[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.37 # Vayupurana 1.37: adhyāyaḥ 37 Vāyupurāṇa 1.37 - **Language:** Sanskrit ### adhyāyaḥ 37 ### [1.37.1](https://indike.org/pramana/in.purana.vayu.1.37.1) ..sūta uvāca.. ### [1.37.2](https://indike.org/pramana/in.purana.vayu.1.37.2) śītāntasyācalendrasya kumuñjasyāntareṇa tu. droṇyo vihaṅgasaṅghuṣṭā nānāsattvaniṣevitāḥ .. 37.1 .. ### [1.37.3](https://indike.org/pramana/in.purana.vayu.1.37.3) triyojanaśatāyāmā vistīrṇāḥ śatayojanāḥ. surasāmalapānīyaramyaṃ tatra sarovaram .. 37.2 .. ### [1.37.4](https://indike.org/pramana/in.purana.vayu.1.37.4) droṇyāyāmapramāṇaistu puṇḍarīkaiḥ sugandhibhiḥ. sahasraśatapatrairhi mahāpadmairalaṃkṛtam .. 37.3 .. ### [1.37.5](https://indike.org/pramana/in.purana.vayu.1.37.5) mahoragairadhyuṣitaṃ mahābhogairdurāsadaiḥ. devadānavagandharvairupaspṛṣṭaṃ jalaṃ śubham .. 37.4 .. ### [1.37.6](https://indike.org/pramana/in.purana.vayu.1.37.6) puṇyaṃ tacchrīsaro nāma prakāśaṃ divi ceha ca. prasannajalasampūrṇaṃ śaraṇyaṃ sarvadehinām .. 37.5 .. ### [1.37.7](https://indike.org/pramana/in.purana.vayu.1.37.7) tatra tvekaṃ mahāpadmaṃ madhye padmavanasya ha. koṭipatrapracāraṃ tattaruṇādityavarcasam .. 37.6 .. ### [1.37.8](https://indike.org/pramana/in.purana.vayu.1.37.8) nityaṃ vyākośamajaraṃ cāñcalyāccātimaṇḍalam. cārukeśarajālāḍhyaṃ mattaṣaṭ‌padanāditam .. 37.7 .. ### [1.37.9](https://indike.org/pramana/in.purana.vayu.1.37.9) tasmin padme bhagavatī sākṣācchrīrnityameva hi. lakṣmyāḥ padmaṃ tadāvāsaṃ mūrttimatyā na saṃśayaḥ .. 37..8 .. ### [1.37.10](https://indike.org/pramana/in.purana.vayu.1.37.10) sarasastasya pūrvasmin tīre siddhaniṣevita. sadā puṣpaphalaṃ ramyaṃ tatra bilvavanaṃ mahat .. 37.9 .. ### [1.37.11](https://indike.org/pramana/in.purana.vayu.1.37.11) śatayojanavistīrṇaṃ triyojanaśatāya tam. ardhakrośoccaśikharairmahāvṛkṣaiḥ sahasraśaḥ .. 37.10 .. ### [1.37.12](https://indike.org/pramana/in.purana.vayu.1.37.12) śākhāsahasrakalitairmahāskandhaiḥ samākulam. phalaiḥ suvarṇasaṅkāśairharitaiḥ pāṇḍaraistathā .. 37.11 .. ### [1.37.13](https://indike.org/pramana/in.purana.vayu.1.37.13) amṛtasvādusadṛśairbherīmātraiḥ sugandhibhiḥ. śīryamāṇaiḥ patadbhiśca kīrṇā bhūmirnirantarā .. 37.12 .. ### [1.37.14](https://indike.org/pramana/in.purana.vayu.1.37.14) nāmnā tacchrīvanaṃ nāma sarvalokeṣu viśrutam. gandharvaiḥ kinnarairyakṣairmahānāgaiśca sevitam .. 37.13 .. ### [1.37.15](https://indike.org/pramana/in.purana.vayu.1.37.15) siddhaiścaiva samākīrṇaṃ nityaṃ bilvaphalāśibhiḥ. vividhairbhūtasaṅghaiśca nityameva niṣevitam .. 37.14 .. ### [1.37.16](https://indike.org/pramana/in.purana.vayu.1.37.16) tasmin vane bhagavatī sākṣācchrīrnityameva hi. devī sannihitā tatra siddhasaṅghairnamaskṛtā .. 37.15 .. ### [1.37.17](https://indike.org/pramana/in.purana.vayu.1.37.17) vikaṅkasyācalendrasya maṇiśailasya cāntare. śatayojanavistīrṇaṃ dviyojanaśatāyatam .. 37.16 .. ### [1.37.18](https://indike.org/pramana/in.purana.vayu.1.37.18) vipulañcampakavanaṃ siddhacāraṇasevitam. puṣpalakṣmyāvṛtaṃ bhāti jvalantamiva nityadā .. 37.17 .. ### [1.37.19](https://indike.org/pramana/in.purana.vayu.1.37.19) arddhakrośoccaśikharairmahāskandhaiḥ palāśibhiḥ . praphullaśākhāśikharaiḥ piñjaraṃ bhāti tadvanam .. 37.18 .. ### [1.37.20](https://indike.org/pramana/in.purana.vayu.1.37.20) dvibāhupariṇāhaistaistrihastāyāmavistaraiḥ . manaḥ śilācūrṇanibhaiḥ pāṇḍukesaraśālibhiḥ .. 37.19 .. ### [1.37.21](https://indike.org/pramana/in.purana.vayu.1.37.21) puṣpairmanoharairvyāptaṃ vyākośairgandhaśālibhiḥ. virājate vanaṃ sarvaṃ mattabhramaranāditam .. 37.20 .. ### [1.37.22](https://indike.org/pramana/in.purana.vayu.1.37.22) tadvanaṃ dānavairdevagandharvairyakṣarākṣasaiḥ. kinnarairapsarobhiśca mahānāgaiśca sevitam .. 37.21 .. ### [1.37.23](https://indike.org/pramana/in.purana.vayu.1.37.23) tatrāśramaṃ bhagavataḥ kaśyapasya prajāpateḥ. siddhasādhyagaṇā kīrṇaṃ nānāśrutivibhūṣitam. mahānīlakumuñjābhyāmantarepyacalāvatha .. 37.22 .. ### [1.37.24](https://indike.org/pramana/in.purana.vayu.1.37.24) mahānadyāḥ sukhāyāstu tīre siddhaniṣevite. pañcāśadyojanāyāmaṃ triṃśadyojanavistaram. ramyaṃ tālavanaṃ taddhi arddhakrośoccamastakam .. 37.23 .. ### [1.37.25](https://indike.org/pramana/in.purana.vayu.1.37.25) mahāmūlairmahāsāraiḥ sthirairaviralaiḥ śubhaiḥ. kumudāñjanasaṃsthānaiḥ parivṛttairmahā phalaiḥ. mṛṣṭagandharasopetairupetaṃ siddhasevitam .. 37.24 .. ### [1.37.26](https://indike.org/pramana/in.purana.vayu.1.37.26) māhendrasya dvipendrasya tatra vāsa udāhṛtaḥ. airāvatasya bhadrasya sarvalokeṣu viśrutaḥ .. 37.25 .. ### [1.37.27](https://indike.org/pramana/in.purana.vayu.1.37.27) veṇumantasya śailasya sumedhasyottareṇa ca. sahasrayojanāyāmaṃ vistīrṇaṃ śatayojanam .. 37.26 .. ### [1.37.28](https://indike.org/pramana/in.purana.vayu.1.37.28) vṛkṣagulmalatāgucchaiḥ sarvavīrudbhirīritam. dūrvāprastāramevātha sarvasatvavivarjitam .. 37.27 .. ### [1.37.29](https://indike.org/pramana/in.purana.vayu.1.37.29) tathā niṣadhaśailasya devaśailasya cottare. sahasrayojanāyāmā śatayojanavistṛtā .. 37.28 .. ### [1.37.30](https://indike.org/pramana/in.purana.vayu.1.37.30) savāṃhyekaśilā bhūmirvṛkṣavīrudvivarjitā. āplutā pādamātreṇa hyudakena samantataḥ .. 37.29 .. ### [1.37.31](https://indike.org/pramana/in.purana.vayu.1.37.31) ityetā hyantaradroṇyo nānākārāḥ prakīrttitāḥ. meroḥ pūrveṇa viprendrā yathāvadanupūrvaśaḥ .. 37.30 .. ### [1.37.32](https://indike.org/pramana/in.purana.vayu.1.37.32) iti śrīmahāpurāṇe vāyuprokte bhuvanavinyāso nāma saptatriṃśo'dhyāyaḥ .. 37 .. ## Linked texts (2) - [Varāhapurāṇa](https://indike.org/pramana/in.purana.varaha.79.5) — Vyāsa, Sanskrit - [Prakriyāpāda](https://indike.org/pramana/in.purana.prakriyapada.37.1) — Sanskrit --- Source: [https://indike.org/pramana/in.purana.vayu.1.37](https://indike.org/pramana/in.purana.vayu.1.37) · Pramāṇa