[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Minor Purāṇas](https://indike.org/pramana/in.purana.upa) › [Śākta Upapurāṇas](https://indike.org/pramana/in.purana.upa.sakta) › [Devibhagavatapurana](https://indike.org/pramana/in.purana.upa.sakta.devibhagavata) › 11.2 # Devibhagavatapurana 11.2: dvitīyo'dhyāyaḥ | śaucavidhivarṇanam Devībhāgavatapurāṇa 11.2 - **Language:** Sanskrit ## Contents - [11.2.42](https://indike.org/pramana/in.purana.upa.sakta.devibhagavata.11.2.42) — 1 part ### dvitīyo'dhyāyaḥ | śaucavidhivarṇanam ### [11.2.1](https://indike.org/pramana/in.purana.upa.sakta.devibhagavata.11.2.1) śrīnārāyaṇa uvāca | ācārahīnaṃ na punanti vedā yadapyadhītāḥ saha ṣaḍbhiraṅgaiḥ | chandāṃsyenaṃ mṛtyukāle tyajanti nīḍaṃ śakuntā iva jātapakṣāḥ || ### [11.2.2](https://indike.org/pramana/in.purana.upa.sakta.devibhagavata.11.2.2) brāhme muhūrtte cotthāya tatsarvaṃ samyagācaret | rātrerantimayāme tu vedābhyāsaṃ cared budhaḥ || ### [11.2.3](https://indike.org/pramana/in.purana.upa.sakta.devibhagavata.11.2.3) kiñcitkālaṃ tataḥ kuryādiṣṭadevānucintanam | yogī tu pūrvamārgeṇa brahmadhyānaṃ samācaret || ### [11.2.4](https://indike.org/pramana/in.purana.upa.sakta.devibhagavata.11.2.4) jīvabrahmaikyatā yena jāyate tu nirantaram | jīvanmuktaśca bhavati tatkṣaṇādeva nārada || ### [11.2.5](https://indike.org/pramana/in.purana.upa.sakta.devibhagavata.11.2.5) pañcapañca uṣaḥkālaḥ saptapañcāruṇodayaḥ | aṣṭapañcabhavetprātaḥ śeṣaḥ sūryodayaḥ smṛtaḥ || ### [11.2.6](https://indike.org/pramana/in.purana.upa.sakta.devibhagavata.11.2.6) prātarutthāya yaḥ kuryādviṇmūtraṃ dvijasattamaḥ | nairṛtyāmiṣuvikṣepamatītyābhyadhikaṃ bhuvaḥ || ### [11.2.7](https://indike.org/pramana/in.purana.upa.sakta.devibhagavata.11.2.7) viṇmūtre'pi ca karṇastha āśrame prathame dvijaḥ | nivītaṃ pṛṣṭhataḥ kuryādvānaprasthagṛhasthayoḥ || ### [11.2.8](https://indike.org/pramana/in.purana.upa.sakta.devibhagavata.11.2.8) kṛtvā yajñopavītaṃ tu pṛṣṭhataḥ kaṇṭhalambitam | viṇmūtraṃ tu gṛhī kuryātkarṇasthaṃ prathamāśramī || ### [11.2.9](https://indike.org/pramana/in.purana.upa.sakta.devibhagavata.11.2.9) antardhāya tṛṇairbhūmiṃ śiraḥ prāvṛtya vāsasā | vācaṃ niyamya yatnena ṣṭhīvanaśvāsavarjitaḥ || ### [11.2.10](https://indike.org/pramana/in.purana.upa.sakta.devibhagavata.11.2.10) na phālakṛṣṭe na jale na citāyāṃ na parvate | jīrṇadevālaye kuryānna valmīke na śādvale || ### [11.2.11](https://indike.org/pramana/in.purana.upa.sakta.devibhagavata.11.2.11) na sasattveṣu garteṣu na gacchanna pathi sthitaḥ | sandhyayorubhayorjapye bhojane dantadhāvane || ### [11.2.12](https://indike.org/pramana/in.purana.upa.sakta.devibhagavata.11.2.12) pitṛkārye ca daive ca tathā mūtrapurīṣayoḥ | utsāhe maithune vāpi tathā vai gurusannidhau || ### [11.2.13](https://indike.org/pramana/in.purana.upa.sakta.devibhagavata.11.2.13) yāge dāne brahmayajñe dvijo maunaṃ samācaret | devatā ṛṣayaḥ sarve piśācoragarākṣasāḥ || ### [11.2.14](https://indike.org/pramana/in.purana.upa.sakta.devibhagavata.11.2.14) ito gacchantu bhūtāni bahirbhūmiṃ karomyaham | iti samprārthya paścāttu kuryācchaucaṃ yathāvidhi || ### [11.2.15](https://indike.org/pramana/in.purana.upa.sakta.devibhagavata.11.2.15) vāyvagnī vipramādityamāpaḥ paśyaṃstathaiva gāḥ | na kadācana kurvīta viṇmūtrasya visarjanam || ### [11.2.16](https://indike.org/pramana/in.purana.upa.sakta.devibhagavata.11.2.16) udaṅmukho divā kuryādrātrau ceddakṣiṇāmukhaḥ | tata ācchādya viṇmūtraṃ loṣṭhaparṇatṛṇādibhiḥ || ### [11.2.17](https://indike.org/pramana/in.purana.upa.sakta.devibhagavata.11.2.17) gṛhītaliṅga utthāya sa gacchedvārisannidhau | pātre jalaṃ gahītvā tu gacchedanyatra caiva hi || ### [11.2.18](https://indike.org/pramana/in.purana.upa.sakta.devibhagavata.11.2.18) gṛhītvā mṛttikāṃ kūlācchvetāṃ brāhmaṇasattamaḥ | raktāṃ pītāṃ tathā kṛṣṇāṃ gṛhṇīyuścānyavarṇakāḥ || ### [11.2.19](https://indike.org/pramana/in.purana.upa.sakta.devibhagavata.11.2.19) athavā yā yatra deśe saiva grāhyā dvijottamaiḥ | antarjalāddevagṛhādvalmīkānmūṣakotkarāt || ### [11.2.20](https://indike.org/pramana/in.purana.upa.sakta.devibhagavata.11.2.20) kṛtaśaucāvaśiṣṭācca na grāhyāḥ pañcamṛttikāḥ | mūtrāttu dviguṇaṃ śauce maithune triguṇaṃ smṛtam || ### [11.2.21](https://indike.org/pramana/in.purana.upa.sakta.devibhagavata.11.2.21) ekā liṅge kare tisra ubhayormṛddvayaṃ smṛtam | mūtraśaucaṃ samākhyātaṃ śauce tad dviguṇaṃ smṛtam || ### [11.2.22](https://indike.org/pramana/in.purana.upa.sakta.devibhagavata.11.2.22) viṭśauce liṅgadeśe tu pradadyānmṛttikādvayam | pañcāpāne daśaikasminnubhayoḥ sapta mṛttikāḥ || ### [11.2.23](https://indike.org/pramana/in.purana.upa.sakta.devibhagavata.11.2.23) vāmapādaṃ puraskṛtya paścāddakṣiṇameva ca | pratyekaṃ ca caturvāraṃ mṛttikāṃ lepayetsudhīḥ || ### [11.2.24](https://indike.org/pramana/in.purana.upa.sakta.devibhagavata.11.2.24) evaṃ śaucaṃ gṛhasthasya dviguṇaṃ brahmacāriṇaḥ | triguṇaṃ vānaprasthasya yatīnāṃ ca caturguṇam || ### [11.2.25](https://indike.org/pramana/in.purana.upa.sakta.devibhagavata.11.2.25) ārdrāmalakamānā tu mṛttikā śaucakarmaṇi | pratyekaṃ tu sadā grāhyā nāto nyūnā kadācana || ### [11.2.26](https://indike.org/pramana/in.purana.upa.sakta.devibhagavata.11.2.26) etaddivā syādviṭśaucaṃ tadardhaṃ niśi kīrtitam | āturasya tadardhaṃ tu mārgasthasya tadardhakam || ### [11.2.27](https://indike.org/pramana/in.purana.upa.sakta.devibhagavata.11.2.27) strīśūdrāṇāmaśaktānāṃ bālānāṃ śaucakarmaṇi | yathā gandhakṣayaḥ syāttu tathā kuryādasaṅkhyakam || ### [11.2.28](https://indike.org/pramana/in.purana.upa.sakta.devibhagavata.11.2.28) gandhalepakṣayo yāvattāvacchaucaṃ vidhīyate | sarveṣāmeva varṇānāmityāha bhagavānmanuḥ || ### [11.2.29](https://indike.org/pramana/in.purana.upa.sakta.devibhagavata.11.2.29) vāmahastena śaucaṃ tu kuryādvai dakṣiṇena na | nābheradho vāmahasto nābherūrdhvaṃ tu dakṣiṇaḥ || ### [11.2.30](https://indike.org/pramana/in.purana.upa.sakta.devibhagavata.11.2.30) śaucakarmaṇi vijñeyo nānyathā dvijapuṅgavaiḥ | jalapātraṃ na gṛhṇīyādviṇmūtrotsarjane budhaḥ || ### [11.2.31](https://indike.org/pramana/in.purana.upa.sakta.devibhagavata.11.2.31) gṛhṇīyādyadi mohena prāyaścittaṃ carettataḥ | mohādvāpyathavā''lasyānna kuryācchaucamātmanaḥ || ### [11.2.32](https://indike.org/pramana/in.purana.upa.sakta.devibhagavata.11.2.32) jalāhārastrirātraḥ syāttato jāpācca śudhyati | deśakāladravyaśaktisvopapattīśca sarvaśaḥ || ### [11.2.33](https://indike.org/pramana/in.purana.upa.sakta.devibhagavata.11.2.33) jñātvā śaucaṃ prakartavyamālasyaṃ nātra dhārayet | purīṣotsarjane kuryād gaṇḍūṣāndvādaśaiva tu || ### [11.2.34](https://indike.org/pramana/in.purana.upa.sakta.devibhagavata.11.2.34) caturo mūtravikṣepe nāto nyūnānkadācana | adhomukhaṃ naraḥ kṛtvā tyajettaṃ vāmataḥ śanaiḥ || ### [11.2.35](https://indike.org/pramana/in.purana.upa.sakta.devibhagavata.11.2.35) ācamya ca tataḥ kuryāddantadhāvanamādarāt | kaṇṭakikṣīravṛkṣotthaṃ dvādaśāṅgulamavraṇam || ### [11.2.36](https://indike.org/pramana/in.purana.upa.sakta.devibhagavata.11.2.36) kaniṣṭhikāgravatsthūlaṃ pūrvārdhe kṛtakūrcakam | karañjodumbarau cūtaḥ kadambo lodhracampakau | badarīti drumāśceti proktā dantapradhāvane || ### [11.2.37](https://indike.org/pramana/in.purana.upa.sakta.devibhagavata.11.2.37) annādyāya vyūhadhvaṃse somo rājāyamāgamat | sa me mukhaṃ prakṣālya tejasā ca bhagena ca || ### [11.2.38](https://indike.org/pramana/in.purana.upa.sakta.devibhagavata.11.2.38) āyurbalaṃ yaśo varcaḥ prajāḥ paśuvasūni ca | brahmaprajñāṃ ca medhāṃ ca tvanno dehi vanaspate || ### [11.2.39](https://indike.org/pramana/in.purana.upa.sakta.devibhagavata.11.2.39) abhāve dantakāṣṭhasya pratiṣiddhadineṣu ca | apāṃ dvādaśagaṇḍūṣairvidadhyāddantadhāvanam || ### [11.2.40](https://indike.org/pramana/in.purana.upa.sakta.devibhagavata.11.2.40) raverdine yaḥ kurute prāṇī dantasya dhāvanam | savitā bhakṣitastena svakulaṃ tena ghātitam || ### [11.2.41](https://indike.org/pramana/in.purana.upa.sakta.devibhagavata.11.2.41) pratipaddarśaṣaṣṭhīṣu navamyekādaśīravau | dantānāṃ kāṣṭhasaṃyogāddahatyāsaptamaṃ kulam || ### [11.2.42](https://indike.org/pramana/in.purana.upa.sakta.devibhagavata.11.2.42) kṛtvālaṃ pādaśaucaṃ hyamalamatha jalaṃ triḥpibed dvirvimṛjya tarjanyāṅguṣṭhavatyā sajalamabhimṛśe-nnāsikārandhrayugmam | aṅguṣṭhānāmikābhyāṃ nayanayugayutaṃ karṇayugmaṃ kaniṣṭhā-ṅguṣṭhābhyāṃ nābhideśe hṛdayamatha tale-nāṅgulībhiḥ śirāṃsi || ### [11.2.42.c1](https://indike.org/pramana/in.purana.upa.sakta.devibhagavata.11.2.42.c1) iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ ekādaśaskandhe śaucavidhivarṇanaṃ nāma dvitīyo'dhyāyaḥ || ## Linked texts (5) - [Bhagavatībhāgavatapurāṇa](https://indike.org/pramana/in.purana.upa.sakta.bhagavatibhagavatapurana.94.1) — Sanskrit - [Ācāraratna (Maṇirāma)](https://indike.org/pramana/in.niti.dharma.acara.bhatta.acararatna.7.23) — Maṇirāma 1630, Sanskrit - [Anūpavilāsa](https://indike.org/pramana/in.niti.dharma.nibandha.mahanibandha.anupavilasa.7.23) — Maṇirāma 1665, Sanskrit - [Āhnikaprakāśa](https://indike.org/pramana/in.niti.dharma.acara.ahnika.ahnikaprakasa.1.p54) — Mitramiśra, Sanskrit - [Ācārārka (Divākarabhaṭṭa)](https://indike.org/pramana/in.niti.dharma.acara.bhatta.acararka.4.11.p1.1) — Divākarabhaṭṭa 1686, Sanskrit --- Source: [https://indike.org/pramana/in.purana.upa.sakta.devibhagavata.11.2](https://indike.org/pramana/in.purana.upa.sakta.devibhagavata.11.2) · Pramāṇa