[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.47 # Vayupurana 1.47: adhyāyaḥ 47 Vāyupurāṇa 1.47 - **Language:** Sanskrit ### adhyāyaḥ 47 ### [1.47.1](https://indike.org/pramana/in.purana.vayu.1.47.1) ..sūta uvāca.. ### [1.47.2](https://indike.org/pramana/in.purana.vayu.1.47.2) savye himavataḥ pārśve kailāso nāma parvataḥ. tasminnivasati śrīmān kuberaḥ saha rākṣasaiḥ. apsarogaṇasaṃyukto modate hyalakādhipaḥ .. 47.1 .. ### [1.47.3](https://indike.org/pramana/in.purana.vayu.1.47.3) kailāsapādāt sambhūtaṃ puṇyaṃ śīta jalaṃ śubham. mandaṃ nāmnā kumudvantaṃ śaradambudasannibham .. 47.2 .. ### [1.47.4](https://indike.org/pramana/in.purana.vayu.1.47.4) tasmāddivyā prabhavati nadī mandākinī śubhā. divyañca nandanaṃ tatra tasyāstīre mahadvanam .. 47.3 .. ### [1.47.5](https://indike.org/pramana/in.purana.vayu.1.47.5) prāguttareṇa kailāsāddivyasattvauṣadhaṃ girim. suradhātumayaṃ citraṃ suvarṇaṃ parvataṃ prati .. 47.4 .. ### [1.47.6](https://indike.org/pramana/in.purana.vayu.1.47.6) candraprabho nāma giriḥ saśuddhāṃ ratnasannibhaḥ. tasya pāde mahaddivyamacchodaṃ nāma tatsaraḥ .. 47.5 .. ### [1.47.7](https://indike.org/pramana/in.purana.vayu.1.47.7) tasmāddivyā prabhavati hyacchodā nāma nimnagā. tasyāstīre mahādivyaṃ vanaṃ caitrarathaṃ smṛtam .. 47.6 .. ### [1.47.8](https://indike.org/pramana/in.purana.vayu.1.47.8) tasmin girau nivasati maṇibhadraḥ sahānugaḥ. yakṣasenāpatiḥ krūraguhyakaiḥ parivāritaḥ .. 47.7 .. ### [1.47.9](https://indike.org/pramana/in.purana.vayu.1.47.9) puṇyā mandākinī caiva nimnagācchodikā tathā. mahīmaṇḍalamadhyena praviṣṭe te mahodadhim .. 47.8 .. ### [1.47.10](https://indike.org/pramana/in.purana.vayu.1.47.10) kailāsāddakṣiṇaprācyāṃ śivasattvauṣadhiṃ gurum . manaḥśilāmayaṃ divyaṃ piśaṅgaṃ parvataṃ prati .. 47.9 .. ### [1.47.11](https://indike.org/pramana/in.purana.vayu.1.47.11) lohito hemaśrṛṅgastu giriḥ sūrya prabho mahān. tasya pāde mahaddivyaṃ lohitaṃ nāma tatsaraḥ .. 47.10 .. ### [1.47.12](https://indike.org/pramana/in.purana.vayu.1.47.12) tasmāt puṇyaḥ prabhavati lauhityaḥ sadano mahān. devāraṇyaṃ viśokañca tasya tīre mahāvanam .. 47.11 .. ### [1.47.13](https://indike.org/pramana/in.purana.vayu.1.47.13) tasmin girau nivasati yakṣo maṇivaro vaśī. saumyaiḥ sudhārmikaiścaiva guhyakaiḥ parivāritaḥ .. 47.12 .. ### [1.47.14](https://indike.org/pramana/in.purana.vayu.1.47.14) kailāsāddakṣiṇe pārśve krūrasatvauṣadhaṃ girim. vṛtrakāyāt kilotpannamañjanaṃ trikakutprati .. 47.13 .. ### [1.47.15](https://indike.org/pramana/in.purana.vayu.1.47.15) sarvadhātumayastatra sumahān vaidyuto giriḥ. tasya pāde saraḥ puṇyaṃ mānasaṃ siddhasevitam .. 47.14 .. ### [1.47.16](https://indike.org/pramana/in.purana.vayu.1.47.16) tasmāt prabhavate puṇyā sarayūrlokabhāvanī. tasyāstīre vanaṃ divyaṃ vaibhrājaṃ nāma viśrutam .. 47.15 .. ### [1.47.17](https://indike.org/pramana/in.purana.vayu.1.47.17) kuberānucarastatra prahetṛtanayo vaśī. brahma pāto nivasati rākṣaso'nantavikramaḥ. antarikṣacarairghorairyātudhānaśatairvṛtaḥ .. 47.16 .. ### [1.47.18](https://indike.org/pramana/in.purana.vayu.1.47.18) apareṇa tu kailāsānmukhyasattvauṣadhiṃ girim. aruṇaṃ parvataśreṣṭhaṃ rukmadhātumayaṃ prati .. 47.17 .. ### [1.47.19](https://indike.org/pramana/in.purana.vayu.1.47.19) bhavasya dayitaḥ śrīmān parvato meghasannibhaḥ. śātakumbhamayaiḥ śubhraiḥ śilājālaiḥ samāvṛtaḥ .. 47 .18 .. ### [1.47.20](https://indike.org/pramana/in.purana.vayu.1.47.20) śatasaṅkhyaistāpanīyaiḥ śrṛṅgairdivamivollikhan. muñjavān sa mahādivyo durgaśailo himārcitaḥ .. 47.19 .. ### [1.47.21](https://indike.org/pramana/in.purana.vayu.1.47.21) tasmin girau nivasati giriśo dhūmralohitaḥ. tasya pādāt prabhavati śailodaṃ nāma tatsaraḥ .. 47.20 .. ### [1.47.22](https://indike.org/pramana/in.purana.vayu.1.47.22) tasmāt prabhavate hivyā śailodā nāma nimnagā. sā cakṣuḥśītayormadhye praviṣṭā lavaṇodadhim .. 47.21 .. ### [1.47.23](https://indike.org/pramana/in.purana.vayu.1.47.23) tasyāstīre vanaṃ divyaṃ viśrutaṃ surabhīti vai. astyuttareṇa kailāsācchivasattvauṣadho giriḥ .. 47.22 .. ### [1.47.24](https://indike.org/pramana/in.purana.vayu.1.47.24) gauro nāma giristatra haritālamayaḥ śubhaḥ. hiraṇyaśrṛṅgaḥ sumahān divyo maṇimayo giriḥ .. 47.23 .. ### [1.47.25](https://indike.org/pramana/in.purana.vayu.1.47.25) tasya pāde mahaddivyaṃ śubhaṃ kāñcanavālukam. ramyaṃ bindusaro nāma yatra yāto bhagīrathaḥ .. 47.24 .. ### [1.47.26](https://indike.org/pramana/in.purana.vayu.1.47.26) gaṅgānimittaṃ rājarṣiruvāsa bahulāḥ samāḥ . divaṃ yāsyanti me pūrve gaṅgātoyapariplutāḥ .. 47.25 .. ### [1.47.27](https://indike.org/pramana/in.purana.vayu.1.47.27) tatra tripathagā devī prathamantu pratiṣṭhitā. somapādaprasūtā sā saptadhā pratipadya te .. 47.26 .. ### [1.47.28](https://indike.org/pramana/in.purana.vayu.1.47.28) yūpā maṇimayāstatra citayaśca hiraṇmayāḥ . tatreṣṭvā tu gataḥ śarvaṃ śakraḥ sarvaiḥ suraiḥ saha .. 47.27 .. ### [1.47.29](https://indike.org/pramana/in.purana.vayu.1.47.29) divicchāyāpatho yastu anunakṣatramaṇḍalam . dṛśyate bhāsvaro rātrau devī tripathagā tu sā .. 47.28 .. ### [1.47.30](https://indike.org/pramana/in.purana.vayu.1.47.30) antarikṣaṃ divañcaiva bhāvayantī bhuvaṅgatā. bhavottamāṅge patitā saṃruddhā yogamāyayā .. 47.29 .. ### [1.47.31](https://indike.org/pramana/in.purana.vayu.1.47.31) tasyā ye bindavaḥ kecit kruddhāyāḥ patitāḥ kṣitau. kṛtaṃ bindusarastatra tato bindusaraḥ smṛtam .. 47.30 .. ### [1.47.32](https://indike.org/pramana/in.purana.vayu.1.47.32) tato niruddhā devī sā bhavena smayatā kila. cintayāmāsa manasā śaṅkarakṣepaṇaṃ prati .. 47.31 .. ### [1.47.33](https://indike.org/pramana/in.purana.vayu.1.47.33) bhittvā viśāmi pātālaṃ srotasā gṛhya śaṅkaram. jñātvā tasyā abhiprāyaṃ krūraṃ devyā cikīrṣitam .. 47.32 .. ### [1.47.34](https://indike.org/pramana/in.purana.vayu.1.47.34) tirobhāvayituṃ buddhirāsīdaṅgeṣu tāṃ nadīm. tasyāvalepaṃ taṃ buddhvā nadyāḥ kruddhastu śaṅkaraḥ. nirudhya tu śirasyenāṃ vegena patitāṃ bhuvi .. 47.33 .. ### [1.47.35](https://indike.org/pramana/in.purana.vayu.1.47.35) etasminneva kāle tu dṛṣṭvā rājānamagrataḥ. dhamanīsantataṃ kṣīṇaṃ kṣudhāparigatendriyam .. 47.34 .. ### [1.47.36](https://indike.org/pramana/in.purana.vayu.1.47.36) anena toṣitaścāhaṃ nadyarthaṃ pūrvameva hi. buddhvāsya varadānaṃ tu kopaṃ niyatavāṃstu saḥ .. 47.35 .. ### [1.47.37](https://indike.org/pramana/in.purana.vayu.1.47.37) brahmaṇo hi vacaḥ śrutvā pratijñādhāraṇaṃ prati. tato visarjayāmāsa saṃruddhāṃ svena tejasā. nadīṃ bhagīrathasyārthe tapasogreṇa toṣitaḥ .. 47.36 .. ### [1.47.38](https://indike.org/pramana/in.purana.vayu.1.47.38) tato visṛjyamānāyāḥ srotastatsaptatāṅgatam. trayaḥ prācīmabhimukhaṃ pratīcīṃ trayaḥ eva tu .. 47.37 .. ### [1.47.39](https://indike.org/pramana/in.purana.vayu.1.47.39) nadyāḥ srotastu gaṅgāyāḥ pratyapadyata saptadhā. nalinī hrādinī caiva pāvanī caiva prāggatā .. 47.38 .. ### [1.47.40](https://indike.org/pramana/in.purana.vayu.1.47.40) sītā cakṣuśca sindhuśca pratīcīṃ diśamākṣitāḥ. saptamī tvanugā tāsāṃ dakṣiṇena bhagīrathī .. 47.39 .. ### [1.47.41](https://indike.org/pramana/in.purana.vayu.1.47.41) tasmādbhāgīrathī yā sā praviṣṭā lavaṇodadhim. saptaitā bhāvayantīha himāhvaṃ varṣameva tu .. 47.40 .. ### [1.47.42](https://indike.org/pramana/in.purana.vayu.1.47.42) prasūtāḥ sapta nadyastāḥ śubhā bindusarodbhavāḥ. nānādeśān bhāvayantyo mlecchaprāyāṃśca sarvaśaḥ .. 47.41 .. ### [1.47.43](https://indike.org/pramana/in.purana.vayu.1.47.43) upagacchanti tāḥ sarvā yato varṣati vāsanaḥ. sirindhrān kuntalāṃścīnān barbharān yavasān druhān .. 47.42 .. ### [1.47.44](https://indike.org/pramana/in.purana.vayu.1.47.44) ruṣāṇāṃśca kuṇindāṃśca aṅagalokavarāśca ye. kṛtvā dvidhā sindhumaruṃ sītāgātpaścimodadhim .. 47.43 .. ### [1.47.45](https://indike.org/pramana/in.purana.vayu.1.47.45) atha cīnamarūṃścaiva naṅgaṇān sarvamūlikān . sādhrāṃstu ṣārāṃstampākān pahnavān daradān śakān. etān janapadān cakṣuḥ srāvayantī gatodadhim .. 47.44 .. ### [1.47.46](https://indike.org/pramana/in.purana.vayu.1.47.46) daradāṃśca sakāṃśmīrān gāndhārān varapān hradān. śivapaurānindrahāsān vadātīṃśca visarjayān .. 47.45 .. ### [1.47.47](https://indike.org/pramana/in.purana.vayu.1.47.47) saindhavān randhrakarakān bhramarābhīrarohakān . śunāmukhāṃścorddhvamanūn siddhacāraṇasovitān .. 47.46 .. ### [1.47.48](https://indike.org/pramana/in.purana.vayu.1.47.48) gandharvān kinnarān yakṣān rakṣovidyādharoragān. kalāpagrāmakāṃścaiva pāradān sīgaṇān khasān .. 47.47 .. ### [1.47.49](https://indike.org/pramana/in.purana.vayu.1.47.49) kirātāṃśca pulindāṃśca kurūn sabharatānapi. pañcālakāśimātsyāṃśca magadhāṅgāṃstathaiva ca .. 47.48 .. ### [1.47.50](https://indike.org/pramana/in.purana.vayu.1.47.50) brahmottarāṃśca vaṅgāṃśca tāmaliptāṃstathaiva ca. etān janapadānāryān gaṅgā bhāvayate śubhān .. 47.49 .. ### [1.47.51](https://indike.org/pramana/in.purana.vayu.1.47.51) tataḥ pratihatā vindhye praviṣṭā dakṣiṇodadim. tatakṣvāhlādinī puṇyā prācīnābhimukhī yayau .. 47.50 .. ### [1.47.52](https://indike.org/pramana/in.purana.vayu.1.47.52) plāvayantyupabhogāṃśca niṣādānāṃ ca jātayaḥ. dhīvarānṛṣikāṃścaiva tathā nīlamukhānapi .. 47.51 .. ### [1.47.53](https://indike.org/pramana/in.purana.vayu.1.47.53) keralānuṣṭrakarṇāṃśca kirātānapi caiva hi. kālodarān vivarṇāṃśca kumārān svarṇabhūṣitān .. 47.52 .. ### [1.47.54](https://indike.org/pramana/in.purana.vayu.1.47.54) sā maṇḍale samudrasya tirobhūtā'nupūrvataḥ. tatastu pāvanī caiva prācīmeva diśaṅgatā .. 47.53 .. ### [1.47.55](https://indike.org/pramana/in.purana.vayu.1.47.55) apathān bhāvayantīha indradyumnasaro'pi ca. tatā kharathāṃścaiva indraśaṅkupathānapi .. 47.54 .. ### [1.47.56](https://indike.org/pramana/in.purana.vayu.1.47.56) madhyenodyānamaskārān kuthaprāvaraṇān yayau. indradvīpasamudre tu praviṣṭā lavaṇodadhim .. 47.55 .. ### [1.47.57](https://indike.org/pramana/in.purana.vayu.1.47.57) tataśca nalinī cāgāt prācīmāśāṃ javena tu. tomarān bhāvayantīha haṃsamārgān sahūhukān .. 47.56 .. ### [1.47.58](https://indike.org/pramana/in.purana.vayu.1.47.58) pūrvān deśāṃśca sevantī bhittvā sā bahudhā girīn. karṇaprāvaraṇāṃścaiva prāpya cāśvamukhānapi .. 47.57 .. ### [1.47.59](https://indike.org/pramana/in.purana.vayu.1.47.59) sikatāparvatamarūn gatvā vidyādharān yayau. nemimaṇḍalakoṣṭhe tu praviṣṭā sā mahodadhim .. 47.58 .. ### [1.47.60](https://indike.org/pramana/in.purana.vayu.1.47.60) tāsāṃ nadyupanadyaśca śataśo'tha sahasraśaḥ. upagacchanti tāḥ sarvā yato varṣati vāsavaḥ .. 47.59 .. ### [1.47.61](https://indike.org/pramana/in.purana.vayu.1.47.61) vasvokasāyāstīre tu vārisurabhiviśrute. hariśrṛṅge tu vasati vidvān kaubairako vaśī .. 47.60 .. ### [1.47.62](https://indike.org/pramana/in.purana.vayu.1.47.62) yajñopetaḥ sa sumahānamitaujāḥ suvikramaḥ. tatrāgastyaiḥ parivṛto vidvadbhirbrahmarākṣasaiḥ. kubairānucarāḥ hyete catvārastatsamāḥ smṛtāḥ .. 47.61 .. ### [1.47.63](https://indike.org/pramana/in.purana.vayu.1.47.63) evameva tu vijñeyā ṛddhiḥ parvatavāsinām. paraspareṇa dviguṇā dharmataḥ kāmato'rthataḥ .. 47.62 .. ### [1.47.64](https://indike.org/pramana/in.purana.vayu.1.47.64) hemakūṭasya pṝṣṭhe tu sāyanaṃ nāma tatsaraḥ. manasvinī prabhavati tasmājjyotiṣmatī ca sā .. 47.63 .. ### [1.47.65](https://indike.org/pramana/in.purana.vayu.1.47.65) avagāhya hyubhayataḥ samudrau pūrvapaścimau . saro viṣṇupadaṃ nāma niṣadhe parvatottame .. 47.64 .. ### [1.47.66](https://indike.org/pramana/in.purana.vayu.1.47.66) tasmāddvayaṃ prabhavati gāndharvī nanvalī ca yā. meroḥ paścāt prabhavati hradaścandraprabho mahān .. 47.65 .. ### [1.47.67](https://indike.org/pramana/in.purana.vayu.1.47.67) tatra jāmbūnadī puṇyā yasyāṃ jāmbūnadaṃ śubham. payodaṃ tu saro nīle suśubhraṃ puṇḍarīkavat .. 47.66 .. ### [1.47.68](https://indike.org/pramana/in.purana.vayu.1.47.68) puṇḍarīkāpayodā ca tasmānnadyau vinirgate. śvetāt prabhavate puṇyaṃ sarastūttaramānasam .. 47.67 .. ### [1.47.69](https://indike.org/pramana/in.purana.vayu.1.47.69) jyotsnā ca mṛgakāntā ca tasmāddve saṃbabhūvatuḥ. madhumatsaraḥ puṇyañca pajhamīnadvijākulam .. 47.68 .. ### [1.47.70](https://indike.org/pramana/in.purana.vayu.1.47.70) kalpavṛkṣasamākīrṇaṃ madhuvatsarvataḥ sukham. rudrakāntamiti khyātaṃ nirmitaṃ tadbhavena tu .. 47.69 .. ### [1.47.71](https://indike.org/pramana/in.purana.vayu.1.47.71) anye cāpyatra vikhyātāḥ pajhamīnadvijākulāḥ. nāmnā rudrājayā nāma dvādaśodadhisannibhāḥ .. 47.70 .. ### [1.47.72](https://indike.org/pramana/in.purana.vayu.1.47.72) tebhyaḥ śāntā ca mādhvī ca dve nadyau sambabhūvatuḥ. yani kimpuruṣādyāni teṣu devo na varṣati .. 47.71 .. ### [1.47.73](https://indike.org/pramana/in.purana.vayu.1.47.73) udbhidyānyudakānyatra pravahanti saridvarāḥ. ṛṣabho dundubhiścaiva dhūmraścaiva mahāgiriḥ .. 47.72 .. ### [1.47.74](https://indike.org/pramana/in.purana.vayu.1.47.74) pūrvāyatā mahabhāgā nimnagā lavaṇāmbhasi. candrakaṅkastathā prāṇo mahānagniḥ śiloccayaḥ. udagyātā udīcyāntā avagāḍhā mahodadhim .. 47.73 .. ### [1.47.75](https://indike.org/pramana/in.purana.vayu.1.47.75) somakaśca varāhaśca nāradaśca mahīdharaḥ. pratīcīmāyatāste vai praviṣṭā lavaṇodadhim .. 47.74 .. ### [1.47.76](https://indike.org/pramana/in.purana.vayu.1.47.76) cakro balāhakaścaiva mainākaścaiva parvataḥ. āyatāste mahāśailāḥ samudraṃ dakṣiṇaṃ prati. candramainākayormadhyevidiśaṃ dakṣiṇāṃ prati .. 47.75 .. ### [1.47.77](https://indike.org/pramana/in.purana.vayu.1.47.77) tatra saṃvarttako nāma so'gniḥ pibati tajjalam. nāmnā samudrapaḥ śrīmānaurvaḥ sa vaḍavāmukhaḥ .. 47.76 .. ### [1.47.78](https://indike.org/pramana/in.purana.vayu.1.47.78) dvādaśaite praviṣṭā hi parvatā lavaṇodadhim. mahendrabhayavitrastāḥ pakṣacchedabhayāttadā. yadetadṝśyate candre śvete kṛṣṇaśaśākṛtiḥ .. 47.77 .. ### [1.47.79](https://indike.org/pramana/in.purana.vayu.1.47.79) bhāratasya tu varṣasya bhedāste nava kīrtitāḥ. ihoditasya dṛśyante tathānye'nyatra nodite .. 47.78 .. ### [1.47.80](https://indike.org/pramana/in.purana.vayu.1.47.80) uttarottarameteṣāṃ varṣamuddiśyate guṇaiḥ. ārogyāyuḥ pramāṇābhyāṃ dharmataḥ kāmato'rthataḥ .. 47.79 .. ### [1.47.81](https://indike.org/pramana/in.purana.vayu.1.47.81) samanvitāni bhūtāni guṇai retaistu bhāgataḥ. vasanti nānājātīni teṣu varṣeṣu tāni vai. ityeṣā'dhārayat sarvaṃ pṛtvī viśvaṃ jagatsthitā .. 47.80 .. ### [1.47.82](https://indike.org/pramana/in.purana.vayu.1.47.82) iti mahāpurāṇe vāyu prokte bhuvanavinyāso nāma saptacatvāriṃśo'dhyāyaḥ .. 47 .. ## Linked texts (5) - [Brahmāṇḍapurāṇa](https://indike.org/pramana/in.purana.brahmanda.1.18.1) — Vyāsa, Sanskrit - [Matsyapurāṇa](https://indike.org/pramana/in.purana.matsya.121.2) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.3.14) — Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.13.29) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.13.29) — Basava, Sanskrit --- Source: [https://indike.org/pramana/in.purana.vayu.1.47](https://indike.org/pramana/in.purana.vayu.1.47) · Pramāṇa