Vaishnavakhanda 96
Vaiṣṇavakhaṇḍa 96
- Language
- Sanskrit
Contents
- 96.58 — 1 part
96.1
cha|| || nārada uvāca || || samāpi pārtha tatrāsti
mūrtirbrāhmaṇakāmyayā || tatra nāhaṃ tyajāmyaṃga cchatradaṇḍavibhūṣitām
96.2
kārtikasya tu yā śuklā bhavatyekādaśī śubhā || tasyāṃ madarcanaṃ kṛtvā
kalidoṣairvimucyate
96.3
arjuna uvāca || || bālyātprabhṛti saṃdeho mamāyaṃ hṛdi vartate || pṛcchatastaṃ ca me vipra na
krodhaṃ kartumarhasi
96.4
sadā tvaṃ mokṣadharmeṣu pariniṣṭhāṃ parāṃ gataḥ || sarvabhūtasamo dāṃto rāgadveṣavivarjitaḥ
96.5
tyaktanindāstutirmaunī mokṣasthaḥ parikīrtyase || tvaṃ ca nārada lokeṣu vāyuvaccapalo mune
96.6
saudāminīva vicarandṛśyase prājñasaṃmataḥ || sadā kalikaro loke
nirdayaḥ sarvaprāṇiṣu
96.7
bahūnāṃ hi sahasrāṇi devagaṃdharvarakṣasām || rājñāṃ munīndradaityānāṃ kalerneṣṭāni te'bhavan
96.8
kasmāttadeṣā ceṣṭā te
saṃdehaṃ me hara dvija || saṃdehānna sukhaṃ śete bāṇaviddho mṛgo yathā
96.9
sūta uvāca || || śaunakedaṃ vacaḥ śrutvā phālgunānnārado muniḥ
prahasanniva bābhravyavadanaṃ sa niraikṣata
96.10
sa ca bābhravyanāmā vai hārītasyānvayodbhavaḥ || brāhmaṇo nāradamuneḥ samīpe vartate sadā
96.11
sa
ca jñātvā mahābuddhirnāradasya manīṣitam || prahasanniva provāca phālgunaṃ snigdhayā girā
96.12
bābhravya uvāca || || satyametadyathāttha tvaṃ nāradaṃ prati pāṃḍava || sarvo'pi cātra vṛttāṃte saṃśayaṃ yāti mānavaḥ
96.13
tadahaṃ te pravakṣyāmi yathā kṛṣṇānmayā śrutam || stokakālāṃtare pūrvaṃ
sarvaṃ yādavanaṃdanaḥ
96.14
mahīsāgarayātrāyāṃ kṛṣṇastatrāyayau prabhuḥ || ugrasenena sahito vasudevena babhruṇā
96.15
rāmeṇa raukmiṇameyena yuyudhā
nādibhistadā || sa ca jñātvā jñātisamaṃ mahīsāgarasaṃgame
96.16
piṃḍadānādikaṃ kṛtvā dattvā dānāni bhūriśaḥ || guheśvarādiliṃgāni yatnataḥ
pratipūjya ca
96.17
snānaṃ kṛtvā koṭitīrthe jayādityaṃ samarcya ca || pūjayannāradamuniṃ yuktaḥ kṛṣṇo mahāmanāḥ
96.18
ugrasenena rājñā vai pūrvajena jaṭāyunā || madādivipramukhyānāṃ bahūnāṃ copaśṛṇvatām || ugraseno mahārājaḥ kṛṣṇaṃ provāca saṃsadi
96.19
ugrasena uvāca
kṛṣṇa prakṣyāmi tvāmekaṃ saṃśayaṃ vada taṃ mama
96.20
yo'yaṃ nāma mahābuddhirnārado viśvavaṃditaḥ || kasmādepo'ticapalo vāyuvadbhramate jagat
96.20-2
kalipriyaśca kasmādvā kasmāttvayyatiprītimān
96.21
śrīkṛṣṇa uvāca || || satyaṃ rājaṃstvayā pṛṣṭametatsarvaṃ vadāmi te || dakṣeṇa tu purā
śapto nārado munisattamaḥ
96.22
sṛṣṭimārgāttu tānvīkṣya nāradena vicālitān || nāvasthānaṃ ca lokeṣu bhramataste bhaviṣyati
96.23
paiśunya
vaktā ca tathā dvitīyānāṃ pracālanāt || iti śāpadvayaṃ prāpya dvividhātmajacālanāt
96.24
nirākartuṃ samartho'pi munirmene tathaiva tat || etā
vānsādhuvādo hi yataśca kṣamate svayam
96.25
vināśakālaṃ cāvekṣya kaliṃ vardhayate yataḥ || satyaṃ ca vakti tasmātsa na ca pāpena lipyate
96.26
śramato'pi ca sarvatra nāsya yasmātpṛthaṅmanaḥ || dhyeyādbhavati naiva syādbhramadoṣastatosya ca || yacca prītirmayi tasya paramā tacchṛṇuṣva ca
96.27
ahaṃ hi sarvadā staumi nāradaṃ devadarśanam || maheṃdragaditenaiva stotreṇa śṛṇu tannṛpa
96.28
śrutacāritrayorjātā yasyāhaṃtā na vidyate || aguṇaśruta
cāritraṃ nāradaṃ taṃ namāmyaham
96.29
aratikrodhacāpalye bhayaṃ naitāni yasya ca || adīrghasūtraṃ dhīraṃ ca nāradaṃ taṃ namāmyaham
96.30
kāmādyā yadi
vā lobhādyācaṃ yo nānyathā vadet || upāsyaṃ sarvajaṃtūnāṃ nāradaṃ taṃ namāmyaham
96.31
adhyātmagatitattvajñaṃ kṣāṃtaṃ śaktaṃ jiteṃdriyam || ṛjuṃ yathārtha
vaktāraṃ nāradaṃ taṃ namāmyaham
96.32
tejasā yaśasā buddhyā nayena vinayena ca || janmanā tapasā vṛddhaṃ nāradaṃ taṃ namāmyaham
96.33
sukhaśīlaṃ sukhaṃ veṣaṃ
subhojaṃ svācaraṃ śubham || sucakṣuṣaṃ suvākyaṃ ca nāradaṃ taṃ namāmyaham
96.34
kalyāṇaṃ kurute gāḍhaṃ pāpaṃ yasya na vidyate || na prīyate parānarthe yo
'sau taṃ naumi nāradam
96.35
vedasmṛtipurāṇoktadharme yo nityamāsthitaḥ || priyāpriyavimuktaṃ taṃ nāradaṃ praṇamāmyaham
96.36
aśanādiṣva
liptaṃ ca paṃḍitaṃ nālasaṃ dvijam || bahuśrutaṃ citrakathaṃ nāradaṃ praṇamāmyaham
96.37
nārthe krodhe ca kāme ca bhūtapūrvo'sya viśramaḥ
yenaite nāśitā doṣā nāradaṃ taṃ namāmyaham
96.38
vītasaṃmohadoṣo yo dṛḍhabhaktiśca śreyasi || sunayaṃ satrapaṃ taṃ ca nāradaṃ praṇamāmyaham
96.39
asaktaḥ sarvasaṃgeṣu yaḥ saktātmeti lakṣyate || adīrghasaṃśayo vāgmī nāradaṃ taṃ namāmyaham
96.40
na tyajatyāgamaṃ kiṃcidyastapo nopajīvati
avaṃdhyakālo yasyātmā tamahaṃ naumi nāradam
96.41
kṛtaśramaṃ kṛtaprajñaṃ na ca tṛptaṃ samādhitaḥ || nityaṃ yatnātpramattaṃ ca nāradaṃ taṃ namāmyaham
96.42
na hṛṣyatyarthalābhena yo'lābhe na vyathatyapi || sthirabuddhirasaktātmā tamahaṃ naumi nāradam
96.43
taṃ sarvaguṇasaṃpannaṃ dakṣaṃ śucimakātaram
kālajñaṃ ca nayajñaṃ ca śaraṇaṃ yāmi nāradam
96.44
imaṃ stavaṃ nāradasya nityaṃ rājanpaṭhāmyaham || tena me paramāṃ prītiṃ karoti munisattamaḥ
96.45
anyopi yaḥ śucirbhūtvā nityametāṃ stutiṃ japet || acirāttasya devarṣiḥ prasādaṃ kurute param
96.46
etānguṇānnāradasya tvamathākarṇya pārthiva
japa nityaṃ stavaṃ puṇyaṃ prītaste bhavitā muniḥ
96.47
bābhravya uvāca || || iti kṛṣṇamukhācchrutvā nāradasya guṇānnṛpaḥ || babhūva paramaprīṃ
taścake tacca tathā vacaḥ
96.48
tato nāradamānarca dattvā dānaṃ ca puṣkalam || nāradīyadvijāgryāṇāṃ nāradaḥ prīyatāmiti
96.49
yayau dvāravatīṃ
kṛṣṇaḥ saprāvṛjñātibāṃdhavaḥ || tīrthayātrāmimāṃ kṛtvā vidhivatpuruṣottamaḥ
96.50
tathā tvamapi kauravya nāradasya guṇānimān || śrutvā śraddhāmayo
bhūtvā śṛṇu kṛtyaṃ yadatra ca
96.51
kārtike śukladvādaśyāṃ prabodhinyāmasau muniḥ || viṣṇordhyānasamādheśca prabuddho jāyate sadā
96.52
tasmin
ndine nāradena nirmite'traiva kūpake || snānaṃ kṛtvā prayatnena śrāddhaṃ kuryātsamāhitaḥ
96.53
tapo dānaṃ japaścātra kūpe bhavati cākṣayyam
96.54
idaṃ viṣṇavati maṃtreṇa tato viṣṇuṃ prabodhayet || nāradaṃ ca muniṃ paścānmantreṇānena pāṃḍava
96.55
yoganidrā yathā tyaktā hariṇā munisattama
tathā lokopakārāya bhavānapi parityaja
96.56
iti maṃtreṇa cotthāpya nāradaṃ paripūjayet || kṛṣṇaproditayā stutyā chatradhotrārcanaiḥ śubhaiḥ
96.57
śaktyā dvijānāṃ deyaṃ ca chatraṃ dhotraṃ kamaṃḍalum || praṇamya brāhmaṇānbhaktyā nāradaḥ prīyatāmiti
96.58
evaṃ kṛte prasādātsa muneḥ pāpena mucyate
jāyate na kalistasya na cāsaukhyaṃ bhavediha
96.58.p1
iti śrīskānde mahāpurāṇe ekāśītisāhasryāṃ saṃhitāyāṃ prathame māheśvarakhaṇḍe kaumā rikākhaṇḍe nāradamāhātmyavarṇanaṃnāma catuḥpaṃcāśattamo'dhyāyaḥ
Linked texts (5)
- Skandamahāpurāṇa (vulgate) — Sanskrit
- Kumārikākhaṇḍa — Sanskrit
- Kaumārakhaṇḍa — Sanskrit
- Māheśvarakhaṇḍa — Sanskrit
- Kaumārīkākhaṇḍa — Sanskrit