[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.33 # Vayupurana 1.33: adhyāyaḥ 33 Vāyupurāṇa 1.33 - **Language:** Sanskrit ### adhyāyaḥ 33 ### [1.33.1](https://indike.org/pramana/in.purana.vayu.1.33.1) ..sūta uvāca.. ### [1.33.2](https://indike.org/pramana/in.purana.vayu.1.33.2) manvantareṣu sarveṣu atītānāgateṣviha. tulyābhimāninaḥ sarve jāyante nāmarūpataḥ .. 33.1 .. ### [1.33.3](https://indike.org/pramana/in.purana.vayu.1.33.3) devāśca vividhā ye ca tasmin manvantare'dhipāḥ. ṛṣayo mānavāścaiva sarve tulyābhimāninaḥ .. 33.2 .. ### [1.33.4](https://indike.org/pramana/in.purana.vayu.1.33.4) maharṣisargaḥ prokto vai vaṃśaṃ svāyambhuvasya tu. vistareṇānupūrvyā ca kīrttyamānaṃ nibodhata .. 33.3 .. ### [1.33.5](https://indike.org/pramana/in.purana.vayu.1.33.5) manoḥ svāyambhuvasyāsan daśa pautrāstu tatsamāḥ. yairiyaṃ pṛthivī sarvā saptadvīpasamanvitā .. 33.4 .. ### [1.33.6](https://indike.org/pramana/in.purana.vayu.1.33.6) sasamudrākaravatī prativarṣanniveśitā. svāyambhuve'ntare pūrvamādye tretāyuge tadā .. 33.5 .. ### [1.33.7](https://indike.org/pramana/in.purana.vayu.1.33.7) priyavratasya putraistaiḥ pautraiḥ svāyambhuvasya tu. prajāsargatapoyogaistairiyaṃ viniveśitā .. 33.6 .. ### [1.33.8](https://indike.org/pramana/in.purana.vayu.1.33.8) priyavratāt prajāvantaḥ vīrāt kanyā vyajāyata. kanyā sā tu mahābhāgā karddamasya prajāpateḥ .. 33.7 .. ### [1.33.9](https://indike.org/pramana/in.purana.vayu.1.33.9) kanye dve śataputrāṃśca samrāṭ kukṣiśca te ubhe. taryorvai bhrātaraḥ śūrāḥ prajāpatisamā daśa .. 33.8 .. ### [1.33.10](https://indike.org/pramana/in.purana.vayu.1.33.10) agnīdhraścavapuṣmāṃśca medhā medhātithirvibhuḥ. jyotiṣmān dyutimān havyaḥ savanaḥ sarva eva ca .. 33.9 .. ### [1.33.11](https://indike.org/pramana/in.purana.vayu.1.33.11) priyavrato'bhiṣicyaitān sapta saptasu pārthivān. dvīpeṣu teṣu dharmeṇa dvīpāṃstāṃśca nibodhata .. 33.10 .. ### [1.33.12](https://indike.org/pramana/in.purana.vayu.1.33.12) jambūdvīpeśvaraṃ cakre agnīdhrantu mahābalam. plakṣadvīpeśvaraścāpi tena medhātithiḥ kṛtaḥ .. 33.11 .. ### [1.33.13](https://indike.org/pramana/in.purana.vayu.1.33.13) śālmalau tu vapuṣmantaṃ rājānamabhiṣiktavān. jyotiṣmantaṃ kuśadvīpe rājānaṃ kṛtavān prabhuḥ .. 33.12 .. ### [1.33.14](https://indike.org/pramana/in.purana.vayu.1.33.14) dyutimantañca rājānaṃ kraujcadvīpe samādiśat. śākadvīpeśvarañcāpi havyañcakre priyavrataḥ .. 33.13 .. ### [1.33.15](https://indike.org/pramana/in.purana.vayu.1.33.15) puṣkarādhipatiñcāpi savanaṃ kṛtavān prabhuḥ. puṣkare savanasyāpi mahāvītaḥ suto'bhavat. dhātakiścaiva dvāvetau putrau putravatāṃ varo .. 33.14 .. ### [1.33.16](https://indike.org/pramana/in.purana.vayu.1.33.16) mahāvītaṃ smṛtaṃ varṣaṃ tasya nāmnā mahātmanaḥ. nāmnā tu dhātakeścāpi dhātakīkhaṇḍa ucyate .. 33.15 .. ### [1.33.17](https://indike.org/pramana/in.purana.vayu.1.33.17) havyo vyajanayat putrān śākadvīpeśvarān prabhuḥ. jaladañca kumārañca sukumāraṃ maṇīcakam. vasumodaṃ sumodākaṃ saptamañca mahādrumam .. 33.16 .. ### [1.33.18](https://indike.org/pramana/in.purana.vayu.1.33.18) jaladaṃ jaladasyātha varṣaṃ prathamamucyate. kumārasya ca kaumāraṃ dvitīyaṃ parikīrtitam .. 33.17 .. ### [1.33.19](https://indike.org/pramana/in.purana.vayu.1.33.19) sukumāraṃ tṛtīyantu sukumārasya kīrtitam. maṇīcakasya caturthaṃ maṇīcakamihocyate .. 33.18 .. ### [1.33.20](https://indike.org/pramana/in.purana.vayu.1.33.20) vasumodasya vai varṣaṃ pañcamaṃ vasumodakam. modākasya tu modākaṃ varṣaṃ ṣaṣṭhaṃ prakīrtitam .. 33.19 .. ### [1.33.21](https://indike.org/pramana/in.purana.vayu.1.33.21) mahādrumasya nāmnā tu saptamantu mahādrumam. eṣāntu mānabhistāni saptavarṣāṇi tatra vai .. 33.20 .. ### [1.33.22](https://indike.org/pramana/in.purana.vayu.1.33.22) krauñcadvīpeśvarasyāpi putrā dyutimatastu vai. kuśalo manugaścoṣṇaḥ pīvaraścāndhakārakaḥ. muniśca dundubhiścaiva sutā dyutimatastu vai .. 33.21 .. ### [1.33.23](https://indike.org/pramana/in.purana.vayu.1.33.23) teṣāṃ svanāmabhirddeśāḥ krauñcadvīpāśrayāḥ śubhāḥ. uṣṇasyoṣṇaḥ smṛto deśaḥ pīvarasyāpi pīvaraḥ .. 33.22 .. ### [1.33.24](https://indike.org/pramana/in.purana.vayu.1.33.24) andhakārakadeśastu andhakāraśca kīrttyate. munestu munideśo vai dundubherdundubhiḥ smṛtaḥ. ete janapadāḥ sapta krauñcadvīpe tu bhāsvarāḥ .. 33.23 .. ### [1.33.25](https://indike.org/pramana/in.purana.vayu.1.33.25) jyotiṣmataḥ kuśadvīpe saptaite sumahaujasaḥ. udbhido veṇumāṃścaiva svairatho lavaṇo dhṛtiḥ. ṣaṣṭhaḥ prabhākaraścaiva saptamaḥ kapilaḥ smṛtaḥ .. 33.24 .. ### [1.33.26](https://indike.org/pramana/in.purana.vayu.1.33.26) udbhidaṃ prathamaṃ varṣaṃ dvitīyaṃ veṇumaṇḍalam. tṛtīyaṃ svairathākāraṃ caturthaṃ lavaṇaṃ smṛtam .. 33.25 .. ### [1.33.27](https://indike.org/pramana/in.purana.vayu.1.33.27) pañcamaṃ dhṛtimadvarṣaṃ ṣaṣṭhaṃ varṣaṃ prabhākaram. saptamaṃ kapilaṃ nāma kapilasya prakīrtitam .. 33.26 .. ### [1.33.28](https://indike.org/pramana/in.purana.vayu.1.33.28) teṣāṃ dvīpāḥ kuśadvīpe tatsanāmāna eva tu. āśramācārayuktābhiḥ prajābhiḥ samalaṃkṛtāḥ .. 33.27 .. ### [1.33.29](https://indike.org/pramana/in.purana.vayu.1.33.29) śālmalasyeśvarāḥ sapta putrāste tu vapuṣmataḥ. śvetaśca haritaścaiva jīmūto rohitastathā. vaidyuto mānasaścaiva suprabhaḥ saptamastathā .. 33.28 .. ### [1.33.30](https://indike.org/pramana/in.purana.vayu.1.33.30) śvetasya śvetadeśastu rohitasya ca rohitaḥ. jīmūtasya ca jīmūto haritasya ca hāritaḥ .. 33.29 .. ### [1.33.31](https://indike.org/pramana/in.purana.vayu.1.33.31) vaidyuto vaidyutasyāpi mānasasyāpi mānasaḥ. suprabhaḥ suprabhasyāpi saptaite deśapālakāḥ .. 33.30 .. ### [1.33.32](https://indike.org/pramana/in.purana.vayu.1.33.32) saptadvīpe tu vakṣyāmi jambūdvīpādanantaram. sapta medhātitheḥ putrāḥ plakṣadvīpeśvarā nṛpāḥ .. 33.31 .. ### [1.33.33](https://indike.org/pramana/in.purana.vayu.1.33.33) jyeṣṭhaḥ śāntabhayasteṣāṃ saptavarṣāṇi tāni vai. tasmācchāntabhayāccaiva śiśirastu sukhodayaḥ. ānandaśca dhruvaścaiva kṣemakaśca śivastathā .. 33.32 .. ### [1.33.34](https://indike.org/pramana/in.purana.vayu.1.33.34) tāni teṣāṃ sanāmāni saptavarṣāṇi bhāgaśaḥ. niveśitāni taistāni pūrve svāyambhuve'ntare .. 33.33 .. ### [1.33.35](https://indike.org/pramana/in.purana.vayu.1.33.35) medhātithestu putraistaiḥ saptadvīpanivāsibhiḥ. varṇāśramācārayuktāḥ plakṣadvīpe prajāḥ kṛtāḥ .. 33.34 .. ### [1.33.36](https://indike.org/pramana/in.purana.vayu.1.33.36) plakṣadvīpādikeṣveva śākadvīpāntareṣu vai. jñeyaḥ pañcasu dharmo vai varṇāśramavibhāgaśaḥ .. 33.35 .. ### [1.33.37](https://indike.org/pramana/in.purana.vayu.1.33.37) sukhamāyuśca rūpañca balaṃ dharmaśca nityaśaḥ. pañcasveteṣu dvīpeṣu sarvaṃ sādhāraṇaṃ smṛtam .. 33.36 .. ### [1.33.38](https://indike.org/pramana/in.purana.vayu.1.33.38) saptadvīpaparikrāntaṃ jambūdvīpaṃ nibodhata. āgnīdhraṃ jyeṣṭhadāyādaṃ kanyāputraṃ mahābalam. priyavrato'bhyaṣiñcattaṃ jambūdvīpeśvaraṃ nṛpam .. 33.37 .. ### [1.33.39](https://indike.org/pramana/in.purana.vayu.1.33.39) tasya putrā babhūvurhi prajāpatisamaujasaḥ. jyeṣṭho nābhi riti khyātastasya kimpuruṣo'nujaḥ .. 33.38 .. ### [1.33.40](https://indike.org/pramana/in.purana.vayu.1.33.40) harivarṣastṛtīyastu caturtho'bhūdilāvṛtaḥ. ramyaḥ syātpañcamaḥ putro harinmān ṣaṣṭha ucyate .. 33.39 .. ### [1.33.41](https://indike.org/pramana/in.purana.vayu.1.33.41) kurustu saptamasteṣāṃ bhadrāśvo hyaṣṭamaḥ smṛtaḥ. navamaḥ ketumālastu teṣāṃ deśānnibodhata .. 33.40 .. ### [1.33.42](https://indike.org/pramana/in.purana.vayu.1.33.42) nābhestu dakṣiṇaṃ varṣaṃ himādvantu pitā dadau . hema kūṭaṃ tu yadvarṣaṃ dadau kimpuruṣāya tat .. 33.41 .. ### [1.33.43](https://indike.org/pramana/in.purana.vayu.1.33.43) naiṣadhaṃ yat smṛtaṃ varṣaṃ harivarṣāya taddadau. madhyamaṃ yatsumerostu sa dadau tadilāvṛte .. 33.42 .. ### [1.33.44](https://indike.org/pramana/in.purana.vayu.1.33.44) nīlantu yat smṛtaṃ varṣaṃ ramyāyaitat pitā dadau . śvetaṃ yaduttaraṃ tasmāt pitrā dattaṃ harinmate .. 33.43 .. ### [1.33.45](https://indike.org/pramana/in.purana.vayu.1.33.45) yaduttaraṃ śrṛṅgavato varṣa tat kurave dadau . varṣaṃ mālyavata ścāpi bhadrāśvāya nyavedayat .. 33.44 .. ### [1.33.46](https://indike.org/pramana/in.purana.vayu.1.33.46) gandhamādanavarṣantu ketumāle nyavedayat. ityetāni mahāntīha navavarṣāṇi bhāgaśaḥ .. 33.45 .. ### [1.33.47](https://indike.org/pramana/in.purana.vayu.1.33.47) āgnīdhrasteṣu sarveṣu putrāṃstānabhyaṣiñcata. yathākramaṃ sa dharmātmā tatastu tapasi sthitaḥ .. 33.46 .. ### [1.33.48](https://indike.org/pramana/in.purana.vayu.1.33.48) ityetaiḥ sapbhiḥ kṛtsnāḥ saptadvīpā niveśitāḥ . priyavratasya putraistaiḥ pautraiḥ svāyambhuvasya tu .. 33.47 .. ### [1.33.49](https://indike.org/pramana/in.purana.vayu.1.33.49) yāni kimpuruṣādyāni varṣāṇyaṣṭau śubhāni tu. teṣāṃ svabhāvataḥ siddhiḥ sukhaprāyā hyayatnataḥ .. 33.48 .. ### [1.33.50](https://indike.org/pramana/in.purana.vayu.1.33.50) viparyayo na teṣvasti jarāmṛtyubhayaṃ na ca . dharmādharmau na teṣvāstāṃ nottamādhamamadhyamāḥ . na teṣvasti yugāvasthā kṣetreṣveva tu sarvaśaḥ .. 33.49 .. ### [1.33.51](https://indike.org/pramana/in.purana.vayu.1.33.51) nābherhi sargaṃ vakṣyāmi himāhve tannibodhata. nābhistvajanayat putraṃ meṟudevyāṃ mahādyutiḥ. ṛṣabhaṃ pārthivaśreṣṭhaṃ sarvakṣatrasya pūrvajam .. 33.50 .. ### [1.33.52](https://indike.org/pramana/in.purana.vayu.1.33.52) ṛṣabhādbharato jajñe vīraḥ putraśatāgrajaḥ. so'bhiṣicyātha bharataḥ putraṃ prāvrājyamāsthitaḥ .. 33.51 .. ### [1.33.53](https://indike.org/pramana/in.purana.vayu.1.33.53) himāhvaṃ dakṣiṇaṃ varṣaṃ bharatāya nyavedayat. tasmāttadbhārataṃ varṣaṃ tasya nāmnā vidurbudhāḥ .. 33.52 .. ### [1.33.54](https://indike.org/pramana/in.purana.vayu.1.33.54) bharatasyātmajo vidvān sumatirnāma dhārmikaḥ. babhūva tasmiṃstadrājyaṃ bharataḥ saṃnyayojayat. putra saṃkrāmitaśrīko vanaṃ rājā viveśa saḥ .. 33.53 .. ### [1.33.55](https://indike.org/pramana/in.purana.vayu.1.33.55) tejasastu sutaścāpi prajāpatiramitrajit. taijasasyātmajo vidvānindradyumna iti śrutaḥ .. 33.54 .. ### [1.33.56](https://indike.org/pramana/in.purana.vayu.1.33.56) parameṣṭhī sutaścātha nidhane tasya śobhanaḥ . pratīhārakule tasya nāmnā jajñe tadanvayāt. pratihartteti vikhyāto jajñe tasyāpi dhīmataḥ .. 33.55 .. ### [1.33.57](https://indike.org/pramana/in.purana.vayu.1.33.57) unnetā pratiharttustu bhuvastasya sutaḥ smṛtaḥ . udgīthastasya putro'bhūtpratāviścāpi tatsutaḥ .. 33.56 .. ### [1.33.58](https://indike.org/pramana/in.purana.vayu.1.33.58) pratāvestu vibhuḥ putraḥ pṛthustasya suto mataḥ . pṛthoścāpi suto nakto naktasyāpi gayaḥ smṛtaḥ .. 33.57 .. ### [1.33.59](https://indike.org/pramana/in.purana.vayu.1.33.59) gayasya tu naraḥ putro narasyāpi suto virāṭ. virāṭ‌suto mahāvīryo dīmāṃstasya suto'bhavat .. 33.58 .. ### [1.33.60](https://indike.org/pramana/in.purana.vayu.1.33.60) dhīmataśca mahān putro mahataścāpi bhauvanaḥ. bhauvanasya sutastvaṣṭā arijastasya cātmajaḥ .. 33.59 .. ### [1.33.61](https://indike.org/pramana/in.purana.vayu.1.33.61) arijasya rajaḥ putraḥ śatajidrajaso mataḥ. tasya putraśataṃ tvāsīdrājānaḥ sarva eva te .. 33.60 .. ### [1.33.62](https://indike.org/pramana/in.purana.vayu.1.33.62) viśvajyotiḥ pradhānāyaistairimā varddhitāḥ prajāḥ. tairidaṃ bhārataṃ varṣaṃ saptakhaṇḍaṃ kṛtaṃ purā .. 33.61 .. ### [1.33.63](https://indike.org/pramana/in.purana.vayu.1.33.63) teṣāṃ vaṃśaprakūtaistu bhukteyaṃ bhāratī dharā. kṛtatretādiyuktāni yugākhyānyekasaptatiḥ .. 33.62 .. ### [1.33.64](https://indike.org/pramana/in.purana.vayu.1.33.64) ye'tītāstairyugaiḥ sārddhaṃ rājānaste tadanvayāḥ. svāyambhuve'ntare pūrvaṃ śataśo'tha sahasraśaḥ .. 33.63 .. ### [1.33.65](https://indike.org/pramana/in.purana.vayu.1.33.65) eṣa svāyambhuvaḥ sargo yenedaṃ pūritaṃ jagat. ṛṣibhirdaivataiścāpi pitṛgandharvarākṣasaiḥ .. 33.64 .. ### [1.33.66](https://indike.org/pramana/in.purana.vayu.1.33.66) yakṣabhūtapiśācaiśca manuṣyamṛgapakṣibhiḥ . taiṣāṃ sṛṣṭiriyaṃ loke yugaiḥ saha vivarttate .. 33.65 .. ### [1.33.67](https://indike.org/pramana/in.purana.vayu.1.33.67) iti śrīmahāpurāṇe vāyuprokte svāyambhuva vaṃśānukīrttanaṃ nāma trayastriśo'dhyāyaḥ .. 33 ... ## Linked texts (6) - [Brahmāṇḍapurāṇa](https://indike.org/pramana/in.purana.brahmanda.1.14.1) — Vyāsa, Sanskrit - [Liṅgapurāṇa](https://indike.org/pramana/in.purana.linga.1.46.21) — Vyāsa, Sanskrit - [Mārkaṇḍeyapurāṇa](https://indike.org/pramana/in.purana.markandeya.53.12) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.38.13) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.1.14) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.52.21) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.vayu.1.33](https://indike.org/pramana/in.purana.vayu.1.33) · Pramāṇa