Pramāṇa · Search · About · API

Devibhagavatapurana 11.8: aṣṭamo'dhyāyaḥ | bhūtaśuddhivarṇanam

Devībhāgavatapurāṇa 11.8

Language
Sanskrit

Contents

aṣṭamo'dhyāyaḥ | bhūtaśuddhivarṇanam

11.8.1

śrīnārāyaṇa uvāca |
bhūtaśuddhiprakāraṃ ca kathayāmi mahāmune |
mūlādhārātsamutthāya kuṇḍalīṃ paradevatām ||

11.8.2

suṣumṇāmārgamāśritya brahmarandhragatāṃ smaret |
jīvaṃ brahmaṇi saṃyojya haṃsamantreṇa sādhakaḥ ||

11.8.3

pādādijānuparyantaṃ catuṣkoṇaṃ savajrakam |
laṃ bījākhyaṃ svarṇavarṇaṃ smaredavanimaṇḍalam ||

11.8.4

jānvādyānābhicandrārdhanibhaṃ padmadvayāṅkitam |
vaṃ bījayuktaṃ śvetābhamambhaso maṇḍalaṃ smaret ||

11.8.5

nābherhṛdayaparyantaṃ trikoṇaṃ svastikānvitam |
raṃ bījena yutaṃ raktaṃ smaretpāvakamaṇḍalam ||

11.8.6

hṛdo bhūmadhyaparyantaṃ vṛttaṃ ṣaḍbindulāñchitam |
yaṃ bījayuktaṃ dhūmrābhaṃ nabhasvanmaṇḍalaṃ smaret ||

11.8.7

ābrahmarandhraṃ bhrūmadhyādvṛttaṃ svacchaṃ manoharam |
haṃ bījayuktamākāśamaṇḍalaṃ ca vicintayet ||

11.8.8

evaṃ bhūtāni sañcintya pratyekaṃ saṃvilāpayet |
bhuvaṃ jale jalaṃ vahnau vahniṃ vāyau nabhasyamum ||

11.8.9

vilāpya khamahaṅkāre mahattattve'pyahaṅkṛtim |
mahāntaṃ prakṛtau māyāmātmani pravilāpayet ||

11.8.10

śuddhasaṃvinmayo bhūtvā cintayetpāpapūruṣam |
vāmakukṣisthitaṃ kṛṣṇamaṅguṣṭhaparimāṇakam ||

11.8.11

brahmahatyāśiroyuktaṃ kanakasteyabāhukam |
madirāpānahṛdayaṃ gurutalpakaṭīyutam ||

11.8.12

tatsaṃsargipadadvandvamupapātakamastakam |
khaḍgacarmadharaṃ kṛṣṇamadhovaktraṃ suduḥsaham ||

11.8.13

vāyubījaṃ smaranvāyuṃ sampūryainaṃ viśoṣayet |
svaśarīrayutaṃ mantro vahnibījena nirdahet ||

11.8.14

kumbhake parijaptena tataḥ pāpanarodbhavam |
bahirbhasma samutsārya vāyubījena recayet ||

11.8.15

sudhābījena dehotthaṃ bhasma samplāvayetsudhīḥ |
bhūbījena ghanīkṛtya bhasma tatkanakāṇḍavat ||

11.8.16

viśuddhamukurākāraṃ japanbījaṃ vihāyasaḥ |
mūrdhādipādaparyantānyaṅgāni racayetsudhīḥ ||

11.8.17

ākāśādīni bhūtāni punarutpādayeccitaḥ |
so'haṃ mantreṇa cātmānamānayeddhṛdayāmbuje ||

11.8.18

kuṇḍalījīvamādāya parasaṅgātsudhāmayam |
saṃsthāpya hṛdayāmbhoje mūlādhāragatāṃ smaret ||

11.8.19

raktāmbhodhisthapotollasadaruṇa-sarojādhirūḍhā karābjaiḥ śūlaṃ kodaṇḍamikṣūdbhavamaṇiguṇa-mapyaṅkuśaṃ pañcabāṇān |
bibhrāṇāsṛkkapālaṃ trinayana-lasitā pīnavakṣoruhāḍhyā devī bālārkavarṇā bhavatu sukhakarī prāṇaśaktiḥ parā naḥ ||

11.8.20

evaṃ dhyātvā prāṇaśaktiṃ paramātmasvarūpiṇīm |
vibhūtidhāraṇaṃ kāryaṃ sarvādhikṛtisiddhaye ||

11.8.21

vibhūtervistaraṃ vakṣye dhāraṇe ca mahāphalam |
śrutismṛtipramāṇoktaṃ bhasmadhāraṇamuttamam ||

11.8.21.c1

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmekādaśaskandhe bhūtaśuddhivarṇanaṃ nāmāṣṭamo'dhyāyaḥ ||

Linked texts (2)