[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.42 # Vayupurana 1.42: adhyāyaḥ 42 Vāyupurāṇa 1.42 - **Language:** Sanskrit ### adhyāyaḥ 42 ### [1.42.1](https://indike.org/pramana/in.purana.vayu.1.42.1) ..sūta uvāca.. ### [1.42.2](https://indike.org/pramana/in.purana.vayu.1.42.2) sarovarebhyaḥ puṇyodā deva nadyo vinirgatāḥ. mahaughatoyā nadyaśca tāḥ śrṛṇudhvaṃ yathākramam .. 42.1 .. ### [1.42.3](https://indike.org/pramana/in.purana.vayu.1.42.3) ākāśāmbhonidheryo'sau soma ityabhidhīyate. ādhāraḥ sarvabhūtānāṃ devānāmamṛtākaraḥ .. 42.2 .. ### [1.42.4](https://indike.org/pramana/in.purana.vayu.1.42.4) tasmāt pravṛttā puṇyodā nadī hyākāśagāminī. saptamenānilapathā prayātā vimalodakā .. 42.3 .. ### [1.42.5](https://indike.org/pramana/in.purana.vayu.1.42.5) sā jyotiṣi nivartantī jyotirgaṇaniṣevitā. tārākojisahasrāṇāṃ nabhasaśca samāyatā .. 42.4 .. ### [1.42.6](https://indike.org/pramana/in.purana.vayu.1.42.6) māhendreṇa gajendreṇa ākāśapathayāyinā. krīḍitā hyantaratale yā sā vikṣobhitodakā .. 42.5 .. ### [1.42.7](https://indike.org/pramana/in.purana.vayu.1.42.7) naikairvimānasaṅghātaiḥ prakrāmadbhirnabhastalam. siddhairupaspṛṣṭajalā mahāpuṇyajalā śivā .. 42.6 .. ### [1.42.8](https://indike.org/pramana/in.purana.vayu.1.42.8) vāyunā preryamāṇā ca anekābhogagāminī. parivarttatyaharaharyathā sūryastathaiva sā .. 42.7 .. ### [1.42.9](https://indike.org/pramana/in.purana.vayu.1.42.9) catvāryaśītiḥ pratatā yojanānāṃ samantataḥ. vegena kurvatī meruṃ sā prayātā pradakṣiṇam .. 42.8 .. ### [1.42.10](https://indike.org/pramana/in.purana.vayu.1.42.10) vibhidyamānā salilaistaijasenānilena ca. meroruttarakūṭeṣu patitātha caturṣvapi .. 42.9 .. ### [1.42.11](https://indike.org/pramana/in.purana.vayu.1.42.11) merukūṭataṭāntebhya utkṛṣṭebhyo nivartitā. vikīryamāṇa salilā caturddhāsaṃsṛtodakā .. 42.10 .. ### [1.42.12](https://indike.org/pramana/in.purana.vayu.1.42.12) ṣaṣṭiyojanasāhasraṃ nirālambanamambaram. nipapāta mahābhāga merostasya caturddiśam .. 42.11 .. ### [1.42.13](https://indike.org/pramana/in.purana.vayu.1.42.13) sā caturṣvabhitaścaiva mahāpādeṣu śobhanā. puṇyā mandarapūrveṇa patitā hi mahānadī .. 42.12 .. ### [1.42.14](https://indike.org/pramana/in.purana.vayu.1.42.14) pūrveṇāṃśena devānāṃ sarvasiddhagaṇālayam. suvarṇacitrakaṭakaṃ naikanirjharakandaram .. 42.13 .. ### [1.42.15](https://indike.org/pramana/in.purana.vayu.1.42.15) plāvayantī saśailendraṃ mandarañcārukandaram. vaprapratāpaśamanairanekaiḥ sphāṭikodakaiḥ .. 42.14 .. ### [1.42.16](https://indike.org/pramana/in.purana.vayu.1.42.16) tathā caitrarathaṃ ramyaṃ plāvayantī pradakṣiṇam. praviṣṭā hyambaranadī hyaruṇodasarovaram .. 42.15 .. ### [1.42.17](https://indike.org/pramana/in.purana.vayu.1.42.17) aruṇodānnivṛttā'tha śītānte ramyanirjhare. śaile siddhagaṇāvāse nipapāta sugāminī .. 42.16 .. ### [1.42.18](https://indike.org/pramana/in.purana.vayu.1.42.18) sītā nāma mahā puṇyā nadīnāṃ pravarā nadī. sā nikuñjaniruddhā tu anekābhogagāminī .. 42.17 .. ### [1.42.19](https://indike.org/pramana/in.purana.vayu.1.42.19) śītāntāśikharādbhraṣṭā sukuñje varaparvate. nipapāta mahābhāgā tasmādapi sumañjasam .. 42.18 .. ### [1.42.20](https://indike.org/pramana/in.purana.vayu.1.42.20) tasmānmālyavataṃ śailaṃ bhāvayantī varāpagā. vaikaṅkaṃ samanuprāptā vaikaṅkānmaṇiparvatam. maṇiparvatānmahāśailaṃ ṛṣabhaṃ naikakandaram .. 42.19 .. ### [1.42.21](https://indike.org/pramana/in.purana.vayu.1.42.21) evaṃ śailasahasrāṇi dārayantī mahānadī. patitā'tha mahāśaile jaṭhare siddhasevite .. 42.20 .. ### [1.42.22](https://indike.org/pramana/in.purana.vayu.1.42.22) tasmādapi mahāśailaṃ devakūṭaṃ taraṅgiṇī. tasya kukṣisamudrāntā krameṇa pṛthivīṃ gatā .. 42.21 .. ### [1.42.23](https://indike.org/pramana/in.purana.vayu.1.42.23) saivaṃ sthalīsahasrāṇi śailarājaśatāni ca. vanāni ca vicitrāṇi sarāṃsi vividhāni ca .. 42.22 .. ### [1.42.24](https://indike.org/pramana/in.purana.vayu.1.42.24) srāvayantī mahābhāgā visphāreṣvavalīkadā. nadī sahasrānugatā pravṛttā ca mahānadī .. 42.23 .. ### [1.42.25](https://indike.org/pramana/in.purana.vayu.1.42.25) bhadrāśvaṃ sumahādvīpaṃ plāvayantī varāpagā. praviṣṭā hyarṇavaṃ pūrvaṃ pūrve dvīpe mahānadī .. 42.24 .. ### [1.42.26](https://indike.org/pramana/in.purana.vayu.1.42.26) dakṣiṇe'pi prapannā yā śailendre gandhamādane. citraiḥ prapātairvidhairnaikavisphālitodakā .. 42.25 .. ### [1.42.27](https://indike.org/pramana/in.purana.vayu.1.42.27) tadghandhamādanavanaṃ nandanaṃ devanandanam. plāvayantī mahābhāgā prayātā sā pradakṣiṇam .. 42.26 .. ### [1.42.28](https://indike.org/pramana/in.purana.vayu.1.42.28) nāmnā hyalakanandeti sarvalokeṣu viśrutā. praviśatyuttarasaro mānasaṃ devamānasam .. 42.27 .. ### [1.42.29](https://indike.org/pramana/in.purana.vayu.1.42.29) mānasācchailarājānaṃ ramyaṃ triśikharaṃ gatā. trikūṭācchailaśikharāt kaliṅgaśikharaṃ gatā .. 42.28 .. ### [1.42.30](https://indike.org/pramana/in.purana.vayu.1.42.30) kaliṅgaśikharādbhraṣṭā rucake nipapāta sā. rucakānniṣadhaṃ prāptā tāmrābhaṃ niṣadhādapi .. 42.29 .. ### [1.42.31](https://indike.org/pramana/in.purana.vayu.1.42.31) tāmrābhaśikharārdbhraṣṭā gatā śvetodaraṃ girim . tasmātsumūlaṃ śailendraṃ vasudhārañca parvatam .. 42.30 .. ### [1.42.32](https://indike.org/pramana/in.purana.vayu.1.42.32) hemakūṭaṃ gatā tasmāddevaśrṛṅge tato gatā. tasmādgatā mahāśailaṃ tataścāpi piśācakam .. 42.31 .. ### [1.42.33](https://indike.org/pramana/in.purana.vayu.1.42.33) piśācakācchailavarāt pañcakūṭaṅgatā punaḥ. pañcakūṭāttu kailāsaṃ devāvāsaṃ śiloccayam .. 42.32 .. ### [1.42.34](https://indike.org/pramana/in.purana.vayu.1.42.34) tasya kukṣiṣu vibhrāntā naikakandarasānuṣu. himavatyuttamanadī nipapātācalottame .. 42.33 .. ### [1.42.35](https://indike.org/pramana/in.purana.vayu.1.42.35) saivaṃ śailasahasrāṇi dārayantī mahānadī. sthalīśatānyanekāni plāvayantyāśugāṇinī .. 42.34 .. ### [1.42.36](https://indike.org/pramana/in.purana.vayu.1.42.36) vanānāñca sahasrāṇi kandarāṇāṃ śatāni ca . srāvayantī mahābhāgā prayātā dakṣiṇodadhim .. 42.35 .. ### [1.42.37](https://indike.org/pramana/in.purana.vayu.1.42.37) ramyā yojanavistīrṇā śailakukṣiṣu saṃvṛtā. yādhṛtā devadevena śaṅkareṇa mahātmanā .. 42.36 .. ### [1.42.38](https://indike.org/pramana/in.purana.vayu.1.42.38) pāvanī dvijaśārdūla ghorāṇāmapi pāpmanām. śaṅkarasyāṅkasaṃsparśānmahādevasya dhīmataḥ. dviguṇaṃ pavitrasalilā sarvaloke mahānadī .. 42.37 .. ### [1.42.39](https://indike.org/pramana/in.purana.vayu.1.42.39) anuśailaṃ samantācca nirgatā bahubhirmukhaiḥ. atho'nyenābhidhānena khyātā nadyaḥ sahasraśaḥ .. 42.38 .. ### [1.42.40](https://indike.org/pramana/in.purana.vayu.1.42.40) tasmāddhimavato gaṅgā gatā sā tu mahānadī. evaṃ gaṅgeti nāmnādiprakāśā siddhasevitā .. 42.39 .. ### [1.42.41](https://indike.org/pramana/in.purana.vayu.1.42.41) dhanyāste sattamā deśā yatra gaṅgā mahānadī. rudrasāddhyānilādityairjuṣṭatoyā yaśasvatī .. 42.40 .. ### [1.42.42](https://indike.org/pramana/in.purana.vayu.1.42.42) mahāpādaṃ pravakṣyāmi merorapi hi paścimam. nānāratnākāraṃ puṇyaṃ puṇyakṛdbhirniṣevitam .. 42.41 .. ### [1.42.43](https://indike.org/pramana/in.purana.vayu.1.42.43) vipulaṃ śailarājānaṃ vipulodarakandaram . nitambakuñja kaṭakairvimalairmmaṇḍitodaram .. 42.42 .. ### [1.42.44](https://indike.org/pramana/in.purana.vayu.1.42.44) api yā tryambakasyaiṣā tridaśaiḥ sevitodakā. vāyuvegā gatābhogā lateva bhrāmitā punaḥ .. 42.43 .. ### [1.42.45](https://indike.org/pramana/in.purana.vayu.1.42.45) merukūṭataṭādbhraṣṭā prahataiḥ svāditodakā. vistīryyamāṇasalilā nirmmalāṃśukasannibhā .. 42.44 .. ### [1.42.46](https://indike.org/pramana/in.purana.vayu.1.42.46) tasya kūṭe'mbaranadī siddhacāraṇasevitā . pradakṣiṇamathāvṛtya patitā sā tu gāminī .. 42.45 .. ### [1.42.47](https://indike.org/pramana/in.purana.vayu.1.42.47) devabhrājaṃ mahābhrājaṃ savaibhrājaṃ mahāvanam. plāvayantī mahābhāgā nānāpuṣpaphalodakā .. 42.46 .. ### [1.42.48](https://indike.org/pramana/in.purana.vayu.1.42.48) pradakṣiṇaṃ prakurvāṇā nānāvanavibhūṣitā. praviṣṭā paśvimasaraḥ sitodaṃ vimalodakam .. 42.47 .. ### [1.42.49](https://indike.org/pramana/in.purana.vayu.1.42.49) sā sitodādviniṣkrāntā supakṣaṃ parvvataṃ gatā. supakṣatastu puṇyodāttato devarṣisevitā .. 42.48 .. ### [1.42.50](https://indike.org/pramana/in.purana.vayu.1.42.50) supakṣakūṭataṭagā tasmācca saṃśitodakā. nipapāta mahābhāgā ramaṇyaṃ śikhiparvvatam .. 42.49 .. ### [1.42.51](https://indike.org/pramana/in.purana.vayu.1.42.51) śikheśca parvatāt kaṅkaṃ kaṅkādvaidūryyaparvvatam. vaidūryyāt kapilaṃ śailaṃ tasmācca gandhamādanam .. 42.50 .. ### [1.42.52](https://indike.org/pramana/in.purana.vayu.1.42.52) tasmādgirivarāt prāptā piñjaraṃ varaparvvatam. piñjarāt sarasaṃ yātā tasmācca kumudācalam .. 42.51 .. ### [1.42.53](https://indike.org/pramana/in.purana.vayu.1.42.53) madhumantaṃ janañcaiva mukuṭañca śiloccayam. mukuṭācchailaśikharāt kṛṣṇaṃ yātā mahāgirim .. 42.52 .. ### [1.42.54](https://indike.org/pramana/in.purana.vayu.1.42.54) kṛṣṇāt śvetaṃ mahāśailaṃ mahānaganiṣevitam. śvetāt sahasraśikharaṃ śailendraṃ patitā punaḥ .. 42.53 .. ### [1.42.55](https://indike.org/pramana/in.purana.vayu.1.42.55) anekābhiḥ sravantībhirāpyāyitajalā śivā . evaṃ śailasahasrāṇi sādayantī mahānadī. pārijāte mahāśaile nipapātāśugāminī .. 42.54 .. ### [1.42.56](https://indike.org/pramana/in.purana.vayu.1.42.56) anekanirjharanadī guhāsānuṣu rājate. tasya kukṣiṣvanekāsu bhrāntatoyā taraṅgiṇī .. 42.55 .. ### [1.42.57](https://indike.org/pramana/in.purana.vayu.1.42.57) vyāhanyamānasaṃvegā gaṇḍaśailairanekaśaḥ. saṃvidyamānasalilā gatā ca dharaṇītale .. 42.56 .. ### [1.42.58](https://indike.org/pramana/in.purana.vayu.1.42.58) ketumālaṃ mahādvīpaṃ nānāmleccha gaṇairyutam . plāvayantī mahābhāgā prayātā paścimārṇavam .. 42.57 .. ### [1.42.59](https://indike.org/pramana/in.purana.vayu.1.42.59) suvarṇacitrapārśve tu supārśve'pyuttare girau . merościtramahāpāde mahāsattvaniṣevite .. 42.58 .. ### [1.42.60](https://indike.org/pramana/in.purana.vayu.1.42.60) merukūṭataṭādbhraṣṭā pavaneneritodakā. anekābhogavakrāṅgī kṣipyamāṇā nabhastale .. 42.59 .. ### [1.42.61](https://indike.org/pramana/in.purana.vayu.1.42.61) ṣaṣṭiyojanasāhasre nirālambe'mbare śubhe. vikīryamāṇā māleva nipapāta mahānadī .. 42.60 .. ### [1.42.62](https://indike.org/pramana/in.purana.vayu.1.42.62) evaṃ kūṭataṭairbhraṣṭā naikairdevarṣisevitaiḥ. vikīryamāṇasalilā naikapuṣpoḍupotkacā .. 42.61 .. ### [1.42.63](https://indike.org/pramana/in.purana.vayu.1.42.63) nānāratnavanoddeśamaraṇyaṃ saviturvvanam. mahāvanaṃ mahābhāgā plāvayantī pradakṣiṇam .. 42.62 .. ### [1.42.64](https://indike.org/pramana/in.purana.vayu.1.42.64) sarovaraṃ mahāpuṇyaṃ mahābhāganiṣevitam. tatrāviveśa kalyāṇī mahābhadraṃ sitodakā .. 42.63 .. ### [1.42.65](https://indike.org/pramana/in.purana.vayu.1.42.65) bhadrasometi nāmnā hi mahāpārā mahājavā. mahānadī mahāpuṇyā mahābhadrā vinirgatā .. 42.64 .. ### [1.42.66](https://indike.org/pramana/in.purana.vayu.1.42.66) naikanirjharavaprāḍhyā śaṃkhakūṭataṭe tu sā. tatra kūṭe giritaṭe nipapātāśugāminī .. 42.65 .. ### [1.42.67](https://indike.org/pramana/in.purana.vayu.1.42.67) śaṃkhakūṭataṭādbhraṣṭā papāta vṛṣaparvvatam. vṛṣaparvvatādvatsagiriṃ nāgaśailaṃ tato gatā .. 42.66 .. ### [1.42.68](https://indike.org/pramana/in.purana.vayu.1.42.68) tasmānnīlaṃ nagaśreṣṭhaṃ saṃprāptā varṣaparvvatam. nīlāt kapiñjalañcaiva indranīlaṃ ca nimnagā .. 42.67 .. ### [1.42.69](https://indike.org/pramana/in.purana.vayu.1.42.69) tataḥ paraṃ mahānīlaṃ hemaśrṛṅgañca sā yayau . hemaśrṛṅgādgatā śvetaṃ śvetācca sunagaṃ yayau .. 42.68 .. ### [1.42.70](https://indike.org/pramana/in.purana.vayu.1.42.70) sunagāt śataśrṛṅgañca saṃprāptā sā mahānadī. śataśrṛṅgānmahāśailaṃ puṣkaraṃ puṣpamaṇḍitam .. 42.69 .. ### [1.42.71](https://indike.org/pramana/in.purana.vayu.1.42.71) puṣkarācca mahāśailaṃ dvirājaṃ sumahābalam . varāhaparvvataṃ tasmānmayūrañca śiloccayam .. 42.70 .. ### [1.42.72](https://indike.org/pramana/in.purana.vayu.1.42.72) mayūrāccaikaśikharaṃ kandarodaramaṇḍitam . jārudhiṃ śaila śikharaṃ nipapātāśugāminī .. 42.71 .. ### [1.42.73](https://indike.org/pramana/in.purana.vayu.1.42.73) evaṃ girisahasrāṇi dārayantī mahānadī. triśrṛṅgaṃ śrṛṅgakalilaṃ maryādāparvataṃ gatā .. 42.72 .. ### [1.42.74](https://indike.org/pramana/in.purana.vayu.1.42.74) triśrṛṅgataṭavibhraṣṭā mahābhāganiṣevitā. merukūṭataṭādbhraṣṭā pavaneneritodakā .. 42.73 .. ### [1.42.75](https://indike.org/pramana/in.purana.vayu.1.42.75) viruddhaṃ parvatavaraṃ papāta vimalodakā. plāvayantī mahābhāgā prayātā paścimārṇavam .. 42.74 .. ### [1.42.76](https://indike.org/pramana/in.purana.vayu.1.42.76) suvarṇabhuvi pārśve tu supārśvepyuttare girau .. ### [1.42.77](https://indike.org/pramana/in.purana.vayu.1.42.77) merośvitre mahāpāde mahāsattvaniṣevite .. 42.75 .. ### [1.42.78](https://indike.org/pramana/in.purana.vayu.1.42.78) kandarodaravibhraṣṭā tasmādapi taraṅgiṇī. naikabhogā papātorvīṃ citrapuṣpoḍhupotkacā .. 42.76 .. ### [1.42.79](https://indike.org/pramana/in.purana.vayu.1.42.79) plāvayantī pramuditā uttarān sā kurūn śivā. mahādvīpasya madhyena prayātā sottarārṇavam .. 42.77 .. ### [1.42.80](https://indike.org/pramana/in.purana.vayu.1.42.80) evaṃ tāstu mahānadyaścatasro vimalodakāḥ. mahāgiritaṭabhraṣṭāḥ saṃprayātāścaturdiśam .. 42.78 .. ### [1.42.81](https://indike.org/pramana/in.purana.vayu.1.42.81) tatseyaṃ kathitaprāyā pṛthivī bahuvistarā. meruśailamahākīrṇā'viśacca sarvatodiśam .. 42.79 .. ### [1.42.82](https://indike.org/pramana/in.purana.vayu.1.42.82) caturmahādvīpavatī caturākrīḍakānanā. catuṣketumahāvṛkṣā caturvarasarasvatī .. 42.80 .. ### [1.42.83](https://indike.org/pramana/in.purana.vayu.1.42.83) caturmahāśailavatī caturbhujagasaṃśrayā. aṣṭottaramahāśailā tathāṣṭavaraparvatā .. 42.81 .. ### [1.42.84](https://indike.org/pramana/in.purana.vayu.1.42.84) iti śrīmahāpurāṇe vāyuprokte bhuvanavinyāso nāma dvicatvāriṃśo'dhyāyaḥ .. 42 .. ## Linked texts (1) - [Liṅgapurāṇa](https://indike.org/pramana/in.purana.linga.1.52.5) — Vyāsa, Sanskrit --- Source: [https://indike.org/pramana/in.purana.vayu.1.42](https://indike.org/pramana/in.purana.vayu.1.42) · Pramāṇa