Pramāṇa · Search · About · API

Nandipurana 1.47

Nandipurāṇa 1.47

Language
Sanskrit

Contents

1.47.1

brahmovāca
jāpyaṃ homaṃ vidhānena maṃtreṇānyena cakrire
pāyasairmadhusaṃyuktaiḥ saghṛtairmadhurānvitaiḥ

1.47.2

nānāpatraiḥ phalaiścāpi vastubhiśca samaṃtataḥ
tatastuṣṭā jaganmātā vakrāṃgī pratyuvāca tān

1.47.3

varaṃ varayatāṃ viprā yadiṣṭaṃ taddadāmi vaḥ
śrutvā vākyaṃ sakaruṇaṃ pratyūcurdvijasattamāḥ

1.47.4

nāṃdīmukhā ūcuḥ
prasādaṃ kuruno mātarmlecchadhūmrādaya stataḥ
pīḍayanti janān sarvān rājānaṃ ca punaḥ punaḥ

1.47.5

lakṣmīruvāca
anena stavarājena lakṣmīnārāyaṇātmanoḥ
bhavatāṃ śatravo nāśaṃ yāntu vākyānmamaiva hi

1.47.6

antardadhe tadā vatsa devī divyasvarūpiṇī
tataste brāhmaṇāḥ sarve rājānaṃ gāṅgakairjalaiḥ

1.47.7

abhyasiñcanmahāmaṃtraiḥ śratyuktai rāgamoditaiḥ
tatastān brāhmaṇānnatvā prayayau sa narādhipaḥ

1.47.8

rathamāsthāna saṃnnāhaṃ dhṛtavān divyasārathim
snātaḥ śuklāmbaradharaḥ kṛṣṇa kṛṣṇoti cābruvan

1.47.9

haricaṃdanaliptāṃgaḥ puṣpamālāsuśobhitaḥ
gallakīyaśilākaṃṭhaḥ svasenāparivāritaḥ

1.47.10

bherīpaṭahatūryāṇāṃ svanena saha sāṃpratam
karighaṃṭāraṇatkārairhiṃkārairvājināṃ tathā

1.47.11

jagāma sanmukhaṃ teṣāṃ bahirgrāmācca sāṃpratam
tatrābhūttumulaṃ yuddhaṃ bhūpālamlecchayo stadā

1.47.12

sainye ca sumahāghore nadyo rudhirajāstathā
kolāhalena senāyāḥ saṃmūḍhā iva cābhavan

1.47.13

nāṃdīmukhaprabhāvācca mṛtakalpā ivābhavan
teṣā madhipatistatra mlecchaḥ saṃpīḍito mṛśam

1.47.14

visārathirvirathaska ścacāra pṛthivītale
lohito bāṇavidvāṃgo vyākulībhūtamānasaḥ

1.47.15

raṇabhūmerviniṣkrāṃto gato'sau ca palāyitaḥ
teṣāṃ sainye tadā jāto hāhākāro dvijottama

1.47.16

sainyaṃ saṃkṣayatāṃ prāptaṃ mlecchānāṃ duṣṭacetasām
mlecchasainye tathā jāte śabdastatra jayānvitaḥ

1.47.17

nagare sa samāyāto naṃdo rājā viśaṃpatiḥ
naṃdigrāme tadā vatsa māṃgalyāni gṛhe gṛhe

1.47.18

gīta vāditraṃ nirghoṣā vedānāṃ dhvanayastathā
brāhmaṇāḥ sūryasaṃkāśāḥ kāmukāḥ kāryalolakāḥ

1.47.19

evaṃ rājyaṃ tadā cakre kośalādhipatistadā
tathaiva bahu kālena cotyākhyo mlecchamaṃḍanaḥ

1.47.20

naṃdigrāmādhipasyaiva prajānāṃ ca bhayāvahaḥ
tatastān śaraṇaṃ prāpto viprānnāṃdīmukhotkaṭān

1.47.21

yatratatratya jīvānāṃ balaṃviprāḥ prakīrtitāḥ
tathā tairbrāhmaṇairvatsa stutirhanumataḥ kṛtā

1.47.22

tathā tasya prabhāveṇa mlecchā ste ca kṣayaṃ gatāḥ

1.47.23

marīciruvāca
kathayasvaprasādena stotrametanmahāprabho
yatprabhāvātsuraṃśreṣṭhā trailokyaṃ vaśamānayet

1.47.24

śatravo nāśamāyānti dhanaṃ ca vipulaṃ bhavet
brahmovāca
guhyādguhyataraṃ vatsa stotrametanmahāmune

1.47.25

yasyaśravaṇamātreṇa hanumām̐stuṣṭimāpnuyāt
bhavecca mānasaḥ kāmaḥ saṃkaṭaṃ tasya nobhavet

1.47.26

— aṃjanyāstanayaḥ samīraṇasuto yaḥ phālgunīyodbhavaḥ
śrīrāmapraṇataikadhāmanilayaḥ satyapratikṣānidhiḥ

1.47.27

piṃgākṣodbhutavikramo jalanidherullaṃghane dhīradhī
rhelotpāṭitaśailaśṛṃgaghaṭitapratyagra setusthitiḥ

1.47.28

laṃkādhīśvaradarpahā janakajāśokāntakṛllakṣmaṇaprāṇatrāṇakaro jitendriyagaṇaḥ saśrīhanūmānbhaṭaḥ

1.47.29

etairnāmabhirādarāduṣasi yo nidrākṣaye kīrtayet
nāśaṃyātyatha karmadoṣajanito nityastṛtīyojvaraḥ

1.47.30

yo vārāṃnidhi malpapalvalamivollaṃghyapratāpānvito vaidehīghanaśokatāpaharaṇo
vaikuṃṭhabhaktipriyaḥ

1.47.31

īśādūrjitarākṣaseśvaramahādarpā pahārī raṇe sopaṃ vānarapuṃgavo diśatu naḥ prītiṃ
samīrātmajaḥ

1.47.32

vīrādhipo vānararājamaṃtrī devādikāryeṣu kṛtodyamo yaḥ
laṃkādhirājasya kulāntakārī so'yaṃ hanūmān diśatu priyaṃ naḥ

1.47.33

sītāsaṃdeśahārī yo vānarākhilayūthapaḥ
prahaṃtā cākṣavīrasya hanumantaṃ namāmi tam

1.47.34

atyugraḥ sarvavīreṣu rākṣasāntakaro balī
prahantā ca pareṣāṃ yastaṃ vīraṃ praṇamāmyaham

1.47.35

idaṃ stotraṃ paṭhedyastu vṛṇuyā dvāpi bhaktitaḥ
tasyavāṃchitasiddhiśca karoti hanumān bharaḥ

1.47.36

daśarātraṃ daśāvartaṃ paṭhedyaḥ prayataḥ śuciḥ
śatravo nāśamāyānti lakṣmīvṛddhistathā gṛhe

1.47.37

brahmovāca
evaṃ tairbrāhmaṇairvatsa stutaḥ sahanumān bhaṭaḥ
śatravo nāśayāyātā vāyuputraprasādataḥ

1.47.38

yugatrayāvasāne ca kalāvapi samāgate
kāśmīrāḥ koṇakāḥ kācchā mlecchā vyāptāḥ samaṃtataḥ

1.47.39

śāpasya kāraṇaṃ vatsa mlecchairjñātaṃ dvijottama
tataśca taiḥ paraiścāpi dvijeṣu dveṣamuddadhat

1.47.40

kṣatriyā vīryarahitā brāhmaṇāḥ śāpasaṃyutāḥ
maṃtrā nirvīryatāṃ prāptāstairvyāptaṃ ca samaṃtataḥ

1.47.41

kṣatriyā balahīnatvāda rakṣāṃ kartumanudyamāḥ
atha te brāhmaṇāḥ sarve śaktāḥ sthātaṃ na tatra ca

1.47.42

saṃgantu kāmukāsteca madhyadeśadvijottamāḥ
śakaṭeṣu samāropya dhanānivipulāni ca

1.47.43

vāsāṃsi ca vicitrāṇi ratnāni ca bahūnyapi
jīvasaṃrakṣaṇārthaṃ ca te dvijā gantukāmukāḥ

1.47.44

putradārāḥ sasuhṛdaścāruhya rathagajasu
celuste madhyadeśaṃ hi tyaktvā grāmaṃ svakīyakam

1.47.45

śokasaṃtaptadehāśca bhayavihvalamānasāḥ
madhyadeśaṃ samāgatya tatratyāṃśca nareśvarān

1.47.46

āśīrbhirabhinandyātha tatra vāsaṃ pracakrire
sadbhibhūpatibhiścaiṣāṃ bahumānapuraḥsaram

1.47.47

nāṃdīmukhānāṃ viprāṇāṃ sevācāpi kṛtāmudā
ekadā te hi rājānastānūcuḥ paramānmunīn

1.47.48

bhavatāṃ draviṇaṃ viprā datta no bhūritejasaḥ
vidhāya dāsyaṃ bhavatāṃ dāsyāmaḥ paramarṣayaḥ

1.47.49

kālenālpena viprendrāḥ vayaṃ tvatsevakā hyataḥ
pratyuktāste tathetyevaṃ dhanaṃ dattaṃ svakīyakam

1.47.50

kiyatā kālayogena maitrī teṣāmupasthitā
brahmovāca
atha tepi samāmaṃtrya mitho bhūmisurā api

1.47.51

rājānaśca gatāḥ sarve saṃmīlya sunareśvaram
madhyadeśādhipaṃ bhūpaṃ śrībhojaṃ suyaśonvitam

1.47.52

tamāśīrbhiḥ samāmaṃtrya kathayāmāsurapyataḥ
nāṃdīmukhānāṃ nagaraṃ mlecchairvyāptiṃ samaṃtataḥ

1.47.53

suvācyaistān samājyātha sa rājā cintayānvitaḥ
prayāṇe'tha matiṃ cakre mlecchāñjetuṃ sasainikaḥ

1.47.54

bherīmṛdaṃgatūryādivādyān saṃvādya yatnataḥ
āruroha rathaṃ divyaṃ varūthadhvajaśobhitam

1.47.55

gatavatyatha senā sā rarāja paramarddhibhiḥ
gajai rathairhayairścāpi sapatākaiḥ samaṃtataḥ

1.47.56

paṭahādyaninādaiścā pyatibelodadhiryathā
mlecchādhīśaśca yatrāste gato'sau tatra roṣitaḥ

1.47.57

śrutvā dvijānāṃ saṃtāpaṃ bāṃcchan yuddhaṃ nareśvaraḥ
sindhostīre samāsthāya vādyavādāna nādayat

1.47.58

tamāgataṃ samājñāya mlecchādhīśo nareśvaraḥ
āgatya puratastena punaryuddha mathākaron

1.47.59

tatputreṇa ca vīro'sau yuddhe ca prapalāyitaḥ
tato'mī deśadeśeṣu gatāḥ sarve dvijottamāḥ

1.47.60

ekadā dhanalubdhena naṃdena ca palāyitāḥ
samāgatāśca gokarṇaṃ tenasākaṃ dvijottamāḥ

1.47.60.p1

iti śrī bahnipurāṇe nāṃdīmukhotpattau viprāṇāmāgamanaṃ nāma saptacatvāriṃśattamo'dhyāyaḥ

Linked texts (1)