṃsthitau

3.27

tatpaścād dhāvakān dūtān dṛṣṭvā bhītena cetasā | dhanaṃ saṃsthāpya tatraiva sa tu śīghramalakṣitaḥ

3.28

tato dūtāḥ samāyātā yatrāste sajjano vaṇik | dṛṣṭvā nṛpadhanaṃ tatra baddhvā''nītau vaṇiksutau

3.29

harṣeṇa dhāvamānāśca procurnṛpasamīpataḥ | taskarau dvau samānītau vilokyājñāpaya prabho

3.30

rājñā''jñaptāstataḥ śīghraṃ dṛḍhaṃ badhvā tu tāvubhau | sthāpitau dvau mahādurge kārāgāre'vicārataḥ

3.31

māyayā satyadevasya na śrutaṃ kaistayorvacaḥ | atastayordhanaṃ rājñā gṛhītaṃ candraketunā

3.32

tacchāpācca tayorgehe bhāryā caivātiduḥkhitā| caureṇāpahṛtaṃ sarvaṃ gṛhe yacca sthitaṃ dhanam

3.33

ādhivyādhisamāyuktā kṣutpipāsātiduḥkhitā| annacintāparā bhūtvā babhrāma ca gṛhe gṛhe

3.34

kalāvatī tu kanyāpi babhrāma prativāsaram
ekasmin divase yātā kṣudhārtā dvijamandiram | gatvā'paśyad vrataṃ tatra satyanārāyaṇasya ca

3.35

upaviśya kathāṃ śrutvā varaṃ prārthitavatyapi | prasādabhakṣaṇaṃ kṛtvā yayau rātrau gṛhaṃ prati

3.36

mātā kalāvatīṃ kanyāṃ kathayāmāsa premataḥ | putri rātrau sthitā kutra kiṃ te manasi vartate

3.37

kanyā kalāvatī prāha mātaraṃ prati satvaram | dvijālaye vrataṃ mātardṛṣṭaṃ vāñchitasiddhidam

3.38

tacchrutvā kanyakāvākyaṃ vrataṃ kartuṃ samudyatā | sā mudā tu vaṇigbhāryā satyanārāyaṇasya ca

3.39

vrataṃ cakre saiva sādhvī bandhubhiḥ svajanaiḥ saha | bhartṛjāmātarau kṣipramāgacchetāṃ svamāśramam

3.40

aparādhaṃ ca me bharturjāmātuḥ kṣantumarhasi | vratenānena tuṣṭo'sau satyanārāyaṇaḥ punaḥ

3.41

darśayāmāsa svapnaṃ hi candraketuṃ nṛpottamam | vandinau mocaya prātarvaṇijau nṛpasattama

3.42

deyaṃ dhanaṃ ca tatsarvaṃ gṛhītaṃ yat tvayā'dhunā | no cet tvāṃ nāśayiṣyāmi sarājyadhanaputrakam

3.43

evamābhāṣya rājānaṃ dhyānagamyo'bhavat prabhuḥ | tataḥ prabhātasamaye rājā ca svajanaiḥ saha

3.44

upaviśya sabhāmadhye prāha svapnaṃ janaṃ prati | baddhau mahājanau śīghraṃ mocaya dvau vaṇiksutau

3.45

iti rājño vacaḥ śrutvā mocayitvā mahājanau | samānīya nṛpasyāgre prāhuste vinayānvitāḥ

3.46

ānītau dvau vaṇikputrau muktau nigaḍabandhanāt | tato mahājanau natvā candraketuṃ nṛpottamam

3.47

smarantau pūrvavṛttāntaṃ nocaturbhayavihvalau | rājā vaṇiksutau vīkṣya vacaḥ provāca sādaram

3.48

daivāt prāptaṃ mahadduḥkhamidānīṃ nāsti vai bhayam| tadā nigaḍasaṃnyāgaṃ kṣaurakarmādyakārayat

3.49

vastrālaṅkārakaṃ dattvā paritoṣya nṛpaśca tau| puraskṛtya vaṇikputrau vacasā'toṣayad bhṛśam

3.50

purānītaṃ tu yad dravyaṃ dviguṇīkṛtya dattavān| provāca ca tato rājā gaccha sādho nijāśramam

3.51

rājānaṃ praṇipatyāha gantavyaṃ tvatprasādataḥ| ityuktvā tau mahāvaiśyau jagmatuḥ svagṛhaṃ prati

3.51.p1

iti śrīskandapurāṇe revākhaṇḍe śrīsatyanārāyaṇavratakathāyāṃ tṛtīyo'dhyāyaḥ || 3

Linked texts (5)