Devibhagavatapurana 11.10: daśamo'dhyāyaḥ | bhasmamāhātmye pāśupatavratavarṇanam
Devībhāgavatapurāṇa 11.10
- Language
- Sanskrit
Contents
- 11.10.33 — 1 part
daśamo'dhyāyaḥ | bhasmamāhātmye pāśupatavratavarṇanam
11.10.1
śrīnārāyaṇa uvāca |
āgneyaṃ gauṇamajñānadhvaṃsakaṃ jñānasādhakam |
gauṇaṃ nānāvidhaṃ viddhi brahmanbrahmavidāṃvara ||
11.10.2
agnihotrāgnijaṃ tadvadvirajānalajaṃ mune |
aupāsanasamutpannaṃ samidagnisamudbhavam ||
11.10.3
pacanāgnisamutpannaṃ dāvānalasamudbhavam |
traivarṇikānāṃ sarveṣāmagnihotrasamudbhavam ||
11.10.4
virajānalajaṃ caiva dhāryaṃ bhasma mahāmune |
aupāsanasamutpannaṃ gṛhasthānāṃ viśeṣataḥ ||
11.10.5
samidagnisamutpannaṃ dhāryaṃ vai brahmacāriṇā |
śūdrāṇāṃ śrotriyāgārapacanāgnisamudbhavam ||
11.10.6
anyeṣāmapi sarveṣāṃ dhāryaṃ dāvānalodbhavam |
kālaścitrā paurṇamāsī deśaḥ svīyaḥ parigrahaḥ ||
11.10.7
kṣetrārāmādyaraṇyaṃ vā praśastaḥ śubhalakṣaṇaḥ |
tatra pūrvatrayodaśyāṃ susnātaḥ sukṛtāhnikaḥ ||
11.10.8
anujñāpya svamācāryaṃ sampūjya praṇipatya ca |
pūjāṃ vaiśeṣikīṃ kṛtvā śuklāmbaradharaḥ svayam ||
11.10.9
śuddhayajñopavītī ca śuklamālyānulepanaḥ |
darbhāsane samāsīno darbhamuṣṭiṃ pragṛhya ca ||
11.10.10
prāṇāyāmatrayaṃ kṛtvā prāṅmukho vāpyudaṅmukhaḥ |
dhyātvā devaṃ ca devīṃ ca tadvijñāpanavartmanā ||
11.10.11
vratametatkaromīti bhavetsaṅkalpadīkṣitaḥ |
yāvaccharīrapātaṃ vā dvādaśābdamathāpi vā ||
11.10.12
tadardhaṃ vā tadardhaṃ vā māsadvādaśakaṃ tu vā |
tadardhaṃ vā tadardhaṃ vā māsamekamathāpi vā ||
11.10.13
dinadvādaśakaṃ vāpi dinaṣaṭkamathāpi vā |
tadardhaṃ dinamekaṃ vā vratasaṅkalpanāvadhi ||
11.10.14
agnimādhāya vidhivadvirajāhomakāraṇāt |
hutvā''jyena samidbhiśca caruṇā ca yathāvidhi ||
11.10.15
pūtāhātpurato bhūyastattvānāṃ śuddhimuddiśan |
juhuyānmūlamantreṇa taireva samidādibhiḥ ||
11.10.16
tattvānyetāni me dehe śudhyantāmityanusmaran |
paścādbhūtāditanmātrāḥ pañcakarmendriyāṇi ca ||
11.10.17
jñānakarmavibhedena pañca pañca vibhāgaśaḥ |
tvagādidhātavaḥ sapta pañca prāṇādivāyavaḥ ||
11.10.18
mano buddhirahaṅkāro guṇāḥ prakṛtipūruṣau |
rāgo vidyā kalā caiva niyatiḥ kāla eva ca ||
11.10.19
māyā ca śuddhavidyā ca maheśvarasadāśivau |
śaktiśca śivatattvaṃ ca tattvāni kramaśo viduḥ ||
11.10.20
mantraistu virajairhutvā hotāsau virajo bhavet |
atha gomayamādāya piṇḍīkṛtyābhimantrya ca ||
11.10.21
nyasyāgnau taṃ ca saṃrakṣya dine tasmin haviṣyabhuk |
prabhāte ca caturdaśyāṃ kṛtvā sarvaṃ puroditam ||
11.10.22
tasmindine nirāhāraḥ kālaśeṣaṃ samāpayet |
prātaḥ parvaṇi cāpyevaṃ kṛtvā homāvasānataḥ ||
11.10.23
upasaṃhṛtya rudrāgniṃ gṛhītvā bhasma yatnataḥ |
tataśca jaṭilo muṇḍaḥ śikhaikajaṭa eva ca ||
11.10.24
bhūtvā snātvā punarvītalajjaścetsyāddigambaraḥ |
anyaḥ kāṣāyavasanaścarmacīrāmbaro'thavā ||
11.10.25
ekāmbaro valkalavānbhaveddaṇḍī ca mekhalī |
prakṣālya caraṇau paścāddvirācamyātmanastanum ||
11.10.26
saṅkalīkṛtya tadbhasma virajānalasambhavam |
agnirityādibhirmantraiḥ ṣaḍbhirātharvaṇaiḥ kramāt ||
11.10.27
vimṛjyāṅgāni mūrdhādicaraṇāntaṃ ca taiḥ spṛśet |
tatastena krameṇaiva samuddhūlya ca bhasmanā ||
11.10.28
sarvāṅgoddhūlanaṃ kuryātpraṇavena śivena vā |
tataśca puṇḍraṃ racayettriyāyuṣasamāhvayam ||
11.10.29
śivabhāvaṃ samāgamya śivabhāvamathācaret |
kuryāttrisandhyamapyevametatpāśupataṃ vratam ||
11.10.30
bhuktimuktipradaṃ caiva paśutvaṃ vinivartayet |
tatpaśutvaṃ parityajya kṛtvā pāśupataṃ vratam ||
11.10.31
pūjanīyo mahādevo liṅgamūrtiḥ sadāśivaḥ |
bhasmasnānaṃ mahāpuṇyaṃ sarvasaukhyakaraṃ param ||
11.10.32
āyuṣyaṃ balamārogyaṃ śrīpuṣṭivardhanaṃ yataḥ |
rakṣārthaṃ maṅgalārthaṃ ca sarvasampatsamṛddhaye ||
11.10.33
bhasmasnigdhamanuṣyāṇāṃ mahāmārībhayaṃ na ca |
śāntikaṃ pauṣṭikaṃ bhasma kāmadaṃ ca tridhā bhavet ||
11.10.33.c1
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmekādaśaskandhe bhasmamāhātmye pāśupatavratavarṇanaṃ nāma daśamo'dhyāyaḥ ||
Linked texts (8)
- Kriyāsāra — Śrīkaṇtha, Sanskrit
- Kriyāsāraḥ — Sanskrit
- Śivapurāṇa (complete text) — Sanskrit
- Tantracintāmaṇi — Sanskrit
- Liṅgapurāṇa — Vyāsa, Sanskrit
- Saurapurāṇa — Sanskrit
- Śivadharma (Nandiprokta) — Sanskrit
- Ācārabhūṣaṇa — Tryambaka rāma oka 1794, Sanskrit