[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.1 # Vayupurana 1.1 Vāyupurāṇa 1.1 - **Language:** Sanskrit ### [1.1.1](https://indike.org/pramana/in.purana.vayu.1.1.1) śrīgaṇeśāya namaḥ .. ### [1.1.2](https://indike.org/pramana/in.purana.vayu.1.1.2) nārāyaṇaṃ namaskṛtya narañcaiva narottamam. devīṃ sarasvatīṃ caiva tato jayamudīrayet.. ### [1.1.3](https://indike.org/pramana/in.purana.vayu.1.1.3) jayati parāśarasūnuḥ satyavatīhṛdayanandano vyāsaḥ. yasyāsyakamalagalitaṃ vāṅmayamamṛtaṃ jagat pibati.. ### [1.1.4](https://indike.org/pramana/in.purana.vayu.1.1.4) prapadye devamīśānaṃ śāśvataṃ dhruvamavyayam. mahādevaṃ mahātmānaṃ sarvasya jagataḥ patim ..1.. ### [1.1.5](https://indike.org/pramana/in.purana.vayu.1.1.5) brahmāṇaṃ lokakarttāraṃ sarvajñamaparājitam. prabhuṃ bhūtabhaviṣyasya sāmpratasya ca satpatim ..2.. ### [1.1.6](https://indike.org/pramana/in.purana.vayu.1.1.6) jñānamapratimaṃ yasya vairāgyaṃ ca jagatpateḥ. aiśvaryañcaiva dharmaśca sahasiddhicatuṣṭayaḥ ..3.. ### [1.1.7](https://indike.org/pramana/in.purana.vayu.1.1.7) ya imān paśyate bhāvānnityaṃ sadasadātmakān. āviśanti punastaṃ vai kriyābhāvārthamīśvaram ..4.. ### [1.1.8](https://indike.org/pramana/in.purana.vayu.1.1.8) lokakṛllokatattvajño yogamāsthāya tattvavit. asṛjat sarvabhūtāni sthāvarāṇi carāṇi ca ..5.. ### [1.1.9](https://indike.org/pramana/in.purana.vayu.1.1.9) tamajaṃ viśvakarmāṇaṃ citpatiṃ lokasākṣiṇam. purāṇākhyānajijñāsurvrajāmi śaraṇaṃ prabhum ..6.. ### [1.1.10](https://indike.org/pramana/in.purana.vayu.1.1.10) brahmavāyumahendrebhyo namaskṛtya samāhitaḥ. ṛṣīṇāñca variṣṭhāya vasiṣṭhāya mahātmane ..7.. ### [1.1.11](https://indike.org/pramana/in.purana.vayu.1.1.11) tannapttre cātiyaśase jātūkarṇāya carṣaye. vasiṣṭhāya ca śucaye kṛṣṇadvaipāyanāya ca ..8.. ### [1.1.12](https://indike.org/pramana/in.purana.vayu.1.1.12) purāṇaṃ sampravakṣyāmi brahmoktaṃ vedasammitam. dharmārthanyāyasaṃyuktairāgamaiḥ suvibhūṣitam ..9.. ### [1.1.13](https://indike.org/pramana/in.purana.vayu.1.1.13) asīmakṛṣṇe vikrānte rājanye'nupamatviṣi. praśāsatīmāṃ dharmeṇa bhūmiṃ bhūmipasattame ..10.. ### [1.1.14](https://indike.org/pramana/in.purana.vayu.1.1.14) ṛṣayaḥ saṃśitātmānaḥ satyavrataparāyaṇāḥ. ṛjavo naṣṭarajasaḥ śāntā dāntā jitendriyāḥ ..11.. ### [1.1.15](https://indike.org/pramana/in.purana.vayu.1.1.15) dharmakṣetre kurukṣetre dīrghasatrantu ījire. nadyāstīre dṛṣadvatyāḥ puṇyāyāḥ śucirodhasaḥ. dīkṣitāste yathāśāstraṃ naimiṣāraṇyagocarāḥ ..12.. ### [1.1.16](https://indike.org/pramana/in.purana.vayu.1.1.16) draṣṭuṃ tān sa mahābuddhiḥ sūtaḥ paurāṇikottamaḥ. lomāni harṣayāñcakre śrotrūṇāṃ yat subhāṣitaiḥ. karmaṇā prathitastena loke'smim̐llomaharṣaṇaḥ ..13.. ### [1.1.17](https://indike.org/pramana/in.purana.vayu.1.1.17) tapaḥśrutācāranidhervedavyāsasya dhīmataḥ. śiṣyo babhūva medhāvī triṣu lokeṣu viśrutaḥ ..14.. ### [1.1.18](https://indike.org/pramana/in.purana.vayu.1.1.18) purāṇa vedo hyakhilo yasmin samyak pratiṣṭhitaḥ. bhāratī caiva vipulā mahābhāratavarddhinī ..15.. ### [1.1.19](https://indike.org/pramana/in.purana.vayu.1.1.19) dharmārthakāmamokṣārthāḥ kathā yasmin pratiṣṭhitāḥ. sūktāḥ suparibhāṣāśca bhūmāvoṣadhayo yathā ..16.. ### [1.1.20](https://indike.org/pramana/in.purana.vayu.1.1.20) sa tān nyāyena sudhiyo nyāyavinmunipuṅgavān. abhigamyopasaṃsṛtya namaskṛtya kṛtāñjaliḥ. toṣayāmāsa medhāvī praṇipātena tānṛṣīn ..17.. ### [1.1.21](https://indike.org/pramana/in.purana.vayu.1.1.21) te cāpi sartriṇaḥ prītāḥ sasadasyā mahaujasaḥ. tasmai sāma ca pūjāñca yathāvat pratipedire ..18.. ### [1.1.22](https://indike.org/pramana/in.purana.vayu.1.1.22) atha teṣāṃ purāṇasya śuśrūṣā samapadyata. dṛṣṭvā tamātiviśvastaṃ vidvāṃsaṃ lomaharṣaṇam ..19.. ### [1.1.23](https://indike.org/pramana/in.purana.vayu.1.1.23) tasmin satre gṛhapatiḥ sarvaśāstraviśāradaḥ. iṅgitairbhāvamālakṣya teṣāṃ sūtamanodayat ..20.. ### [1.1.24](https://indike.org/pramana/in.purana.vayu.1.1.24) tvayā sūta mahābuddhirbhagavān brahmavittamaḥ. itihāsapurāṇārthaṃ vyāsaḥ samyagupāsitaḥ. dudoha vai matiṃ tasya tvaṃ purāṇāśrayāṃ kathām ..21.. ### [1.1.25](https://indike.org/pramana/in.purana.vayu.1.1.25) eṣāñca ṛṣimukhyānāṃ purāṇaṃ prati dhīmatām. śuśrūṣāsti mahābuddhe tacchrāvayitumarhasi ..22.. ### [1.1.26](https://indike.org/pramana/in.purana.vayu.1.1.26) sarve hīme mahātmāno nānā gotrāḥ samāgatāḥ. svān svān vaṃśān purāṇaistu śrṛṇuyurbrahmavādinaḥ ..23.. ### [1.1.27](https://indike.org/pramana/in.purana.vayu.1.1.27) saputrān dīrghasatre'smiñchravayethā munīnatha. dīkṣiṣyamāṇairasmābhi stena prāgasi saṃsmṛtaḥ ..24.. ### [1.1.28](https://indike.org/pramana/in.purana.vayu.1.1.28) iti sannoditaḥ sūtastaireva munibhiḥ purā. purāṇārthaṃ purāṇajñaiḥ satyavrataparāyaṇaiḥ ..25.. ### [1.1.29](https://indike.org/pramana/in.purana.vayu.1.1.29) svadharma eṣa sūtasya sadbhirdṛṣṭaḥ purātanaiḥ. devatānāmṛṣīṇāñca rājñāñcāmitatejasām ..26.. ### [1.1.30](https://indike.org/pramana/in.purana.vayu.1.1.30) vaṃśānāṃ dhāraṇaṃ kāryaṃ śrutānāñca mahātmanām. itihāsapurāṇeṣu diṣṭā ye brahmavādibhiḥ ..27.. ### [1.1.31](https://indike.org/pramana/in.purana.vayu.1.1.31) na hi vedeṣvadhikāraḥ kaśvit sūtasya dṛśyate. vainyasya hi pṛthoryajñe varttamāne mahātmanaḥ. sutyāyāmabhavat sūtaḥ prathamaṃ varṇavaikṛtaḥ ..28.. ### [1.1.32](https://indike.org/pramana/in.purana.vayu.1.1.32) aindreṇa haviṣā tatra haviḥ pṛktaṃ bṛhaspateḥ. juhāvendrāya devāya tataḥ sūto vyajāyata. pramādāttatra sañjajñe prāyaścittañca karmasu ..29.. ### [1.1.33](https://indike.org/pramana/in.purana.vayu.1.1.33) śiṣyahavyena yat pṛktamabhibhūtaṃ gurorhaviḥ. adharottaracāreṇa jajñe tadvarṇavaikṛtaḥ ..30.. ### [1.1.34](https://indike.org/pramana/in.purana.vayu.1.1.34) yacca kṣatrāt samabhavadbrāhmaṇā'varayonitaḥ. tataḥ pūrveṇa sādharmyāttulyadharmā prakīrttitaḥ ..31.. ### [1.1.35](https://indike.org/pramana/in.purana.vayu.1.1.35) madhyamo hyeṣa sūtasya dharmaḥ kṣatropajīvanam. rathanāgāśvacaritaṃ jaghanyañca cikitsitam ..32.. ### [1.1.36](https://indike.org/pramana/in.purana.vayu.1.1.36) tat svadharmamahaṃ pṛṣṭo bhavadbhirbrahmavādibhiḥ. kasmāt samyaṅna vibrūyāṃ purāṇamṛṣipūjitam ..33.. ### [1.1.37](https://indike.org/pramana/in.purana.vayu.1.1.37) pitṝṇāṃ mānasī kanyā vāsavī samapadyata. apadhyātā ca pitṛbhirmatsyayonau babhūva sā ..34.. ### [1.1.38](https://indike.org/pramana/in.purana.vayu.1.1.38) araṇīva hutāśasya nimittaṃ yasya janmanaḥ. tasyāṃ jāto mahāyogī vyāso vedavidāṃ varaḥ ..35.. ### [1.1.39](https://indike.org/pramana/in.purana.vayu.1.1.39) tasmai bhagavate kṛtvā namo vyāsāya vedhase.. ### [1.1.40](https://indike.org/pramana/in.purana.vayu.1.1.40) puruṣāya purāṇāya bhṛguvākyapravarttine. mānuṣacchadmarūpāya viṣṇave prabhaviṣṇave ..36.. ### [1.1.41](https://indike.org/pramana/in.purana.vayu.1.1.41) jātamātrañca yaṃ veda upatasthe sasaṅgrahaḥ. dharmameva puraskṛtya jātūkarṇādavāpa tam ..37.. ### [1.1.42](https://indike.org/pramana/in.purana.vayu.1.1.42) matiṃ manthānamāvidhya yenāsau śrutisāgarāt. prakāśaṃ janito loke mahābhāratacandramāḥ ..38.. ### [1.1.43](https://indike.org/pramana/in.purana.vayu.1.1.43) vedadrumaśca yaṃ prāpya saśākhaḥ samapadyata. bhūmikālaguṇān prāpya bahuśākho yathā drumaḥ ..39.. ### [1.1.44](https://indike.org/pramana/in.purana.vayu.1.1.44) tasmādahamupaśrutya purāṇaṃ brahmavādinaḥ. sarvajñātsarvavedeṣu pūjitāddīptatejasaḥ ..40.. ### [1.1.45](https://indike.org/pramana/in.purana.vayu.1.1.45) purāṇaṃ sampravakṣyāmi yaduktaṃ mātariśvanā. pṛṣṭena munibhiḥ pūrvaṃ naimiṣīyairmahātmabhiḥ ..41.. ### [1.1.46](https://indike.org/pramana/in.purana.vayu.1.1.46) maheśvaraḥ paro'vyaktaścaturbāhuścaturmukhaḥ. acintyaścāprameyaśca svayambhūrheturīśvaraḥ ..42.. ### [1.1.47](https://indike.org/pramana/in.purana.vayu.1.1.47) avyaktaṃ kāraṇaṃ yadyannityaṃ sadasadātmakam. mahadādiviśeṣāntaṃ sṛjatīti viniścayaḥ ..43.. ### [1.1.48](https://indike.org/pramana/in.purana.vayu.1.1.48) aṇḍaṃ hiraṇmayañcaiva babhūvāpratimaṃ tataḥ. aṇḍasyāvaraṇañcādbhirapāmapi ca tejasā ..44.. ### [1.1.49](https://indike.org/pramana/in.purana.vayu.1.1.49) vāyunā tasya nabhasā nabho bhūtādinā vṛtam. bhūtādirmahatā caiva avyaktenāvṛto mahān ..45.. ### [1.1.50](https://indike.org/pramana/in.purana.vayu.1.1.50) ato'tra viśvadevānāmṛṣīṇāñcopavarṇitam. nadīnāṃ parvatānāñca prādurbhāvo'tra śasyate ..46.. ### [1.1.51](https://indike.org/pramana/in.purana.vayu.1.1.51) manvantarāṇāṃ sarveṣāṃ kalpānāñcopavarṇanam. kīrttanaṃ brahmakṣatrasya brahma janma ca kīrttyate ..47.. ### [1.1.52](https://indike.org/pramana/in.purana.vayu.1.1.52) ato brahmaṇi sraṣṭṛtvaṃ prajāsargopavarṇanam. avasthāścātra kīrttyante brahmaṇo'vyaktajanmanaḥ ..48.. ### [1.1.53](https://indike.org/pramana/in.purana.vayu.1.1.53) kalpānāṃ vatsarāścaiva jagataḥ sthāpanantathā. śayanañca hareratra pṛthivyuddharaṇantathā ..49.. ### [1.1.54](https://indike.org/pramana/in.purana.vayu.1.1.54) sanniveśaḥ purādīnāṃ varṇāśramavibhāgaśaḥ. vṛkṣāṇāṃ gṛhasaṃsthānāṃ siddhānāñcavināśanam ..50.. ### [1.1.55](https://indike.org/pramana/in.purana.vayu.1.1.55) yojanānāṃ pathāñcaiva sañcaro bahuvistaraḥ. svarge sthānavibhāgaśca marttyānāṃ bhuvicāriṇām ..51.. ### [1.1.56](https://indike.org/pramana/in.purana.vayu.1.1.56) vṛkṣāṇāmoṣadhīnāñca vīrudhāñca prakīrttanam. vṛkṣanārakikīṭatvaṃ marttyānāṃ parikīrttitam ..52.. ### [1.1.57](https://indike.org/pramana/in.purana.vayu.1.1.57) devatānāmṛṣīṇāñca dve sṛtī parikīrttite. annādīnāṃ tanūnāñca sarjanantyajanantathā ..53.. ### [1.1.58](https://indike.org/pramana/in.purana.vayu.1.1.58) prathamaṃ sarvaśāstrāṇāṃ purāṇaṃ brahmaṇā smṛtam. anantarañca vakrebhyo vedāstasya viniḥsṛtāḥ ..54.. ### [1.1.59](https://indike.org/pramana/in.purana.vayu.1.1.59) aṅgāni dharmaśāstrañca vratāni niyamāstathā. paśūnāṃ puruṣāṇāñca sambhavaḥ parikīrtitaḥ ..55.. ### [1.1.60](https://indike.org/pramana/in.purana.vayu.1.1.60) tathā nirvacanaṃ proktaṃ kalpasya ca parigrahaḥ. nava sargāḥ punaḥ proktā brahmaṇo buddhipūrvakāḥ ..56.. ### [1.1.61](https://indike.org/pramana/in.purana.vayu.1.1.61) trayo'nye buddhipūrvāstu tato lokānakalpayat. brahmaṇo'vayavebhyaśca dharmādīnāṃ samudbhavaḥ ..57.. ### [1.1.62](https://indike.org/pramana/in.purana.vayu.1.1.62) ye dvādaśa prasūyante prajāḥ kalpe punaḥ punaḥ. kalpayorantaraṃ proktaṃ pratisandhiśca yastayoḥ ..58.. ### [1.1.63](https://indike.org/pramana/in.purana.vayu.1.1.63) tamomātrāvṛtatvācca brahmaṇo'dharmasambhavaḥ. tathaiva śatarūpāyāḥ sambhavaśca tataḥ param ..59.. ### [1.1.64](https://indike.org/pramana/in.purana.vayu.1.1.64) priyavratottānapādau prasūtyākūtayaśca tāḥ. kīrttyante dhūtapāpmāno yeṣu lokāḥ pratiṣṭhitāḥ ..60.. ### [1.1.65](https://indike.org/pramana/in.purana.vayu.1.1.65) ruceḥ prajāpateścordvamākūtyāṃ mitunodbhavaḥ. prasūtyāmapi dakṣasya kanyānāṃ prabhavastataḥ ..61.. ### [1.1.66](https://indike.org/pramana/in.purana.vayu.1.1.66) dākṣāyaṇīṣu cāpyūrddhvaṃ śraddhādyāsu mahātmanām. dharmasya kīrttyate sargaḥ sāttvikasya sukhodayaḥ ..62.. ### [1.1.67](https://indike.org/pramana/in.purana.vayu.1.1.67) tathā'dharmmasya hiṃsāyāṃ tāmaso'śubhalakṣaṇaḥ. maheśvarasya satyāñca prajāsargaḥ prakīrtitaḥ ..63.. ### [1.1.68](https://indike.org/pramana/in.purana.vayu.1.1.68) nirāmayañca brahmāṇaṃ tādṛśaṃ kīrttitaṃ punaḥ. yogaṃ yoganidhiḥ prāha dvijānāṃ muktikāṃkṣiṇām ..64.. ### [1.1.69](https://indike.org/pramana/in.purana.vayu.1.1.69) avatāraśca rudrasya mahābhāgyaṃ tathaiva ca. traivedikāṃ kathāñcāpi saṃvādaḥ paramo mahān ..65.. ### [1.1.70](https://indike.org/pramana/in.purana.vayu.1.1.70) brahmanārāyaṇābhyāñca yatra stotraṃ prakīrttitam. stutastābhyāṃ sa deveśastutoṣa bhagavān śivaḥ ..66.. ### [1.1.71](https://indike.org/pramana/in.purana.vayu.1.1.71) prādurbhāvo'tha rudrasya brahmaṇo'ṅge mahātmanaḥ. kīrttyate nāma hetuśca yathā'rodīnmahāmanāḥ ..67.. ### [1.1.72](https://indike.org/pramana/in.purana.vayu.1.1.72) rudrādīni yathā hyaṣṭau nāmānyāpnot svayambhuvaḥ. yathā ca tairvyāpratamidaṃ trailokyaṃ sacarācaram ..68.. ### [1.1.73](https://indike.org/pramana/in.purana.vayu.1.1.73) bhṛgvādīnāmṛṣīṇāñca prajāsargopavarṇanam. vasiṣṭhasya ca brahmarṣeryatra gotrānukīrttanam ..69.. ### [1.1.74](https://indike.org/pramana/in.purana.vayu.1.1.74) agneḥ prajāyāḥ sambhūtiḥ svāhāyāṃ yatra kīrttitā. pitṝṇāṃ dviprakārāṇāṃ svadhāyāstadanantaram ..70.. ### [1.1.75](https://indike.org/pramana/in.purana.vayu.1.1.75) pitṛvaṃśaprasaṅgena kīrtyate ca maheśvarāt. dakṣasya śāpaḥ satyarthe bhṛgvādīnāñca dhīmatām ..71.. ### [1.1.76](https://indike.org/pramana/in.purana.vayu.1.1.76) pratiśāpaśca rudrasya dakṣādadbhutakarmaṇaḥ. pratiṣedhaśca vairasya kīrtyate yatra vistarāt ..72.. ### [1.1.77](https://indike.org/pramana/in.purana.vayu.1.1.77) teṣāṃ niyogo dvīpeṣu deśeṣu ca pṛthak pṛthak. svāyambhuvasya sargasya tataścāpyanukīrttanam ..73.. ### [1.1.78](https://indike.org/pramana/in.purana.vayu.1.1.78) ukto nābhernisargaśca rajasaśca mahātmanaḥ. dvīpānāṃ sasamudrāṇāṃ parvatānāñca kīrttanam ..74.. ### [1.1.79](https://indike.org/pramana/in.purana.vayu.1.1.79) varṣāṇāñca nadīnāñca tadbhedānāñca sarvaśaḥ. dvīpabhedasahasrāṇāmantarbhedaśca saptasu ..75.. ### [1.1.80](https://indike.org/pramana/in.purana.vayu.1.1.80) vistarān maṇḍalāccaiva jambūd‌vīpasamudrayoḥ. pramāṇaṃ yojanāgreṇa kīrttyate parvataiḥ saha ..76.. ### [1.1.81](https://indike.org/pramana/in.purana.vayu.1.1.81) himavān hemakūṭastu niṣadho merureva ca. nīlaḥ śvetaḥ śṛṅgavāṃśca kīrttyante varṣaparvatāḥ ..77.. ### [1.1.82](https://indike.org/pramana/in.purana.vayu.1.1.82) teṣāmantaraviṣkambhā ucchrāyāyāmavistarāḥ. kīrttyante yojanāgreṇa ye ca tatra nivāsinaḥ ..78.. ### [1.1.83](https://indike.org/pramana/in.purana.vayu.1.1.83) bhāratādīni varṣāṇi nadībhiḥ parvataistathā. bhūtaiścopaniviṣṭāni gatimadbhirdhruvaistathā ..79.. ### [1.1.84](https://indike.org/pramana/in.purana.vayu.1.1.84) jambūdvīpādayo dvīpāḥ samudraiḥ saptabhirvṛtāḥ. tataścāpyammayī bhūmirlokālokaśca kīrttyate ..80.. ### [1.1.85](https://indike.org/pramana/in.purana.vayu.1.1.85) aṇḍasyāntastvime lokāḥ saptadvīpā ca medinī. bhūrādayaśca kīrttyante varaṇaiḥ prākṛtaiḥ saha ..81.. ### [1.1.86](https://indike.org/pramana/in.purana.vayu.1.1.86) sarvañca tat‌pradhānasya parimāṇaikadeśikam. savyāsaparimāṇañca saṃkṣepeṇaiva kīrttyate ..82.. ### [1.1.87](https://indike.org/pramana/in.purana.vayu.1.1.87) sūryācandramasoścaiva pṛthivyāścāpyaśeṣataḥ. pramāṇaṃ yojanāgreṇa sāmpratairabhimānibhiḥ. mahendrādyāḥ sabhāḥ puṇyā mānasottaramūrddhani ..83.. ### [1.1.88](https://indike.org/pramana/in.purana.vayu.1.1.88) ata ūrddhvaṃ gatiścoktā svargasyālātacakravat. nāgavīthyajavīthyośca lakṣaṇaṃ parikīrttyate ..84.. ### [1.1.89](https://indike.org/pramana/in.purana.vayu.1.1.89) kāṣṭhayorlekhayoścaiva maṇḍalānāñca yojanaiḥ. lokālokasya sandhyāyā ahno viṣuvatastathā ..85.. ### [1.1.90](https://indike.org/pramana/in.purana.vayu.1.1.90) lokapālāḥ sthitāścorddhvaṃ kīrttyante ye caturdiśam. pitrūṇāṃ devatānāṃ ca panthānau dakṣiṇottarau ..86.. ### [1.1.91](https://indike.org/pramana/in.purana.vayu.1.1.91) gṛhiṇāṃ nyāsināñcoktau rajaḥsattvasamāśrayāt. kīrttyate ca padaṃ viṣṇordharmādyā yatra dhiṣṭhitāḥ ..87.. ### [1.1.92](https://indike.org/pramana/in.purana.vayu.1.1.92) sūryācandramasoścāro grahāṇāṃ jyotiṣāṃ tathā. kīrttyate dhruvasāmarthyāt prajānāṃ ca śubhāśubham ..88.. ### [1.1.93](https://indike.org/pramana/in.purana.vayu.1.1.93) brahmaṇā nirmitaḥ sauraḥ syandano'rthavaśāt svayam. kīrttyate bhagavān yena prasarpati divi svayam ..89.. ### [1.1.94](https://indike.org/pramana/in.purana.vayu.1.1.94) sa ratho'dhiṣṭhito devairādityaiḥ ṛṣibhistathā. gandharvairapsarobhiśca grāmaṇīsarparākṣasaiḥ ..90.. ### [1.1.95](https://indike.org/pramana/in.purana.vayu.1.1.95) apāṃ sāramayasyendoḥ kīrtyate ca rathastathā. vṛddhikṣayau ca saumasya kīrttyete sūryakāritau ..91.. ### [1.1.96](https://indike.org/pramana/in.purana.vayu.1.1.96) sūryādīnāṃ syandanānāṃ dhruvādeva prakīrttanam. kīrttyate śiśumāraśca yasya pucche dhruvaḥ sthitaḥ ..92.. ### [1.1.97](https://indike.org/pramana/in.purana.vayu.1.1.97) tārārūpāṇi sarvāṇi nakṣatrāṇi grahaiḥ saha. nivāsā yatra kīrttyante devānāṃ puṇyakāriṇām ..93.. ### [1.1.98](https://indike.org/pramana/in.purana.vayu.1.1.98) sūryaraśmisahasre ca varṣaśītoṣṇaniḥsravaḥ. pravibhāgaśca raśmīnāṃ nāmataḥ karmato'rthataḥ ..94.. ### [1.1.99](https://indike.org/pramana/in.purana.vayu.1.1.99) parimāṇagatī cokte grahāṇāṃ sūryasaṃśrayāt. yathā cāśu viṣāt prāptā śambhoḥ kaṇṭhasya nīlatā ..95.. ### [1.1.100](https://indike.org/pramana/in.purana.vayu.1.1.100) brahmaprasāditasyāśu viṣādaḥ śūlapāṇinaḥ. stūyamānaḥ surairviṣṇuḥ stauti devaṃ maheśvaram ..96.. ### [1.1.101](https://indike.org/pramana/in.purana.vayu.1.1.101) liṅgodbhavakathā puṇyā sarvapāpapraṇāśinī. viśvarūpāt pradhānasya pariṇāmo'yamadbhutaḥ ..97.. ### [1.1.102](https://indike.org/pramana/in.purana.vayu.1.1.102) purūravasa ailasya māhātmyānuprakīrttanam. pitṝṇāṃ dviprakārāṇāṃ tarpaṇaṃ cāmṛtasya vai ..98.. ### [1.1.103](https://indike.org/pramana/in.purana.vayu.1.1.103) tataḥ parvāṇi kīrttyante parvaṇāñcaiva sandhayaḥ. svarga lokagatānāṃ ca prāptānāñcāpyadhogatim. pitṝṇāṃ dviprakārāṇāṃ śrāddhenānugraho mahān ..99.. ### [1.1.104](https://indike.org/pramana/in.purana.vayu.1.1.104) yugasaṃkhyāpramāṇaṃ ca kīrtyate ca kṛte yuge. tretāyuge cāpakarṣādvārtāyāḥ saṃpravarttanam ..100.. ### [1.1.105](https://indike.org/pramana/in.purana.vayu.1.1.105) varṇānāmāśramāṇāñca saṃkhyānañca pravarttanam. varṇānāmāśramāṇāñca saṃsthitirdharmatastathā ..101.. ### [1.1.106](https://indike.org/pramana/in.purana.vayu.1.1.106) yajñapravarttanañcaiva saṃvādo yatra kīrtyate. ṛṣīṇāṃ vasunā sārddhaṃ vasoścādhaḥ punargatiḥ ..102.. ### [1.1.107](https://indike.org/pramana/in.purana.vayu.1.1.107) praśnānāṃ durvacatvaṃ ca svāyambhuvamṛte manum. praśaṃsā tapasaścoktā yugāvasthāśca kṛtsnaśaḥ. dvāparasya kaleścātra saṅkṣepeṇa prakīrtanam ..103.. ### [1.1.108](https://indike.org/pramana/in.purana.vayu.1.1.108) devatiryaṅmanuṣyāṇāṃ pramāṇāni yugeyuge. kīrtyante yugasāmarthyāt pariṇāhocchrayāyuṣaḥ ..104.. ### [1.1.109](https://indike.org/pramana/in.purana.vayu.1.1.109) śiṣṭādīnāṃ ca nirdeśaḥ prādurbhāvaśca kīrtyate. vedasya tadvijātānāṃ maṃtrāṇāṃ ca prakīrtanam ..105.. ### [1.1.110](https://indike.org/pramana/in.purana.vayu.1.1.110) śākhānāṃ parimāṇaṃ ca vedavyāsādiśabdanam. manvantarāṇāṃ saṃhāraḥ saṃhārānte ca sambhavaḥ ..106.. ### [1.1.111](https://indike.org/pramana/in.purana.vayu.1.1.111) devatānāmṛṣīṇāṃ ca manoḥ pitṛgaṇasya ca. na śakyaṃ vistarādvaktumityuktaṃ ca samāsataḥ ..107.. ### [1.1.112](https://indike.org/pramana/in.purana.vayu.1.1.112) manvantarasya saṃkhyā ca mānuṣeṇa prakīrtitā. manvantarāṇāṃ sarveṣāmetadeva ca lakṣaṇam ..108.. ### [1.1.113](https://indike.org/pramana/in.purana.vayu.1.1.113) atītānāgatānāṃ ca varttamānena kīrttyate. tathā manvantarāṇāṃ ca pratisandhānalakṣaṇam ..109.. ### [1.1.114](https://indike.org/pramana/in.purana.vayu.1.1.114) atītānāgatānāṃ ca proktaṃ svāyambhuve'ntare. manvantaratrayaṃ caiva kālajñānaṃ ca kīrttyate ..110.. ### [1.1.115](https://indike.org/pramana/in.purana.vayu.1.1.115) manvantareṣu devānāṃ prajeśānāṃ ca kīrttanam. dakṣasya cāpi dauhitrāḥ priyāyā duhituḥ sutāḥ .. ### [1.1.116](https://indike.org/pramana/in.purana.vayu.1.1.116) brahmādibhiste janitā dakṣeṇaiva ca dhīmatā ..111.. ### [1.1.117](https://indike.org/pramana/in.purana.vayu.1.1.117) sāvarṇādyāśca kīrttyante manavo merumāśritāḥ. dhruvasyottānapādasya prajāsargopavarṇanam ..112.. ### [1.1.118](https://indike.org/pramana/in.purana.vayu.1.1.118) pṛthunāpi ca vainyena bhūmerddohapravarttanam. pātrāṇāṃ payasāṃ caiva vaṃśānāṃ ca viśeṣaṇam. brahmādibhiḥ pūrvameva dugdhā ceyaṃ vasundharā ..113.. ### [1.1.119](https://indike.org/pramana/in.purana.vayu.1.1.119) daśabhyastu pracetebhyo māriṣāyāṃ prajāpateḥ. dakṣasya kīrttyate janma somasyāṃśena dhīmataḥ ..114.. ### [1.1.120](https://indike.org/pramana/in.purana.vayu.1.1.120) bhūtabhavyabhaveśatvaṃ mahendrāṇāṃ ca kīrttyate. manvādikā bhaviṣyanti ākhyānairbahubhirvṛtāḥ ..115.. ### [1.1.121](https://indike.org/pramana/in.purana.vayu.1.1.121) vaivasvatasya ca manoḥ kīrttyate sargavistaraḥ. devasya mahato yajñe vāruṇīṃ bibhratastanum. brahmaśukrāt samutpattirbhṛgvādīnāṃ ca kīrtyate ..116.. ### [1.1.122](https://indike.org/pramana/in.purana.vayu.1.1.122) vinivṛtte prajāsarge cākṣuṣasya manoḥ śubhe. dakṣasya kīrttyate sargo dhyānādvaivasvatai'ntare ..117.. ### [1.1.123](https://indike.org/pramana/in.purana.vayu.1.1.123) nāradaḥ priyasaṃvādī dakṣaputrānmahābalān ..117.. ### [1.1.124](https://indike.org/pramana/in.purana.vayu.1.1.124) nāśayāmāsa śāpāya ātmano brahmaṇaḥ sutaḥ ..118.. ### [1.1.125](https://indike.org/pramana/in.purana.vayu.1.1.125) tato dakṣo'sṛjat kanyā vīriṇyāmeva viśrutāḥ. kīrttyate dharmasargaśca kāśyapasya ca dhīmataḥ ..119.. ### [1.1.126](https://indike.org/pramana/in.purana.vayu.1.1.126) ata ūrdhvaṃ brahmaṇaśca viṣṇoścaiva bhavasya ca. ekatvaṃ ca pṛthaktvaṃ ca viśeṣatvaṃ ca kīrtyate ..120.. ### [1.1.127](https://indike.org/pramana/in.purana.vayu.1.1.127) īśatvācca yathā śaptā jātā devāḥ svayambhuvā. marutprasādo marutāṃ dityā devāṃśasambhavāḥ ..121.. ### [1.1.128](https://indike.org/pramana/in.purana.vayu.1.1.128) kīrttyante marutāñcātha gaṇāste saptasaptakāḥ. devatvaṃ pitṛvākyena vāyuskandhena cāśrayaḥ ..122.. ### [1.1.129](https://indike.org/pramana/in.purana.vayu.1.1.129) daityānāṃ dānavānāñca gandharvoragarakṣasām. sarvabhūtapiśācānāṃ paśūnāṃ pakṣivīrudhām. utpattayaścāpsarasāṃ kīrttyante bahuvistarāt ..123.. ### [1.1.130](https://indike.org/pramana/in.purana.vayu.1.1.130) samudrasaṃyogakṛtaṃ janmairāvatahastinaḥ. vainateyasamutpattistathā cāsyābhiṣecanam ..124.. ### [1.1.131](https://indike.org/pramana/in.purana.vayu.1.1.131) bhṛgūṇāṃ vistaraścoktastathā cāṅgirasāmapi. kaśyapasya pulastyasya tathaivātrermmahātmanaḥ ..125.. ### [1.1.132](https://indike.org/pramana/in.purana.vayu.1.1.132) parāśarasya ca muneḥ prajānāṃ yatra vistaraḥ. devatānāmṛṣīṇāñca prajotpattistataḥ param ..126.. ### [1.1.133](https://indike.org/pramana/in.purana.vayu.1.1.133) tisraḥ kanyāḥ prakīrttyante yāsu lokāḥ pratiṣṭhitāḥ. pitṛdauhitranirddeśo devānāṃ janma cocyate ..127.. ### [1.1.134](https://indike.org/pramana/in.purana.vayu.1.1.134) vistaraste bhagavataḥ pañcānāṃ sumahātmanām. ilāyā vistaraścokta ādityasya tataḥ param ..128.. ### [1.1.135](https://indike.org/pramana/in.purana.vayu.1.1.135) vikukṣicaritañcoktaṃ dhundhoścaiva nibarhaṇam. bṛhadbalāntasaṃkṣepādikṣvākvādyāḥ prakīrttitāḥ ..129.. ### [1.1.136](https://indike.org/pramana/in.purana.vayu.1.1.136) nimyādīnāṃ kṣitīśānāṃ yāvajjahugaṇāditi. kīrttyate vistaro yaśca yayāterapi bhūpateḥ ..130.. ### [1.1.137](https://indike.org/pramana/in.purana.vayu.1.1.137) yaduvaṃśasamuddeśo haihayasya ca vistaraḥ. kroṣṭoranantaraṃ coktastathā vaṃśasya vistaraḥ ..131.. ### [1.1.138](https://indike.org/pramana/in.purana.vayu.1.1.138) jyāmaghasya ca māhātmyaṃ prajāsargaśca kīrttyate. devāvṛdhasya tvarkasya vṛṣṭeścaiva mahātmanaḥ ..132.. ### [1.1.139](https://indike.org/pramana/in.purana.vayu.1.1.139) atrimitrānvayaścaiva viṣṇorddivyābhiśaṃsanam. vivasvato'tha saṃprāptirmaṇiratnasya dhīmataḥ ..133.. ### [1.1.140](https://indike.org/pramana/in.purana.vayu.1.1.140) yudhā jitaḥ prajāsargaḥ kīrttyate ca mahātmanaḥ. kīrttyate cānvayaḥ śrīmān rājarṣerdevamīḍhuṣaḥ ..134.. ### [1.1.141](https://indike.org/pramana/in.purana.vayu.1.1.141) punaśca janma cāpyuktaṃ caritañca mahātmanaḥ. kaṃsasyacāpi daurātmyamekāntena samudbhavaḥ ..135.. ### [1.1.142](https://indike.org/pramana/in.purana.vayu.1.1.142) vāsudevasya devakyāṃ viṣṇorjjanma prajāpateḥ. viṣṇoranantarañcāpi prajāsargopavarṇanam ..136.. ### [1.1.143](https://indike.org/pramana/in.purana.vayu.1.1.143) daivāsure samutpanne viṣṇunā strīvadhe kṛte. saṃrakṣatā śakravadhaṃ śāpaḥ prāptaḥ purā bhṛgoḥ. bhṛguścotthāpayāmāsa divyāṃ śukrasya mātaram ..137.. ### [1.1.144](https://indike.org/pramana/in.purana.vayu.1.1.144) devānāmasurāṇāṃ ca saṃgrāmā dvādaśāyutāḥ. nārasiṃhaprabhṛtayaḥ kīrttyante prāṇanāśanāḥ ..138.. ### [1.1.145](https://indike.org/pramana/in.purana.vayu.1.1.145) śukreṇārādhanaṃ sthāṇordhīreṇa tapasā kṛtam. varadānapralubdhena yatra śarvastavaḥ kṛtaḥ. anantaraṃ vinirdiṣṭaṃ devāsuraviceṣṭitam ..139.. ### [1.1.146](https://indike.org/pramana/in.purana.vayu.1.1.146) jayantyā saha sakte tu yatra śukre mahātmani. asurānmohayāmāsa śukrarūpeṇa buddhimān. bṛhaspatistu tān śukraḥ śaśāpa sumahādyutiḥ ..140.. ### [1.1.147](https://indike.org/pramana/in.purana.vayu.1.1.147) uktaṃ ca viṣṇumāhātmyaṃ viṣṇorjanmādiśabdanam. turvasuḥ śukradauhitro devayānyāṃ yadorabhūt. anurdruhyustathā pūruryayātitanayā nṛpāḥ ..141.. ### [1.1.148](https://indike.org/pramana/in.purana.vayu.1.1.148) atra vaṃśyā mahātmānasteṣāṃ pārthivasattamāḥ. kīrtyante dīrghayaśaso bhūridraviṇatejasaḥ ..142.. ### [1.1.149](https://indike.org/pramana/in.purana.vayu.1.1.149) kuśikasya ca viprarṣeḥ samyagyo dharmasaṃśrayaḥ. bārhaspatyantu surabhiryatra śāpamihānudat ..143.. ### [1.1.150](https://indike.org/pramana/in.purana.vayu.1.1.150) kīrttanaṃ jahnuvaṃśasya śantanorvīryaśabdanam. bhaviṣyatāṃ tathā rājñāmupasaṃhāraśabdanam ..144.. ### [1.1.151](https://indike.org/pramana/in.purana.vayu.1.1.151) anāgatānāṃ saptānāṃ manūnāṃ copavarṇanam. bhaumasyānte kaliyuge kṣīṇe saṃhāravarṇanam ..145.. ### [1.1.152](https://indike.org/pramana/in.purana.vayu.1.1.152) parārddhaparayoścaiva lakṣaṇaṃ parikīrttyate. brahmaṇo yojanāgreṇa parimāṇavinirṇayaḥ ..146.. ### [1.1.153](https://indike.org/pramana/in.purana.vayu.1.1.153) naimittikaḥ prākṛtikastathaivātyantikaḥ smṛtaḥ. trividhaḥ sarva bhūtānāṃ kīrttyate pratisañcaraḥ ..147.. ### [1.1.154](https://indike.org/pramana/in.purana.vayu.1.1.154) anāvṛṣṭirbhāskarācca ghoraḥ saṃvarttako'nalaḥ. megho hyekārṇavaṃ vāyustathā rātrirmahātmanaḥ ..148.. ### [1.1.155](https://indike.org/pramana/in.purana.vayu.1.1.155) saṃkhyālakṣaṇamuddiṣṭaṃ tato brāhmaṃ viśeṣataḥ. bhūrādīnāṃ ca lokānāṃ saptānāmupavarṇanam. kīrttyante cātra nirayāḥ pāpānāṃ rauravādayaḥ ..149.. ### [1.1.156](https://indike.org/pramana/in.purana.vayu.1.1.156) brahmalokopariṣṭāttu śivasya sthānamuttamam. yatra saṃhāramāyānti sarvabhūtāni saṃkṣaye ..150.. ### [1.1.157](https://indike.org/pramana/in.purana.vayu.1.1.157) sarveṣāṃ caiva sattvānāṃ pariṇāmavinirṇayaḥ. brahmaṇaḥ pratisaṃsarge sarvasaṃhāravarṇanam ..151.. ### [1.1.158](https://indike.org/pramana/in.purana.vayu.1.1.158) aṣṭarūpyamataḥ proktaṃ prāṇasyāṣṭakameva ca. gatiścordhvamadhaścoktā dharmādharmasamāśrayāt ..152.. ### [1.1.159](https://indike.org/pramana/in.purana.vayu.1.1.159) kalpe kalpe ca bhūtānāṃ mahatāmapi saṃkṣayaḥ. prasaṃkhyāya ca duḥkhāni brahmaṇaścāpyanityatā ..153.. ### [1.1.160](https://indike.org/pramana/in.purana.vayu.1.1.160) daurātmyaṃ caiva bhogānāṃ pariṇāmavinirṇaṃyaḥ. durlabhatvaṃ ca mokṣasya vairāgyāddoṣadarśanam ..154.. ### [1.1.161](https://indike.org/pramana/in.purana.vayu.1.1.161) vyaktāvyaktaṃ parityajya sattvaṃ brahmaṇi saṃsthitam. nānātvadarśanācchuddhaṃ tatastadabhivarttate ..155.. ### [1.1.162](https://indike.org/pramana/in.purana.vayu.1.1.162) tatastāpatrayātīto nīrūpākhyo nirañjanaḥ. ānando brahmaṇaḥ prokto na bibheti kutaścana ..156.. ### [1.1.163](https://indike.org/pramana/in.purana.vayu.1.1.163) kīrttyate ca punaḥ sargo brahmaṇo'nyasya pūrvavat. kīrttyate ṛṣivaṃśaśca sarvapāpapraṇāśanaḥ ..157.. ### [1.1.164](https://indike.org/pramana/in.purana.vayu.1.1.164) iti kṛtyasamuddeśaḥ purāṇasyopavarṇitaḥ. kīrttyante jagato hyatra sarvapralayavikriyāḥ. pravṛttayaśca bhūtānāṃ nivṛttīnāṃ phalāni ca ..158.. ### [1.1.165](https://indike.org/pramana/in.purana.vayu.1.1.165) prādurbhāvo vasiṣṭhasya śakterjanma tathaiva ca. saudāsānnigrahastasya viśvāmitrakṛtena ca ..159.. ### [1.1.166](https://indike.org/pramana/in.purana.vayu.1.1.166) parāśarasya cotpattiradṛśyatvaṃ yathā vibhoḥ. jajñe pitṝṇāṃ kanyāyāṃ vyāsaścāpi yathā muniḥ ..160.. ### [1.1.167](https://indike.org/pramana/in.purana.vayu.1.1.167) śukasya ca tathā janma saha putrasya dhīmataḥ. parāśarasya pradveṣo viśvāmitrakṛto yathā ..161.. ### [1.1.168](https://indike.org/pramana/in.purana.vayu.1.1.168) vasiṣṭhasambhṛtaścāgnirviśvāmitrajighāṃsayā. santānahetorvibhunā cīrṇaḥ skandena dhīmatā. daivena vidhinā vipra viśvāmitrahitaiṣiṇā ..162.. ### [1.1.169](https://indike.org/pramana/in.purana.vayu.1.1.169) ekaṃ vedañcatuṣpādañcaturddhā punarīśvaraḥ. yathā bibheda bhagavān vyāsaḥ sarvān svabuddhitaḥ. tasya śiṣyaiḥ praśiṣyaiśca śākhā bhedāḥ punaḥ kṛtāḥ ..163.. ### [1.1.170](https://indike.org/pramana/in.purana.vayu.1.1.170) prayogaiḥ ṣaḍ‌guṇīyaiśca yathā pṛṣṭaḥ svayambhuvā. pṛṣṭena cānupṛṣṭāste munayo dharmakāṅkṣiṇaḥ.. ### [1.1.171](https://indike.org/pramana/in.purana.vayu.1.1.171) deśaṃ puṇyamabhīpsantau vibhunā taddhitaiṣiṇā ..164.. ### [1.1.172](https://indike.org/pramana/in.purana.vayu.1.1.172) sunābhaṃ divyarūpākhyaṃ satyāṅgaṃ śubhavikramam. anaupamyamidañcakraṃ varttamānamatandritāḥ. pṛṣṭhato yāta niyatāstataḥ prāpsyatha yaddhitam ..165.. ### [1.1.173](https://indike.org/pramana/in.purana.vayu.1.1.173) gacchato dharmacakrasya yatra nemirviśīryate. puṇyaḥ sa deśo mantavya ityuvāca tadā prabhuḥ. uktvā caivamṛṣīn brahmā hyadṛśyatvamagātpunaḥ ..166.. ### [1.1.174](https://indike.org/pramana/in.purana.vayu.1.1.174) gaṅgāgarbhasamāhāraṃ naimiṣeyatvameva ca. ījire caiva satreṇa munayo naimiṣe tadā. mṛte śaradvati tathā tasya cotthāpanaṃ kṛtam ..167.. ### [1.1.175](https://indike.org/pramana/in.purana.vayu.1.1.175) ṛṣayo naimiṣeyāstu śraddhayā parayā punaḥ. niḥsīmāṃ gāmimāṃ kṛtsnāṃ kṛtvā rājānamāharan. yathāvidhi yathāśāstraṃ tamātithyairapūjayan ..168.. ### [1.1.176](https://indike.org/pramana/in.purana.vayu.1.1.176) prītaṃ tathā kṛtātithyaṃ rājānaṃ vidhivattadā. antarddhānagataḥ krūraḥ svarbhānurasuro'harat ..169.. ### [1.1.177](https://indike.org/pramana/in.purana.vayu.1.1.177) anusasrurhataṃ cāpi nṛpamaiḍaṃ yathā purā. gandharva sahitaṃ dṛṣṭvā kalāpagrāmavāsinam ..170.. ### [1.1.178](https://indike.org/pramana/in.purana.vayu.1.1.178) sannipātaḥ punastasya yathā yajñe maharṣibhiḥ. dṛṣṭvā hiraṇmayaṃ sarvaṃ yajñe vastu mahātmanām ..171.. ### [1.1.179](https://indike.org/pramana/in.purana.vayu.1.1.179) tadā vai naimiṣeyāṇāṃ satre dvādaśavārṣike. yathā vivadamānastu aiḍaḥ saṃsthāpitastu taiḥ ..172.. ### [1.1.180](https://indike.org/pramana/in.purana.vayu.1.1.180) janayitvā tvaraṇyānte aiḍaputraṃ yathāyuṣam. samāpayitvā tatsatramāyuṣaṃ paryupāsate ..173.. ### [1.1.181](https://indike.org/pramana/in.purana.vayu.1.1.181) etatsarvaṃ yathāvṛttaṃ vyākhyātaṃ dvijasattamāḥ. ṛṣīṇāṃ paramaṃ cātra lokatantramanuttamam ..174.. ### [1.1.182](https://indike.org/pramana/in.purana.vayu.1.1.182) brahmaṇā yatpurā proktaṃ purāṇaṃ jñānamuttamam. avatāraśca rudrasya dvijānugrahakāraṇāt ..175.. ### [1.1.183](https://indike.org/pramana/in.purana.vayu.1.1.183) tathā pāśupatā yogāḥ sthānānāñcaiva kīrttanam. liṅgodbhavasya devasya nīlakaṇṭhatvameva ca ..176.. ### [1.1.184](https://indike.org/pramana/in.purana.vayu.1.1.184) kathyate yatra viprāṇāṃ vāyunā brahmavādinā. dhanyaṃ yaśasyamāyuṣyaṃ puṇyaṃ pāpapraṇāśanam. kīrttanaṃ śravaṇaṃ cāsya dhāraṇañca viśeṣataḥ ..177.. ### [1.1.185](https://indike.org/pramana/in.purana.vayu.1.1.185) anena hi krameṇedaṃ purāṇaṃ saṃpracakṣyate. sukhamarthaḥ samāsena mahānapyupalabhyate. tasmāt kiñcitsumuddiśya paścādvakṣyāmi vistaram ..178.. ### [1.1.186](https://indike.org/pramana/in.purana.vayu.1.1.186) pādamādyamidaṃ samyak yo'dhīyīta jitendriyaḥ. tenādhītaṃ purāṇaṃ tat sarvaṃ nāstyatra saṃśayaḥ ..179.. ### [1.1.187](https://indike.org/pramana/in.purana.vayu.1.1.187) yo vidyāccaturo vedān sāṅ‌gopaniṣado dvijaḥ. na cetpurāṇaṃ saṃvidyānnaiva sa syādvicakṣaṇaḥ ..180.. ### [1.1.188](https://indike.org/pramana/in.purana.vayu.1.1.188) itihāsapurāṇābhyāṃ vedaṃ samupabṛṃhayet. bibhetyalpaśrutādvedo māmayaṃ pratariṣyati ..181.. ### [1.1.189](https://indike.org/pramana/in.purana.vayu.1.1.189) abhyasannimamadhyāyaṃ sākṣāt proktaṃ svayambhuvā. āpadaṃ prāpya mucyeta yatheṣṭāṃ prāpnuyādghatim ..182.. ### [1.1.190](https://indike.org/pramana/in.purana.vayu.1.1.190) yasmāt purā hyanatīdaṃ purāṇaṃ tena tat smṛtam. niruktamasya yo veda sarvapāpaiḥ pramucyate ..183.. ### [1.1.191](https://indike.org/pramana/in.purana.vayu.1.1.191) nārāyaṇaḥ sarvamidaṃ viśvaṃ vyāpya pravarttate. tasyāpi jagataḥ sraṣṭuḥ sraṣṭā devo maheśvaraḥ ..184.. ### [1.1.192](https://indike.org/pramana/in.purana.vayu.1.1.192) ataśca saṃkṣepamimaṃ śrṛṇudhvaṃ maheśvaraḥ sarvamidaṃ purāṇam. sa sargakāle ca karoti sargān saṃhārakāle punarādadīta ..185.. ### [1.1.193](https://indike.org/pramana/in.purana.vayu.1.1.193) iti śrīmahāpurāṇe vāyuprokte anukramaṇikā nāma prathamo'dhyāyaḥ .. 1 .. ## Linked texts (2) - [Mudgalapurāṇa](https://indike.org/pramana/in.purana.upa.surya.mudgala.6.7.10) — Sanskrit - [Śivatattvaviveka (Appayya Dīkṣita)](https://indike.org/pramana/in.sampradaya.saiva.sivatattvaviveka-appayya-diksita.47-2.5) — Appayya Dīkṣita 1560, Sanskrit --- Source: [https://indike.org/pramana/in.purana.vayu.1.1](https://indike.org/pramana/in.purana.vayu.1.1) · Pramāṇa