Devibhagavatapurana 8.7: saptamo'dhyāyaḥ | bhuvanakośavarṇane parvatanadīvarṣādivarṇanam
Devībhāgavatapurāṇa 8.7
- Language
- Sanskrit
Contents
- 8.7.37 — 1 part
saptamo'dhyāyaḥ | bhuvanakośavarṇane parvatanadīvarṣādivarṇanam
8.7.1
śrīnārāyaṇa uvāca |
girī meruṃ ca pūrveṇa dvau cāṣṭādaśayojanaiḥ |
sahasrairāyatau codagdvisahasraṃ pṛthūccakau ||
8.7.2
jaṭharo devakūṭaśca tāvetau girivaryakau |
meroḥ paścimato'drī dvau pavamānastathāparaḥ ||
8.7.3
pāriyātraśca tau tāvadvikhyātau tuṅgavistarau |
merordakṣiṇataḥ khyātau kailāsakaravīrakau ||
8.7.4
prāgāyatau pūrvavṛttau mahāparvatarājakau |
evaṃ cottarato merostriśṛṅgamakarau girī ||
8.7.5
etaiścādrivarairaṣṭasaṅkhyaiḥ parivṛto giriḥ |
sumeruḥ kāñcanagiriḥ paribhrājan raviryathā ||
8.7.6
merormūrdhani dhāturhi purī paṅkajajanmanaḥ |
madhyataścopaklṛpteyaṃ daśasāhasrayojanaiḥ ||
8.7.7
samānacaturasrāṃ ca śātakaumbhamayīṃ purīm |
varṇayanti mahātmānaḥ parāvaravido budhāḥ ||
8.7.8
tāṃ purīmanulokānāmaṣṭānāmīśiṣāṃ parāḥ |
puryaḥ prakhyātasauvarṇarūpāstāśca yathādiśam ||
8.7.9
yathārūpaṃ sārdhanetrasahasrapramitāḥ kṛtāḥ |
merornava purāṇi syurmanovatyamarāvatī ||
8.7.10
tejovatī saṃyamanī tathā kṛṣṇāṅganāparā |
śraddhāvatī gandhavatī tathā cānyā mahodayā ||
8.7.11
yaśovatī ca brahmendravahnyādīnāṃ yathākramam |
tatraiva yajñaliṅgasya viṣṇorbhagavato vibhoḥ ||
8.7.12
vāmapādāṅguṣṭhanakhanirbhinnasya ca nārada |
aṇḍordhvabhāgarandhrasya madhyātsaṃviśatī divaḥ ||
8.7.13
mūrdhanyavatatāreyaṃ gaṅgā saṃviśatī vibho |
lokānāmakhilānāṃ ca pāpahārijalākulā ||
8.7.14
iyaṃ ca sākṣādbhagavatpadī lokeṣu viśrutā |
kālena mahatā sā tu yugasāhasrakeṇa tu ||
8.7.15
divo mūrdhānamāgatya devī devanadīśvarī |
yattadviṣṇupadaṃ nāma sthānaṃ trailokyaviśrutam ||
8.7.16
auttānapādiryatrāste dhruvaḥ paramapāvanaḥ |
bhagavatpādayugalaṃ padmakośarajo dadhat ||
8.7.17
adyāpyāste sa rājarṣiḥ padavīmacalāṃ śritaḥ |
tatra saptarṣayastasya prabhāvajñā mahāśayāḥ ||
8.7.18
pradakṣiṇaṃ prakramanti sarvalokahitepsavaḥ |
ātyantikī siddhiriyaṃ tapatāṃ siddhidāyinī ||
8.7.19
ādriyante ca śirasā jaṭājūṭoṣitena ca |
tato viṣṇupadāddevī naikasāhasrakoṭibhiḥ ||
8.7.20
vimānairākule devayāne'vataratī ca sā |
candramaṇḍalamāplāvya patantī brahyasadyani ||
8.7.21
caturdhā bhidyamānā sā brahmaloke ca nārada |
caturbhirnāmabhirdevī caturdiśamabhisṛtā ||
8.7.22
saritāṃ ca nadīnāṃ ca patimevānvapadyata |
sītā cālakanandā ca caturbhadreti nāmabhiḥ ||
8.7.23
sītā ca brahmasadanācchikharebhyaḥ kṣamābhṛtām |
kesarābhidhanāmnā ca prasravantī ca svarṇadī ||
8.7.24
gandhamādanamūrdhnīha patitā pāpahāriṇī |
antareṇa tu bhadrāśvavarṣaṃ prācyāṃ samāgatā ||
8.7.25
kṣārodadhiṃ gatā sā tu dyunadī devapūjitā |
tato mālyavataḥ śṛṅgād dvitīyā parinirgatā ||
8.7.26
tato vegavatī bhūtvā ketumālaṃ samāgatā |
cakṣurnāmnī devanadī pratīcyāṃ diśyupāgatā ||
8.7.27
saritāṃ patimāviṣṭā sā gaṅgā devavanditā |
tatastṛtīyā dhārā tu nāmnā khyātā ca nārada ||
8.7.28
puṇyā cālakanandā vai dakṣiṇenābjabhūpadāt |
vanāni girikūṭāni samatikramya cāgatā ||
8.7.29
hemakūṭaṃ girivaraṃ prāptāto'pīha nirgatā |
ativegavatī bhūtvā bhārataṃ cāgatāparā ||
8.7.30
dakṣiṇaṃ jaladhiṃ prāptā tṛtīyā sā saridvarā |
yasyāḥ snānāya saratāṃ manujānāṃ pade pade ||
8.7.31
rājasūyāśvamedhādi phalaṃ tu na hi durlabham |
tataścaturthī dhārā tu bhṛṅgavatparvatātpunaḥ ||
8.7.32
bhadrābhidhā saṃsravantī kurūnsantarpya cottarān |
samudraṃ samanuprāptā gaṅgā trailokyapāvanī ||
8.7.33
anye nadāśca nadyaśca varṣe varṣe'pi santi hi |
bahuśo merumandāraprasūtāścaiva nārada ||
8.7.34
tatrāpi bhārataṃ varṣaṃ karmakṣetramuśanti hi |
anyāni cāṣṭavarṣāṇi bhaumasvargapradāni ca ||
8.7.35
svargiṇāṃ puṇyaśeṣasya bhogasthānāni nārada |
puruṣāṇāṃ cāyutāyurvajrāṅgā devasannibhāḥ ||
8.7.36
puruṣā nāgasāhasrairdaśabhiḥ parikalpitāḥ |
mahāsauratasantuṣṭāḥ kalatrāḍhyāḥ sukhānvitāḥ ||
8.7.37
ekavarṣonake cāyuṣyāptagarbhāḥ striyo'pi hi |
tretāyugasamaḥ kālo vartate sarvadaiva hi ||
8.7.37.c1
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmaṣṭamaskandhe bhuvanakośavarṇane parvatanadīvarṣādivarṇanaṃ nāma saptamo'dhyāyaḥ ||
Linked texts (1)
- Bhāgavatapurāṇa — Vyāsa, Sanskrit