[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.59 # Vayupurana 1.59: adhyāyaḥ 59 Vāyupurāṇa 1.59 - **Language:** Sanskrit ### adhyāyaḥ 59 ### [1.59.1](https://indike.org/pramana/in.purana.vayu.1.59.1) ..sūta uvāca.. ### [1.59.2](https://indike.org/pramana/in.purana.vayu.1.59.2) yugeṣu yāstu jāyante prajāstā vai nibodhata. āśurī sarpagopakṣipaiśācī yakṣarākṣasī. yasmin yuge ca sambhūtistāsāṃ yāvattu jīvitam .. 59.1 .. ### [1.59.3](https://indike.org/pramana/in.purana.vayu.1.59.3) piśācāsuragandharvā yakṣarākṣasapannagāḥ. yugamātrantu jīvanti ṛte mṛtyuvadhena te .. 59.2 .. ### [1.59.4](https://indike.org/pramana/in.purana.vayu.1.59.4) mānuṣāṇāṃ paśūnāñca pakṣiṇāṃ sthāvaraiḥsaha. teṣāmāyuḥ parikrāntaṃ yugadharmeṣu sarvaśaḥ .. 59.3 .. ### [1.59.5](https://indike.org/pramana/in.purana.vayu.1.59.5) asthitistu kalau dṛṣṭā bhūtānāmāyuṣastu vai. paramāyuḥ śatantvetanmanuṣyāṇāṃ kalau smṛtam .. 59.4 .. ### [1.59.6](https://indike.org/pramana/in.purana.vayu.1.59.6) devāsurapramāṇāttu saptasaptāṅgulaṃ hrasat. ahgulānāṃ śataṃ pūrṇamaṣṭapañcāśaduttaram .. 59.5 .. ### [1.59.7](https://indike.org/pramana/in.purana.vayu.1.59.7) devāsurapramāṇantaducchrāyaṃ kalijaiḥ smṛtam. catvāraścāpyaśītiśca kalijairaṅgulaiḥ smṛtam .. 59.6 .. ### [1.59.8](https://indike.org/pramana/in.purana.vayu.1.59.8) svenāṅgulapramāṇena ūrddhvamāpādamastakam. ityeṣa mānuṣotsedho hrasatīha yugāntike .. 59.7 .. ### [1.59.9](https://indike.org/pramana/in.purana.vayu.1.59.9) sarveṣu yugakāleṣu atītānāgateṣviha. svenāṅgulapramāṇena aṣṭatālaḥ smṛto naraḥ .. 59.8 .. ### [1.59.10](https://indike.org/pramana/in.purana.vayu.1.59.10) āpādato mastakantu navatālo bhavettu yaḥ. saṃhatājānubāhustu sa surairapi pūjyate .. 59.9 .. ### [1.59.11](https://indike.org/pramana/in.purana.vayu.1.59.11) gavāśvahastināñcaiva mahiṣa sthāvarātmanām. krameṇaitena yogena hrāsavṛddhī yuge yuge .. 59.10 .. ### [1.59.12](https://indike.org/pramana/in.purana.vayu.1.59.12) ṣaṭsaptatyaṅgulotsedhaḥ paśūnāṃ kakudastu vai. aṅgulāṣṭaśataṃ pūrṇamutsedhaḥ kariṇāṃ smṛtaḥ .. 59.11 .. ### [1.59.13](https://indike.org/pramana/in.purana.vayu.1.59.13) aṅgulānāṃ sahasrantu catvāriṃśāṅgulaṃ vinā . pañcāśataṃ hayānāñca utsedhaḥ śākhināṃ smṛtaḥ .. 59.12 .. ### [1.59.14](https://indike.org/pramana/in.purana.vayu.1.59.14) mānuṣasya śarīrasya sanniveśastu yādṛśaḥ. tallakṣaṇastu devānāṃ dṛśyate tattvarśanāt .. 59.13 .. ### [1.59.15](https://indike.org/pramana/in.purana.vayu.1.59.15) buddhyātiśayayuktañca devānāṃ kāyamucyate . devānatiśayañcaiva mānuṣaṃ kāyamucyate .. 59.14 .. ### [1.59.16](https://indike.org/pramana/in.purana.vayu.1.59.16) ityete vai parikrāntā bhāvā ye divyamānuṣāḥ. paśūnāṃ pakṣiṇāñcaiva sthāvarāṇāṃ nibodhata .. 59.15 .. ### [1.59.17](https://indike.org/pramana/in.purana.vayu.1.59.17) gāvo hyajā mahiṣyo'śvā hastinaḥ pakṣiṇo nagāḥ. upayūktāḥ kriyāsvete yajñiyāsviha sarvaśaḥ .. 59.16 .. ### [1.59.18](https://indike.org/pramana/in.purana.vayu.1.59.18) devasthāneṣu jāyante tadrūpā eva te punaḥ . yathāśayopabhogāstu devānāṃ śubhamūrttayaḥ .. 59.17 .. ### [1.59.19](https://indike.org/pramana/in.purana.vayu.1.59.19) teṣāṃ rūpānurūpaistaiḥ pramāṇaiḥ sthāṇujaṅgamaiḥ. manojñaistattvabhāvajñaiḥ sukhino hyupapedire .. 59.18 .. ### [1.59.20](https://indike.org/pramana/in.purana.vayu.1.59.20) ataḥ śiṣṭān pravakṣyāmi sataḥ sādhūṃstathaiva ca. saditi brahmaṇaḥ śabdastadvanto ye bhavantyuta. sāyujyaṃ brahmaṇo'tyantaṃ tena santaḥ prajakṣyate .. 59.19 .. ### [1.59.21](https://indike.org/pramana/in.purana.vayu.1.59.21) daśātmake ye viṣaye kāraṇe cāṣṭalakṣaṇe . na krudhyanti na hṛṣyanti jitātmānastu te smṛtāḥ .. 59.20 .. ### [1.59.22](https://indike.org/pramana/in.purana.vayu.1.59.22) sāmānyeṣu ca dharmeṣu tathā vaiśeṣikeṣu ca. brahmakṣatraviśo yuktā yasmāttasmāddvijātayaḥ .. 59.21 .. ### [1.59.23](https://indike.org/pramana/in.purana.vayu.1.59.23) varṇāśrameṣu yuktasya svargagomukhacāriṇaḥ. śrautasmārtasya dharmasya jñānāddharmaḥ sa ucyate .. 59.22 .. ### [1.59.24](https://indike.org/pramana/in.purana.vayu.1.59.24) vidyāyāḥ sādhanātsādhurbrahmacārī gurorhitaḥ. kriyāṇāṃ sādhanāccaiva gṛhasthaḥ sādhurucyate .. 59.23 .. ### [1.59.25](https://indike.org/pramana/in.purana.vayu.1.59.25) sādhanāttapaso'raṇye sādhurvaikhānasaḥ smṛtaḥ. yatamāno yatiḥ sādhuḥ smṛto yogasya sādhanāt .. 59.24 .. ### [1.59.26](https://indike.org/pramana/in.purana.vayu.1.59.26) evamāśramadharmāṇāṃ sādhanāt sādhavaḥ smṛtāḥ. gṛhastho brahmacārī ca vānaprastho'tha bhikṣukaḥ .. 59.25 .. ### [1.59.27](https://indike.org/pramana/in.purana.vayu.1.59.27) na ca devā na pitaro munayo na ca mānavāḥ. ayaṃ dharmo hyayaṃ neti bruvanto'bhinnadarśanāḥ .. 59.26 .. ### [1.59.28](https://indike.org/pramana/in.purana.vayu.1.59.28) dharmādharmāviha proktau śabdāvetau kriyātmakau. kuśalākuśalaṃ karma dharmā dharmāviti smṛtau .. 59.27 .. ### [1.59.29](https://indike.org/pramana/in.purana.vayu.1.59.29) dhāraṇā dhṛtirityarthāddhātordharmaḥ prakīrttitaḥ . adhāraṇe'mahattve ca adharma iti cocyate .. 59.28 .. ### [1.59.30](https://indike.org/pramana/in.purana.vayu.1.59.30) atreṣṭaprāpakā dharmā ācāryairupadiśyate. vṛddhā hyalolupāścaiva ātmavanto hyadambhakāḥ. samyagvinītā ṛjavastānācāryān pracakṣate .. 59.29 .. ### [1.59.31](https://indike.org/pramana/in.purana.vayu.1.59.31) svayamācarate yasmādācāraṃ sthāpayatyapi. ācinoti ca śāstrārthānyamaiḥ sanniyamairyutaḥ .. 59.30 .. ### [1.59.32](https://indike.org/pramana/in.purana.vayu.1.59.32) pūrvebhyo vedayitveha śrautaṃ saptarṣayo'bruvan. ṛco yajūṃṣi sāmāni brahmaṇo'ṅgāni ca śrutiḥ .. 59.31 .. ### [1.59.33](https://indike.org/pramana/in.purana.vayu.1.59.33) manvantarasyātītasya smṛtvācāraṃ punarjagau. tasmātsmārtaḥ smṛto dharmo varṇāśramavibhāgajaḥ .. 59.32 .. ### [1.59.34](https://indike.org/pramana/in.purana.vayu.1.59.34) sa eṣa dvividho dharmaḥ śiṣṭācāra ihocyate. śeṣaśabdāt śiṣṭa iti śiṣṭācāraḥ pracakṣyate .. 59.33 .. ### [1.59.35](https://indike.org/pramana/in.purana.vayu.1.59.35) manvantareṣu ye śiṣṭā iha tiṣṭhanti dhārmikāḥ. manuḥ saptarṣayaścaiva lokasantānakāraṇāt. dharmārthaṃ ye ca śiṣṭa vai yāthātathyaṃ pracakṣyate .. 59.34 .. ### [1.59.36](https://indike.org/pramana/in.purana.vayu.1.59.36) manvādayaśca ye śiṣṭā ye mayā prāgudīritāḥ. taiḥ śiṣṭaiścarito dharmaḥ samyageva yuge yuge .. 59.35 .. ### [1.59.37](https://indike.org/pramana/in.purana.vayu.1.59.37) trayī vārtā daṇḍanītirijyā varṇāśramāstathā. śiṣṭairācaryate yasmānmanunā ca punaḥ punaḥ. pūrvaiḥ pūrvagatatvācca śiṣṭācāraḥ sa śāśvataḥ .. 59.36 .. ### [1.59.38](https://indike.org/pramana/in.purana.vayu.1.59.38) dānaṃ satyantapo'lobho vidyejyāprajanī dayā. aṣṭau tāni caritrāṇi śiṣṭācārasya lakṣaṇam .. 59.37 .. ### [1.59.39](https://indike.org/pramana/in.purana.vayu.1.59.39) śiṣṭā yasmāccarantyenaṃ manuḥ saptarṣayaśca vai. manvantareṣu sarveṣu śiṣṭācārastataḥ smṛtaḥ .. 59.38 .. ### [1.59.40](https://indike.org/pramana/in.purana.vayu.1.59.40) vijñeyaḥ śravaṇāt śrautaḥ smaraṇāt smārtta ucyate. ijyā vedātmakaḥ śrautaḥ smārto varṇāśramātmakaḥ. pratyaṅgāni ca vakṣyāmi dharmasyeha tu lakṣaṇam .. 59.39 .. ### [1.59.41](https://indike.org/pramana/in.purana.vayu.1.59.41) dṛṣṭvā prabhūtamarthaṃ yaḥ pṛṣṭo vai na nigūhati. yathā bhūtapravādastu ityetatsatyalakṣaṇam .. 59.40 .. ### [1.59.42](https://indike.org/pramana/in.purana.vayu.1.59.42) brahmacaryaṃ japo maunaṃ nirāhāratvameva ca. ityetat tapaso mūlaṃ sughoraṃ taddurāsadam .. 59.41 .. ### [1.59.43](https://indike.org/pramana/in.purana.vayu.1.59.43) paśūnāṃ dravyahaviṣāmṛksāmayajuṣāṃ tathā. ṛtvijāṃ dakṣiṇānāñca saṃyogo yoga ucyate .. 59.42 .. ### [1.59.44](https://indike.org/pramana/in.purana.vayu.1.59.44) ātmavatsarvabhūteṣu yo hitāyāhitāya ca. samā pravarttate dṛṣṭiḥ kṛtsnā hyeṣā dayā smṛtā .. 59.43 .. ### [1.59.45](https://indike.org/pramana/in.purana.vayu.1.59.45) ākruṣṭo'bhihato vāpi nākrośedyo na hanti vā. vāṅ‌manaḥkarmabhiḥ kṣāntistitikṣaiṣā kṣamā smṛtā .. 59.44 .. ### [1.59.46](https://indike.org/pramana/in.purana.vayu.1.59.46) svāminārakṣyamāṇānāmutsṛṣṭānāñca mṛtsu ca. parasvānāmanādānamalobha iha kīrtyate .. 59.45 .. ### [1.59.47](https://indike.org/pramana/in.purana.vayu.1.59.47) maithunasyāsamācāro hyacintanamakalpanam. nivṛttirbrahmacaryaṃ tadacchidraṃ dama ucyate .. 59.46 .. ### [1.59.48](https://indike.org/pramana/in.purana.vayu.1.59.48) ātmārthaṃ vā parārthaṃ vā indriyāṇīha yasya vai. na mithyā sampravartante śamasyai tattu lakṣaṇam .. 59.47 .. ### [1.59.49](https://indike.org/pramana/in.purana.vayu.1.59.49) daśātmake yo viṣaye kāraṇe cāṣṭalakṣaṇe. na krudhyettu pratihataḥ sa jitātmā vibhāvyate .. 59.48 .. ### [1.59.50](https://indike.org/pramana/in.purana.vayu.1.59.50) yadyadiṣṭatamaṃ dravyaṃ nyāyenopāgatañca yat. tattadguṇavate deyamityetaddānalakṣaṇam .. 59.49 .. ### [1.59.51](https://indike.org/pramana/in.purana.vayu.1.59.51) dānaṃ trividhamityetat kaniṣṭhajyeṣṭhamadhayamam . tatra naiḥśreyasaṃ jyeṣṭhaṃ kaniṣṭhaṃ svārthasiddhaye. kāruṇyātsarvabhūtebhyaḥ suvibhāgastu bandhuṣu .. 59.50 .. ### [1.59.52](https://indike.org/pramana/in.purana.vayu.1.59.52) śrutismṛtibhyāṃ vihito dharmo varṇāśramātmakaḥ. śiṣṭācārāviruddhaśca dharmaḥ satsādhusaṅgataḥ .. 59.51 .. ### [1.59.53](https://indike.org/pramana/in.purana.vayu.1.59.53) apradveṣo hyaniṣṭeṣu tatheṣṭānabhinandanam. prītitāpaviṣādebhyo vinivṛttirviraktatā .. 59.52 .. ### [1.59.54](https://indike.org/pramana/in.purana.vayu.1.59.54) saṃnyāsaḥ karmaṇo nyāsaḥ kṛtānāmakṛtaiḥ saha. kuśalākuśalānāñca prahāṇaṃ tyāga ucyate .. 59.53 .. ### [1.59.55](https://indike.org/pramana/in.purana.vayu.1.59.55) avyaktādyo'viśeṣācca vikāro'sminnacetane. cetanācetānyatvavijñānaṃ jñānamucyate .. 59.54 .. ### [1.59.56](https://indike.org/pramana/in.purana.vayu.1.59.56) pratyaṅgānāṃ tu dharmasya ityetallakṣaṇaṃ smṛtam . ṛṣibhirdharmatattvajñaiḥ pūrve svāyambhuve'ntare .. 59.55 .. ### [1.59.57](https://indike.org/pramana/in.purana.vayu.1.59.57) atra vo varttayiṣyāmi vidhirmanvantarasya yaḥ . itaretaravarṇasya cāturvarṇasya caiva hi. pratimanvantarañcaiva śrutiranyā vidhīyate .. 59.56 .. ### [1.59.58](https://indike.org/pramana/in.purana.vayu.1.59.58) ṛco yajūṣiṃ sāmāni yathāvat pratidaivatam. ābhūtasaṃplavasyāpi varjyaikaṃ śatarudriyam .. 59.57 .. ### [1.59.59](https://indike.org/pramana/in.purana.vayu.1.59.59) vidhirhotraṃ tathā stotraṃ pūrvavatsampravartate. dravyastotraṃ guṇastotraṃ karma stotraṃ tathaiva ca. caturthamābhijanikaṃ stotrametaccaturvidham .. 59.58 .. ### [1.59.60](https://indike.org/pramana/in.purana.vayu.1.59.60) manvantareṣu sarveṣu yathā devā bhavanti ye. pravarttayati teṣāṃ vai brahmastotraṃ caturvidham. evaṃ mantraguṇānāñca samutpattiścaturvidhā .. 59.59 .. ### [1.59.61](https://indike.org/pramana/in.purana.vayu.1.59.61) atharvayajuṣāṃ sāmnāṃ vedeṣviha pṛthak pṛthak . ṛṣīṇāntapyatāmugrantapaḥ paramaduścaram .. 59.60 .. ### [1.59.62](https://indike.org/pramana/in.purana.vayu.1.59.62) mantrāḥ prādurbabhūvurhi pūrvamanvantareṣviha. paritoṣādbhayādduḥkhātsukhācchokācca pañcadhā .. 59.61 .. ### [1.59.63](https://indike.org/pramana/in.purana.vayu.1.59.63) ṛṣīṇāṃ tapaḥkārtsnyena darśanena yadṛcchayā. ṛṣīṇāṃ yadṛṣitvaṃ hi tadvakṣyāmīha lakṣaṇaiḥ .. 59.62 .. ### [1.59.64](https://indike.org/pramana/in.purana.vayu.1.59.64) atītānāgatānāntu pañcadhā ṛṣirucyate. atastvṛṣīṇāṃ vakṣyāmi hyārṣasya ca samudbhavam .. 59. 63 .. ### [1.59.65](https://indike.org/pramana/in.purana.vayu.1.59.65) guṇasāmye varttamāne sarvasampralaye tadā. aticāre tu devānāmatideśe tayoryathā .. 59.64 .. ### [1.59.66](https://indike.org/pramana/in.purana.vayu.1.59.66) abuddhipūrvakaṃ tadvai cetanārthaṃ pravarttate . tena hyabuddhipūrvaṃ taccetanena hyadhiṣṭhitam .. 59.65 .. ### [1.59.67](https://indike.org/pramana/in.purana.vayu.1.59.67) varttate ca yathā tau tu yathā matsyodake ubhe. cetanādhiṣṭhitaṃ tattvaṃ pravarttati guṇātmanā .. 59.66 .. ### [1.59.68](https://indike.org/pramana/in.purana.vayu.1.59.68) karaṇatvāttathā kāryaṃ tadā tasya pravarttate. viṣaye viṣayitvācca hyarthe'rthitvāttathaiva ca .. 59.67 .. ### [1.59.69](https://indike.org/pramana/in.purana.vayu.1.59.69) kālena prāpaṇīyena bhedāstu kāraṇātmakāḥ. saṃsidhyanti tadā vyaktāḥ krameṇa mahadādayaḥ .. 59.68 .. ### [1.59.70](https://indike.org/pramana/in.purana.vayu.1.59.70) mahataśvāpyahaṅkārastasmādbhūtendriyāṇi ca. bhūtabhedāstu bhedebhyo jajñire te parasparam. saṃsiddhikāraṇaṃ kāryaṃ sadya eva vivarttate .. 59.69 .. ### [1.59.71](https://indike.org/pramana/in.purana.vayu.1.59.71) yatholmukasruṭannūrddhvamekakālaṃ pravarttate. tathā vivṛtaḥ kṣetrajñaḥ kālenaikena karmaṇā .. 59.70 .. ### [1.59.72](https://indike.org/pramana/in.purana.vayu.1.59.72) yathāndhakāre khadyotaḥ sahasā sampradṛśyate. tathā vivṛtto hyavyaktāt khadyota iva celvaṇaḥ .. 59.71 .. ### [1.59.73](https://indike.org/pramana/in.purana.vayu.1.59.73) sa mahān saśarīrastu yatraivāgre vyavasthitaḥ. tatraiva saṃsthito vidvān dvāraśālāmukhe sthitaḥ .. 59.72 .. ### [1.59.74](https://indike.org/pramana/in.purana.vayu.1.59.74) mahāṃstu tamasaḥ pāre vailakṣaṇyādvibhāvyate . tatraiva saṃsthito vidvāṃstamaso'nta iti śrutiḥ .. 59.73 .. ### [1.59.75](https://indike.org/pramana/in.purana.vayu.1.59.75) buddhirvivarttamānasya prādurbhūtā caturvidhā . jñānaṃ vairāgyamaiśvaryaṃ dharmaśceti catuṣṭayam .. 59.74 .. ### [1.59.76](https://indike.org/pramana/in.purana.vayu.1.59.76) sāṃsiddikānyathaitāni supratīkāni tasya vai . mahataḥ saśarīrasya vaivarttyāt siddhirucyate .. 59.75 .. ### [1.59.77](https://indike.org/pramana/in.purana.vayu.1.59.77) atra śete ca yatpuryāṃ kṣetrajñānamathāpi vā. purīśayatvātpuruṣaḥ kṣetrajñānāt saucyate .. 59.76 .. ### [1.59.78](https://indike.org/pramana/in.purana.vayu.1.59.78) kṣetrajñaḥ kṣetravijñānāt bhagavān matirucyate. yasmādbuddhyā tu śete ha tasmādbodhātmakaḥ sa vai . saṃsiddhaye parigataṃ vyaktāvyaktamacetanam .. 59.77 .. ### [1.59.79](https://indike.org/pramana/in.purana.vayu.1.59.79) evaṃ nivṛttiḥ kṣetrajñā kṣetrajñenābhisaṃhitā. kṣetrajñena parijñāto bhogyo'yaṃ viṣayastviti .. 59.78 .. ### [1.59.80](https://indike.org/pramana/in.purana.vayu.1.59.80) ṛṣītyeṣa gatau dhātuḥśrutau satye tapasyatha. etatsanniyate tasmin brahmaṇā sa ṛṣiḥ smṛtaḥ .. 59.79 .. ### [1.59.81](https://indike.org/pramana/in.purana.vayu.1.59.81) nivṛttisamakālaṃ tu buddhyāvyaktamṛṣiḥ svayam. paraṃ hi ṛṣate yasmātparamarṣistataḥ smṛtaḥ .. 59.80 .. ### [1.59.82](https://indike.org/pramana/in.purana.vayu.1.59.82) gatyarthādṛṣaterddhātornāmanirvṛttirāditaḥ . yasmādeṣa svayambhūtastasmāccātmarṣitā smṛtā. īśvarāḥ svayamudbhūtā mānasā brahmaṇaḥ sutāḥ .. 59.81 .. ### [1.59.83](https://indike.org/pramana/in.purana.vayu.1.59.83) yasmānna hanyate mānairmahān parigataḥ puraḥ. yasmādṛṣanti ye dhīrā mahāntaṃ sarvato guṇaiḥ. tasmānmaharṣayaḥ proktā buddheḥ paramadarśinaḥ .. 59.82 .. ### [1.59.84](https://indike.org/pramana/in.purana.vayu.1.59.84) īśvarāṇāṃ śubhāsteṣāṃ mānasāntarasāśca te. ahaṅkāraṃ tamaścaiva tyaktvā ca ṛṣitāṅgātāḥ .. 59.83 .. ### [1.59.85](https://indike.org/pramana/in.purana.vayu.1.59.85) tasmāttu ṛṣayaste vai bhūtādau tattvadarśanāḥ. ṛṣiputrā ṛṣīkāstu maithunādgarbhasambhavāḥ .. 59.84 .. ### [1.59.86](https://indike.org/pramana/in.purana.vayu.1.59.86) tanmātrāṇi ca satyañca ṛṣante te mahaujasaḥ. satyarṣayastataste vai paramāḥ satyadarśanāḥ .. 59.85 .. ### [1.59.87](https://indike.org/pramana/in.purana.vayu.1.59.87) ṛṣīṇāñca sutāste tu vijñeyā ṛṣiputrakāḥ . ṛṣanti vai śrutaṃ yasmādviśeṣāṃścaiva tattvataḥ. tasmāt śrutarṣayaste'pi śrutasya paridarśanāḥ .. 59.86 .. ### [1.59.88](https://indike.org/pramana/in.purana.vayu.1.59.88) avyaktātmā mahātmā cāhaṅkārātmā tathaiva ca. bhūtātmā cendriyātmā ca teṣāṃ tajjñānamucyate . ityetā ṛṣijātīstu nāmabhiḥ pañca vai śrṛṇu .. 59.87 .. ### [1.59.89](https://indike.org/pramana/in.purana.vayu.1.59.89) bhṛgurmarīciratriśca aṅgirāḥ pulahaḥkratuḥ. manurdakṣo vasiṣṭhaśca pulastyaśceti te daśa. brahmaṇo mānasā hyete udbhūtāḥ svayamīśvarāḥ .. 59.88 .. ### [1.59.90](https://indike.org/pramana/in.purana.vayu.1.59.90) pravarttante ṛṣeryasmānmahāṃstasmānmaharṣayaḥ. īśvarāṇāṃ sutāstvete ṛṣayastānnibodhata .. 59.89 .. ### [1.59.91](https://indike.org/pramana/in.purana.vayu.1.59.91) kāvyo bṛhaspatiścaiva kaśyapaścośanāstathā. utathyo vāmadevaśca apojyaścaiśijastathā .. 59.90 .. ### [1.59.92](https://indike.org/pramana/in.purana.vayu.1.59.92) karddamo viśravāḥ śaktirvālakhilya stathā dharāḥ. ityete ṛṣayaḥ proktā jñānato ṛṣitāṅgatāḥ .. 59.91 .. ### [1.59.93](https://indike.org/pramana/in.purana.vayu.1.59.93) ṛṣiputrānṛṣikāṃstu garbhotpannānnibodhata. vatsaro nagrahūścaiva bhāradvājastathaiva ca .. 59.92 .. ### [1.59.94](https://indike.org/pramana/in.purana.vayu.1.59.94) bṛhadutthaḥ śaradvāṃśca agastyaścauśijastathā. ṛṣirdīrghatamāścaiva bṛhadukthaḥ śaradvataḥ .. 59.93 .. ### [1.59.95](https://indike.org/pramana/in.purana.vayu.1.59.95) vājaśravāḥ suvittaśca suvāgveṣaparāyaṇaḥ. dadhīcaḥ śaṅkhamāṃścaiva rājā vaiśravaṇastathā. ityete ṛṣikāḥ proktāste satyādṛṣitāṅgatāḥ .. 59.94 .. ### [1.59.96](https://indike.org/pramana/in.purana.vayu.1.59.96) īśvarā ṛṣikāścaiva ye cānye vai tathā smṛtāḥ. ete mantrakṣakṛtaḥ sarve kṛtsnaśastānnibodhata .. 59.95 .. ### [1.59.97](https://indike.org/pramana/in.purana.vayu.1.59.97) bhṛguḥ kāvyaḥ pracetāstu dadhīco hyātmavānapi . aurvo'tha jamadagniśca divaḥ sārasvata stathā .. 59.96 .. ### [1.59.98](https://indike.org/pramana/in.purana.vayu.1.59.98) adviṣeṇa hyarūpaśca vītahavya sumedhasaḥ. vainyaḥ pṛthurdivodāsaḥ praśvāro gṛtsamānnabhaḥ. ekonaviṃśadityete ṛṣayo mantravādinaḥ .. 59.97 .. ### [1.59.99](https://indike.org/pramana/in.purana.vayu.1.59.99) aṅgirā vedhasaścaiva bhāradvājo'tha bāṣkaliḥ. tathāmṛtastathā gārgyaḥ śenī saṃhṛtireva ca .. 59.98 .. ### [1.59.100](https://indike.org/pramana/in.purana.vayu.1.59.100) purukutso'tha māndhātā ambarīṣastathaiva ca. āhāryothājamīḍhaśca ṛṣabho valireva ca .. 59.99 .. ### [1.59.101](https://indike.org/pramana/in.purana.vayu.1.59.101) pṛṣadaśvo virūpaśca kaṇvaścaivātha mudgalaḥ. yuvanāśvaḥ paurukutsastrasaddasyuḥ sadasyumān .. 59.100 .. ### [1.59.102](https://indike.org/pramana/in.purana.vayu.1.59.102) utathyaśca bharadvājastathā vājaśravā api . āyāpyaśca suvittiśca vāmadevastathaiva ca .. 59.101 .. ### [1.59.103](https://indike.org/pramana/in.purana.vayu.1.59.103) augajo bṛhadukthaśca ṛṣirdīrghatapāstathā. kakṣīvāṃśca trayastriṃśat smṛtā aṅgiraso varāḥ. ete mantrakṛtaḥ sarve kāśyapāṃstu nibodhata .. 59.102 .. ### [1.59.104](https://indike.org/pramana/in.purana.vayu.1.59.104) kāśyapaścaiva vatsāro vibhramo raibhya eva ca. asito devalaścaiva ṣaḍete brahmavādinaḥ .. 59.103 .. ### [1.59.105](https://indike.org/pramana/in.purana.vayu.1.59.105) atrirarccisanaścaiva śyāmāvāṃścātha niṣṭhuraḥ. valgūtako munirddhīmāṃstathā pūrvātithiśca yaḥ. ityete cātrayaḥ proktā mantrakārā maharṣayaḥ .. 59.104 .. ### [1.59.106](https://indike.org/pramana/in.purana.vayu.1.59.106) vasiṣṭhaścaiva śaktiśca tathaiva ca parāśaraḥ. caturtha indrapramatiḥ pañcamastu bharadvasuḥ .. 59.105 .. ### [1.59.107](https://indike.org/pramana/in.purana.vayu.1.59.107) ṣaṣṭhastu maitrāvaruṇāḥ kuṇḍinaḥ saptamastathā. sudyumnaścāṣṭamaścaiva navamo'tha bṛhaspatiḥ. daśamastu bharadvājau mantrabrāhmaṇakārakāḥ .. 59.106 .. ### [1.59.108](https://indike.org/pramana/in.purana.vayu.1.59.108) ete caiva hi kartāro vidharmadhvaṃsakāriṇaḥ. lakṣaṇaṃ brahmaṇaścaitadvihitaṃ sarvaśākhinām .. 59.107 .. ### [1.59.109](https://indike.org/pramana/in.purana.vayu.1.59.109) heturhiteḥ smṛto dhātoryannihantyuditamparaiḥ. atha vārthapari prāpterhinotergatikarmaṇaḥ .. 59.108 .. ### [1.59.110](https://indike.org/pramana/in.purana.vayu.1.59.110) tathā nirvacanaṃ brūyādvākyārthasyāvadhāraṇam . nindāṃ tāmāhurācāryā yaddoṣannindyate vacaḥ .. 59.109 .. ### [1.59.111](https://indike.org/pramana/in.purana.vayu.1.59.111) praṣūrvācchaṃsaterdhātoḥ praśasāṃ guṇavattayā. idantvidamidaṃ nedamityaniścitya saṃśayaḥ .. 59.110 .. ### [1.59.112](https://indike.org/pramana/in.purana.vayu.1.59.112) idameva vidhātavyamityayaṃ vidhirucyate . anyasyānyasya coktatvād‌budhaiḥ parakṛtiḥ smṛtā .. 59.111 .. ### [1.59.113](https://indike.org/pramana/in.purana.vayu.1.59.113) yo hyatyantataroktaśca purākalpaḥ sa ucyate. purāvikrāntavācitvāt purākalpasya kalpanā .. 59.112 .. ### [1.59.114](https://indike.org/pramana/in.purana.vayu.1.59.114) mantrabrāhmaṇakalpaistu nigamaiḥ śuddhavistaraiḥ . aniścitya kṛtāmāhurvyavadhāraṇakalpanām .. 59.113 .. ### [1.59.115](https://indike.org/pramana/in.purana.vayu.1.59.115) yathā hīdaṃ tathā tadvai idaṃ vāpi tathaiva tat. ityeṣa hyupadeśo'yaṃ daśamo brāhmaṇasya tu .. 59.114 .. ### [1.59.116](https://indike.org/pramana/in.purana.vayu.1.59.116) ityetadbrāhmaṇasyādau vihitaṃ lakṣaṇaṃ budhaḥ . tasya tadvṛttiruddiṣṭā vyākhyāpyanupadaṃ dvijaiḥ .. 59.115 .. ### [1.59.117](https://indike.org/pramana/in.purana.vayu.1.59.117) mantrāṇāṃ kalpanaṃ caiva vidhidṛṣṭeṣu karmasu. mantro mantrayaterdhātorbrāhmaṇo brahmaṇo'vanāt .. 59.116 .. ### [1.59.118](https://indike.org/pramana/in.purana.vayu.1.59.118) alpākṣaramasandigdhaṃ sāravadviśvatomukham. astobhamanavadyañca sūtraṃ sūtravido viduḥ .. 59.117 .. ### [1.59.119](https://indike.org/pramana/in.purana.vayu.1.59.119) iti śrīmahāpurāṇe vāyuprokte ṛṣilakṣaṇaṃ nāmonaṣaṣṭitamo'dhyāyaḥ .. 59 .. ## Linked texts (3) - [Brahmāṇḍapurāṇa](https://indike.org/pramana/in.purana.brahmanda.1.32.1) — Vyāsa, Sanskrit - [Matsyapurāṇa](https://indike.org/pramana/in.purana.matsya.145.11) — Vyāsa, Sanskrit - [Śivadharmaśāstra](https://indike.org/pramana/in.sampradaya.saiva.sivadharma.sivadharmasastra.11.113) — Sanskrit --- Source: [https://indike.org/pramana/in.purana.vayu.1.59](https://indike.org/pramana/in.purana.vayu.1.59) · Pramāṇa