[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.57 # Vayupurana 1.57: adhyāyaḥ 57 Vāyupurāṇa 1.57 - **Language:** Sanskrit ### adhyāyaḥ 57 ### [1.57.1](https://indike.org/pramana/in.purana.vayu.1.57.1) ..ṛṣaya ūcuḥ .. ### [1.57.2](https://indike.org/pramana/in.purana.vayu.1.57.2) caturyugāni yānyāsan pūrvaṃ svāyambhuve'ntare . teṣāṃ nisargaṃ tattvañca śrotumicchāmi vistarāt .. 57.1 .. ### [1.57.3](https://indike.org/pramana/in.purana.vayu.1.57.3) ..sūta uvāca.. ### [1.57.4](https://indike.org/pramana/in.purana.vayu.1.57.4) pṛthivyādiprasaṅgena yanmayā prāgudāhṛtam. teṣāñcaturyugaṃ hyetat pravakṣyāmi nibodhata .. 57.2 .. ### [1.57.5](https://indike.org/pramana/in.purana.vayu.1.57.5) saṅkhyayeha prasaṅkhyāya vistārāccaiva sarvaśaḥ. yugañca yugabhedañca yugadharmantathaiva ca .. 57.3 .. ### [1.57.6](https://indike.org/pramana/in.purana.vayu.1.57.6) yugasandhyaṃśakañcaiva yugasandhānameva ca. ṣaṭ‌prakārayugākhyānāṃ pravakṣyāmīha tattvataḥ .. 57.4 .. ### [1.57.7](https://indike.org/pramana/in.purana.vayu.1.57.7) laukikena pramāṇena vibuddho'bdastu mānuṣaḥ. tenābdena prasaṅkhyāya vakṣyāmīha caturyugam .. 57.5 . nimeṣakālaḥ kāṣṭhā ca kalāścāpi muhūrttakāḥ. nimeṣakālatulyaṃ hi vidyāllaghvakṣarañcayat .. 57.6 .. ### [1.57.8](https://indike.org/pramana/in.purana.vayu.1.57.8) kāṣṭhā nimeṣā daśa pañca caiva triṃśacca kāṣṭhā gaṇayet kalāstāḥ. triṃśat kalāścaiva bhavenmuhūrttāstatrtriṃśatā rātryahanī samete .. 57.7 .. ### [1.57.9](https://indike.org/pramana/in.purana.vayu.1.57.9) ahorātre vibhajate sūryo mānuṣadaivike. tatrāhaḥ karmaceṣṭāyāṃ rātriḥ svapnāya kalpyate .. 57.8 .. ### [1.57.10](https://indike.org/pramana/in.purana.vayu.1.57.10) pitrye rātryahanī māsaḥ pravibhāgastayoḥ punaḥ. kṛṣṇa pakṣastvahasteṣāṃ śuklaḥ svapnāya śarvarī .. 57.9 .. ### [1.57.11](https://indike.org/pramana/in.purana.vayu.1.57.11) triṃśacca mānuṣā māsāḥ pitryo māsaśca sa smṛtaḥ. śatāni trīṇi māsānāṃ ṣaṣṭayā cāpyadhikāni vai. pitryaḥ saṃvatsaro hyeṣa mānuṣeṇa vibhāvyate .. 57.10 .. ### [1.57.12](https://indike.org/pramana/in.purana.vayu.1.57.12) mānuṣeṇaiva mānena varṣāṇāṃ yacchataṃ bhavet . pidṝṇāṃ trīṇi varṣāṇi saṅkhayātānīha tāni vai. catvāra ścādhikā māsāḥ pitre caiveha kīrttitāḥ .. 57.11 .. ### [1.57.13](https://indike.org/pramana/in.purana.vayu.1.57.13) lokikenaiva mānena abdo yo mānuṣaḥ smṛtaḥ. etaddivyamahorātraṃ śāstre'smin niśvayo mataḥ .. 57.12 .. ### [1.57.14](https://indike.org/pramana/in.purana.vayu.1.57.14) divye rātryahanī varṣaṃ pravibhāgastayoḥ punaḥ . ahastatrodagayanaṃ rātriḥ syāddakṣiṇāyanam .. 57.13 .. ### [1.57.15](https://indike.org/pramana/in.purana.vayu.1.57.15) ye te rātryahanī divye prasaṅkhayāte tayoḥ punaḥ. triṃśacca tāni varṣāṇi divyo māsastu sa smṛtaḥ .. 57.14 .. ### [1.57.16](https://indike.org/pramana/in.purana.vayu.1.57.16) mānuṣañca śataṃ viddhi divyamāsāstrayastu te. daśa caiva tathāhāni divyo hyeṣa vidhiḥ smṛtaḥ .. 57.15 .. ### [1.57.17](https://indike.org/pramana/in.purana.vayu.1.57.17) trīṇi parṣaśatānyeva ṣaṣṭivarṣāṇi yāni ca. divyaḥ saṃvatsaro hyeṣa mānuṣeṇa prakīrttitaḥ .. 57.16 .. ### [1.57.18](https://indike.org/pramana/in.purana.vayu.1.57.18) trīṇi varṣasahasrāṇi mānuṣeṇa pramāṇataḥ. triṃśadyāni tu varṣāṇi mataḥ saptarṣivatsaraḥ .. 57.17 .. ### [1.57.19](https://indike.org/pramana/in.purana.vayu.1.57.19) nava yāni sahasrāṇi varṣāṇāṃ mānuṣāṇi tu . anyāni navatiścaiva krauñcaḥ saṃvatsaraḥ smṛtaḥ .. 57.18 .. ### [1.57.20](https://indike.org/pramana/in.purana.vayu.1.57.20) ṣaṭ‌triṃśattu sahasrāṇi varṣāṇāṃ mānuṣāṇi tu . varṣāṇāntu śataṃ jñeyaṃ divyo hyeṣa vidhiḥ smṛtaḥ .. 57.19 .. ### [1.57.21](https://indike.org/pramana/in.purana.vayu.1.57.21) trīṇyeva niyutānyeva varṣāṇāṃ mānuṣāṇi ca. ṣaṣṭiścaiva sahasrāṇi saṅkhyātāni tu saṅkhyayā. divyavarṣasahasrantu prāhuḥ saṅkhyāvido janāḥ .. 57.20 .. ### [1.57.22](https://indike.org/pramana/in.purana.vayu.1.57.22) ityevamṛṣibhirgītaṃ divyayā saṅkhyayānvitam. divyenaiva pramāṇena yugasaṅkacāprakalpanam .. 57.21 .. ### [1.57.23](https://indike.org/pramana/in.purana.vayu.1.57.23) catvāri bhārate varṣe yugāni kavayo viduḥ. pūrvaṃ kṛtayugaṃ nāma tatastretā vidhīyate. dvāparaśca kali ścaiva yugānyetāni kalpayet .. 57.22 .. ### [1.57.24](https://indike.org/pramana/in.purana.vayu.1.57.24) catvāryāhuḥ sahasrāṇi varṣāṇāntu kṛtaṃ yugam. tatra tāvacchatī sandhyā sandhyāṃśaśca tathāvidhaḥ .. 57.23 .. ### [1.57.25](https://indike.org/pramana/in.purana.vayu.1.57.25) ita rāsu ca sandhyāsu sandhyāṃśeṣu ca vai triṣu . ekāpāyena varttante sahasrāṇi śatāni ca .. 57.24 .. ### [1.57.26](https://indike.org/pramana/in.purana.vayu.1.57.26) tretā trīṇi sahasrāṇi saṅkhyaiva parikīrtyate. tasyāstu triśatī sandhyā sandhyāṃśaśca tathāvidhaḥ .. 57.25 .. ### [1.57.27](https://indike.org/pramana/in.purana.vayu.1.57.27) dvāparaṃ dve sahasre tu yugamāhurmanīṣiṇaḥ . tasyāpi dviśatī sandhyā sandhayāṃśaḥ sandhyayā samaḥ .. 57.26 .. ### [1.57.28](https://indike.org/pramana/in.purana.vayu.1.57.28) kaliṃ varṣasahasrantu yugamāhurmanīṣiṇaḥ. tasyāpyekaśatī sandhyā sandhyayā samaḥ .. 57.27 .. ### [1.57.29](https://indike.org/pramana/in.purana.vayu.1.57.29) eṣā dvādaśasāhasrī yugākhyā parikīrttitā. kṛtaṃ tretā dvāparañca kaliścaiva catuṣṭayam .. 57.28 .. ### [1.57.30](https://indike.org/pramana/in.purana.vayu.1.57.30) atra saṃvatsarāḥ sṛṣṭā mānuṣeṇa pramāṇataḥ. kṛtasya tāvadvakṣyāmi varṣāṇāṃ tatpramāṇataḥ .. 57.29 .. ### [1.57.31](https://indike.org/pramana/in.purana.vayu.1.57.31) sahasrāṇāṃ śatānyatra caturdaśa tu saṅkhyayā. catvāriṃśat sahasrāṇi kalikālayugasya tu .. 57.30 .. ### [1.57.32](https://indike.org/pramana/in.purana.vayu.1.57.32) evaṃ saṅ‌khyātakālaśca kāleṣviha viśeṣataḥ. evaṃ caturyugaḥ kālo vinā sandhyāṃśakaiḥ smṛtaḥ .. 57.31 .. ### [1.57.33](https://indike.org/pramana/in.purana.vayu.1.57.33) catvāriṃśatrtrīṇi caiva niyutāni ca saṅkhyayā . viṃśatiśca sahasrāṇi sasandhyāṃśaścaturyugaḥ .. 57.32 .. ### [1.57.34](https://indike.org/pramana/in.purana.vayu.1.57.34) evaṃ caturyugākhyā tu sādhikā hyekasaptatiḥ. kṛtatretādiyuktā sā manorantaramucyate .. 57.33 .. ### [1.57.35](https://indike.org/pramana/in.purana.vayu.1.57.35) manvantarasya saṅkhyā tu varṣāgreṇa nibodhata. triṃśatkoṭyastu varṣāṇāṃ mānuṣeṇa prakīrtitāḥ .. 57.34 .. ### [1.57.36](https://indike.org/pramana/in.purana.vayu.1.57.36) saptaṣaṣṭistathānyāni niyutānyadhikāni tu. viṃśatiśca sahasrāṇi kālo'yaṃ sādhikāṃ vinā .. 57.35 .. ### [1.57.37](https://indike.org/pramana/in.purana.vayu.1.57.37) manvantarasya saṅkhyaiṣā saṅkhyāvidbhirdvijaiḥ smṛtā. manvantarasya kālo'yaṃ yugaiḥ sārddhaṃ prakīrtitaḥ .. 57.36 .. ### [1.57.38](https://indike.org/pramana/in.purana.vayu.1.57.38) catuḥ sahasrayuktaṃ vai prathamantat kṛtaṃ yugam. tretāvaśiṣṭaṃ vakṣyāmi dvāparaṃ kalimeva ca .. 57.37 .. ### [1.57.39](https://indike.org/pramana/in.purana.vayu.1.57.39) yugapatsamavetārtho dvidhā vaktuṃ na śakyate. kramāgataṃ mayā hyetattubhyaṃ proktaṃ yugadvayam. ṛṣivaṃśaprasaṅgena vyākulatvāttathaiva ca .. 57.38 .. ### [1.57.40](https://indike.org/pramana/in.purana.vayu.1.57.40) tatra tretāyugasyādau manuḥ saptarṣayaśca te. śrautaṃ smārttañca dharmañca brahmaṇā ca pracoditam .. 57.39 .. ### [1.57.41](https://indike.org/pramana/in.purana.vayu.1.57.41) dārāgnihotrasaṃyogamṛgyajuḥ sāmasaṃjñitam. ityādilakṣaṇaṃ śrautaṃ dharmaṃ saptarṣayo'bruvan .. 57.40 .. ### [1.57.42](https://indike.org/pramana/in.purana.vayu.1.57.42) parasparāgataṃ dharmaṃ smārttañcācāralakṣaṇam. varṇāśramācārayutaṃ manuḥ svāyambhuvo'bravīt .. 57.41 .. ### [1.57.43](https://indike.org/pramana/in.purana.vayu.1.57.43) satyena brahmacaryeṇa śrutena tapasā ca vai. teṣāṃ sutaptatapasāmārṣeyeṇa krameṇa tu .. 57.42 .. ### [1.57.44](https://indike.org/pramana/in.purana.vayu.1.57.44) saptarṣīṇāṃ manoścaiva ādye tretāyugasya tu . abuddhipūrvakaṃ teṣāmakriyāpūrvameva ca .. 57.43 .. ### [1.57.45](https://indike.org/pramana/in.purana.vayu.1.57.45) abhivyaktāstu te mantrāstārakādyairnidarśanaiḥ. ādikalpe tu devānāṃ prādurbhūtāstu te svayam .. 57.44 .. ### [1.57.46](https://indike.org/pramana/in.purana.vayu.1.57.46) praṇāśe tvatha siddhīnāmapyāsāñca pravarttanam. āsan mantrā vyatīteṣu ye kalpeṣu sahasraśaḥ. temantrā vai punasteṣāṃ pratibhāsasamutthitāḥ .. 57.45 .. ### [1.57.47](https://indike.org/pramana/in.purana.vayu.1.57.47) ṛco yajūṃṣi sāmāni mantrāścātharvaṇāni ca. saptarṣibhistu te proktāḥ smārtaṃ dharmaṃ manurjagau .. 57.46 .. ### [1.57.48](https://indike.org/pramana/in.purana.vayu.1.57.48) tretādau saṃhitā vedāḥ kevalā dharmaśeṣataḥ. saṃrodhādāyuṣaścaiva vyasyante dvāpareṣu te .. 57.47 .. ### [1.57.49](https://indike.org/pramana/in.purana.vayu.1.57.49) ṛṣayastapasā devāḥ kalau ca dvāpareṣu vai. anādinidhanā divyāḥ pūrvaṃ sṛṣṭāḥ svayambhuvā .. 57.48 .. ### [1.57.50](https://indike.org/pramana/in.purana.vayu.1.57.50) sadharmāḥ saprajāḥ sāṅgā yathādharmaṃ yuge yuge. vikrīḍante samānārthā vedavādā yathāyugam .. 57.49 .. ### [1.57.51](https://indike.org/pramana/in.purana.vayu.1.57.51) ārambhayajñā kṣatrasya haviryajñā viśāmpateḥ. paricāra yajñāḥ śūdrāstu japayajñā dvijottamāḥ .. 57.50 .. ### [1.57.52](https://indike.org/pramana/in.purana.vayu.1.57.52) tathā pramuditā varṇāstretāyāṃ dharmapālitāḥ. kriyāvantaḥ prajāvantaḥ samṛddhāḥ sukhinastathā .. 57.51 .. ### [1.57.53](https://indike.org/pramana/in.purana.vayu.1.57.53) brāhmaṇānanuvarttante kṣatriyāḥ kṣatriyān viśaḥ. vaiśyānuvartinaḥ śūdrāḥ parasparamanuvratāḥ .. 57.52 .. ### [1.57.54](https://indike.org/pramana/in.purana.vayu.1.57.54) śubhāḥ pravṛttayasteṣāṃ dharmā varṇāśramāstathā. saṅkalpitena manasā vācoktena svasarmaṇā. tretāyuge tvavikalaḥ karmmārambhaḥ prasiddhyati .. 57.53 .. ### [1.57.55](https://indike.org/pramana/in.purana.vayu.1.57.55) āyurmedhā balaṃ rūpamārogyaṃ dharmaśīlatā. sarvasādhāraṇā hyete tretāyāṃ vai bhavantyuta .. 57.54 .. ### [1.57.56](https://indike.org/pramana/in.purana.vayu.1.57.56) varṇāśramavyavasthānaṃ teṣāṃ brahmā tathākarot . punaḥ prajāstu tā mohāttān dharmānna hyapālayan .. 57.55 .. ### [1.57.57](https://indike.org/pramana/in.purana.vayu.1.57.57) parasparavirodhena manuntāḥ punaranvayuḥ. manuḥ svāyambhuvo dṛṣṭvā yāthātathyaṃ prajāpatiḥ .. 57.56 .. ### [1.57.58](https://indike.org/pramana/in.purana.vayu.1.57.58) dhātā tu śatarūpāyāḥ pumān sa udapādayat. priyavratottānapādau pradhamantau mahīpatī .. 57.57 .. ### [1.57.59](https://indike.org/pramana/in.purana.vayu.1.57.59) tataḥ prabhṛti rājāna utpannā daṇḍadhāriṇaḥ. prajānāṃ rañjanāccaiva rājānastvabhavannṛṣāḥ .. 57.58 .. ### [1.57.60](https://indike.org/pramana/in.purana.vayu.1.57.60) pracchannapāpā ye jetumaśakyā manujā bhuvi. dharmasaṃsthāpanārthāya teṣāṃ śāstre tapo mayā .. 57.59 .. ### [1.57.61](https://indike.org/pramana/in.purana.vayu.1.57.61) varṇānāṃ pravibhāgāśca tretāyāṃ saṃprakīrtitāḥ. saṃhitāśca tato mantrā ṛṣabhirbrahmaṇaistu te .. 57.60 .. ### [1.57.62](https://indike.org/pramana/in.purana.vayu.1.57.62) yajñaḥ pravartitaścaiva tadā hyevantu daivataiḥ. yāmaiḥ śuklairjapaiścaiva sarvasambhārasaṃvṛtaiḥ .. 57.61 .. ### [1.57.63](https://indike.org/pramana/in.purana.vayu.1.57.63) sārddhaṃ viśvabhujā caiva devendreṇa mahaujasā. svāyambhuve'ntare devairyajñāste prāk pravartitāḥ .. 57.62 .. ### [1.57.64](https://indike.org/pramana/in.purana.vayu.1.57.64) satyaṃ japastapo dānaṃ tretāyāṃ dharma ucyate. kriyā dharmaśca hrasate satyadharmaḥ pravarttate .. 57.63 .. ### [1.57.65](https://indike.org/pramana/in.purana.vayu.1.57.65) prajāyante tataḥ śūrā āyuṣmanto mahābalāḥ. nyastadaṇḍamahābhāgā yajvāno brahmavādinaḥ .. 57.64 .. ### [1.57.66](https://indike.org/pramana/in.purana.vayu.1.57.66) padma patrāyatākṣāśca pṛthūraskāḥ susaṃhitāḥ. siṃhāntakā mahāsattvā mattamātaṅgagāminaḥ .. 57.65 .. ### [1.57.67](https://indike.org/pramana/in.purana.vayu.1.57.67) mahādhanurddharāścaiva tretāyāṃ cakravartinaḥ. sarvalakṣaṇasampannā nyagrodhaparimaṇḍalāḥ .. 57.66 .. ### [1.57.68](https://indike.org/pramana/in.purana.vayu.1.57.68) nyagrodhau tau smṛtau bāhū vyāmo nyagrodha ucyate. vāmenaivocchrayādyasya sama ūrddhvantu dehinaḥ. samucchrayaḥ parīṇāho jñeyo nyagrodhamaṇḍalaḥ .. 57.67 .. ### [1.57.69](https://indike.org/pramana/in.purana.vayu.1.57.69) cakraṃ ratho maṇirbhāryā nidhiraścāgajāstathā. saptātiśayaratnāni sarveṣāñcakravarttinām .. 57.68 .. ### [1.57.70](https://indike.org/pramana/in.purana.vayu.1.57.70) cakraṃ ratho maṇiḥ khaḍgaṃ dhanūratnañca pañcamam. keturnidhiśca saptaite prāṇahīnāḥ prakīrttitāḥ .. 57.69 .. ### [1.57.71](https://indike.org/pramana/in.purana.vayu.1.57.71) bhāryā purohitaścaiva senānī rathakṛcca yaḥ. mantryaśvaḥ kalabhaścaiva prāṇinaḥ samprakīrttitāḥ .. 57.70 .. ### [1.57.72](https://indike.org/pramana/in.purana.vayu.1.57.72) ratnānyetāni divyāni saṃsiddhāni mahātmanām. caturdaśa vidheyāni sarveṣāṃ cakravārtinām .. 57.71 .. ### [1.57.73](https://indike.org/pramana/in.purana.vayu.1.57.73) viṣṇoraṃśena jāyante pṛthivyāṃ cakravarttinaḥ. manvantareṣu sarveṣu atītānāgateṣu vai .. 57.72 .. ### [1.57.74](https://indike.org/pramana/in.purana.vayu.1.57.74) bhūtabhavyāni yānīha varttamānāni yāni ca. tretāyugādikeṣvatra jāyante cakravarttinaḥ .. 57.73 .. ### [1.57.75](https://indike.org/pramana/in.purana.vayu.1.57.75) bhadrāṇīmāni teṣāṃ vai bhavantīha mahīkṣitām. adbhutāni ca catvāri balaṃ dharmaḥ sukhaṃ dhanam .. 57.74 .. ### [1.57.76](https://indike.org/pramana/in.purana.vayu.1.57.76) anyonyasyāvirodhena prāpyante vai nṛpaiḥ samam. artho dharmaśca kāmaśca yaśo vijaya eva ca .. 57.75 .. ### [1.57.77](https://indike.org/pramana/in.purana.vayu.1.57.77) aiśvaryeṇāṇimādyena prabhuśaktyā tathaiva ca. anyena tapasā caiva ṛṣīnabhibhavanti ca. balena tapasā caiva devadānavāmānuṣān .. 57.76 .. ### [1.57.78](https://indike.org/pramana/in.purana.vayu.1.57.78) lakṣaṇaiścāpi jāyante śarīrasthairamānuṣaiḥ. keśasthitā lalāṭorṇā jihvā cāsyapramārjanī. tāmraprabhoṣṭhadantoṣṭhāḥ śrīvatsāścorddhvaromaśāḥ .. 57.77 .. ### [1.57.79](https://indike.org/pramana/in.purana.vayu.1.57.79) ājānubāhanaścaiva jālahastā vṛṣāṅkitāḥ. nyagrodhapariṇāhāśca siṃhaskandhāḥ sumehanāḥ . gajendragatayaścaiva mahāhanava eva ca .. 57.78 .. ### [1.57.80](https://indike.org/pramana/in.purana.vayu.1.57.80) pādayoścakramatsyau tu śaṅkhapadmau tu hastayoḥ. pañcāśītisahasrāṇi te bhavantyajarā nṛpāḥ .. 57.79 .. ### [1.57.81](https://indike.org/pramana/in.purana.vayu.1.57.81) asaṅgā gatayasteṣāṃ catasraścakravarttinām. antarikṣe samudre ca pātāle parvateṣu ca .. 57.80 .. ### [1.57.82](https://indike.org/pramana/in.purana.vayu.1.57.82) ijyā dānaṃ tapaḥ satyaṃ tretāyāṃ dharma ucyate . tadā pravarttate dharmo varṇāśramavibhāgaśaḥ .. 57.81 .. ### [1.57.83](https://indike.org/pramana/in.purana.vayu.1.57.83) maryādāsthāpanārthaṃ ca daṇḍanītiḥ pravarttate . hṛṣṭapuṣṭāḥ prajāḥ sarvā hyarogāḥ pūrṇamānasāḥ .. 57.82 .. ### [1.57.84](https://indike.org/pramana/in.purana.vayu.1.57.84) eko vedaścatuṣpādastretāyugavidhau smṛtaḥ. trīṇi varṣasahasrāṇi tadā jīvanti mānavāḥ .. 57.83 .. ### [1.57.85](https://indike.org/pramana/in.purana.vayu.1.57.85) putrapautrasamākīrṇā mriyante ca krameṇa tu . eṣa tretāyuge dharmastretāsandhau nibodhata .. 57.84 .. ### [1.57.86](https://indike.org/pramana/in.purana.vayu.1.57.86) tretāyuga svabhāvastu sandhyāpādeva varttate . sandhyāyāṃ vai svabhāvastu yugapādena tiṣṭhati .. 57.85 .. ### [1.57.87](https://indike.org/pramana/in.purana.vayu.1.57.87) ..śāṃśapāyana uvāca.. ### [1.57.88](https://indike.org/pramana/in.purana.vayu.1.57.88) kathaṃ tretāyugamukhe yajñasyāsītpravartanam. pūrvaṃ svāyambhuve sarge yathāvattadbravīhi me .. 57.86 .. ### [1.57.89](https://indike.org/pramana/in.purana.vayu.1.57.89) antarhitāyāṃ sandhyāyāṃ sārddhaṃ kṛtayugena vai. kalākhyāyāṃ pravṛttāyāṃ prāpte tretāyuge tadā. varṇāśramavyavasthānaṃ kṛtavantaśca vai punaḥ .. 57.87 .. ### [1.57.90](https://indike.org/pramana/in.purana.vayu.1.57.90) sambhārāṃstāṃ śca sambhṛtya kathaṃ yatraḥ pravartitaḥ. etacchrutvābravītsūtaḥ śrūyatāṃ śāṃśapāyana .. 57.88 .. ### [1.57.91](https://indike.org/pramana/in.purana.vayu.1.57.91) iyathā tretāyugamukhe yajñasyāsītpravartanam. oṣadhīṣu ca jātāsu pravṛtte vṛṣṭisarjane. pratiṣṭhitāyāṃ vārtāyāṃ gṛhāśramapureṣu ca .. 57.89 .. ### [1.57.92](https://indike.org/pramana/in.purana.vayu.1.57.92) varṇāśrama vyavasthānaṃ kṛtvā mantrāṃśca saṃhitām. mantrān saṃyojayitvātha ihāmutreṣu karmasu .. 57.90 .. ### [1.57.93](https://indike.org/pramana/in.purana.vayu.1.57.93) tathā viśvamugindrastu yajñaṃ prāvartayattadā. daivataiḥ sahitaḥ sarvaiḥ sarvasambhārasambhṛtam .. 57.91 .. ### [1.57.94](https://indike.org/pramana/in.purana.vayu.1.57.94) athāśvamedhe vitate samājagmurmaharṣayaḥ. yajante paśubhirmedhyairhutvā sarve samāgatāḥ .. 57.92 .. ### [1.57.95](https://indike.org/pramana/in.purana.vayu.1.57.95) karmavyagreṣu ṛtvikṣu satate yajñakarmaṇi. sampragīteṣu teṣvevamāgameṣvatha satvaram .. 57.93 .. ### [1.57.96](https://indike.org/pramana/in.purana.vayu.1.57.96) parikrānteṣu laghuṣu adhvaryuvṛṣabheṣu ca. ālabdheṣu ca medhyeṣu tathā paśugaṇeṣu vai .. 57.94 .. ### [1.57.97](https://indike.org/pramana/in.purana.vayu.1.57.97) haviṣyagnau hūyamāne devānāṃ devahotṛbhiḥ. āhūteṣu ca deveṣu yajñabhākṣu mahātmasu .. 57.95 .. ### [1.57.98](https://indike.org/pramana/in.purana.vayu.1.57.98) ya indriyātmakā devā yajñabhājastathā tu ye. tān yajante tadā devāḥ kalpādiṣu bhavanti ye .. 57.96 .. ### [1.57.99](https://indike.org/pramana/in.purana.vayu.1.57.99) adhvaryavaḥ praiṣakāle vyutthitā ye maharṣayaḥ. maharṣayastu tān dṛṣṭvā dīnān paśugaṇān sthitān . papracchurindraṃ sambhūya ko'yaṃ yajñavidhistava .. 57.97 .. ### [1.57.100](https://indike.org/pramana/in.purana.vayu.1.57.100) adharmo balavāneṣa hiṃsādharmepsayā tava. neṣṭaḥ paśuvadhastveṣa tava yajñe surottama .. 57.98 .. ### [1.57.101](https://indike.org/pramana/in.purana.vayu.1.57.101) adharmo dharmagātāya prārabdhaḥ paśubhistvayā. nāyaṃ dharmo hyadharmo'yaṃ na hiṃsā dharma ucyate .. 57.99 .. ### [1.57.102](https://indike.org/pramana/in.purana.vayu.1.57.102) āgamena bhavān yajñaṃ karotu yadihecchasi. vidhidṛṣṭena yajñena dharmamavyayahetunā. yajñabījaiḥ suraśreṣṭha yeṣu hiṃsā na vidyate .. 57.100 .. ### [1.57.103](https://indike.org/pramana/in.purana.vayu.1.57.103) trivarṣaparamaṃ kālamuṣitairaprarohibhiḥ. eṣa dharmo mahānindra svayambhuviṅitaḥ purā .. 57.101 .. ### [1.57.104](https://indike.org/pramana/in.purana.vayu.1.57.104) evaṃ viśvabhugindrastu munibhistattvadarśibhiḥ. jaṅgamaiḥ sthāvarairveti kairyaṣṭavyamihocyate .. 57.102 .. ### [1.57.105](https://indike.org/pramana/in.purana.vayu.1.57.105) te tu khinnā vivādena tattvayuktā maharṣayaḥ. sandhāya vākyamindreṇa prapacchuśceśvaraṃ vasum .. 57.103 .. ### [1.57.106](https://indike.org/pramana/in.purana.vayu.1.57.106) ..ṛṣaya ūcuḥ.. ### [1.57.107](https://indike.org/pramana/in.purana.vayu.1.57.107) mahāprājña kathaṃ dṛṣṭastvayā yajñavidhirnṛpa. uttānapāde prabrūhi saṃśayaṃ chindhi naḥ prabho .. 57.104 .. ### [1.57.108](https://indike.org/pramana/in.purana.vayu.1.57.108) śrutvā vākyaṃ tatasteṣāmavicārya balābalam. vedaśāstramanusmṛtya yajñatattvamuvāca ha. yathopadiṣṭairyaṣṭavyamiti hovāca pārthivaḥ .. 57.105 .. ### [1.57.109](https://indike.org/pramana/in.purana.vayu.1.57.109) yaṣṭavyaṃ paśubhirmedhyairatha bījaiḥ phalaistathā. hiṃsāsvabhāvo yajñasya iti me darśayatyasau .. 57.106 .. ### [1.57.110](https://indike.org/pramana/in.purana.vayu.1.57.110) yatheha saṃhitāmantrā hiṃsāliṅgā maharṣibhiḥ. dīrgheṇa tapasā yuktairdarśanaistārakādibhiḥ. tatprāmāṇyānmayā coktaṃ tasmānmā mantumarhatha .. 57.107 .. ### [1.57.111](https://indike.org/pramana/in.purana.vayu.1.57.111) yadi pramāṇaṃ tānyeva mantravākyāni vai dvijāḥ . tadā prāvarttatā yajño hyanyathā no'nṛtaṃ vacaḥ. evaṃ hṛtottarāste vai yuktātmānastapodhanāḥ .. 57.108 .. ### [1.57.112](https://indike.org/pramana/in.purana.vayu.1.57.112) adhasva bhavanaṃ dṛṣṭvā tamarthaṃ vāgyato bhava. mithyāvādī nṛpo yasmāt praviveśa rasātalam .. 57.109 .. ### [1.57.113](https://indike.org/pramana/in.purana.vayu.1.57.113) ityuktamātre nṛpatiḥ praviveśa rasātalam. ūrddhvacārī vasurbhūtvā rasātalacaro'bhavat .. 57.110 .. ### [1.57.114](https://indike.org/pramana/in.purana.vayu.1.57.114) vasudhātalavāsī tu tena vākyena so'bhavat. dharmāṇāṃ saṃśayacchettā rājā vasurathāgataḥ .. 57.111 .. ### [1.57.115](https://indike.org/pramana/in.purana.vayu.1.57.115) tasmānna vācyamekena bahujñenāpi saṃśayaḥ. bahūddhārasya dharmasya sūkṣmād‌dūramupāgatiḥ .. 57.112 .. ### [1.57.116](https://indike.org/pramana/in.purana.vayu.1.57.116) tasmānna niścayādvaktuṃ dharmaḥ śakyastu kenacit. devānṛṣīnupādāya svāyambhuvamṛte manum .. 57.113 .. ### [1.57.117](https://indike.org/pramana/in.purana.vayu.1.57.117) tasmānna hiṃsādharmasya dvāramuktaṃ maharṣibhiḥ. ṛṣikoṭisahasrāṇi karmabhiḥ svairdivaṃ yayuḥ .. 57.114 .. ### [1.57.118](https://indike.org/pramana/in.purana.vayu.1.57.118) tasmānna dānaṃ yajñaṃ vā praśaṃsanti maharṣayaḥ. tucchaṃ mūlaṃ phalaṃ śākamudapātraṃ tapodhanāḥ. evaṃ dattvā vibhavataḥ svargaloke pratiṣṭhitāḥ .. 57.115 .. ### [1.57.119](https://indike.org/pramana/in.purana.vayu.1.57.119) adrohaścāpyalobhaśca damo bhūtadayā tapaḥ. brahmacaryaṃ tathā satyamanukrośaḥ kṣamā dhṛtiḥ. sanātanasya dharmasya mūlametaddurāsadam .. 57.116 .. ### [1.57.120](https://indike.org/pramana/in.purana.vayu.1.57.120) dharmamantrātmako yajñastapaścānaśanātmakam. yajñena devānāpnoti vairāgyaṃ tapasā punaḥ .. 57.117 .. ### [1.57.121](https://indike.org/pramana/in.purana.vayu.1.57.121) brāhmaṇyaṃ karmasaṃnyāsādvairāgyāt prekṣate layam. jñānāt prāpnoti kaivalyaṃ pañcaitā gatayaḥ smṛtāḥ .. 57.118 .. ### [1.57.122](https://indike.org/pramana/in.purana.vayu.1.57.122) evaṃ vivādaḥ sumahān yajñasyāsīt pravarttane. ṛṣīṇāṃ devatānāñca pūrvaṃ svāyambhuve'ntare .. 57.119 .. ### [1.57.123](https://indike.org/pramana/in.purana.vayu.1.57.123) tataste ṛṣayo dṛṣṭvādbhutaṃ vartma balena tu. vasorvākyamanādṛtya jagmuste vai yathāgatāḥ .. 57.120 .. ### [1.57.124](https://indike.org/pramana/in.purana.vayu.1.57.124) gateṣu devasaṅgheṣu devā yajñamavāpnuyuḥ. śrūyante hi tapaḥsiddhā brahmakṣatramayā nṛpāḥ .. 57.121 .. ### [1.57.125](https://indike.org/pramana/in.purana.vayu.1.57.125) priyavratottānapādau dhruvo medhātithirvasuḥ. sumedhā virajāścaiva śaṅkhapādraja eva ca. prācīnabarhiḥ parjanyo havirddhānādayo nṛpāḥ .. 57.122 .. ### [1.57.126](https://indike.org/pramana/in.purana.vayu.1.57.126) ete cānye ca bahavo nṛpāḥ siddhā divaṃ gatāḥ. rājarṣayo mahāsattvā yeṣāṃ kīrttiḥ pratiṣṭhitā .. 57.123 .. ### [1.57.127](https://indike.org/pramana/in.purana.vayu.1.57.127) tasmādviśiṣyate yajñāttapaḥ sarveṣu kāraṇaiḥ. brahmaṇā tapasā sṛṣṭa jagadviśvamidaṃ purā .. 57.124 .. ### [1.57.128](https://indike.org/pramana/in.purana.vayu.1.57.128) tasmānnātyeti tadyajñaṃ tapomūlamidaṃ smṛtam. yajñapravarttanaṃ hyevamataḥ svāyambhuve'ntare. tataḥprabhṛti yajño'yaṃ yugaiḥ saha vyavarttata .. 57.125 .. ### [1.57.129](https://indike.org/pramana/in.purana.vayu.1.57.129) iti śrīmahāpurāṇe vāyuprokte yajñapravarttanaṃ nāma saptapañcāśo'dhyāyaḥ .. 57 .. ### [1.57.130](https://indike.org/pramana/in.purana.vayu.1.57.130) = = śloka 57.70 - dra. śatapatha brāhmaṇam 5.3.1 ## Linked texts (7) - [Brahmāṇḍapurāṇa](https://indike.org/pramana/in.purana.brahmanda.1.29.1) — Vyāsa, Sanskrit - [Matsyapurāṇa](https://indike.org/pramana/in.purana.matsya.142.3) — Vyāsa, Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.1.4.37.47) — Sanskrit - [Mudgalapurāṇa](https://indike.org/pramana/in.purana.upa.surya.mudgala.3.15.44) — Sanskrit - [Bhāgavatapurāṇa](https://indike.org/pramana/in.purana.bhagavata.3.12.41) — Vyāsa, Sanskrit - [Viṣṇudharma](https://indike.org/pramana/in.purana.upa.vaisnava.visnudharma.1.104.19) — Sanskrit - [Śivadharmaśāstra](https://indike.org/pramana/in.sampradaya.saiva.sivadharma.sivadharmasastra.11.94) — Sanskrit --- Source: [https://indike.org/pramana/in.purana.vayu.1.57](https://indike.org/pramana/in.purana.vayu.1.57) · Pramāṇa