[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.4 # Vayupurana 1.4 Vāyupurāṇa 1.4 - **Language:** Sanskrit ### [1.4.1](https://indike.org/pramana/in.purana.vayu.1.4.1) ṛṣayastu tataḥ śrutvā naimiṣāraṇyavāsinaḥ. pratyūcuste tataḥ sarve sūtaṃ paryākulekṣaṇāḥ ..1.. ### [1.4.2](https://indike.org/pramana/in.purana.vayu.1.4.2) bhavān vai vaṃśakuśalo vyāsāt pratyakṣadarśavān. tasmāttvaṃ bhavanaṃ kṛtsnaṃ lokasyāmuṣya varṇaya ..2.. ### [1.4.3](https://indike.org/pramana/in.purana.vayu.1.4.3) yasya yasyānvayā ye ye tāṃstānicchāma veditum. teṣāṃ pūrvarṣisṛṣṭiṃ ca vicitrāṃ tāṃ prajāpateḥ ..3.. ### [1.4.4](https://indike.org/pramana/in.purana.vayu.1.4.4) asakṛtparipṛṣṭastairmahātmā lomaharṣaṇaḥ. vistareṇānupūrvyā ca kathayāmāsa sattamaḥ ..4.. ### [1.4.5](https://indike.org/pramana/in.purana.vayu.1.4.5) ..lomaharṣaṇa uvāca.. ### [1.4.6](https://indike.org/pramana/in.purana.vayu.1.4.6) pṛṣṭāṃ caitāṃ kathāṃ divyāṃ ślakṣṇāṃ pāpapraṇāśinīm. kathyamānāṃ mayā citrāṃ bahvarthāṃ śrutisammatām ..5.. ### [1.4.7](https://indike.org/pramana/in.purana.vayu.1.4.7) yaścemāṃdhārayennityaṃ śrṛṇuyādvāpyabhīkṣṇaśaḥ. śrāvayeccāpi viprebhyo yatibhyaśca viśeṣataḥ ..6.. ### [1.4.8](https://indike.org/pramana/in.purana.vayu.1.4.8) śuciḥ parvasu yuktātmā tīrtheṣvāyataneṣu ca. dīrghamāyuravāpnoti sa purāṇānukīrttanāt. svavaṃśadhāraṇaṃ kṛtvā svargaloke mahīyate ..7.. ### [1.4.9](https://indike.org/pramana/in.purana.vayu.1.4.9) vistārāvayavaṃ teṣāṃ yathāśabdaṃ yathāśrutam. kīrttyamānaṃ nibodhadhvaṃ sarveṣāṃ kīrttivarddhanam ..8.. ### [1.4.10](https://indike.org/pramana/in.purana.vayu.1.4.10) dhanyaṃ yaśasyaṃ śatrughnaṃ svargyamāyurvivardhanam. kīrttanaṃ sthirakīrttīnāṃ sarveṣāṃ puṇyakāriṇām ..9.. ### [1.4.11](https://indike.org/pramana/in.purana.vayu.1.4.11) sargaśca pratisargaśca vaṃśo manvantarāṇi ca. vaṃśānucaritañceti purāṇaṃ paṃcalakṣaṇam ..10.. ### [1.4.12](https://indike.org/pramana/in.purana.vayu.1.4.12) kalpebhyo'pi hi yaḥ kalpaḥ śucibhyo niyataḥ śuciḥ. purāṇaṃ sampravakṣyāmi mārutaṃ vedasammitam ..11.. ### [1.4.13](https://indike.org/pramana/in.purana.vayu.1.4.13) prabodhaḥ pralayaścaiva sthitirutpattireva ca. prakriyā prathamaḥ pādaḥ kathyavastuparigrahaḥ ..12.. ### [1.4.14](https://indike.org/pramana/in.purana.vayu.1.4.14) upodvāto'nuṣaṅgaśca upasaṃhāra eva ca. dharmyaṃ yaśasyamāyuṣyaṃ sarvapāpapraṇāśanam ..13.. ### [1.4.15](https://indike.org/pramana/in.purana.vayu.1.4.15) evaṃ hi pādāścatvāraḥ samāsāt kīrttitā mayā. vakṣyāmyetān punastāṃstu vistareṇa yathākramam ..14.. ### [1.4.16](https://indike.org/pramana/in.purana.vayu.1.4.16) tasmai hiraṇyagarbhāya puruṣāyeśvarāya ca. antāya prathamāyaiva viśiṣṭāya prajātmane. brahmaṇe lokatantrāya namaskṛtya svayambhuve ..15.. ### [1.4.17](https://indike.org/pramana/in.purana.vayu.1.4.17) mahadādyaṃ viśeṣāntaṃ savairupyaṃ salakṣaṇam. pañcapramāṇaṃ ṣaṭśyetaṃ puruṣādhiṣṭhitaṃ nutam. asaṃśayāt pravakṣyāmi bhūtasargamanuttamam ..16.. ### [1.4.18](https://indike.org/pramana/in.purana.vayu.1.4.18) avyaktaṃ kāraṇaṃ yattu nityaṃ sadasadātmakam. pradhānaṃ prakṛtiṃ caiva yamāhustattva cintakāḥ ..17.. ### [1.4.19](https://indike.org/pramana/in.purana.vayu.1.4.19) gandhavarṇarasairhīnaṃ śabdasparśavivarjjitam. ajātaṃ dhruvamakṣayyaṃ nityaṃ svātmanyavasthitam ..18.. ### [1.4.20](https://indike.org/pramana/in.purana.vayu.1.4.20) jagadyoniṃ mahadbhūtaṃ paraṃ brahma sanātanam. vigrahaṃ sarvabhūtānāmavyaktamabhavat kila ..19.. ### [1.4.21](https://indike.org/pramana/in.purana.vayu.1.4.21) anādyantamajaṃ sūkṣmantriguṇaṃ prabhavāvyayam. asāmpratamavijñeyaṃ brahmāgre samavarttata ..20.. ### [1.4.22](https://indike.org/pramana/in.purana.vayu.1.4.22) tasyātmanā sarvamidaṃ vyāptamāsīttamomayam. guṇasāmye tadā tasmin guṇabhāve tamomaye ..21.. ### [1.4.23](https://indike.org/pramana/in.purana.vayu.1.4.23) gargakāle pradhānasya kṣetrajñādhiṣṭhitasya vai. guṇabhāvādvācyamāno mahān prādurbabhūva ha ..22.. ### [1.4.24](https://indike.org/pramana/in.purana.vayu.1.4.24) sūkṣmeṇa mahatā so'tha avyaktena samāvṛtaḥ. satvodrikto mahānagre sattvamātraprakāśakam. mano mahāṃśca vijñeyo manastatkāraṇaṃ smṛtam ..23.. ### [1.4.25](https://indike.org/pramana/in.purana.vayu.1.4.25) liṅgamātrasamutpannaḥ) kṣetrajñādhiṣṭhitastu saḥ. dharmādīnāntu rūpāṇi lokatattvārthahetavaḥ. mahāṃstu sṛṣṭiṃ kurute nodyamānaḥ sisṛkṣayā ..24.. ### [1.4.26](https://indike.org/pramana/in.purana.vayu.1.4.26) mano mahānmatirbrahmā pūrbuddhiḥ khyātirīśvaraḥ. prajñā citiḥ smṛtiḥ saṃvit vipuraṃ cocyate budhaiḥ ..25.. ### [1.4.27](https://indike.org/pramana/in.purana.vayu.1.4.27) manute sarvabhūtānāṃ yasmācceṣṭāphalaṃ vibhuḥ. saukṣmatvena vivṛddhānāṃ tena tanmana ucyate ..26.. ### [1.4.28](https://indike.org/pramana/in.purana.vayu.1.4.28) tattvānāmagrajo yasmānmahāṃśca parimāṇataḥ. śeṣebhyo'pi guṇebhyo'sau mahāniti tataḥ smṛtaḥ ..27.. ### [1.4.29](https://indike.org/pramana/in.purana.vayu.1.4.29) bibharti mānaṃ manute vibhāgaṃ manyate'pi ca. puruṣo bhogasambandhāt tena cāsau matiḥ smṛtaḥ ..28.. ### [1.4.30](https://indike.org/pramana/in.purana.vayu.1.4.30) bṛhattvādṛṃhaṇatvācca bhāvānāṃ salilāśrayāt. yasmād‌bṛṃhayate bhāvān brahmā tena nirucyate ..29.. ### [1.4.31](https://indike.org/pramana/in.purana.vayu.1.4.31) āpūrayitvā yasmācca kṛtsnān dehānanugrahaiḥ. tattvabhāvāṃśca niyatāṃ stena pūriti cocyate ..30.. ### [1.4.32](https://indike.org/pramana/in.purana.vayu.1.4.32) budhyate puruṣaścātra sarvabhāvān hitāhitān . yasmādbodhayate caiva tena buddhirnirucyate ..31.. ### [1.4.33](https://indike.org/pramana/in.purana.vayu.1.4.33) khyātiḥ pratyupabhogaśca yasmāt saṃvarttate tataḥ. bhogaśca jñānaniṣṭhatvāttena khyātiriti smṛtaḥ ..32.. ### [1.4.34](https://indike.org/pramana/in.purana.vayu.1.4.34) khyāyate tadguṇairvāpi nāmādibhiranekaśaḥ. tasmācca mahataḥ saṃjñā khyātirityabhidhīyate ..33.. ### [1.4.35](https://indike.org/pramana/in.purana.vayu.1.4.35) sākṣāt sarvaṃ vijānāti mahātmā tena ceśvaraḥ. tasmājjātā grahāścaiva prajñā tena sa ucyate ..34.. ### [1.4.36](https://indike.org/pramana/in.purana.vayu.1.4.36) jñānādīni ca rūpāṇi kratukarmaphalāni ca. cinoti yasmādbhogārthāntenāsau citirucyate ..35.. ### [1.4.37](https://indike.org/pramana/in.purana.vayu.1.4.37) varttamānānyatītāni tathā cānāgatānyapi. smarate sarvakāryāṇi tenāsau smṛtirucyate ..36.. ### [1.4.38](https://indike.org/pramana/in.purana.vayu.1.4.38) kṛtsnaṃ ca vindate jñānaṃ tasmānmāhātmyamucyate. tasmādvidervideścaiva saṃvidityabhidhīyate ..37.. ### [1.4.39](https://indike.org/pramana/in.purana.vayu.1.4.39) vidyate sa ca sarvasmin sarvaṃ tasmiśca vidyate. tasmātsaṃviditi prokto mahānvai buddhimattaraiḥ ..38.. ### [1.4.40](https://indike.org/pramana/in.purana.vayu.1.4.40) jñānāttu jñānamityāha bhagavān jñānasannidhiḥ. dvandvānāṃ vipurībhāvādvipuraṃ procyate budhaiḥ ..39.. ### [1.4.41](https://indike.org/pramana/in.purana.vayu.1.4.41) sarveśatvācca lokānāmavaśyaṃ ca tatheśvaraḥ. bṛhatvācca smṛto brahmā bhūtatvādbhava ucyate ..40.. ### [1.4.42](https://indike.org/pramana/in.purana.vayu.1.4.42) kṣetrakṣetrajñavijñānādekatvācca sa kaḥ smṛtaḥ. yasmāt puryanuśete ca tasmāt puruṣa ucyate. notpāditatvāt pūrvatvāt svayambhūriti cocyate ..41.. ### [1.4.43](https://indike.org/pramana/in.purana.vayu.1.4.43) paryāyavācakaiḥ śabdaistattvamādyamanuttamam. vyākhyātaṃ tattvabhāvajñairevaṃ sadbhāvacintakaiḥ ..42.. ### [1.4.44](https://indike.org/pramana/in.purana.vayu.1.4.44) mahān sṛṣṭiṃ vikurute codyamānaḥ sisṛkṣayā. saṅkalpo'dhyavasāyaśca tasya vṛttidvayaṃ smṛtam ..43.. ### [1.4.45](https://indike.org/pramana/in.purana.vayu.1.4.45) dharmādīni ca rūpāṇi lokatattvārthahetavaḥ. triguṇastu sa vijñeyaḥ sattvarājasatāmasaḥ ..44.. ### [1.4.46](https://indike.org/pramana/in.purana.vayu.1.4.46) triguṇādrajasodriktādahaṅkārastato'bhavat. mahatā cāvṛtaḥ sargo bhūtādivikṛtastu saḥ ..45.. ### [1.4.47](https://indike.org/pramana/in.purana.vayu.1.4.47) tasmācca tamasodriktādahaṅkārādajāyata. bhūtatanmātrasargastu bhūtādistāmasastu saḥ ..46.. ### [1.4.48](https://indike.org/pramana/in.purana.vayu.1.4.48) ākāśaṃ śuṣiraṃ tasmādudriktaṃ śabdalakṣaṇam. ākāśaṃ śabdamātrantu bhūtādiścāvṛṇot punaḥ ..47.. ### [1.4.49](https://indike.org/pramana/in.purana.vayu.1.4.49) śabdamātrantadākāśaṃ sparśamātraṃ sasarja ha. bhūtādistu vikurvāṇaḥ śabdamātraṃ sasarjja ha ..48.. ### [1.4.50](https://indike.org/pramana/in.purana.vayu.1.4.50) balavān jāyate vāyuḥ sa vai sparśaguṇo mataḥ. ākāśaṃ śabdamātrantu sparśamātraṃ samāvṛṇot ..49.. ### [1.4.51](https://indike.org/pramana/in.purana.vayu.1.4.51) rasamātrāstu tā hyāpo rūpamātrābhirāvṛṇot. āpo rasān vikurvantyo gandhamātraṃ sasarjjire ..50.. ### [1.4.52](https://indike.org/pramana/in.purana.vayu.1.4.52) saṅghāto jāyate tasmāttasya gandho guṇaḥ smṛtaḥ. rasamātrantu tattoyaṃ gandhamātraṃ samāvṛṇot ..51.. ### [1.4.53](https://indike.org/pramana/in.purana.vayu.1.4.53) tasmiṃstasmiṃstu tanmātrā tena tanmātratā smṛtā. aviśeṣavācakatvādaviśeṣāstataḥ smṛtāḥ. aśāntaghoramūḍhatvādaviśeṣāstataḥ punaḥ ..52.. ### [1.4.54](https://indike.org/pramana/in.purana.vayu.1.4.54) bhūtatanmātrasargo'yaṃ vijñeyastu parasparāt. vaikārikādahaṅkārātsatvodriktāttu sātvikāt. vaikārikaḥ sa sargastu yugapatsampravarttate ..53.. ### [1.4.55](https://indike.org/pramana/in.purana.vayu.1.4.55) buddhīndriyāṇi pañcaiva pañca karmendriyāṇyapi. sādhakānīndriyāṇi syurddevā vaikārikā daśa. ekādaśaṃ manastatra devā vaikārikāḥ smṛtā ..54.. ### [1.4.56](https://indike.org/pramana/in.purana.vayu.1.4.56) śrotraṃ tvak cakṣuṣī jihvā nāsikā caiva pañcamī. śabdādīnāmavāptyarthaṃ buddhiyuktāni vakṣyate ..55.. ### [1.4.57](https://indike.org/pramana/in.purana.vayu.1.4.57) pādau pāyurupasthañca hastau vāgdaśamī bhavet. gatirvisargo hyānandaḥ śilpaṃ vāsyañca karma ca ..56.. ### [1.4.58](https://indike.org/pramana/in.purana.vayu.1.4.58) ākāśaṃ śabdamātrañca sparśamātraṃ samāviśet. dviguṇastu tato vāyuḥ śabda sparśātmako'bhavat ..57.. ### [1.4.59](https://indike.org/pramana/in.purana.vayu.1.4.59) rūpantathaiva viśataḥ śabdasparśaguṇāvubhau. triguṇastu tataścāgniḥ sa śabdasparśarūpavān ..58.. ### [1.4.60](https://indike.org/pramana/in.purana.vayu.1.4.60) saśabdasparśarūpañca rasamātraṃ samāviśat. tasmāccaturguṇā hyāpo vijñeyāstā rasātmikāḥ ..59.. ### [1.4.61](https://indike.org/pramana/in.purana.vayu.1.4.61) saśabdasparśarūpeṣu gandhasteṣu samāviśat. saṃyuktā gandhamātreṇa ācinvanti mahīmimām. tasmātpañcaguṇā bhūmiḥ sthūlabhūteṣu dṛśyate ..60.. ### [1.4.62](https://indike.org/pramana/in.purana.vayu.1.4.62) śāntā ghorāśca mūḍhāśca viśeṣāstena te smṛtāḥ. parasparānupraveśāddhārayanti parasparam ..61.. ### [1.4.63](https://indike.org/pramana/in.purana.vayu.1.4.63) bhūmerantastivadaṃ sarvaṃ lokālokaghanāvṛtam. viśeṣā indriyagrāhyā niyatatvācca te smṛtāḥ ..62.. ### [1.4.64](https://indike.org/pramana/in.purana.vayu.1.4.64) guṇaṃ pūrvasya pūrvasya prāpnuvantyuttarottaram. teṣāṃ yāvacca yadyacca tattattāvadguṇaṃ smṛtam ..63.. ### [1.4.65](https://indike.org/pramana/in.purana.vayu.1.4.65) upalabhya śucergandhaṃ kecidvāyoranaipuṇāt. pṛthivyāmeva tadvidyādeṣāṃ vāyośca saṃśrayāt ..64.. ### [1.4.66](https://indike.org/pramana/in.purana.vayu.1.4.66) ete sapta mahāvīryā nānābhūtāḥ pṛthak pṛthak. nāśaknuvan prajāḥ sraṣṭumasamāgamya kṛtsnaśaḥ. te sametya mahātmāno hyayonyasyaiva saṃśrayāt ..65.. ### [1.4.67](https://indike.org/pramana/in.purana.vayu.1.4.67) puruṣādhiṣṭhitatvācca avyaktānugraheṇa ca. mahadādyā viśeṣāntā aṇḍamutpādayanti te ..66.. ### [1.4.68](https://indike.org/pramana/in.purana.vayu.1.4.68) ekakālaṃ samutpannaṃ jalabud‌budavacca tat. viśeṣebhyo'ṇḍamabhavad bṛhattadudakaṃ ca yat. tattasmin kāryakaraṇaṃ saṃsiddhaṃ brahmaṇastadā ..67.. ### [1.4.69](https://indike.org/pramana/in.purana.vayu.1.4.69) prākṛte'ṇḍe vibuddhe san kṣetrajño brahmasaṃjñitaḥ. sa vai śarīrī prathamaḥ sa vai puruṣa ucyate ..68.. ### [1.4.70](https://indike.org/pramana/in.purana.vayu.1.4.70) ādikarttā ca bhūtānāṃ brahmā'gre samavarttata. hiraṇyagarbhaḥ so'gro'smin prādurbhūtaścaturmukhaḥ. sarge ca prati sarge ca kṣetrajño brahmasaṃjñitaḥ ..69.. ### [1.4.71](https://indike.org/pramana/in.purana.vayu.1.4.71) karaṇaiḥ saha sṛjyante pratyāhāre tyajanti ca. bhajante ca punardehānasamāhārasandhiṣu ..70.. ### [1.4.72](https://indike.org/pramana/in.purana.vayu.1.4.72) hiraṇmayastu yo merustasyolbaṃ tanmahātmanaḥ. garbhodakaṃ samudrāśca jarādyasthīni parvatāḥ ..71.. ### [1.4.73](https://indike.org/pramana/in.purana.vayu.1.4.73) tasminnaṇḍe tvime lokā antarbhūtāstu sapta vai. saptadvīpā ca pṛthvīyaṃ samudraiḥ saha saptabhiḥ ..72.. ### [1.4.74](https://indike.org/pramana/in.purana.vayu.1.4.74) parvataiḥ sumahadbhiśca nadībhiśca sahasraśaḥ. antastasmiṃstvime lokā antarviśvamidaṃ jagat ..73.. ### [1.4.75](https://indike.org/pramana/in.purana.vayu.1.4.75) candrādityau sanakṣatrau sagrahau saha vāyunā. lokālokaṃ ca yat kiṃciccāṇḍe tasmin samarpitam ..74.. ### [1.4.76](https://indike.org/pramana/in.purana.vayu.1.4.76) adbhirdaśaguṇābhistu bāhyato'ṇḍaṃ samāvṛtam. āpo daśaguṇā hyevantejasā bāhyato vṛtāḥ ..75.. ### [1.4.77](https://indike.org/pramana/in.purana.vayu.1.4.77) tejaudaśaguṇenaiva bāhyato vāyunā vṛtam. vāyorddaśaguṇenaiva bāhyato nabhasā vṛtam ..76.. ### [1.4.78](https://indike.org/pramana/in.purana.vayu.1.4.78) ākāśena vṛto vāyuḥ khaṃ ca bhūtādinā vṛtam. bhūtādirmahatā cāpi avyaktena vṛto mahān. etairāvaraṇairaṇḍaṃ saptabhiḥ prākṛtairvṛtam ..77.. ### [1.4.79](https://indike.org/pramana/in.purana.vayu.1.4.79) etāsvāvṛtya cānyonyamaṣṭau prakṛtayaḥ sthitāḥ. prasargakāle sthitvā ca grasantyetāḥ parasparam ..78.. ### [1.4.80](https://indike.org/pramana/in.purana.vayu.1.4.80) evaṃ parasparotpannā dhārayanti parasparam. ādhārādheyabhāvena vikārasya vikāriṣu ..79.. ### [1.4.81](https://indike.org/pramana/in.purana.vayu.1.4.81) avyaktaṃ kṣetramuddiṣṭaṃ brahmā kṣetrajña ucyate. ityeṣa prākṛtaḥ sargaḥ kṣetrajñādhiṣṭhitastu saḥ. abuddhipūrvaṃ prāgāsīt prādurbhūtā taḍidyathā ..80.. ### [1.4.82](https://indike.org/pramana/in.purana.vayu.1.4.82) etaddhiraṇyagarbhasya janma yo veda tattvataḥ. āyuṣmān kīrtimān dhanyaḥ prajāvāṃśca bhavatyuta ..81.. ### [1.4.83](https://indike.org/pramana/in.purana.vayu.1.4.83) nivṛttikāmo'pi naraḥ śuddhātmā labhate gatim. purāṇaśravaṇānnityaṃ sukhaṃ ca kṣemamāpnuyāt ..82.. ### [1.4.84](https://indike.org/pramana/in.purana.vayu.1.4.84) iti mahāpurāṇe vāyuprokte sṛṣṭiprakaraṇaṃ nāma caturtho'dhyāyaḥ .. 4 .. ## Linked texts (12) - [Brahmāṇḍapurāṇa](https://indike.org/pramana/in.purana.brahmanda.1.3.1) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.4.7) — Vyāsa, Sanskrit - [Mārkaṇḍeyapurāṇa](https://indike.org/pramana/in.purana.markandeya.45.34) — Vyāsa, Sanskrit - [Śivapurāṇa](https://indike.org/pramana/in.purana.siva.7.1.10.14) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.1.2.47) — Sanskrit - [Padmapurāṇa](https://indike.org/pramana/in.purana.padma.1.1.103) — Vyāsa, Sanskrit - [Sāmbapurāṇa](https://indike.org/pramana/in.purana.upa.surya.samba.6.8) — Sanskrit - [Daśavidhahetunirūpaṇa](https://indike.org/pramana/in.vedanga.kalpa.grhya.vaikhanasa!tatparyacintamani.dasavidhahetunirupana.10.9) — Śrīnivāsamakhin, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.4.p3) — Ativīrarāma Pāṇṭiyar, Sanskrit - [Ṭoḍarānanda](https://indike.org/pramana/in.niti.dharma.nibandha.mahanibandha.todarananda.1.101) — Ṭoḍaramalla 1564, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p154) — Lakṣmīdhara Bhaṭṭa, Sanskrit - [Śivatattvaviveka (Appayya Dīkṣita)](https://indike.org/pramana/in.sampradaya.saiva.sivatattvaviveka-appayya-diksita.17.4) — Appayya Dīkṣita 1560, Sanskrit --- Source: [https://indike.org/pramana/in.purana.vayu.1.4](https://indike.org/pramana/in.purana.vayu.1.4) · Pramāṇa