[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.58 # Vayupurana 1.58: adhyāyaḥ 58 Vāyupurāṇa 1.58 - **Language:** Sanskrit ### adhyāyaḥ 58 ### [1.58.1](https://indike.org/pramana/in.purana.vayu.1.58.1) ..sūta uvāca .. ### [1.58.2](https://indike.org/pramana/in.purana.vayu.1.58.2) ata ūrddhvaṃ pravakṣyāmi dvāparasya vidhiṃ punaḥ. tatra tretāyuge kṣīṇe dvāparaṃ pratipadyate .. 58.1 .. ### [1.58.3](https://indike.org/pramana/in.purana.vayu.1.58.3) dvāparādau prajānāntu siddhistratāyuge tu yā. parivṛtte yuge tasmiṃstataḥ sā saṃpraṇaśyati .. 58.2 .. ### [1.58.4](https://indike.org/pramana/in.purana.vayu.1.58.4) tataḥ pravarttate tāsāṃ prajānāṃ dvāpare punaḥ. lobho'dhṛtirvaṇigyuddhaṃ tattvānāmaviniścayaḥ .. 58.3 .. ### [1.58.5](https://indike.org/pramana/in.purana.vayu.1.58.5) tambhedaścaiva varṇānāṃ kāryāṇāñcā vinirṇayaḥ. yajñauṣadheḥ paśordaṇḍo mado dambho'kṣamā balam. eṣāṃ rajastamoyuktā pravṛttirdvāpare smṛtā .. 58.4 .. ### [1.58.6](https://indike.org/pramana/in.purana.vayu.1.58.6) ādye kṛte ca dharmo'sti tretāyāṃ samprapadyate. dvāpare vyākulībhūtvā praṇaśyati kalau yuge .. 58.5 .. ### [1.58.7](https://indike.org/pramana/in.purana.vayu.1.58.7) varṇānāṃ viparidhvaṃsaḥ saṃkīrttyate tathāśramaḥ. dvaidhamutpadyate caiva yuge tasmin śrutau smṛtau .. 58.6 .. ### [1.58.8](https://indike.org/pramana/in.purana.vayu.1.58.8) dvaidhāt śruteḥ smṛteścaiva niścayo nādhigamyate. aniścayādigamanāddharmatattvaṃ nigadyate. dharmatattve tu bhinnānāṃ matibhedo bhavennṛṇām .. 58.7 .. ### [1.58.9](https://indike.org/pramana/in.purana.vayu.1.58.9) parasparavibhinnaistairdṛṣṭīnāṃ vibhrameṇa ca. ayaṃ dharmo hyayaṃ neti niścayo nābhigamyate .. 58.8 .. ### [1.58.10](https://indike.org/pramana/in.purana.vayu.1.58.10) kāraṇānāñca vakailyāt kāraṇasyāpyaniścayāt. matibhede ca teṣāṃ vai dṛṣṭīnāṃ vibhramo bhavet .. 58.9 .. ### [1.58.11](https://indike.org/pramana/in.purana.vayu.1.58.11) tato dṛṣṭivibhinnaistaiḥ kṛtaṃ śāstrakulantvidam. eko vedaśvatuṣpādastretāsviha vidhīyate .. 58.10 .. ### [1.58.12](https://indike.org/pramana/in.purana.vayu.1.58.12) saṃrodhādāyuṣaścaiva dṛśyate dvāpareṣu ca . vedavyāsaiścaturdhā tu vyasyate dvāparādiṣu .. 58.11 .. ### [1.58.13](https://indike.org/pramana/in.purana.vayu.1.58.13) ṛṣiputraiḥ punarvedā bhidyante dṛṣṭivibhramaiḥ. mantrabrāhmaṇavinyāsaiḥ svaravarṇaviparyayaiḥ .. 58.12 .. ### [1.58.14](https://indike.org/pramana/in.purana.vayu.1.58.14) saṃhitā ṛgyajuḥsāmnāṃ saṃhanyante śrutarṣibhiḥ. sāmānyādvaikṛtāccaiva dṛṣṭibhinnaiḥ vkacitvkacit .. 58.13 .. ### [1.58.15](https://indike.org/pramana/in.purana.vayu.1.58.15) brāhmaṇaṃ kalpasūtrāṇi mantrapravacanāni ca. anye tu prahitāstīrthaiḥ kecittān pratyavasthitāḥ .. 58.14 .. ### [1.58.16](https://indike.org/pramana/in.purana.vayu.1.58.16) dvāpareṣu pravarttante bhinnavṛttāśramā dvijāḥ. ekamādhvaryavaṃ pūrvamāsīddvaidhaṃ punastataḥ .. 58.15 .. ### [1.58.17](https://indike.org/pramana/in.purana.vayu.1.58.17) sāmānyaviparītārthaiḥ kṛtaṃ śāstrakulantvidam. ādhvaryavasya prastāvairbahudhā vyākulaṃ kṛtam .. 58.16 .. ### [1.58.18](https://indike.org/pramana/in.purana.vayu.1.58.18) tathaivātharvaṛksāmnāṃ vikalpaiścāpyasaṃkṣayaiḥ. vyākulaṃ dvāpare bhinne kriyate bhinnadarśanaiḥ .. 58.17 .. ### [1.58.19](https://indike.org/pramana/in.purana.vayu.1.58.19) taiṣāṃ bhedāḥ prabhedāśca vikalpaiścāpyasaṃkṣayāḥ . dvāpare sampravartante vinaśyanti punaḥ kalau .. 58.18 .. ### [1.58.20](https://indike.org/pramana/in.purana.vayu.1.58.20) teṣāṃ viparyayāścaiva bhavanti dvāpare punaḥ. avṛṣṭirmaraṇañcaiva tathaiva vyādhyupadvavāḥ .. 58.19 .. ### [1.58.21](https://indike.org/pramana/in.purana.vayu.1.58.21) vāṅmanaḥkarmajairduḥkhairnirvedo jāyate punaḥ . nirvedājjāyate teṣāṃ duḥkhamokṣa vicāraṇā .. 58.20 .. ### [1.58.22](https://indike.org/pramana/in.purana.vayu.1.58.22) vicārāṇācca vairāgyaṃ vairāgyāddopadarśanam. doṣāṇāṃ darśanāccaiva dvāpare jñānasambhavaḥ .. 58.21 .. ### [1.58.23](https://indike.org/pramana/in.purana.vayu.1.58.23) teṣāñca mānināṃ pūrvamādye svāyambhuve'ntare. utpadyante hi śāstrāṇāṃ dvāpare paripanthinaḥ .. 58.22 .. ### [1.58.24](https://indike.org/pramana/in.purana.vayu.1.58.24) āyurvedavikalpāśca aṅgānāṃ jyautiṣasya ca. arthaśāstravikalpaśca hetuśāstravikalpanam .. 58.23 .. ### [1.58.25](https://indike.org/pramana/in.purana.vayu.1.58.25) smṛtiśāstraprabhedāśca prasthānāni pṛthak pṛthak. dvāpareṣvabhivarttante matibhedāstathā nṛṇām .. 58.24 .. ### [1.58.26](https://indike.org/pramana/in.purana.vayu.1.58.26) manasā karmaṇā vācā kṛcchrā dvārttā prasiddhyati. dvāpare sarvabhūtānāṃ kāyakleśapuraskṛtā .. 58.25 .. ### [1.58.27](https://indike.org/pramana/in.purana.vayu.1.58.27) lobhe'dhṛtirvaṇigyuddhaṃ tattvānāmaviniścayaḥ. vedaśāstrapraṇayanaṃ dharmāṇāṃ saṅkarastathā .. 58.26 .. ### [1.58.28](https://indike.org/pramana/in.purana.vayu.1.58.28) dvāpareṣu pravarttante rogo lobho vadhastathā. varṇāśramaparidhvaṃsāḥ kāmadveṣau tathaiva ca .. 58.27 .. ### [1.58.29](https://indike.org/pramana/in.purana.vayu.1.58.29) pūrṇe varṣasahasre dve paramāyustuthā nṛṇām. niḥśepe dvāpare tasmin tasya sandhyā tu pādataḥ .. 58.28 .. ### [1.58.30](https://indike.org/pramana/in.purana.vayu.1.58.30) pratiṣṭhate guṇairhīno dharmo'sau dvāparasya tu . tathaiva sandhyāpādena aṃśastasyāvatiṣṭhate .. 58.29 .. ### [1.58.31](https://indike.org/pramana/in.purana.vayu.1.58.31) dvāparasya ca varṣe yā tiṣyasya tu nibodhata. dvāparasyāṃśaśeṣe tu pratipattiḥ kalerataḥ .. 58.30 .. ### [1.58.32](https://indike.org/pramana/in.purana.vayu.1.58.32) hiṃsāsūyānṛtaṃ māyā vadhaścaiva tapasvinām. ete svabhāvāstiṣyasya sādhayanti ca vai prajāḥ .. 58.31 .. ### [1.58.33](https://indike.org/pramana/in.purana.vayu.1.58.33) eṣa dharmaḥ kṛtaḥ kṛtsno dharmaśca parihīyate. manasā karmaṇā stutyā vārttā siddhyati vā na vā .. 58.32 .. ### [1.58.34](https://indike.org/pramana/in.purana.vayu.1.58.34) kalau pramārako rogaḥ satataṃ kṣudbhayāni vai. anāvṛṣṭibhayaṃ ghoraṃ darśanañca viparyayam .. 58.33 .. ### [1.58.35](https://indike.org/pramana/in.purana.vayu.1.58.35) na pramāṇaṃ smṛterasti tiṣye loke yuge yuge. garbhastho mriyate kaścidyauvanasthastathāparaḥ . sthāvire madhyakaumāre mriyante vai kalau prajāḥ .. 58.34 .. ### [1.58.36](https://indike.org/pramana/in.purana.vayu.1.58.36) adhārmikāstvanācārāstīkṣṇa kopālpatejasaḥ. anṛtabruvaśca satataṃ tiṣye jāyanti vai prajāḥ .. 58.35 .. ### [1.58.37](https://indike.org/pramana/in.purana.vayu.1.58.37) duriṣṭairduradhītaiśca durācārairdurāgamaiḥ. viprāṇāṃ karmadoṣaistaiḥ prajānāṃ jāyate bhayam .. 58.36 .. ### [1.58.38](https://indike.org/pramana/in.purana.vayu.1.58.38) hiṃsā māyā tatherṣyā ca krodho'sūyākṣamānṛtam. tiṣye bhavanti jantūnāṃ rāgo lobhaśca sarvaśaḥ .. 58.37 .. ### [1.58.39](https://indike.org/pramana/in.purana.vayu.1.58.39) saṃkṣobho jāyate'tyarthaṃ kalimāsādya vai yugam. nādhīyante tadā vedā na yajante dvijātayaḥ. utsīdanti narāścaiva kṣatriyāḥ saviśaḥ kramāt .. 58.38 .. ### [1.58.40](https://indike.org/pramana/in.purana.vayu.1.58.40) kṣudrāṇāmantyayonestu sambandhā brāhmaṇaiḥ saha. bhavantīha kalau tasmin śayanāsanabhojanaiḥ .. 58.39 .. ### [1.58.41](https://indike.org/pramana/in.purana.vayu.1.58.41) rājānaḥ śūdrabhūyiṣṭhā pāṣaṇḍānāṃ pravartakāḥ. bhrūṇahatyāḥ prajāstatra prajā evaṃ pravarttate .. 58.40 .. ### [1.58.42](https://indike.org/pramana/in.purana.vayu.1.58.42) āyurmedhā balaṃ rūpaṃ kulañcaiva prahīyate. śūdrāśca brāhmaṇācārāḥ śūdrācārāśca brāhmaṇāḥ .. 58.41 .. ### [1.58.43](https://indike.org/pramana/in.purana.vayu.1.58.43) rājavṛtte sthitāścaurāścauravṛttāśca pārthivāḥ. bhṛtyāśca naṣṭasuhṛdo yugānte paryupasthite .. 58.42 .. ### [1.58.44](https://indike.org/pramana/in.purana.vayu.1.58.44) aśīlinyo'vratāścāpi striyo madyāmiṣapriyāḥ. māyāmātrā bhaviṣyanti yugānte pratyupasthite .. 58.43 .. ### [1.58.45](https://indike.org/pramana/in.purana.vayu.1.58.45) śvāpadaprabalatvañca gavāñcaivāpyupakṣayaḥ. sādhūnāṃ vinivṛttiśca vidyāttasmin kalau yuge .. 58.44 .. ### [1.58.46](https://indike.org/pramana/in.purana.vayu.1.58.46) tadā sūkṣme mahodarko durlabho bhogināṃ tathā. caturāśramaśaithilyāddharmaḥ pravicaliṣyati .. 58.45 .. ### [1.58.47](https://indike.org/pramana/in.purana.vayu.1.58.47) tadā hyalpaphalā devī bhavedbhūmirmahīyasī. śūdrāstapaścariṣyanti yugānte pratyupaśthite .. 58.46 .. ### [1.58.48](https://indike.org/pramana/in.purana.vayu.1.58.48) tadā hyaikāhiko dharmo dvāpare yaśca māsikaḥ. tretāyāṃ vatsarasthaśca ekāhādatiricyate .. 58.47 .. ### [1.58.49](https://indike.org/pramana/in.purana.vayu.1.58.49) arakṣitāro harttāro balibhāgasya pārthivāḥ. yugānteṣu bhaviṣyanti svarakṣaṇaparāyaṇāḥ .. 58.48 .. ### [1.58.50](https://indike.org/pramana/in.purana.vayu.1.58.50) akṣatriyāśca rājāno viśaḥ śūdropajīvinaḥ. śūdrābhivādinaḥ sarve yugānte dvijasattamāḥ .. 58.49 .. ### [1.58.51](https://indike.org/pramana/in.purana.vayu.1.58.51) patayaśca bhaviṣyanti bahavo'smin kalau yuge. citravarṣī tadā devo yadā syāttu yugakṣayaḥ .. 58.50 .. ### [1.58.52](https://indike.org/pramana/in.purana.vayu.1.58.52) sarve vāṇijakāścāpi bhaviṣyantyadhame yuge. bhūyiṣṭhaṃ kūṭamānaiśca paṇyavikrītatejanaiḥ .. 58.51 .. ### [1.58.53](https://indike.org/pramana/in.purana.vayu.1.58.53) kuśīlacaryā pāṣaṇḍairvṛthārūpaiḥ samāvṛtam. puruṣālpaṃ bahustrīkaṃ yugānte paryupasthite .. 58.52 .. ### [1.58.54](https://indike.org/pramana/in.purana.vayu.1.58.54) bahuyācanako loko bhaviṣyati parasparam. kravyādanaḥ krūravākyo nārjavo nānasūyakaḥ .. 58.53 .. ### [1.58.55](https://indike.org/pramana/in.purana.vayu.1.58.55) na kṛte pratikartā ca kṣīṇo loko bhaviṣyati. aśaṅkā caiva patite tadyugāntasya lakṣaṇam .. 58.54 .. ### [1.58.56](https://indike.org/pramana/in.purana.vayu.1.58.56) naraśūnyā vasumatī śūnyā caiva bhaviṣyati. maṇḍalāni bhavantyatra deśeṣu nagareṣu ca .. 58.55 .. ### [1.58.57](https://indike.org/pramana/in.purana.vayu.1.58.57) alpodakā cālpaphalā bhaviṣyati vasundharā. goptāraścāpyagoptāraḥ prabhaviṣyantyaśāsanāḥ .. 58.56 .. ### [1.58.58](https://indike.org/pramana/in.purana.vayu.1.58.58) harttāraḥ pararatnānāṃ paradārapradharṣakāḥ. kāmātmāno durātmāno hyadharmāt sāhasapriyāḥ .. 58.57 .. ### [1.58.59](https://indike.org/pramana/in.purana.vayu.1.58.59) anaṣṭacetanāḥ puṃso muktakeśāstu cūlikāḥ. ūnaṣoḍaśavarṣāśca prajāyante yugakṣaye .. 58.58 .. ### [1.58.60](https://indike.org/pramana/in.purana.vayu.1.58.60) śukladantā jitākṣāśca muṇḍāḥ kāṣāyavāsasaḥ. śūdrā dharmañcariṣyanti yugānte paryupasthite .. 58.59 .. ### [1.58.61](https://indike.org/pramana/in.purana.vayu.1.58.61) sasyacaurā bhaviṣyaṃti tathā cailābhimarśanāḥ. caurāścaurasya harttāro hanturharttāra eva va .. 58.60 .. ### [1.58.62](https://indike.org/pramana/in.purana.vayu.1.58.62) jñānakarmaṇyuparate loke niṣkriyatāṅgate . kīṭamūṣikasarpāśca dharṣayiṣyanti mānavān .. 58.61 .. ### [1.58.63](https://indike.org/pramana/in.purana.vayu.1.58.63) subhikṣaṃ kṣemamārogyaṃ sāmarthyaṃ durlabhaṃ bhavet. kauśikāḥ prativatsyanti deśān kṣudbhayapīḍitān .. 58.62 .. ### [1.58.64](https://indike.org/pramana/in.purana.vayu.1.58.64) duḥkhenābhiplutānāñca paramāyuḥ śataṃ bhavet. dṛśyante na ca dṛśyante vedāḥ kaliyuge'khilāḥ .. 58.63 .. ### [1.58.65](https://indike.org/pramana/in.purana.vayu.1.58.65) utsīdanti tathā yajñāḥ kevalā dharmapīḍitāḥ. kaṣāyiṇaśca nirgranthāstathā kāpālinaśca ha .. 58.64 .. ### [1.58.66](https://indike.org/pramana/in.purana.vayu.1.58.66) vedavikrayiṇaścānye tīrthavikrayiṇo'pare . varṇāśramāṇāṃ ye cānye pāṣaṇḍāḥ paripanthinaḥ .. 58.65 .. ### [1.58.67](https://indike.org/pramana/in.purana.vayu.1.58.67) utpadyante tathā te vai saṃprāpte tu kalau yuge. nādhīyante tadā vedāḥ śūdrā dharmārthakovidāḥ .. 58.66 .. ### [1.58.68](https://indike.org/pramana/in.purana.vayu.1.58.68) yajante nāśvamedhena rājānaḥ śūdrayonayaḥ. strīvadhaṃ govadhaṃ kṛtvā hatvā caiva parasparam. upahanyustadānyonyaṃ sādhayanti tathā prajāḥ .. 58.67 .. ### [1.58.69](https://indike.org/pramana/in.purana.vayu.1.58.69) duḥkhapracārato'lpāyurdeśotsādaḥ sarogatā. moho glānistathāsaukhyaṃ tamovṛttaṃ kalau smṛtam .. 58.68 .. ### [1.58.70](https://indike.org/pramana/in.purana.vayu.1.58.70) prajā tu bhrūṇahatyāyāmatha vai sampravarttate. tasmādāyurbalaṃ rūpaṃ kaliṃ prāpya prahīyate. duḥkhenābhiplutānāṃ vai paramāyuḥ śataṃ nṛṇām .. 58.69 .. ### [1.58.71](https://indike.org/pramana/in.purana.vayu.1.58.71) dṛśyante nābhidṛśyante vedāḥ kaliyuge'khilāḥ. utsīdante tadā yajñāḥ kovalā dharmapīḍitāḥ .. 58.70 .. ### [1.58.72](https://indike.org/pramana/in.purana.vayu.1.58.72) tadā tvalpena kālena siddhiṃ yāsyanti mānavāḥ. dhanyā dharmañcariṣyanti yugānte dvijasattamāḥ .. 58.71 .. ### [1.58.73](https://indike.org/pramana/in.purana.vayu.1.58.73) śrutismṛtyuditaṃ dharmaṃ ye carantyanasūyakāḥ. tretāyāṃ vārṣiko dharmo dvāpare māsikaḥ smṛtaḥ. yathāśaktiṃ caran prājñastadahnā prāpruyāt kalau .. 58.72 .. ### [1.58.74](https://indike.org/pramana/in.purana.vayu.1.58.74) eṣā kaliyuge'vasthā sandhyāṃśantu nibodha me . yuge yuge tu hīyante trīṃstrīn pādāṃśca siddhayaḥ .. 58.73 .. ### [1.58.75](https://indike.org/pramana/in.purana.vayu.1.58.75) yugasvabhāvātsandhyāstu tiṣṭhantīmāstu pādaśaḥ. sandhyāsvabhāvāccāṃśeṣu pādaśaste pratiṣṭhitāḥ .. 58.74 .. ### [1.58.76](https://indike.org/pramana/in.purana.vayu.1.58.76) evaṃ sandhyāṃśake kāle samprāpte tu yugāntike. teṣāṃ śāstā hyasādhūnāṃ bhṛgūṇāṃ nidhanotthitaḥ .. 58.75 .. ### [1.58.77](https://indike.org/pramana/in.purana.vayu.1.58.77) gotreṇa vai candramaso nāmnā pramitirucyate. mādhavasya tu soṃśena pūrvaṃ svāyambhuve'ntare .. 58.76 .. ### [1.58.78](https://indike.org/pramana/in.purana.vayu.1.58.78) samāḥ sa viṃśatiṃ pūrṇāḥ paryaṭan vai vasundharām. ācakarṣa sa vai senāṃ savājirathakuñjarām .. 58.77 .. ### [1.58.79](https://indike.org/pramana/in.purana.vayu.1.58.79) pragṛhītāyudhairvipraiḥ śataśo'tha sahasraśaḥ. sa tadā taiḥ parivṛto mlecchān hanti sahasraśaḥ .. 58.78 .. ### [1.58.80](https://indike.org/pramana/in.purana.vayu.1.58.80) sa hatvā sarvagaścaiva rājñastān śūdrayonijāt. pāṣaṇḍān sa tataḥ sarvānniḥśeṣān kṛtavān prabhuḥ .. 58.79 .. ### [1.58.81](https://indike.org/pramana/in.purana.vayu.1.58.81) nātyarthaṃ dhārmikā ye ca tān sarvān hanti sarvaśaḥ. varṇavyatyāsajātāṃśca ye ca tānupajīvinaḥ .. 58.80 .. ### [1.58.82](https://indike.org/pramana/in.purana.vayu.1.58.82) udīcyānmadhyadeśāṃśca pārvatīyāṃstathaiva ca. prācyān pratīcyāṃśca tathā vindhyapṛṣṭhāparāntikān .. 58.81 .. ### [1.58.83](https://indike.org/pramana/in.purana.vayu.1.58.83) tathaiva dākṣiṇātyāṃśca draviḍān siṃhalaiḥ saha. gāndārān pāradāṃścaiva pahnavān yavanāṃstathā .. 58.82 .. ### [1.58.84](https://indike.org/pramana/in.purana.vayu.1.58.84) tuṣārān varvarāṃścīnān śūlikān daradān khasān. lampākāntha ketāṃśca kirātānāñca jātayaḥ .. 58.83 .. ### [1.58.85](https://indike.org/pramana/in.purana.vayu.1.58.85) pravṛttacakro balavān mlecchānāmantakṛdvibhuḥ. adhṛṣyaḥ sarvabhūtānāṃ cacārātha vasundharām .. 58.84 .. ### [1.58.86](https://indike.org/pramana/in.purana.vayu.1.58.86) mādhavasya tu soṃśena devasya hi vijajñivān . pūrvajanmavidhijñaiśca pramitirnāma vīryavān .. 58.85 .. ### [1.58.87](https://indike.org/pramana/in.purana.vayu.1.58.87) gotreṇa vai candramasaḥ pūrve kaliyuge prabhuḥ. dvātriṃśe'bhyudite varṣe prakrānte viṃśatiṃ samāḥ .. 58.86 .. ### [1.58.88](https://indike.org/pramana/in.purana.vayu.1.58.88) vinighnan sarvabhūtāni mānavāni sahasraśaḥ. kṛtvā vīryāvaśeṣāntu pṛthvīṃ ṟūḍhena karmaṇā . parasparanimittena kopenākasmikena tu .. 58.87 .. ### [1.58.89](https://indike.org/pramana/in.purana.vayu.1.58.89) sa sādhayitvā vṛṣalān prāyaśastānadhārmikān . gaṅgāyamunayormadhye niṣṭhāṃ prāptaḥ sahānugaḥ .. 58.88 .. ### [1.58.90](https://indike.org/pramana/in.purana.vayu.1.58.90) tato vyatīte tasmiṃstu amātye satyasainike. utsādya pārthivān sarvān mlecchāṃścaiva sahasraśaḥ .. 58.89 .. ### [1.58.91](https://indike.org/pramana/in.purana.vayu.1.58.91) tatra sandhyāṃśake kāle samprāpte tu yugāntike. sthitāsvalpāvaśiṣṭāsu prajāsviha vkacit vkacit .. 58.90 .. ### [1.58.92](https://indike.org/pramana/in.purana.vayu.1.58.92) apragrahāstatastā vai lokaceṣṭāstu vṛndaśaḥ. upahiṃsanti cānyonyaṃ prapadyante parasparam .. 58.91 .. ### [1.58.93](https://indike.org/pramana/in.purana.vayu.1.58.93) arājake yugavaśāt saṃśaye samupasthite. prajāstā vai tataḥ sarvāḥ parasparabhayārditāḥ .. 58.92 .. ### [1.58.94](https://indike.org/pramana/in.purana.vayu.1.58.94) vyākulāśca pariśrāntāstyaktvā dārān gṛhāṇi ca. svān prāṇān samavekṣanto niṣṭhāṃ prāptāḥ suduḥkhitāḥ .. 58.93 .. ### [1.58.95](https://indike.org/pramana/in.purana.vayu.1.58.95) naṣṭe śraute smṛte dharme parasparahatāstadā. nirmaryādā nirākrandā niḥsnehā nirapatrapāḥ .. 58.94 .. ### [1.58.96](https://indike.org/pramana/in.purana.vayu.1.58.96) naṣṭe varpe pratihatā hrasvakāḥ pañjaviṃśakāḥ. hitvā dārāṃśca putrāṃśca viṣādavyākulendriyāḥ .. 58.95 .. ### [1.58.97](https://indike.org/pramana/in.purana.vayu.1.58.97) anāvṛṣṭihatāścaiva vārttāmutsṛjya duḥkhitāḥ. pratyantāṃstānnipevante hitvā janapadān svakān .. 58.96 .. ### [1.58.98](https://indike.org/pramana/in.purana.vayu.1.58.98) saritaḥ sāgarān kūpān sevante parvatāṃstadā. madhumāṃsairmūlaphalairvarttayanti suduḥkhitāḥ .. 58.97 .. ### [1.58.99](https://indike.org/pramana/in.purana.vayu.1.58.99) cīravastrājinadharā niṣpatrā niṣparigrahāḥ. varṇāśramaparibhraṣṭāḥ saṅkaraṃ ghoramāsthitāḥ .. 58.98 .. ### [1.58.100](https://indike.org/pramana/in.purana.vayu.1.58.100) etāḥ kāṣṭhāmanuprāptā alpaśeṣāstathā prajāḥ . jarāvyādhikṣudhāviṣṭā duḥkhānnirvedamāgaman .. 58.99 .. ### [1.58.101](https://indike.org/pramana/in.purana.vayu.1.58.101) vicāraṇantu nirvedāt sāmyāvasthā vicāraṇāt. sāmyāvasthāsu sambodhaḥ sambodhāddharmaśīlatā .. 58.100 .. ### [1.58.102](https://indike.org/pramana/in.purana.vayu.1.58.102) tāsupagamayuktāsu kaliśiṣṭāsu vai svayam. ahorātraṃ tadā tāsāṃ yugantu parivarttate .. 58.101 .. ### [1.58.103](https://indike.org/pramana/in.purana.vayu.1.58.103) cittasammohanaṃ kṛtvā tāsāntaiḥ saptamantu tat. bhāvino'rthasya ca balāttataḥ kṛtamavartata .. 58.102 .. ### [1.58.104](https://indike.org/pramana/in.purana.vayu.1.58.104) pravṛtte tu punastasmiṃstataḥ kṛtayuge tu vai. utpannāḥ kaliśiṣṭāstu kārtayugyaḥ prajāmtadā .. 58.103 .. ### [1.58.105](https://indike.org/pramana/in.purana.vayu.1.58.105) tiṣṭhanti ceha ye siddhāḥ sudṛṣṭā vicaranti ca. sadā saptarṣayaścaiva tatra te ca vyavasthitāḥ .. 58.104 .. ### [1.58.106](https://indike.org/pramana/in.purana.vayu.1.58.106) brahmakṣatraviśaḥ śūdrā bījārthaṃ ye smṛtā iha. kalijaiḥ saha te sarve nirviśeṣāstadābhavan .. 58.105 .. ### [1.58.107](https://indike.org/pramana/in.purana.vayu.1.58.107) teṣāṃ saptarṣayo dharma kathayantītareṣu ca . varṇā śramācārayuktaḥ śrautaḥ smārto dvidhā tu saḥ .. 58.106 .. ### [1.58.108](https://indike.org/pramana/in.purana.vayu.1.58.108) tatasteṣu kriyāvatsu varttante vai prajāḥ kṛte . śrautaḥ smārttaḥ kṛtānāntu dharmaḥ saptarṣidarśitaḥ .. 58.107 .. ### [1.58.109](https://indike.org/pramana/in.purana.vayu.1.58.109) tāsu dharmavyavastārthaṃ tiṣṭhantīhāyugakṣayāt . manvantarādhikāreṣu tiṣṭhanti munayastu vai .. 58.108 .. ### [1.58.110](https://indike.org/pramana/in.purana.vayu.1.58.110) yathā dāvapradagdheṣu tṛṇeṣviha tape ṛtau . navānāṃ prathamaṃ dṛṣṭasteṣāṃ mūle tu sambhavaḥ .. 58.109 .. ### [1.58.111](https://indike.org/pramana/in.purana.vayu.1.58.111) evaṃ yugādyugasteha santānastu parasparam . varttate hyavyavacchedādyāvanmanvantarakṣayaḥ .. 58.110 .. ### [1.58.112](https://indike.org/pramana/in.purana.vayu.1.58.112) sukhamāyurbalaṃ rūpaṃ dharmārthau kāma eva ca . yugeṣvetāni hīyante trīṇi pādakrameṇa tu .. 58.111 .. ### [1.58.113](https://indike.org/pramana/in.purana.vayu.1.58.113) sasandhyaṃśeṣu hīyante yugānāṃ dharmasiddhayaḥ. ityeṣa pratisandhirvaḥ kīrttitastu mayā dvijāḥ .. 58.112 .. ### [1.58.114](https://indike.org/pramana/in.purana.vayu.1.58.114) caturyugānāṃ sarveṣāmetenaiva prasādhanam .. ### [1.58.115](https://indike.org/pramana/in.purana.vayu.1.58.115) eṣā caturyugāvṛttirāsahasrāt pravarttate .. 58.113 .. ### [1.58.116](https://indike.org/pramana/in.purana.vayu.1.58.116) brahmaṇastadahaḥ proktaṃ rātriśca tāvatī smṛtā . atrārjavaṃ jaḍībhāvo bhūtānāmāyugakṣayāt .. 58.114 .. ### [1.58.117](https://indike.org/pramana/in.purana.vayu.1.58.117) etadeva tu sarveṣāṃ yugānāṃ lakṣaṇaṃ smṛtam. eṣā caturyugānāntu gaṇanā hyekasaptatiḥ. krameṇa parivṛttā tu manorantaramucyate .. 58.115 .. ### [1.58.118](https://indike.org/pramana/in.purana.vayu.1.58.118) caturyuge tathaikasmin bhavatīha yathāśrutam. tathā cānyeṣu bhavati punastadvai yathākramam .. 58.116 .. ### [1.58.119](https://indike.org/pramana/in.purana.vayu.1.58.119) sarge sarge yathā bhedā utpadyante tathaiva tu . pañcaviṃśatparimitā na nyūnā nādhikāstathā .. 58.117 .. ### [1.58.120](https://indike.org/pramana/in.purana.vayu.1.58.120) tathā kalpayugaiḥ sārddhaṃ bhavanti samalakṣaṇāḥ. manvantarāṇāṃ sarveṣāmetadeva tu lakṣaṇam .. 58.118 .. ### [1.58.121](https://indike.org/pramana/in.purana.vayu.1.58.121) tathā yugānāṃ parivarttanāni cirapravṛttāni yugasvabhavāt . tathā na santiṣṭhati jīvalokaḥ kṣayodayābhyāṃ parivarttamānaḥ .. 58.119 .. ### [1.58.122](https://indike.org/pramana/in.purana.vayu.1.58.122) ityetallakṣaṇaṃ proktaṃ yugānāṃ vai samāsataḥ. atītānāgatānāṃ vai sarvāṇyevāntarāṇi .. 58.120 .. ### [1.58.123](https://indike.org/pramana/in.purana.vayu.1.58.123) anāgateṣu tadvacca tarkkaḥ kāryo vijānatā. manvantareṣu sarveṣu atītānāgateṣviha .. 58.121 .. ### [1.58.124](https://indike.org/pramana/in.purana.vayu.1.58.124) manvantareṇa caikena sarvāṇyevāntarāṇi vai. vyākhyātāni vijānīdvaṃ kalpe kalpena caiva hi .. 58.122 .. ### [1.58.125](https://indike.org/pramana/in.purana.vayu.1.58.125) asyābhimāninaḥ sarve nāmarūpairbhavantyuta. devā hyaṣṭavidhā ye ca iha manvantareśvarāḥ .. 58.123 .. ### [1.58.126](https://indike.org/pramana/in.purana.vayu.1.58.126) ṛṣayo manavaścaiva sarve tulyāḥ prayojanaiḥ. evaṃ varṇāśramāṇāntu pravibhāgo yuge yuge .. 58.124 .. ### [1.58.127](https://indike.org/pramana/in.purana.vayu.1.58.127) yugasvabhāvācca tathā vidhatte vai sadā prabhuḥ . varṇāśramavibhāgaśca yugāni yugasiddhaye .. 58.125 .. ### [1.58.128](https://indike.org/pramana/in.purana.vayu.1.58.128) anuṣaṅgaḥ samākhyātaḥ sṛṣṭisargannibodhata. vistareṇānupūrvyā ca sthitiṃ vakṣye yugeṣviha .. 58.126 .. ### [1.58.129](https://indike.org/pramana/in.purana.vayu.1.58.129) iti śrīmahāpurāṇe vāyuprokte caturyugākhyānaṃ nāmāṣṭapañcāśo'dhyāyaḥ .. 58 .. ## Linked texts (5) - [Brahmāṇḍapurāṇa](https://indike.org/pramana/in.purana.brahmanda.1.31.1) — Vyāsa, Sanskrit - [Matsyapurāṇa](https://indike.org/pramana/in.purana.matsya.144.1) — Vyāsa, Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.1.4.38.238) — Sanskrit - [Śūdrakamalākara](https://indike.org/pramana/in.niti.dharma.jati.sudrakamalakara.6.3-2) — Kamalākarabhaṭṭa, Sanskrit - [Śūdrācāraśiromaṇi](https://indike.org/pramana/in.niti.dharma.acara.sudradharma.sudracarasiromani.1.p52) — Kṛṣṇaśeṣa 1520, Sanskrit --- Source: [https://indike.org/pramana/in.purana.vayu.1.58](https://indike.org/pramana/in.purana.vayu.1.58) · Pramāṇa