[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.49 # Vayupurana 1.49: adhyāyaḥ 49 Vāyupurāṇa 1.49 - **Language:** Sanskrit ### adhyāyaḥ 49 ### [1.49.1](https://indike.org/pramana/in.purana.vayu.1.49.1) ..sūta uvāca.. ### [1.49.2](https://indike.org/pramana/in.purana.vayu.1.49.2) plakṣadvīpaṃ pravakṣyāmi yathāvadiva saṅgrahāt. śrṛṇutemaṃ yatātattvaṃ bruvato me dvijottamāḥ .. 49.1 .. ### [1.49.3](https://indike.org/pramana/in.purana.vayu.1.49.3) jambūdvīpasya vistārāddviguṇastasya vistaraḥ. vistārātrriguṇaścāsya pariṇāhaḥ samantataḥ. tenāvṛtaḥ samudro'yaṃ dvīpena lavaṇodakaḥ.. 49.2 .. ### [1.49.4](https://indike.org/pramana/in.purana.vayu.1.49.4) tatra puṇyā janapadāścirācca mriyate prajā. kuta eva hi durbhikṣaṃ jarāvyādhibhayaṃ kutaḥ .. 49.3 .. ### [1.49.5](https://indike.org/pramana/in.purana.vayu.1.49.5) tatrāpi parvatāḥ śubhrāḥ saptaiva maṇibhūṣaṇāḥ. ratnākarāstathā nadyastāsānnāmāni vacmi bhoḥ .. 49.4 .. ### [1.49.6](https://indike.org/pramana/in.purana.vayu.1.49.6) plakṣadvīpādiṣu teṣu sapta saptasu saptasu. ṛjvāyatāḥ pratidiśaṃ niviṣṭāḥ parvatāḥ sadā .. 49.5 .. ### [1.49.7](https://indike.org/pramana/in.purana.vayu.1.49.7) plakṣadvīpe tu vakṣyāmi sapta dvīpānmahācalān. gomeda ko'tra prathamaḥ parvato meghasannibhaḥ. khyāyate tasya nāmnā vai varṣaṃ gomedakantu tat .. 49.6 .. ### [1.49.8](https://indike.org/pramana/in.purana.vayu.1.49.8) dvitīyaḥ parvataścandraḥ sarvauṣadhisamanvitaḥ. aśvibhyāmamṛtasyārthe oṣadhyastatra saṃsthitāḥ .. 49.7 .. ### [1.49.9](https://indike.org/pramana/in.purana.vayu.1.49.9) tṛtīyo nārado nāma durgaśailo mahocchrayaḥ. tatrācale samutpannau pūrvaṃ nāradaparvatau .. 49.8 .. ### [1.49.10](https://indike.org/pramana/in.purana.vayu.1.49.10) caturthastatra vai śailo dundubhirnāma nāmataḥ. śabdamṛtyuḥ purā tasmin dundubhistāḍitaḥ suraiḥ . rajjudāro rajjumayaḥ śālmalasvāsurāntakṛt .. 49.9 .. ### [1.49.11](https://indike.org/pramana/in.purana.vayu.1.49.11) pañcamaḥ somako nāma devai ryatrāmṛtaṃ purā. sambhṛtañca hṛtaṃ caiva māturarthe garutmatā .. 49.10 .. ### [1.49.12](https://indike.org/pramana/in.purana.vayu.1.49.12) ṣaṣṭhastu sumanā nāma sa evarṣabha ucyate. hiraṇyākṣo varāheṇa tasmin śaile niṣūditaḥ .. 49.11 .. ### [1.49.13](https://indike.org/pramana/in.purana.vayu.1.49.13) vaibhrājaḥ saptamastatra bhrājiṣṇuḥ sphāṭiko mahān. yasmādvibhrājate'rcirbhirvaibhrājastena sa smṛtaḥ .. 49.12 .. ### [1.49.14](https://indike.org/pramana/in.purana.vayu.1.49.14) teṣāṃ varṣāṇi vakṣyāmi nāmatastu yathākramam. gomedaṃ prathamaṃ varṣaṃ nāmnā śāntabhayaṃ smṛtam .. 49.13 .. ### [1.49.15](https://indike.org/pramana/in.purana.vayu.1.49.15) candrasya śikharaṃ nāma nāradasya sukhodayam. ānandaṃ dundubhervarṣa somakasya śivaṃsmṛtam. kṣemakaṃ ṛṣabhasyāpi vaibhrājasya dhruvaṃ tathā .. 49.14 .. ### [1.49.16](https://indike.org/pramana/in.purana.vayu.1.49.16) eteṣu devagandharvāḥ siddhāśca sahacāraṇaiḥ viharanti ramante ca dṛśyamānāstu taiḥ saha .. 49.15 .. ### [1.49.17](https://indike.org/pramana/in.purana.vayu.1.49.17) teṣāṃ nadyaśca saptaiva prativarṣaṃ samudragāḥ. nāmatastāḥ pravakṣyāmi saptagaṅgā mahānadī .. 49.16 .. ### [1.49.18](https://indike.org/pramana/in.purana.vayu.1.49.18) abhigacchanti tā nadyastābhyaścānyāḥ sahasraśaḥ. bahūdakāścaughavatyo yato varṣati vāsavaḥ .. 49.17 .. ### [1.49.19](https://indike.org/pramana/in.purana.vayu.1.49.19) tāḥ pibanti sadā hṛṣṭā nadīrjanapadāstu te. śubhāḥ śāntavahāścaiva pramodā ye ca te śivāḥ .. 49.18 .. ### [1.49.20](https://indike.org/pramana/in.purana.vayu.1.49.20) ānandāśca dhruvāścaiva kṣemakāśca śivai saha. varṇāśramācārayuktāḥ prajāsteṣvatha sarvaśaḥ .. 49.19 .. ### [1.49.21](https://indike.org/pramana/in.purana.vayu.1.49.21) sarveṣvarogāḥ subalā- prajāstvāmayavarjitāḥ. adhaḥsarpiṇī na teṣvasti tathaivotsarpiṇī na ca .. 49.20 .. ### [1.49.22](https://indike.org/pramana/in.purana.vayu.1.49.22) na tatrāsti yugāvasthā caturyugakṛtā vkacit. tretāyugasamaḥ kālaḥ sarvadā tatra varttate .. 49.21 .. ### [1.49.23](https://indike.org/pramana/in.purana.vayu.1.49.23) plakṣadvīpādiṣu jñeyaḥ pañcasveteṣu sarvaśaḥ. deśasyānuvidhānena kālasyānuvidhāḥ smṛtāḥ .. 49.22 .. ### [1.49.24](https://indike.org/pramana/in.purana.vayu.1.49.24) pañcavarṣasahasrāṇi teṣu jīvanti mānavāḥ. surūpāśca suveṣāśca arogā balinastathā .. 49.23 .. ### [1.49.25](https://indike.org/pramana/in.purana.vayu.1.49.25) sukhamāyurbalaṃ rūpamārogyaṃ dharma eva ca. plakṣadvīpādiṣu jñeyaṃ śākadvīpāntakeṣu ca .. 49.24 .. ### [1.49.26](https://indike.org/pramana/in.purana.vayu.1.49.26) plakṣadvīpaḥ pṛthuḥ śrīmān sarvato dhanadhānyavān. divyauṣadhi phalopetaḥ sarvauṣadhivanaspatiḥ .. 49.25 .. ### [1.49.27](https://indike.org/pramana/in.purana.vayu.1.49.27) āvṛtaḥ paśubhiḥ sarvairgrāmāraṇyaiḥ sahasraśaḥ. jambūvṛkṣeṇa saṃkhyātastasya madhye dvijottamāḥ. plakṣo nāmnā mahāvṛkṣastasya nāmnā sa ucyate .. 49.26 .. ### [1.49.28](https://indike.org/pramana/in.purana.vayu.1.49.28) sa tatra pūjyate sthāṇurmadhye janapadasya hi. sa cāpīkṣurasoddeśaḥ plakṣadvīpasamāvṛtaḥ. plakṣadvīpasya caiveha vaipulyādvistareṇa tu .. 49.27 .. ### [1.49.29](https://indike.org/pramana/in.purana.vayu.1.49.29) ityeṣa sanniveśovaḥ plakṣadvīpasya kīrtitaḥ. ānupūrvyā samāsena śālmalantannibodhata .. 49.28 .. ### [1.49.30](https://indike.org/pramana/in.purana.vayu.1.49.30) tatastṛtīyaṃ dvīpānāṃ śālmalaṃ dvīpamuttamam. śālmalena samudrastu dvīpenekṣurasodakaḥ. plakṣadvīpasya vistārād‌dviguṇena samāvṛtaḥ .. 49.29 .. ### [1.49.31](https://indike.org/pramana/in.purana.vayu.1.49.31) tatrāpi parvatāḥ sapta vijñeyā ratnayonayaḥ. ratnākarāstathā nadyasteṣu varṣeṣu saptasu .. 49.30 .. ### [1.49.32](https://indike.org/pramana/in.purana.vayu.1.49.32) prathamaḥ sūryasaṅkāśaḥ kumudo nāma parvataḥ. sarvadhātumayaiḥ śrṛṅgaiḥ śilājālasamudgataiḥ .. 49.31 .. ### [1.49.33](https://indike.org/pramana/in.purana.vayu.1.49.33) dvitīyaḥ parvatastasya unnato nāma viśrutaḥ. haritālamayaiḥ śrṛṅgairdivamāvṛtya tiṣṭhati .. 49.32 .. ### [1.49.34](https://indike.org/pramana/in.purana.vayu.1.49.34) tṛtīyaḥ parvatastasya balāhaka iti śrutaḥ. jātyañjanamayaiḥ śrṛṅgairdivamāvṛtya tiṣṭhati .. 49.33 .. ### [1.49.35](https://indike.org/pramana/in.purana.vayu.1.49.35) caturthaḥ parvato droṇo yatrauṣadhyo mahābalāḥ. viśalyakaraṇī caiva mṛtasañjīvanī tathā .. 49.34 .. ### [1.49.36](https://indike.org/pramana/in.purana.vayu.1.49.36) kaṅkastu pañcamastatra parvataḥ sumahodayaḥ. divyapuṣpaphalo peto vṛkṣavīrutsamāvṛtaḥ .. 49.35 .. ### [1.49.37](https://indike.org/pramana/in.purana.vayu.1.49.37) ṣaṣṭhastu parvatastatra mahiṣo meghasannibhaḥ. yasmin so'gnirnivasati mahiṣo nāma vārijaḥ .. 49.36 .. ### [1.49.38](https://indike.org/pramana/in.purana.vayu.1.49.38) saptamaḥ parvatastatra kakujhānnāma bhāṣyate. tatra ratnānyanekāni svayaṃ varṣati vāsavaḥ. prajāpatimupādāya prājāpatye vidhistvayam .. 49.37 .. ### [1.49.39](https://indike.org/pramana/in.purana.vayu.1.49.39) ityete parvatāḥ sapta śālmale maṇibhūṣitāḥ . teṣāṃ varṣāṇi vakṣyāmi saptaiva tu śubhāni vai. kumudāt prathamaṃ śvetamunnatasya tu lohitam .. 49.38 .. ### [1.49.40](https://indike.org/pramana/in.purana.vayu.1.49.40) balāhakasya jīmūtaṃ droṇasya haritaṃ smṛtam . kaṅkasya vaidyutaṃ nāma mahiṣasya tu mānasam .. 49.39 .. ### [1.49.41](https://indike.org/pramana/in.purana.vayu.1.49.41) kakudaḥ suprabhaṃ nāma saptaitāni tu saptadhā. varṣāṇi parvatāṃścaiva nadīsteṣu nibodhata .. 49.40 .. ### [1.49.42](https://indike.org/pramana/in.purana.vayu.1.49.42) pānitoyā vitṛṣṇā ca candrā śukrā vimocanī. nivṛttiḥ saptamī tāsāṃ prativarṣaṃ tu tāḥ smṛtāḥ .. 49.41 .. ### [1.49.43](https://indike.org/pramana/in.purana.vayu.1.49.43) tāsāṃ samīpagāścānyāḥ śataśo'tha sahasraśaḥ. aśakyāḥ parisaṃkhyātuṃ śraddheyāstu bubhūṣatā .. 49.42 .. ### [1.49.44](https://indike.org/pramana/in.purana.vayu.1.49.44) ityeṣa sanniveśo vaḥ śālmalasyāpi kīrtitaḥ. plakṣavṛkṣeṇa saṃkhyātastasya madhye mahādrumaḥ .. 49.43 .. ### [1.49.45](https://indike.org/pramana/in.purana.vayu.1.49.45) śālmalirvipulaskandha stasya nāmnā sa ucyate. śālmalistu samudreṇa surodena samantataḥ. vistārācchālmalasyaiva samena tu samantataḥ .. 49.44 .. ### [1.49.46](https://indike.org/pramana/in.purana.vayu.1.49.46) uttareṣu tu dharmajñā dvīpeṣu śrṛṇuta prajāḥ. yathāśrutaṃ yathānyāyaṃ bruvato me nibodhata .. 49.45 .. ### [1.49.47](https://indike.org/pramana/in.purana.vayu.1.49.47) kuśadvīpaṃ pravakṣyāmi caturthaṃ taṃ samāsataḥ. surodakaḥ parivṛtaḥ kuśadvīpena sarvataḥ .. 49.46 .. ### [1.49.48](https://indike.org/pramana/in.purana.vayu.1.49.48) saptaiva girayastatra varṇyamānānnibodhata. śālmalasya tu vistārād dviguṇena samantataḥ .. 49.47 .. ### [1.49.49](https://indike.org/pramana/in.purana.vayu.1.49.49) kukhadvīpe tu vijñeyaḥ parvato vidrumoccayaḥ. dvīpasya prathamastasya dvitīyo hemaparvataḥ .. 49.48 .. ### [1.49.50](https://indike.org/pramana/in.purana.vayu.1.49.50) tṛtīyo dyutimānnāma jīmūtasadṛśo giriḥ. caturthaḥ puṣpavānnāma pañcamastu kuśeśayaḥ .. 49.49 .. ### [1.49.51](https://indike.org/pramana/in.purana.vayu.1.49.51) ṣaṣṭho harigirirnāma saptamo mandaraḥ smṛtaḥ . mandā iti hyapāṃ nāma mandaro dāraṇādapām .. 49.50 .. ### [1.49.52](https://indike.org/pramana/in.purana.vayu.1.49.52) teṣāmantaraviṣkambho dviguṇaḥ parivāritaḥ. udbhidaṃ prathamaṃ varṣaṃ dvitīyaṃ veṇumaṇḍalam .. 49.51 .. ### [1.49.53](https://indike.org/pramana/in.purana.vayu.1.49.53) tṛtīyaṃ svairathākāraṃ caturthaṃ lavaṇaṃ smṛtam. pañcamaṃ dhṛtimadvarṣaṃ ṣaṣṭhaṃ varṣa prabhākaram. saptamaṃ kapilaṃ nāma saptaite varṣaparvatāḥ .. 49.52 .. ### [1.49.54](https://indike.org/pramana/in.purana.vayu.1.49.54) eteṣu devagandharvāḥ prabhāstu jagadīśvarāḥ. viharanti ramante ca dṛśyamānāstu varṣaśaḥ .. 49.53 .. ### [1.49.55](https://indike.org/pramana/in.purana.vayu.1.49.55) na teṣu dasyavaḥ santi mlecchajātyastathaiva ca. gauraprāyo janaḥ sarvaḥ kramācca mriyate tathā .. 49.54 .. ### [1.49.56](https://indike.org/pramana/in.purana.vayu.1.49.56) tatrāpi nadyaḥ saptaiva dhutapāpāḥ śivāstathā. pavitrā santatiścaiva dyutigarbhā mahī tathā .. 49.55 .. ### [1.49.57](https://indike.org/pramana/in.purana.vayu.1.49.57) anyāstābhyaḥ parijñātāḥ śataśo'tha sahasraśaḥ. abhigacchanti tāḥ sarvā yato varṣati vāsavaḥ .. 49.56 .. ### [1.49.58](https://indike.org/pramana/in.purana.vayu.1.49.58) ghṛtodena kuśadvīpo bāhyataḥ parivāritaḥ. vijñeyaḥ sa tu vistārāt kuśadvīpasamena tu .. 49.57 .. ### [1.49.59](https://indike.org/pramana/in.purana.vayu.1.49.59) ityeṣa sanniveśo vaḥ kuśadvīpasya varṇitaḥ. krauñcadvīpasya vistāraṃ vakṣyāmyahamataḥ param .. 49.58 .. ### [1.49.60](https://indike.org/pramana/in.purana.vayu.1.49.60) kuśadvīpasya vistārād dviguṇaḥ sa tu vai smṛtaḥ. ghṛtodakasamudro vai krauñcadvīpena saṃvṛtaḥ .. 49.59 .. ### [1.49.61](https://indike.org/pramana/in.purana.vayu.1.49.61) tasmin dvīpe nagaśreṣṭhaḥ krauñcasthaḥ prathamo giriḥ. krauñcātparo vāmanako vāmanādandhakārakaḥ .. 49.60 .. ### [1.49.62](https://indike.org/pramana/in.purana.vayu.1.49.62) andhakārātparaścāpi divāvṛnnāma parvataḥ. divāvṛtaḥ paraścapi divindo girirucyate .. 49.61 .. ### [1.49.63](https://indike.org/pramana/in.purana.vayu.1.49.63) divindātparataścāpi puṇḍarīko mahāgiriḥ. puṇḍarīkātparaścāpi procyate dundubhisvanaḥ .. 49.62 .. ### [1.49.64](https://indike.org/pramana/in.purana.vayu.1.49.64) ete ratnamayāḥ sapta krauñcadvīpasya parvatāḥ. bahuvṛkṣaphalo petā nānāvṛkṣalatāvṛtāḥ .. 49.63 .. ### [1.49.65](https://indike.org/pramana/in.purana.vayu.1.49.65) paraspareṇa dviguṇā viṣkambhādvarṣaparvvatāḥ . varṣāṇi tatra vakṣyāmi nāmatastu nibodhata .. 49.64 .. ### [1.49.66](https://indike.org/pramana/in.purana.vayu.1.49.66) krauñcasya kuśalī deśo vāmanasya manonugaḥ. manonugātparaścoṣṇastṛtīyo deśa ucyate .. 49.65 .. ### [1.49.67](https://indike.org/pramana/in.purana.vayu.1.49.67) uṣṇātparaḥ prāvarakaḥ prāvarādandhakārakaḥ. andhakārakadeśāttu munideśaḥ paraḥ smṛtaḥ .. 49.66 .. ### [1.49.68](https://indike.org/pramana/in.purana.vayu.1.49.68) munideśātparaścaiva procyate dundubhisvanaḥ. siddhacāraṇasaṅkīrṇo gauraprāyo janaḥ smṛtaḥ .. 49.67 .. ### [1.49.69](https://indike.org/pramana/in.purana.vayu.1.49.69) tatrāpi nadyaḥ saptaiva prati varṣa smṛtāḥ śubhāḥ . gaurī kumudvatī caiva sandhyā rātrirmanojavā . khyātiśca puṇḍarīkā ca gaṅgā saptavidhā smṛtā .. 49.68 .. ### [1.49.70](https://indike.org/pramana/in.purana.vayu.1.49.70) tāsāṃ samudragāścānyā nadyo yāstu samīpagāḥ. anugacchanti tāḥ sarvā vipulāḥ subahūdakāḥ .. 49.69 .. ### [1.49.71](https://indike.org/pramana/in.purana.vayu.1.49.71) krauñcadvīpaḥ samudreṇa dadhimaṇḍodakena tu. āvṛtaḥ sarvataḥ śrīmān krauñcadvīpasamena tu .. 49.70 .. ### [1.49.72](https://indike.org/pramana/in.purana.vayu.1.49.72) plakṣadvīpādayo hyete samāsena prakīrttitāḥ. teṣāṃ nisargo dvīpānāmānupūrvyeṇa sarvaśaḥ .. 49.71 .. ### [1.49.73](https://indike.org/pramana/in.purana.vayu.1.49.73) na śakyaṃ vistarādvaktu mapi varṣaśatairapi . nisargo'yaṃ prajānāṃ tu saṃhāro yaśca tāsu vai .. 49.72 .. ### [1.49.74](https://indike.org/pramana/in.purana.vayu.1.49.74) ata ūrddvaṃ pravakṣyāmi śākadvīpasya yo vidhiḥ. śākadvīpasya kṛtsnasya yathāvadiha niścayāt. śrṛṇudhvaṃ vai yathātattvaṃ bruvato me yathārthavat .. 49.73 .. ### [1.49.75](https://indike.org/pramana/in.purana.vayu.1.49.75) krauñcadvīpasya vistārād dviguṇastasya vistaraḥ. parivārya samudraṃ sa dadhimaṇḍodakaṃ sthitaḥ .. 49.74 .. ### [1.49.76](https://indike.org/pramana/in.purana.vayu.1.49.76) tatra puṇyā janapadāścirācca mriyate janaḥ. kuta eva tu durbhikṣañcarāvyādhibhayaṃ kutaḥ .. 49.75 .. ### [1.49.77](https://indike.org/pramana/in.purana.vayu.1.49.77) tatrāpi parvatāḥ śubhrāḥ saptaiva maṇibhūṣitāḥ. ratnākarāstathā nadyastāsāṃ nāmāni me śrṛṇu .. 49.76 .. ### [1.49.78](https://indike.org/pramana/in.purana.vayu.1.49.78) devarṣigandharvayutaḥ prathamo merurucyate. prāgāyataḥ sa sauvarṇa udayo nāma parvataḥ .. 49.77 .. ### [1.49.79](https://indike.org/pramana/in.purana.vayu.1.49.79) tatra meghāstu vṛṣṭyarthaṃ prabhavanti ca yānti ca. tasyāpareṇa sumahān jaladhāro mahāgiriḥ .. 49.78 .. ### [1.49.80](https://indike.org/pramana/in.purana.vayu.1.49.80) tasmānnityamupādatte vāsavaḥ paramaṃ jalam. tato varṣaṃ prabhavati varṣākāle prajāsviha .. 49.79 .. ### [1.49.81](https://indike.org/pramana/in.purana.vayu.1.49.81) tasyāpare raivatako yatra nityaṃ pratiṣṭhitā . revatī divi nakṣatraṃ pitāmahakṛto giriḥ .. 49.80 .. ### [1.49.82](https://indike.org/pramana/in.purana.vayu.1.49.82) tasyāpareṇa sumahān śyāmo nāma mahāgiriḥ. tasmācchayāmatvamāpannāḥ prajāḥ pūrvamimāḥ kila .. 49.81 .. ### [1.49.83](https://indike.org/pramana/in.purana.vayu.1.49.83) tasyāpareṇa rajato mahānasto giriḥ smṛtaḥ. tasyāpareṇāmbikeyo durgaḥ śailo himācitaḥ .. 49.82 . āmbikeyātparo ramyaḥ sarvauṣadhisamanvitaḥ . sa caiva keśarītyukto yato vāyuḥ pravāyati .. 49.83 .. ### [1.49.84](https://indike.org/pramana/in.purana.vayu.1.49.84) śrṛṇudhvaṃ nāmatastāni yathāvadanupūrvaśaḥ. udayasyodayaṃ varṣaṃ jaladaṃ nāma viśrutam .. 49.84 .. ### [1.49.85](https://indike.org/pramana/in.purana.vayu.1.49.85) dvitīyaṃ jaladhārasya sukumāramiti smṛtam. raivatasya tu kaumāraṃ śyāmasya tu maṇīcakam .. 49.85 .. ### [1.49.86](https://indike.org/pramana/in.purana.vayu.1.49.86) astasyāpi śubhaṃ varṣaṃ vijñeyaṃ kusumottaram. āmbikeyasya modākaṃ kesareṣu mahādrumam .. 49.86 .. ### [1.49.87](https://indike.org/pramana/in.purana.vayu.1.49.87) dvīpasya parimāṇañca hrasvadīrghatvameva ca. śākadvīpena vikhyātastasya madhye vanaspatiḥ . śāko nāma mahāvṛkṣastasya pūjāṃ prayuñjate .. 49.87 .. ### [1.49.88](https://indike.org/pramana/in.purana.vayu.1.49.88) etena devagandharvāḥ siddhāśca saha cāraṇaiḥ. viharanti ramante ca dṛśyamānāśca taiḥ saha .. 49.88 .. ### [1.49.89](https://indike.org/pramana/in.purana.vayu.1.49.89) tatra puṇyā janapadāścāturvarṇasamanvitāḥ. teṣu nadyaśca saptaiva prativarṣaṃ samudragāḥ . viddhi nāmnaśca tāḥ sarvā gaṅgāstāḥ saptadhā smṛtāḥ .. 49.89 .. ### [1.49.90](https://indike.org/pramana/in.purana.vayu.1.49.90) prathamā sukumārīti gaṅgā śivajalā tathā. anu taptā ca nāmnaiva nadī samparikīrttitā .. 49.90 .. ### [1.49.91](https://indike.org/pramana/in.purana.vayu.1.49.91) kumārī nāmataḥ siddhā dvitīyā sā punaḥ satī . nandā ca pārvatī caiva tṛtīya parikīrttitā .. 49.91 .. ### [1.49.92](https://indike.org/pramana/in.purana.vayu.1.49.92) śivetikā caturthī syāt tridivā ca punaḥ smṛtā. ikṣuśca pañcamī jñeyā tathaiva ca punaḥ kratuḥ .. 49.92 .. ### [1.49.93](https://indike.org/pramana/in.purana.vayu.1.49.93) dhenukā ca mṛtā caiva ṣaṣṭhī saṃparikīrttitā. etāḥ sapta mahāgaṅgāḥ prativarṣaṃ śivodakāḥ. bhāvayanti janaṃ sarvaṃ śākadvīpanivāsinam .. 49.93 .. ### [1.49.94](https://indike.org/pramana/in.purana.vayu.1.49.94) anugacchanti tāstvanyā nadīnadyaḥ sahasraśaḥ. bahūdaka parisrāvā yato varṣati vāsavaḥ .. 49.94 .. ### [1.49.95](https://indike.org/pramana/in.purana.vayu.1.49.95) tāsāntu nāmadheyāni parimāṇaṃ tathaiva ca. na śakyaṃ parisaṃkhyātuṃ puṇyāstāḥ sariduttamāḥ. tāḥ pibanti sadā hṛṣṭā nadīrjanapadāstu te .. 49.95 .. ### [1.49.96](https://indike.org/pramana/in.purana.vayu.1.49.96) śaṃśapāyana vistīrṇo dvīpo'sau cakrasaṃsthitaḥ. nadījalaiḥ praticchannaḥ parvataiścābhrasannibhaiḥ .. 49.96 .. ### [1.49.97](https://indike.org/pramana/in.purana.vayu.1.49.97) sarvadhātuvicitraiśca maṇi vidrumabhūṣitaiḥ. puraiśca vividhākāraiḥ sphītairjanapadairapi .. 49.97 .. ### [1.49.98](https://indike.org/pramana/in.purana.vayu.1.49.98) vṛkṣaiḥ puṣpaphalopetaiḥ samantāddhanadhānyavān. kṣīrodena samudreṇa sarvataḥ parivāritaḥ. śākadvīpastu vistārāt samena tu samantataḥ .. 49.98 .. ### [1.49.99](https://indike.org/pramana/in.purana.vayu.1.49.99) tasmin janapadāḥ puṇyāḥ parvatāntarite śubhāḥ . varṇāśramasamākīrṇā deśāste sapta vai smṛtāḥ .. 49.99 .. ### [1.49.100](https://indike.org/pramana/in.purana.vayu.1.49.100) na saṅkaraśca teṣvasti varṇāśramakṛtaḥ vkacit . dharmasya cāvyabhīcārādekāntasukhitāḥ prajāḥ .. 49.100 .. ### [1.49.101](https://indike.org/pramana/in.purana.vayu.1.49.101) na teṣu lobho māyā vā īrṣyāsūyā'dhṛtiḥ kutaḥ. viparyayo na teṣvasti etat svābhāvikaṃ smṛtam .. 49.101 .. ### [1.49.102](https://indike.org/pramana/in.purana.vayu.1.49.102) karotpattirnateṣvasti na daṇḍo na ca daṇḍakāḥ. svadharmeṇaiva dharmajñāste rakṣanti parasparam .. 49.102 .. ### [1.49.103](https://indike.org/pramana/in.purana.vayu.1.49.103) etāvadeva śakyaṃ vai tasmin dvīpe nivāsinām. puṣkaraṃ saptamaṃ dvīpaṃ pravakṣyāmi nibodhata .. 49.103 .. ### [1.49.104](https://indike.org/pramana/in.purana.vayu.1.49.104) puṣkareṇa tu dvīpena vṛtaḥ kṣīrodako bahiḥ. śākadvīpasya vistārād‌dviguṇena samantataḥ .. 49.104 .. ### [1.49.105](https://indike.org/pramana/in.purana.vayu.1.49.105) puṣkare parvataḥ śrīmān eka eva mahāśilaḥ. citrai rmaṇimayaiḥ śīlaiḥ śikharaistu samucchritaiḥ .. 49.105 .. ### [1.49.106](https://indike.org/pramana/in.purana.vayu.1.49.106) dvīpasya tasya pūrvārddhe citrasānuḥ sthito mahān. parimaṇḍalasahasrāṇi vistīrṇaḥ pañcaviṃśatiḥ .. 49.106 .. ### [1.49.107](https://indike.org/pramana/in.purana.vayu.1.49.107) ūrddvañcaiva catustriśatsahasrāṇi samācitaḥ. dvīpārddhasya paristomaḥ parvato mānasottamaḥ .. 49.107 .. ### [1.49.108](https://indike.org/pramana/in.purana.vayu.1.49.108) sthito velāsamīpe tu navacandra ivoditaḥ. yojanānāṃ sahasrāṇi ūrddhvaṃ pañcaśaducchritaḥ .. 49.108 .. ### [1.49.109](https://indike.org/pramana/in.purana.vayu.1.49.109) tāvadeva sa vistīrṇaḥ sarvataḥ parimaṇḍalaḥ. sa evaṃ dvīpapaścārddhe mānasaḥ pṛthivīdharaḥ .. 49.109 .. ### [1.49.110](https://indike.org/pramana/in.purana.vayu.1.49.110) eka eva mahāsānuḥ sanniveśāddvidhā kṛtaḥ. svādūdakenodadhinā sarvataḥ parivāritaḥ .. 49.110 .. ### [1.49.111](https://indike.org/pramana/in.purana.vayu.1.49.111) puṣkaradvīpavistārādvistīrṇo'sau samantataḥ. tasmin dvīpe smṛtau dvau tu puṇyau janapadau śubhau. abhito mānasasyātha parvatasyānumaṇḍalau .. 49.111 .. ### [1.49.112](https://indike.org/pramana/in.purana.vayu.1.49.112) mahāvītantu yadvarṣaṃ bāhyato mānasasya tat. tasyaivābhyantare yattu dhātakīkhaṇḍamucyate .. 49.112 .. ### [1.49.113](https://indike.org/pramana/in.purana.vayu.1.49.113) daśavarṣasahasrāṇi tatra jevanti mānavāḥ. ārogyasukhabhūyiṣṭhā mānasīṃ siddhimāsthitāḥ .. 49.113 .. ### [1.49.114](https://indike.org/pramana/in.purana.vayu.1.49.114) samamāyuśca rūpañca tasmin varṣadvaye sthitam. adhamottamau na teṣvāstāṃ tulyāste rūpaśīlataḥ .. 49.114 .. ### [1.49.115](https://indike.org/pramana/in.purana.vayu.1.49.115) na tatra vañcako nerṣyā na stenā na bhayaṃ tathā. nigraho na ca daṇḍo'sti na lobho na parigrahaḥ .. 49.115 .. ### [1.49.116](https://indike.org/pramana/in.purana.vayu.1.49.116) satyānṛtaṃ na tatrāsti dharmādharmau tathaiva ca. varṇāśramāṇāṃ vārttā vā pāśupālyaṃ vaṇikkriyā .. 49.116 .. ### [1.49.117](https://indike.org/pramana/in.purana.vayu.1.49.117) trayī vidyā daṇḍanītiḥ śuśrūṣā śalyameva ca. varṣadvaye sarvametat puṣkarasya na vidyate .. 49.117 .. ### [1.49.118](https://indike.org/pramana/in.purana.vayu.1.49.118) na tatra nadyo varṣañca śītoṣṇaṃ vā na vidyate . udbhijjānyudakānyatra giriprasravaṇāni ca .. 49.118 .. ### [1.49.119](https://indike.org/pramana/in.purana.vayu.1.49.119) uttarāṇāṃ kurūṇāñca tulyakālo janaḥ sadā. sarvatra susukhastatra jarāklamavivarjitaḥ .. 49.119 .. ### [1.49.120](https://indike.org/pramana/in.purana.vayu.1.49.120) ityeṣa dhātakīkhaṇḍo mahāvīte tathaiva ca . ānupūrvyādvidhiḥ kṛtsnaḥ puṣkarasya prakīrtitaḥ .. 49.120 .. ### [1.49.121](https://indike.org/pramana/in.purana.vayu.1.49.121) svādūdakenodadhinā puṣkaraḥ parivāritaḥ. vistarānmaṇḍalāccaiva puṣkarasya tathaiva ca .. 49.121 .. ### [1.49.122](https://indike.org/pramana/in.purana.vayu.1.49.122) evaṃ dvīpāḥ samudraistu sapta saptabhirāvṛtāḥ. dvīpasyānantaro yastu samudrastu samantataḥ .. 49.122 .. ### [1.49.123](https://indike.org/pramana/in.purana.vayu.1.49.123) evaṃ dvīpasamudrāṇāṃ vṛddhirjñeyā parasparāt. apāñcaiva samudrekāt samudrā iti saṃjñitāḥ .. 49.123 .. ### [1.49.124](https://indike.org/pramana/in.purana.vayu.1.49.124) ṛṣayo nivasantyasmin prajā yasmāccaturvidhāḥ. tasmādvarṣamiti proktaṃ prajānāṃ sukhadantu tat .. 49.124 .. ### [1.49.125](https://indike.org/pramana/in.purana.vayu.1.49.125) ṛṣa ityeva ṛṣayaḥ vṛṣaḥ śaktiprabandhane. iti prabandhanāt siddhaṃ varṣatvaṃ tena teṣu tat .. 49.125 .. ### [1.49.126](https://indike.org/pramana/in.purana.vayu.1.49.126) śuklapakṣe candravṛddhau samudraḥ pūryate tadā. prakṣīyamāṇe bahule kṣīyate'stamite khage .. 49.126 .. ### [1.49.127](https://indike.org/pramana/in.purana.vayu.1.49.127) āpūryamāṇe udadhiḥ svata evābhipūryate. tato'pakṣīyamāṇe'pi svātmanaivāpakṛṣyate .. 49.127 .. ### [1.49.128](https://indike.org/pramana/in.purana.vayu.1.49.128) ukhāsthamagnisaṃyogāt jalamudricyate yathā. tathā mahodadhigataṃ toyamudricyate tataḥ .. 49.128 .. ### [1.49.129](https://indike.org/pramana/in.purana.vayu.1.49.129) anyūnāhyatiriktāśca varddhantyāpo hrasanti ca. udayāstamitaiścendoḥ pakṣayoḥ śuklakṛṣṇayoḥ. kṣayavṛddhirevamudadheḥ somavṛddhikṣayātpunaḥ .. 49.129 .. ### [1.49.130](https://indike.org/pramana/in.purana.vayu.1.49.130) daśottarāṇi pañcaiva aṅgulīnāṃ śatāni tu. apāṃ vṛddhiḥ kṣayo dṛṣṭaḥ samudrāṇāntu parvasu .. 49.130 .. ### [1.49.131](https://indike.org/pramana/in.purana.vayu.1.49.131) dvirāpatvāt smṛtā dvīpāḥ sarvataścodakāvṛtāḥ. udakasyādhānaṃ yasmācca tasmādudadhirucyate .. 49.131 .. ### [1.49.132](https://indike.org/pramana/in.purana.vayu.1.49.132) aparvāṇastu girayaḥ parvabhiḥ parvatāḥ smṛtāḥ . plakṣadvīpe tu gomedaḥ parvatastena cocyate .. 49.132 .. ### [1.49.133](https://indike.org/pramana/in.purana.vayu.1.49.133) śālmaliḥ śālmaladvīpe pūjyate ca mahādrumāḥ. kuśadvīpe kuśastambastasya nāmnā sa ucyate .. 49.133 .. ### [1.49.134](https://indike.org/pramana/in.purana.vayu.1.49.134) krauñcadvīpe giriḥ krauñco madhye janapadasya ha. śakadvīpe drumaḥ śākastasya nāmnā sa ucyate .. 49.134 .. ### [1.49.135](https://indike.org/pramana/in.purana.vayu.1.49.135) nyagrodhaḥ puṣkaradvīpe tatra taiḥ sa namaskṛtaḥ. mahādevaḥ puṣkare tu brahmā tribhuvaneśvaraḥ .. 49.135 .. ### [1.49.136](https://indike.org/pramana/in.purana.vayu.1.49.136) tasminnivasati brahmā sādhyaiḥ sārddhaṃ prajāpatiḥ. upāsate tatra devāstrayastriṃśanmaharṣibhiḥ. sa tatra pūjyate caiva devairdevottamottamaḥ .. 49.136 .. ### [1.49.137](https://indike.org/pramana/in.purana.vayu.1.49.137) jambūdvīpātpravarttante ratnāni vividhāni ca. dvīpeṣu teṣu sarveṣu prajānāṃ hi kramāstviha .. 49.137 .. ### [1.49.138](https://indike.org/pramana/in.purana.vayu.1.49.138) sarvaso brahmacaryeṇa satyena ca damena ca. ārogyāyuḥpramāṇāddhi dviguṇañca samantataḥ .. 49.138 .. ### [1.49.139](https://indike.org/pramana/in.purana.vayu.1.49.139) etasmin puṣkaradvīpe yaduktaṃ varṣakadvayam. gopāyati prajāstatra svayaṃ sajjanamaṇḍitāḥ .. 49.139 .. ### [1.49.140](https://indike.org/pramana/in.purana.vayu.1.49.140) īśvaro daṇḍamudyamya brahmā tribhuvaneśvaraḥ. saviṣṇuḥ saśivo devaḥ sapitā sapitāmahaḥ .. 49.140 .. ### [1.49.141](https://indike.org/pramana/in.purana.vayu.1.49.141) bhojanañcāprayatnena tatra svayamupasthitam . ṣaḍrasaṃ sumahāvīryaṃ bhuñjate ca prajāḥ sadā .. 49.141 .. ### [1.49.142](https://indike.org/pramana/in.purana.vayu.1.49.142) pareṇa puṣkarasyātha āvṛtyā yaḥ sthito mahān . svādūdakaḥ samudrastu samantātpariveṣṭitaḥ .. 49.142 .. ### [1.49.143](https://indike.org/pramana/in.purana.vayu.1.49.143) pareṇa tasya mahatī dṛśyate loka saṃsthitiḥ. kāñcanī dviguṇā bhūmiḥ sarvā caikaśilopamā .. 49.143 .. ### [1.49.144](https://indike.org/pramana/in.purana.vayu.1.49.144) tasmātpareṇa śailastu maryādānte tu maṇḍalam. prakāśaścāprakāśaśca lokālokaḥ sa ucyate .. 49.144 .. ### [1.49.145](https://indike.org/pramana/in.purana.vayu.1.49.145) ālokastasya cārvāktu nirālokastataḥ param. yojanānāṃ sahasrāṇi daśa tasyocchrayaḥ smṛtaḥ .. 49.145 .. ### [1.49.146](https://indike.org/pramana/in.purana.vayu.1.49.146) tāvāṃśca vistarastasya pṛthivyāṃ kāmagaśca saḥ. āloke lokaśabdastu nirāloke salokatā. lokārthaṃ sammato loko nirālokastu bāhyataḥ .. 49.146 .. ### [1.49.147](https://indike.org/pramana/in.purana.vayu.1.49.147) lokavistāramātrantu ālokaḥ sarvato bahiḥ. paricchinnaḥ samantācca udakenāvṛtaśca saḥ. nirālokātparaścāpi aṇḍamāvṛtya tiṣṭhati .. 49.147 .. ### [1.49.148](https://indike.org/pramana/in.purana.vayu.1.49.148) aṇḍasyāntastvime lokāḥ saptadvīpā ca medinī. bhūrloko'tha bhuvarlokaḥ svarloko'tha mahastathā .. 49.148 .. ### [1.49.149](https://indike.org/pramana/in.purana.vayu.1.49.149) janastapastathā satya etāvān lokasaṅ‌grahaḥ. ekāvāneva vijñeyo lokāntaścaiva tatparaḥ .. 49.149 .. ### [1.49.150](https://indike.org/pramana/in.purana.vayu.1.49.150) kumbasthāyī bhavedyādṛk pratīcyāndiśi candramāḥ. āditaḥ śuklapakṣasya vapuraṇḍasya tadvidham .. 49.150 .. ### [1.49.151](https://indike.org/pramana/in.purana.vayu.1.49.151) aṇḍānāmīdṛśānāntu koṭyo jñeyāḥ sahasraśaḥ. tiryagūrdhvamadhastācca kāraṇasyāvyayātmanaḥ. kāraṇaiḥ prākṛtaistatra hyāvṛtaṃ pratisaptabhiḥ .. 49.151 .. ### [1.49.152](https://indike.org/pramana/in.purana.vayu.1.49.152) daśādhikyena cānyonyaṃ dhārayanti parasparam. parasparāvṛtāḥ sarve utpannāśca parasparāt .. 49.152 .. ### [1.49.153](https://indike.org/pramana/in.purana.vayu.1.49.153) aṇḍasyāsya samantāttu sanniviṣṭo ghanodadhiḥ. samantādyena toyena dhāryamāṇaḥ sa tiṣṭhati .. 49.153 .. ### [1.49.154](https://indike.org/pramana/in.purana.vayu.1.49.154) bāhyato ghanatoyasya tiryagūrddhvānumaṇḍalam. dhāryamāṇaṃ samantāttu tiṣṭhate ghanatejasā .. 49.154 .. ### [1.49.155](https://indike.org/pramana/in.purana.vayu.1.49.155) ayoguḍanibho vahniḥ samantānmaṇḍalākṛtiḥ. samantāddhanavātena dhāryamāṇaḥ sa tiṣṭhati. ghanavātastathākāśandhārayāṇastu tiṣṭhati .. 49.155 .. ### [1.49.156](https://indike.org/pramana/in.purana.vayu.1.49.156) bhūtādiśca tathākāśaṃ bhūtādyañcāpyasau mahān . mahān vyāpto hyanantena avyaktena tu dhāryate .. 49.156 .. ### [1.49.157](https://indike.org/pramana/in.purana.vayu.1.49.157) anantamaparivyaktandaśadhā sūkṣma eva ca. anantamakṛtātmānamanādinidhanañca tat .. 49.157 .. ### [1.49.158](https://indike.org/pramana/in.purana.vayu.1.49.158) atītya para to ghoramanālambamanāmayam. naikayojanasāhasraṃ viprakṛṣṭaṃ tamovṛtam .. 49.158 .. ### [1.49.159](https://indike.org/pramana/in.purana.vayu.1.49.159) tama eva nirālokamamaryādamadeśikam. devānāmapyavidiṃtaṃ vyavahāravivarjjitam .. 49.159 .. ### [1.49.160](https://indike.org/pramana/in.purana.vayu.1.49.160) tamaso'nte ca vikhyātamākāśānte ca bhāsvaram. maryādāyāmatastasya śivasyāyatanaṃ mahat .. 49.160 .. ### [1.49.161](https://indike.org/pramana/in.purana.vayu.1.49.161) tridaśānāmagamyantu sthānaṃ divyamiti śrutiḥ. mahato devadevasya maryādāyāṃ vyavasthitam .. 49.161 .. ### [1.49.162](https://indike.org/pramana/in.purana.vayu.1.49.162) candrādityāvataptāstu ye lokāḥ prathitā budhaiḥ. te lokā ityabhihitā jagataśca na saṃśayaḥ .. 49.162 .. ### [1.49.163](https://indike.org/pramana/in.purana.vayu.1.49.163) rasātalatalāt sapta saptaivorddhvatalāḥ kṣitau. saptaskandhāstathā vāyoḥ sabrahmasadanā dvijāḥ .. 49.163 .. ### [1.49.164](https://indike.org/pramana/in.purana.vayu.1.49.164) āpātālāddivaṃ yāvadatra pañcavidhā gatiḥ. pramāṇametajjagata eṣa saṃsārasāgaraḥ .. 49.164 .. ### [1.49.165](https://indike.org/pramana/in.purana.vayu.1.49.165) anādyantā prayātyevaṃ naikajātisamudbhavāḥ. vicitrā jagataḥ sā vai pravṛttiranavasthitā .. 49.165 .. ### [1.49.166](https://indike.org/pramana/in.purana.vayu.1.49.166) yathaitad bhautikaṃ nāma nisargabahuvistaram. atīndriyairmahābhāgaiḥ siddhairapi na lakṣyate .. 49.166 .. ### [1.49.167](https://indike.org/pramana/in.purana.vayu.1.49.167) pṛthivyāñcāgnivāyūnāṃ mahatastamasastathā. īśvarasya tu devasya anantasya dvijottamāḥ .. 49.167 .. ### [1.49.168](https://indike.org/pramana/in.purana.vayu.1.49.168) kṣayo vā parimāṇaṃ vā anto vāpi na vidyate. ananta eṣa sarvatra sarvasthāneṣu paṭhyate. tasya coktaṃ mayā pūrvaṃ tasminnāmānukīrttane .. 49.168 .. ### [1.49.169](https://indike.org/pramana/in.purana.vayu.1.49.169) ya eṣa śivanāmnā hi tadvaḥ kārtsnyena kīrtitam. sa eṣa sarvatra gataḥ sarvasthāneṣu pūjyate .. 49.169 .. ### [1.49.170](https://indike.org/pramana/in.purana.vayu.1.49.170) bhūmau rasātale caiva ākāśe pavane'nale. arṇaveṣu ca sarveṣu divi caiva na saṃśayaḥ .. 49.170 .. ### [1.49.171](https://indike.org/pramana/in.purana.vayu.1.49.171) tathā tapasi vijñeya eṣa eva mahādyutiḥ. anekadhā vibhaktāṅgo mahāyogī maheśvaraḥ. sarvalokeṣu lokeśa ijyate bahudhā prabhuḥ .. 49.171 .. ### [1.49.172](https://indike.org/pramana/in.purana.vayu.1.49.172) evaṃ parasparotpannā dhāryante ca parasparān. ādhārādheyabhāvena vikārāste vikāriṇaḥ .. 49.172 .. ### [1.49.173](https://indike.org/pramana/in.purana.vayu.1.49.173) pṛthvyādayo vikārāste paricchinnāḥ parasparam. parasparādhikāścaiva praviṣṭāśca parasparam .. 49.173 .. ### [1.49.174](https://indike.org/pramana/in.purana.vayu.1.49.174) yasmādviṣṭāśca te'nyonyaṃ tasmāt sthairyamupāgatāḥ. prāgāsan hyaviśeṣāstu viśeṣānyonyaveśanāt. pṛthivyādyāśca vāyvantāḥ paricchinnāstrayastu te .. 49.174 .. ### [1.49.175](https://indike.org/pramana/in.purana.vayu.1.49.175) guṇāpacayasāreṇa paricchedo viśeṣataḥ. śeṣāṇāṃ tu paricchedaḥ saukṣmyānneha vibhāvyate .. 49.175 .. ### [1.49.176](https://indike.org/pramana/in.purana.vayu.1.49.176) bhūtebhyaḥ paratastebhyo hyālokaḥ parataḥ smṛtaḥ. bhūtānyāloka ākāśe paricchinnāni sarvaśaḥ .. 49.176 .. ### [1.49.177](https://indike.org/pramana/in.purana.vayu.1.49.177) pātre mahati pātrāṇi yathaivāntargatāni tu. bhavantyanyonyahīnāni parasparasamāśrayāt. tathā hyāloka ākāśe bhedāstvantargatā matāḥ .. 49.177 .. ### [1.49.178](https://indike.org/pramana/in.purana.vayu.1.49.178) kṛtsnānyetāni catvāri anyonyasyādhikāni tu . yāvadetāni bhūtāni tāvadutpatti rucyate .. 49.178 .. ### [1.49.179](https://indike.org/pramana/in.purana.vayu.1.49.179) jantūnāmiha saṃskāro bhūteṣvantargato matāḥ. pratyākhyāya ca bhūtāni kāryotpattirna vidyate .. 49.179 .. ### [1.49.180](https://indike.org/pramana/in.purana.vayu.1.49.180) tasmātparimitā bhedāḥ smṛtāḥ kāryātmakāstu te. kāraṇātmakāstathaiva syurbhedā ye mahadādayaḥ .. 49.180 .. ### [1.49.181](https://indike.org/pramana/in.purana.vayu.1.49.181) ityeṣa sanniveśo vo mayā prokto vibhāgaśaḥ. saptadvīpasamudrāyā yāthātathyena vai dvijāḥ .. 49.181 .. ### [1.49.182](https://indike.org/pramana/in.purana.vayu.1.49.182) vistārānmaṇjalāccaiva prasaṃkhyātena caiva hi . vaiśvarūpaṃ pradhānasya parimāṇaikadeśikam .. 49.182 .. ### [1.49.183](https://indike.org/pramana/in.purana.vayu.1.49.183) adiṣṭhānaṃ bhaganato yasya sarvamidaṃ jagat . evaṃ bhūtagaṇāḥ sapta sanniviṣṭāḥ parasparam .. 49.183 .. ### [1.49.184](https://indike.org/pramana/in.purana.vayu.1.49.184) etāvān sanniveśastu mayā śakyaḥ prabhāvitu m. etāvadeva śrotavyaṃ sanniveśe tu pārthiva .. 49.184 .. ### [1.49.185](https://indike.org/pramana/in.purana.vayu.1.49.185) sapta prakṛtayastvetā dhārayanti parasparam. tāsvalpaparimāṇena prasaṅkhyātumihocyate. asaṅkhyeyāḥ prakṛtayastiryagūrddhvamadhaśca yāḥ .. 49.185 .. ### [1.49.186](https://indike.org/pramana/in.purana.vayu.1.49.186) tārakāsanniveśaśca yāvaddivyaṃ tu maṇjalam. maryādāsanniveśastu bhūmestadanumaṇḍalam. ataḥ paraṃ pravakṣyāmi pṛthivyāṃ vai dvijottamāḥ .. 49.186 .. ### [1.49.187](https://indike.org/pramana/in.purana.vayu.1.49.187) iti śrīmahāpurāṇe vāyuprokte bhuvanavinyāso nāmaikonapañcāśo'dhyāyaḥ .. 49 .. ## Linked texts (10) - [Brahmāṇḍapurāṇa](https://indike.org/pramana/in.purana.brahmanda.1.19.6) — Vyāsa, Sanskrit - [Matsyapurāṇa](https://indike.org/pramana/in.purana.matsya.122.3) — Vyāsa, Sanskrit - [Liṅgapurāṇa](https://indike.org/pramana/in.purana.linga.1.53.2) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.48.4) — Vyāsa, Sanskrit - [Ṣaṭsandarbha](https://indike.org/pramana/in.sampradaya.vaisnava.gaudiya.siddhanta.satsandarbha.1.4.60) — Jīva Gosvāmin 1555, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.4.9) — Sanskrit - [Varāhapurāṇa](https://indike.org/pramana/in.purana.varaha.87.1) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.59.2) — Ativīrarāma Pāṇṭiyar 1500, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.14.9) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.14.9) — Basava, Sanskrit --- Source: [https://indike.org/pramana/in.purana.vayu.1.49](https://indike.org/pramana/in.purana.vayu.1.49) · Pramāṇa