<!-- Pramāṇa, a library of Indian primary sources · https://indike.org/pramana/in.purana.varaha.64.1 -->

[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Varahapurana](https://indike.org/pramana/in.purana.varaha) › 64.1

# Varahapurana 64.1

Varāhapurāṇa 64.1

- **Language:** Sanskrit

### [64.1](https://indike.org/pramana/in.purana.varaha.64.1)

agastya uvāca .  
athāparaṃ pravakṣyāmi śauryavratamanuttamam .  
yena bhīrorapi mahacchauryaṃ bhavati tatkṣaṇāt .. 64.1 ..  
māsi cāśvayuje śuddhāṃ navamīṃ samupoṣayet .  
saptamyāṃ kṛtasaṃkalpaḥ sthitvā'ṣṭamyāṃ nirodanaḥ .. 64.2 ..  
navamyāṃ pārayet piṣṭaṃ prathamaṃ bhaktito nṛpa .  
brāhmaṇān bhojayed bhaktyā devīṃ caiva tu pūjayet .  
durgāṃ devīṃ mahābhāgāṃ mahāmāyāṃ mahāprabhām .. 64.3 ..  
evaṃ saṃvatsaraṃ yāvadupoṣyeti vidhānataḥ .  
vratānte bhojayed dhīmān yathāśaktyā kumārikāḥ .. 64.4 ..  
hemavastrādibhistāstu bhūṣayitvā tu śaktitaḥ .  
paścāt kṣamāpayet tāstu devī me prīyatāmiti .. 64.5 ..  
evaṃ kṛte bhraṣṭarājyo labhed rājyaṃ na saṃśayaḥ .  
avidyo labhate vidyāṃ bhītaḥ śauryaṃ ca vidanti .. 64.6 ..  
.. iti śrīvarāhapurāṇe bhagavacchāstre catuḥṣaṣṭitamo'dhyāyaḥ .. 64 ..

- [Previous: 63.13](https://indike.org/pramana/in.purana.varaha.63.13)
- [Next: 65.1](https://indike.org/pramana/in.purana.varaha.65.1)
- [Up: 64](https://indike.org/pramana/in.purana.varaha.64)

## Linked texts (1)

- [Vrata(2)](https://indike.org/pramana/in.niti.dharma.vrata.vrata-2.p259) — Sanskrit

---
Source: [https://indike.org/pramana/in.purana.varaha.64.1](https://indike.org/pramana/in.purana.varaha.64.1) · Pramāṇa