Nandipurana 1.20
Nandipurāṇa 1.20
- Language
- Sanskrit
Contents
- 1.20.23 — 1 part
1.20.1
marīciruvāca
bhūya eva mahābāho vada māhātmyamuttamam
1.20.2
atitheḥ kṛtsnamasmākaṃ vistareṇa ca padmaja
brahmovāca
śrūyatā mṛṣiśārdūla māhātmyamidamuttamam
1.20.3
yena saṃśrutamātreṇa naśyetpāpaṃ dinodbhavam
yanmayā kathitaṃ pūrvaṃ nāradāya mahātmane
1.20.4
gṛhasthānaṃ parodharmo nānyostyatithipūjanāt
atitherna ca devosti tasyātikramaṇena ca
1.20.5
atithiryasya bhagnāśo gṛhātpratinivartate
sa tasmai duṣkṛtaṃ dattvā puṇyamādāya gacchati
1.20.6
satyaṃ śaucaṃ tapo'dhītaṃ dattamiṣṭaṃ śataṃ samāḥ
tasya sarvamidaṃ naṣṭamatithiṃ yo na pūjayet
1.20.7
dūrādatithayo yasya gṛhamāyānti nirvṛtāḥ
sa gṛhasya iti proktaḥ śeṣāśca gṛharakṣiṇaḥ
1.20.8
na purā kṛtapuṇyānāṃ narāṇāmiha bhūtale
trīṇina pratipadyante śraddhādānaṃ śubhāgiraḥ
1.20.9
tuṣṭe'tithau gṛhasthasya tuṣṭāḥ syuḥ sarvadevatāḥ
vimukhe vimukhāḥ sarve bhavanti na ca saṃśayaḥ
1.20.10
tasmāttoṣayitavyaśca gṛhasthena samāhitaḥ
athātmanaḥ pradānena yadīcchecchumamātmanaḥ
1.20.11
trividhastvatithiḥ prokto gṛhasthānāṃ dvijottama
tasyāhaṃ vacmi te kālaṃ śṛṇuṣva susamāhitaḥ
1.20.12
śrāddhīyo vaiśvadevīyo sūryāḍhyaśca tṛtīyakaḥ
ye cānye bhojanārthīyāste sāmānyāḥ prakīrtitāḥ
1.20.13
sāṃkalpe vihite śrāddhe pitṝṇāṃ bhojanodbhave
samāgacchati yaḥ kāle tasmin śrāddhīyaevasaḥ
1.20.14
dūrādhvānaṃ pathi śrāntaṃ vaiśvadevāntamāgatam
atithiṃ taṃ vijānīyāt nāgataḥ pūrvamāgataḥ
1.20.15
priyo vā yadi vā dveṣyo mūrkhaḥ paṃḍitaeva vā
vaiśvadeve tu saṃprāpte so'tithiḥ svargasaṃkramaḥ
1.20.16
na pṛcchedgotravaraṇaṃ na sthānaṃ vedameva ca
dṛṣṭvā yajñopavītaṃ ca bhojayettaṃ prabhaktitaḥ
1.20.17
śrāddhe vā vaiśvadeve vā yadyāgacchati nā'tithiḥ
ghṛtāhutiṃ tato dadyāttannā mnā ca havirbhuji
1.20.18
aśaktyā bhojyadānasya deyaṃ śaktyā tataḥ param
tasyānnamapi ca stokaṃ yena tuṣṭiṃ pragacchati
1.20.19
tasyāśaktyā pradātavyaṃ sasyaṃ ca gṛhamedhinā
sūryodaye tu saṃprāpto gṛhātpūjāṃ vinā vrajet
1.20.20
nirāśaḥ pātakaṃ tasya nijaṃ datvā prayāti saḥ
tṛṇāni bhūmi rudakaṃ vākcaturthī ca munṛtā
1.20.21
etānyapi satāṃ gehe nocchidyante kadācana
svāgatenāgnaya stṛptiṃ gṛhasthasya prayānti ca
1.20.22
āsanena vrajettuṣṭiṃ svayaṃbhūḥ prapitāmahaḥ
arghyeṇa śaṃbhuḥ pādyena sarve devāḥ savāsavāḥ
1.20.23
bhojyadānena viṣṇuḥ syātsarvadevamayo'tithiḥ
tasmātpūjyaḥ sadā viprā bhojanīyo viśeṣataḥ
nāmāpyuccārya bhojyonyo brāhmaṇā gṛhamedhinā
1.20.23.p1
iti śrīvahnipurāṇe nāṃdīmukhotpattā atithimāhātmyaṃ nāma viṃśo'dhyāyaḥ
Linked texts (1)
- Skandamahāpurāṇa (vulgate) — Sanskrit