[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Minor Purāṇas](https://indike.org/pramana/in.purana.upa) › [Śākta Upapurāṇas](https://indike.org/pramana/in.purana.upa.sakta) › [Devibhagavatapurana](https://indike.org/pramana/in.purana.upa.sakta.devibhagavata) › 8.7 # Devibhagavatapurana 8.7: saptamo'dhyāyaḥ | bhuvanakośavarṇane parvatanadīvarṣādivarṇanam Devībhāgavatapurāṇa 8.7 - **Language:** Sanskrit ## Contents - [8.7.37](https://indike.org/pramana/in.purana.upa.sakta.devibhagavata.8.7.37) — 1 part ### saptamo'dhyāyaḥ | bhuvanakośavarṇane parvatanadīvarṣādivarṇanam ### [8.7.1](https://indike.org/pramana/in.purana.upa.sakta.devibhagavata.8.7.1) śrīnārāyaṇa uvāca | girī meruṃ ca pūrveṇa dvau cāṣṭādaśayojanaiḥ | sahasrairāyatau codagdvisahasraṃ pṛthūccakau || ### [8.7.2](https://indike.org/pramana/in.purana.upa.sakta.devibhagavata.8.7.2) jaṭharo devakūṭaśca tāvetau girivaryakau | meroḥ paścimato'drī dvau pavamānastathāparaḥ || ### [8.7.3](https://indike.org/pramana/in.purana.upa.sakta.devibhagavata.8.7.3) pāriyātraśca tau tāvadvikhyātau tuṅgavistarau | merordakṣiṇataḥ khyātau kailāsakaravīrakau || ### [8.7.4](https://indike.org/pramana/in.purana.upa.sakta.devibhagavata.8.7.4) prāgāyatau pūrvavṛttau mahāparvatarājakau | evaṃ cottarato merostriśṛṅgamakarau girī || ### [8.7.5](https://indike.org/pramana/in.purana.upa.sakta.devibhagavata.8.7.5) etaiścādrivarairaṣṭasaṅkhyaiḥ parivṛto giriḥ | sumeruḥ kāñcanagiriḥ paribhrājan raviryathā || ### [8.7.6](https://indike.org/pramana/in.purana.upa.sakta.devibhagavata.8.7.6) merormūrdhani dhāturhi purī paṅkajajanmanaḥ | madhyataścopaklṛpteyaṃ daśasāhasrayojanaiḥ || ### [8.7.7](https://indike.org/pramana/in.purana.upa.sakta.devibhagavata.8.7.7) samānacaturasrāṃ ca śātakaumbhamayīṃ purīm | varṇayanti mahātmānaḥ parāvaravido budhāḥ || ### [8.7.8](https://indike.org/pramana/in.purana.upa.sakta.devibhagavata.8.7.8) tāṃ purīmanulokānāmaṣṭānāmīśiṣāṃ parāḥ | puryaḥ prakhyātasauvarṇarūpāstāśca yathādiśam || ### [8.7.9](https://indike.org/pramana/in.purana.upa.sakta.devibhagavata.8.7.9) yathārūpaṃ sārdhanetrasahasrapramitāḥ kṛtāḥ | merornava purāṇi syurmanovatyamarāvatī || ### [8.7.10](https://indike.org/pramana/in.purana.upa.sakta.devibhagavata.8.7.10) tejovatī saṃyamanī tathā kṛṣṇāṅganāparā | śraddhāvatī gandhavatī tathā cānyā mahodayā || ### [8.7.11](https://indike.org/pramana/in.purana.upa.sakta.devibhagavata.8.7.11) yaśovatī ca brahmendravahnyādīnāṃ yathākramam | tatraiva yajñaliṅgasya viṣṇorbhagavato vibhoḥ || ### [8.7.12](https://indike.org/pramana/in.purana.upa.sakta.devibhagavata.8.7.12) vāmapādāṅguṣṭhanakhanirbhinnasya ca nārada | aṇḍordhvabhāgarandhrasya madhyātsaṃviśatī divaḥ || ### [8.7.13](https://indike.org/pramana/in.purana.upa.sakta.devibhagavata.8.7.13) mūrdhanyavatatāreyaṃ gaṅgā saṃviśatī vibho | lokānāmakhilānāṃ ca pāpahārijalākulā || ### [8.7.14](https://indike.org/pramana/in.purana.upa.sakta.devibhagavata.8.7.14) iyaṃ ca sākṣādbhagavatpadī lokeṣu viśrutā | kālena mahatā sā tu yugasāhasrakeṇa tu || ### [8.7.15](https://indike.org/pramana/in.purana.upa.sakta.devibhagavata.8.7.15) divo mūrdhānamāgatya devī devanadīśvarī | yattadviṣṇupadaṃ nāma sthānaṃ trailokyaviśrutam || ### [8.7.16](https://indike.org/pramana/in.purana.upa.sakta.devibhagavata.8.7.16) auttānapādiryatrāste dhruvaḥ paramapāvanaḥ | bhagavatpādayugalaṃ padmakośarajo dadhat || ### [8.7.17](https://indike.org/pramana/in.purana.upa.sakta.devibhagavata.8.7.17) adyāpyāste sa rājarṣiḥ padavīmacalāṃ śritaḥ | tatra saptarṣayastasya prabhāvajñā mahāśayāḥ || ### [8.7.18](https://indike.org/pramana/in.purana.upa.sakta.devibhagavata.8.7.18) pradakṣiṇaṃ prakramanti sarvalokahitepsavaḥ | ātyantikī siddhiriyaṃ tapatāṃ siddhidāyinī || ### [8.7.19](https://indike.org/pramana/in.purana.upa.sakta.devibhagavata.8.7.19) ādriyante ca śirasā jaṭājūṭoṣitena ca | tato viṣṇupadāddevī naikasāhasrakoṭibhiḥ || ### [8.7.20](https://indike.org/pramana/in.purana.upa.sakta.devibhagavata.8.7.20) vimānairākule devayāne'vataratī ca sā | candramaṇḍalamāplāvya patantī brahyasadyani || ### [8.7.21](https://indike.org/pramana/in.purana.upa.sakta.devibhagavata.8.7.21) caturdhā bhidyamānā sā brahmaloke ca nārada | caturbhirnāmabhirdevī caturdiśamabhisṛtā || ### [8.7.22](https://indike.org/pramana/in.purana.upa.sakta.devibhagavata.8.7.22) saritāṃ ca nadīnāṃ ca patimevānvapadyata | sītā cālakanandā ca caturbhadreti nāmabhiḥ || ### [8.7.23](https://indike.org/pramana/in.purana.upa.sakta.devibhagavata.8.7.23) sītā ca brahmasadanācchikharebhyaḥ kṣamābhṛtām | kesarābhidhanāmnā ca prasravantī ca svarṇadī || ### [8.7.24](https://indike.org/pramana/in.purana.upa.sakta.devibhagavata.8.7.24) gandhamādanamūrdhnīha patitā pāpahāriṇī | antareṇa tu bhadrāśvavarṣaṃ prācyāṃ samāgatā || ### [8.7.25](https://indike.org/pramana/in.purana.upa.sakta.devibhagavata.8.7.25) kṣārodadhiṃ gatā sā tu dyunadī devapūjitā | tato mālyavataḥ śṛṅgād dvitīyā parinirgatā || ### [8.7.26](https://indike.org/pramana/in.purana.upa.sakta.devibhagavata.8.7.26) tato vegavatī bhūtvā ketumālaṃ samāgatā | cakṣurnāmnī devanadī pratīcyāṃ diśyupāgatā || ### [8.7.27](https://indike.org/pramana/in.purana.upa.sakta.devibhagavata.8.7.27) saritāṃ patimāviṣṭā sā gaṅgā devavanditā | tatastṛtīyā dhārā tu nāmnā khyātā ca nārada || ### [8.7.28](https://indike.org/pramana/in.purana.upa.sakta.devibhagavata.8.7.28) puṇyā cālakanandā vai dakṣiṇenābjabhūpadāt | vanāni girikūṭāni samatikramya cāgatā || ### [8.7.29](https://indike.org/pramana/in.purana.upa.sakta.devibhagavata.8.7.29) hemakūṭaṃ girivaraṃ prāptāto'pīha nirgatā | ativegavatī bhūtvā bhārataṃ cāgatāparā || ### [8.7.30](https://indike.org/pramana/in.purana.upa.sakta.devibhagavata.8.7.30) dakṣiṇaṃ jaladhiṃ prāptā tṛtīyā sā saridvarā | yasyāḥ snānāya saratāṃ manujānāṃ pade pade || ### [8.7.31](https://indike.org/pramana/in.purana.upa.sakta.devibhagavata.8.7.31) rājasūyāśvamedhādi phalaṃ tu na hi durlabham | tataścaturthī dhārā tu bhṛṅgavatparvatātpunaḥ || ### [8.7.32](https://indike.org/pramana/in.purana.upa.sakta.devibhagavata.8.7.32) bhadrābhidhā saṃsravantī kurūnsantarpya cottarān | samudraṃ samanuprāptā gaṅgā trailokyapāvanī || ### [8.7.33](https://indike.org/pramana/in.purana.upa.sakta.devibhagavata.8.7.33) anye nadāśca nadyaśca varṣe varṣe'pi santi hi | bahuśo merumandāraprasūtāścaiva nārada || ### [8.7.34](https://indike.org/pramana/in.purana.upa.sakta.devibhagavata.8.7.34) tatrāpi bhārataṃ varṣaṃ karmakṣetramuśanti hi | anyāni cāṣṭavarṣāṇi bhaumasvargapradāni ca || ### [8.7.35](https://indike.org/pramana/in.purana.upa.sakta.devibhagavata.8.7.35) svargiṇāṃ puṇyaśeṣasya bhogasthānāni nārada | puruṣāṇāṃ cāyutāyurvajrāṅgā devasannibhāḥ || ### [8.7.36](https://indike.org/pramana/in.purana.upa.sakta.devibhagavata.8.7.36) puruṣā nāgasāhasrairdaśabhiḥ parikalpitāḥ | mahāsauratasantuṣṭāḥ kalatrāḍhyāḥ sukhānvitāḥ || ### [8.7.37](https://indike.org/pramana/in.purana.upa.sakta.devibhagavata.8.7.37) ekavarṣonake cāyuṣyāptagarbhāḥ striyo'pi hi | tretāyugasamaḥ kālo vartate sarvadaiva hi || ### [8.7.37.c1](https://indike.org/pramana/in.purana.upa.sakta.devibhagavata.8.7.37.c1) iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāmaṣṭamaskandhe bhuvanakośavarṇane parvatanadīvarṣādivarṇanaṃ nāma saptamo'dhyāyaḥ || ## Linked texts (1) - [Bhāgavatapurāṇa](https://indike.org/pramana/in.purana.bhagavata.5.17.6) — Vyāsa, Sanskrit --- Source: [https://indike.org/pramana/in.purana.upa.sakta.devibhagavata.8.7](https://indike.org/pramana/in.purana.upa.sakta.devibhagavata.8.7) · Pramāṇa