Nandipurana 1.13

1.13.1

marīciruvāca
ke deśāḥ sumahāpuṇyāḥ kānadyaḥ kecaparvatāḥ
sevyā dharmārthibhirnityaṃ tanme brūhi pitāmaha

That water, its taste removed, turns into light;
and light, its form removed by darkness, merges into wind.

1.13.2

brahmovāca
atraivodāharantīmamitihāsaṃ purātanam
śilocchavṛtteḥ saṃvādaṃ siddhasya ca mahāmuneḥ

1.13.3

kaścitsiddhaḥ parikramya samastāṃ pṛthivīmimām
uñchavṛttergṛhasthasya gṛhaṃ prāpto mahāmuniḥ

1.13.4

sa tu samyakkṛtātithyaḥ sukhāsīnaṃ gataklamam
pṛṣṭavānidamevārthaṃ yanmāṃtvaṃ paripṛcchasi

1.13.5

śiloñchavṛttiruvāca
ke deśāḥ ke janapadāḥ keśailāḥ kepi cāśramāḥ
utkṛṣṭāḥ puṇyalokāśca jñeyā steṣveva cocyatām

1.13.6

siddhauvāca
te deśāste janapadāste śailāstepi cāśramāḥ
puṇyā tripathagā yeṣāṃ madhye bhāti saridvarā

1.13.7

tapasā brahmacaryeṇa yajñaistyāgairnavā punaḥ
gatiṃ na labhate jaṃturyā gaṃgāsevayā bhavet

1.13.8

snātānāṃ ca śubhaistoyairgāṃgeyairniyatātmanām
tuṣṭirbhavati yā puṃsāṃ na sā kratuśatairapi

1.13.9

apahṛtya tamastīvraṃ yathā bhātyudaye raviḥ
tathāpahṛtya pāpāni bhāti gaṃgājalaplutaḥ

1.13.10

agniṃ prāpya yathā kṣipraṃ tūlarāśirvinaśyati
tathā gaṃgāvagāhena sarvaṃ pāpaṃ vinaśyati

1.13.11

yastu sūryāṃśusaṃtaptaṃ gāṃgeyaṃ salilaṃ pibet
sa tunīhāranirmuktātpāvakāddhi viśiṣyate

1.13.12

cāndrāyaṇasahasraṃ tu yaścaretkāyaśodhanam
pibedyaścāpi gaṃgāṃbhaḥ samau khyātāvimau hitau

1.13.13

tiṣṭhedyugasahasraṃ tu pādenaikena yaḥpumān
pibedyatheṣṭagaṃgāṃbho yo naraḥ saviśiṣyate

1.13.14

laṃvedarvākśirā yastu varṣāṇāmayutaṃ naraḥ
gatimanvicchatāṃ puṃsāṃ nāsti gaṃgāsamā gatiḥ

1.13.15

mahadbhiraṃśubhirgrastānanekānihamānavān
patitānnarake ghore gaṃgoddharati sevitā

1.13.16

te saṃvibhaktā yatibhirnūnaṃ devaiḥ savāsavaiḥ
ye yānti niyatātmāno gaṃgādevīniṣevitām

1.13.17

yathopajīvanā vedā devādīnāṃ viśeṣataḥ
tathaiva dehināṃ gaṃgā sarvakāmaphalāpradā

1.13.18

jāhnavītīrasaṃbhūtāṃ mṛdaṃ mūrdhnā vibharti yaḥ
vibhartirūpaṃ so'rkasya tamonāśāya kevalam

1.13.19

saptāparān sapta pūrvān tathā cānyānsusaṃginaḥ
sa narastārayedgaṃgāṃ dṛṣṭvā spṛṣṭvāvagāhya ca

1.13.20

darśanātsparśanāddhyānā ttathā gaṃgeti kīrtanāt
puṇyān punāti puruṣān śataśo'tha sahasraśaḥ

1.13.21

ya icchetsaphalaṃjanma pauruṣaṃśrutamevavā
sa pitṝṃstarpayedgaṃgā mabhigamya surāṃstathā

1.13.22

śrutātha kīrtitādhyātā dṛṣṭā pītāvagāhitā
gaṃgā tārayate nṝṇāmubhau vaṃśau viśeṣataḥ

1.13.23

jātyandhairiva tulyāste mṛtaiḥ paṃgubhireva vā
samarthā ye na paśyanti gaṃgāṃ puṇyajalāṃ śubhām

1.13.24

trikāladarśibhirnityaṃ sevitā munisattamaiḥ
devaiḥ sendraiśca ko gaṃgāṃ nopaseveta mānavaḥ

1.13.25

vānaprasthaiśca yatibhirgṛhasthairbrahmacāribhiḥ
vidvadbhiḥ sevitāṃ gaṃgāṃ pumān konāma nāśrayet

1.13.26

manovākkāyajairdauṣaiḥ pāpairbahuvidhairapi
vīkṣya gaṃgāṃ bhavetpūtaḥ puruṣo nātra saṃśayaḥ

1.13.27

antakāle ca yo jīvaḥ praṇataḥ śraddhayānvitaḥ
ciṃtayenmanasā gaṃgāṃ sa gacchetparamāṃ gatim

1.13.28

yāvadasthi manuṣyāṇāṃ gaṃgātoyeṣu tiṣṭhati
tāva dvarṣasahasrāṇi svargaloke mahīyate

1.13.29

pūrve vayasi karmāṇi kṛtvā pāpāni ye narāḥ
paścādgaṃgāṃ niṣevante te piyānti parāṃ gatim

1.13.30

gaṃgājalorbhinirdhautaḥ puruṣaṃ pavano yathā
spṛśate tasyapāpāni kṣayaṃ yānti sadā dvija

1.13.31

gaṃgāṃ ca sumahāpuṇyāṃ patantī dyāṃ maheśvaraḥ
dadhāra śirasādevīṃ tāṃ gaṃgāṃ ko na saṃśrayet

1.13.32

triṣulokeṣu puṇyatvādgaṃgāyāḥ prathitaṃ yaśaḥ
sagarasyātmajānsvargaṃ bhasmībhūtānnināya sā

1.13.33

aṃdhāḥklībā jaḍāvyaṃgāḥ patitā drohiṇoṃtyajāḥ
gaṃgāṃ sametya puruṣaiḥ samairgacchantitulyatām

1.13.34

ārādhya yāṃ tapasogreṇa devīṃ rājā bhagīratha ātmaniṣṭhaḥ
gaṃgābhānayaddevalokātsupuṇyāṃ kastāṃ naronāśrayetsiddhikāmaḥ

1.13.35

tadakṣayāṃ pṛthivīṃ viśvarūpāṃ śivābhṛtāṃ surasāṃ suprasādām
vibhāvarīṃ prabhūtāṃ tattadiṣṭāṃ gaṃgāṃtoye tridivaṃ gatāste

1.13.36

ṛṣistutāmindrasutāṃ purāṇāṃ pavitratoyāmamṛtāṃ trimārgagām
sarvātmanā jāhnavīṃ ye prapannāste brahmaṇaḥ sadanaṃ saṃprayātāḥ

1.13.37

harasyagātrasaṃparkāt pavitratvamupāgatām
ko nāma nāśrayedgaṃgāṃ samagraduritāpahām

1.13.38

gaṃgāyāṃ maraṇaṃcaiva dṛḍhābhaktiśca keśave
brahmavidyāvabodhaśca nālpasya tapasaḥ phalam

1.13.39

kāṃkṣanti pitaraḥ puṃsāṃ sarveṣāṃ dvijapuṃgava
madveśajo'yaṃ dharmātmā kadā gaṃgāṃ gamiṣyati

1.13.40

gaṃgodakairyadā martyāḥ svapitṝṃstarpayiṣyati
tadā tajjanma saphalaṃ sa dhanyaḥ puruṣottamaḥ

1.13.41

sudūrastho'pi yo būyāt trisaṃdhyaṃ śraddhayānvitaḥ
gaṃgā gaṃgeti gaṃgeti so'pigacchetparāṃ gatim

1.13.42

maraṇe smaraṇaṃ viṣṇoḥ kathyate'tyaṃtadurlabham
tadapyalpena kālena gaṃgāṃ saṃsevya labhyate

1.13.43

guṇānāmekadeśo'yaṃ gaṃgāyāḥ kīrtito mayā
samastāniha ko vaktuṃ śakto varṣaśatairapi

1.13.44

yathārṇavasya ratnāni merośca kanakopalāḥ
saṃkhyātuṃ naiva śakyante bhāgīrathyā guṇāstathā

1.13.45

iti matiparamo guṇānanekān dvijavararatna samāpa devanadyāḥ
bahuvidhamabhidhāya tatvabhūtān gaganatalaṃ dyutimān viveśa siddhaḥ

1.13.46

siddhavākyaiśca vividhairvipraiḥ saṃtoṣitastadā
gaṃgāmupāsya vidhivatsiddhiṃ prāptaḥ sudurlabhām

1.13.47

tasmātvamapi viprendra śraddhayā parayāyutaḥ
gaṃgāmeva niṣevasva tataḥ siddhimavāpsyasi

1.13.48

itihāsamimaṃ puṇyaṃ gaṃgāmāhātmyamuttamam
yaḥ paṭhecchṛṇuyādvāpi sagacchetparamāṃ gatim

1.13.49

gaṃgādvāre prayāṇe ca vārāṇasyāṃ yathā dvija
tathā puṇyāviśeṣeṇa kuṃḍe nāṃdīpurodbhave

1.13.50

ṛṣibhiḥ sā samāhūtā tapasaḥ siddhihetave
tasmāttatra naraiḥkāryaṃ snānaṃ kalimalāpaham

1.13.50.p1

iti śrīvahnipurāṇe nāṃdīmukhotpattau gaṃgāmāhātmyanāma trayodaśo'dhyāyaḥ