[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.24 # Vayupurana 1.24: adhyāyaḥ 24 Vāyupurāṇa 1.24 - **Language:** Sanskrit ### adhyāyaḥ 24 ### [1.24.1](https://indike.org/pramana/in.purana.vayu.1.24.1) .. vāyuruvāca .. ### [1.24.2](https://indike.org/pramana/in.purana.vayu.1.24.2) catvāri bhārate varṣe yugāni munayo viduḥ . kṛtaṃ tretā dvāparaṃ ca tiṣyaṃ ceti caturyugam .. 24.1 .. ### [1.24.3](https://indike.org/pramana/in.purana.vayu.1.24.3) etatsahasraparyantamaharyadbrahmaṇaḥ smṛtam. yāmādyāstu gaṇāḥ sapta romavantaścaturddaśa .. 24.2 .. ### [1.24.4](https://indike.org/pramana/in.purana.vayu.1.24.4) saśarīrāḥ śrayante sma janalokaṃ sahānugāḥ. evaṃ deveṣvatīteṣu maharllokājjanaṃ tapaḥ .. 24.3 .. ### [1.24.5](https://indike.org/pramana/in.purana.vayu.1.24.5) manvantareṣvatīteṣu devāḥ sarve mahaujasaḥ. tatasteṣu gateṣūrddhvaṃ sāyujyaṃ kalpavāsinām .. 24.4 .. ### [1.24.6](https://indike.org/pramana/in.purana.vayu.1.24.6) sametya devaiste devāḥ prāpte saṅkālane tadā. maharlokaṃ parityajya gaṇāste vai caturddaśa .. 24.5 .. ### [1.24.7](https://indike.org/pramana/in.purana.vayu.1.24.7) bhūtadiṣvavaśiṣṭeṣu sthāvarānteṣu vai tadā . śūnyeṣu teṣu lokeṣu mahānteṣu bhuvādiṣu. deveṣvatha gateṣūrddhvaṃ kalpavāsiṣu vai janam .. 24.6 .. ### [1.24.8](https://indike.org/pramana/in.purana.vayu.1.24.8) tatsaṃhatyā tato brahmā devarṣigaṇadānavān. saṃsthāpayati vai sarvvān dāhavṛṣ‌ṭyā yugakṣaye .. 24.7 .. ### [1.24.9](https://indike.org/pramana/in.purana.vayu.1.24.9) yo'tītaḥ saptamaḥ kalpo mayā vaḥ parikīrtitaḥ. samudraiḥ saptabhirgāḍhamekībhūtairmahārṇavaiḥ . āsīdekārṇavaṃ ghoramavibhāgaṃ tamomayam .. 24.8 māyayaikārṇave tasmin śaṅkhacakragadādharaḥ. jīmūtābho'mbujākṣaśca kirīṭī śrīpatirhariḥ .. 24.9 .. ### [1.24.10](https://indike.org/pramana/in.purana.vayu.1.24.10) nārāyaṇamukhodgīrṇaḥ so'ṣṭamaḥ puruṣottamaḥ. aṣṭabāhurmahorasko lokānāṃ yonirucyate. kimapyacintyaṃ yuktātmā yogamāsthāya yogavit .. 24.10 .. ### [1.24.11](https://indike.org/pramana/in.purana.vayu.1.24.11) phaṇāsahasrakalitaṃ tamapratimavarcasam. mahābhogapaterbhogamanvāstīrya mahocchrayam. tasminmahati paryaṅke śete vai kanakaprabhe .. 24.11 .. ### [1.24.12](https://indike.org/pramana/in.purana.vayu.1.24.12) evaṃ tatra śayānena viṣṇunā prabhaviṣṇunā. ātmārāmeṇa krīḍārthaṃ sṛṣṭaṃ nābhyāṃ tu paṅkajam .. 24.12 .. ### [1.24.13](https://indike.org/pramana/in.purana.vayu.1.24.13) śatayojanavistīrṇaṃ taruṇādityavarccasam. bajradaṇḍaṃ mahotsedhaṃ līlayā prabhaviṣṇunā .. 24.13 .. ### [1.24.14](https://indike.org/pramana/in.purana.vayu.1.24.14) tasyaivaṃ krīḍamānasya samīpaṃ devamīḍhuṣaḥ. hemabrahmāṇḍajo brahmā rukmavarṇohyatīndriyaḥ. caturmukho viśālākṣaḥ samāgamya yadṛcchayā .. 24.14 .. ### [1.24.15](https://indike.org/pramana/in.purana.vayu.1.24.15) śriyā yuktena navyena suprabheṇa sugandhinā. taṃ krīḍamānaṃ pajhena dṛṣṭvā brahmā tu bhejivān .. 24.15 .. ### [1.24.16](https://indike.org/pramana/in.purana.vayu.1.24.16) sa vismayamathāgamya śasya saṃpūrṇayā girā. provāca ko bhavān śete ākṣito mdhyamambhasām .. 24.16 .. ### [1.24.17](https://indike.org/pramana/in.purana.vayu.1.24.17) atha tasyācyutaḥ śrutvā brahmaṇastu śubhaṃ vacaḥ. udatiṣṭhata paryyaṅkādvismayotphullalocanaḥ .. 24.17 .. ### [1.24.18](https://indike.org/pramana/in.purana.vayu.1.24.18) pratyuvācottaraṃ caiva kriyate yacca kiñcana. dyaurantarikṣaṃ bhūtañca paraṃ padamahaṃ prabhuḥ .. 24.18 .. ### [1.24.19](https://indike.org/pramana/in.purana.vayu.1.24.19) tamevamuktvā bhagavān viṣṇuḥ punarathāvravīt . kastvaṃ khalu samāyātaḥ samīpaṃ bhagavān kutaḥ . kutasva bhūyo gantavyaṃ kutra vā te pratiśrayaḥ .. 24.19 .. ### [1.24.20](https://indike.org/pramana/in.purana.vayu.1.24.20) ko bhavān viśvamūrtistvaṃ karttavyaṃ kiñca te mayā. evaṃ bruvāṇa vaikuṇṭhaṃ pratyuvāca pitāmahaḥ .. 24.20 .. ### [1.24.21](https://indike.org/pramana/in.purana.vayu.1.24.21) yathā bhavāṃstathā cāhamādikartta prajāpatiḥ. nārāyaṇasamākhyātaḥ sarvvaṃ vai mayi tiṣṭhati .. 24.21 .. ### [1.24.22](https://indike.org/pramana/in.purana.vayu.1.24.22) savismayaṃ paraṃ śrutvā brahmaṇā lokakartṛṇā. so'nujñāto bhagavatā vaikuṇṭho viśvasambhavaḥ .. 24.22 .. ### [1.24.23](https://indike.org/pramana/in.purana.vayu.1.24.23) kautūhalānmahāyogī praviṣṭo brahmaṇo mukham. imānaṣṭādaśadvīpān sasamudrān saparvvatān. praviśya sa mahātejāścāturvarṇyasamākulān. brahmādistambaparyyantān saptalokān sanātanān .. 24.23 .. ### [1.24.24](https://indike.org/pramana/in.purana.vayu.1.24.24) brahmaṇastūdare dṛṣṭvā sarvvān viṣṇurmahāyaśāḥ. aho'sya tapaso vīryyaṃ punaḥ punarabhāṣata .. 24.24 .. ### [1.24.25](https://indike.org/pramana/in.purana.vayu.1.24.25) paryyaṭan vividhān lokān viṣṇurnānāvidhāśramān. tato varṣasahasrānte nāntaṃ hi dadṛśe tadā .. 24.25 .. ### [1.24.26](https://indike.org/pramana/in.purana.vayu.1.24.26) tadā'sya vakrānniṣkramya pannagendrāriketanaḥ. ajātaśatrurbhagavān pitāmahamathābravīt .. 24.26 .. ### [1.24.27](https://indike.org/pramana/in.purana.vayu.1.24.27) bhagavan ādi madhyañca antaṃ kāladiśorna ca. nāhamantaṃ prapaśyāmi hyudarasya tavānagha .. 24.27 .. ### [1.24.28](https://indike.org/pramana/in.purana.vayu.1.24.28) evamuktvābravīdbhūyaḥ pitāmahamidaṃ hariḥ. bhavānapyevamevādya hyudaraṃ mama śāśvatam. praviśya lokān paśyaitānanaupamyān dvijottama .. 24.28 .. ### [1.24.29](https://indike.org/pramana/in.purana.vayu.1.24.29) manaḥprahlādanīṃ vāṇīṃ śrutvā tasyābhinandya ca. śrīpaterudaraṃ bhūyaḥ praviveśa pitāmahaḥ .. 24.29 .. ### [1.24.30](https://indike.org/pramana/in.purana.vayu.1.24.30) tāneva lokān garbhasthaḥ paśyan so'cintyavikramaḥ. paryaṭitvādidevasya dadarśāntaṃ na vai hareḥ .. 24.30 .. ### [1.24.31](https://indike.org/pramana/in.purana.vayu.1.24.31) jñātvāgamantasya pitāmahasya dvārāṇi sarvāṇi pidhāya viṣṇuḥ. vibhurmanaḥ karttumiyeṣa cāśu sukhaṃ prasupto'smi mahājalaughe .. 24.31 .. ### [1.24.32](https://indike.org/pramana/in.purana.vayu.1.24.32) tato dvārāṇi sarvāṇi pihitānyupalakṣyate. sūkṣmaṃ kṛtvātmano rūpaṃ nābhyāṃ dvāramavindata .. 24.32 .. ### [1.24.33](https://indike.org/pramana/in.purana.vayu.1.24.33) pajhasūtrānumārgeṇa hyanugamya pitāmahaḥ. ujjahārātmano rūpaṃ puṣkarāccaturānanaḥ. virarājāravindasthaḥ pajhagarbhasamadyutiḥ .. 24.33 .. ### [1.24.34](https://indike.org/pramana/in.purana.vayu.1.24.34) etasminnantare tābhyāmekaikasya tu kārtsnyataḥ. pravarttamāne saṃharṣe madhye tasyārṇavasya tu .. 24.34 .. ### [1.24.35](https://indike.org/pramana/in.purana.vayu.1.24.35) ..sūta uvāca.. ### [1.24.36](https://indike.org/pramana/in.purana.vayu.1.24.36) tato hyaparimeyātmā bhūtānāṃ prabhurīśvaraḥ. śūlapāṇirmahādevo haimacīrāmbaracchadaḥ. āgacchad yatra so'nanto nāgabhogapatirhariḥ .. 24.35 .. ### [1.24.37](https://indike.org/pramana/in.purana.vayu.1.24.37) śīghraṃ vikramatastasya padbhyāmatyantapīḍitāḥ. uddhūtāstūrṇamākāśe pṛthulāstoyabindavaḥ. atyuṣṇāścātiśītāśca vāyustatra vavau bhṛśam .. 24.36 .. ### [1.24.38](https://indike.org/pramana/in.purana.vayu.1.24.38) taddṛṣṭvā mahadāścaryaṃ brahmā viṣṇumabhāṣata. abbindavo hi sthūloṣṇāḥ kampate cāmbujaṃ bhṛśam. etaṃ me saṃśayaṃ brūhi kiñcānyat tvañcikīrṣasi .. 24.37 .. ### [1.24.39](https://indike.org/pramana/in.purana.vayu.1.24.39) etadevaṃvidhaṃ vākyaṃ pitāmahamukhodbhavam. śrutvāpratimakarmāha bhagavānasurāntakṛt .. 24.38 .. ### [1.24.40](https://indike.org/pramana/in.purana.vayu.1.24.40) kinnu khalvatra me nābhyāṃ bhūtamanyatkṛtālayam . vadanti priyamatyarthaṃ vipriyepi ca te mayā .. 24.39 .. ### [1.24.41](https://indike.org/pramana/in.purana.vayu.1.24.41) ityevaṃ manasā dhyātvā pratyuvācedamuttaram. kinnvatra bhagavāṃstasmin puṣkare jātasambhramaḥ .. 24.40 .. ### [1.24.42](https://indike.org/pramana/in.purana.vayu.1.24.42) kiṃ mayā yat kṛtaṃ deva yanmāṃ priyamanuttamam. bhāṣase puruṣaśreṣṭha kimarthaṃ brūhi tattvataḥ .. 24.41 .. ### [1.24.43](https://indike.org/pramana/in.purana.vayu.1.24.43) evaṃ bruvāṇaṃ deveśaṃ lokayā trāntu tattvagām. pratyuvācāmbujābhāsko brahma vedanidhiḥ prabhuḥ .. 24.42 .. ### [1.24.44](https://indike.org/pramana/in.purana.vayu.1.24.44) yo'sau tavodaraṃ pūrvaṃ praviṣṭo'haṃ tvadicchayā. yathā mamodare lokāḥ sarve dṛṣṭāstvayā prabho. tathaiva dṛṣṭāḥ kārtsnyena mayā lokāstavodare .. 24.43 .. ### [1.24.45](https://indike.org/pramana/in.purana.vayu.1.24.45) tato varṣasahasrānte upāvṛttasya me'nagha. nūnaṃ matsarabhāvena māṃ vaśīkartumicchatā. āśu dvārāṇi sarvāṇi ghaṭitāni tvayā punaḥ .. 24.44 .. ### [1.24.46](https://indike.org/pramana/in.purana.vayu.1.24.46) tato mayā mahābhāga sañcintya svena cetasā. labdho nābhyāṃ praveśatu padmasūtrādvinirgamaḥ .. 24.45 .. ### [1.24.47](https://indike.org/pramana/in.purana.vayu.1.24.47) mābhūtte manaso'lpo'pi vyāghāto'yaṃ kathañcana. ityeṣānugatirviṣṇoḥ kāryāṇāmaupasargikī .. 24.46 .. ### [1.24.48](https://indike.org/pramana/in.purana.vayu.1.24.48) yanma yānantaraṃ kāryaṃ mayādhyavasitaṃ tvayi. tvāñcābādhitukāmena krīḍāpūrvaṃ yadṛcchayā. āśu dvārāṇi sarvāṇi ghaṭitāni mayā punaḥ .. 24.47 .. ### [1.24.49](https://indike.org/pramana/in.purana.vayu.1.24.49) na te'nyathāvamantavyo mānyaḥ pūjyaśca me bhavān. sarvaṃ marṣaya kalyāṇa yanmayā'pakṛtantava. tasmānmayocyamānastvaṃ pajhādavatara prabho .. 24.48 .. ### [1.24.50](https://indike.org/pramana/in.purana.vayu.1.24.50) nāhaṃ bhavantaṃ śaknomi soduntejomayaṃ gurum. sa covāca varaṃ brūhi pajhādavatarāmyayam .. 24.49 .. ### [1.24.51](https://indike.org/pramana/in.purana.vayu.1.24.51) ..viṣṇuruvāca .. ### [1.24.52](https://indike.org/pramana/in.purana.vayu.1.24.52) putro bhava mamārighna mudaṃ prāpsyasi śobhanam. satyadhano mahāyogī tvamīḍyaḥ praṇavātmakaḥ .. 24.50 .. ### [1.24.53](https://indike.org/pramana/in.purana.vayu.1.24.53) adyaprabhṛti sarveśa śvetoṣṇīṣavibhūṣaṇaḥ. pajhayoniritītyevaṃ khyāto nāmnā bhaviṣyasi. putro me tvaṃ bhava brahman sarvalokādhipa prabho .. 24.51 .. ### [1.24.54](https://indike.org/pramana/in.purana.vayu.1.24.54) tataḥ sa bhagavān brahma varaṃ gṛhya kirīṭinaḥ . evaṃ bhavatu cetyuktvāṃ prītātmā gatamatsaraḥ .. 24.52 .. ### [1.24.55](https://indike.org/pramana/in.purana.vayu.1.24.55) pratyāsannamathāyātaṃ bālārkābhaṃ mahānanam. bhūtamatyadbhutaṃ dṛṣṭvā nārāyaṇamathābravīt .. 24.53 .. ### [1.24.56](https://indike.org/pramana/in.purana.vayu.1.24.56) aprameyo mahāvakro daṃṣṭrī vyastaśiro ruhaḥ. daśabāhustriśūlāṅko nayanairviśvatomukhaḥ .. 24.54 .. ### [1.24.57](https://indike.org/pramana/in.purana.vayu.1.24.57) lokaprabhuḥ svayaṃ sākṣādvikṛto muñjamekhalī . meḍhreṇordhvena mahatā nadamāno'tibhairavam .. 24.55 .. ### [1.24.58](https://indike.org/pramana/in.purana.vayu.1.24.58) kaḥ khalveṣa pumān viṣṇo tejorāśirmahādyutiḥ. vyāpya sarvā diśo dyāñca ita evābhivarttate .. 24.56 .. ### [1.24.59](https://indike.org/pramana/in.purana.vayu.1.24.59) tenaivamukto bhagavān viṣṇurbrahmāṇamabravīt. padbhyāntalanipātena yasya vikramato'rṇave. vegena mahatākāśe vyathitāśca jalāśayāḥ .. 24.57 .. ### [1.24.60](https://indike.org/pramana/in.purana.vayu.1.24.60) chaṭābhirviṣṇuto'tyarthaṃ sicyate pajhasambhavaḥ. ghrāṇajena ca vātena kampamānaṃ tvayā saha. dodhūyate mahāpajhaṃ svacchandaṃ mama nābhijam .. 24.58 .. ### [1.24.61](https://indike.org/pramana/in.purana.vayu.1.24.61) sa eṣa bhagavānīśo hyanādiścāntakṛdvibhuḥ. bhavānahañca stotreṇa hyupatiṣṭhāva godhvajam .. 24.59 .. ### [1.24.62](https://indike.org/pramana/in.purana.vayu.1.24.62) tataḥ kruddho'mbujābhāskaṃ brahmā provāca keśavam. na bhavān nyūnamātmānaṃ lokānāṃ yonimuttamam .. 24.60 .. ### [1.24.63](https://indike.org/pramana/in.purana.vayu.1.24.63) brahmāṇaṃ lokakarttāraṃ māñca vetti sanātanam. ko'yaṃ bhoḥ śaṅkaro nāma hyāvayorvyatiricyate .. 24.61 .. ### [1.24.64](https://indike.org/pramana/in.purana.vayu.1.24.64) tasya tat krodhajaṃ vākyaṃ śrutvā viṣṇurabhāṣata. mā maivaṃ vada kalyāṇa parivādaṃ mahātmanaḥ .. 24.62 .. ### [1.24.65](https://indike.org/pramana/in.purana.vayu.1.24.65) māyāyogeśvaro dharmo durādharṣo varapradaḥ. heturasyātra jagataḥ purāṇaḥ puruṣo'vyayaḥ .. 24.63 .. ### [1.24.66](https://indike.org/pramana/in.purana.vayu.1.24.66) jīvaḥ khalveṣa jīvānāṃ jyotirekaṃ prakāśate. bālakrīḍanakairddevaḥ krīḍato śaṅkaraḥ svayam .. 24.64 .. ### [1.24.67](https://indike.org/pramana/in.purana.vayu.1.24.67) pradhānamavyayaṃ jyotiravyaktaṃ prakṛtistamaḥ. asya caitāni nāmāni nityaṃ prasavadharmiṇaḥ. yaḥ kaḥ sa iti duḥkhārttairmṛgyate yatibhiḥ śivaḥ .. 24.65 .. ### [1.24.68](https://indike.org/pramana/in.purana.vayu.1.24.68) eṣa bījī bhavān bījamahaṃ yoniḥ sanātanaḥ. evamukro'tha viśvātmā brahmā viṣṇumabhāṣata .. 24.66 .. ### [1.24.69](https://indike.org/pramana/in.purana.vayu.1.24.69) bhavānyonirahaṃ bījaṃ kathaṃ bījī maheśvaraḥ . etanme sūkṣmamavyaktaṃ saṃśayaṃ chettumarhasi .. 24.67 .. ### [1.24.70](https://indike.org/pramana/in.purana.vayu.1.24.70) jñātvā caivaṃ samutpattiṃ brahmaṇā lokatantriṇā. idaṃ paramasādṛśyaṃ praśramabhyavadaddhariḥ .. 24.68 .. ### [1.24.71](https://indike.org/pramana/in.purana.vayu.1.24.71) asmānmahattaraṃ guhyaṃ bhūtamavyanna vidyate. mahataḥ paramaṃ dhāma śivamadhyātmināṃ padam .. 24.69 .. ### [1.24.72](https://indike.org/pramana/in.purana.vayu.1.24.72) dvaidhībhāvena cātmānaṃ praviṣṭastu vyavasthitaḥ. niṣkalaḥ sūkṣmamavyaktaḥ sakalaśca maheśvaraḥ .. 24.70 .. ### [1.24.73](https://indike.org/pramana/in.purana.vayu.1.24.73) asya māyāvidhijñasya agamyagahanasya ca. purā liṅgaṃ bhavadbījaṃ prathamaṃ tvādisargikam .. 24.71 .. ### [1.24.74](https://indike.org/pramana/in.purana.vayu.1.24.74) mayi yonau samāyuktaṃ tadbījaṃ kālaparyayāt‌. hiraṇmayamapārantadyonyāmaṇḍamajāyata .. 24.72 .. ### [1.24.75](https://indike.org/pramana/in.purana.vayu.1.24.75) śatāni daśavarṣāṇāmaṇḍañcāpsu pratiṣṭhitam. ante varṣasahasrasya vāyunā taddvidhā kṛtam .. 24.73 .. ### [1.24.76](https://indike.org/pramana/in.purana.vayu.1.24.76) kapālamekaṃ dyaurjajñe kapālamaparaṃ kṣitiḥ. ulvantasya mahotsedhaṃ yo'sau kanakaparvataḥ .. 24.74 .. ### [1.24.77](https://indike.org/pramana/in.purana.vayu.1.24.77) tatastasmāt prabuddhātmā devo devavaraḥ prabhuḥ . hiraṇyagarbho bhagavānahaṃ jajñe caturbhujaḥ .. 24.75 .. ### [1.24.78](https://indike.org/pramana/in.purana.vayu.1.24.78) tato varṣasahasrānte vāyunā taddvidhākṛtam. atārārkendunakṣatraṃ śūnyaṃ lokamavekṣya ca. ko'yamatre tyabhidhyāte kumārāste'bhavaṃstadā .. 24.76 .. ### [1.24.79](https://indike.org/pramana/in.purana.vayu.1.24.79) priyadarśanāssutanavo ye'tītāḥ pūrvajāstava. bhūyo varṣasahasrānte tata evātmajāstava. bhuvanānalasaṅkāśāḥ pajhapatrāyatekṣaṇāḥ .. 24.77 .. ### [1.24.80](https://indike.org/pramana/in.purana.vayu.1.24.80) śrīmān sanatkumārastu ṛbhuścaivorddhvaretasau . sanātanaśca sanakastathaiva ca sanandanaḥ. utpannāḥ samakālaṃ te buddhayā'tīndriyadarśanāḥ .. 24.78 .. ### [1.24.81](https://indike.org/pramana/in.purana.vayu.1.24.81) utpannāḥ pratighātmāno jagaduśca tadaiva hi. nārapsyante ca karmāṇi tāpatrayavivarjitāḥ .. 24.79 .. ### [1.24.82](https://indike.org/pramana/in.purana.vayu.1.24.82) asya saumyaṃ bahukleśaṃ jarāśokasamanvitam. jīvitaṃ maraṇaṃ caiva saṃbhavañca punaḥ punaḥ .. 24.80 .. ### [1.24.83](https://indike.org/pramana/in.purana.vayu.1.24.83) svaprabhūtaṃ punaḥ svarge duḥkhāni narakāṃstathā. viditvā cāgamaṃ sarvamavaśyaṃ bhavitavyatām .. 24.81 .. ### [1.24.84](https://indike.org/pramana/in.purana.vayu.1.24.84) ṛbhuṃ sanatkumārañca dṛṣṭvā tava vaśe sthitau. trayastu trīn guṇān hitvā ātmajāḥ sanakādayaḥ. vaivarttena tu jñānena nivṛttāste mahaujasaḥ .. 24.82 .. ### [1.24.85](https://indike.org/pramana/in.purana.vayu.1.24.85) tatasteṣvapavṛtteṣu sanakādiṣu vai triṣu. bhaviṣyasi vimūḍhastu māyayā śaṅkarasya tu .. 24.83 .. ### [1.24.86](https://indike.org/pramana/in.purana.vayu.1.24.86) evaṃ kalpe tu vaikalpe saṃjñā nasyati te'nagha. kalpaśeṣāṇi bhūtāni sūkṣmāṇi pārthivāni ca .. 24.84 .. ### [1.24.87](https://indike.org/pramana/in.purana.vayu.1.24.87) sā caiṣā hyaiśvarī māyā jagataḥ samudāhṛtā. sa eṣa parvato meru rdevaloka udāhṛtaḥ .. 24.85 .. ### [1.24.88](https://indike.org/pramana/in.purana.vayu.1.24.88) tavaivedaṃ hi māhātmyaṃ dṛṣṭvā cātmānamātmanā . jñātvā ceśvarasadbhāvaṃ jñātvā māmambujekṣaṇam .. 24.86 .. ### [1.24.89](https://indike.org/pramana/in.purana.vayu.1.24.89) mahādevaṃ mahāyogaṃ bhūtānāṃ varadaṃ prabhum. praṇavātmānamāsādya namaskṛtyā jagadgurum. tvāñca māñcaiva saṃkruddho niḥśvāsānnirddahedayam .. 24.87 .. ### [1.24.90](https://indike.org/pramana/in.purana.vayu.1.24.90) evaṃ jñātvā mahāyogaṃ abhyuttiṣṭhan mahābalaḥ. ahaṃ tvāmagrataḥ kṛtvā stoṣye'hamanalaprabham .. 24.88 .. ### [1.24.91](https://indike.org/pramana/in.purana.vayu.1.24.91) ..sūta uvāca.. ### [1.24.92](https://indike.org/pramana/in.purana.vayu.1.24.92) brahmāṇamagrataḥ kṛtvā tataḥ sa garuḍadhvajaḥ. atītaiśca bhaviṣyaiśca varttamānaistathaiva ca. nāmabhiśchāndasaiścaiva idaṃ stotramudīrayat .. 24.89 .. ### [1.24.93](https://indike.org/pramana/in.purana.vayu.1.24.93) namastubhyaṃ bhagavate suvrate'nantatejase. namaḥ kṣetrādhipataye bījine śūline namaḥ .. 24.90 .. ### [1.24.94](https://indike.org/pramana/in.purana.vayu.1.24.94) ameḍhrāyorddhvameḍhrāya namo vaikuṇṭharetase . namo jyeṣṭhāya śreṣṭhāya apūrvaprathamāya ca .. 24.91 .. ### [1.24.95](https://indike.org/pramana/in.purana.vayu.1.24.95) namo havyāya pūjyāya sadyo jātāya vai namaḥ . gahvarāya dhaneśāya haimacīrāmbarāya ca .. 24.92 .. ### [1.24.96](https://indike.org/pramana/in.purana.vayu.1.24.96) namaste hyasmadādīnāṃ bhūtānāṃ prabhavāya ca. vedakarmmāvadānānāṃ dravyāṇāṃ prabhave namaḥ .. 24.93 .. ### [1.24.97](https://indike.org/pramana/in.purana.vayu.1.24.97) namo yogsya prabhave sāṃkhyasya prabhave namaḥ . namo dhruvaniśīthānāmṛṣīṇāṃ pataye namaḥ .. 24.94 .. ### [1.24.98](https://indike.org/pramana/in.purana.vayu.1.24.98) vidyudaśanimeghānāṃ garjjitaprabhave namaḥ. udadhīnāñca prabhave dvīpānāṃ prabhave namaḥ .. 24.95 .. ### [1.24.99](https://indike.org/pramana/in.purana.vayu.1.24.99) adrīṇāṃ prabhave caiva varṣāṇāṃ prabhave namaḥ. namo nadānāṃ prabhave nadīnāṃ prabhave namaḥ .. 24.96 .. ### [1.24.100](https://indike.org/pramana/in.purana.vayu.1.24.100) namaścauṣadhiprabhave vṛkṣāṇāṃ prabhave namaḥ. dharmmādhyakṣāya dharmmāya sthitīnāṃ prabhave namaḥ .. 24.97 .. ### [1.24.101](https://indike.org/pramana/in.purana.vayu.1.24.101) namo rasānāṃ prabhave ratnānāṃ prabhave namaḥ . namaḥ kṣaṇānāṃ prabhave kalānāṃ prabhave namaḥ .. 24.98 .. ### [1.24.102](https://indike.org/pramana/in.purana.vayu.1.24.102) nimeṣaprabhave caiva kāṣṭhānāṃ prabhave namaḥ . ahorātrārddhamāsānāṃ māsānāṃ prabhave namaḥ .. 24.99 .. ### [1.24.103](https://indike.org/pramana/in.purana.vayu.1.24.103) nama ṛtunāṃ prabhave saṃkhyāyāḥ prabhave namaḥ. prabhave ca parārddhasya parasya prabhave namaḥ .. 24.100 .. ### [1.24.104](https://indike.org/pramana/in.purana.vayu.1.24.104) namaḥ purāṇaprabhave yugasya prabhave namaḥ. caturvidhasya sargasya prabhave'nantacakṣuṣe .. 24.101 .. ### [1.24.105](https://indike.org/pramana/in.purana.vayu.1.24.105) kalpodaye nibaddhānāṃ vārttānāṃ prabhave namaḥ. namo viśvasya prabhave brahmadiprabhave namaḥ .. 24.102 .. ### [1.24.106](https://indike.org/pramana/in.purana.vayu.1.24.106) vidyānāṃ prabhave caiva vidyānāṃ pataye namaḥ. namo vratānāṃ pataye mantrāṇāṃ pataye namaḥ .. 24.103 .. ### [1.24.107](https://indike.org/pramana/in.purana.vayu.1.24.107) pitṝṇāṃ pataye caiva paśūnāṃ pataye namaḥ. vāgvṛṣāya namastubhyaṃ purāṇavṛṣabhāya ca .. 24.104 .. ### [1.24.108](https://indike.org/pramana/in.purana.vayu.1.24.108) sucārucārukeśāya ūrddhvacakṣuḥśirāya ca. namaḥ paśūnāṃ pataye govṛṣendradhvajāya ca .. 24.105 .. ### [1.24.109](https://indike.org/pramana/in.purana.vayu.1.24.109) prajāpatīnāṃ pataye siddhānāṃ pataye namaḥ. garuḍoragasarpāṇāṃ pakṣiṇāṃ pataye namaḥ .. 24.106 .. ### [1.24.110](https://indike.org/pramana/in.purana.vayu.1.24.110) gokarṇāya ca goṣṭhāya śaṅkukarṇāya vai namaḥ. vārāhāyāprameyāya rakṣodhipataye namaḥ .. 24.107 .. ### [1.24.111](https://indike.org/pramana/in.purana.vayu.1.24.111) namo hyapsarasāṃpataye gaṇānāṃ (pataye) hrīmaye namaḥ. ambhasāṃ pataye caiva tejasāṃ pataye namaḥ .. 24.108 .. ### [1.24.112](https://indike.org/pramana/in.purana.vayu.1.24.112) namo'stu lakṣmīpataye śrīmate hrīmate namaḥ. balābalasamūhāya hyakṣobhyakṣobhaṇāya ca .. 24.109 .. ### [1.24.113](https://indike.org/pramana/in.purana.vayu.1.24.113) dīrghaśrṛṅgaikaśrṛṅgāya vṛṣabhāya kakudmine. namaḥ sthairyāya vapuṣe tejase suprabhāya ca .. 24.110 .. ### [1.24.114](https://indike.org/pramana/in.purana.vayu.1.24.114) bhūtāya ca bhaviṣyāya varttamānāya vai namaḥ. suvarccase'tha vīrāya śūrāya hyatigāya ca .. 24.111 .. ### [1.24.115](https://indike.org/pramana/in.purana.vayu.1.24.115) varadāya vareṇyāya namaḥ sarvagatāya ca. namo bhūtāya bhavyāya bhavāya mahate tathā .. 24.112 .. ### [1.24.116](https://indike.org/pramana/in.purana.vayu.1.24.116) janāya ca namastubhyaṃ tapase varadāya ca. namo vandyāya mokṣāya janāya narakāya ca .. 24.113 .. ### [1.24.117](https://indike.org/pramana/in.purana.vayu.1.24.117) bhavāya bhajamānāya iṣṭāya yājakāya ca. abhyudīrṇāya dīptāya tattvāya nirguṇāya ca .. 24.114 .. ### [1.24.118](https://indike.org/pramana/in.purana.vayu.1.24.118) namaḥ pāśāya hastāya namaḥ svābharaṇāya ca. hutāya cāpahutāya prahutapraśitāya ca .. 24.115 .. ### [1.24.119](https://indike.org/pramana/in.purana.vayu.1.24.119) namo'stviṣṭāya mūrttāya hyagniṣṭomartvijāya ca. nama ṛtāya satyāya bhūtādhipataye namaḥ .. 24.116 .. ### [1.24.120](https://indike.org/pramana/in.purana.vayu.1.24.120) sadasyāya namaścaiva dakṣiṇāvabhṛthāya ca. ahiṃsāyātha lokānāṃ paśumantrauṣadhāya ca .. 24.117 .. ### [1.24.121](https://indike.org/pramana/in.purana.vayu.1.24.121) namastuṣṭipradānāya tryambakāya sugandhine. namo'stvindriyapataye parihārāya sragviṇe .. 24.118 .. ### [1.24.122](https://indike.org/pramana/in.purana.vayu.1.24.122) viśvāya viśvarūpāya viśvato'kṣimukhāya ca. sarvataḥ pāṇipādāya rudrāyāpramitāya ca .. 24.119 .. ### [1.24.123](https://indike.org/pramana/in.purana.vayu.1.24.123) namo havyāya kavyāya havyakavyāya vai namaḥ. namaḥ siddhāya medhyāya ceṣṭāya tvavyayāya ca .. 24.120 .. ### [1.24.124](https://indike.org/pramana/in.purana.vayu.1.24.124) suvīrāya sughorāya hyakṣobhyakṣobhaṇāya ca. sumedhase suprajāya dīptāya bhāskarāya ca .. 24.121 .. ### [1.24.125](https://indike.org/pramana/in.purana.vayu.1.24.125) mano namaḥ suparṇāya tapanīyanibhāya ca. virūpākṣāya tryakṣāya piṅgalāya mahaujase .. 24.122 .. ### [1.24.126](https://indike.org/pramana/in.purana.vayu.1.24.126) dṛṣṭighnāya namaścaiva namaḥ saumyekṣaṇāya ca. namo dhūmrāya śvetāya kṛṣṇāya lohitāya ca .. 24.123 .. ### [1.24.127](https://indike.org/pramana/in.purana.vayu.1.24.127) piśitāya piśaṅgāya pītāya ca niṣaṅgiṇe. namaste saviśeṣāya nirviśeṣāya vai namaḥ .. 24.124 .. ### [1.24.128](https://indike.org/pramana/in.purana.vayu.1.24.128) namo vai pajhavarṇāya mṛtyughnāya ca mṛtyave . namaḥ śyāmāya gaurāya kadrave rohitāya ca .. 24.125 .. ### [1.24.129](https://indike.org/pramana/in.purana.vayu.1.24.129) namaḥ kāntāya sandhyābhravarṇāya bahurūpiṇe. namaḥ kapālahastāya digvastrāya kaparddine .. 24.126 .. ### [1.24.130](https://indike.org/pramana/in.purana.vayu.1.24.130) aprameyāya śarvāya hyavadhyāya varāya ca. purastāt pṛṣṭhataścaiva bibhrāṇāya kṛśānave .. 24.127 .. ### [1.24.131](https://indike.org/pramana/in.purana.vayu.1.24.131) durgāya mahate caiva rodhāya kapilāya ca. arkaprabhaśarīrāya baline raṃhasāya ca .. 24.128 .. ### [1.24.132](https://indike.org/pramana/in.purana.vayu.1.24.132) pinākine prasiddhāya sphītāya prasṛtāya ca. sumedhase'kṣamālāya digvāsāya śikhaṇḍine .. 24.129 .. ### [1.24.133](https://indike.org/pramana/in.purana.vayu.1.24.133) citrāya citravarṇāya vicitrāya dharāya ca. cekitānāya tuṣṭāya namastvanihitāya ca .. 24.130 .. ### [1.24.134](https://indike.org/pramana/in.purana.vayu.1.24.134) namaḥ kṣāntāya śāntāya vajrasaṃhananāya ca. rakṣoghnāya makhaghnāya śitikaṇṭhorddhvaretase .. 24.131 .. ### [1.24.135](https://indike.org/pramana/in.purana.vayu.1.24.135) arihāya kṛtāntāya tigmāyudhadharāya ca. samodāya pramodāya iriṇāyaiva te namaḥ .. 24.132 .. ### [1.24.136](https://indike.org/pramana/in.purana.vayu.1.24.136) praṇavapraṇaveśāya bhaktānāṃ śarmadāya ca. mṛgavyādhāya dakṣāya dakṣayajñaharāya ca .. 24.133 .. ### [1.24.137](https://indike.org/pramana/in.purana.vayu.1.24.137) sarvabhūtāya bhūtāya sarveśātiśayāya ca. purabhetre ca śāntāya sugandhāya vareśave .. 24.134 .. ### [1.24.138](https://indike.org/pramana/in.purana.vayu.1.24.138) puṣpavantasvarupāya bhaganetrāntakāya ca . kaṇādāya variṣṭhāya kāmāṅgadahanāya ca .. 24.135 .. ### [1.24.139](https://indike.org/pramana/in.purana.vayu.1.24.139) raveḥ karālacakrāya nāgendradamanāya ca. daityānāmantakāyātho divyākrandakarāya ca .. 24.136 .. ### [1.24.140](https://indike.org/pramana/in.purana.vayu.1.24.140) śmaśānaratinityāya namastryambakadhāriṇe. namaste prāṇapālāya dhavamālādharāya ca .. 24.137 .. ### [1.24.141](https://indike.org/pramana/in.purana.vayu.1.24.141) prahīṇaśokairvividhairbhūtaiḥ pariṣṭutāya ca. naranārīśarīrāya devyāḥ priyakarāya ca .. 24.138 .. ### [1.24.142](https://indike.org/pramana/in.purana.vayu.1.24.142) jaṭine daṇḍine tubhyaṃ vyālayajñopavītine . namo'stu nṛtyaśīlāya vādyanṛtyapriyāya ca .. 24.139 .. ### [1.24.143](https://indike.org/pramana/in.purana.vayu.1.24.143) manyave śītaśīlāya sugītigāyate namaḥ. kaṭakakarāya bhīmāya cograrūpadharāya ca .. 24.140 .. ### [1.24.144](https://indike.org/pramana/in.purana.vayu.1.24.144) vibhīṣaṇāya bhīmāya bhagapramathanāya ca. siddhasaṅghātagītāya mahābhāgāya vai namaḥ .. 24.141 .. ### [1.24.145](https://indike.org/pramana/in.purana.vayu.1.24.145) namo muktāṭṭahāsāya kṣveḍitāsphoṭitāya ca. nadate kūrdate caiva namaḥ pramuditāya ca .. 24.142 .. ### [1.24.146](https://indike.org/pramana/in.purana.vayu.1.24.146) namo'dbhutāya svapate dhāvate prasthitāya ca. dhyāyate jṛmbhate caiva tudate dravate namaḥ .. 24.143 .. ### [1.24.147](https://indike.org/pramana/in.purana.vayu.1.24.147) calate krīḍate caiva lambodaraśarīriṇe. namaḥ kṛtāya kampāya muṇḍāya vikarāya ca .. 24.144 .. ### [1.24.148](https://indike.org/pramana/in.purana.vayu.1.24.148) nama unmattaveṣāya kiṅkiṇīkāya vai namaḥ. namo vikṛtaveṣāya krūrogrāmarṣaṇāya ca .. 24.145 .. ### [1.24.149](https://indike.org/pramana/in.purana.vayu.1.24.149) aprameyāya dīptāya dīptaye nirguṇāya ca. namaḥ priyāya vādāya mudrāmaṇidharāya ca .. 24.146 .. ### [1.24.150](https://indike.org/pramana/in.purana.vayu.1.24.150) namastokāya tanave guṇairapratimāya ca. namo gaṇāya guhyāya agamyāgamanāya ca .. 24.147 .. ### [1.24.151](https://indike.org/pramana/in.purana.vayu.1.24.151) loka dhātrī tviyaṃ bhūmiḥ pādau sajjanasevitau. sarvveṣāṃ siddhayogānāmadhiṣṭhānantavodaram .. 24.148 .. ### [1.24.152](https://indike.org/pramana/in.purana.vayu.1.24.152) madhye'ntarikṣaṃ vistīrṇantārāgaṇavibhūṣitam. tārāpatha ivā bhāti śrīmān hārastavorasi .. 24.149 .. ### [1.24.153](https://indike.org/pramana/in.purana.vayu.1.24.153) diśo daśa bhujāste vai keyūrāṅgadabhūṣitāḥ. vistīrṇapariṇāhaśca nīlāmbudacayopamaḥ .. 24.150 .. ### [1.24.154](https://indike.org/pramana/in.purana.vayu.1.24.154) kaṇṭhaste śobhate śrīmān hemasūtravibhūṣitaḥ . daṃṣṭrākarāladurddharṣamanaupamyaṃ mukhaṃ tava .. 24.151 .. ### [1.24.155](https://indike.org/pramana/in.purana.vayu.1.24.155) pajhamālākṛtoṣṇīṣaṃ śīrṣaṇyaṃ śobhate katham. dīptiḥ sūrye vapuścandre sthairye bhūrhyanilo bale .. 24.152 .. ### [1.24.156](https://indike.org/pramana/in.purana.vayu.1.24.156) taikṣṇyamagnau prabhā candre khe śabdaḥ śaityamapsu ca. akṣarottamaniṣpandān guṇānetānvidurbudhāḥ .. 24.153 .. ### [1.24.157](https://indike.org/pramana/in.purana.vayu.1.24.157) japo japyo mahāyogī mahādevo maheśvaraḥ. pureśayo guhāvāsī khecaro rajanīcaraḥ .. 24.154 .. ### [1.24.158](https://indike.org/pramana/in.purana.vayu.1.24.158) taponidhirguhagururnandano nandivarddhanaḥ. hayaśīrṣo dharādhātā vidhātā bhūtivāhanaḥ .. 24.155 .. ### [1.24.159](https://indike.org/pramana/in.purana.vayu.1.24.159) boddhavyo bodhano netā dhūrvaho duṣprakampakaḥ. bṛhadratho bhīmakarmā bṛhatkīrtirdhanañjayaḥ .. 24.156 .. ### [1.24.160](https://indike.org/pramana/in.purana.vayu.1.24.160) ghaṇṭāpriyo dhvajīchatrī patākādhvajinīpatiḥ. kavacī paṭṭiśī śaṅkhī pāśahastaḥ paraśvabhṛt .. 24.157 .. ### [1.24.161](https://indike.org/pramana/in.purana.vayu.1.24.161) agamastvanaghaḥ śūro devarājārimardanaḥ. tvāṃ prasādya purā'smābhirdviṣanto nihatā yudhi .. 24.158 .. ### [1.24.162](https://indike.org/pramana/in.purana.vayu.1.24.162) agnistvaṃ cārṇavān sarvān pibhannaiva na tṛpyase. krodhāgāraḥ prasannātmā kāmahā kāmadaḥ priyaḥ .. 24.159 .. ### [1.24.163](https://indike.org/pramana/in.purana.vayu.1.24.163) brahmaṇyo brahmacārī ca goghnastvaṃ śiṣṭapūjitaḥ. vedānāmavyayaḥ kośastvayā yajñaḥ prakalpitaḥ .. 24.160 .. ### [1.24.164](https://indike.org/pramana/in.purana.vayu.1.24.164) havyañca vedaṃ vahati vedoktaṃ havyavāhanaḥ. prīte tvayi mahādeva vayaṃ prītā bhavāmahe .. 24.161 .. ### [1.24.165](https://indike.org/pramana/in.purana.vayu.1.24.165) bhavānīśo nādimān dhāmarāśirbrahmama lokānāntvaṃ karttā tvādisargaḥ. sāṅkhyāḥ prakṛtibhyaḥ paramaṃ tvāṃ viditvā kṣīṇadhyānāste na mṛtyuṃ viśanti .. 24.162 .. ### [1.24.166](https://indike.org/pramana/in.purana.vayu.1.24.166) yogena tvāndhyānino nityayuktāḥ jñātvā bhogān santyajante punastān . ye'nye marttyāstvāṃ prapannā viśuddhāste karmabhirdivyabhogān bhajante .. 24.163 .. ### [1.24.167](https://indike.org/pramana/in.purana.vayu.1.24.167) aprameyasya tattvasya yathā vijhaḥ svaśaktitaḥ. kīrtitaṃ tava māhātmyamapāraṃ paramātmanaḥ. śivo no bhava sarvatra yo'si so'si namo'stu te .. 24.164 .. ### [1.24.168](https://indike.org/pramana/in.purana.vayu.1.24.168) iti śrīmahāpurāṇe vāyuprokte śārvastavaṃ nāma caturviṃśo'dhyāyaḥ .. 24 .. ## Linked texts (4) - [Liṅgapurāṇa](https://indike.org/pramana/in.purana.linga.1.20.5) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.9.24) — Vyāsa, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.9.p5) — Ativīrarāma Pāṇṭiyar, Sanskrit - [Vratakhaṇḍa](https://indike.org/pramana/in.niti.dharma.vrata.vratakhanda.107.18-2) — Hemādri, Sanskrit --- Source: [https://indike.org/pramana/in.purana.vayu.1.24](https://indike.org/pramana/in.purana.vayu.1.24) · Pramāṇa