[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.50 # Vayupurana 1.50: adhyāyaḥ 50 Vāyupurāṇa 1.50 - **Language:** Sanskrit ### adhyāyaḥ 50 ### [1.50.1](https://indike.org/pramana/in.purana.vayu.1.50.1) ..sūta uvāca.. adhaḥpramāṇamūrddhvañca varṇyamānaṃ nibodhata. pṛthivī vāyurākāśamāpo jyotiśca pañcamam. anantadhātavo hyete vyāpakāstu prakīrtitāḥ .. 50.1 .. ### [1.50.2](https://indike.org/pramana/in.purana.vayu.1.50.2) jananī sarvabhūtānāṃ sarva bhūtadharā dharā. nānājanapadākīrṇā nānādhiṣṭhānapattanā .. 50.2 .. ### [1.50.3](https://indike.org/pramana/in.purana.vayu.1.50.3) nānānadanadīśailā naikajātisamākulā. anantā gīyate devī pṛthivī bahuvistarā .. 50.3 .. ### [1.50.4](https://indike.org/pramana/in.purana.vayu.1.50.4) nadīnadasamudrasthāstathā kṣudrāśrayāḥ sthitāḥ. parvatākāśasaṃsthāśca antarbhūmigatāśca yāḥ .. 50.4 .. ### [1.50.5](https://indike.org/pramana/in.purana.vayu.1.50.5) āpo'nantāśca vijñeyāstathāgniḥ sarvalaukikaḥ. anantaḥ paṭhyate caiva vyāpakaḥ sarvasambhavaḥ .. 50.5 .. ### [1.50.6](https://indike.org/pramana/in.purana.vayu.1.50.6) tathākāśamanālambaṃ ramyaṃ nānāśrayaṃ smṛtam. anantaṃ prathitaṃ sarvaṃ vāyuścākāśasambhavaḥ .. 50.6 .. ### [1.50.7](https://indike.org/pramana/in.purana.vayu.1.50.7) āpaḥ pṛthivyāmudake pṛthivī copari sthitā. ākāśañcāparamadhaḥ punarbhūmiḥ punarjjalam .. 50.7 .. ### [1.50.8](https://indike.org/pramana/in.purana.vayu.1.50.8) evamantamanantasya bhautikasya na vidyate. purā surairabhihitaṃ niścitantu nibodhata .. 50.8 .. ### [1.50.9](https://indike.org/pramana/in.purana.vayu.1.50.9) bhūmirjalamathākāśamiti jñeyā paramparā. sthitireṣā tu vijñeyā saptame'smin rasātale .. 50.9 .. ### [1.50.10](https://indike.org/pramana/in.purana.vayu.1.50.10) daśayojanasāhasramekabhaumaṃ rasātalam. sādhubhiḥ parivikhyātamekaikaṃ bahuvistaram .. 50.10 .. ### [1.50.11](https://indike.org/pramana/in.purana.vayu.1.50.11) prathamamatalañcaiva sutalantu tataḥ param. tataḥ parataraṃ vidyādvitalaṃ bahuvistaram .. 50.11 .. ### [1.50.12](https://indike.org/pramana/in.purana.vayu.1.50.12) tato gabhastalaṃ nāma parataśca mahātalam. śrītalañca tataḥ prāhuḥ pātālaṃ saptamaṃsmṛtam .. 50.12 .. ### [1.50.13](https://indike.org/pramana/in.purana.vayu.1.50.13) kṛṣṇabhaumañca prathamaṃ bhūmibhāgañca kīrttitam. pāṇḍubhaumaṃ dvitīyantu tṛtīyaṃ raktamṛttikam .. 50.13 .. ### [1.50.14](https://indike.org/pramana/in.purana.vayu.1.50.14) pītabhaumañcaturthantu pañcamaṃ śarkarātalam. ṣaṣṭhaṃ silāmayañcaiva sauvarṇaṃ saptamantalam .. 50.14 .. ### [1.50.15](https://indike.org/pramana/in.purana.vayu.1.50.15) prathame tu tale khyātamasurendrasya mandiram. namucerindraśatrorhi mahānādasya cālayam .. 50.15 .. ### [1.50.16](https://indike.org/pramana/in.purana.vayu.1.50.16) purañca śaṅkukarṇasya kabandhasya ca mandiram. niṣkulādasya ca puraṃ prahṛṣṭajanasaṅkulam .. 50.16 .. ### [1.50.17](https://indike.org/pramana/in.purana.vayu.1.50.17) rākṣasasya ca bhīmasya śūladantasya cālayam. lohitākṣakaliṅgānāṃ nagaraṃ śvāpadasya tu .. 50.17 .. ### [1.50.18](https://indike.org/pramana/in.purana.vayu.1.50.18) dhanañjayasya ca puraṃ māhendrasya mahātmanaḥ . kāliyasya ca nāgasya nagaraṃ kalasasya ca .. 50.18 .. ### [1.50.19](https://indike.org/pramana/in.purana.vayu.1.50.19) evaṃ purasahasrāṇiṃ nāgadānavarakṣasām. tale jñeyāni prathame kṛṣṇabhaume na saṃśayaḥ .. 50.19 .. ### [1.50.20](https://indike.org/pramana/in.purana.vayu.1.50.20) dvitīye'pi tale viprā daityendrasya surakṣasaḥ. mahājambhasya ca tathā nagaraṃ prathamasya tu .. 50.20 .. ### [1.50.21](https://indike.org/pramana/in.purana.vayu.1.50.21) hayagrīvasya kṛṣṇasya nikumbhasya ca mandiram. śaṅkhākhyeyasya ca puraṃ nagaraṃ gomukhasya ca .. 50.21 .. ### [1.50.22](https://indike.org/pramana/in.purana.vayu.1.50.22) rākṣasasya ca nīlasya meghasya krathanasya ca. purañca kurupādasya mahoṣṇīṣasya cālayam .. 50.22 .. ### [1.50.23](https://indike.org/pramana/in.purana.vayu.1.50.23) kambalasya ca nāgasya puramaśvatarasya ca. kadruputrasya ca puraṃ takṣakasya mahātmanaḥ .. 50.23 .. ### [1.50.24](https://indike.org/pramana/in.purana.vayu.1.50.24) evaṃ purasahasrāṇi nāgadānavarakṣasām. dvitīye'smin tale viprāḥ pāṇḍubhaume na saṃśayaḥ .. 50.24 .. ### [1.50.25](https://indike.org/pramana/in.purana.vayu.1.50.25) tṛtīye tu talekhyātaṃ prahlādasya mahātmanaḥ. anuhlādasya ca puraṃ detyendrasya mahātmanaḥ .. 50.25 .. ### [1.50.26](https://indike.org/pramana/in.purana.vayu.1.50.26) tārakākh‌yasya ca puraṃ puraṃ triśirasastathā. śiśumārasya ca puraṃ hṛṣṭapuṣṭajanākulam .. 50.26 .. ### [1.50.27](https://indike.org/pramana/in.purana.vayu.1.50.27) cyavanasya ca vijñeyaṃ rākṣasasya ca mandiram. rākṣasendrasya ca puraṃkumbhilasya kharasyaca .. 50.27 .. ### [1.50.28](https://indike.org/pramana/in.purana.vayu.1.50.28) virādhasya ca krūrasya puramulkāmukhasya ca. hemakasya ca nāgasya tathā pāṇḍurakasya ca .. 50.28 .. ### [1.50.29](https://indike.org/pramana/in.purana.vayu.1.50.29) maṇimantrasya ca puraṃ kapilasya ca mandiram. nandasya coragapaterviśālasya ca mandiram .. 50.29 .. ### [1.50.30](https://indike.org/pramana/in.purana.vayu.1.50.30) evaṃ purasahasrāṇi nāgadānavarakṣasām. tṛtīye'smistale viprāḥ pītabhaume na saṃśayaḥ .. 50.30 .. ### [1.50.31](https://indike.org/pramana/in.purana.vayu.1.50.31) caturthe daityasiṃhasya kālanemermahātmanaḥ. gajakarṇasya ca puraṃ nagaraṃ kuñjarasya ca .. 50.31 .. ### [1.50.32](https://indike.org/pramana/in.purana.vayu.1.50.32) rākṣasendrasya ca puraṃ sumālerbahuvistaram. muñjasya lokanāthasya vṛkavaktrasya cālayam .. 50.32 .. ### [1.50.33](https://indike.org/pramana/in.purana.vayu.1.50.33) bahuyojanasāhasraṃ bahupakṣisamākulam . nagaraṃ vainateyasya caturthe'smin rasātale .. 50.33 .. ### [1.50.34](https://indike.org/pramana/in.purana.vayu.1.50.34) pañcame śarkarābhaume bahuyojanavistṛte. virocanasya nagaraṃ daityasiṃhasya dhīmataḥ .. 50.34 .. ### [1.50.35](https://indike.org/pramana/in.purana.vayu.1.50.35) vaiḍhūryyasyāgnijihvasya hiraṇyākṣasya cālayam. purañca vidyujjihvasya rākṣasasya ca dhīmataḥ .. 50.35 .. ### [1.50.36](https://indike.org/pramana/in.purana.vayu.1.50.36) mahāmeghasya ca puraṃ rākṣasendrasya śālinaḥ. karmmārasya ca nāgasya svastikasya jayasya ca .. 50.36 .. ### [1.50.37](https://indike.org/pramana/in.purana.vayu.1.50.37) evaṃ purasahasrāṇi nāgadānavarakṣasām. pañcame'pi tathā jñeyaṃ śarkarānilaye sadā .. 50.37 .. ### [1.50.38](https://indike.org/pramana/in.purana.vayu.1.50.38) ṣaṣṭhe tale daityapateḥ kesarernagarottamam. suparvvaṇaḥ sulomnaśca nagaraṃ mahiṣasya ca. rākṣasendrasya ca puramutkrośasya mahātmanaḥ .. 50.38 .. ### [1.50.39](https://indike.org/pramana/in.purana.vayu.1.50.39) tatrāste surasāputraḥ śataśīrṣo mudā yutaḥ. kaśyapasya sutaḥ śrīmān vāsukirnāma nāgarāṭ .. 50.39 .. ### [1.50.40](https://indike.org/pramana/in.purana.vayu.1.50.40) evaṃ purasahasrāṇi nāgadānavarakṣasām . ṣaṣṭhe tale'smin vikhyāte śilābhaume rasātale .. 50.40 .. ### [1.50.41](https://indike.org/pramana/in.purana.vayu.1.50.41) saptame tu tale jñeyaṃ pātāle sarvvapaścime . puraṃ baleḥ pramuditaṃ naranārīsamākulam .. 50.41 .. ### [1.50.42](https://indike.org/pramana/in.purana.vayu.1.50.42) asurāśīviṣaiḥ pūrṇamuddhṛtairddevaśatrubhiḥ. mucukundasya daityasya tatra vai nagaraṃ mahat .. 50.42 .. ### [1.50.43](https://indike.org/pramana/in.purana.vayu.1.50.43) anekairditiputrāṇāṃ samudīrṇairmahāpuraiḥ. tathaiva nāganagaraiṛddhimadbhiḥ sahasraśaḥ .. 50.43 .. ### [1.50.44](https://indike.org/pramana/in.purana.vayu.1.50.44) daityānāṃ dānavānāñca samudīrṇai rmahāpuraiḥ. udīrṇai rākṣasāvāsairanekaiśca samākulam .. 50.44 .. ### [1.50.45](https://indike.org/pramana/in.purana.vayu.1.50.45) pātālānte ca viprendrā vistīrṇe bahuyojane. āste raktāravindākṣo mahātmā hyajarāmaraḥ .. 50.45 .. ### [1.50.46](https://indike.org/pramana/in.purana.vayu.1.50.46) dhautaśaṅkhodaravapurnīlavāsā mahābhujaḥ. viśālabhogo dyutimāṃścitramālādharo balī .. 50.46 .. ### [1.50.47](https://indike.org/pramana/in.purana.vayu.1.50.47) rukmaśrṛṅagāvadātena dīptāsyena virājatā. prabhurmukhasahasreṇa śobhate vai sa kuṇḍalī .. 50.47 .. ### [1.50.48](https://indike.org/pramana/in.purana.vayu.1.50.48) sa jihvāmālayā devo lolajvālānalārciṣā. jvālāmālāparikṣiptaḥ kailāsa iva lakṣyate .. 50.48 .. ### [1.50.49](https://indike.org/pramana/in.purana.vayu.1.50.49) sa tu netrasahasreṇa dviguṇena virājatā. bālasūryyābhitāmreṇa śobhate snigdhamaṇḍalaḥ .. 50.49 .. ### [1.50.50](https://indike.org/pramana/in.purana.vayu.1.50.50) tasya kundenduvarṇasya akṣamālā virājate . taruṇādityamāleva śvetaparvvatamūrddhani .. 50.50 .. ### [1.50.51](https://indike.org/pramana/in.purana.vayu.1.50.51) jaṭākarālo dyutimān lakṣyate śayanāsane. vistīrṇa iva medinyāṃ sahasraśikharo giriḥ .. 50.51 .. ### [1.50.52](https://indike.org/pramana/in.purana.vayu.1.50.52) mahābhogairmahābhāgairmahānāgairmahābalaiḥ. upāsyate mahātejā mahānāgapatiḥ svayam .. 50.52 .. ### [1.50.53](https://indike.org/pramana/in.purana.vayu.1.50.53) sa rājā sarvanāgānāṃ śeṣo nāma mahādyutiḥ. sā vaiṣṇavī hyahitanurmaryādāyāṃ vyavasthitā .. 50.53 .. ### [1.50.54](https://indike.org/pramana/in.purana.vayu.1.50.54) saptaivamete kathitā vyavahāryā rasātalāḥ . devāsuramahānāgarākṣasādhyuṣitāḥ sadā .. 50.54 .. ### [1.50.55](https://indike.org/pramana/in.purana.vayu.1.50.55) ataḥparamanālokyamagamyaṃ siddhasādhubhiḥ. devā mānapyaviditaṃ vyavahāravivarjjitam .. 50.55 .. ### [1.50.56](https://indike.org/pramana/in.purana.vayu.1.50.56) pṛthivyagnyambuvāyūnāṃ nabhasaśca dvijottamāḥ. mahattvamevamṛṣibhirvarṇyate nātra saṃśayaḥ .. 50.56 .. ### [1.50.57](https://indike.org/pramana/in.purana.vayu.1.50.57) ata ūrddhvaṃ pravakṣyāmi sūryācandramasorgatim. sūryācandramasāvetau bhramantau yāvadeva tu. prakāśataḥ svabhābhistau maṇḍalābhyāṃ samāsthitau .. 50.57 .. ### [1.50.58](https://indike.org/pramana/in.purana.vayu.1.50.58) saptānāñca samudrāṇāṃ dvīpānāntu sa vistaraḥ. vistarārddhaṃ pṛthivyāstu bhavedanyatra bāhyataḥ .. 50.58 .. ### [1.50.59](https://indike.org/pramana/in.purana.vayu.1.50.59) paryāsapārimāṇyantu cāndrādityau prakāśataḥ. paryāsapārimāṇyena bhūmestulyaṃ divaṃ smṛtam .. 50.59 .. ### [1.50.60](https://indike.org/pramana/in.purana.vayu.1.50.60) avati trīnimān lokān yasmāt sūryaḥ paribhraman. avadhātuḥ prakāśākhyo hyavanātsa raviḥ smṛtaḥ .. 50.60 .. ### [1.50.61](https://indike.org/pramana/in.purana.vayu.1.50.61) ataḥ paraṃ pravakṣyāmi pramāṇaṃ candrasūryayoḥ. mahitatvānmahīśabdo hyasmin varṣe nipātyate .. 50.61 .. ### [1.50.62](https://indike.org/pramana/in.purana.vayu.1.50.62) asya bhāratavarṣasya viṣkambhantu suvistaram. maṇḍalaṃ bhāskarasyātha yojanānāṃ nibodhata .. 50.62 .. ### [1.50.63](https://indike.org/pramana/in.purana.vayu.1.50.63) navayojanasāhasro vistāro bhāskarasya tu. vistārātrriguṇaścāsya pariṇāho'tha maṇḍalam. viṣkambo maṇjalasyaiva bhāskarād dviguṇaḥ śaśī .. 50.63 .. ### [1.50.64](https://indike.org/pramana/in.purana.vayu.1.50.64) ataḥ pṛthivyāṃ vakṣyāmi pramāṇaṃ yojanaiḥ saha. saptadvīpasamudrāyā vistāro maṇjalañca yat .. 50.64 .. ### [1.50.65](https://indike.org/pramana/in.purana.vayu.1.50.65) ityetadiha saṅkhyātaṃ purāṇaṃ parimāṇataḥ. tadvakṣyāmi prasaṅkhyāya sāmpratairabhimānibhiḥ .. 50.65 .. ### [1.50.66](https://indike.org/pramana/in.purana.vayu.1.50.66) abhimānivyatītā ye tulyāste sāmpratairiha. devā ye vai hyatītāste rūpairnāmabhireva ca .. 50.66 .. ### [1.50.67](https://indike.org/pramana/in.purana.vayu.1.50.67) tasmāttu sāmpratairdevairvakṣyāmi vasudhātalam. divastu sanniveśo vai sāmprataireva kṛtsnaśaḥ .. 50.67 .. ### [1.50.68](https://indike.org/pramana/in.purana.vayu.1.50.68) śatārddha koṭivistārā pṛthivī kṛtsnataḥ smṛtā. tasyā vārdhapramāṇena merorvai cāturantaram .. 50.68 .. ### [1.50.69](https://indike.org/pramana/in.purana.vayu.1.50.69) pṛthivyā vārdhavistāro yojanāgrātprakīrttitaḥ . merumadhyāt prati diśaṃ koṭirekādaśa smṛtāḥ .. 50.69 .. ### [1.50.70](https://indike.org/pramana/in.purana.vayu.1.50.70) tathā śatasahasrāṇi ekonanavatiḥ punaḥ. pañcāśacca sahasrāṇi pṛthivyā vārdhavistaraḥ .. 50.70 .. ### [1.50.71](https://indike.org/pramana/in.purana.vayu.1.50.71) pṛthivyā vistaraṃ kṛtsnaṃ yojanaistannibodhata. tisraḥ koṭyastu vistāraḥ saṃkhyātaḥ sa caturdiśam .. 50.71 .. ### [1.50.72](https://indike.org/pramana/in.purana.vayu.1.50.72) tathā śatasahasrāṇāmekonāśītirucyate. saptadvīpasamudrāyāḥ pṛthivyāstveṣa vistaraḥ .. 50.72 .. ### [1.50.73](https://indike.org/pramana/in.purana.vayu.1.50.73) vistārāt triguṇa़ñcaiva pṛthivyantasya maṇḍalam. gaṇitaṃ yojanāgrantu koṭyastvekādaśa smṛtāḥ .. 50.73 .. ### [1.50.74](https://indike.org/pramana/in.purana.vayu.1.50.74) tathā śatasahasrantu sapta triṃśādhikāni tu. ityetadvai prasaṅkhyātaṃ pṛthivyantasya maṇḍalam .. 50.74 .. ### [1.50.75](https://indike.org/pramana/in.purana.vayu.1.50.75) tārakāsanniveśasya divi yāvaddhi maṇḍalam. paryāsaḥ sanniveśasya bhūmastāvattu maṇḍalam .. 50.75 .. ### [1.50.76](https://indike.org/pramana/in.purana.vayu.1.50.76) paryāsapārimāṇḍena bhūmestulyaṃ divaṃ smṛtam. saptānāmapi lokānāmetanmānaṃ prakīrtitam .. 50.76 .. ### [1.50.77](https://indike.org/pramana/in.purana.vayu.1.50.77) paryāsapārimāṇḍena maṇḍalānugatena ca. uparyupari lokānāṃ chatravatparimaṇḍalam .. 50.77 .. ### [1.50.78](https://indike.org/pramana/in.purana.vayu.1.50.78) saṃsthitirvihitā sarvā yeṣu tiṣṭhanti jantavaḥ. etadaṇḍakaṭāhasya pramāṇaṃ parikīrttitam .. 50.78 .. ### [1.50.79](https://indike.org/pramana/in.purana.vayu.1.50.79) aṇḍasyāntastvime lokāḥ saptadvīpā ca medinī. bhūrlokasva bhuvaścaiva tṛtīyaḥ svariti smṛtaḥ . maharloko janaścaiva tapaḥ satyaśca saptamaḥ .. 50.79 .. ### [1.50.80](https://indike.org/pramana/in.purana.vayu.1.50.80) ete sapta kṛtā lokāśchatrākārā vyavasthitāḥ. svakairāvaraṇaiḥ sūkṣmairdhāryamāṇāḥ pṛthak pṛthak .. 50.80 .. ### [1.50.81](https://indike.org/pramana/in.purana.vayu.1.50.81) daśabhāgādhikābhiśca tābhiḥ prakṛtibhirbahiḥ. dhāryamāṇā viśeṣaiśca samutpannaiḥ parasparam .. 50.81 .. ### [1.50.82](https://indike.org/pramana/in.purana.vayu.1.50.82) asyāṇḍasya samantācca sanniviṣṭo ghanodadhiḥ. pṛthivīmaṇḍalaṃ kṛtsnaṃ ghanatoyena dhāryate .. 50.82 .. ### [1.50.83](https://indike.org/pramana/in.purana.vayu.1.50.83) ghanodadhipareṇātha dhāryyate ghanatejasā. bāhyato ghanatejastu tiryyagūrddhvantu maṇḍalam .. 50.83 .. ### [1.50.84](https://indike.org/pramana/in.purana.vayu.1.50.84) samantādvanavātena dhāryyamāṇaṃ pratiṣṭhitam. ghanavātāttathākāśamākāśañca mahātmanā .. 50.84 .. ### [1.50.85](https://indike.org/pramana/in.purana.vayu.1.50.85) bhūtādinā vṛtaṃ sarvvaṃ bhūtādhirmahatā vṛtaḥ . vṛto mahānanantena pradhānenāvyayātmanā .. 50.85 .. ### [1.50.86](https://indike.org/pramana/in.purana.vayu.1.50.86) purāṇi lokapālānāṃ pravakṣyāmi yathākramam . jyotirgaṇapracārasya pramāṇaṃ parivakṣyate .. 50.86 .. ### [1.50.87](https://indike.org/pramana/in.purana.vayu.1.50.87) meroḥ prācyāṃ diśi tathā mānasasyaiva mūrddhani. vasvokasārā māhendrī puṇyā hemapariṣkṛtā . 50.87 .. ### [1.50.88](https://indike.org/pramana/in.purana.vayu.1.50.88) dakṣiṇena punarmerormānasasyaiva mūrddhani. vaivasvato nivasati yamaḥ saṃyamane pure .. 50.88 .. ### [1.50.89](https://indike.org/pramana/in.purana.vayu.1.50.89) pratīcyāntu punarmerormānasasyaiva mūrddhani. sukhā nāma purī ramyā varuṇasyātha dhīmataḥ .. 50.89 .. ### [1.50.90](https://indike.org/pramana/in.purana.vayu.1.50.90) diśyuttarasyāṃ merostu mānasasyaiva mūrddhani. tulyā māhendrapuryyā tu somasyāpi vibhāvarī .. 50.90 .. ### [1.50.91](https://indike.org/pramana/in.purana.vayu.1.50.91) mānasottarapṛṣṭhe tu lokapālāścaturddiśam. sthitā dharmmavyavasthāyai lokasaṃrakṣaṇāya ca .. 50.91 .. ### [1.50.92](https://indike.org/pramana/in.purana.vayu.1.50.92) lokapālopariṣṭāttu sarvvato dakṣiṇāyane. kāṣṭhāgatasya sūryyasya gatiryā tāṃ nibodhata .. 50.92 .. ### [1.50.93](https://indike.org/pramana/in.purana.vayu.1.50.93) dakṣiṇe prakrame sūryyaḥ kṣipteṣuriva sarpati. jyotiṣāñcakramādāya satataṃ parigacchati .. 50.93 .. ### [1.50.94](https://indike.org/pramana/in.purana.vayu.1.50.94) madhyagaścāmarāvatyāṃ yadā bhavati bhāskaraḥ. vaivasvate saṃyamane udayastatra ucyate .. 50.94 .. ### [1.50.95](https://indike.org/pramana/in.purana.vayu.1.50.95) sukhāyāmarddharātrañca madhyagaḥ syādraviryadā. sukhāyāmatha vāruṇyāmuttiṣṭhan sa tu dṛśyate .. 50.95 .. ### [1.50.96](https://indike.org/pramana/in.purana.vayu.1.50.96) vibhāyāmarddharātraṃ syānmāhendyrāmastameti ca. tadā dakṣiṇapūrvveṣāmaparāhno vidhīyate .. 50.96 .. ### [1.50.97](https://indike.org/pramana/in.purana.vayu.1.50.97) dakṣiṇāpara deśyānāṃ pūrvvāhnaḥ parikīrttyate. teṣāmapararātrañca ye janā uttarāpathe .. 50.97 .. ### [1.50.98](https://indike.org/pramana/in.purana.vayu.1.50.98) deśā uttarapūrvvā ye pūrvvarātrantu tān prati. evamevottareṣvarko bhavaneṣu virājate .. 50.98 .. ### [1.50.99](https://indike.org/pramana/in.purana.vayu.1.50.99) sukhāyāmatha vāruṇyāṃ madhyāhne cāryyamā yadā. vibhāvaryyāṃ somapuryyāmuttiṣṭhati vibhāvasuḥ .. 50.99 .. ### [1.50.100](https://indike.org/pramana/in.purana.vayu.1.50.100) rātryarddhaṃ cāmarāvatyāmastameti yamasya ca. somapuryāṃ vibhāyāntu madhyāhne syāddhivākaraḥ .. 50.100 .. ### [1.50.101](https://indike.org/pramana/in.purana.vayu.1.50.101) mahendrasyāmarāvatyāmuttiṣṭhati yadā raviḥ. arddharātraṃ saṃyamane vāruṇyāmastameti ca .. 50.101 .. ### [1.50.102](https://indike.org/pramana/in.purana.vayu.1.50.102) sa śīgrameti paryyeti bhāskaro'lātacakravat. bhraman vai bhramamāṇāni ṛkṣāṇi gagane raviḥ .. 50.102 .. ### [1.50.103](https://indike.org/pramana/in.purana.vayu.1.50.103) evaṃ caturṣu dvīpeṣu dakṣiṇāntena sarpati. udayāstamanenāsāvuttiṣṭhati punaḥ punaḥ .. 50.103 .. ### [1.50.104](https://indike.org/pramana/in.purana.vayu.1.50.104) pūrvvāhne cāparāhne tu dvau dvau devālayau tu saḥ. tapatyekantu madhyāhne taireva tu saraśmibhiḥ .. 50.104 .. ### [1.50.105](https://indike.org/pramana/in.purana.vayu.1.50.105) udito varddhamānābhirāmadhyāhnaṃ tapan raviḥ. ataḥ paraṃ hrasantībhirgobhirastaṃ sa gacchati .. 50.105 .. ### [1.50.106](https://indike.org/pramana/in.purana.vayu.1.50.106) udayāstamayābhyāṃ hismṛte pūrvāpare diśo. yāvatpurastāttapati tāvat pṛṣṭhe tu pārśvayoḥ .. 50.106 .. ### [1.50.107](https://indike.org/pramana/in.purana.vayu.1.50.107) yatrodyan dṛśyate sūryasteṣāṃ sa udayaḥ smṛtaḥ. yatra praṇāśamāyāti teṣāmastaḥ sa ucyate .. 50.107 .. ### [1.50.108](https://indike.org/pramana/in.purana.vayu.1.50.108) sarveṣāmuttare merurlokālokastu dakṣiṇe. vidūrabhāvādarkasya bhūmerlekhāvṛtasya ca. hriyante raśmayo yasmāttena rātrau na dṛśyate .. 50.108 .. ### [1.50.109](https://indike.org/pramana/in.purana.vayu.1.50.109) grahanakṣatratārāṇāṃ darśanaṃ bhāskarasya ca. ucchrāyasya pramāṇena jñeyamastamanodayam .. 50.109 .. ### [1.50.110](https://indike.org/pramana/in.purana.vayu.1.50.110) śuklacchāyognirāpaśca kṛṣṇacchāyā ca medinī. vidūrabhāvādarkasya udyātasya viraśmitā. raktābāvo viraśmitvādraktatvāccāpyanuṣṇatā .. 50.110 .. ### [1.50.111](https://indike.org/pramana/in.purana.vayu.1.50.111) lekhayāvasthitaḥ sūryo yatra yatra tu dṛśyate. ūrddhvaṃ gataḥ sahasrantu yojanānāṃ sa dṛśyate .. 50.111 .. ### [1.50.112](https://indike.org/pramana/in.purana.vayu.1.50.112) prabhā hi saurī pādena astaṅgacchati bhāskare. agnimāviśate rātrau tasmāddūrāt prakāśate .. 50.112 .. ### [1.50.113](https://indike.org/pramana/in.purana.vayu.1.50.113) uditastu punaḥ sūryaḥ astamāgneyamāviśat. saṃyukto vahninā sūryastataḥ sa tapate divā .. 50.113 .. ### [1.50.114](https://indike.org/pramana/in.purana.vayu.1.50.114) prākāśyañca tathauṣṇyañca sūryāgneyī ca tejasī. parasparānupraveśādāpyāyete divāniśam .. 50.114 .. ### [1.50.115](https://indike.org/pramana/in.purana.vayu.1.50.115) uttare caiva bhūmyarddhe tathā tasmiṃśca dakṣiṇe. uttiṣṭhati tathā sūrye rātrirāviśate tvapaḥ . tasmāttāmrā bhavantyāpo divārātripraveśanāt .. 50.115 .. ### [1.50.116](https://indike.org/pramana/in.purana.vayu.1.50.116) astaṃ yāti punaḥ sūrye dinaṃ vai praviśatyapaḥ. tasmācchuklā bhavantyāpo naktamahnaḥ praveśanāt .. 50.116 .. ### [1.50.117](https://indike.org/pramana/in.purana.vayu.1.50.117) etena kramayogena bhūmyarddhe dakṣiṇottare. udayāstamane'rkasya ahorātraṃ viśatyapaḥ .. 50.117 .. ### [1.50.119](https://indike.org/pramana/in.purana.vayu.1.50.119) dinaṃ sūryaprakāśākhyaṃ tāmasī rātrirucyate. tasmādvyavasthitā rātriḥ sūryāvekṣyamahaḥ smṛtam .. 50.118. evaṃ puṣkaramadhyena yadā sarpati bhāskaraḥ. triṃśāṃ śakantu medinyā muhūrtenaiva gacchati .. 50.119 .. ### [1.50.120](https://indike.org/pramana/in.purana.vayu.1.50.120) yojanāgrānmuhūrttasya imāṃ saṅkhyāṃ nibodhata. pūrṇaṃ śatasahasrāṇāmekatriṃśattu sā smṛtā .. 50.120 .. ### [1.50.121](https://indike.org/pramana/in.purana.vayu.1.50.121) pañcāśattu tathānyāni sahasrāṇyadhikāni tu. mauhūrttikī gatirhyeṣā sūryasya tu vidhīyate .. 50.121 .. ### [1.50.122](https://indike.org/pramana/in.purana.vayu.1.50.122) etena gatiyogena yadā kāṣṭhāntu dakṣiṇām. paryyāgacchettadādityo māghe kāṣṭhāntameva hi .. 50.122 .. ### [1.50.123](https://indike.org/pramana/in.purana.vayu.1.50.123) sarpate dakṣiṇāyāntu kāṣṭhāyāṃ tannibodhata. navakoṭyaḥ prasaṅkhyātā yojanaiḥ parimaṇḍalam .. 50.123 .. ### [1.50.124](https://indike.org/pramana/in.purana.vayu.1.50.124) tathā śatasahasrāṇi catvāriṃśacca pañca ca. ahorātrātpataṅgasya gatireṣā vidhīyate .. 50.124 .. ### [1.50.125](https://indike.org/pramana/in.purana.vayu.1.50.125) dakṣiṇādvinivṛtto'sau viṣuvastho yadā raviḥ. kṣīrodasya samudrasya uttarāntā diśaścaran .. 50.125 .. ### [1.50.126](https://indike.org/pramana/in.purana.vayu.1.50.126) maṇḍalaṃ viṣuvadyāpi yojanaistannibodhata. tisraḥ koṭyastu vistīrṇā viṣuvadyāpi sā smṛtā .. 50.126 .. ### [1.50.127](https://indike.org/pramana/in.purana.vayu.1.50.127) tathā śatasahasrāṇāmaśītyekādhikā punaḥ . śravaṇe cottarāṃ kāṣṭhāñcitrabhānuryadā bhavet . śākadvīpasya ṣaṣṭhasya uttarāntā diśaścaran .. 50.127 .. ### [1.50.128](https://indike.org/pramana/in.purana.vayu.1.50.128) uttarāyāñca kāṣṭhāyāṃ pramāṇaṃ maṇ‍ḍalasya ca. yojanāgrātprasaṅkhyātā koṭirekā tu sā dvijaiḥ .. 50.128 .. ### [1.50.129](https://indike.org/pramana/in.purana.vayu.1.50.129) aśītirniyutānīha yojanānāṃ tathaiva ca. aṣṭapañcāśatañcaiva yojanānyadhikāni tu .. 50.129 .. ### [1.50.130](https://indike.org/pramana/in.purana.vayu.1.50.130) nāgavīthyuttarāvīthī ajavīthī ca dakṣiṇā. mūlaṃ caiva tathāṣāḍe hyajavīthyudayāstrayaḥ. abhijitpūrvataḥ svātirnāgavīthyudayāstrayaḥ .. 50.130 .. ### [1.50.131](https://indike.org/pramana/in.purana.vayu.1.50.131) kāṣṭhayorantaraṃ yacca tadvakṣye yojanaiḥ punaḥ. etacchatasahasrāṇāmekatriṃśottaraṃ śatam .. 50.131 .. ### [1.50.132](https://indike.org/pramana/in.purana.vayu.1.50.132) trayastriṃśādhikāścānye trayastriṃśacca yojanaiḥ. kāṣṭhayorantaraṃ hyetadyojanāgrāt pratiṣṭhitam .. 50.132 .. ### [1.50.133](https://indike.org/pramana/in.purana.vayu.1.50.133) kāṣṭhayorlekhayoścaiva antare dakṣiṇottare . te tu vakṣyāmi saṅkhyāya yojanaistannibodhata .. 50.133 .. ### [1.50.134](https://indike.org/pramana/in.purana.vayu.1.50.134) ekaikamantarantasyā niyutānyekasaptatiḥ. sahasrāṇyatiriktāśca tato'nyā pañcasaptatiḥ .. 50.134 .. ### [1.50.135](https://indike.org/pramana/in.purana.vayu.1.50.135) lekhayoḥ kāṣṭhayoścaiva bāhyābhyantarayoḥ smṛtam. abhyantarantu paryeti maṇḍalānyuttarāyaṇe .. 50.135 .. ### [1.50.136](https://indike.org/pramana/in.purana.vayu.1.50.136) bāhyato dakṣiṇe caiva satatantu yathākramam. maṇḍalānāṃ śataṃ pūrṇamaśītyadhikamuttaram .. 50.136 .. ### [1.50.137](https://indike.org/pramana/in.purana.vayu.1.50.137) carate dakṣiṇe cāpi tāvadeva vibhāvasuḥ. pramāṇaṃ maṇḍalasyātha yojanāgrānnibodhata .. 50.137 .. ### [1.50.138](https://indike.org/pramana/in.purana.vayu.1.50.138) ekaviṃśadyojanānāṃ sahasrāṇi samāsataḥ. śate dve punarapyanye yojanānāṃ prakīrttite .. 50.138 .. ### [1.50.139](https://indike.org/pramana/in.purana.vayu.1.50.139) ekaviṃśatibhiścaiva yojanairadhikairhi te. etatpramāṇamākhyātaṃ yojanairmaṇḍalaṃ hi tat .. 50.139 .. ### [1.50.140](https://indike.org/pramana/in.purana.vayu.1.50.140) viṣkambho maṇḍalasyaiṣa tiryak sa tu vidhīyate. pratyahañcarate tāni sūryo vai maṇḍalakramam .. 50.140 .. ### [1.50.141](https://indike.org/pramana/in.purana.vayu.1.50.141) kulālacakraparyanto yathā śīghraṃ nivarttate. dakṣiṇe prakrame sūryastathā śīghraṃ nivarttate .. 50.141 .. ### [1.50.142](https://indike.org/pramana/in.purana.vayu.1.50.142) tasmāt prakṛṣṭāṃ bhūmiñca kālenālpena gacchati. sūryo dvādaśabhiḥ śīghraṃ muhūrtterdakṣiṇottare .. 50.142 .. ### [1.50.143](https://indike.org/pramana/in.purana.vayu.1.50.143) trayodaśārddhamṛkṣāṇāmahnānucarate raviḥ. muhūrttaistāvadṛkṣāṇi naktamaṣṭādaśaiścaran .. 50.143 .. ### [1.50.144](https://indike.org/pramana/in.purana.vayu.1.50.144) kulālacakramadhyastu yathā mandaṃ prasarpati. tathodagayane sūryaḥ sarpate mandavikramaḥ .. 50.144 .. ### [1.50.145](https://indike.org/pramana/in.purana.vayu.1.50.145) trayodaśārddhamarddhena ṛkṣāṇāṃ carate raviḥ. tasmāddīrgheṇa kālena bhūmimilpāṃ nigacchati .. 50.145 .. ### [1.50.146](https://indike.org/pramana/in.purana.vayu.1.50.146) aṣṭādaśamuhūrttaistu uttarāyaṇapaścimam. aharbhavati taccāpi carate mandavikramaḥ .. 50.146 .. ### [1.50.147](https://indike.org/pramana/in.purana.vayu.1.50.147) trayodaśārddhamardhena ṛkṣāṇāñcarate raviḥ. muhūrttaistāvadṛkṣāṇi naktamaṣṭādaśaiścaran .. 50.147 .. ### [1.50.148](https://indike.org/pramana/in.purana.vayu.1.50.148) tato mandataraṃ tābhyāñcakraṃ bhramati vai yathā. mṛtpiṇḍa iva madhyastho dhruvo bhramati vai yathā .. 50.148 .. ### [1.50.149](https://indike.org/pramana/in.purana.vayu.1.50.149) triṃśanmuhūrttāne vāhurahorātraṃ dhruvo bhraman . ubhayoḥ kāṣṭhayormadhye bhramate maṇḍalāni saḥ .. 50.149 .. ### [1.50.150](https://indike.org/pramana/in.purana.vayu.1.50.150) kulālacakranābhistu yathā tatraiva varttate. dhruvastathā hi vijñeyastatraiva parivarttate .. 50.150 .. ### [1.50.151](https://indike.org/pramana/in.purana.vayu.1.50.151) ubhayoḥ kāṣṭhayormadhye bhramato maṇḍalāni tu. divā naktañca sūryasya mandā śīghrā ca vai gatiḥ .. 50.151 .. ### [1.50.152](https://indike.org/pramana/in.purana.vayu.1.50.152) uttare prakrame tvindo rdivā mandā gatiḥ smṛtā. tathaiva ca punarnaktaṃ śīghrā sūryasya vai gatiḥ .. 50.152 .. ### [1.50.153](https://indike.org/pramana/in.purana.vayu.1.50.153) dakṣiṇe prakrame caiva divā śīghraṃ vidhīyate . gatiḥ sūryasya naktaṃ vai mandā cāpi tathā smṛtā .. 50.153 .. ### [1.50.154](https://indike.org/pramana/in.purana.vayu.1.50.154) evaṃ gativiśeṣeṇa vibhajan rātryahāni tu. tathā vicarate mārgaṃ samena viṣameṇa ca .. 50.154 .. ### [1.50.155](https://indike.org/pramana/in.purana.vayu.1.50.155) lokāloke sthitā ye te lokapālāścaturdiśam. agastyaścarate teṣāmupariṣṭājjavena tu . bhajannasāvahorātramevaṅgativiśeṣaṇaiḥ .. 50.155 .. ### [1.50.156](https://indike.org/pramana/in.purana.vayu.1.50.156) dakṣiṇe nāgavīthyāyāṃ lokālokasya cottaram. lokasantārako hyeṣa vaiśvānarapathādbahiḥ .. 50.156 .. ### [1.50.157](https://indike.org/pramana/in.purana.vayu.1.50.157) pṛṣṭhe yāvat prabhā sauhī purastāt samprakāśate. pārśvayoḥ pṛṣṭhatastāvallokālokasya sarvataḥ .. 50.157 .. ### [1.50.158](https://indike.org/pramana/in.purana.vayu.1.50.158) yojanānāṃ sahasrāṇi daśorddvantūcchrito giriḥ. prakāśaścāprakāśaśca sarvataḥ parimaṇḍalaḥ .. 50.158 .. ### [1.50.159](https://indike.org/pramana/in.purana.vayu.1.50.159) nakṣatracandrasūryāśca grahāstārāgaṇaiḥ saha. abhyantaraṃ prakāśante lokālokasya vai gireḥ .. 50.159 .. ### [1.50.160](https://indike.org/pramana/in.purana.vayu.1.50.160) etāvāneva lokastu nirālokastvataḥ param. lokāloka ekadhā tu nirālokastvanekadhā .. 50.160 .. ### [1.50.161](https://indike.org/pramana/in.purana.vayu.1.50.161) lokālokantu sandhatte yasmāt sūryaḥ parigraham. tasmātsandhyeti tāmāhuruṣāvyuṣṭyoryadantaram . uṣā rātriḥ smṛtā viprairvyuṣṭiścāpi tvahaḥ smṛtam .. 50.161 .. ### [1.50.162](https://indike.org/pramana/in.purana.vayu.1.50.162) sūryaṃ hi grasamānānāṃ sandhyākāle hi rakṣasām. prajāpatiniyogena śāpasteṣāṃ durātmanām . akṣayatvañca dehasya prāpitā maraṇaṃ tathā .. 50.162 .. ### [1.50.163](https://indike.org/pramana/in.purana.vayu.1.50.163) tisraḥ koṭyastu vikhyātā mandehā nāma rākṣasāḥ. prārthayanti sahasrāṃśumudayanti dine dine. tāpayanto durātmānaḥ sūryamicchanti khāditum .. 50.163 .. ### [1.50.164](https://indike.org/pramana/in.purana.vayu.1.50.164) atha sūryasya teṣāñca yuddhamāsīt sudāruṇam. tato brahmā ca devāśca brāhmaṇāścaiva sattamāḥ. sandhyeti samupāsantaḥ kṣepayanti mahājalam .. 50.164 .. ### [1.50.165](https://indike.org/pramana/in.purana.vayu.1.50.165) oṅkārabrahmasaṃyuktaṃ gāyatryā cābhimantritam. tena dahyanti te daityā vajrabhūtena vāriṇā .. 50.165 .. ### [1.50.166](https://indike.org/pramana/in.purana.vayu.1.50.166) tataḥ punarmahātejā mahādyutiparākramaḥ. yojanānāṃ saha srāṇi ūrddhvamuttiṣṭhate śatam .. 50.166 .. ### [1.50.167](https://indike.org/pramana/in.purana.vayu.1.50.167) tataḥ prayāti bhagavān brāhmaṇaiḥ parivāritaḥ. vālakhilyaiśca munibhiḥ kṛtārthaiḥ samarīcibhiḥ .. 50.167 .. ### [1.50.168](https://indike.org/pramana/in.purana.vayu.1.50.168) kāṣṭhā nimeṣā daśa pañca caiva triṃśacca kāṣṭhā gaṇayet kalāntam . triṃśat kalāścaiva bhavenmuhūrttastaistriṃśatā rātryahanī samete .. 50.168 .. ### [1.50.169](https://indike.org/pramana/in.purana.vayu.1.50.169) hrāsavṛddhī tvaharbhāgairdivasānāṃ yathākramam. sandhyā muhūrtamānantu hrāse vṛddhau samā smṛtā .. 50.169 .. ### [1.50.170](https://indike.org/pramana/in.purana.vayu.1.50.170) lekhāprabhṛtyathāditye trimuhūrttāgate tu vai. prātastanaḥ smṛtaḥ kālo bhāgastvahnaḥ sa pañcamaḥ .. 50.170 .. ### [1.50.171](https://indike.org/pramana/in.purana.vayu.1.50.171) tasmāt prātastanātkālāt trimuhūrttastu saṅgavaḥ. madhyāhnastrimuhūrttastu tasmātkālācca saṅgavāt .. 50.171 .. ### [1.50.172](https://indike.org/pramana/in.purana.vayu.1.50.172) tasmānmadhyandināt kālādaparāhna iti smṛtaḥ . traya eva muhūrttāstu tasmāt kālācca madhyamāt .. 50.172 .. ### [1.50.173](https://indike.org/pramana/in.purana.vayu.1.50.173) aparāhne vyatīpāte kāla- sāyāhna ucyate. daśapañcamuhūrttādvai muhūrttāstraya eva ca .. 50.173 .. ### [1.50.174](https://indike.org/pramana/in.purana.vayu.1.50.174) daśapañcamuhūrttaṃ vai aharviṣuvati smṛtam. daśapañcamuhūrttādvai rātrindivamiti smṛtam .. 50.174 .. ### [1.50.175](https://indike.org/pramana/in.purana.vayu.1.50.175) vardhdhate hrasate caiva ayane dakṣiṇottare. ahastu grasate rātriṃ rātristu grasate tvahaḥ .. 50.175 .. ### [1.50.176](https://indike.org/pramana/in.purana.vayu.1.50.176) śaradvasantayormadhye viṣuvantadvibhāvyate. ahorātraṃ kalāścaiva sapta somaḥ samaśrute .. 50.176 .. ### [1.50.177](https://indike.org/pramana/in.purana.vayu.1.50.177) tathā pañcadaśāhāni pakṣa ityābhidhīyate. dvau pakṣau ca bhavenmāso dvau māsāvantarāvṛtuḥ. ṛtutrayamayanaṃ syāddvai'yane varṣamucyate .. 50.177 .. ### [1.50.178](https://indike.org/pramana/in.purana.vayu.1.50.178) nimeṣādikṛtaḥ kālaḥ kāṣṭhāyā daśa pañca ca. kalāyāstriṃśataḥ kāṣṭhā mātrāghītidvayātmikā .. 50.178 .. ### [1.50.179](https://indike.org/pramana/in.purana.vayu.1.50.179) śataghnaikonakāstriṃśanmātrātriśat ṣaḍuttarā. dviṣaṣṭibhāk trayoviṃśanmātrāyāñca calā bhavet .. 50.179 .. ### [1.50.180](https://indike.org/pramana/in.purana.vayu.1.50.180) catvāriṃśatsahasrāṇi śatānyaṣṭau ca vidyutiḥ. saptatiñcāpi tatraiva navatiṃ viddhi nisvaye .. 50.180 .. ### [1.50.181](https://indike.org/pramana/in.purana.vayu.1.50.181) catvāryeva śatānyāhurvidyutau vaidhasaṃyuge. carāṃśo hyeṣa vijñeyo nālikā cātra kāraṇam .. 50.181 .. ### [1.50.182](https://indike.org/pramana/in.purana.vayu.1.50.182) saṃvatsarādayaḥ pañca caturmānavikalpitāḥ. niścayaḥ sarvakālasya yuga ityabhidhīyate .. 50.182 .. ### [1.50.183](https://indike.org/pramana/in.purana.vayu.1.50.183) saṃvatsarastu prathamo dvitīyaḥ parivatsaraḥ. idvatsarastṛtīyastu caturthaścānuvatsaraḥ. pañcamo vatsarasteṣāṃ kālastu parisaṃjñitaḥ .. 50.183 .. ### [1.50.184](https://indike.org/pramana/in.purana.vayu.1.50.184) viṃśaśataṃ bhavetpūrṇaṃ parvaṇāṃ tu raveryugam. etānyaṣṭādaśastriṃśadudayo bhāskarasya ca .. 50.184 .. ### [1.50.185](https://indike.org/pramana/in.purana.vayu.1.50.185) ṛtavastriṃśataḥ saurā ayanāni daśaiva tu. pañcatriṃśat śataṃ cāpi ṣaṣṭirmāsāśca bhāskaraḥ .. 50.185 .. ### [1.50.186](https://indike.org/pramana/in.purana.vayu.1.50.186) triṃśadeva tvahorātraṃ sa tu māsaśca bhāskaraḥ. ekaṣaṣṭistvahorātrā danureko nibhāvyate .. 50.186 .. ### [1.50.187](https://indike.org/pramana/in.purana.vayu.1.50.187) ahnāntu tryadhikāśītiḥ śataṃ cāpyadhikaṃ bhavet. mānaṃ taccitrabhānostu vijñeyaṃ bhuvanasya tu .. 50.187 .. ### [1.50.188](https://indike.org/pramana/in.purana.vayu.1.50.188) saurasaumyaṃ tu vijñeyaṃ nakṣatraṃ sāvanaṃ tathā. nāmānyetāni catvāri yaiḥ purāṇaṃ vibhāvyate .. 50.188 .. ### [1.50.189](https://indike.org/pramana/in.purana.vayu.1.50.189) khe tasyottarataścaiva śrṛṅgavānnāma parvataḥ. trīṇi tasya tu śrṛṅgāṇi spṛśantīva nabhastalam .. 50.189 .. ### [1.50.190](https://indike.org/pramana/in.purana.vayu.1.50.190) taiścāpi śrṛṅgavānnāma sarvataścaiva viśrutaḥ. ekamārgaśca vistāro viṣkambhaścāpi kīrtitaḥ .. 50.190 .. ### [1.50.191](https://indike.org/pramana/in.purana.vayu.1.50.191) tasya vai sarvataḥ śrṛṅgaṃ madhyamantaddhiraṇmayam. dakṣiṇaṃ rājatañcaiva śrṛṅgaṃ tu sphaṭikaprabham .. 50.191 .. ### [1.50.192](https://indike.org/pramana/in.purana.vayu.1.50.192) sarvaratnamayaṃ caikaṃ śrṛṅgamuttaramuttamam. evaṃ kūṭaisribhiḥ śailaiḥ śrṛṅgavāniti viśrutaḥ .. 50.192 .. ### [1.50.193](https://indike.org/pramana/in.purana.vayu.1.50.193) yattadviṣuvataṃ śrṛṅgantadarkaḥ pratipadyate. śaradvasantayormadhye madhyamāṃ gatimāsthitaḥ. ahastulyāmatho rātriṃ karoti timirāpahaḥ .. 50.193 .. ### [1.50.194](https://indike.org/pramana/in.purana.vayu.1.50.194) haritāśca hayā divyāste niyuktā mahārathe. anuliptā ivābhānti pajharaktairgabhastibhiḥ .. 50.194 .. ### [1.50.195](https://indike.org/pramana/in.purana.vayu.1.50.195) meṣānte ca tulānte ca bhāskarodayataḥ smṛtāḥ . muhūrttā daśa pañcaiva ahorātriśca tāvatī .. 50.195 .. ### [1.50.196](https://indike.org/pramana/in.purana.vayu.1.50.196) kṛttikānāṃ yadā sūryaḥ prathamāṃśagato bhavet . viśākhānāṃ tathā jñeyaścaturthāṃśe niśākaraḥ.. 50.196 .. ### [1.50.197](https://indike.org/pramana/in.purana.vayu.1.50.197) viśākhāyāṃ yadā sūrya ścrateṃ'śaṃ tṛtīyakam. tadā candraṃ vijānīyāt kṛttikāśirasi sthitam .. 50.197 .. ### [1.50.198](https://indike.org/pramana/in.purana.vayu.1.50.198) viṣuvantaṃ tadā vidyādevamāhurmaharṣayaḥ. sūryeṇa viṣuvaṃ vidyāt kālaṃ somena lakṣayet .. 50.198 .. ### [1.50.199](https://indike.org/pramana/in.purana.vayu.1.50.199) samā rātrirahaścaiva yadā tadviṣuvadbhavet. tadā dānāni deyāni pitṛbhyo viṣuvatyapi. brāhmaṇebhyo viśeṣeṇa mukhametattu daivatam .. 50.199 .. ### [1.50.200](https://indike.org/pramana/in.purana.vayu.1.50.200) ūnarātrādhimāsau ca kalākāṣṭhāmuhūrttakāḥ. paurṇamāsī tathā jñeyā amāvāsyā tathaiva ca. sinīvālī kuhūścaiva rākā cānumati stathā .. 50.200 .. ### [1.50.201](https://indike.org/pramana/in.purana.vayu.1.50.201) tapastapasyau madhumādhavau ca śukraḥ śuciścāyanamuttaraṃ syāt. nabho nabhaśyo'tha iṣuḥ sahorjaḥ sahaḥsahasyāviti dakṣiṇaṃ syāt .. 50.201 .. _First 200 of 223 passages. [Read on](https://indike.org/pramana/in.purana.vayu.1.50)_ ## Linked texts (10) - [Brahmāṇḍapurāṇa](https://indike.org/pramana/in.purana.brahmanda.1.20.3) — Vyāsa, Sanskrit - [Matsyapurāṇa](https://indike.org/pramana/in.purana.matsya.124.5) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.8.32) — Sanskrit - [Liṅgapurāṇa](https://indike.org/pramana/in.purana.linga.1.54.4) — Vyāsa, Sanskrit - [Sāmbapurāṇa](https://indike.org/pramana/in.purana.upa.surya.samba.19.5) — Sanskrit - [Vīraśaivānandacandrikā (Maritontadārya)](https://indike.org/pramana/in.sampradaya.saiva.virasaiva.virasaivanandacandrika-maritontadarya.29.27) — Maritontadārya 1725, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.60.4) — Ativīrarāma Pāṇṭiyar 1500, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.17.68) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.17.68) — Basava, Sanskrit - [Gṛhastharatnākara](https://indike.org/pramana/in.niti.dharma.acara.ahnika.grhastharatnakara.17.p11) — Caṇḍeśvara, Sanskrit --- Source: [https://indike.org/pramana/in.purana.vayu.1.50](https://indike.org/pramana/in.purana.vayu.1.50) · Pramāṇa