[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.39 # Vayupurana 1.39: adhyāyaḥ 39 Vāyupurāṇa 1.39 - **Language:** Sanskrit ### adhyāyaḥ 39 ### [1.39.1](https://indike.org/pramana/in.purana.vayu.1.39.1) ..sūta uvāca.. ### [1.39.2](https://indike.org/pramana/in.purana.vayu.1.39.2) ataḥ paraṃ pravakṣyāmi yasmin yasmin śiloccaye. ye sanniviṣṭā devānāṃ vividhānāṃ gṛhottamāḥ .. 39.1 .. ### [1.39.3](https://indike.org/pramana/in.purana.vayu.1.39.3) tatra yo'sau mahāśailaḥ śītānto naika vistaraḥ. naikadhātuśataiścitrairnaikaratnākarākaraḥ .. 39.2 .. ### [1.39.4](https://indike.org/pramana/in.purana.vayu.1.39.4) nitambaiḥ puṣpasālambairnaikasattvaguṇālayaḥ. mahārhamaṇicitrābhirhemavaṃśairalaṃkṛtaḥ .. 39.3 .. ### [1.39.5](https://indike.org/pramana/in.purana.vayu.1.39.5) nitambaiḥ ṣaṭpadodgītaiḥ pravālairhemacitrakaiḥ. taṭaiḥ kusumasaṅkīrṇairmattabhramaranāditaiḥ .. 39.4 .. ### [1.39.6](https://indike.org/pramana/in.purana.vayu.1.39.6) latālambaiścitravadbhiścitrairdhātuśatārcitaiḥ. sānubhī ratnacitraiśca puṣpāḍhyaiśca vibhūṣitaḥ .. 39.5 .. ### [1.39.7](https://indike.org/pramana/in.purana.vayu.1.39.7) vimalasvādupānīyairnaikaprasravamairyutaḥ. nikuñjaiḥ kusumotkīrṇairanekaiśca vibhūṣitaḥ .. 39.6 .. ### [1.39.8](https://indike.org/pramana/in.purana.vayu.1.39.8) puṣmauḍupavahābhiśca sravantībhiralaṃkṛtaḥ. kinnarācaritābhiśca darībhiḥ sarvatastataḥ .. 39.7 .. ### [1.39.9](https://indike.org/pramana/in.purana.vayu.1.39.9) yakṣagandharvacaritairanekaiḥ kandarodaraiḥ. śobhitaśca sukhāsevyaiścitrairgahanasaṅkaṭaiḥ .. 39.8 .. ### [1.39.10](https://indike.org/pramana/in.purana.vayu.1.39.10) nānāsatvagaṇākīrṇaiḥ supānīyaiḥ sukhāśrayaiḥ. nānāpuṣpaphalopetaiḥ pādapaiḥ samalaṃkṛtaḥ .. 39.9 . tasmin guhāśrayākīrṇe anekodarakandare. krīḍāvanaṃ mahendrasya sarvakāmaguṇairyutam .. 39.10 .. ### [1.39.11](https://indike.org/pramana/in.purana.vayu.1.39.11) tatra taddevarājasya pārijātavanaṃ mahat. prakāśaṃ triṣu lokeṣu gīyate śrutiniścayāt .. 39.11 .. ### [1.39.12](https://indike.org/pramana/in.purana.vayu.1.39.12) taruṇādityasaṃkāśai rmahāgandhairmanoharaiḥ. puṣpairbhāti nagaśreṣṭhaḥ sudīpta iva sarvaśaḥ .. 39.12 .. ### [1.39.13](https://indike.org/pramana/in.purana.vayu.1.39.13) samagraṃ yojanaśataṃ taṃ gandhamanilo vavau. pārijātakapuṣmāṇāṃ māhendra vananirgataḥ .. 39.13 .. ### [1.39.14](https://indike.org/pramana/in.purana.vayu.1.39.14) vaiḍhūryanīlaiḥ kamalaiḥ sauvarṇairvajrakesaraiḥ. sarvagandhabalopetairmattaṣaṭpadanāditaiḥ .. 39.14 .. ### [1.39.15](https://indike.org/pramana/in.purana.vayu.1.39.15) vyākośaurvikacaiścāpi śatapatrairmanoharaiḥ. sapaṅkajairmahā patrairvāpyastatra vibhūṣitāḥ .. 39.15 .. ### [1.39.16](https://indike.org/pramana/in.purana.vayu.1.39.16) virejurantarambusthāḥ sauvarṇamaṇibhūṣitāḥ. paripsandekṣaṇā nityaṃ mīnayūthāḥ sahasraśaḥ .. 39.16 .. ### [1.39.17](https://indike.org/pramana/in.purana.vayu.1.39.17) kūrmaiścānekasaṃsthānairhemaratnapariṣkṛtaiḥ. cañcūryamāṇaiḥ salilairbhāti citraṃ samantataḥ .. 39.17 .. ### [1.39.18](https://indike.org/pramana/in.purana.vayu.1.39.18) nānāvarṇaiśca śakhunairnānāratnatanūruhaiḥ. suvarṇapuṣpaiścānekairmaṇituṇḍairdvijātibhiḥ .. 39.18 .. ### [1.39.19](https://indike.org/pramana/in.purana.vayu.1.39.19) valgusvaraiḥ sadonmattaiḥ sampatadbhiḥ samantataḥ. śuśubhe tadvanaṃ ramyaṃ sahasrākṣasya dhīmataḥ .. 39.19 .. ### [1.39.20](https://indike.org/pramana/in.purana.vayu.1.39.20) mattabhramarasannādairvihaṅgānāñca kūjitaiḥ. nityamā nanditavanaṃ tasmāt krīḍāvanaṃ mahat .. 39.20 .. ### [1.39.21](https://indike.org/pramana/in.purana.vayu.1.39.21) suvarṇapārśvaiśca nagairmaṇimuktāpuraskṛtaiḥ. maṇiśrṛṅgakalāpannaiḥ patadbhiśca samantataḥ .. 39.21 .. ### [1.39.22](https://indike.org/pramana/in.purana.vayu.1.39.22) śākhāmṛgaiśca citrāṅgairnānāratnatanūruhaiḥ. nānāvarṇaprakāraiśca satvairanyaiḥ samākulam .. 39.22 .. ### [1.39.23](https://indike.org/pramana/in.purana.vayu.1.39.23) muñcanti puṣpavarṣañca tatra bālalatā drumāḥ. pārijātakapuṣpāṇāṃ mandamāruta kampitāḥ .. 39.23 .. ### [1.39.24](https://indike.org/pramana/in.purana.vayu.1.39.24) śayanāsananirvyūhaiḥ stīrṇai ratnavibhūṣitaiḥ. vihārabhūmayastatra dvijāḥ śakravane śubhāḥ. na ca śīto na cāpyuṣṇo ravistatra samaḥ sadā .. 39.24 .. ### [1.39.25](https://indike.org/pramana/in.purana.vayu.1.39.25) nityamunmādajanano madhumādhavasambhavaḥ. vāti cāpyanilastatra nānāpuṣpādhivāsitaḥ. nityaṃ saṅgasukhāhlādī śramaklamavināśanaḥ .. 39.25 .. ### [1.39.26](https://indike.org/pramana/in.purana.vayu.1.39.26) tasminnindravane śubhre devadānavapannagāḥ. yakṣarākṣasaguhyāśca gandharvāścāmitaujasaḥ .. 39.26 .. ### [1.39.27](https://indike.org/pramana/in.purana.vayu.1.39.27) vidyādharāśca siddhāśca kinnarāśca mudā yutāḥ. athāpsarogaṇāścaiva nityaṃ krīḍāparāyaṇāḥ .. 39.27 .. ### [1.39.28](https://indike.org/pramana/in.purana.vayu.1.39.28) tasya parvatarājasya pūrve pārśve mahocitam. kumuñcaṃ śailarājānaṃ naikanirjharakandaram .. 39.28 .. ### [1.39.29](https://indike.org/pramana/in.purana.vayu.1.39.29) tasya dhātuvicitreṣu kūṭeṣu bahuvistarāḥ. aṣṭau puryo hyudīrṇāśca dānavānāṃ mahātmanām .. 39.29 .. ### [1.39.30](https://indike.org/pramana/in.purana.vayu.1.39.30) vajrake parvate cāpi anekaśikharodaraiḥ. udīrṇā rākṣasāvāsā naranārīsamākulāḥ .. 39.30 .. ### [1.39.31](https://indike.org/pramana/in.purana.vayu.1.39.31) nīlakā nāma te ghorā rākṣasāḥ kāmarūpiṇaḥ. tatra te'bhiratā nityaṃ mahābalaparākramāḥ .. 39.31 .. ### [1.39.32](https://indike.org/pramana/in.purana.vayu.1.39.32) mahānīle'pi śailendre purāṇi daśa pañca ca. hayānanānāṃ vikhyātāḥ kinnarāṇāṃ mahātmanām .. 39.32 .. ### [1.39.33](https://indike.org/pramana/in.purana.vayu.1.39.33) devaseno mahābāhurbalamindrādayastathā. tatra kinnararājāno daśapañca ca garvitāḥ .. 39.33 .. ### [1.39.34](https://indike.org/pramana/in.purana.vayu.1.39.34) suvarṇapārśvāḥ prāyeṇa nānāparṇasamākulaiḥ. bilapraveśairnagaraiḥ śailendraḥ so'bhyalaṃkṛtaḥ .. 39.34 .. ### [1.39.35](https://indike.org/pramana/in.purana.vayu.1.39.35) atidāruṇā dṛṣṭiviṣā hyagnikopā durāsadāḥ. mahoragaśatāstatra suvarṇavaśavartinaḥ .. 39.35 .. ### [1.39.36](https://indike.org/pramana/in.purana.vayu.1.39.36) sunāge'pi mahāśaile daityāvāsā- sahasraśaḥ. harmyaprāsāda kalilāḥ prāṃśuprākāratoraṇāḥ .. 39.36 .. ### [1.39.37](https://indike.org/pramana/in.purana.vayu.1.39.37) veṇumante mahāśaile vidyādharapuratrayam. triṃśadadyojanavistīrṇaṃ pañcāśadyojanāyatam .. 39.37 .. ### [1.39.38](https://indike.org/pramana/in.purana.vayu.1.39.38) ulūko romaśaścaiva mahānetraśca vīryavān. vidyādharavarāstatra śakratulyaparākramāḥ .. 39.38 .. ### [1.39.39](https://indike.org/pramana/in.purana.vayu.1.39.39) vaikaṅke śailaśikhare hyantaḥkandaranirjhare. mahoccaśrṛṅge rucire ratnadhātuvicitrite .. 39.39 .. ### [1.39.40](https://indike.org/pramana/in.purana.vayu.1.39.40) tatrāste gāruḍirnityaṃ uragārirdurāsadaḥ. mahāvāyujavaścaṇḍaḥ sugrīvo nāma vīryavān .. 39.40 .. ### [1.39.41](https://indike.org/pramana/in.purana.vayu.1.39.41) mahāpramāṇai rvikrāntairmahābalaparākramaiḥ. saśailo hyāvṛtaḥ sarvaḥ pakṣibhiḥ pannagāribhiḥ .. 39.41 .. ### [1.39.42](https://indike.org/pramana/in.purana.vayu.1.39.42) karañje'bhirato nityaṃ sākṣādbhūtapatiḥ prabhuḥ. vṛṣabhāṅko mahādevaḥ śaṅkaro yogināṃ prabhuḥ .. 39.42 .. ### [1.39.43](https://indike.org/pramana/in.purana.vayu.1.39.43) nānāveṣadharairbhūtaiḥ pramathaiśca durāsadaiḥ. karañje sānavaḥ sarve hyavakīrṇāḥ samantataḥ .. 39.43 .. ### [1.39.44](https://indike.org/pramana/in.purana.vayu.1.39.44) vasudhāre vasumatāṃ vasūnāmamitaujasām. aṣṭāvāyatanānyāhuḥ pūjitāni mahātmanām .. 39.44 .. ### [1.39.45](https://indike.org/pramana/in.purana.vayu.1.39.45) ratnadhātau girivare ṛṣīṇāñca mahātmanām. saptāśramāṇi puṇyāni siddhāvāsayutāni ca .. 39.45 .. ### [1.39.46](https://indike.org/pramana/in.purana.vayu.1.39.46) mahāprajāpateḥ sthānaṃ hemaśrṛṅgo nagottame. caturvaktrasya devasya sarvabhūtanamaskṛtam .. 30.46 .. ### [1.39.47](https://indike.org/pramana/in.purana.vayu.1.39.47) gajaśaile bhagavato nānābhūtagaṇāvṛtāḥ . rudrāḥ pramuditā nityaṃ sarvabhūtanamaskṛtāḥ .. 39.47 .. ### [1.39.48](https://indike.org/pramana/in.purana.vayu.1.39.48) sumedhe dhātucitrāḍhye śailendre meghasannibhe. naikodaradarīvapranikuñjaiścopaśobhite .. 39.48 .. ### [1.39.49](https://indike.org/pramana/in.purana.vayu.1.39.49) ādityānāṃ vasūnāñca rudrāṇāñcāmitaujasām. tatrāyatanavinyāsā ramyāścaivāśvinorapi .. 39.49 .. ### [1.39.50](https://indike.org/pramana/in.purana.vayu.1.39.50) sthānāni siddhairdevānāṃ sthāpitāni nagottame. tatra pūjāparā nityaṃ yakṣa gandharvakinnarāḥ .. 39.50 .. ### [1.39.51](https://indike.org/pramana/in.purana.vayu.1.39.51) gandharvanagarī sphītā hemakakṣe nagottame. aśītyāmarapuryyābhā mahāprākāratoraṇā .. 39.51 .. ### [1.39.52](https://indike.org/pramana/in.purana.vayu.1.39.52) siddhā hyapattanā nāma gandharvā yuddha śālinaḥ. yeṣāmadhipatirdevo rājarājaḥ kapiñjalaḥ .. 39.52 .. ### [1.39.53](https://indike.org/pramana/in.purana.vayu.1.39.53) anale rākṣasāvāsāḥ pañcakūṭe'pi dānavāḥ. ūrjitā devaripavo mahābalaparākramāḥ .. 39.53 .. ### [1.39.54](https://indike.org/pramana/in.purana.vayu.1.39.54) śataśrṛṅge puraśataṃ yakṣāṇāmamitaujasām. tāmrābhe kādraveyasya takṣakasya purottamam .. 39.54 .. ### [1.39.55](https://indike.org/pramana/in.purana.vayu.1.39.55) viśākhe parvataśreṣṭhe naikavapradarīśubhe. guhāniratavāsasya guhasyāyatanaṃ mahat .. 39.55 .. ### [1.39.56](https://indike.org/pramana/in.purana.vayu.1.39.56) śvetodare mahāśaile mahābhavanamaṇḍite. puraṃ garuḍhaputrasya sunābhasya mahātmanaḥ .. 39.56 .. ### [1.39.57](https://indike.org/pramana/in.purana.vayu.1.39.57) piśācake girivare harmyaṃ prāsāda maṇḍitam. yakṣagandharvacaritaṃ kuberabhavanaṃ mahat .. 30.57 .. ### [1.39.58](https://indike.org/pramana/in.purana.vayu.1.39.58) harikūṭe harirdevaḥ sarvabhūtanamaskṛtaḥ. prabhāvāttasya śailo'sau mahānābhaḥ prakāśate .. 39.58 .. ### [1.39.59](https://indike.org/pramana/in.purana.vayu.1.39.59) kumude kinnarāvāsā añjane ca mahoragāḥ. kṛṣṇe gandharvvanagarā mahābhavanaśālinaḥ .. 39.59 .. ### [1.39.60](https://indike.org/pramana/in.purana.vayu.1.39.60) pāṇḍure cāruśikhare mahāprākāratoraṇe. vidyādharapuraṃ tatra mahābhavanamālinam .. 39.60 .. ### [1.39.61](https://indike.org/pramana/in.purana.vayu.1.39.61) sahasraśikhare śaile daityānāmugrakarmmaṇām. purāṇi samudīrṇānāṃ sahasraṃ hemamālinām .. 39.61 .. ### [1.39.62](https://indike.org/pramana/in.purana.vayu.1.39.62) mukuṭe pannagāvāsā anekāḥ parvatottamāḥ. puṣpake vai munigaṇā nityameva mudā yutāḥ .. 39.62 .. ### [1.39.63](https://indike.org/pramana/in.purana.vayu.1.39.63) vaivasvatasya somasya vāyornāgādhipasya ca. supakṣe parvatavare catvāryyāyatanāni ca .. 39.63 .. ### [1.39.64](https://indike.org/pramana/in.purana.vayu.1.39.64) gandharvaiḥ kinnarairyakṣairnnāgairvidyādharottamaiḥ. siddhairhi teṣu sthāneṣu nityamiṣṭaḥ prapūjyate .. 39.64 .. ### [1.39.65](https://indike.org/pramana/in.purana.vayu.1.39.65) iti śrīmahā purāṇe vāyuprokte bhuvanavinyāso nāmaikonacatvāriṃśo'dhyāyaḥ .. 39 .. ## Linked texts (6) - [Varāhapurāṇa](https://indike.org/pramana/in.purana.varaha.81.5) — Vyāsa, Sanskrit - [Liṅgapurāṇa](https://indike.org/pramana/in.purana.linga.1.50.10) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.46.12) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.56.10) — Ativīrarāma Pāṇṭiyar 1500, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.12.36) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.12.36) — Basava, Sanskrit --- Source: [https://indike.org/pramana/in.purana.vayu.1.39](https://indike.org/pramana/in.purana.vayu.1.39) · Pramāṇa