[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.25 # Vayupurana 1.25: adhyāyaḥ 25 Vāyupurāṇa 1.25 - **Language:** Sanskrit ### adhyāyaḥ 25 ### [1.25.1](https://indike.org/pramana/in.purana.vayu.1.25.1) ..sūta uvāca.. ### [1.25.2](https://indike.org/pramana/in.purana.vayu.1.25.2) saṃpibanniva tau dṛṣṭvā madhupiṅgāyatekṣaṇaḥ . prahṛṣṭavadano'tyarthamabhavacca svakīrttanāt .. 25.1 .. ### [1.25.3](https://indike.org/pramana/in.purana.vayu.1.25.3) umāpatirvirūpākṣo dakṣayajñavināśanaḥ. pinākī khaṇḍaparaśurbhūtaprāntastrilocanaḥ .. 25.2 .. ### [1.25.4](https://indike.org/pramana/in.purana.vayu.1.25.4) tataḥ sa bhagavān devaḥ śrutvā vākyāmṛtaṃ tayoḥ. jānannapi mahābhāgaḥ prītapūrvamathābravīt .. 25.3 .. ### [1.25.5](https://indike.org/pramana/in.purana.vayu.1.25.5) kau bhavantau mahātmānau parasparahitaiṣiṇau. sametāvambujābhākṣau tasmin ghore jalaplave .. 25.4 .. ### [1.25.6](https://indike.org/pramana/in.purana.vayu.1.25.6) tāvūcatūrmahātmānau sannirīkṣya parasparam. bhagavan kiñca tathyena vijñātena tvayā vibho. kutra vā sukhamānantyamicchācāramṛte tvayā .. 25.5 .. ### [1.25.7](https://indike.org/pramana/in.purana.vayu.1.25.7) uvāca bhagavān devo madhuraślakṣṇayā girā. bho bho hiraṇyagarbha tvāṃ tvāṃ ca kṛṣṇa vadāmyaham .. 25.6 .. ### [1.25.8](https://indike.org/pramana/in.purana.vayu.1.25.8) prīto'hamanayā bhaktyā śāśvatākṣarayuktayā. bhavantau mānanīyau vai mama hyarhatarāvubhau. yuvābhyāṃ kiṃ dadāmyadya varāṇāṃ varamuttamam .. 25.7 .. ### [1.25.9](https://indike.org/pramana/in.purana.vayu.1.25.9) tenaivamukte vacane brahmāṇaṃ viṣṇurabravīt . brūhi brūhi mahābhāga varo yaste vivakṣitaḥ .. 25.8 .. ### [1.25.10](https://indike.org/pramana/in.purana.vayu.1.25.10) prajākāmo'smyahaṃ viṣṇo putramicchāmi dhūrvaham. tataḥ sa bhagavān brahmā verapsuḥ putralipsayā .. 25.9 .. ### [1.25.11](https://indike.org/pramana/in.purana.vayu.1.25.11) atha viṣṇuruvācedaṃ prajākāmaṃ prajāpatim. vīramapratimaṃ putraṃ yattvamicchasi dhūrvaham .. 25.10 .. ### [1.25.12](https://indike.org/pramana/in.purana.vayu.1.25.12) putratvenābhiyuṅkṣva tvaṃ devadevaṃ maheśvaram. satasya vākyaṃ saṃpūjya keśavasya pitāmahaḥ .. 25.11 .. ### [1.25.13](https://indike.org/pramana/in.purana.vayu.1.25.13) īśānaṃ varadaṃ rudramabhivādya kṛtāñjaliḥ . uvāca putrakāmastu vākyāni saha viṣṇunā .. 25.12 .. ### [1.25.14](https://indike.org/pramana/in.purana.vayu.1.25.14) yadi me bhagavān prītaḥ putrakāmasya nityaśaḥ. putro me bhava viśvātman svatulyo vāpi dhūrvvahaḥ. nānyaṃ varamahaṃ vavre prīte tvayi maheśvara .. 25.13 .. ### [1.25.15](https://indike.org/pramana/in.purana.vayu.1.25.15) tasya tāṃ prārthanāṃ śrutvā bhagavān bhaganetrahā. niṣkalmaṣamamāyañca bāḍhamityabravīdvacaḥ .. 25.14 .. ### [1.25.16](https://indike.org/pramana/in.purana.vayu.1.25.16) yadā kāryasamārambhe kasmiṃścittava suvrata. aniṣṇattau ca kāryasya krodhastvāṃ samupeṣyati. ātmaikādaśa ye rudrā vihitāḥ prāṇa hetavaḥ .. 25.15 .. ### [1.25.17](https://indike.org/pramana/in.purana.vayu.1.25.17) so'hamekādaśātmā vai śūlahastaḥ sahānugaḥ. ṛṣirmmitro mahātmā vai lalāṭādbhavitā tadā .. 25.16 .. ### [1.25.18](https://indike.org/pramana/in.purana.vayu.1.25.18) prasādamatulaṃ kṛtvā brahmaṇastādṛśaṃ purā. viṣṇuṃ punaruvācedaṃ dadāmi ca varantava .. 25.17 .. ### [1.25.19](https://indike.org/pramana/in.purana.vayu.1.25.19) sa hovāca mahābhāgo viṣṇurbhavamidaṃ vacaḥ. sarvvametat kṛtaṃ deva parituṣṭo'si me yadi. tvayi me supratiṣṭhā'stu bhaktirambudavāhana .. 25.18 .. ### [1.25.20](https://indike.org/pramana/in.purana.vayu.1.25.20) evamuktastato devastamabhāṣata keśavam. viṣṇo śrṛṇu yathā deva prīto'hantava śāśvata .. 25.19 .. ### [1.25.21](https://indike.org/pramana/in.purana.vayu.1.25.21) prakāśañcāprakāśañca jaṅgamaṃ sthāvarañca yat . viśvarūpamidaṃ sarvvaṃ rudranārāyaṇātmakam .. 25.20 .. ### [1.25.22](https://indike.org/pramana/in.purana.vayu.1.25.22) ahamagnirbhavān somo bhavān rātrirahaṃ dinam. bhavānṛtamahaṃ satyaṃ bhavān kraturahaṃ phalam .. 25.21 .. ### [1.25.23](https://indike.org/pramana/in.purana.vayu.1.25.23) bhavān jñānamahaṃ jñeyaṃ yajjapitvā sadā janāḥ . māṃ viśanti tvayi prīte janāḥ sukṛtakāriṇaḥ. āvābhyāṃ sahitā caiva gatirnānyā yugakṣaye .. 25.22 .. ### [1.25.24](https://indike.org/pramana/in.purana.vayu.1.25.24) ātmānaṃ prakṛtiṃ viddhi māṃ viddhi puruṣaṃ śivam. bhavānarddhaśarīraṃ me tvahantava yathaiva ca .. 25.23 .. ### [1.25.25](https://indike.org/pramana/in.purana.vayu.1.25.25) vāmapārśvamahammahyaṃ śyāmaṃ śrīvatsalakṣaṇam . tvañca vāmetaraṃ pārśvaṃ tvahaṃ vai nīlalohitaḥ .. 25.24 .. ### [1.25.26](https://indike.org/pramana/in.purana.vayu.1.25.26) tvañca me hvadayaṃ viṣṇo tava cāhaṃ hṛdi sthitaḥ. bhavān sarvvasya kāryasya karttāhamadhidaivatam .. 25.25 .. ### [1.25.27](https://indike.org/pramana/in.purana.vayu.1.25.27) tadehi svasti te vatsa gamiṣyāmyambudaprabha. evamuktvā gato viṣṇordevo'ntarddhānamīśvaraḥ .. 25.26 .. ### [1.25.28](https://indike.org/pramana/in.purana.vayu.1.25.28) tataḥ so'ntarhite deve saṃprahṛṣṭastadā punaḥ. aśeta śayane bhūpa praviśyāntarjale hariḥ .. 25.27 .. ### [1.25.29](https://indike.org/pramana/in.purana.vayu.1.25.29) taṃ padmaṃ padmagarbhābhaṃ padmākṣaḥ padmasambhavaḥ. samprahṛṣṭamanā brahmā bheje brāhmaṃ tadāsanam .. 25.28 .. ### [1.25.30](https://indike.org/pramana/in.purana.vayu.1.25.30) atha dīrghaṇa kālena tatrāpyapratimāvubhau. mahābalau mahāsattvau bhrātarau madhukaiṭabhau .. 25.29 .. ### [1.25.31](https://indike.org/pramana/in.purana.vayu.1.25.31) ūcatuśvaiva vacanaṃ bhakṣyo vai nau bhaviṣyasi . evamuktvā tu tau tasminnantarddhānaṃ gatāvubhau .. 25.30 .. ### [1.25.32](https://indike.org/pramana/in.purana.vayu.1.25.32) dāruṇantu tayorbhāvaṃ jñātvā puṣkarasambhavaḥ . māhātmyaṃ cātmano buddhvā vijñātumupacakrame .. 25.31 .. ### [1.25.33](https://indike.org/pramana/in.purana.vayu.1.25.33) karṇikāghaṭanaṃ bhūyo nābhyajānādyadā gatim. tataḥ sa padmanālena avatīryya rasātalam. kṛṣṇājinottarāsaṅgandadṛśe'ntarjale harim .. 25.32 .. ### [1.25.34](https://indike.org/pramana/in.purana.vayu.1.25.34) sa ca taṃ bodhayāmāsa vibuddhaṃ cedamabravīt . bhūtebhyo me bhayaṃ deva trāyasvottiṣṭha śaṅkuru .. 25.33 .. ### [1.25.35](https://indike.org/pramana/in.purana.vayu.1.25.35) tataḥ sa bhagavān viṣṇuḥ saprahāsamarindamaḥ. na bhetavyaṃ na bhetavyamityuvāca muniḥ svayam .. 25.34 .. ### [1.25.36](https://indike.org/pramana/in.purana.vayu.1.25.36) tasmātpūrvaṃ tvayā coktaṃ bhūtebhyo me mahadbhayam. tasmādbhūtādivākyaistau daityau tvaṃ nāśayiṣyasi .. 25.35 .. ### [1.25.37](https://indike.org/pramana/in.purana.vayu.1.25.37) bhūrbhūvaḥsvastato devaṃ viviśustamayonijam . tataḥ pradakṣiṇaṃ kṛtvā tamevāsīnamāgatam .. 25.36 .. ### [1.25.38](https://indike.org/pramana/in.purana.vayu.1.25.38) gate tasmiṃtato'nanta udgīrya bhrātarau mukhāt. viṣṇuṃ jiṣṇuñca provāca brahmāṇamabhirakṣatām. madhukaiṭabhayorjñātvā tayorāgamanaṃ punaḥ .. 25.37 .. ### [1.25.39](https://indike.org/pramana/in.purana.vayu.1.25.39) cakrāte rūpa sādṛśyaṃ viṣṇorjiṣṇośca sattamau. kṛtasādṛśyarūpau tau tāvevābhimukhau sthitau .. 25.38 .. ### [1.25.40](https://indike.org/pramana/in.purana.vayu.1.25.40) tatastau procaturddaityau brahmāṇaṃ dāruṇaṃ vacaḥ. asmākaṃ yudhyamānānāṃ madhye vai prāśniko bhava .. 25.39 .. ### [1.25.41](https://indike.org/pramana/in.purana.vayu.1.25.41) tatastau jalamāviśya saṃstambhyāpaḥ svamāyayā . cakratustumulaṃ yuddhaṃ yasya yenepsitaṃ tadā .. 25.40 .. ### [1.25.42](https://indike.org/pramana/in.purana.vayu.1.25.42) teṣāntu yudhyamānānāṃ divyaṃ varṣaśataṅgatam. na ca yuddhamadotseko hyanyonyaṃ saṃnyavarttata .. 25.41 .. ### [1.25.43](https://indike.org/pramana/in.purana.vayu.1.25.43) lakṣaṇadvayasaṃsthānādrūpavantau sthiteṅgitau. sādṛśyādvyākulamanā brahmā dhyānamupāgamat .. 25.42 .. ### [1.25.44](https://indike.org/pramana/in.purana.vayu.1.25.44) sa tayorantaraṃ buddhvā brahmā divyena cakṣuṣā. padmakesarajaṃ sūkṣmaṃ babandha kavacantayoḥ. āmekhalañca gātrañca tato mantramudāharat .. 25.43 .. ### [1.25.45](https://indike.org/pramana/in.purana.vayu.1.25.45) japatastvabhavatkanyā viśvarūpasamutthitā. padmenduvadanaprakhyā padmahastā śubhā satī. tāṃ dṛṣṭvā vyathitau daityau bhayādvarṇavivarjjitau .. 25.44 .. ### [1.25.46](https://indike.org/pramana/in.purana.vayu.1.25.46) tataḥ provāca tāṃ kanyāṃ brahmā madhurayā girā. kā'tra tvamavagantavyā brūhi satyamanindite .. 25.45 .. ### [1.25.47](https://indike.org/pramana/in.purana.vayu.1.25.47) sāmnā saṃpūjya sā kanyā brahmāṇaṃ prāñjalistadā . mohinīṃ viddhi māṃ māyāṃ viṣṇoḥ sandeśakāriṇīm .. 25.46 .. ### [1.25.48](https://indike.org/pramana/in.purana.vayu.1.25.48) tvayā saṅkīrttyamānā'haṃ brahman prāptā tvarāyutā. asyāḥ prītamanā brahmā gauṇaṃ nāma cakāra ha .. 25.47 .. ### [1.25.49](https://indike.org/pramana/in.purana.vayu.1.25.49) mayā ca vyāhṛtā yasmāttvañcaiva samupasthitā. mahāvyāhṛtirityeva nāma te vicariṣyati .. 25.48 .. ### [1.25.50](https://indike.org/pramana/in.purana.vayu.1.25.50) utthitā ca śiro bhittvā sāvitrī tena cocyate. ekānaṃśāttu yasmāttvamanekāṃśā bhaviṣyasi .. 25.49 .. ### [1.25.51](https://indike.org/pramana/in.purana.vayu.1.25.51) gauṇāni tāvadetāni karmajānyaparāṇi ca. nāmāni te bhaviṣyanti matprasādāt śubhānane .. 25.50 .. ### [1.25.52](https://indike.org/pramana/in.purana.vayu.1.25.52) tatastau pīḍyamānau tu varamenamayācatām. anāvṛtaṃ nau maraṇaṃ putratvañca bhavettava .. 25.51 .. ### [1.25.53](https://indike.org/pramana/in.purana.vayu.1.25.53) tathetyuktvā tatastūrṇamanayat yamasādanam. anayat kaiṭabhaṃ viṣṇurjiṣṇuścāpyanayanmadhum .. 25.52 .. ### [1.25.54](https://indike.org/pramana/in.purana.vayu.1.25.54) evantau nihatau daityau viṣṇunā jiṣṇunā saha. prītena brahmaṇā cātha lokānāṃ hitakāmyayā .. 25.53 .. ### [1.25.55](https://indike.org/pramana/in.purana.vayu.1.25.55) putratvamīśena yathā hyātmā datto nibodhata. viṣṇunā jiṣṇunā sārddhaṃ madhukaiṭabhayostathā. samparāye vyatikrānte brahmā viṣṇumabhāṣata .. 25.54 .. ### [1.25.56](https://indike.org/pramana/in.purana.vayu.1.25.56) adya varṣaśataṃ pūrṇaṃ samayaḥ pratyupasthitaḥ. saṃkṣepasaṃplavaṅghoraṃ svasthānaṃ yāmi cāpyaham .. 25.55 .. ### [1.25.57](https://indike.org/pramana/in.purana.vayu.1.25.57) sa tasya vacasā devaḥ saṃhāramakarottadā. mahīṃ nisthāvarāṃ kṛtvā prakṛtisthāṃśca jaṅgamān .. 25.56 .. ### [1.25.58](https://indike.org/pramana/in.purana.vayu.1.25.58) yadi govinda bhadrante kṣiptaste yādasāṃ patiḥ. brūhi yat karaṇīyaṃ syānmayā te lakṣmivarddhana .. 25.57 .. ### [1.25.59](https://indike.org/pramana/in.purana.vayu.1.25.59) bāḍhaṃ śrṛṇu hemābha padmayone vaco mama . prasādo yastvayā labdha īśvarāt putralipsayā .. 25.58 .. ### [1.25.60](https://indike.org/pramana/in.purana.vayu.1.25.60) tantathā saphalaṃ kṛtvā matto'bhūdanṛṇo bhavān. caturvidhāni bhūtāni sṛja tvaṃ visṛjasva vā .. 25.59 .. ### [1.25.61](https://indike.org/pramana/in.purana.vayu.1.25.61) avāpya saṃjñāṅgovindāt padmayoniḥ pitāmahaḥ. prajāḥ sraṣṭumanāstepe tapa ugraṃ tato mahat .. 25.60 .. ### [1.25.62](https://indike.org/pramana/in.purana.vayu.1.25.62) tasyaivantapyamānasya na kiñcitsamavarttata. tato dīrgheṇa kālena duḥkhāt krodho vyavarddhata .. 25.61 .. ### [1.25.63](https://indike.org/pramana/in.purana.vayu.1.25.63) sakrodhāviṣṭanetrabhyāmapatannaśrubindavaḥ . tatastebhyo'śrubindubhyo vātapittakaphātmakāḥ .. 25.62 .. ### [1.25.64](https://indike.org/pramana/in.purana.vayu.1.25.64) mahābhāgā mahāsattvāḥ svastikairabhyalaṅkṛtāḥ. prakīrṇakeśāḥ sarpāste prādurbhūtā mahāviṣāḥ .. 25.63 .. ### [1.25.65](https://indike.org/pramana/in.purana.vayu.1.25.65) sarpāṃstathāgrajān dṛṣṭvā brahmātmānamanindata. aho dhik tapasā mahyaṃ phalamīdṛśakaṃ yadi. lokavaināśikī jajñe ādāveva prajā mama .. 25.64 .. ### [1.25.66](https://indike.org/pramana/in.purana.vayu.1.25.66) tasya tīvrābhavanmūrcchā krodhāmarṣasamudbhavā. mūrcchābhitāpena tadā jahau prāṇān prajāpatiḥ .. 25.65 .. ### [1.25.67](https://indike.org/pramana/in.purana.vayu.1.25.67) tasyāpratimavīryasya dehāt kāruṇyapūrvakam. ātmaikādaśa te rudrāḥ prodbhūtā rudatastathā. rodanāt khalu rudrāste rudratvaṃ tena teṣu tat .. 25.66 .. ### [1.25.68](https://indike.org/pramana/in.purana.vayu.1.25.68) ye rudrāḥ khalu te prāṇā ye prāṇāste tadātmakāḥ. prāṇāḥ prāṇabhṛtāṃ jñeyāḥ sarvabhūteṣvavasthitāḥ .. 25.67 .. ### [1.25.69](https://indike.org/pramana/in.purana.vayu.1.25.69) atyugrasya mahattvasya sādhunā caritasya ca. tasya prāṇān dadau bhūyastriśūlī nīlalohitaḥ. lalāṭāt padmayonestu prabhurekādaśātmakaḥ .. 25.68 .. ### [1.25.70](https://indike.org/pramana/in.purana.vayu.1.25.70) brahmaṇaḥ so'dadāt prāṇānātmajaḥ sa tadā prabhuḥ. prahṛṣṭavadano rudraḥ kiṃcit pratyāgatāsavam. abhyabhāṣattadā devo brahmāṇaṃ paramaṃ vacaḥ .. 25.69 .. ### [1.25.71](https://indike.org/pramana/in.purana.vayu.1.25.71) upayācasva māṃ brahman smarttumarhasi cātmanaḥ. māṃ ca vetthātmajaṃ rudraṃ prasādaṃ kuru me prabho .. 25.70 .. ### [1.25.72](https://indike.org/pramana/in.purana.vayu.1.25.72) śrutvā tvidaṃ vacastasya prabhūtañca manogatam. pitāmahaḥ prasannātmā netre phullāmbujaprabhaiḥ .. 25.71 .. ### [1.25.73](https://indike.org/pramana/in.purana.vayu.1.25.73) tataḥ pratyāgataprāṇaḥ snigdhagambhīrayā girā. uvāca bhagavān brahmā śuddhajāmbūnadaprabhaḥ .. 25.72 .. ### [1.25.74](https://indike.org/pramana/in.purana.vayu.1.25.74) bho bho vada mahābhāga ānandayasi me manaḥ. ko bhavān viśvabhūtistvaṃ sthita ekādaśātmakaḥ .. 25.73 .. ### [1.25.75](https://indike.org/pramana/in.purana.vayu.1.25.75) evamukto bhagavatā brahmaṇā'nantatejasā. tataḥ pratyavadadrudro hyabhivādyātmajaiḥ saha .. 25.74 .. ### [1.25.76](https://indike.org/pramana/in.purana.vayu.1.25.76) yatte varamahaṃ brahman yācito viṣṇunā saha. putro me bhava deveti tvattulyo vāpi dhūrvahaḥ .. 25.75 .. ### [1.25.77](https://indike.org/pramana/in.purana.vayu.1.25.77) lokeṣu viśrutaiḥ kāryaṃ sarvairviśvātmasambhavaiḥ. viṣādantyaja deveśa lokāṃstvaṃ sraṣṭumarhasi .. 25.76 .. ### [1.25.78](https://indike.org/pramana/in.purana.vayu.1.25.78) evaṃ sa bhagavānukto brahmā prītamanābhavat . rudraṃ pratyavadadbhūyo lokānte nīlalohitam .. 25.77 .. ### [1.25.79](https://indike.org/pramana/in.purana.vayu.1.25.79) sāhāyyaṃ mama kāryārthaṃ prajāḥ sṛja mayā saha. bījī tvaṃ sarvabhūtānāṃ tatprapannastathā bhava. bāḍhamityeva tāṃ vāṇīṃ pratijagrāha śaṅkaraḥ .. 25.78 .. ### [1.25.80](https://indike.org/pramana/in.purana.vayu.1.25.80) tataḥ sa bhagavān brahmā kṛṣṇājinavibhūṣitaḥ. mano'gre so'sṛjaddevo bhūtānāṃ dhāraṇāṃ tataḥ. jihvāṃ sarasvatīñcaiva tatastāṃ viśvarūpiṇīm .. 25.79 .. ### [1.25.81](https://indike.org/pramana/in.purana.vayu.1.25.81) bhṛgumaṅgirasaṃ dakṣaṃ pulastyaṃ pulahaṃ kratum. vasiṣṭhañca mahātejāḥ sasṛje sapta mānasān .. 25.80 .. ### [1.25.82](https://indike.org/pramana/in.purana.vayu.1.25.82) putrānātmasamānanyān so'sṛjadviśvasambhavān . teṣāṃ bhūyo'numārgeṇa gāvo vakrādvijajñire .. 25.81 .. ### [1.25.83](https://indike.org/pramana/in.purana.vayu.1.25.83) oṅkārapramukhān vedānabhimānyāśca devatāḥ. evametān yatāproktān brahmā lokapitāmahaḥ .. 25.82 .. ### [1.25.84](https://indike.org/pramana/in.purana.vayu.1.25.84) dakṣādyān mānasān putrān provāca bhagavān prabhuḥ. prajāḥ sṛjata bhadraṃ vo rudreṇa saha dhīmatā .. 25.83 .. ### [1.25.85](https://indike.org/pramana/in.purana.vayu.1.25.85) anugamya mahātmānaṃ prajānāṃ patayastadā. vayamicchāmahe deva prajāḥ sraṣṭuṃ tvayā saha. brahmaṇastveṣa sandeśastava caiva maheśvara .. 25.84 .. ### [1.25.86](https://indike.org/pramana/in.purana.vayu.1.25.86) tairevamukto bhagavān rudraḥ provāca tān prabhuḥ. brahmaṇaścātmajā mahyaṃ prāṇān gṛhya ca vai surāḥ .. 25.85 .. ### [1.25.87](https://indike.org/pramana/in.purana.vayu.1.25.87) kṛtvāgrajāgrajānetān brāhmaṇānātmajānmama. brahmādistambaparyantān saptalokānmamātmakān. bhavantaḥ sraṣṭumarhanti vacanānmama svasti vaḥ .. 25.86 .. ### [1.25.88](https://indike.org/pramana/in.purana.vayu.1.25.88) tenaivamuktāḥ pratyūcuḥ rudramādyantriśūlinam. yathājñāpayase deva tathā tadvai bhaviṣyati .. 25.87 .. ### [1.25.89](https://indike.org/pramana/in.purana.vayu.1.25.89) anumānya mahādevaṃ prajānāṃ patayastadā. ūcurdakṣaṃ mahātmānaṃ bhavān śreṣṭhaḥ prajāpatiḥ. tvāṃ puraskṛtya bhadrante prajāḥ srakṣyāmahe vayam .. 25.88 .. ### [1.25.90](https://indike.org/pramana/in.purana.vayu.1.25.90) evamastviti vai dakṣaḥ pratyapadyata bhāṣitam. taiḥ saha sraṣṭumārebhe prajākāmaḥ prajāpatiḥ. sargasthite tataḥ sthāṇau brahmā sargamathāsṛjat .. 25.89 .. ### [1.25.91](https://indike.org/pramana/in.purana.vayu.1.25.91) athāsya saptame'tīte kalpe vai sambabhūvatuḥ. ṛbhuḥ sanatkumāraśca tapo lokanivāsinau. tatau maharṣīnanyān sa mānasānasṛjat prabhuḥ .. 25.90 .. ### [1.25.92](https://indike.org/pramana/in.purana.vayu.1.25.92) iti śrīmahāpurāṇe vāyuprokte madhukaiṭabhotpattivināśavarṇanaṃ nāma pañcaviṃśo' dhyāyaḥ .. 25 .. ## Linked texts (5) - [Liṅgapurāṇa](https://indike.org/pramana/in.purana.linga.1.22.1) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.10.18) — Vyāsa, Sanskrit - [Śivapurāṇa (complete text)](https://indike.org/pramana/in.purana.siva*complete.9.11-3.23) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.47.39) — Ativīrarāma Pāṇṭiyar 1500, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.10.p4) — Ativīrarāma Pāṇṭiyar, Sanskrit --- Source: [https://indike.org/pramana/in.purana.vayu.1.25](https://indike.org/pramana/in.purana.vayu.1.25) · Pramāṇa