Nandipurana 1.27
Nandipurāṇa 1.27
- Language
- Sanskrit
Contents
- 1.27.31 — 1 part
1.27.1
marīciruvāca
evaṃ gatāyāṃ sāvitryāṃ kupitāyāṃ pitāmaha
kiṃ kṛtaṃ tatra gāyatryā brahmādyaiścāpi kiṃ suraiḥ
1.27.2
etatsarvaṃ samācakṣva paraṃ kautuhalaṃ hi me
kathaṃ śāpānvitā devāḥ saṃsthitā yajñamaṃḍape
1.27.3
brahmovāca
gatāyāmapi sāvitryāṃ śāpaṃ datvā dvijottama
gāyatrī sahasotthāya vākyametadudairayat
1.27.4
sāvitryā yadvacaḥ proktaṃ tanna śakyaṃ kathaṃcana
anyathā kartumevātha sarvairapi surāsuraiḥ
1.27.5
mahāsatī mahābhāgā sāvitrī sā pativratā
pūjyā ca sarvadevānāṃ śraiṣṭhyāchreṣṭhā ca sadguṇaiḥ
1.27.6
paraṃ strīṇāṃ svabhāvoyaṃ sarvāsāṃ surasattamāḥ
api sahyo vajrapātaḥ kaṣṭaṃ sāpatnyajaṃ nanu
1.27.7
matkṛte ye'tra śapitāḥ sāvitryā brāhmaṇāḥ surāḥ
teṣāmahaṃ kariṣyāmi śaktyā sādhāraṇaṃ śubham
1.27.8
apūjo'yaṃ vidhiḥ proktastayā maṃtrapuraḥsaram
sarveṣāmeva varṇātaṃ viprādīnāṃ surottamāḥ
1.27.9
brahmasthāneṣu sarveṣu samagradharaṇītale
na brahmaṇā vinā kiṃcit kṛtyaṃ siddhimupaiṣyati
1.27.10
kṛṣṇārcanena yatpuṇyaṃ yatpuṇyaṃ liṅgapūjane
tatphalaṃ koṭiguṇitaṃ sadā syādbrahmadarśanāt
1.27.11
bhaviṣyati na saṃdeho viśeṣātsarvakarmasu
tvaṃ ca bhṛtyatayā prokto viṣṇorjanma yadāpsyasi
1.27.12
tatrāpi parabhṛtyatvaṃ pareṣāṃ te bhaviṣyati
ekaḥ kṛṣṇābhidhānastu dvitīyo'rjunasaṃmitaḥ
1.27.13
tasyātmano'rjunākhyasya sārathyaṃ tvaṃ kariṣyasi
tena kṛtyena raktāste gopā yāsyanti ślāghyatām
1.27.14
sarveṣāmeva lokānāṃ devānāṃ ca viśeṣataḥ
yatra yatra vasiṣyanti bhramante'pi vane narāḥ
1.27.15
tatra tatrāśraye vāse vane ca rakṣayiṣyati
tataḥ praviśya saṃgrāme na parājayamāpsyasi
1.27.16
tvaṃ vahne sarvabhakṣyaśca yatpṛṣṭo ruṣṭayā tayā
tadamedhyamapi prāyaḥ spaṣṭaṃ te'rcibhiragrataḥ
1.27.17
medhyatāṃ yāsyasi kṣipraṃ tataḥ pūjāmavāpsyasi
svāhā nāmnī ca yā bhāryā devān saṃtarpayiṣyati
1.27.18
svadhā yā ca pitṝn sarvān mamavākyādasaṃśayam
yadrudrapriyayā sārdhaṃ viyogaḥ kathitastayā
1.27.19
tataḥ preṣṭhatamā cānyā tava patnī bhaviṣyati
gaurīnāmneti vikhyātā himācalasutā śubhā
1.27.20
bho bho nāndīmukhā viprā śṛṇutedaṃ vaco mama
vidyāmānena conmattāḥ kurutākṛtyamevaca
1.27.21
tena vaśca kulādyātu vidyā cābhyasitā hyapi
evaṃ datte tayāśāpe sāvitryā yajñavartinaḥ
1.27.22
tānuvācātha gāyatrī sarvairdevaiḥ supūjitā
bho bho viprā vaco'smākaṃ śṛṇutedaṃ samāhitāḥ
1.27.23
sāvitryā dattaśāpā vai tasyānugrahakāraṇam
lakṣmīvaṃto bhaviṣyanti kalau bhūsuratarpakāḥ
1.27.24
vedācāraratā nityaṃ viṣṇubhaktiparāyaṇāḥ
evaṃ kalau vyatīte tu svāṃ vidyāmapyavāpsyaya
1.27.25
vahniruvāca
evaṃ sā tān varān datvā sarveṣāṃ śāpabhāginām
maunavrataparā bhūtvā praviveśa dharātale
1.27.26
tato devagaṇāḥ sarve te ca sarve maharṣayaḥ
sādhu sādhviti tāṃ procuridaṃ vākyamudairayan
1.27.27
etāṃ devaprasādena brāhmaṇānāṃ viśeṣataḥ
pūjayiṣyanti martye'tra sarve lokāḥ samāhitāḥ
1.27.28
brahmāṇaṃ pūjayitvā tu paścādenāṃ sureśvarīm
pūjayiṣyanti ye martyā ste tu yānti parāṃgatim
1.27.29
yā kanyā patisaṃyogaṃ saṃprāpyātra samāhitā
tataḥ pādapramāṇaṃ ca gāyatryāśca kariṣyati
1.27.30
patiṃ prajāpatiṃ prāpya sā bhaviṣya tyasaṃśayam
sarvakāmasukhopetā dhanadhānya samanvitā
1.27.31
sā nārī durbhagā vaṃdhyā na bhaviṣyati sarvadā
1.27.31.p1
iti śrīvahnipurāṇe nāṃdīmukhotpattau sāvitrīśāpānugraho nāma saptaviṃśo'dhyāyaḥ
Linked texts (2)
- Skandamahāpurāṇa (vulgate) — Sanskrit
- Kṛtyakalpataru — Lakṣmīdhara Bhaṭṭa, Sanskrit