[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.29 # Vayupurana 1.29: adhyāyaḥ 29 Vāyupurāṇa 1.29 - **Language:** Sanskrit ### adhyāyaḥ 29 ### [1.29.1](https://indike.org/pramana/in.purana.vayu.1.29.1) yo'sāvagnirabhimānī hyāsīt svāyambhuve'ntare. brahmaṇo mānasaḥ putrastasmātsvāhā vyajāyata .. 29.1 .. ### [1.29.2](https://indike.org/pramana/in.purana.vayu.1.29.2) pāvakaḥ pavamānaśca pāvamānaśca yaḥ smṛtaḥ. śuciḥ śaurastu vijñeyaḥ svāhāputrāstrayastu te .. 29.2 .. ### [1.29.3](https://indike.org/pramana/in.purana.vayu.1.29.3) nirmmathya pavamānastu śuciḥ śaurastu yaḥ smṛtaḥ. pāvakā vaidyutāścaiva teṣāṃ sthānāni yāni vai .. 29.3 .. ### [1.29.4](https://indike.org/pramana/in.purana.vayu.1.29.4) pavamānātmajaścaiva kavyavāhana ucyate. pāvakāt saharakṣastu havyavāhaḥ śuceḥ sutaḥ .. 29.4 .. ### [1.29.5](https://indike.org/pramana/in.purana.vayu.1.29.5) devānāṃ havyavāho'gniḥ pitṝṇāṃ kavyavāhanaḥ. saharakṣo'surāṇāntu trayāṇāntu trayo'gnayaḥ .. 29.5 .. ### [1.29.6](https://indike.org/pramana/in.purana.vayu.1.29.6) eteṣāṃ putrapautrāstu catvāriṃśannavaiva tu. vakṣyāmi nāmatasteṣāṃ pravibhāgaṃ pṛthak pṛthak .. 29.6 .. ### [1.29.7](https://indike.org/pramana/in.purana.vayu.1.29.7) vaidyuto laukikāgnistu prathamo brahmaṇaḥ sutaḥ. brahmaudanāgnistatputro bharato nāma viśrutaḥ .. 29.7 .. ### [1.29.8](https://indike.org/pramana/in.purana.vayu.1.29.8) atharvā tu bhṛgurjñeyo'pyaṅgirā'tharvaṇaḥ sutaḥ. tasmāt sa laukikāgnistu dadhyaṅcātharvaṇaḥ sutaḥ .. 29.9 .. ### [1.29.9](https://indike.org/pramana/in.purana.vayu.1.29.9) atha yaḥ pavamāno'gnirnirmanthāḥ kavibhiḥ smṛtaḥ. sa jñeyo gārhapatyo'gnistataḥ putradvayaṃ smṛtam .. 29.10 .. ### [1.29.10](https://indike.org/pramana/in.purana.vayu.1.29.10) śaṃsyastvāhavanīyo'gniryaḥ smṛto havyavāhanaḥ. dvitīyastu sutaḥ proktaḥ śukro'gniryaḥ praṇīyate .. 29.11 .. ### [1.29.11](https://indike.org/pramana/in.purana.vayu.1.29.11) tathā sabhyāvasathyau vai śaṃsyasyāgneḥ sutāvubhau. śaṃsyāstu ṣoḍaśa nadīśvakame havyavāhanaḥ. yo'sāvāhavanīyo'gnirabhimānī dvijaiḥ smṛtaḥ .. 29.12 .. ### [1.29.12](https://indike.org/pramana/in.purana.vayu.1.29.12) kāverīṃ kṛṣṇaveṇīñca narmadāṃ yamunāntathā. godāvarīṃ vitastāñca candrabhāgāmirāvatīm .. 29.13 .. ### [1.29.13](https://indike.org/pramana/in.purana.vayu.1.29.13) vipāśāṃ kauśikīñcaiva śatadruṃ sarayūntathā. sītāṃ sarasvatīñcaiva hrādinīṃ pāvanīṃ tathā .. 29.14 .. ### [1.29.14](https://indike.org/pramana/in.purana.vayu.1.29.14) tāsu ṣoḍaśadhātmānaṃ pravibhajya pṛthak pṛthak . ātmānaṃ vyadadhāttāsu dhiṣṇīṣvatha babhūva saḥ .. 29.15 .. ### [1.29.15](https://indike.org/pramana/in.purana.vayu.1.29.15) dhiṣṇayo divyabhicāriṇyastāsūtpannāstu dhiṣṇayaḥ. dhiṣṇīṣu jajñire yasmāddhiṣṇayastena kīrttitāḥ .. 29.16 .. ### [1.29.16](https://indike.org/pramana/in.purana.vayu.1.29.16) ityete vai nadīputrā dhiṣṇīṣveva vijajñire. teṣāṃ viharaṇīyā ye upastheyāśca ye'gnayaḥ. tān śrṛṇudhvaṃ samāsena kīrtyamānān yathā tathā .. 29.17 .. ### [1.29.17](https://indike.org/pramana/in.purana.vayu.1.29.17) ṛtuḥ pravāhaṇo'gnīdhraḥ purastāddhiṣṇayo'paro. vidhīyante yathāsthānaṃ sautye'hni savanakramāt .. 29.18 .. ### [1.29.18](https://indike.org/pramana/in.purana.vayu.1.29.18) anirddeśyānyavācyānāmagnīnāṃ śrṛṇuta kramam. samrāḍagniḥ kṛśānuryo dvitīyottaravedikaḥ .. 29.19 .. ### [1.29.19](https://indike.org/pramana/in.purana.vayu.1.29.19) samrāḍagniḥ smṛtā hyaṣṭau upatiṣṭhanti tān dvijāḥ. adhastātparṣadanyastu dvitīyaḥ so'tra dṛśyate .. 29.20 .. ### [1.29.20](https://indike.org/pramana/in.purana.vayu.1.29.20) pratadvoce nabho nāma catvāri sa vibhāvyate. brahmajyotirvasurnāma brahmasthāne sa ucyate .. 29.21 .. ### [1.29.21](https://indike.org/pramana/in.purana.vayu.1.29.21) havyasūryyādyasaṃsṛṣṭaḥ śāmitre sa vibhāvyate. viśvasyātha samudrognirbrahmasthāne sa kīrttyate .. 29.22 .. ### [1.29.22](https://indike.org/pramana/in.purana.vayu.1.29.22) ṛtudhāmā ca sujyotiraudumbaryyāṃ sa kīrttyate. brahmajyotirvasurnāma brahmasthāne sa ucyate .. 29.23 .. ### [1.29.23](https://indike.org/pramana/in.purana.vayu.1.29.23) ajaikapādupastheyaḥ sa vai śālāmukhīyakaḥ. anuddeśyopyahirbudhnyaḥ so'gnirgṛhapatiḥ smṛtaḥ .. 29.24 .. ### [1.29.24](https://indike.org/pramana/in.purana.vayu.1.29.24) śaṃsyasyaiva sutāḥ sarvve upastheyā dvijaiḥ smṛtāḥ. tato viharaṇīyāṃśca vakṣyāmyaṣṭau tu tatsutān .. 29.25 .. ### [1.29.25](https://indike.org/pramana/in.purana.vayu.1.29.25) kratupravāhaṇo'gnīdhrastatrasthā dhiṣṇayo'pare. vihriyante yathāsthānaṃ sautyohni savanakramāt .. 29.26 .. ### [1.29.26](https://indike.org/pramana/in.purana.vayu.1.29.26) pautreyastu tato hyagniḥ smṛto yo havyavāhanaḥ. śāntisvāgniḥ pracetāstu dvitīyaḥ satya ucyate .. 29.27 .. ### [1.29.27](https://indike.org/pramana/in.purana.vayu.1.29.27) tathāgnirviśvadevastu brahmasthāne sa ucyate. avakṣuracchāvākastu bhuvaḥ sthāne vibhāvyate .. 29.28 .. ### [1.29.28](https://indike.org/pramana/in.purana.vayu.1.29.28) uśīrāgniḥ savīryastu neṣṭhīyaḥ saṃvibhāvyate. aṣṭamastu vyaratnistu mārjālīyaḥ prakīrttitaḥ .. 29.29 .. ### [1.29.29](https://indike.org/pramana/in.purana.vayu.1.29.29) dhiṣṇyā viharaṇīyā ye saumyenānyena caiva hi. tayoryaḥ pāvako nāma sa cāpāṃ garbha ucyate .. 29.30 .. ### [1.29.30](https://indike.org/pramana/in.purana.vayu.1.29.30) agniḥ so'vabhṛtho jñeyaḥ samyak prāpyāpsu hūyate. hṛcchayastatsuto hyagnirjaṭhare yo nṛṇāṃ sthitaḥ .. 29.31 .. ### [1.29.31](https://indike.org/pramana/in.purana.vayu.1.29.31) manyumān jāṭharasyāgnervidvānagniḥ sutaḥ smṛtaḥ. parasparocchritaḥ so'gnirbhūtānāṃ ha vibhurmahān .. 29.32 .. ### [1.29.32](https://indike.org/pramana/in.purana.vayu.1.29.32) putraḥ so'gnermanyumato ghoraḥ saṃvarttakaḥ smṛtaḥ . pibannapaḥ sa vasati samudre vaḍhavāmukhaḥ .. 29.33 .. ### [1.29.33](https://indike.org/pramana/in.purana.vayu.1.29.33) samudra vāsinaḥ putraḥ saharakṣo vibhāvyate. saharakṣasutaḥ kṣāmo gṛhāṇi sa dahennṝṇām .. 29.34 .. ### [1.29.34](https://indike.org/pramana/in.purana.vayu.1.29.34) kravyādo'gniḥ sutastasya puruṣānatti yo mṛtān . ityete pāvakasyāgneḥ putrā hyevaṃ prakīrtitāḥ .. 29.35 .. ### [1.29.35](https://indike.org/pramana/in.purana.vayu.1.29.35) tataḥ śucestu yaiḥ saurergandharvairasurāvṛtaiḥ. mathito yastvaraṇyāṃ vai so'gniragniḥ samidhyate .. 29.36 .. ### [1.29.36](https://indike.org/pramana/in.purana.vayu.1.29.36) āyurnāmātha bhagavān paśau yastu praṇīyate. āyuṣo mahimān putraḥ sa śāvānnāmataḥ sutaḥ .. 29.37 .. ### [1.29.37](https://indike.org/pramana/in.purana.vayu.1.29.37) pākayajñeṣvabhimānī so'gnistu savanaḥ smṛtaḥ. putraśca savanasyāgneradbhutaḥ sa mahāyaśāḥ .. 29.38 .. ### [1.29.38](https://indike.org/pramana/in.purana.vayu.1.29.38) vivicistvadbhutasyāpi putro'gneḥ sa mahān smṛtaḥ. prāyaścitte'tha bhīmānāṃ hutaṃ bhuhkte haviḥ sadā .. 29.39 .. ### [1.29.39](https://indike.org/pramana/in.purana.vayu.1.29.39) vivicestu suto hyarko yo'gnistasya sutāstvime. anīkavān vāsṛjavāṃśca rakṣohā pitṛkṛttathā. surabhirvasuratnādau praviṣṭo yaśca rukmavān .. 29.40 .. ### [1.29.40](https://indike.org/pramana/in.purana.vayu.1.29.40) śuceragneḥ prajā vahnayastu caturddaśa. ityete vahnayaḥ proktāḥ praṇīyante'dhvareṣu ye .. 29.41 .. ### [1.29.41](https://indike.org/pramana/in.purana.vayu.1.29.41) ādisarge hyatītā vai yāmaiḥ saha surottamaiḥ. svāyambhu ve'ntare pūrvamagnayaste'bhimāninaḥ .. 29.42 .. ### [1.29.42](https://indike.org/pramana/in.purana.vayu.1.29.42) ete viharaṇīyāstu cetanācetaneṣviha. sthānābhimānino loke prāgāsan havyavāhanāḥ .. 29.43 .. ### [1.29.43](https://indike.org/pramana/in.purana.vayu.1.29.43) kāmyanaimittikājasreṣvete karmasvavasthitāḥ. pūrvamanvantare'tīte śuklairyāmaiḥ sutaiḥ saha. devairmahātmabhiḥ puṇyaiḥ prathamasyāntare manoḥ .. 29.44 .. ### [1.29.44](https://indike.org/pramana/in.purana.vayu.1.29.44) ityetāni mayoktāni sthānāni sthāninaśca ha . taireva tu prasaṅkhyātamatītānāgateṣvapi .. 29.45 .. ### [1.29.45](https://indike.org/pramana/in.purana.vayu.1.29.45) manvantareṣu sarveṣu lakṣaṇaṃ jātavedasām. sarve tapasvino hyete sarve hyavabhṛthā stathā. prajānāṃ patayaḥ sarve jyotiṣmantaśca te smṛtāḥ .. 29.46 .. ### [1.29.46](https://indike.org/pramana/in.purana.vayu.1.29.46) svārociṣādiṣu jñeyāḥ sāvarṇyanteṣu saptasu. manvantareṣu sarveṣu nānārūpaprayojanaiḥ .. 29.47 .. ### [1.29.47](https://indike.org/pramana/in.purana.vayu.1.29.47) varttante varttamānaiśca devairiha sahāgnayaḥ. anāgataiḥ suraiḥ sārddhaṃ varttante'nāgatāgnayaḥ .. 29.48 .. ### [1.29.48](https://indike.org/pramana/in.purana.vayu.1.29.48) ityeṣa ninayo'gnīnāṃ mayā prokto yathātatham. vistareṇānupūrvyā ca pitṝṇāṃ vakṣyate tataḥ .. 29.49 .. ### [1.29.49](https://indike.org/pramana/in.purana.vayu.1.29.49) iti śrīmahāpurāṇe vāyuprokte agnivaṃśavarṇanaṃ nāmonatriṃśo'dhyāyaḥ .. 29 .. ## Linked texts (2) - [Brahmāṇḍapurāṇa](https://indike.org/pramana/in.purana.brahmanda.1.12.3) — Vyāsa, Sanskrit - [Matsyapurāṇa](https://indike.org/pramana/in.purana.matsya.51.12) — Vyāsa, Sanskrit --- Source: [https://indike.org/pramana/in.purana.vayu.1.29](https://indike.org/pramana/in.purana.vayu.1.29) · Pramāṇa