[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.35 # Vayupurana 1.35: adhyāyaḥ 35 Vāyupurāṇa 1.35 - **Language:** Sanskrit ### adhyāyaḥ 35 ### [1.35.1](https://indike.org/pramana/in.purana.vayu.1.35.1) .. sūta uvāca .. ### [1.35.2](https://indike.org/pramana/in.purana.vayu.1.35.2) yattadvai karṇikāmūlamiti vai samprakīrtitam. tadyojanasahasrāṇāṃ saptatīnāmadhaḥ smṛtam .. 35.1 .. ### [1.35.3](https://indike.org/pramana/in.purana.vayu.1.35.3) catvariṃśattathāṣṭau ca sahasrāṇyatra maṇḍalam. śailarājāvṛtaṃ ramyaṃ merumūlamiti śrutiḥ .. 35.2 .. ### [1.35.4](https://indike.org/pramana/in.purana.vayu.1.35.4) teṣāṃ girisahasrāṇāmanekeṣu mahocchritāḥ. dikṣu sarvāsu paryyantairmaryyādāḥ parvatāḥ smṛtāḥ .. 35.3 .. ### [1.35.5](https://indike.org/pramana/in.purana.vayu.1.35.5) nikuñjakandaranadīguhānirjharaśobhitāḥ. bahuprāsādakaṭakai staṭaiśca kusumojjvalaiḥ .. 35.4 .. ### [1.35.6](https://indike.org/pramana/in.purana.vayu.1.35.6) nitambapuṣpamālaughaiḥ sānubhirdhātumaṇḍitaiḥ . śikharairhemakapilairnaikaprasravaṇāvṛtaiḥ. śobhitā girayaḥ sarvve puṣṭai ratna samarpitaiḥ .. 35.5 .. ### [1.35.7](https://indike.org/pramana/in.purana.vayu.1.35.7) vihaṅgaśatasaṃjuṣṭaiḥ kuñjairanupamairapi. sihaśārdūlaśarabhairnaikaiścāmaravāraṇaiḥ. nānāvarṇākṛtidharaiḥ sevitā vividhairnagaiḥ .. 35.6 .. ### [1.35.8](https://indike.org/pramana/in.purana.vayu.1.35.8) saptāśca harikṛṣṇāṅgamekaikaṃ daśaparvatam. bāhyamābhyantarā ye tu trivāhāstu samāḥ smṛtāḥ .. 35.7 .. ### [1.35.9](https://indike.org/pramana/in.purana.vayu.1.35.9) jaṭharo devakūṭaśca pūrvasyāṃ diśi parvatau. tau dakṣiṇottarāyāmāvānīlaniṣadhāyatau .. 35.8 .. ### [1.35.10](https://indike.org/pramana/in.purana.vayu.1.35.10) kailāso himavāṃścaiva dakṣiṇottaraparvatau. pūrvapaścāyatāvetāvarṇavāntavyavasthitau .. 35.9 .. ### [1.35.11](https://indike.org/pramana/in.purana.vayu.1.35.11) yo'sau merurdvijaśreṣṭhāḥ prāṃśuḥ kanakaparvataḥ. viṣkambhaṃ tasya vakṣyāmi tanme nigadataḥ śrṛṇu .. 35.10 .. ### [1.35.12](https://indike.org/pramana/in.purana.vayu.1.35.12) mahāpādāstu catvāro meroratha caturddiśam. yairdhṛtatvānna calati saptadvīpavatī mahī .. 35.11 .. ### [1.35.13](https://indike.org/pramana/in.purana.vayu.1.35.13) daśayojanasāhasra āyāmasteṣu paṭhyate. devagandharvayakṣāṇāṃ nānāratnopaśobhitāḥ. naikanirjharavaprāḍhyā ramyakandaranirmitāḥ .. 35.12 .. ### [1.35.14](https://indike.org/pramana/in.purana.vayu.1.35.14) nitambapuṣpakādambaiḥ śobhitāścitrasānavaḥ. manaḥśilādarībhiśca haritālatalaistathā .. 35.13 .. ### [1.35.15](https://indike.org/pramana/in.purana.vayu.1.35.15) suvarṇamaṇicitrābhirguhābhiśca samantataḥ. śuddhahiṅgulakaprakhyaiḥ kāñcanairdhātumaṇḍitaiḥ .. 35.14 .. ### [1.35.16](https://indike.org/pramana/in.purana.vayu.1.35.16) varakāñcanacitraiśca pravālaiḥ samalaṃkṛtāḥ. rucirāḥ śataparvāṇaḥ siddhāvāsā mudānvitāḥ. mahāvimānaiḥ śrīmadbhiḥ samantātparidīpitāḥ .. 35.15 .. ### [1.35.17](https://indike.org/pramana/in.purana.vayu.1.35.17) pūrveṇa mandaro nāma dakṣiṇe gandhamādanaḥ. vipulaḥ paścime pārśve supārśvaścottare smṛtaḥ .. 35.16 .. ### [1.35.18](https://indike.org/pramana/in.purana.vayu.1.35.18) teṣāṃ sahasraśrṛṅgeṣu vajravaiḍhūryavedikāḥ. śākhāsahasrakalitāḥ sumūlāḥ supratiṣṭhitāḥ .. 35.17 .. ### [1.35.19](https://indike.org/pramana/in.purana.vayu.1.35.19) srigdhairnīlairghanaiḥ parṇaiḥ sañjhannavividhāśrayāḥ . anekaprajanotsedhā mahāpuṣpaphalopagāḥ .. 35.18 .. ### [1.35.20](https://indike.org/pramana/in.purana.vayu.1.35.20) yakṣagandharvasevyāśca sevitāḥ siddhacāraṇaiḥ. mahāvṛkṣāḥ samutpannāścatvāro dvīpaketavaḥ .. 35.19 .. ### [1.35.21](https://indike.org/pramana/in.purana.vayu.1.35.21) mandarasya gireḥśrṛṅge mahāvṛkṣaḥ sa keturāṭ. ālambaśākhāśikharaḥ kandaraścaiva pādapaḥ .. 35.20 .. ### [1.35.22](https://indike.org/pramana/in.purana.vayu.1.35.22) mahākumbhapramāṇaistu puṣpairvikacakesaraiḥ. mahāgandhairmanojñaiśca śobhitaḥ sarvakālajaiḥ .. 35.21 .. ### [1.35.23](https://indike.org/pramana/in.purana.vayu.1.35.23) sahasramadhikaṃ so'tha gandhenāpūrayaddiśaḥ. yojanānāṃ samantādvai mandamārutavījitaḥ .. 35.22 .. ### [1.35.24](https://indike.org/pramana/in.purana.vayu.1.35.24) varaketureva prathito bhadrāśvo nāma yo dvijāḥ. yatra sākṣāt hṛṣīkeśaḥ siddhasaṅghairmahīyate .. 35.23 .. ### [1.35.25](https://indike.org/pramana/in.purana.vayu.1.35.25) tasya rudrakadambasya tadā śvetaharo hariḥ . prāptavānaparaśreṣṭhaḥ sa tatra sahitaḥ purā .. 35.24 .. ### [1.35.26](https://indike.org/pramana/in.purana.vayu.1.35.26) tena cālokitaṃ sarvaṃ dvīpaṃ dvipadanāyakāḥ. yasya nāmnā samākhyāto bhadrāśvo nāma nāmataḥ .. 35.25 .. ### [1.35.27](https://indike.org/pramana/in.purana.vayu.1.35.27) dakṣiṇasyāpi śailasya śikhare devasevitā. jambūḥ sadā puṣpaphalā sadā mālyopaśobhitā .. 35.26 .. ### [1.35.28](https://indike.org/pramana/in.purana.vayu.1.35.28) mahāmūlairmahāskandhaiḥ snigdhavarṇairvibhūṣitā. navaiḥ sadā puṣpaphalaiḥ śākhābhiścopaśobhitā .. 35.27 .. ### [1.35.29](https://indike.org/pramana/in.purana.vayu.1.35.29) tasyā hyatipramāṇāni svādūni ca mṛdūni ca. phalānyamṛtakalpāni patanti girimūrddhani .. 35.28 .. ### [1.35.30](https://indike.org/pramana/in.purana.vayu.1.35.30) tasmādgirivaraprasthāt punaḥ prasyandavāhinī. nadī jambūnadī nāma pravṛttā madhuvāhinī .. 35.29 .. ### [1.35.31](https://indike.org/pramana/in.purana.vayu.1.35.31) tatra jāmbūnadannāma suvarṇaṃ jvalanaprabham. devālaṅkāramatulaṃ jāyate pāpanāśanam .. 35.30 .. ### [1.35.32](https://indike.org/pramana/in.purana.vayu.1.35.32) devadānavagandharvā yakṣarākṣasapannagāḥ. yat pibantyamṛtaprakhyaṃ madhu jāmbhūrasasravam .. 35.31 .. ### [1.35.33](https://indike.org/pramana/in.purana.vayu.1.35.33) sa keturdakṣiṇe dvīpe jambhūrlokeṣu viśrutā. yasyā nāmnā sa vikhyāto jambhūdvīpaḥ sanātanaḥ .. 35.32 .. ### [1.35.34](https://indike.org/pramana/in.purana.vayu.1.35.34) vipulasyāpi śailasya paścimasya mahātmanaḥ. jātaḥ śrṛṅge'tisumahānaśvattha ścaiva pādapaḥ .. 35.33 .. ### [1.35.35](https://indike.org/pramana/in.purana.vayu.1.35.35) vilambivaramālādyaḥ suvarṇamaṇivedikaḥ. mahoccaskandhaviṭapo naikasattvaguṇālayaḥ .. 35.34 .. ### [1.35.36](https://indike.org/pramana/in.purana.vayu.1.35.36) kumbhapramāṇaiḥ sukhadaiḥ phalaiḥ sarvarttukaiḥ śubhaiḥ. sa ketuḥ ketumālānāṃ devagandharvasevitaḥ .. 35.35 .. ### [1.35.37](https://indike.org/pramana/in.purana.vayu.1.35.37) ketumāleti ca yathā tasyā nāma prakīrtitam. tannibodhata viprendrā niruktaṃ nāma karmataḥ .. 35.36 .. ### [1.35.38](https://indike.org/pramana/in.purana.vayu.1.35.38) kṣīrodamathane vṛtte daityapakṣe parājite. mahāsamarasammardavṛkṣakṣobhavimarditā .. 35.37 .. ### [1.35.39](https://indike.org/pramana/in.purana.vayu.1.35.39) sahasrākṣeṇa vihitā mālā tasya sutānitā. tasya skandhe samāsaktyā hyaśvatthasya vanaspateḥ .. 35.38 .. ### [1.35.40](https://indike.org/pramana/in.purana.vayu.1.35.40) sā tathaiva mahāgandhā hyamlānā sarvakāmikī. ijyate sumahābhāgā vividhaiḥ siddhacāraṇaiḥ .. 35.39 .. ### [1.35.41](https://indike.org/pramana/in.purana.vayu.1.35.41) tasya ketoḥ sadā mālā devadattā virājate. pavaneneritā divyaṃ vāti gandhaṃ manoramam .. 35.40 .. ### [1.35.42](https://indike.org/pramana/in.purana.vayu.1.35.42) tābhyāṃ nāmāṅkito dvīpaḥ paścime bahuvistaraḥ. ketumāla iti khyāto divi ceha ca sarvaśaḥ .. 35.41 .. ### [1.35.43](https://indike.org/pramana/in.purana.vayu.1.35.43) svapārśvasyottare cāpi śrṛṅge jāto mahādrumaḥ . nyagrodho vipulaskandho'nekayojanamaṇḍalaḥ .. 35.42 .. ### [1.35.44](https://indike.org/pramana/in.purana.vayu.1.35.44) mālyadāmakalāpaiśca vividhairgandhaśālibhiḥ. śākāvilambī śuśubhe siddhacāraṇasevitaḥ .. 35.43 .. ### [1.35.45](https://indike.org/pramana/in.purana.vayu.1.35.45) pravālakumbhasadṛśairmadhupūrṇaiḥ phalaiḥ sadā. sa hyuttara kurūṇāntu ketuvṛkṣaḥ prakāśate .. 35.44 .. ### [1.35.46](https://indike.org/pramana/in.purana.vayu.1.35.46) sanatkumārāvarajā mānasā brahmaṇaḥ sutāḥ. sapta tatra mahābhāgāḥ kuravo nāma viśrutāḥ .. 35.45 .. ### [1.35.47](https://indike.org/pramana/in.purana.vayu.1.35.47) tatra tairāgatajñānaiḥ sattvasthaiḥ puṇyakīrtibhiḥ. akṣayaṃ kṣemamaparaṃ lokaṃ prāptaṃ sanātanam .. 35.46 .. ### [1.35.48](https://indike.org/pramana/in.purana.vayu.1.35.48) teṣāṃ nāmāṅkito dvīpaḥ saptānāṃ vai mahātmanām . divi ceha ca vikhyātā uttarāḥ kuravaḥ sadā .. 35.47 .. ### [1.35.49](https://indike.org/pramana/in.purana.vayu.1.35.49) iti śrīmahāpurāṇe vāyuprokte jambūdvīpavarṇanaṃ nāma pañcatriṃśo'dhyāyaḥ .. 35 .. ## Linked texts (10) - [Varāhapurāṇa](https://indike.org/pramana/in.purana.varaha.77.4) — Vyāsa, Sanskrit - [Liṅgapurāṇa](https://indike.org/pramana/in.purana.linga.1.49.21) — Vyāsa, Sanskrit - [Mārkaṇḍeyapurāṇa](https://indike.org/pramana/in.purana.markandeya.54.22) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.2.43) — Sanskrit - [Kūrmapurāṇa](https://indike.org/pramana/in.purana.kurma.1.43.15) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.55.21) — Ativīrarāma Pāṇṭiyar 1500, Sanskrit - [Caturvargacintāmaṇi](https://indike.org/pramana/in.niti.dharma.nibandha.mahanibandha.caturvargacintamani.18.p4) — Hemādri, Sanskrit - [Ṣoḍaśamahādānavidhi (Hemādri)](https://indike.org/pramana/in.niti.dharma.dana.mahadana.sodasamahadanavidhi-hemadri.18.p4) — Hemādri, Sanskrit - [Dānakhaṇḍa](https://indike.org/pramana/in.niti.dharma.nibandha.hemadri.danakhanda.20.p4) — Hemādri, Sanskrit - [Tīrthaprakāśa](https://indike.org/pramana/in.niti.dharma.tirtha.tirthaprakasa.4.p33) — Mitramiśra, Sanskrit --- Source: [https://indike.org/pramana/in.purana.vayu.1.35](https://indike.org/pramana/in.purana.vayu.1.35) · Pramāṇa