Pramāṇa · Search · About · API

Nandipurana 1.21

Nandipurāṇa 1.21

Language
Sanskrit

Contents

1.21.1

brahmovāca
caturthe divase prāpte tato yajñasamudbhave

1.21.2

ṛtvigbhiryājñikaṃ karma prārabdhaṃ tadanantaram
somapānādikaṃ karma paśorhiṃsādikaṃ tathā

1.21.3

paśorgudaṃ samādāya prasthātācāpyadhārayat
ekāṃte sadasormadhye homārthaṃ dvijasattama

1.21.4

tasmin vyākulatāṃ yāte brāhmaṇaḥ kaścidāgataḥ
yuvā tatra praviṣṭastu māṃsabhakṣaṇalālasaḥ

1.21.5

tato gudaṃ paśordṛṣṭvā bhakṣayāmāsa cotsukaḥ
etasminnaṃtare prāptaḥ prasthātā tasya saṃnidhau

1.21.6

bhakṣyamāṇaṃ samālokya taṃ śaśāpa tataḥ param
dhik dhik pāpasamācāra homārthaṃ yadgudaṃ dhṛtam

1.21.7

tattvayā dūṣitaṃ laulyād yajñavighnakṛraṃ param
ucchiṣṭena mayā homaḥ kartavyo naiva sāṃpratam

1.21.8

rākṣasānā midaṃ karma yattvayā samanuṣṭhitam
tasmāttvaṃ mama vākyena rākṣaso bhava mā ciram

1.21.9

etasminnaṃtare kāla ūrdhvakeśo'bhavaddhisaḥ
raktākṣaḥ śaṃkukarṇaśca kṛṣṇadaṃto'tibhairavaḥ
gatāsthiḥ snāyuśeṣaśca cāmuṃḍākṛtireva ca

1.21.10

sa ca viśvāvasurnāma pulahasyasuto muniḥ
maṃtrapūtasya māṃsasya bhakṣaṇārthaṃ samāgataḥ

1.21.11

vedavedāṃgatatvajñaḥ pautrastu parameṣṭhinaḥ
taṃ dṛṣṭvā rākṣasākāraṃ vitresuḥ sarvato dvijāḥ

1.21.12

keciccharaṇamāpannā viṣṇo rudrasya cāpare
pitāmahasya cānyetu gāyatryāḥ śaraṇaṃ gatāḥ

1.21.13

rakṣa rakṣeti krandanto bhayasaṃtrastamānasāḥ
so'pi dṛṣṭvā tadātmānaṃ gataṃ rākṣasatāṃ dvijaḥ

1.21.14

bāṣpapūrṇekṣaṇo dīnaḥ pitāmahamupādravat
sa praṇamya tatovākyaṃ kṛtāṃjaliruvāca tam

1.21.15

pautrohaṃ tava deveśa pulahasya suto dvijaḥ
nīto rākṣasatāmadya prasthātrā kopitena ca

1.21.16

jihvālaulyena deveśa paśorgudamajānatā
bhakṣitaṃ tanmayā deva homārthaṃ yatprakalpitam

1.21.17

tasmānmānuṣatāṃ deva mama dehi dayāṃ kuru
rākṣasatvaṃ yathā yāti tathā nītirvidhīyatām

1.21.18

tacchrutvā jalpitaṃ tasya dayāṃ kṛtvā pitāmahaḥ
pratiprasthātaraṃ caiva vākyametaduvācaha

1.21.19

bālo'yaṃ mama pautro'sti kṛtyākṛtyaṃ na vetti ca
tasmāttaṃ rākṣasaṃ bhāvaṃ harasvāsya dvijottama

1.21.20

tacchrutvā sa muniḥ prāha prāyaścittaṃ makhe tava
anena janitaṃ deva gudaṃ dūṣayatā vibho

1.21.21

tasmādeṣa mayā śapto yajñe vighnakaro mama
nāhamasya hariṣyāmi rākṣasatvaṃ kathaṃcana

1.21.22

narmaṇāpi mayā proktaṃ kadācinnānṛtaṃ vacaḥ
brahmovāca
prāyaścittaṃ kariṣye'haṃ yajñasyāsya prasiddhaye

1.21.23

dakṣiṇāgnau yathoktena homaṃ kṛtvā vidhānataḥ
tvamasya rākṣasaṃ bhāvaṃ harasva vacanānmama

1.21.24

so'bravīcchītalo vahniryadi syāduṣṇaguḥ śaśī
tanmesyādanyathā vākyaṃ vyāhṛtaṃ prapitāmaha

1.21.25

tasya tadvacanaṃ śrutvā jñātvā caiva ca niścayam
viśvāvasuṃ vidhiḥ prāha tato rākṣasarūpiṇam

1.21.26

tvaṃ vasānena rūpeṇa tiṣṭhatādvacanaṃ mama
kuruṣvaitat prayacchāmi yenasthānamanuttamam

1.21.27

śrīmannāṃdīpurasyāsya paścimaṃ sthānamāśritāḥ
rākṣasā bahavaḥ santi kūṣmāṃḍāśca piśācakāḥ

1.21.28

tatra gacchanti ye sarva nigṛhṇanti ca tatkṣaṇāt
bhūtāḥ pretāḥ piśācāśca kūṣmāṃḍāśca viśeṣataḥ

1.21.29

nagarānupuro dṛṣṭvā tadbhayādyānti dūrataḥ
tadgaccha putra tatra tvaṃ sarveṣāmadhipo bhava

1.21.30

rākṣasānāṃ mayā dattaṃ tava rājyaṃ ca sāṃpratam
rākṣasa uvāca
ādhipatye sthitenaivaṃ rākṣasānāṃ pitāmaha

1.21.31

kiṃ mayā tatra bhoktavyaṃ tebhyo deyaṃ ca kiṃ vada
rājñā caiva yato deyaṃ bhṛtyānāṃ bhojanaṃ vibho

1.21.32

tanmamācakṣva deveśa dayāṃ kṛtvā garīyasīm
nakaroti ca yo rājā bhṛtyavargasya poṣaṇam

1.21.33

rauravaṃ narakaṃ yāti śrutametanmayā purā
brahmovāca
yacchrāddhaṃ dakṣiṇāhīnaṃ tilairdarbhairvivarjitam

1.21.34

tatsarvaṃ te mayā dattaṃ yadyapi syātsutīrthakam
yacchrāddhaṃ śūkaraḥ paśyennārīvātha rajasvalā

1.21.35

śvabhiśca gardabhairdṛṣṭaṃ tatsarvaṃ te bhaviṣyati
vidhihīnaṃ tu yacchrāddhaṃ darbhairvāmūlavarjitaiḥ

1.21.36

vittaistucādhikairvāpi tatsarvaṃ te bhaviṣyati
yadvā māhiṣiko bhuṅkte śunī vā kunakhī tu vā

1.21.37

kuṣṭhī vātha dvijo bhuṅkte tatte śrāddhaṃ bhaviṣyati
asnātairyatkṛtaṃ śrāddhaṃ yaccādhautāṃmbaraiḥ kṛtam

1.21.38

tailābhyaṃgayutaiścāpi tatte śrāddhaṃ bhaviṣyati
śyāmadaṃtastu yadbhuṃkte tadbhuṃkte vṛṣalīpatiḥ

1.21.39

dvijaghno vātha yadbhuṃkte tatte śrāddhaṃ bhaviṣyati
yo yajño dakṣiṇāhīno yaccāśaucayutaiḥ kṛtam

1.21.40

brahmacaryavihīnaṃ tu tatphalaṃ te bhaviṣyati
pratyakṣaṃ lavaṇaṃ yacca yaccādhautāmbaraṃ bhavet

1.21.41

jātīpuṣpapradānaṃ ca tatte sarva bhaviṣyati
yajamāno dvijo vāpi brahmacaryavivarjitaḥ

1.21.42

tacchrāddhaṃ te mayā dattaṃ tathānyadapi hīnataḥ
maṃtrakriyābhyāṃ yatkiṃcidrātrau dattaṃ hutaṃ tathā

1.21.43

saṃkrāntisomaparvābhyāṃ vyatiriktaṃ tu kutsitam
ityuktā virarāmāśu brahmā lokapitāmahaḥ
rākṣasaḥ so'pi tatraiva labhyasthānaṃ tu rākṣasam

1.21.43.p1

iti śrīvahnipurāṇe nāṃdīmukhotpattau rākṣasaśrāddha kathanaṃ nāma ekaviṃśo'dhyāyaḥ

Linked texts (1)