[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.56 # Vayupurana 1.56: adhyāyaḥ 56 Vāyupurāṇa 1.56 - **Language:** Sanskrit ### adhyāyaḥ 56 ### [1.56.1](https://indike.org/pramana/in.purana.vayu.1.56.1) ..śāṃśapāyana uvāca .. ### [1.56.2](https://indike.org/pramana/in.purana.vayu.1.56.2) agātkathamamāvāsyāṃ māsi māsi divaṃ nṛpaḥ. ailaḥ purūravāḥ sūta kathaṃ vā'tarpayat pitṝn .. 56.1 .. ### [1.56.3](https://indike.org/pramana/in.purana.vayu.1.56.3) ..sūta uvāca.. ### [1.56.4](https://indike.org/pramana/in.purana.vayu.1.56.4) tasya cāhaṃ pravakṣyāmi prabhāvaṃ śāṃśapāyana. ailasyādityasaṃyogaṃ somasya ca mahātmanaḥ .. 56.2 .. ### [1.56.5](https://indike.org/pramana/in.purana.vayu.1.56.5) apāṃsāramayasyendoḥ pakṣayoḥ śuklakṛṣṇayoḥ. hrāsavṛddhī pitṛmataḥ pakṣasya ca vinirṇayaḥ .. 56.3 .. ### [1.56.6](https://indike.org/pramana/in.purana.vayu.1.56.6) somāccaivāmṛtaprāptiḥ pitṝṇāṃ tarpaṇaṃ tathā. kavyāgneścāttasomānāṃ pitṝṇāñcaiva darśanam .. 56.4 .. ### [1.56.7](https://indike.org/pramana/in.purana.vayu.1.56.7) yathā purūravāścaila tarpayāmāsa vai pitṝn. etatsarvaṃ pravakṣyāmi parvāṇi ca yathākramam .. 56.5 .. ### [1.56.8](https://indike.org/pramana/in.purana.vayu.1.56.8) yadā tu candrasūryau tau nakṣatreṇa samāgatau. amāvāsyānnivasata ekarātraikamaṇḍale .. 56.6 .. ### [1.56.9](https://indike.org/pramana/in.purana.vayu.1.56.9) sa gacchati tadā draṣṭuṃ divākaraniśākarau. amāvasyāmamāvāsyāṃ mātāmahapitāmahau. abhivādya tadā tatra kālāpekṣaḥ pratīkṣyate .. 56.7 .. ### [1.56.10](https://indike.org/pramana/in.purana.vayu.1.56.10) prasīdamānāt somācca pitrarthaṃ tatparisravāt. ailaḥ purūravā vidvān māsi māsi prayatnataḥ. uvāste pitṛmantaṃ taṃ sasomaṃ sa divāsthitaḥ .. 56.8 .. ### [1.56.11](https://indike.org/pramana/in.purana.vayu.1.56.11) dvilavaṃ kuhumātraṃ tu te ubhe tu vicārya saḥ. sinīvālīpramāṇena sinīvālīmupāsakaḥ .. 56.9 .. ### [1.56.12](https://indike.org/pramana/in.purana.vayu.1.56.12) kuhūmātrāṃ kalāñcaiva jñātvopāste kuhuṃ punaḥ. sa tadā bhānumatyeka kālāvekṣī prapaśyati .. 56.10 .. ### [1.56.13](https://indike.org/pramana/in.purana.vayu.1.56.13) sudhāmṛtaṃ kutaḥ somāt prasravenmāsatṛptaye. daśabhiḥ pañcabhiścaiva sudhāmṛtaparisravaiḥ .. 56.11 .. ### [1.56.14](https://indike.org/pramana/in.purana.vayu.1.56.14) kṛṣṇapakṣe tadā pītvā duhyamānaṃ tathāṃśubhiḥ. sadyaḥ pakṣaratā tena saumyena madhunā ca saḥ .. 56.12 .. ### [1.56.15](https://indike.org/pramana/in.purana.vayu.1.56.15) nirvāpaṇārthaṃ dattena pitreṇa vidhinā nṛpaḥ. sudhāmṛtena rājendrastarpayāmāsa vai pitṝn. saumyā barhiṣadaḥ kāvyā agniṣvāttāstathaiva ca .. 56.13 .. ### [1.56.16](https://indike.org/pramana/in.purana.vayu.1.56.16) ṛturagnistu yaḥ proktaḥ sa tu saṃvatsaro mataḥ. jajñire hyṛtavastasmādṛtubhyaścārttavāśca ye . 56.14 .. ### [1.56.17](https://indike.org/pramana/in.purana.vayu.1.56.17) ārttavā hyarddhamāsākhyāḥ pitaro hyabdasūnavaḥ. ṛtuḥ pitāmahā māsā ṛtuścaivābhdasūnavaḥ .. 56.15 .. ### [1.56.18](https://indike.org/pramana/in.purana.vayu.1.56.18) prapitāmahāstu vai devāḥ pañcābdā brahmaṇaḥ sutāḥ. saumyāstu saumyajā jñeyāḥ kāvyā jñeyāḥ kaveḥ sutāḥ .. 56.16 .. ### [1.56.19](https://indike.org/pramana/in.purana.vayu.1.56.19) upahūtāḥ smṛtāḥ devāḥ somajāḥ somapāstathā. ājyapāstu smṛtāḥ kāvyāstṛpyanti pitṛjātayaḥ .. 56.17 .. ### [1.56.20](https://indike.org/pramana/in.purana.vayu.1.56.20) kāvyā barhiṣadaścaiva agniṣvāttāśca te tridhā. gṛhasthā ye ca yajvānā ṛturbarhiṣado dhruvam .. 56.18 .. ### [1.56.21](https://indike.org/pramana/in.purana.vayu.1.56.21) gṛhasthāścāpi yajvānā agniṣvāttāstathārttavāḥ. aṣṭakāpatayaḥ kāvyāḥ pañcābdāstānnibodhata .. 56.19 .. ### [1.56.22](https://indike.org/pramana/in.purana.vayu.1.56.22) eṣāṃ saṃvatsaro hyagniḥ sūryastu parivatsaraḥ. soma īdvatsaraḥ prokto vāyuścaivānuvatsaraḥ .. 56.20 .. ### [1.56.23](https://indike.org/pramana/in.purana.vayu.1.56.23) rudrastu vatsarasteṣāṃ pañcābdā ye yugātmakāḥ. lekhāśvaivoṣmapāścaiva divākīrtyāśca te smṛtāḥ .. 56.21 .. ### [1.56.24](https://indike.org/pramana/in.purana.vayu.1.56.24) ete pibantyamāvāsyāṃ māsi māsi sudhāṃ divi . tāṃstena tarpayāmāsa yāvadāsīt purūravāḥ .. 56.22 .. ### [1.56.25](https://indike.org/pramana/in.purana.vayu.1.56.25) yasmāt prasravate somānmāsi māsi nibodhata. tasmāt sudhāmṛtaṃ dvai pitṝṇāṃ somapāyinām .. 56.23 .. ### [1.56.26](https://indike.org/pramana/in.purana.vayu.1.56.26) evaṃ tadamṛtaṃ saumyaṃ sudhā ca madhu caiva ha . kṛṣṇapakṣe yathā cendoḥ kalāḥ pañcadaśa kramāt .. 56.24 .. ### [1.56.27](https://indike.org/pramana/in.purana.vayu.1.56.27) pibantyambumayīrde vāstrayastriṃśattu chandajāḥ. pītvā ca māsaṃ gacchanti caturddaśyāṃ sudhāmṛtam .. 56.25 .. ### [1.56.28](https://indike.org/pramana/in.purana.vayu.1.56.28) ityevaṃ pīyamānastu daivataiśca niśākaraḥ. samāgacchadamāvāsyāṃ bhāge pañcadaśe sthitaḥ .. 56.26. suṣumnāpyāyitañcaiva amāvāsyāṃ yathākramam. pibanti dvikalaṃ kālaṃ pitaraste sudhāmṛtam .. 56.27 .. ### [1.56.29](https://indike.org/pramana/in.purana.vayu.1.56.29) tataḥ pītakṣaye some sūryo'sāvekaraśminā. āpyāyayatsuṣumnena pitṝṇāṃ somapāyinām .. 56.28 .. ### [1.56.30](https://indike.org/pramana/in.purana.vayu.1.56.30) niḥśeṣāyāṃ kalāyāntu somamāpyāyayat punaḥ. suṣumnāpyāyamānasya bhāgaṃ bhāga mahaḥkramāt. kalāḥ kṣīyanti tāḥ kṛṣṇāḥ śuklāścāpyāyayanti ca .. 56.29 .. ### [1.56.31](https://indike.org/pramana/in.purana.vayu.1.56.31) evaṃ sūryasya vīryeṇa candrasyāpyāyitā tanuḥ. dṛśyate paurṇamāsyāṃ vai śuklaḥ sampūrṇamaṇḍalaḥ. saṃsiddhirevaṃ somasya pakṣayoḥ śuklakṛṣṇayoḥ .. 56.30 .. ### [1.56.32](https://indike.org/pramana/in.purana.vayu.1.56.32) ityeṣa pitṛmān somaḥ smṛta idvatsaraḥ kramāt . krāntaḥ paṃcadaśaiḥ sārddhaṃ sudhā mṛtaparisravaiḥ .. 56.31 .. ### [1.56.33](https://indike.org/pramana/in.purana.vayu.1.56.33) ataḥ parvāṇi vakṣyāmi parvaṇāṃ sandhayastathā. granthimanti yathā parvāṇīkṣuveṇvorbhavantyuta .. 56.32 .. ### [1.56.34](https://indike.org/pramana/in.purana.vayu.1.56.34) tathārddhamāsaparvāṇi śuklakṛṣṇāni vai viduḥ. pūrṇāmāvāsyayorbhedairgranthiryā sandhayaśca vai . arddhamāsāstu parvāṇi tṛtīyāprabhṛtīni tu .. 56.33 .. ### [1.56.35](https://indike.org/pramana/in.purana.vayu.1.56.35) agnayādhānakriyā yasmāt kriyate parvasandhiṣu. sāyāhne pratipaccaiva sa kālaḥ paurṇamāsikaḥ .. 56.34 .. ### [1.56.36](https://indike.org/pramana/in.purana.vayu.1.56.36) vyatīpāte sthite sūrye lesorddhantu yugāntare. yugāntarodite caiva lekhorddhaṃ śaśinaḥ kramāt .. 56.35 .. ### [1.56.37](https://indike.org/pramana/in.purana.vayu.1.56.37) paurṇamāse vyatīpāte yadīkṣete parasparam. yasminkāle sa sīmānte sa vyatīpāta eva tu .. 56.36 .. ### [1.56.38](https://indike.org/pramana/in.purana.vayu.1.56.38) kālaṃ sūryasya nirddeśaṃ dṛṣṭvā saṅkhyā tu sarpati. sa vai pathaṃ kriyākālaḥ kālātsadyo vidhīyate .. 56.37 .. ### [1.56.39](https://indike.org/pramana/in.purana.vayu.1.56.39) pūrṇendoḥ pūrṇapakṣe tu rātrisandhiṣu pūrṇimā. yasmāttāmanupaśyanti pitaro daivataiḥ saha. tasmādanumatirnāma pūrṇimā prathamā smṛtā .. 56.38 .. ### [1.56.40](https://indike.org/pramana/in.purana.vayu.1.56.40) atyarthaṃ bhrājate yasmāt paurṇamāsyānniśākaraḥ. rañjanāccaiva candrasya rāketi kavayo viduḥ .. 56.39 .. ### [1.56.41](https://indike.org/pramana/in.purana.vayu.1.56.41) amā vasetāmṛkṣe tu yadā candradivākarau. ekāṃ pañcadaśīṃ rātrimamāvāsyā tataḥ smṛtā .. 56.40 .. ### [1.56.42](https://indike.org/pramana/in.purana.vayu.1.56.42) tato'parasya tairvyaktaḥ paurṇamāsyāṃ niśākaraḥ. yadīkṣate vyatīpāte divā pūrṇe parasparam. candrārkāvaparāhne tu pūrṇātmānau tu pūrṇimā .. 56.41 .. ### [1.56.43](https://indike.org/pramana/in.purana.vayu.1.56.43) vicchinnāṃ tāmamāvāsyāṃ paśyataśca samāgatau. anyonyaṃ candrasūryau tau yadā taddarśa ucyate .. 56.42 .. ### [1.56.44](https://indike.org/pramana/in.purana.vayu.1.56.44) dvau dvau lavāvamāvāsyāṃ yaḥ kālaḥ parvasandhiṣu. dvākṣaraṃ kuhumātraṃ tu evaṃ kālastu sa smṛtaḥ. naṣṭacandrā pyamāvāsyā madhyasūryeṇa saṅgatā .. 56.43 .. ### [1.56.45](https://indike.org/pramana/in.purana.vayu.1.56.45) divasārddhena rātryarddhaṃ sūryaṃ prāpya tu candramāḥ. sūryeṇa sahasā muktiṃ gatvā prātastanotsavau . dvau kālau saṅgamaścaiva madhyāhne niṣpatedraviḥ .. 56.44 .. ### [1.56.46](https://indike.org/pramana/in.purana.vayu.1.56.46) pratipacchuklapakṣasya candramāḥ sūryamaṇḍalāt. nirmucyamānayormadhye tayormaṇḍalayostu vai .. 56.45 .. ### [1.56.47](https://indike.org/pramana/in.purana.vayu.1.56.47) sa tadā hyāhuteḥ kālo darśasya ca vaṣaṭkriyā. etadṛtumukhaṃ jñeyamamāvāsyāsya parvaṇaḥ .. 56.46 .. ### [1.56.48](https://indike.org/pramana/in.purana.vayu.1.56.48) divā parvaṇyamāvāsyāṃ kṣīṇendau bahule tu vai. tasmāddivā hyamāvāsyāṃ gṛhyate'sau divākaraḥ. gṛhyate vai divā hyasmādamāvāsyāṃ divikṣayaiḥ .. 56.47 .. ### [1.56.49](https://indike.org/pramana/in.purana.vayu.1.56.49) kalānāmapi vai tāsāṃ bahumānyājaḍātmakaiḥ. tithīnāṃ nāma dheyāni vidvadbhiḥ saṃjñitāni vai .. 56.48 .. ### [1.56.50](https://indike.org/pramana/in.purana.vayu.1.56.50) darśayetāmathānyonyaṃ sūryācandramasāvubhau . niṣkrāmatyatha tenaiva kramaśaḥ sūryamaṇḍalāt .. 56.49 .. ### [1.56.51](https://indike.org/pramana/in.purana.vayu.1.56.51) dvilavena hyaho rātraṃ bhāskaraṃ spṛśate śaśī. sa tadā hyāhuteḥ kālo darśasya ca vaṣaṭ‌kriyā .. 56.50 .. ### [1.56.52](https://indike.org/pramana/in.purana.vayu.1.56.52) kuheti kokirenokto yaḥ kālaḥ paricihnitaḥ. tatkālasaṃjñitā yasmādamāvāsyā kuhuḥ smṛtā .. 56.51 .. ### [1.56.53](https://indike.org/pramana/in.purana.vayu.1.56.53) sinīvālīpramāṇena kṣīṇaśeṣo niśākaraḥ. amāvāsyāṃ viśatyarkaṃ sinīvālī tataḥ smṛtā .. 56.52 .. ### [1.56.54](https://indike.org/pramana/in.purana.vayu.1.56.54) parvaṇaḥ parvakālastu tulyo vai tu vaṣaṭ‌kriyā. candrasūryavyatīpāte ubhe te pūrṇime smṛte .. 56.53 .. ### [1.56.55](https://indike.org/pramana/in.purana.vayu.1.56.55) pratipatpañcadaśyośca parvakālo dvimātrakaḥ. kālaḥ kuhusinīvālyoḥ samudro dvilavaḥ smṛtaḥ .. 56.54 .. ### [1.56.56](https://indike.org/pramana/in.purana.vayu.1.56.56) arkāgnimaṇḍale some parvakālaḥ kalāśrayaḥ. evaṃ sa śukrapakṣo vai rajanyāḥ parvasandhiṣu .. 56.55 .. ### [1.56.57](https://indike.org/pramana/in.purana.vayu.1.56.57) sampūrṇamaṇḍalaḥ śrīmāṃścandramā uparajyate. yasmādāpyāyate somaḥ pañcadaśyāntu pūrṇimā .. 56.56 .. ### [1.56.58](https://indike.org/pramana/in.purana.vayu.1.56.58) daśabhiḥ pañcabhiścaiva kalābhirdivasakramāt. tasmāt kalā pañcadaśī some nāsti tu ṣoḍaśī. tasmātsomasya bhavati pañcadaśyāṃ mahākṣayaḥ .. 56.57 .. ### [1.56.59](https://indike.org/pramana/in.purana.vayu.1.56.59) ityete pitaro devāḥ somapāḥ somavarddhanāḥ. ārttavā ṛtavo yasmātte devā bhāvayanti ca .. 56.58 .. ### [1.56.60](https://indike.org/pramana/in.purana.vayu.1.56.60) ataḥ pitṝn pravakṣyāmi māsaśrāddhabhujastu ye. teṣāṃ gatiñca sattvañca gatiṃ śrāddhasya caiva hi .. 56.59 .. ### [1.56.61](https://indike.org/pramana/in.purana.vayu.1.56.61) na mṛtānāṃ gatiḥ śakyā vijñātuṃ punarāgatiḥ. tapasāpi prasiddhena kiṃ punarmāṃsacakṣuṣā .. 56.60 .. ### [1.56.62](https://indike.org/pramana/in.purana.vayu.1.56.62) śrāddhadevān pidṝnetān pitaro laukikāḥ smṛtāḥ. devāḥ saumyāśca yajvānaḥ sarve caiva hyayonijāḥ .. 56.61 .. ### [1.56.63](https://indike.org/pramana/in.purana.vayu.1.56.63) devāste pitaraḥ sarve devāstān bhāvayantyuta. manuṣyāḥ pitaraścaiva tebhyo'nye laukikāḥ smṛtāḥ .. 56.62 .. ### [1.56.64](https://indike.org/pramana/in.purana.vayu.1.56.64) pitā pitāmahaścaiva tathaiva prapitāmahaḥ. yajvāno ye tu some na somavantastu te smṛtāḥ .. 56.63 .. ### [1.56.65](https://indike.org/pramana/in.purana.vayu.1.56.65) ye yajvānaḥ smṛtāsteṣāṃ te vai barhiṣadaḥ smṛtāḥ. karmasveteṣu yuktāste tṛpyantyādehasambhavāt .. 56.64 .. ### [1.56.66](https://indike.org/pramana/in.purana.vayu.1.56.66) agniṣvāttāḥ smṛtāsteṣāṃ homino yājyayājinaḥ. ye vāpyāśramadharmeṇa prasthāneṣu vyavasthitāḥ .. 56.65 .. ### [1.56.67](https://indike.org/pramana/in.purana.vayu.1.56.67) ante ca naiva sīdanti śraddhāyuktena karmaṇā. brahmacaryeṇa tapasā yajñena prajayā ca vai .. 56.66 .. ### [1.56.68](https://indike.org/pramana/in.purana.vayu.1.56.68) śraddhayā vidyayā caiva pradānena ca saptadhā. karmasveteṣu ye yuktā bhavantyā devapātanāt .. 56.67 .. ### [1.56.69](https://indike.org/pramana/in.purana.vayu.1.56.69) devaistaiḥ pitṛbhiḥ sārddhaṃ sūkṣmakaiḥ somapāyakaiḥ. svargatā divi modante pitṛmantamupāsate .. 56.68 .. ### [1.56.70](https://indike.org/pramana/in.purana.vayu.1.56.70) prajāvatāṃ praśaṃsaiva smṛtā siddhā kriyāvatām. teṣāṃ nivāpadattānnaṃ tatkulīnaiśca bāndhavaiḥ .. 56.69 .. ### [1.56.71](https://indike.org/pramana/in.purana.vayu.1.56.71) māsaṃ śrāddhabhujastṛpti labhante somalaukikāḥ. ete manuṣyāḥ pitaro māsi śrāddha bhujastu te .. 56.70 .. ### [1.56.72](https://indike.org/pramana/in.purana.vayu.1.56.72) tebhyo'pare tu ye cānye saṅkīrṇāḥ karmayoniṣu. bhraṣṭāścāśramadharmebhyaḥ svadhāsvāhāvivarjitāḥ .. 56.71 .. ### [1.56.73](https://indike.org/pramana/in.purana.vayu.1.56.73) bhinnadehā durātmanaḥ pretabhūtā yamakṣaye. svakarmāṇyeva śocanti yātanāsthānamāgatāḥ .. 56.72 .. ### [1.56.74](https://indike.org/pramana/in.purana.vayu.1.56.74) dīrghāyuṣo'tiśuṣkāśca vivarṇāśca vivāsasaḥ. kṣutpipāsāparītāśca vidravanti itastataḥ .. 56.73 .. ### [1.56.75](https://indike.org/pramana/in.purana.vayu.1.56.75) saritsarastaḍāgāni vāpiścaiva jalepsavaḥ. parānnāni ca lipsante kampamānāstatastataḥ .. 56.74 .. ### [1.56.76](https://indike.org/pramana/in.purana.vayu.1.56.76) sthāneṣu pācyamānāśca yātāyāteṣu teṣu vai. śālmalau vaitaraṇyāñca kumbhīpākeṣu teṣu ca .. 56.75 .. ### [1.56.77](https://indike.org/pramana/in.purana.vayu.1.56.77) karambhavālukāyāñca asipatravane tathā. śilāsampeṣaṇe caiva pātyamānāḥ svakarmabhiḥ .. 56.76 .. ### [1.56.78](https://indike.org/pramana/in.purana.vayu.1.56.78) tatra sthānāni teṣāṃ vai duḥkhānāmapyanākavat. teṣāṃ lokāntarasthānāṃ vividhairnāmagotrataḥ .. 56.77 .. ### [1.56.79](https://indike.org/pramana/in.purana.vayu.1.56.79) bhūmyāpasavyadarbheṣu dattvā piṇḍatrayantu vai. pati tāṃstarpayante ca pretasthāneṣvadhiṣṭhitāḥ .. 56.78 .. ### [1.56.80](https://indike.org/pramana/in.purana.vayu.1.56.80) aprāptā yātanāsthānaṃ sṛṣṭā ye bhuvi pañcadhā. paścādisthāvarānteṣu bhūtānāṃ teṣu karmasu .. 56.79 .. ### [1.56.81](https://indike.org/pramana/in.purana.vayu.1.56.81) nānārūpāsu jātīṣu tiryagyoniṣu cātiṣu. yadāhārā bhavantyete tāsu tāsviha yoniṣu. tasmistasmiṃstadāhāraṃ śrāddhadattopatiṣṭhati .. 56.80 .. ### [1.56.82](https://indike.org/pramana/in.purana.vayu.1.56.82) kāle nyāyāgataṃ pātraṃ vidhinā pratipāditam. prāpnotyannaṃ yathā dattaṃ bandhuryatrāvatiṣṭhate .. 56.81 .. ### [1.56.83](https://indike.org/pramana/in.purana.vayu.1.56.83) yathā goṣu pranaṣṭāsu vatso vindati mātaram. tathā śrāddhe tadiṣṭānāṃ mantraḥ prāpayate pitṝn .. 56.82 .. ### [1.56.84](https://indike.org/pramana/in.purana.vayu.1.56.84) evaṃ hyavikalaṃ śrāddhaṃ śrāddhadattantu mantrataḥ. sanatkumāraḥ provāca paśyan divyena cakṣuṣā. gatāgatijñaḥ pretānāṃ mantraḥ prāpayate pitṝn .. 56.83 .. ### [1.56.85](https://indike.org/pramana/in.purana.vayu.1.56.85) bahvīkāsvoṣmapāścaiva divākīrtyāśca te smṛtāḥ. kṛṣṇapakṣastvahasteṣāṃ śuklaḥ svaprāya śarvarī .. 56.84 .. ### [1.56.86](https://indike.org/pramana/in.purana.vayu.1.56.86) itye te pitaro devā devāśca pitaraśca vai. ṛtārttavā aneke tu anyonyapitaraḥ smṛtāḥ .. 56.85 .. ### [1.56.87](https://indike.org/pramana/in.purana.vayu.1.56.87) ete tu pitaro devā mānuṣāḥ pitaraśca ye. prīteṣu teṣu prīyante śraddhāyuktena karmaṇā .. 56.86 .. ### [1.56.88](https://indike.org/pramana/in.purana.vayu.1.56.88) ityevaṃ pitaraḥ proktāḥ pidṝṇāṃ somapāyinām. etat pitṛmatatvaṃ hi purāṇe niścayo mataḥ .. 56.87 .. ### [1.56.89](https://indike.org/pramana/in.purana.vayu.1.56.89) ityarkapitṛ somānāmailasya ca samāgamaḥ. sudhāmṛtasya cāvāptiḥ pitṝṇāñcaiva tarpaṇam .. 56.88 .. ### [1.56.90](https://indike.org/pramana/in.purana.vayu.1.56.90) pūrṇimāvāsyayoḥ kālaḥ pitṝṇāṃ sthānameva ca. samāsātkīrttitastubhyameṣa sargaḥ sanātanaḥ .. 56.89 .. ### [1.56.91](https://indike.org/pramana/in.purana.vayu.1.56.91) vaiśvarūpyantu sarvasya kathita़ñcaikadeśikam. na śakyaṃ parisaṅkhyātuṃ śraddheyaṃ bhūtimicchatā .. 56.90 .. ### [1.56.92](https://indike.org/pramana/in.purana.vayu.1.56.92) svāyambhuvasya hītyeṣa sargaḥ krānto mayātra vai. vistareṇānupūrvyā ca bhūyaḥ kiṃ varṇayāmyaham .. 56.91 .. ### [1.56.93](https://indike.org/pramana/in.purana.vayu.1.56.93) iti śrīmahāpurāṇe vāyuprokte pitṛvarṇanaṃ nāma ṣacpañcāśo'dhyāyaḥ .. 56 .. ## Linked texts (8) - [Brahmāṇḍapurāṇa](https://indike.org/pramana/in.purana.brahmanda.1.28.1) — Vyāsa, Sanskrit - [Matsyapurāṇa](https://indike.org/pramana/in.purana.matsya.141.1) — Vyāsa, Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.7.16.24_95) — Sanskrit - [Kālaviveka](https://indike.org/pramana/in.niti.dharma.nibandha.kalaviveka.77.p1.26) — Jīmūtavāhana, Sanskrit - [Gadādharapaddhati](https://indike.org/pramana/in.niti.dharma.nibandha.mahanibandha.gadadharapaddhati.5.p50) — Gadādhara Rājaguru 1725, Sanskrit - [Kālasāra](https://indike.org/pramana/in.astro.muhurta.kala.kalasara.6.p19) — Nārāyaṇa Jyotirvit, Sanskrit - [Kālasāra](https://indike.org/pramana/in.niti.dharma.kala.kalasara.6.p19) — Gadādhara (Pāraskara commentator), Sanskrit - [Nṛsiṃhaprasāda](https://indike.org/pramana/in.niti.dharma.nibandha.mahanibandha.nrsimhaprasada.p27) — Dalapatirāja 1511, Sanskrit --- Source: [https://indike.org/pramana/in.purana.vayu.1.56](https://indike.org/pramana/in.purana.vayu.1.56) · Pramāṇa