[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Minor Purāṇas](https://indike.org/pramana/in.purana.upa) › [Śākta Upapurāṇas](https://indike.org/pramana/in.purana.upa.sakta) › [Devibhagavatapurana](https://indike.org/pramana/in.purana.upa.sakta.devibhagavata) › 2.7 # Devibhagavatapurana 2.7: saptamo'dhyāyaḥ | pāṇḍavānāṃ kathānakaṃ mṛtānāṃ darśanavarṇanam Devībhāgavatapurāṇa 2.7 - **Language:** Sanskrit ## Contents - [2.7.68](https://indike.org/pramana/in.purana.upa.sakta.devibhagavata.2.7.68) — 1 part ### saptamo'dhyāyaḥ | pāṇḍavānāṃ kathānakaṃ mṛtānāṃ darśanavarṇanam ### [2.7.1](https://indike.org/pramana/in.purana.upa.sakta.devibhagavata.2.7.1) sūta uvāca | pañcānāṃ draupadī bhāryā sā mānyā sā pativratā | pañca putrāstu tasyāḥ syurbhartṛbhyo'tīva sundarāḥ || ### [2.7.2](https://indike.org/pramana/in.purana.upa.sakta.devibhagavata.2.7.2) arjunasya tathā bhāryā kṛṣṇasya bhaginī śubhā | subhadrā yā hṛtā pūrvaṃ jiṣṇunā harisammate || ### [2.7.3](https://indike.org/pramana/in.purana.upa.sakta.devibhagavata.2.7.3) tasyāṃ jāto mahāvīro nihato'sau raṇājire | abhimanyurhatāstatra draupadyāśca sutāḥ kila || ### [2.7.4](https://indike.org/pramana/in.purana.upa.sakta.devibhagavata.2.7.4) abhimanyorvarā bhāryā vairāṭī cātisundarī | kulānte suṣuve putraṃ mṛto bāṇāgninā śiśuḥ || ### [2.7.5](https://indike.org/pramana/in.purana.upa.sakta.devibhagavata.2.7.5) jīvitaḥ sa tu kṛṣṇena bhāgineyasutaḥ svayam | drauṇibāṇāgninirdagdhaḥ pratāpenādbhutena ca || ### [2.7.6](https://indike.org/pramana/in.purana.upa.sakta.devibhagavata.2.7.6) parikṣīṇeṣu vaṃśeṣu jāto yasmādvaraḥ sutaḥ | tasmātparīkṣito nāma vikhyātaḥ pṛthivītale || ### [2.7.7](https://indike.org/pramana/in.purana.upa.sakta.devibhagavata.2.7.7) nihateṣu ca putreṣu dhṛtarāṣṭro'tiduḥkhitaḥ | tasthau pāṇḍavarājye ca bhīmavāgbāṇapīḍitaḥ || ### [2.7.8](https://indike.org/pramana/in.purana.upa.sakta.devibhagavata.2.7.8) gāndhārī ca tathātiṣṭhat putraśokāturā bhṛśam | sevāṃ tayordivārātraṃ cakārārto yudhiṣṭhiraḥ || ### [2.7.9](https://indike.org/pramana/in.purana.upa.sakta.devibhagavata.2.7.9) viduro'pyatidharmātmā prajñānetramabodhayat | yudhiṣṭhirasyānumate bhrātṛpārśve vyatiṣṭhata || ### [2.7.10](https://indike.org/pramana/in.purana.upa.sakta.devibhagavata.2.7.10) dharmaputro'pi dharmātmā cakāra sevanaṃ pituḥ | putraśokodbhavaṃ duḥkhaṃ tasya vismārayanniva || ### [2.7.11](https://indike.org/pramana/in.purana.upa.sakta.devibhagavata.2.7.11) yathā śṛṇoti vṛddho'sau tathā bhīmo'tiroṣitaḥ | vārabāṇenāhanattaṃ tu śrāvayansaṃsthitāñjanān || ### [2.7.12](https://indike.org/pramana/in.purana.upa.sakta.devibhagavata.2.7.12) mayā putrā hatāḥ sarve duṣṭasyāndhasya te raṇe | duḥśāsanasya rudhiraṃ pītaṃ hṛdyaṃ tathā bhṛśam || ### [2.7.13](https://indike.org/pramana/in.purana.upa.sakta.devibhagavata.2.7.13) bhunakti piṇḍamandho'yaṃ mayā dattaṃ gatatrapaḥ | dhvāṅkṣavadvā śvavaccāpi vṛthā jīvatyasau janaḥ || ### [2.7.14](https://indike.org/pramana/in.purana.upa.sakta.devibhagavata.2.7.14) evaṃvidhāni rūkṣāṇi śrāvayatyanuvāsaram | āśvāsayati dharmātmā mūrkho'yamiti ca bruvan || ### [2.7.15](https://indike.org/pramana/in.purana.upa.sakta.devibhagavata.2.7.15) aṣṭādaśaiva varṣāṇi sthitvā tatraiva duḥkhitaḥ | dhṛtarāṣṭro vane yānaṃ prārthayāmāsa dharmajam || ### [2.7.16](https://indike.org/pramana/in.purana.upa.sakta.devibhagavata.2.7.16) ayācata dharmaputraṃ dhṛtarāṣṭro mahīpatiḥ | putrebhyo'haṃ dadāmyadya nirvāpaṃ vidhipūrvakam || ### [2.7.17](https://indike.org/pramana/in.purana.upa.sakta.devibhagavata.2.7.17) vṛkodareṇa sarveṣāṃ kṛtamatraurdhvadaihikam | na kṛtaṃ mama putrāṇāṃ pūrvavairamanusmaran || ### [2.7.18](https://indike.org/pramana/in.purana.upa.sakta.devibhagavata.2.7.18) dadāsi ceddhanaṃ mahyaṃ kṛtvā caivordhvadaihikam | gamiṣye'haṃ vanaṃ taptuṃ tapaḥ svargaphalapradam || ### [2.7.19](https://indike.org/pramana/in.purana.upa.sakta.devibhagavata.2.7.19) ekānte vidureṇokto rājā dharmasutaḥ śuciḥ | dhanaṃ dātuṃ manaścakre dhṛtarāṣṭrāya cārthine || ### [2.7.20](https://indike.org/pramana/in.purana.upa.sakta.devibhagavata.2.7.20) samāhūya nijānmarvānuvāca pṛthivīpatiḥ | dhanaṃ dāsye mahābhāgāḥ pitre nirvāpakāmine || ### [2.7.21](https://indike.org/pramana/in.purana.upa.sakta.devibhagavata.2.7.21) tacchrutvā vacanaṃ bhrāturnyeṣṭhasyāmitatejasaḥ | saṅgrahe'sya mahābāhurmārutiḥ kupito'bravīt || ### [2.7.22](https://indike.org/pramana/in.purana.upa.sakta.devibhagavata.2.7.22) dhanaṃ deyaṃ mahābhāga duryodhanahitāya kim | andho'pi sukhamāpnoti mūrkhatvaṃ kimataḥ param || ### [2.7.23](https://indike.org/pramana/in.purana.upa.sakta.devibhagavata.2.7.23) tava durmantritenātha duḥkhaṃ prāptā vane vayam | draupadī ca mahābhāgā samānītā durātmanā || ### [2.7.24](https://indike.org/pramana/in.purana.upa.sakta.devibhagavata.2.7.24) virāṭabhavane vāsaḥ prasādāttava suvrata | dāsatvaṃ ca kṛtaṃ sarvairmatsyasyāmitavikramaiḥ || ### [2.7.25](https://indike.org/pramana/in.purana.upa.sakta.devibhagavata.2.7.25) devitā tvaṃ na cejjyeṣṭhaḥ prabhavetsaṅkṣayaḥ katham | sūpakāro virāṭasya hatvābhūvaṃ tu māgadham || ### [2.7.26](https://indike.org/pramana/in.purana.upa.sakta.devibhagavata.2.7.26) bṛhannalā kathaṃ jiṣṇurbhavedbālasya nartakaḥ | kṛtvā veṣaṃ mahābāhuryoṣāyā vāsavātmajaḥ || ### [2.7.27](https://indike.org/pramana/in.purana.upa.sakta.devibhagavata.2.7.27) gāṇḍīvaśobhitau hastau kṛtau kaṅkaṇaśobhitau | mānuṣaṃ ca vapuḥ prāpya kiṃ duḥkhaṃ syādataḥ param || ### [2.7.28](https://indike.org/pramana/in.purana.upa.sakta.devibhagavata.2.7.28) dṛṣṭvā veṇīṃ kṛtāṃ mūrdhni kajjalaṃ locane tathā | asiṃ gṛhītvā tarasā chedmyahaṃ nānyathā sukham || ### [2.7.29](https://indike.org/pramana/in.purana.upa.sakta.devibhagavata.2.7.29) apṛṣṭvā ca mahīpālaṃ nikṣipto'gnirmayā gṛhe | dagdhukāmaśca pāpātmā nirdagdho'sau purocanaḥ || ### [2.7.30](https://indike.org/pramana/in.purana.upa.sakta.devibhagavata.2.7.30) kīcakā nihatāḥ sarve tvāmapṛṣṭvā janādhipa | na tathā nihatāḥ sarve sabhāryā dhṛtarāṣṭrajāḥ || ### [2.7.31](https://indike.org/pramana/in.purana.upa.sakta.devibhagavata.2.7.31) mūrkhatvaṃ tava rājendra gandharvebhyaśca mocitāḥ | duryodhanādayaḥ kāmaṃ śatravo nigaḍīkṛtāḥ || ### [2.7.32](https://indike.org/pramana/in.purana.upa.sakta.devibhagavata.2.7.32) duryodhanahitāyādya dhanaṃ dātuṃ tvamicchasi | nāhaṃ dade mahīpāla sarvathā preritastvayā || ### [2.7.33](https://indike.org/pramana/in.purana.upa.sakta.devibhagavata.2.7.33) ityuktvā nirgate bhīme tribhiḥ parivṛto nṛpaḥ | dadau vittaṃ subahulaṃ dhṛtarāṣṭrāya dharmajaḥ || ### [2.7.34](https://indike.org/pramana/in.purana.upa.sakta.devibhagavata.2.7.34) kārayāmāsa vidhivatputrāṇāṃ caurdhvadaihikam | dadau dānāni viprebhyo dhṛtarāṣṭro'mbikāsutaḥ || ### [2.7.35](https://indike.org/pramana/in.purana.upa.sakta.devibhagavata.2.7.35) kṛtvaurdhvadaihikaṃ sarvaṃ gāndhārīsahito nṛpaḥ | praviveśa vanaṃ tūrṇaṃ kuntyā ca vidureṇa ca || ### [2.7.36](https://indike.org/pramana/in.purana.upa.sakta.devibhagavata.2.7.36) sañjayena parijñāto nirgato'sau mahāmatiḥ | putrairnivāryamāṇāpi śūrasenasutā gatā || ### [2.7.37](https://indike.org/pramana/in.purana.upa.sakta.devibhagavata.2.7.37) vilapanbhīmaseno'pi tathānye cāpi kauravāḥ | gaṅgātīrātparāvṛtya yayuḥ sarve gajāhvayam || ### [2.7.38](https://indike.org/pramana/in.purana.upa.sakta.devibhagavata.2.7.38) te gatvā jāhnavītīre śatayūpāśramaṃ śubham | kṛtvā tṛṇaiḥ kuṭīṃ tatra tapastepuḥ samāhitāḥ || ### [2.7.39](https://indike.org/pramana/in.purana.upa.sakta.devibhagavata.2.7.39) gatānyabdāni ṣaṭ teṣāṃ yadā yātā hi tāpasāḥ | yudhiṣṭhirastu virahādanujānidamabravīt || ### [2.7.40](https://indike.org/pramana/in.purana.upa.sakta.devibhagavata.2.7.40) svapne dṛṣṭā mayā kuntī durbalā vanasaṃsthitā | mano me jāyate draṣṭuṃ mātaraṃ pitarau tathā || ### [2.7.41](https://indike.org/pramana/in.purana.upa.sakta.devibhagavata.2.7.41) viduraṃ ca mahātmānaṃ sañjayaṃ ca mahāmatim | rocate yadi vaḥ sarvān vrajāma iti me matiḥ || ### [2.7.42](https://indike.org/pramana/in.purana.upa.sakta.devibhagavata.2.7.42) tataste bhrātaraḥ sarve subhadrā draupadī tathā | vairāṭī ca mahābhāgā tathā nāgariko janaḥ || ### [2.7.43](https://indike.org/pramana/in.purana.upa.sakta.devibhagavata.2.7.43) prāptāḥ sarvajanaiḥ sārdhaṃ pāṇḍavā darśanotsukāḥ | śatayūpāśramaṃ prāpya dadṛśuḥ sarva eva te || ### [2.7.44](https://indike.org/pramana/in.purana.upa.sakta.devibhagavata.2.7.44) viduro na yadā dṛṣṭo dharmastaṃ pṛṣṭavāṃstadā | kvāste sa viduro dhīmāṃstamuvācāmbikāsutaḥ || ### [2.7.45](https://indike.org/pramana/in.purana.upa.sakta.devibhagavata.2.7.45) viraktaścarate kṣattā nirīho niṣparigrahaḥ | kuto'pyekāntasaṃvāsī dhyāyate'ntaḥ sanātanam || ### [2.7.46](https://indike.org/pramana/in.purana.upa.sakta.devibhagavata.2.7.46) gaṅgāṃ gacchandvitīye'hni vane rājā yudhiṣṭhiraḥ | dadarśa viduraṃ kṣāmaṃ tapasā saṃśitavratam || ### [2.7.47](https://indike.org/pramana/in.purana.upa.sakta.devibhagavata.2.7.47) dṛṣṭvovāca mahīpālo vande'haṃ tvāṃ yudhiṣṭhiraḥ | tasthau śrutvā ca viduraḥ sthāṇubhūta ivānaghaḥ || ### [2.7.48](https://indike.org/pramana/in.purana.upa.sakta.devibhagavata.2.7.48) kṣaṇena vidurasyāsyānniḥsṛtaṃ teja adbhutam | līnaṃ yudhiṣṭhirasyāsye dharmāṃśatvātparasparam || ### [2.7.49](https://indike.org/pramana/in.purana.upa.sakta.devibhagavata.2.7.49) kṣattā jahau tadā prāṇāñchuśocāti yudhiṣṭhiraḥ | dāhārthaṃ tasya dehasya kṛtavānudyamaṃ nṛpaḥ || ### [2.7.50](https://indike.org/pramana/in.purana.upa.sakta.devibhagavata.2.7.50) śṛṇvatastu tadā rājño vāguvācāśarīriṇī | virakto'yaṃ na dāhārho yatheṣṭaṃ gaccha bhūpate || ### [2.7.51](https://indike.org/pramana/in.purana.upa.sakta.devibhagavata.2.7.51) śrutvā te bhrātaraḥ sarve sasnurgaṅgājale'male | gatvā nivedayāmāsurdhṛtarāṣṭrāya vistarāt || ### [2.7.52](https://indike.org/pramana/in.purana.upa.sakta.devibhagavata.2.7.52) sthitāstatrāśrame sarve pāṇḍavā nāgaraiḥ saha | tatra satyavatīsūnurnāradaśca samāgataḥ || ### [2.7.53](https://indike.org/pramana/in.purana.upa.sakta.devibhagavata.2.7.53) munayo'nye mahātmānaścāgatā dharmanandanam | kuntī prāha tadā vyāsaṃ saṃsthitaṃ śubhadarśanam || ### [2.7.54](https://indike.org/pramana/in.purana.upa.sakta.devibhagavata.2.7.54) kṛṣṇa karṇastu putro me jātamātrastu vīkṣitaḥ | mano me tapyate'tyarthaṃ darśayasva tapodhana || ### [2.7.55](https://indike.org/pramana/in.purana.upa.sakta.devibhagavata.2.7.55) samartho'si mahābhāga kuru me vāñchitaṃ prabho | gāndhāryuvāca | duryodhano raṇe'gacchadvīkṣito na mayā mune || ### [2.7.56](https://indike.org/pramana/in.purana.upa.sakta.devibhagavata.2.7.56) taṃ darśaya muniśreṣṭha putraṃ me tvaṃ sahānujam | subhadrovāca | abhimanyuṃ mahāvīraṃ prāṇādapyadhikaṃ priyam || ### [2.7.57](https://indike.org/pramana/in.purana.upa.sakta.devibhagavata.2.7.57) draṣṭukāmāsmi sarvajña darśayādya tapodhana | sūta uvāca | evaṃvidhāni vākyāni śrutvā satyavatīsutaḥ || ### [2.7.58](https://indike.org/pramana/in.purana.upa.sakta.devibhagavata.2.7.58) prāṇāyāmaṃ tataḥ kṛtvā dadhyau devīṃ sanātanīm | sandhyākāle'tha samprāpte gaṅgāyāṃ munisattamaḥ || ### [2.7.59](https://indike.org/pramana/in.purana.upa.sakta.devibhagavata.2.7.59) sarvāṃstāṃśca samāhūya yudhiṣṭhirapurogamān | tuṣṭāva viśvajananīṃ snātvā puṇyasarijjale || ### [2.7.60](https://indike.org/pramana/in.purana.upa.sakta.devibhagavata.2.7.60) prakṛtiṃ puruṣārāmāṃ saguṇāṃ nirguṇāṃ tathā | devadevīṃ brahmarūpāṃ maṇidvīpādhivāsinīm || ### [2.7.61](https://indike.org/pramana/in.purana.upa.sakta.devibhagavata.2.7.61) yadā na vedhā na ca viṣṇurīśvaro na vāsavo naiva jalādhipastathā | na vittapo naiva yamaśca pāvaka-stadāsi devi tvamahaṃ namāmi tām || ### [2.7.62](https://indike.org/pramana/in.purana.upa.sakta.devibhagavata.2.7.62) jalaṃ na vāyurna dharā na cāmbaraṃ guṇā na teṣāṃ ca na cendriyāṇyaham | mano na buddhirna ca tigmaguḥ śaśī tadāsi devi tvamahaṃ namāmi tām || ### [2.7.63](https://indike.org/pramana/in.purana.upa.sakta.devibhagavata.2.7.63) imaṃ jīvalokaṃ samādhāya citte guṇairliṅgakośaṃ ca nītvā samādhau | sthitā kalpakālaṃ nayasyātmatantrā na ko'pyasti vettā vivekaṃ gato'pi || ### [2.7.64](https://indike.org/pramana/in.purana.upa.sakta.devibhagavata.2.7.64) prārthayatyeṣa māṃ loko mṛtānāṃ darśanaṃ punaḥ | nāhaṃ kṣamo'smi mātastvaṃ darśayāśu janānmṛtān || ### [2.7.65](https://indike.org/pramana/in.purana.upa.sakta.devibhagavata.2.7.65) sūta uvāca | evaṃ stutā tadā devī māyā śrībhuvaneśvarī | svargādāhūya sarvānvai darśayāmāsa pārthivān || ### [2.7.66](https://indike.org/pramana/in.purana.upa.sakta.devibhagavata.2.7.66) dṛṣṭvā kuntī ca gāndhārī subhadrā ca virāṭajā | pāṇḍavā mumuduḥ sarve vīkṣya pratyāgatānsvakān || ### [2.7.67](https://indike.org/pramana/in.purana.upa.sakta.devibhagavata.2.7.67) punarvisarjitāstena vyāsenāmitatejasā | smṛtvā devīṃ mahāmāyāmindrajālamivodyatam || ### [2.7.68](https://indike.org/pramana/in.purana.upa.sakta.devibhagavata.2.7.68) tadā pṛṣṭvā yayuḥ sarve pāṇḍavā munayastathā | rājā nāgapuraṃ prāptaḥ kurvan vyāsakathāṃ pathi || ### [2.7.68.c1](https://indike.org/pramana/in.purana.upa.sakta.devibhagavata.2.7.68.c1) iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ dvitīyaskandhe pāṇḍavānāṃ kathānakaṃ mṛtānāṃ darśanavarṇanaṃ nāma saptamo'dhyāyaḥ || --- Source: [https://indike.org/pramana/in.purana.upa.sakta.devibhagavata.2.7](https://indike.org/pramana/in.purana.upa.sakta.devibhagavata.2.7) · Pramāṇa