Devimahatoriginal 10: atha saptamo'dhyāyaḥ
Devīmāhātoriginal 10
- Language
- Sanskrit
Contents
- 10.27 — 1 part
atha saptamo'dhyāyaḥ
10.1
ṛṣiruvāca
10.2
ājñaptāste tato daityāścaṇḍamuṇḍapurogamāḥ
caturaṅgabalopetā yayurabhyudyatāyudhāḥ
10.3
dadṛśuste tato devīmīṣaddhāsāṃ vyavasthitām
siṃhasyopari śailendraśṛṅge mahati kāñcane
10.4
te dṛṣṭvā tāṃ samādātumudyamaṃ cakrurudyatāḥ
ākṛṣṭacāpāsidharāstathānye tatsamīpagāḥ
10.5
tataḥ kopaṃ cakāroccairambikā tānarīnprati
kopena cāsyā vadanaṃ maṣīvarṇamabhūttadā
10.6
bhrukuṭīkuṭilāttasyā lalāṭaphalakāddrutam
kālī karālavadanā viniṣkrāntāsipāśinī
10.7
vicitrakhaṭvāṅgadharā naramālāvibhūṣaṇā
dvīpicarmaparīdhānā śuṣkamāṃsātibhairavā
10.8
ativistāravadanā jihvālelanabhīṣaṇā
nimagnāraktanayanā nādāpūritadiṅmukhā
10.9
sā vegenābhipatitā ghātayantī mahāsurān
sainye tatra surārīṇāmabhakṣayata tadbalam
10.10
pārṣṇigrāhāṅkuśagrāhiyodhaghaṇṭāsamanvitān
samādāyaikahastena mukhe cikṣepa vāraṇān
10.11
tathaiva yodhaṃ turagai rathaṃ sārathinā saha
nikṣipya vaktre daśanaiścarvayatyatibhairavam
10.12
ekaṃ jagrāha keśeṣu grīvāyāmatha cāparam
pādenākramya caivānyaṃ urasānyamapothayat
10.13
tairmuktāni ca śastrāṇi mahāstrāṇi tathāsuraiḥ
mukhena jagrāha ruṣā daśanairmathitānyapi
10.14
balināṃ tadvalaṃ sarvamasurāṇāṃ durātmanām
mamarda bhakṣayaccānyānanyāṃścātāḍayattathā
10.15
asinā nihatāḥ kecitkeciitkhaṭvāṅgatāḍitāḥ
jagmurvināśamasurā dantāgrābhihatāstathā
10.16
kṣaṇena tadvalaṃ sarvamasurāṇāṃ nipātitam
dṛṣṭvā caṇḍo'bhidudrāva tāṃ kālīmatibhīṣaṇām
10.17
śaravarṣairmahābhīmairbhīmākṣīṃ tāṃ mahāsuraḥ
chādayāmāsa cakraiśca muṇḍaḥ kṣiptaiḥ sahasraśaḥ
10.18
tāni cakrāṇyanekāni viśamānāni tanmukham
babhuryathārkabimbāni subahūni ghanodaram
10.19
tato jahāsātiruṣā bhīmaṃ bhairavanādinī
kālī karālavaktrāntardurdarśadśanojjvalā
10.20
utthāya ca mahāsiṃhaṃ devī caṇḍamadhāvata
gṛhītvā cāsya keśeṣu śirastenāsinācchinat
10.21
atha muṇḍo'bhyadhāvattāṃ dṛṣṭvā caṇḍaṃ nipātitam
tamapyapātayadbhūmau sā khaḍgābhihataṃ ruṣā
10.22
hataśeṣaṃ tataḥ sainyaṃ dṛṣṭvā caṇḍaṃ nipātitam
muṇḍaṃ ca sumahāvīryaṃ diśo bheje bhayāturam
10.23
śiraścaṇḍasya kālī ca gṛhītvā muṇḍameva ca
prāha pracaṇḍāṭṭahāsamiśramabhyetya caṇḍikām
10.24
mayā tavātropahṛtau caṇḍamuṇḍau mahāpaśū
yuddhayajñe svayaṃ śumbhaṃ niśumbhaṃ ca haniṣyasi
10.25
ṛṣiruvāca
10.26
tāvānītau tato dṛṣṭvā caṇḍamuṇḍau mahāsurau
uvāca kālīṃ kalyāṇī lalitaṃ caṇḍikā vacaḥ
10.27
yasmāccaṇḍaṃ ca muṇḍaṃ ca gṛhītvā tvamupāgatā
cāmuṇḍeti tato loke khyātā devi bhaviṣyasi
10.27.p1
iti śrīmārkaṇḍeyapurāṇe sāvarṇike manvantare devīmāhātmye caṇḍamuṇḍavadho nāma saptamo'dhyāyaḥ || 7
Linked texts (12)
- Devīmāhātmya — Sanskrit
- Durgārcanasṛti — Sanskrit
- Mārkaṇḍeyapurāṇa — Vyāsa, Sanskrit
- Śrīcaṇḍī — Sanskrit
- Caṇḍīmāhātmya Devīmāhātmya — Sanskrit
- Caṇḍīsaptasatī — Sanskrit
- Saptaśatīmahāstotra — Sanskrit
- Durgāstotra or saptaśatī — Sanskrit
- Devīmāhātmya or Saptaśatīcaṇḍī — Sanskrit
- Durgārahasya — Sanskrit
- Durgāsaptaśatī Devīmāhātmya — Sanskrit
- Durgāpāṭha — Vyāsa, Sanskrit