Varahapurana 185.58
Varāhapurāṇa 185.58
- Language
- Sanskrit
185.58.1
śrīvarāha uvāca..
rājatīṃ pratimāṃ kṛtvā surūpāṃ nirmalāṃ śucim ..
aśliṣṭāṃ caiva nirdoṣāṃ sarvataḥ pariniṣṭhitām .. 1 ..
candrapāṇḍurasaṅkāśāṃ suślakṣṇāṃ nirvraṇāṃ śubhām ..
śriyāyuktāṃ manojñāṃ ca dīpyamānāṃ diśo daśa ..2..
īdṛśīṃ pratimāṃ kṛtvā mama karmaparāyaṇaḥ ..
gītavāditraśabdena śaṃkhadundubhiniḥsvanaiḥ .. 3 ..
stutibhirmaṅgalaiścaiva mama veśmanyupānayet ..
arghyapādyādikaṃ gṛhya imaṃ mantramudāharet ..4..
mantraḥ-
oṃ yaḥ sarvalokeṣvapi sarvamarghyaṃ pūjyaśca mānyaśca divaukasāmapi..
upāgato gṛhya idaṃ mamārghyaṃ prasīda māṃ tiṣṭhatu lokanātha ..
yo rājate yajñapatiśca yajñe sūryodaye mama karmāgnihotram ..5..
mandaśceti ādimadhyasvarūpāyeti ..
tata etena mantreṇa arghyaṃ dattvā yathāvidhi ..
susnāto'laṃkṛtaścaiva sthāpayettāmudaḍmukhaḥ .. 6 ..
āśleṣāsu ca nakṣatre rāśau karkaṭake sthite ..
astaṅgate dinakare svajane yajati sthire .. 7 ..
tatrādhivāsanaṃ kuryādvidhivanmantrapūrvakam ..
catvāraḥ kalaśāstatra candanodakamiśritāḥ .. 8 ..
sarvauṣadhīsamāyuktāḥ sahakāravibhūṣitāḥ ..
tataste karmiṇaḥ sarve mama śāstrānusāriṇaḥ .. 9 ..
gurostu vacanāddevi manojñānsukhaśītalān ..
namo nārāyaṇāyeti uktvā mantramudāharet .. 186.10 ..
mantraḥ -
yo'sau bhavān sarvalokaikakarttā sarvādhyakṣaḥ sarvarūpaikarūpaḥ ..
āyātu mūrttau sahito mayā ca dhruvādibhirlokapālaistu pūjyaḥ .. 11 ..
namo'nantāyeti ..
vyatītāyāṃ tu śarvaryāmudite sūryamaṇḍale ..
diśāsu ca prasannāsu dvāramūlamupānayet .. 12 ..
evaṃ saṃsthāpanaṃ kṛtvā mama karmānusāriṇaḥ ..
185.58.2
ghaṭaiḥ pūrṇairyathānyāyaṃ kuryāttatrābhiṣecanam .. 13 ..
abhiṣicya tataḥ paścātsthāpayeta vidhānataḥ..
namo nārāyaṇāyeti uktvā mantramudāharet ..14..
mantraḥ -
gaṅgādibhyo nadībhyaśca sāgarebhyo mayā hṛtam ..
snānāya te suraśreṣṭha karpūrāvāsitaṃ jalam .. 15 ..
evaṃ snāpya vidhānena gṛhasyābhyantaraṃ nayet ..
sthāpanā tatra me kāryā mantreṇānena sundari.. 16 .. .
mantraḥ –
vedairvedyo vedavidbhiśca pūjyo yajñātmako yajñaphalapradātā ..
yajñārthaṃ tvāmāhvaye devadeva mūrttāvasyāṃ tiṣṭha sulokanātha .. 17 ..
dhanajana rūpyasvarṇa anantāya nama iti ..
evaṃ saṃsthāpanaṃ kṛtvā prahṛṣṭenāntarātmanā ..
arcayitvā yathānyāyaṃ pūrvoktavidhinā naraḥ ..18 ..
nīla vastrāṇi me dadyātpriyāṇi mama bhūṣaṇam..
tato vastrāṇyupādāya jānubhyāṃ patito bhuvi..19..
namo nārāyaṇāyeti uktvā kāmamudāharet ..186.20 ..
mantraḥ -
yo'sau bhavāṃścandraraśmiprakāśaḥ śaṃkhena kundena samānavarṇaḥ ..
kṣīrojjvalaḥ kaumudavarṇa deva vastrāṇi gṛhṇīṣva mama priyāya .. 21 ..
veṣaḥ suveṣaḥ anantaḥ amaraḥ māraṇaḥ kāraṇaḥ sulabhaḥ durllabhaḥ śreṣṭhaḥ suvarcā iti ..
anaineva tu mantreṇa dattvā vastrāṇi me śuciḥ ..
tato me prāpaṇaṃ dadyādbhaktiyuktena cetasā .. 22 ..
namo nārāyaṇāyeti imaṃ mantramudāharet ..
śālyannaṃ pāyasairyuktaṃ sitayā ca ghṛtena ca .. 23 ..
prāpaṇaṃ gṛhyatāṃ deva ananta puruṣottama ..
dattvā tu mama naivedyaṃ dadyādācamanaṃ budhaḥ .. 24 ..
sarvalokahitārthāya śāntipāṭhamudāharet ..
oṃ śāntiṃ karoti brahmā ca rudro viṣṇurhi bhāskaraḥ..25..
rātriścaiva tu sandhye dve nakṣatrāṇi grahā diśaḥ..26..
185.58.3
acala caṃcala sacala khecala pracala aravindaprabha udbhava ceti namaḥ saṃsthāpitānāṃ vāsudeva iti ..
kṛtvā vai śāntikaṃ tatra sarvapāpapraṇāśanam ..
pūjya bhāgavatāṃstatra yathāvibhavaśaktitaḥ .. 27 ..
brāhmaṇānbhojayettatra guruṃ mantreṇa pūjayet ..
tebhyaḥ śāntyudakaṃ gṛhya kuryādabhyukṣaṇaṃ tataḥ .. 28 ..
brāhmaṇānsvajanaṃ caiva abhivādya kṛtāñjaliḥ ..
śīghraṃ visarjayettāṃśca ye tatra samupāgatāḥ..29..
tato guruṃ ca saṃpūjya dānamānādibhirvibhum ..
gurau sampūjite tatra mama pūjā kṛtā bhavet ..186.30 ..
jalasya bindavo ye'nnabhojanānte patanti hi ..
tāvadvarṣasahasrāṇi viṣṇuloke sa modate ..31 ..
ya etena vidhānena pūjayenmatimānnaraḥ ..
uddhṛtaṃ ca kulaṃ tena pitṛjaṃ mātṛjaṃ tathā .. 32 ..
anena vidhinā devi raupyārccāsthāpanaṃ mama ..
suvarṇasya pravakṣyāmi sthāpanaṃ mama supriyam .. 33 ..
yathaiva rājatī kuryāttathaiva ca suvarṇikām ..
tenaiva vidhinā sarvaṃ kuryādāvāhanādikam ..34..
yatphalaṃ dāruśailādināmnā kāṃsyādirājate ..
tatphalaṃ koṭiguṇitaṃ sauvarṇasya prapūjane .. 35 ..
kulāni tārayetsubhru ayutānyekaviṃśatim ..
yāti mallayatāṃ bhūme punarāvṛttivarjitaḥ .. 36 ..
etatte kathitaṃ bhūme yattvayā paripṛcchitam ..
rahasyaṃ vipulaśroṇi kimanyatkathayāmi te .. 37 ..
bhūmiruvāca ..
uktā yāḥ pratimāḥ sarvāḥ suvarṇādi vinirmitāḥ ..
tāsu tiṣṭhasi sarvāsu śālagrāme ca sarvadā .. 38 ..
kati pūjyā gṛhādau ca aviśeṣastu pūjane ..
viśeṣo vā bhavettanme rahasyaṃ vada mādhava .. 39 ..
śivādipūjane ke vā saṃkhyātāstacca me vada ..
śrīvarāha uvāca ..
185.58.4
gṛhe liṅgadvayaṃ nārcyaṃ śālagrāmatrayaṃ tathā .. 186.40 ..
dve cakre dvārakāyāstu nārcyaṃ sūryadvayaṃ tathā ..
gaṇeśatritayaṃ nārcyaṃ śaktitritayameva ca .. 41 ..
śālagrāmayugaṃ pūjyaṃ yugmeṣu dvitayaṃ na hi ..
viṣamā naiva pūjyāḥ syurviṣame eka eva hi .. 42 ..
gṛhe'gnidagdhā bhagnā vā naiva pūjyā vasundhare ..
āsāṃ tu pūjanādgehe udvegaṃ prāpnuyādgṛhī .. 43 ..
śālagrāma śilā bhagnā pūjanīyā sacakrakā .'.
khaṇḍitā sphuṭitā vāpi śālagrāmaśilā śubhā .. 44 ..
śilā dvādaśa vai devi śālagrāmasamudbhavāḥ ..
vidhivatpūjitā yena tasya puṇyaṃ vadāmi te ..45..
koṭidvādaśaliṅgaistu pūjitaiḥ svarṇapaṅkajaiḥ ..
yatsyāddvādaśakalpaistu dinenaikena tadbhavet ..46 ..
yaḥ punaḥ pūjayedbhaktyā śālagrāmaśilāśatam ..
tatphalaṃ naiva śakto'haṃ vaktuṃ varṣaśatairapi .. 47 ..
sarvairvarṇaistu sampūjyāḥ pratimāḥ sarvadevatāḥ ..
liṅgānyapi tu pūjyāni maṇibhiḥ kalpitāstathā .. 48 ..
śālagrāmo na spṛṣṭavyo hīnavarṇairvasundhare ..
strīśūdrakarasaṃsparśo vajrasparśādhiko mataḥ .. 49 ..
mohādyaḥ saṃspṛśecchūdro yoṣidvāpi kadācana ..
pacyate narake ghore yāvadābhūtasaṃplavam ..186.50 ..
yadi bhaktirbhavettasya strīṇāṃ vāpi vasundhare ..
dūrādevāspṛśanpūjāṃ kārayetsusamāhitaḥ .. 51 ..
caraṇāmṛtapānena sarvapāpakṣayo bhavet ..
abhakṣyaṃ śivanirmālyaṃ patraṃ puṣpaṃ phalaṃ jalam .. 52 ..
śālagrāmaśilāyogātpāvanaṃ tadbhavetsadā ..
dadyādbhaktāya yo devi śālagrāmaśilāṃ naraḥ .. 53 ..
suvarṇasahitāṃ tasya yatpuṇyaṃ tacchṛṇuṣva me ..
suvarṇasahitā bhūmiḥ saparvatavanākarā .. 54 ..
185.58.5
sasamudrā bhaveddattā satpātrāya vasundhare ..
śālagrāmaśilāyāstu mūlyamudghāṭayetkvacit .. ..
vikretā krayakarttā ca narake nīyate dhruvam ..
pūjāphalaṃ na śaknoti vaktuṃ varṣaśatairapi .. 56 ..
etatte kathitaṃ guhyaṃ pratimā sthāpanaṃ prati ..
śālagrāme viśeṣaśca liṅgādīnāṃ ca yo bhavet ..57..
pūjanādau vidhiścāpi kimanyacchrotumicchasi ..58.
Linked texts (2)
- Śūdrakamalākara — Kamalākarabhaṭṭa, Sanskrit
- Vīramitrodaya — Rāmamiśra, Sanskrit