[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.27 # Vayupurana 1.27: adhyāyaḥ 27 Vāyupurāṇa 1.27 - **Language:** Sanskrit ### adhyāyaḥ 27 ### [1.27.1](https://indike.org/pramana/in.purana.vayu.1.27.1) ..ṛṣayaḥ ūcuḥ.. ### [1.27.2](https://indike.org/pramana/in.purana.vayu.1.27.2) asmin kalpe tvayā coktaḥ prādurbhāvo mahātmanaḥ. mahādevasya rudrasya sādhakairmunibhiḥ saha .. 27.1 .. ### [1.27.3](https://indike.org/pramana/in.purana.vayu.1.27.3) ..sūta uvāca.. ### [1.27.4](https://indike.org/pramana/in.purana.vayu.1.27.4) utpattirādisargasya mayā prokta samāsataḥ. vistareṇāsya vakṣyāmi nāmāni tanubhiḥ saha .. 27.2 .. ### [1.27.5](https://indike.org/pramana/in.purana.vayu.1.27.5) patnīṣu janayāmāsa mahādevaḥ sutān bahūn. kalpe'ṣṭame vyatīte tu yasmin kalpe tu tacchṛṇu .. 27.3 .. ### [1.27.6](https://indike.org/pramana/in.purana.vayu.1.27.6) kalpādau cātmānastulyaṃ sutaṃ pradhyāyataḥ prabhoḥ. prādurāsīttatoṅke'sya kumāro nīlalohitaḥ. taṃ dadhe susvaraṃ ghoraṃ nirdahanniva tejasā .. 27.4 .. ### [1.27.7](https://indike.org/pramana/in.purana.vayu.1.27.7) dṛṣṭvā rudantaṃ sahasā kumāraṃ nīlalohitam. vka rodiṣi kumāreti brahmā taṃ pratyabhāṣata .. 27.5 .. ### [1.27.8](https://indike.org/pramana/in.purana.vayu.1.27.8) so'bravīddehi me nāma prathamaṃ vai pitāmaha. rudrastvaṃ deva nāmnāsi ityuktaḥ so'rudatpunaḥ .. 27.6 .. ### [1.27.9](https://indike.org/pramana/in.purana.vayu.1.27.9) kiṃ rodiṣīti taṃ brahmā rudantaṃ punarabravīt . nāma dehi dvitīyaṃ me ityuvāca svayambhuvam .. 27.7 .. ### [1.27.10](https://indike.org/pramana/in.purana.vayu.1.27.10) bhavastvaṃ deva nāmnāsi ṅtyuktaḥ so'rudatpunaḥ. kiṃ rodiṣīti taṃ brahmā pratyuvācātha śaṅkaram .. 27.8 .. ### [1.27.11](https://indike.org/pramana/in.purana.vayu.1.27.11) tṛtīyaṃ dehi me nāma ityuktaḥ pratyuvāca tam. śivastvaṃ deva nāmnāsi ityuktaḥ pratyuvāca tam. śivastvaṃ deva nāmnāsi ityuktaḥ so'rudatpunaḥ .. 27.9 .. ### [1.27.12](https://indike.org/pramana/in.purana.vayu.1.27.12) kiṃ rodiṣīti taṃ brahmā rudantaṃ punarabravīt. caturthaṃ dehi me nāma ityuvāca svayambhuvam .. 27.10 .. ### [1.27.13](https://indike.org/pramana/in.purana.vayu.1.27.13) paśūnāṃ tvaṃ patirdeva ityuktaḥ so'rudatpunaḥ. kiṃ rodiṣīti taṃ brahmā rudantaṃ punarabravīt .. 27.11 .. ### [1.27.14](https://indike.org/pramana/in.purana.vayu.1.27.14) pañcamaṃ dehi me nāma ityuktaḥ pratyuvāca tam. īśastvaṃ deva nāmnāsi ityuktaḥ so'rudatpunaḥ .. 27.12 .. ### [1.27.15](https://indike.org/pramana/in.purana.vayu.1.27.15) kiṃ rodiṣīti taṃ brahmā rudantaṃ punarabravīt. ṣaṣṭhaṃ me nāma dehīti ityuvācātha taṃ prabhum .. 27.13 .. ### [1.27.16](https://indike.org/pramana/in.purana.vayu.1.27.16) bhīmastvaṃ deva nāmnāsi ityuktaḥ so'rudatpunaḥ . kiṃ rodiṣīti taṃ brahmā rudantaṃ punarabravīt .. 27.14 .. ### [1.27.17](https://indike.org/pramana/in.purana.vayu.1.27.17) saptamaṃ dehi me nāma ityuktaḥ pratyuvāca tam. ugrastvaṃ deva nāmnāsi ityuktaḥ so'rudatpunaḥ .. 27.15 .. ### [1.27.18](https://indike.org/pramana/in.purana.vayu.1.27.18) kiṃ rodiṣīti taṃ brahmā rudantaṃ punarabravīt. aṣṭhamaṃ dehi me nāma tvaṃ vibho punarabravīt. mahādevastu nāmnāsi ityukto virarāma ha .. 27.16 .. ### [1.27.19](https://indike.org/pramana/in.purana.vayu.1.27.19) labdhvā nāmāni caitāni brahmaṇo nīlalohitaḥ. provāca nāmnāmeteṣāṃ bhūtāni pradiśeti ha .. 27.17 .. ### [1.27.20](https://indike.org/pramana/in.purana.vayu.1.27.20) tato'bhiśṛṣṭāstanava eṣāṃ nāmnāṃ svayambhuvā. sūryo mahī jalaṃ vahnirvāyurākāśameva ca .. 27.18 .. ### [1.27.21](https://indike.org/pramana/in.purana.vayu.1.27.21) dīkṣito brahmaṇaścandra ityete brahmadhātavaḥ. teṣu pūjyaśca vandyaḥ syādrudrastān hinasti vai .. 27.19 .. ### [1.27.22](https://indike.org/pramana/in.purana.vayu.1.27.22) tato'bravīt punarbrahmā taṃ devaṃ nīlalohitam . dvitīyaṃ nāmadheyante mayā proktaṃ bhaveti yat. etasyāpo dvitīyā te tanurnāmnā bhaviṣyati .. 27.20 .. ### [1.27.23](https://indike.org/pramana/in.purana.vayu.1.27.23) ityukte yat sthiraṃ tasya śarīrasthaṃ rasātmakam. tadviveśa tatastoyaṃ tasmādāpo bhavaḥ smṛtaḥ .. 27.21 .. ### [1.27.24](https://indike.org/pramana/in.purana.vayu.1.27.24) yasmādbhavanti bhūtāni tābhyastā bhāvayanti ca. bhavanādbhāvanāccaiva bhūtānāṃ sambhavaḥ smṛtaḥ .. 27.22 .. ### [1.27.25](https://indike.org/pramana/in.purana.vayu.1.27.25) tasmānmūtraṃ purīṣañca nāpsu kurvīta sarvadā. na snāyedapsu nagnaśca na niṣṭhīvet kadācana .. 27.23 .. ### [1.27.26](https://indike.org/pramana/in.purana.vayu.1.27.26) maithunaṃ naiva seveta śiraḥsnānañca varjayet. na prītaḥ paricakṣīta vahanna saṃsthito'pi vā .. 27.24 .. ### [1.27.27](https://indike.org/pramana/in.purana.vayu.1.27.27) medhyāmedhyaśarīratvānnaiva duṣyantyapaḥ kvacit . vivarṇarasagandhāśca alpāśca parivarjayet .. 27.25 .. ### [1.27.28](https://indike.org/pramana/in.purana.vayu.1.27.28) apāṃ yoniḥ samudraśca tasmāttaṃ kāmayanti tāḥ. medhyāścaivāmṛtāścaiva bhavanti prāpya sāgaram .. 27.26 .. ### [1.27.29](https://indike.org/pramana/in.purana.vayu.1.27.29) tasmādapo na rundhīta samudraṃ kāmayanti tāḥ. na hinasti bhavo devaḥ sadaivaṃ yo'psu varttate .. 27.27 .. ### [1.27.30](https://indike.org/pramana/in.purana.vayu.1.27.30) tato'bravīt punarbrahmā taṃ devaṃ kṛṣṇalohitam. śarvastvamiti yannāma tṛtīyaṃ samudāhṛtam. tasya bhūmistṛtīyā tu tanurnāmnā bhavatviyam .. 27.28 .. ### [1.27.31](https://indike.org/pramana/in.purana.vayu.1.27.31) ityukte yat sthiraṃ tasya śarīrasyāsthisaṃjñitam. tadviveśa tato bhūmistasmādbhūḥ śarva ucyate .. 27.29 .. ### [1.27.32](https://indike.org/pramana/in.purana.vayu.1.27.32) tasmāt kurvīta no vidvān purīṣammūtrameva vā. na cchāyāyāṃ na sopāne svacchāyāṃ nāpi mehayet .. 27.30 .. ### [1.27.33](https://indike.org/pramana/in.purana.vayu.1.27.33) śiraḥ prāpṛtya kurvīta antarddhāya tṛṇairmahīm. ya evaṃ varttate bhūmau taṃ śarvo na hinasti vai .. 27.31 .. ### [1.27.34](https://indike.org/pramana/in.purana.vayu.1.27.34) tato'bravītpunarbrahmā taṃ devaṃ nīlalohitam. īśāna iti yat‌proktaṃ caturthaṃ nāma te mayā .. 27.32 .. ### [1.27.35](https://indike.org/pramana/in.purana.vayu.1.27.35) caturthasya caturthī syādvāyurnāmnā tanustava. ityukte yaccharīrasthaṃ pañcadhā prāṇasaṃjñitam .. 27.33 .. ### [1.27.36](https://indike.org/pramana/in.purana.vayu.1.27.36) viveśa taṃ tadā vāyurīśāno vāyurucyate. tasmādenaṃ parivadedāyataṃ vāyumīśvaram. evaṃ yuktamatheśāno naiva devo hinasti tam .. 27.34 .. ### [1.27.37](https://indike.org/pramana/in.purana.vayu.1.27.37) tato'bravīt punarbrahmā taṃ devaṃ dhūmralohitam. yatte paśupatītyuktaṃ mayā nāmeha pañcamam. pañcamī pañcamasyaiva tanurnāmnā'gnirastu te .. 27.35 .. ### [1.27.38](https://indike.org/pramana/in.purana.vayu.1.27.38) ityukte yaccharīrasthaṃ tejastasyopasaṃjñitam. viveśa tattadā hyagnistasmātpaśupatiḥ patiḥ .. 27.36 .. ### [1.27.39](https://indike.org/pramana/in.purana.vayu.1.27.39) candramāstu smṛtaḥ somastasyātmā hyoṣadhīgaṇaḥ. evaṃ yo varttate vidvān sadā parvaṇi parvaṇi. na hanti taṃ mahādeva evaṃ vandeta taṃ prabhum .. 27.37 .. ### [1.27.40](https://indike.org/pramana/in.purana.vayu.1.27.40) gopāyati divādityaḥ prajā naktantu candramāḥ. ekarātre sameyātāṃ sūryyācandramasāvubhau. amāvāsyāniśāyāntu tasyāṃ yuktaḥ sadā vaset .. 27.38 .. ### [1.27.41](https://indike.org/pramana/in.purana.vayu.1.27.41) tatrāviṣṭaṃ sarvamidantanubhirnāmabhiḥ saha. ekākī yaścaratyeṣaḥ sūryyā'sau candra ucyate .. 27.39 .. ### [1.27.42](https://indike.org/pramana/in.purana.vayu.1.27.42) sūryyasya yat prakāśena vīkṣyante cakṣuṣā prajāḥ. śuklātmā saṃsthito rudraḥ pibatyambho gabhastibhiḥ .. 27.40 .. ### [1.27.43](https://indike.org/pramana/in.purana.vayu.1.27.43) adyate pīyate caivāpyannapānātmakāniyā. tanurātmabhavā sā vai deheṣvevopacīyate .. 27.41 .. ### [1.27.44](https://indike.org/pramana/in.purana.vayu.1.27.44) yayā dhatte prajāḥ sarvāḥ sthirībhūtena cetasā. pārthivī sā tanustasya śārvī dhārayati prajāḥ .. 27.42 .. ### [1.27.45](https://indike.org/pramana/in.purana.vayu.1.27.45) yāvat sthitā śarīreṣu bhūtānāṃ prāṇavṛttibhiḥ. vāyvātmikā tu aiśānī sā prāṇāḥ prāṇinā saha .. 27.43 .. ### [1.27.46](https://indike.org/pramana/in.purana.vayu.1.27.46) pītāśitāni pacati bhūtānāṃ jaṭhareṣu yā. tataḥ pāśupatī tasya pācikā śaktirucyate .. 27.44 .. ### [1.27.47](https://indike.org/pramana/in.purana.vayu.1.27.47) yānīha suṣirāṇi syurdeheṣvantargatāni vai. vāyoḥ sañcaraṇārthāya sā bhīmā cocyate tanuḥ .. 27.45 .. ### [1.27.48](https://indike.org/pramana/in.purana.vayu.1.27.48) vaitānadīkṣitānāṃ tu yā sthitirbrahmavādinām. tanurugrātmikā sā tu tenogro dīkṣitaḥ smṛtaḥ .. 27.46 .. ### [1.27.49](https://indike.org/pramana/in.purana.vayu.1.27.49) yattu saṅkalpakaṃ tasya prajāsviha samaṃ sthitam. sā tanurmmānasī tasya candramāḥ prāṇiṣu sthitaḥ .. 27.47 .. ### [1.27.50](https://indike.org/pramana/in.purana.vayu.1.27.50) navo navo bhavati hi jāyamānaḥ punaḥ punaḥ. nīyate yo yathākāmaṃ vibhudhaiḥ pitṛbhiḥ saha. mahādevo'mṛtātmā'sau hyammayaścandramāḥ smṛtaḥ .. 27.48 .. ### [1.27.51](https://indike.org/pramana/in.purana.vayu.1.27.51) tasya yā prathamā nāmnā tanū raudrī prakīrtitā. patnī suvarcalā tasya putrastasyāḥ śanaiścaraḥ .. 27.49 .. ### [1.27.52](https://indike.org/pramana/in.purana.vayu.1.27.52) bhavasya yā dvitīyā tu tanurāpaḥ smṛtā tu vai . tasyoṣā'tra smṛtā patnī putraścāpyuśanā smṛtaḥ .. 27.50 .. ### [1.27.53](https://indike.org/pramana/in.purana.vayu.1.27.53) śarvasya yā tṛtīyā tu nāma bhūmistanuḥ smṛtā. patnī tasya vikeśīti putraścāṅgārakaḥ smṛtaḥ .. 27.51 .. ### [1.27.54](https://indike.org/pramana/in.purana.vayu.1.27.54) īśānasya caturthasya svargatasya ca yā tanuḥ. tasya patnī śivā nāma putraścāsya manojavaḥ .. 27.52 .. ### [1.27.55](https://indike.org/pramana/in.purana.vayu.1.27.55) nāmnā paśupateryā tu tanuragnirdvijaiḥ smṛtā. tasya patnī smṛtā svāhā skandaścāpi sutaḥ smṛtaḥ .. 27.53 .. ### [1.27.56](https://indike.org/pramana/in.purana.vayu.1.27.56) nāmnā ṣaṣṭhasya yā bhīmā tanurākāśa ucyate. diśaḥ patnyaḥ smṛtāstasya svargaścāsya sutaḥ smṛtaḥ .. 27.54 .. ### [1.27.57](https://indike.org/pramana/in.purana.vayu.1.27.57) ugrā tanuḥ saptamī yā dīkṣitairbrāhmaṇaiḥ smṛtā. dīkṣā patnī smṛtā tasya santānaḥ putra ucyate .. 27.55 .. ### [1.27.58](https://indike.org/pramana/in.purana.vayu.1.27.58) nāmnā'ṣṭamasya mahatastanuryā candramāḥ smṛtaḥ. patnī tu rohiṇī tasya putraścāsya budhaḥ smṛtaḥ .. 27.56 .. ### [1.27.59](https://indike.org/pramana/in.purana.vayu.1.27.59) ityetāstanavastasya nāmabhiḥ parikīrtitāḥ. tāstu vandya namasyāśca pratināma tanūṣu vai .. 27.57 .. ### [1.27.60](https://indike.org/pramana/in.purana.vayu.1.27.60) bhakteḥ sūrye'psu pṛthivyāṃ vāyvagnivyomadīkṣite. tathā ca vai candramasi tanubhirnāmabhiḥ saha. prajāvāneti sāyujyamīśvarasya naro hi saḥ .. 27.58 .. ### [1.27.61](https://indike.org/pramana/in.purana.vayu.1.27.61) ityetadvo mayākhyātaṃ guhyaṃ bhīmasya tadyaśaḥ. śanno'stu dvipade nityaṃ śanno'stu ca catuṣpade .. 27.59 .. ### [1.27.62](https://indike.org/pramana/in.purana.vayu.1.27.62) etat proktaṃ nidānaṃ vastanūnāṃ nāmabhiḥ saha. mahādevasya devasya bhṛgostu śrṛṇuta prajāḥ .. 27.60 .. ### [1.27.63](https://indike.org/pramana/in.purana.vayu.1.27.63) iti śrīmahāpurāṇe vāyuprokte mahādevatanuvarṇanaṃ nāma saptaviśo'dhyāyaḥ .. 27 .. ## Linked texts (2) - [Brahmāṇḍapurāṇa](https://indike.org/pramana/in.purana.brahmanda.1.10.1) — Vyāsa, Sanskrit - [Mārkaṇḍeyapurāṇa](https://indike.org/pramana/in.purana.markandeya.52.2) — Vyāsa, Sanskrit --- Source: [https://indike.org/pramana/in.purana.vayu.1.27](https://indike.org/pramana/in.purana.vayu.1.27) · Pramāṇa