[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.12 # Vayupurana 1.12: adhyāyaḥ 12 Vāyupurāṇa 1.12 - **Language:** Sanskrit ### adhyāyaḥ 12 ### [1.12.1](https://indike.org/pramana/in.purana.vayu.1.12.1) .. sūta uvāca .. ### [1.12.2](https://indike.org/pramana/in.purana.vayu.1.12.2) ata ūrddhvaṃ pravakṣyāmi upasargā yathā tathā . prādurbhavanti ye doṣā dṛṣṭatattvasya dehinaḥ .. 12.1 .. ### [1.12.3](https://indike.org/pramana/in.purana.vayu.1.12.3) mānuṣyān vividhān kāmān kāmayeta ṛtuṃ striyaḥ. vidyādānaphalañcaiva upasṛṣṭastu yogavit .. 12.2 .. ### [1.12.4](https://indike.org/pramana/in.purana.vayu.1.12.4) agnihotraṃ haviryajñametat prāyatanaṃ tathā. māyākarma dhanaṃ svargamupasṛṣṭastu kāṃkṣati .. 12.3 .. ### [1.12.5](https://indike.org/pramana/in.purana.vayu.1.12.5) eṣa karmasu yuktastu so'vidyāvaśamāgataḥ. upasṛṣṭantu jānīyādvuddhyā caiva visarjjayet. nityaṃ brahmaparo yukta upasargāt pramucyate .. 12.4 .. ### [1.12.6](https://indike.org/pramana/in.purana.vayu.1.12.6) jitapratyupasargasya jitaśvāsasya dehinaḥ. upasargāḥ pravarttante sāttvarājasatāmasāḥ .. 12.5 .. ### [1.12.7](https://indike.org/pramana/in.purana.vayu.1.12.7) pratibhāśravaṇe caiva na devānāñcaiva darśanam. bhramāvartaśca ityete siddhilakṣaṇasaṃjñitāḥ .. 12.6 .. ### [1.12.8](https://indike.org/pramana/in.purana.vayu.1.12.8) vidyā kāvyaṃ tathā śilpaṃ sarvaṃ vācāvṛtāni tu. vidyārthāścopatiṣṭhanti prabhāvasyaiva lakṣaṇam .. 12.7 .. ### [1.12.9](https://indike.org/pramana/in.purana.vayu.1.12.9) śrṛṇoti śabdān śrotavyān yojanānāṃ śatādapi. sarvajñaśca vidhijñaśca yogī conmattavadbhavet .. 12.8 .. ### [1.12.10](https://indike.org/pramana/in.purana.vayu.1.12.10) yakṣarākṣasagandharvvān vīkṣate divyamānuṣān. vetti tāṃśca mahāyogī upasargasya lakṣaṇam .. 12.9 .. ### [1.12.11](https://indike.org/pramana/in.purana.vayu.1.12.11) devadānavagandharvān ṛṣīṃścāpi tathā pitṝn. prekṣate sarvataścaiva unmattaṃ taṃ vinirddiśet .. 12.10 .. ### [1.12.12](https://indike.org/pramana/in.purana.vayu.1.12.12) bhrameṇa bhrāmyate yogī codyamāno'ntarātmanā. bhrameṇa bhrāntabuddhestu jñānaṃ sarvaṃ praṇaśyati .. 12.11 .. ### [1.12.13](https://indike.org/pramana/in.purana.vayu.1.12.13) vārttā nāśayate cittaṃ codyamāno'ntarātmanā. varttanākrāntabuddhestu sarvaṃ jñānaṃ praṇaśyati .. 12.12 .. ### [1.12.14](https://indike.org/pramana/in.purana.vayu.1.12.14) āvṛtya manasā śuklaṃ paṭaṃ vā kambalaṃ tathā. tatastu paramaṃ brahma kṣipramevānucintayet .. 12.13 .. ### [1.12.15](https://indike.org/pramana/in.purana.vayu.1.12.15) tasmāccaivātmano doṣāṃstūpasargānupasthitān . parita tyajeta medhāvī yadīcchet siddhimātmanaḥ .. 12.14 .. ### [1.12.16](https://indike.org/pramana/in.purana.vayu.1.12.16) ṛṣayo devagandharvā yakṣoragamahāsurāḥ. upasargeṣu saṃyuktā āvarttante punaḥ punaḥ .. 12.15 .. ### [1.12.17](https://indike.org/pramana/in.purana.vayu.1.12.17) tasmādyuktaḥ sadā yogī laghvāhārī jitendriyaḥ. tathā suptaḥ susūkṣmeṣu dhāraṇāṃ mūrdhni dhārayet .. 12.16 .. ### [1.12.18](https://indike.org/pramana/in.purana.vayu.1.12.18) tatastu yogayuktasya jitanidrasya yoginaḥ. upasargāḥ punaścānte jāyante prāṇasaṃjñakāḥ .. 12.17 .. ### [1.12.19](https://indike.org/pramana/in.purana.vayu.1.12.19) pṛthivīṃ dhārayetsarvāṃ tataścāpo hyanantaram. tato'gniñcaiva sarveṣāmākāśaṃ mana eva ca .. 12.18 .. ### [1.12.20](https://indike.org/pramana/in.purana.vayu.1.12.20) tataḥ parāṃ punarbuddhiṃ dhārayedyatnato yatī. kiddhīnāñcaiva liṅgāni dṛṣṭvā dṛṣṭvā parityajet .. 12.19 .. ### [1.12.21](https://indike.org/pramana/in.purana.vayu.1.12.21) pṛthvīṃ dhārayamāṇasya mahī sūkṣmā pravartate. apo dhārayamāṇasya āpaḥ sūkṣmā bhavanti hi. śītā rasāḥ pravarttante sūkṣmā hyamṛtasannibhāḥ .. 12.20 .. ### [1.12.22](https://indike.org/pramana/in.purana.vayu.1.12.22) tejo dhārayamāṇasya tejaḥ sūkṣmā pravarttate. ātmānaṃ manyate tejastadbhāvamanupaśyati .. 12.21 .. ### [1.12.23](https://indike.org/pramana/in.purana.vayu.1.12.23) ātmānaṃ manyate vāyuṃ vāyuvanmaṇḍalaṃ prabho . ākāśaṃ dhārayāṇasya vyoma sūkṣmaṃ pravarttate .. 12.22 .. ### [1.12.24](https://indike.org/pramana/in.purana.vayu.1.12.24) paśyate maṇḍalaṃ sūkṣmaṃ ghoṣaścāsya pravarttate . ātmānaṃ manyate nityaṃ vāyuḥ sūkṣmaḥ pravarttate .. 12.23 .. ### [1.12.25](https://indike.org/pramana/in.purana.vayu.1.12.25) tathā mano dhārayato manaḥ sūkṣmaṃ pravarttate . manasā sarvabhūtānāṃ manastu viśate hi saḥ. buddhyā buddhiṃ yadā yuñjettadā vijñāya buddhayate .. 12.24 .. ### [1.12.26](https://indike.org/pramana/in.purana.vayu.1.12.26) etāni sapta sūkṣmāṇi viditvā yastu yogavit. parityajati medhāvī sa buddhyā paramaṃ vrajet .. 12.25 .. ### [1.12.27](https://indike.org/pramana/in.purana.vayu.1.12.27) yasmin yasmiṃśca saṃyukto bhūta aiśvaryalakṣaṇe. tatraiva saṅgaṃ bhajate tenaiva pravinaśyati .. 12.26 .. ### [1.12.28](https://indike.org/pramana/in.purana.vayu.1.12.28) tasmādviditvā sūkṣmāṇi saṃsaktāni parasparam. parityajati yobuddhyā sa paraṃ prapnuyāddvijaḥ .. 12.27 .. ### [1.12.29](https://indike.org/pramana/in.purana.vayu.1.12.29) dṛśyante hi mahātmāna ṛṣayo divyacakṣuṣaḥ. saṃsaktāḥ sūkṣmabhāveṣu te doṣāsteṣu saṃjñitāḥ..12.28 tasmānna niścayaḥ kāryaḥ sūkṣmeṣviha kadācana. aiśvaryājjāyate rāgo virāgaṃ brahma cocyate .. 12.29 .. ### [1.12.30](https://indike.org/pramana/in.purana.vayu.1.12.30) viditvā sapta sūkṣmāṇi ṣaḍaṅgañca maheśvaram. pradhānaṃ viniyogajñaḥ paraṃ brahmādhigacchati .. 12.30 .. ### [1.12.31](https://indike.org/pramana/in.purana.vayu.1.12.31) sarvajñatā tṛptiranādibodhaḥ svatantratā nityamaluptaśaktiḥ. anantaśaktiśca vibhorvidhijñāḥ ṣaḍāhuraṅgāni maheśvarasya .. 12.31 .. ### [1.12.32](https://indike.org/pramana/in.purana.vayu.1.12.32) nityaṃ brahmadhano yukta upasargaiḥ pramucyate. jitaśvāsopasargasya jitarāmasya yoginaḥ. ekā bahiḥśarīre'smin dhāraṇā sarvakāmikī .. 12.32 .. ### [1.12.33](https://indike.org/pramana/in.purana.vayu.1.12.33) viśedyadā dvijo yukto yatra yatrārppayenmanaḥ . bhūtānyāviśate vāpi trailokyañcāpi kampayet .. 12.33 .. ### [1.12.34](https://indike.org/pramana/in.purana.vayu.1.12.34) etayā praviśeddehaṃ hitvā dehaṃ punastviha. manodvāraṃ hi yogānāmādityañca vinirddiśet .. 12.34 .. ### [1.12.35](https://indike.org/pramana/in.purana.vayu.1.12.35) ādānādikriyāṇāntu āditya iti cocyate. etena vidhinā yogī viraktaḥ sūkṣmavarjjitaḥ. prakṛtiṃ samatikramya rudraloke mahīyate .. 12.35 .. ### [1.12.36](https://indike.org/pramana/in.purana.vayu.1.12.36) aiśvaryaguṇasamprāptaṃ brahmabhūtantu taṃ prabhum. devasthāneṣu sarveṣu sarvatastu nivarttate .. 12.36 .. ### [1.12.37](https://indike.org/pramana/in.purana.vayu.1.12.37) paiśācāṃśacava piśācāṃśca rākṣasena ca rākṣasān . gāndharveṇa ca gandharvān kaubereṇa kuberajān .. 12.37 .. ### [1.12.38](https://indike.org/pramana/in.purana.vayu.1.12.38) indramaindreṇa sthānena saumyaṃ saumyena caiva hi. prajāpatiṃ tathā caiva prājāpatyena sādhayet .. 12.38 .. ### [1.12.39](https://indike.org/pramana/in.purana.vayu.1.12.39) brāhmaṃ brāhyena cāpyevamupāmantrayate prabhum. tatra saktastu unmattastasmātsarvaṃ pravarttate .. 12.39 .. ### [1.12.40](https://indike.org/pramana/in.purana.vayu.1.12.40) nityaṃ brahmaparo yuktaḥ sthānānyetāni vai tyajet . asajyamānaḥ sthāneṣu dvijaḥ sarvagato bhavet .. 12.40 .. ### [1.12.41](https://indike.org/pramana/in.purana.vayu.1.12.41) iti śrīmahāpurāṇe vāyuprokte yogopasarganirūpaṇaṃ nāma dvādaśo'dhyāyaḥ .. 12 .. ## Linked texts (2) - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p388) — Lakṣmīdhara Bhaṭṭa, Sanskrit - [Śārṅgadharapaddhati](https://indike.org/pramana/in.lit.subhasita.subhasita.kosa.sarngadharapaddhati.182.33) — Śārṅgadhara, Sanskrit --- Source: [https://indike.org/pramana/in.purana.vayu.1.12](https://indike.org/pramana/in.purana.vayu.1.12) · Pramāṇa