Nandipurana 1.10

1.10.1

vaśiṣṭha uvāca
sāmavedataroḥ śākhā vyāsaśiṣyaḥ sa jaiminiḥ
krameṇa yena maitreya vibheda śṛṇu tānmama

First, a drought occurs for a hundred years;
winds also blow then, causing distress to people.

1.10.2

sumaṃtustasya śiṣyo'bhūtsudhanvāsyāpyabhūtsutaḥ
adhītavaṃtāvekaikāṃ saṃhitāṃ tau mahāmunī

1.10.3

sahasrasaṃhitābhedaṃ sukarmā tatsutaḥ smṛtaḥ
cakāra taṃ ca tacchiṣyau jagṛhāte mahāmatī

1.10.4

hiraṇyanābhaḥ kauśalyaḥ paupiṃjiśca dvijottama
gṛhitāste'pi cocyante paṃḍitaiḥ prācyasāmagāḥ

1.10.5

laugākṣiḥ kṣuthubhiścaiva kusīdirlāṃgalistathā
paupiṃjiśiṣyaistadbhedaiḥ saṃhitā bahulīkṛtā

1.10.6

hiraṇyanābhaśiṣyāṇāṃ caturviṃśatisaṃhitāḥ
taiścāpisāmavedo'sau śākhābhirbahulīkṛtaḥ

1.10.7

atharvāṇamathovakṣye saṃhitānāṃ samuccayam
atharvavedaṃ sa muniḥ sumaṃturamitadyutiḥ

1.10.8

śiṣyamadhyāpayāmāsa kravaṃdhaṃ so'pi taddvidhā
kṛtvātu devadarśāya tathā'padvāya dattavān

1.10.9

devadarśasya śiṣyastu mauṃjobrahmabalistathā
śolkāyaniḥ pippalādastathānyo munisattama

1.10.10

pathyasyāpi trayaḥ śiṣyāḥ kṛtā yairdvijasaṃhitā
jāvāliḥ kumudādiśca tṛtīyaḥ śaunakodvijaḥ

1.10.11

śaunakastu dvidhā kṛtvā dadāvekāntababhrave
saindhavāyanasaṃjñāya dvitīyāṃ saṃhitāṃ dadau

1.10.12

saiṃdhavā muṃjakeśāśca bhinnabhedā dvidhā punaḥ
nakṣatrakalpo vaitānaḥ saṃhitānāṃ vikalpakaḥ

1.10.13

ākhyānaiścāpyupākhyānaiḥkathābhiḥ kalpaśuddhibhiḥ
purāṇasaṃhitāṃ cakre purāṇārthaviśāradaḥ

1.10.14

prakhyāto vyāsaśiṣyo'bhūtsuto vai lomaharṣaṇaḥ
purāṇasaṃhitāṃ tasmai dadau vyāso mahāmuniḥ

1.10.15

sumatiścāgnivarcāśca mitrāyuḥ śaśapāvanaḥ
akṛtavraṇo'tha sāvarṇiḥ ṣaṭśiṣyāstasya cābhavan

1.10.16

kāśyaśca saṃhitāvartaḥ sāvarṇiḥ śaṃsalāyanaḥ
lomaharṣasya nikaṭaṃtṛṇāni mūlasaṃhitāḥ

1.10.17

catuṣṭayenāpyetena saṃhitānāmidaṃ tatam
ādyaṃ sarvapurāṇānāṃ purāṇaṃ brāhmamucyate

1.10.18

aṣṭādaśa purāṇāni purāṇajñāḥ pracakṣate
brāhmaṃ pādyaṃ vaiṣṇavaṃ ca śaivaṃ bhāgavataṃ tathā

1.10.19

tathānyannāradīyaṃ ca mārkaṇḍeyaṃ ca saptamam
āgneyamaṣṭamaṃ caiva bhaviṣyaṃ navamaṃ tathā

1.10.20

daśamaṃ brahmavaivartaṃ liṃgamekādaśaṃ smṛtam
vārāhaṃ dvādaśaṃ proktaṃ skāṃdaṃ caiva trayodaśam

1.10.21

caturdaśaṃ vāmanaṃ ca kaurmyaṃ paṃcadaśaṃ smṛtam
mātsyaṃ ca gāruḍe caiva brahmāṃḍe ca tataḥ param

1.10.22

sargaśca pratisargaśca vaṃśo manvantarāṇi ca
sarveṣveteṣu kathyante saṃśānucarituṃ tu yat

1.10.23

yadetattava viprarṣe purāṇaṃ kathyate mayā
etadāgneyasaṃjñaṃ vai pādmasyasamanaṃtaram

1.10.24

sarge ca pratisarge ca vaṃśe manvaṃtarādiṣu
kathyate bhagavān viṣṇuraśeṣeṣuhi sattama

1.10.25

aṃgāni catvāro vedā mīmāṃsānyāyavistaraḥ
purāṇaṃ dharmaśāstraṃ ca vidyāścaitāścaturdaśa

1.10.26

āyurvedo dhanurvedo gāṃdharvaścaiva te trayaḥ
arthaśāstraṃ caturthaṃ ca vidyā hyaṣṭādaśaivatāḥ

1.10.27

jñeyā brahmarṣayaḥ pūrvaṃ tebhyo devarṣayaḥ punaḥ
rājarṣayaḥ punastebhya ṛṣiprakṛtayastataḥ

1.10.28

iti śākhā asaṃkhyātāḥ śākhābhedāstathaiva ca
kartārovedaśākhānāṃ śākhābhedasya hetavaḥ

1.10.29

sarvamanvaṃtareṣvevaṃ śākhābhedaḥ samaḥ smṛtaḥ
prājāpatyāstu nairṛtyāstadvikalpāstvime dvija

1.10.30

etatte noditaṃ sarvaṃ yatpṛṣṭohamihatvayā
marīce vedasaṃbaṃdhaṃ kimanyat kayayāmi te

1.10.30.p1

iti śrīvahnipurāṇe nāṃdīmukhotpattau śākhā vistāro nāma daśamo'dhyāyaḥ